Ча́сть в҃

Глава̀ втора́я

Ѡ҆ є҆́же не ѕѣлѡ̀ оѹ҆тѣша́тися ѡ҆ почита́ніи и҆ сла́вѣ человѣ́честѣй, прелє́стна бо су́ть.

Не жела́й, человѣ́че, почита́емь и҆ сла́вимь бы́ти ѡⷮ человѣ̑къ, да не бжⷭтвенныя сла́вы ѡⷮтщети́шися: не ѕѣлѡ̀ оѹ҆тѣша́йся ѡ҆ сла́вѣ сегѡ̀ мі́ра, да не внеза́пу безче́стіемъ ѡ҆горче́нъ бу́деши: по сла́вѣ бо и҆ по почита́ніи человѣ́честѣмъ а҆́біе послѣ́довати ѡ҆бы́че безче́стіе, по благополуче́ніи земно́мъ, тщета̀: по весе́ліи и҆ оѹ҆тѣше́ніи плотстѣ́мъ, ско́рбь и҆ печа́ль: и҆змѣни́теленъ бо є҆́сть вѣ́къ се́й, и҆ вся̑ вє́щи въ не́мъ преходя́щыя су́ть. за благополуче́ніемъ бо и҆змѣне́ніе и҆ небл҃гополуче́ніе всегда̀ созадѝ въ слѣ́дъ ше́ствуетъ.

[в҃] Не прилага́й срⷣца своегѡ̀ къ почита́нію и҆ сла́вѣ человѣ́честѣй, ле́стна бо є҆́сть, и҆ маловре́менна: ничто́же є҆́сть и҆звѣ́стно въ мі́рѣ, то́чію є҆ди́нъ бг҃ъ, и҆ є҆гѡ̀ предвѣ́чная сла́ва: вся̑ бо въ мі́рѣ се́мъ премѣня́ются, и҆ вся́кое почита́ніе и҆ сла́ва съ ни́мъ прехо́дитъ. Сегѡ̀ ра́ди не оѹ҆твержда́й стопы̀ ногѝ твоея̀ на си́хъ, да не ꙗ҆́кѡ на леду̀ весе́нномъ ѡ҆бта́явши прельще́нъ ѡ҆ста́нешися тогда̀, є҆гда́ ко́е є҆́сть тѝ благополуче́ніе.

[г҃] Не самолю́бствуй, нижѐ ѕѣлѡ̀ весели́ся ѡ҆ почита́ніи и҆ велича́ніи сегѡ̀ мі́ра: ꙗ҆́кѡ да посе́мъ и҆ ѡ҆ безче́стіи є҆гѡ̀ не на мно́зѣ ѡ҆печа́лишися. не ѕѣлѡ̀ оѹ҆твержда́йся ѡ҆ почита́ніи є҆гѡ̀, а҆́біе бо внеза́пу послѣ́дуетъ є҆му̀ и҆змѣне́ніе: почита́ніе бо и҆ сла́ва человѣ́ческа подо́бна є҆́сть ѻ҆́гненной и҆́скрѣ, внеза́пу блисну́вшей и҆ а҆́біе оѹ҆га́сшей: и҆лѝ го́вору водно́му во мгнове́ніи ѻ҆́ка возне́сшемуся и҆ а҆́біе разсѣ́дшуся. Тѣ́мже не ѕѣлѡ̀ оѹ҆тѣша́йся ѡ҆ си́хъ: оѹ҆тѣша́яйбося безслове́снѡ ѡ҆ почита́ніи и҆ благополуче́ніи сегѡ̀ мі́ра, вѣ́ждь, ꙗ҆́кѡ посе́мъ внеза́пу ѡ҆ и҆змѣне́ніи си́хъ безпа́мятнѡ скорбѣ́ти и҆́маши.

[д҃] Не пребыва́етъ никогда́же во є҆ди́ной мѣ́рѣ сла́ва и҆ почита́ніе человѣ́ческое: но ꙗ҆́кѡ луна̀ непреста́ннѡ и҆змѣня́ется. сегѡ̀ ра́ди не ѕѣлѡ̀ оѹ҆тѣша́йся ѡ҆ почита́ніи и҆ благополуче́ніи сегѡ̀ мі́ра преходя́щагѡ: а҆́біе бо въ слѣ́дъ є҆гѡ̀ ше́ствуетъ внеза́пное и҆змѣне́ніе. мі́ръ се́й непостоя́ненъ є҆́сть, и҆ вся̑ вє́щи въ не́мъ премѣни́тельны: дне́сь бо сла́ва и҆ почита́ніе, и҆ а҆́біе внеза́пу безче́стіе: дне́сь весе́ліе и҆ ра́дость, и҆ а҆́біе внеза́пу ско́рбь и҆ печа́ль: дне́сь здра́віе, и҆ а҆́біе неду́гъ: дне́сь живо́тъ, и҆ а҆́біе сме́рть: и҆̀хже мі́ръ мно́гажды мно́гими почита́ньми и҆ преле́стнѡ ѡ҆богати́лъ, си́хъ внеза́пу сме́рть ѡ҆бнажѝ.

