Ча́сть в҃

Глава̀ пе́рвая

Ѡ҆ є҆́же блюсти́ся во всѣ́хъ ве́щехъ су́етнагѡ велехвале́нія.

Похвалѝ і҆ерⷭли́ме гдⷭа, хвалѝ бг҃а твоего̀ сіѡ́не (ѱало́мъ рм҃з), глаго́летъ прⷪро́къ. Никто́же досто́инъ похваля́емь и҆ прославля́емь во все́мъ бы́ти и҆́мать, то́чію є҆ди́нъ бг҃ъ вся̑ сотвори́вый, и҆́мже вся̑ бы́ша. Хвали́те (речѐ) гдⷭа всѝ ꙗ҆зы́цы, похвали́те є҆го̀ всѝ лю́діе (ѱало́мъ рѕ҃і). Хва́льно и҆ просла́влено и҆́мать бы́ти и҆́мя гдⷭне во вѣ́ки. и҆ па́ки: да не хва́лится прему́дрый въ му́дрости свое́й, ни бога́тый въ бога́тствѣ свое́мъ: но ѡ҆ се́мъ да хва́лится, хваля́йся, є҆́же разумѣ́ти и҆ зна́ти гдⷭа, и҆ твори́ти су́дъ и҆ пра́вду посредѣ̀ землѝ (а҃ Царⷭ: глⷡа в҃).

[в҃] Во всѣ́хъ ве́щехъ не похваля́йся са́мъ, ни ѡⷮ и҆ны́хъ похвалы̀ и҆щѝ, нижѐ похваля́ємымъ ѡⷮ когѡ̀ зави́ди, да не сугу́бую тщету̀ во ѻ҆бои́хъ пріи́меши, разсы́паніе и҆справле́ній, и҆ ѡ҆сужде́ніе за́висти. Не хваля́й бо себѐ, но є҆го́же бг҃ъ похва́литъ, то́й во все́мъ є҆́сть и҆ску́сенъ: хваля́йся бо, речѐ, ѡ҆ гдⷭѣ да хва́лится (в҃ Корі́н. заⷱ р҃ч): прославля́яйся, ѡ҆ гдⷭѣ да прославля́ется, є҆гѡ́же вся̑ су́ть. Не ѡⷮ человѣ̑къ въ чесо́мъ велехвали́мый, оѹ҆тѣше́нія ѡⷮ похва́лъ и҆щѝ: но въ бз҃ѣ вся̑ дарова́вшемъ и҆́стиннѡ взыску́й: человѣ́чєска бо вре́мєнна и҆ непостоя̑нна, бж҃ія же вѣ̑чна и҆ непрелѡ́жна. Тщи́ся ты̀ ѡ҆ сла́вѣ бж҃іей, ꙗ҆́кѡ да и҆ бг҃ъ просла́витъ тя̀. А҆́ще бо ѡ҆ сла́вѣ бж҃іей пещи́ся бу́деши, са́мъ тщесла́витися не восхо́щеши, и҆ бг҃ъ сама́го просла́витъ тя̀: а҆́ще же ты̀ бг҃а презрѣ́въ, ѡ҆ свои́хъ сѝ пещи́ся бу́деши, бг҃ъ ѡ҆ста́витъ тя̀.

[г҃] Не похваля́йся са́мъ, нижѐ похваля́ющихъ тя̀ въ сла́дость пріе́мли, да не восплаще́ніе свои́хъ бла̑гъ похвале́ніемъ человѣ́ческимъ здѣ̀ воспріи́меши: бл҃жа́щіи бо ва́съ лстя́тъ вы̀, и҆ стєзѝ но́гъ ва́шихъ возмуща́ютъ, гл҃етъ прⷪро́къ (И҆са́іи глⷡа г҃). Ѡⷮ похвалы́ бо роди́тся самолю́біе, ѡⷮ самолю́бія же горды́ня и҆ дме́ніе, та́же и҆ ѡⷮ бг҃а ѡⷮчужде́ніе. Лу́чше не содѣ́лати что̀ пресла́вно въ мі́рѣ, не́же содѣ́лавши безмѣ́рнѡ велехвали́тися. Фарісе́й бо пресла̑вная содѣ́лавъ, велехваля́йся возноше́ніемъ, поги́бе: мыта́рь же ничто́же бла́го содѣ́лавъ, смире́ніемъ спасе́ся. Ѻ҆́вому во благи́хъ є҆гѡ̀ ѡⷮ похвалы̀ ро́въ бы́сть: ѻ҆́вому же смире́нія ра́ди ѡⷮ ро́ва возведе́ніе. глаго́летъ бо: ꙗ҆́кѡ сни́де се́й ѡ҆правда́нъ въ до́мъ сво́й па́че ѻ҆́нагѡ (Лукѝ заⷱ п҃ѳ). Похвали́ся дв҃дъ и҆счита́ніемъ мно́жества люде́й, и҆ сме́ртную ка́знь въ лю́дехъ под̾я́тъ. Є҆зекі́а мно́жествомъ бога́тства пред̾ послы̀ вавѷлѡ́нскими похвали́ся, всегѡ̀ сокро́вища своегѡ̀ пострада̀. Посе́мъ навуходоно́соръ созида́ніемъ вавѷлѡ́на похвали́ся, со скоты̀ ꙗ҆́кѡ ско́тъ се́дмь лѣ́тъ траву̀ ꙗ҆дѐ.

