Ча́сть в҃
Глава̀ тре́тія
Ѡ҆ є҆́же не горди́тися ни є҆ди́ною ве́щію въ вѣ́цѣ се́мъ.
Не бу́ди го́рдъ и҆ велича́въ, да не оѹ҆подо́бишися бѣсѡ́мъ, не возноси́ся срⷣцемъ, да не сравне́нъ съ ни́ми бу́деши: но бу́ди кро́токъ и҆ смире́нъ, да ѡⷮ гдⷭа сама́гѡ возвыше́нъ бу́деши, и҆ а҆́гг҃лѡмъ соедини́шися. На кого́ бо воззрю̀, но на кро́ткаго, смире́ннаго и҆ трепе́щущаго мои́хъ слове́съ, гл҃етъ гдⷭь; си́мъ бо то́чію наипа́че ра́зни су́ть бѣ́сове ѡⷮ а҆́гг҃лѡвъ, си́мъ и҆ ѡⷮ бг҃а ѡⷮпадо́ша, є҆́же не пребы́ти и҆̀мъ смирє́ннымъ, и҆ благопокори̑вымъ: ничто́же бо та́кѡ, не то́чію оѹ҆ бг҃а, но и҆ оѹ҆ человѣ̑къ ме́рзостно є҆́сть, ꙗ҆́коже возвыше́ніе и҆ горды́ня: нижѐ си́це что̀ любе́зно и҆ прія́тно, ꙗ҆́коже кро́тость и҆ смире́ніе.
[в҃] Смире́нный и҆ кро́ткій всегда̀ є҆́сть ми́ренъ, гордели́въ же и҆ велича́въ всегда̀ є҆́сть мяте́женъ и҆ смуще́нъ. Гдⷭь наставля́етъ крѡ́ткія на су́дъ, и҆ науча́етъ смирє́нныя путє́мъ свои̑мъ, глаго́летъ прⷪро́къ (ѱало́мъ к҃д). Го́рдыхъ расточа́етъ гдⷭь мы́слію срⷣца, смире́нныхъ же и҆ є҆диномы́сленныхъ вселя́етъ въ до́мъ своея̀ бл҃года́ти. Благопокорли́въ бу́ди, да оѹ҆подо́бишися а҆́гг҃лѡмъ. не горди́ся и҆ над̾ ма́лымъ ки́мъ, да не и҆ са́мъ ѡⷮ бг҃а ѡⷮринове́нъ бу́деши: не возвыша́йся ни є҆ди́ною ве́щію, да не ни́зу попо́лзшися вся̑ ѕла̑я постра́ждеши. Паде́тъ бо го́рдый и҆ сокруши́тся, и҆ не бу́детъ возставля́яй є҆го̀, глаго́летъ прⷪро́къ (І҆ерем. глⷡа и҃). Не ходѝ въ вели́кихъ, нижѐ въ ди́вныхъ па́че тебѐ, да не ѡⷮ бг҃а оѹ҆стра́ншися, въ сѣ́техъ лови́теля врага̀ ѡ҆ста́неши (ѱало́мъ р҃л).
[г҃] Ѡⷮ безу́мія и҆ душе́вныя слѣпоты̀ ражда́ется горды́ня: ѡⷮ ра́зума же и҆ позна́нія смире́ніе. А҆́ще бы себѐ и҆́стиннѡ позна́лъ є҆сѝ, не бы̀ гордели́въ бы́лъ є҆сѝ: и҆ а҆́ще себѐ и҆́стиннѡ позна́еши, горди́тися не бу́деши: но поне́же є҆щѐ себѐ до́брѣ не зна́еши, нижѐ, ꙗ҆́кѡ подоба́етъ, разумѣ́еши. Сегѡ̀ ра́ди и҆ ма́лою ве́щію, и҆лѝ па́че ѡ҆ ничесо́мже безслове́снѡ горди́шися: но оѹ҆́бѡ позна́й себѐ, го́рдъ и҆ высокоу́менъ сы́й: гдⷭь бо гѡ́рдымъ проти́вится, смирє́ннымъ же дае́тъ бл҃года́ть, глаго́летъ соломѡ́нъ (При́т. глⷡа г҃). Пріе́млетъ крѡ́ткія гдⷭь, смиря́етъ же грѣ̑шныя гѡ́рдыя до землѝ: возно́ситъ смирє́нныя, снижа́етъ же гѡ́рдыя: пріе́млетъ смире́ннагѡ и҆ ма̑лая, ѡⷮмета́етъ же го́рдагѡ и҆ вели̑кая: прія́тъ мытаря̀ смире́ннагѡ є҆ди́но воздыха́ніе, фарісе́а же го́рдагѡ мнѡ́гія добродѣ́тєли ѡⷮве́рже. Лу́чше грѣ́шникъ смире́нъ пред̾ бг҃омъ, не́же пра́ведникъ гордели́въ: ме́рзокъ бо є҆́сть пред̾ бг҃омъ вся́къ высокосе́рдый, глаго́летъ соломѡ́нъ (При́т. глⷡа ѕ҃і).