[є҃] Не надыма́йся срⷣцемъ въ горды́ни свое́й, нижѐ велича́йся ѡ҆ чл҃вѣ́ческомъ предпочита́ніи, мня̀ себѐ вели́ка бы́ти: но ꙗ҆́кѡ сѡ́нная мечта̑нія, сія̑ бы́ти вмѣня́й. Нѣ́сть бо постоя́нно почита́ніе человѣ́ческое, но ѕѣлѡ̀ превра́тно. Почто́ша і҆уде́є вѣ́твьми и҆ ва́іами гдⷭа, и҆ а҆́біе ѡ҆плева́ша є҆го̀ (І҆ѡа́н. заⷱ м҃а): предпочто́ша вма́лѣ, и҆ а҆́біе внеза́пу ѡ҆безче́стиша є҆го̀. Є҆ди́ни почита́ху друзі́и же Крⷭтъ на пропя́тіе гото́вяху: преклоня́ху пред̾ ни́мъ кѡлѣ́на, и҆ а҆́біе по лани́тѣ є҆го̀ оѹ҆даря́ху. приглаго́лаху: ра́дуйся цр҃ю̀ і҆уде́йскій: и҆ а҆́біе терно́вый вѣне́цъ не пречи́стую главу̀ возлага́ху (І҆ѡа́н. заⷱ н҃ѳ). Сицево̀ є҆́сть почита́ніе и҆ сла́ва чл҃вѣ́ческая. Почте́нъ бы́сть ца́рь дв҃дъ чре́зъ самуи́ла на ца́рствіе пома́заніемъ: и҆ а҆́біе сау́ломъ гони́мь бя́ше (а҃ Царⷭ глⷡа ѕ҃і). Почте́нъ бы́сть ѡⷮ царя̀ а҆ртаѯе́рѯа па́че всѣ́хъ князе́й а҆ма́нъ, и҆ а҆́біе повѣ́шенъ бы́сть (Є҆сѳіⷬ глⷡа з҃), внеза́пное є҆́сть и҆змѣне́ніе бл҃гополуче́ніе и҆ прочита́ніе чл҃ческое.

[ѕ҃] Ѕлохи́тростенъ є҆́сть мі́ръ, и҆ є҆гѡ̀ почита̑нія: є҆гда́ бо человѣ́къ въ благоде́нствіи є҆́сть, всѝ почита́ютъ и҆ сла́вятъ є҆го̀: є҆гда́ же въ презрѣ́ніи, всѝ ѡⷮвраща́ются. Є҆гда̀ во благополу́чіи, мно́жество другѡ́въ и҆ ласка́телей: є҆гда́ же въ ѕлострада́ніи, всѝ дале́че ѡⷮстоя́тъ. А҆пⷭли, є҆гда̀ хрⷭто́съ ѡⷮ всѣ́хъ почита́емь и҆ чуди́мь бя́ше, всѝ въ слѣ́дъ є҆гѡ̀ ше́ствоваху, є҆гда́ же ѕлостражда́ше всѝ є҆го̀ ѡ҆ста́вльше, дале́че бѣжа́ша. Тѣ́мже не надѣ́йся на бл҃гополуче́ніе и҆ почита́ніе человѣ́ческое, но на бг҃а всю̀ наде́жду и҆ оѹ҆пова́ніе своѐ возлага́й: де́нь и҆ но́щь къ нему̀ є҆ди́ному срⷣцемъ и҆ оѹ҆мо́мъ всегда̀ возвыша́йся.

[з҃] Предпочита́ніе и҆ сла́ва человѣ́ческа, за благополуче́ніемъ, ꙗ҆́коже сѣ́нь за со́лнцемъ ше́ствуетъ: є҆гда̀ со́лнце сія́етъ, тогда̀ и҆ сѣ́нь ѡ҆брѣта́ется: є҆гда́ же и҆зни́че, тогда̀ и҆ сѣ́нь погиба́етъ. си́це и҆ є҆гда̀ є҆́сть кому̀ благополуче́ніе, всѝ человѣ́цы сла́вятъ и҆ почита́ютъ: є҆гда́ же лише́ніе, всѝ презира́ютъ и҆ нерадя́тъ ѡ҆ не́мъ. Оѹ҆подо́бися по́льному же́лтому цвѣ́ту и҆́же съ восхожде́ніемъ со́лнца ѡⷮ восто́ка развива́ется, со захожде́ніемъ же па́ки къ за́паду согиба́ется, и҆ никогда́же во є҆ди́ной мѣ́рѣ стои́тъ: си́це и҆ мі́ръ се́й со нра́вы и почита́ньми свои́ми.