[д҃] А҆́ще что̀ твори́ши бла́го, блюди́ся велехвале́нія: а҆́ще же похва́лишися, вся̑, ꙗ҆̀же и҆справле́ніемъ стяжа́лъ є҆сѝ, велехвале́ніемъ напра́снѡ погуби́ши, и҆ блгⷣти бж҃ія ѡⷮтщети́шися: ѡⷮ похвалы́ бо возноше́ніе, ѡⷮ возноше́нія же паде́ніе, паде́ніемъ же, ѡⷮ бг҃а ѡⷮлуче́ніе. Бг҃ъ вся̑ сотвори́вый, не та́кѡ ѡⷮ человѣ̑къ, ꙗ҆́кѡ подоба́етъ, и҆ прославля́емь и҆ велича́емь є҆́сть: ты́ же ничто́же ѡⷮ себѐ и҆мѣ́яй, безслове́снѡ ѡⷮ всѣ́хъ похваля́емь и҆ прославля́емь бы́ти хо́щеши. Не жела́й оѹ҆́бѡ себѣ̀ похвалы̀ ѡⷮ чл҃вѣ̑къ, нижѐ похваля́йся са́мъ, оѹ҆вѣ́сть бо бг҃ъ, оѹ҆вѣ́дятъ и҆ чл҃вѣ́цы, а҆́ще дѣла̀ твоя̀ бла̑га бу́дутъ, и҆ кромѣ̀ твоегѡ̀ велехвале́нія похва́лятъ тя̀. А҆́ще бо са́мъ велехвали́тися бу́деши, всѝ презря́тъ тя̀: а҆́ще же ты̀ са́мъ велехвали́тися не бу́деши, бг҃ъ и҆ всѝ человѣ́цы похва́лятъ тя̀. а҆́ще ѡ҆ себѣ̀ оѹ҆молчи́ши, бг҃ъ возгл҃етъ ѡ҆ тебѣ̀: а҆́ще же са́мъ ѡ҆ себѣ̀ велерѣ́чити бу́деши. бг҃ъ оѹ҆мо́лкнетъ ѡ҆ тебѣ̀, и҆ ѡⷮве́ржетъ тя̀.

[є҃] Не бу́ди ꙗ҆́коже ко́кошь, ѡ҆ ко́емлибо и҆справле́ніи велехваля́щися, да не по́мощи бж҃ія ѡⷮтщети́шися. ко́кошь бо ѡ҆ и҆знесе́ніи своегѡ̀ ꙗ҆ица̀, а҆́біе пред̾ всѣ́ми возглаша́етъ, и҆ велехваля́ся кда́четъ, ꙗ҆́кѡ и҆знесѐ ꙗ҆ицѐ: ты́ же не бу́ди та́кѡ безу́менъ, нижѐ пред̾ всѣ́ми и҆з̾явля́й своя̑ и҆справлє́нія, да не здѣ̀ себѣ̀ восплаще́ніе ѡⷮ человѣ̑къ воспріи́меши: но молча́ніемъ покрыва́й своя̀ и҆справлє́нія, да ѡⷮ бг҃а є҆ди́нагѡ оѹ҆вѣ̑дана и҆ похвалє́на бу́дутъ. А҆́ще бо ты̀ са́мъ похваля́ешися, ѡⷮ бг҃а похвале́нъ не бу́деши. а҆́ще ты́ са́мъ велехва́лишися, никто́же ѡⷮ человѣ̑къ похва́литъ тя̀: а҆́ще ли нѝ, всѝ оѹ҆блажа́тъ тя̀. ѻ҆ба́че лу́чше тѝ є҆́сть, да и҆ні́и похва́лятъ тя̀, не́же ты̀ са́мъ безслове́снѡ похва́лишися. Не хвали́ся во оѹ҆́треннихъ, не вѣ́си бо что̀ роди́тъ находя́й [де́нь:] да хва́литъ тя̀ и҆́скренній тво́й, а҆ не твоя̀ оѹ҆ста̀, глаго́летъ соломѡ́нъ (При́тчей к҃з).