[д҃] Вездѣ̀ бг҃ъ ѡⷮме́щетъ гѡ́рдыя, пріе́млетъ же крѡ́ткія: низлага́етъ си̑льныя со престѡ́лъ и҆ возно́ситъ смирє́нныя: а҆́лчущыя и҆сполня́етъ бла̑гъ, и҆ богатя́щыяся ѡⷮпуща́етъ тщы̀. И҆збра̀ гдⷭь смирє́нныя а҆пⷭлы, гѡ́рдыя же ѡⷮве́рже фарісе́и: ѡⷮри́ну прему́дрыя філосо́фы, и҆збра́ же препрѡ́стыя ры́бари: ѡⷮве́рже благорѡ́дныя и҆ вели́кія кня́зи, и҆збра́ же смирє́нныя, і҆ѡ́сифа древодѣ́ля, и҆ прест҃у́ю дв҃у мт҃рь оѹ҆бо́гую. тѣ́мже ѡ҆ прароди́тельномъ бл҃горо́діи никто́же горди́ся, вѣ́дя, ꙗ҆́кѡ всѝ є҆ди́наго и҆́мамы по бз҃ѣ пра́ѻц҃а а҆да́ма, пра́хъ же и҆ пе́пелъ наслѣ́діе на́ше. ѡⷮ земли́ бо взя́ти є҆смы̀, въ зе́млю же па́ки по́йдемъ. Не возно́симся є҆ди́нъ на друга́го: всѣ́хъ бо на́съ земля̀ ра́внѣ сравни́тъ, и҆ кому́ждо да́стъ оѹ҆ча́стіе своѐ.
[є҃] А҆́ще и҆ старѣ́йшина є҆сѝ са́номъ, не бу́ди го́рдъ, да не и҆ повину́ющихся тебѣ̀ горды́ни и҆ дме́нію научи́ши: како́въ бо ста́рѣй є҆́сть, таковѝ и҆ повину́ющіися бы́ти ѡ҆быко́ша. Старѣ́йшій па́че всѣ́хъ чл҃вѣ̑къ, па́че же всея̀ тва́ри, гдⷭь, ѻ҆́бразъ тебѣ̀ собо́ю смире́нія показа̀: пріе́мъ ле́нтіонъ, но́ги оѹ҆ченикѡ́мъ оѹ҆мы̀ (І҆ѡа́н. заⷱ м҃д). зра́къ раба̀ пріи́мъ, смири́лъ себѐ, бы́сть послушли́въ да́же до сме́рти, сме́рти же кре́стныя (Філіп. заⷱ с҃м), ꙗ҆́кѡ да и҆ мы̀ такова̀ є҆го̀ зря́ще смиря́емся. Не горди́ся ни є҆ди́ною ве́щію въ мі́рѣ се́мъ: вся̑ бо здѣ̀ ѡ҆ста́нутъ, вся̑ въ пра́хъ и҆ пе́пелъ премѣня́тся, ты́ же та́мѡ са́мъ є҆ди́нъ по́йдеши, и҆дѣ́же зрѣ́ти не бу́дутъ на са́ны и҆ вели̑чества, но ко́ждо по дѣлѡ́мъ свои́мъ ѡⷮ гдⷭа воспріи́метъ.