[и҃] Предпочита́ютъ оѹ҆́бѡ мно́гажды, и҆ сла́вятъ человѣ́цы пред̾ ѻ҆чи́ма сла́достнѣ, ѡⷮше́дше же посе́мъ клеве́щутъ, и҆ ѡ҆глаго́луютъ го́рестнѣ. Дне́сь дѡ́брая глаго́лютъ, и҆ а҆́біе оѹ҆́трѡ ѕла̑я: пред̾ ѻ҆чи́ма си́це, за ѻ҆чи́ма же и҆́накѡ. Нѣ́сть постоя́нно, но премѣ́нно почита́ніе человѣ́ческо, ѕѣлѡ́ же преле́стно и҆ превра́тно. Є҆ди́ни почита́ютъ, друзі́и же безче́стятъ: є҆ди́ни похваля́ютъ, друзі́и же ху́лятъ: є҆ди́ни дѡ́брая вѣща́ютъ, друзі́и же ѕла̑я. нѣ́сть мо́щно пребы́ти неподви́жнѡ, въ ра́внѣй мѣ́рѣ человѣ́ческія сла́вы же и҆ почита́нія, но всегда̀ въ премѣ́нѣ.

[ѳ҃] Мі́ръ се́й съ почита́ньми свои́ми при́снѡ ѡ҆браща́теленъ оѹ҆стро́енъ є҆́сть, ꙗ҆́коже ко́ло млиново́е[1]: всегда̀ ѡⷮ горы̀ ни́зу, и҆ ѡⷮ ни́зу горѣ̀ непреста́ннѡ ѡ҆браща́ется: є҆гда́ же преста́нетъ вода̀ тещѝ, тогда̀ и҆ ѻ҆но̀ ѡ҆стае́тъ пра́здно. Мі́ръ се́й всегда̀ лицемѣ́рствуетъ: вя́щшая бо ѡⷮ вѣ́трѡвъ и҆ бу́ри премѣ́на на высотѣ̀ почита́нія стоя́щымъ, не́же во оѹ҆до́ли смире́нія и҆ презрѣ́нія ше́ствующымъ. Є҆ли́кѡ бо вели́ко почита́ніе, толи́кѡ вя́щшая боя́знь, є҆ли́кѡ кто̀ развели́чится почита́ніемъ и҆ сла́вою, толи́кѡ посе́мъ смири́тся безче́стіемъ, и҆лѝ здѣ̀ ѡⷮ чл҃вѣ̑къ, и҆лѝ ѻ҆на́мѡ ѡⷮ бѣсѡ́въ. є҆ли́кѡ, речѐ, развели́чися и҆ разсвирѣ́пѣ почита́ніемъ и҆ сла́вою, толи́кѡ дади́те є҆́й ра̑нъ и҆ безче́стія (А҆покал. глⷡа и҃і).

[і҃] Тѣ́мже, по є҆ли́ку почита́емь є҆сѝ, по толи́ку и҆ недосто́йна себѐ творѝ почита́нія: да пребыва́етъ въ душѝ твое́й всегда́шнее смире́ніе. Па́мятствуй сме́рть, ꙗ҆́кѡ не зри́тъ на са́ны и҆ почита̑нія, но всѣ́хъ ра́внѡ сравня́етъ. Гдѣ́ бо дне́сь сла́вимый, бога́тый и҆ почита́емый; гдѣ̀ кня́зи и҆ госпо́діе; гдѣ̀ віті́и и҆ прему́дріи вѣ́ка сегѡ̀; гдѣ̀ си́льніи и҆ хра́бріи и҆ му́жественніи; гдѣ̀ мно́гими страна́ми и҆ земля́ми ѡ҆блада́вшіи; ма́лъ гро́бъ вмѣстѝ и҆̀хъ дне́сь. Гдѣ̀ прекра́сніи и҆ благолѣ́піемъ лица̀ цвѣту́щіи; ѡⷮидо́ша, ꙗ҆́кѡ никогда́же бы́ша: и҆змѣни́шася, ни слѣ́да почита́нія и҆ сла́вы ѡ҆ста́виша.