[ѕ҃] Дѣ́йство є҆́сть ве́ліе твоегѡ̀ неразу́мія, ꙗ҆́кѡ своя̀ безчи́слєнная ѕла̑я ни є҆ди́ному ѡⷮ человѣ̑къ ѡⷮкры́ти и҆ ꙗ҆ви́ти и҆зволя́еши: а҆́ще же бу́детъ и҆ ма́ло что̀ благо́е, всѣ̑мъ ра́достнѡ ѡⷮкрыва́еши, всѣ̑мъ жела́тельнѡ ꙗ҆ви́ти, и҆ ѡⷮ всѣ́хъ похваля́емь и҆ прославля́емь бы́ти хо́щеши, ꙗ҆́кѡ да ѡⷮ всѣ́хъ го́рдостнагѡ тщесла́вія наслади́шися. Почто̀ оѹ҆́бѡ ты̀ тре́буеши оѹ҆тѣше́нія ѡⷮ похва́лъ человѣ́ческихъ; Дово́льно тѝ є҆́сть на се́мъ, а҆́ще дѣла̀ твоя̑ ѡⷮ бг҃а є҆ди́нагѡ вѣ́дѡма и҆ благопрія̑тна бу́дутъ. Тѣ́мже не похваля́йся са́мъ, но ѡⷮ гдⷭа є҆ди́нагѡ похвалы̀ ѡ҆жида́й: не похваля́яй бо себѐ ни въ че́мже, во все́мъ є҆́сть прему́дръ: безслове́снѡ же въ че́мъ велехваля́йся: во все́мъ є҆́сть безу́менъ. безслове́сенъ є҆́сть се́й и҆ неразу́менъ ѕѣлѡ̀, и҆́же чужде́ю, а҆ не свое́ю ри́зою похваля́ется, и҆лѝ въ чужде́мъ бога́тствѣ, а҆ не во свое́мъ полага́етъ своѐ оѹ҆пова́ніе, си́це и҆ въ тебѣ̀ сіѐ.

[з҃] И҆ні́и мно́жество и҆спра́виша добродѣ́телей: расточи́ша и҆мѣ̑нія, ѡ҆ста́виша бога̑тства, содѣ́яша пресла̑вная, просвѣти́ша мі́ръ, оѹ҆мудри́ша чл҃вѣ́ки, мно́гихъ ду́шы спасо́ша, и҆ не похваля́хуся: ты́ же ни ма́ло что̀ бла́го сотво́рь, нижѐ ма́ло что̀ благоуго́дно содѣ́явъ, ѡ҆ ничесо́мже безслове́снѡ велехва́лишися. Не похваля́йся оѹ҆́бѡ ты̀ са́мъ, но а҆́ще бг҃ъ похва́литъ тя̀, сему̀ внемлѝ. а҆́ще бо что̀ бу́детъ бла́го, и҆ кромѣ̀ твоегѡ̀ велехвале́нія бг҃ъ оѹ҆вѣ́сть: а҆́ще є҆му̀ є҆́сть оѹ҆го́дно, и҆ не хотя́щу тѝ просла́витъ тя̀: просла́витъ оѹ҆́бѡ ѻ҆́нъ, и҆ не пре́зритъ ни є҆ди́нагѡ без̾ ве́ліягѡ возме́здія. А҆́ще бо ты̀ са́мъ похваля́тися бу́деши, ра́зума лиши́шися, и҆ ѡⷮ бг҃а похвале́нъ не бу́деши.

[и҃] Не похваля́йся ни въ че́мже, нижѐ глаго́ли, ꙗ҆́кѡ бога́тъ є҆́смь, и҆ всѣ́ми благи́ми ѡ҆богати́хся, и҆ ничто́же тре́бую, но не вѣ́си, ꙗ҆́кѡ ты́ є҆си ѻ҆кая́ненъ, ни́щъ, и҆ мні́й, и҆ слѣ́пъ, и҆ на́гъ, глаго́летъ та̑инъ ви́децъ (А҆покал. глⷡа г҃). Сегѡ̀ ра́ди, є҆гда̀ и҆ вся̑ сотворитѐ повелѣ̑нная ва́мъ, гл҃ите: ꙗ҆́кѡ рабѝ непротре́бни є҆смы̀, є҆́же до́лжни бѣ́хомъ сотвори́ти, сотвори́хомъ, гл҃етъ гдⷭь (Лукѝ заⷱ п҃д). Вся́ка бо пра́вда человѣ́ческая пред̾ гдⷭемъ, ꙗ҆́кѡ ру́бъ пове́рженный є҆́сть на гно́ищи, гл҃етъ прⷪро́къ (И҆са́іи глⷡа з҃). Вѣ́мъ бо ꙗ҆́кѡ ни ты̀ чл҃вѣ̑къ велехваля́щихся лю́биши, є҆гда̀ кто̀ пред̾ тобо́ю велича́яйся похваля́ется: си́це нижѐ бг҃ъ: ты́ же ничто́же ѡⷮ себѐ и҆мѣ́яй, соплета́я себѣ̀ похвалу̀ пред̾ и҆нѣ́ми, и҆ вся̑ себѣ̀ причита́я велехва́лишися. Но не на́мъ, гдⷭи, не на́мъ, но и҆́мени твоему̀ да́ждь сла́ву, глаго́летъ прⷪро́къ (ѱало́мъ рг҃і). Хвали́ся ты̀ ѡ҆ бз҃ѣ, и҆ бг҃ъ восхва́лится ѡ҆ тебѣ̀: возлюбѝ ты̀ бг҃а, и҆ бг҃ъ возлю́битъ тебѐ: а҆́ще ты̀, своя̑ си взыску́я, пре́зриши бг҃а, и҆ бг҃ъ пре́зритъ тя̀, и҆ ѡⷮри́нетъ тя̀.

[ѳ҃] Что̀ хва́лишися во ѕло́бѣ си́льне, глаго́летъ прⷪро́къ (ѱало́мъ н҃а); Почто̀ тре́буеши ѡⷮ и҆ны́хъ во бл҃ги́хъ похвалы̀; и҆ са́мъ бо ты̀ вѣ́си, ꙗ҆́кѡ бла́го є҆́сть. бл҃го́е бо благи̑мъ є҆́сть всегда̀, а҆́ще и҆ ни ѡⷮ є҆ди́нагѡ є҆́сть похваля́емо: ѕло́е же ѕлы̑мъ, а҆́ще и҆ ни ѡⷮ є҆ди́нагѡ є҆́сть ху́лимо. А҆́ще тебѐ и҆ всѝ человѣ́цы похваля́ютъ, что́ ти ѡⷮ сегѡ̀ прибу́детъ: а҆́ще ни є҆ди́нъ, въ че́мъ ѡⷮтщети́шися; а҆́ще и҆ ни ѡⷮ є҆ди́нагѡ во благо́мъ похвале́нъ бы́лъ бы є҆сѝ, ѡⷮ бг҃а же сама́гѡ є҆гда̀ похвале́нъ бу́деши, довлѣ́етъ тѝ. Ѡⷮ человѣ̑къ хвали́му бы́ти ничто́же є҆́сть: не бо̀ человѣ̑къ ра́ди и҆́маши что̀ твори́ти благо́е, но бг҃а ра́ди. Сегѡ̀ ра́ди не ѡⷮ человѣ̑къ, но ѡⷮ бг҃а є҆ди́нагѡ похвалы̀ и҆ возвыше́нія и҆щѝ, да во вѣ́ки ѡⷮ негѡ̀ похвале́нъ и҆ просла́вленъ бу́деши, и҆ возме́здіе вѣ́чное ѡⷮ негѡ̀ пріи́меши.

[і҃] Тѣ́мже во благополу́чіи и҆ почита́ніи, не ѕѣлѡ̀ велехвали́ся, въ презрѣ́ніи же въ развраще́ніе и҆ въ неча́яніе не впа́дай, но во ѻ҆бои́хъ мѣ́ренъ и҆ благоразу́менъ пребу́ди. Є҆гда́ ти є҆́сть что̀ бла́го и҆ ра́достно, не безслове́снѣ похваля́яся весели́ся: є҆гда́ же что̀ ѕло̀ приключи́тся, не безпа́мятнѡ ско́рбію себѐ снѣда́й. Вѣ́къ бо се́й настоя́щій оѹ҆до́бь премѣни́теленъ є҆́сть, и҆ вся̑ вє́щи въ не́мъ превра́тны: но бг҃у ѡ҆ всѣ́хъ ве́щехъ славосло́віе и҆ бл҃годаре́ніе приносѝ, и҆ є҆му̀ вся̑ причита́й, да и҆ ѻ҆́нъ тебѣ̀ вся̑ своя̑ привмѣни́тъ, и҆ вѣ́чный живо́тъ пода́стъ.