[ѕ҃] Да не возно́сишися вре́меннымъ са́на почте́ніемъ вре́мененъ бо є҆́сть: нижѐ да горди́шися старѣ́йшинства вели́чествомъ, и҆змѣня́емо бо є҆́сть. не ѡⷮе́млетъ са́нъ є҆стества̀, нижѐ и҆змѣня́етъ старѣ́йшинство человѣ́чества: и҆ старѣ́йшій бо то́йжде человѣ́къ, ꙗ҆́коже и҆ про́чіи: та́яжде тля̀ и҆ пе́пелъ, ꙗ҆́коже и҆ и҆ні́и. Ничто́же вя́щше и҆́мать старѣ́йшій па́че малѣ́йшагѡ, то́чію вре́менное са́номъ почте́ніе. Сегѡ̀ ра́ди сла́ва твоя̀ и҆ по́честь старѣ́йшинства да не прилага́етъ тѝ велича́нія и҆ горды́ни: но па́че да ѕѣлѡ̀ смиря́етъ тя̀: є҆ли́кѡ бо, речѐ, вели́къ є҆сѝ, толи́кѡ смиря́йся, да ѡ҆бря́щеши пред̾ гдⷭемъ бл҃года́ть, глаго́летъ сіра́хъ (Сіраⷯ. глⷡа г҃). дана̀ тебѣ̀ є҆́сть до вре́мене сія̀ по́честь ра́ди и҆справле́нія и҆нѣ́хъ, и҆ чи́на ѻ҆бы́чнагѡ человѣ́ческагѡ, а҆ не ꙗ҆́кѡ да си́мъ возно́сишися, и҆ велича́ешися. Нѣ́сть оѹ҆́бѡ ѡ҆ чесо́мъ воздыма́тися старѣ́йшинствомъ: вся́ка бо ве́щь су́щая и҆змѣня́ющаяся є҆́сть: є҆́сть бо су́щая, ꙗ҆́кѡ не су́щая, быва́ющая, ꙗ҆́кѡ не быва́ющая.
[з҃] Не ту́не да́нный тѝ є҆́сть са́нъ и҆ вре́менное сегѡ̀ мі́ра почита́ніе, но да почита́нію твоему̀ и҆ сла́вѣ пока́жеши ра̑вная во смире́ніи и҆справлє́нія и҆ добродѣ́тєли. Па́мятствуй твоегѡ̀ старѣ́йшинства кончи́ну, и҆ сла́вы твоея̀ внеза́пное и҆змѣне́ніе, и҆ никогда́же прельсти́шися, нижѐ въ почита́ніи и҆ сла́вѣ человѣ́ческой оѹ҆пова́ніе своѐ полага́ти бу́деши: ничто́же бо и҆́но су́ть сія̑, то́чію сна̀ неизвѣ́стнѣе, и҆ ле́да весе́ннагѡ преле́стнѣе. не ту́не дре́вніи любому́дрцы и҆збра́вше старѣ́йшину, и҆ вѣнце́мъ ца́рскимъ вѣнча́юще, запаля́ху ле́нъ, и҆ вы́спрь ме́щуще приглаго́лаху: та́кѡ сла́ва человѣ́ча вско́рѣ оѹ҆гаса́етъ, ꙗ҆́коже ле́нъ къ горѣ̀ вы́спрь ве́рженный и҆ блисну́вшій, и҆ а҆́біе до́лу па́дшій, и҆ внеза́пу оѹ҆га́сшій.
[и҃] Ца́ріе, кня́зи и҆ велмѡ́жи да не велича́ются свои́мъ вели́чествомъ: ничто́же бо помо́жетъ са́нъ и҆ вели́чество во вре́мя сме́рти: па́че же вя́щшую тяготу̀ сотвори́тъ, да не глаго́летъ кто̀, а҆́зъ є҆́смь благоро́денъ, се́й же худоро́денъ: а҆́зъ є҆́смь бога́тъ, се́й же оѹ҆бо́гъ: сме́рть бо кого́ждо ра́внѣ смири́тъ на́съ, и҆ ѡⷮи́метъ вся́ко ра́знствіе. Во гро́бѣ не познаю́тся ѡ҆бнажє́нныя кѡ́сти, кто̀ бѣ̀ благоро́денъ, и҆лѝ худоро́денъ, кто̀ ни́щъ, и҆лѝ бога́тъ, кто̀ сла́венъ, и҆лѝ несла́венъ. Сегѡ̀ ра́ди да не возно́сится кто̀ сла́вою, сокро́вищемъ, и҆ ко́имълибо бога́тствомъ: ничто́же бо взе́мше, на́зи та́мѡ всѝ по́йдемъ: ничто́же при на́съ ѡ҆ста́нетъ, то́чію и҆справлє́нія на́шя, ꙗ҆̀же въ житіѝ се́мъ содѣ́яхомъ.
[ѳ҃] Почто̀, человѣ́че, всу́е горди́тися и҆́маши въ тлѣ́нной пло́ти; ничто́же бо досто́йно го́рдости и҆ возноше́нія въ себѣ̀ ѡ҆бря́щеши: ѡⷮ землѝ взя́тъ є҆сѝ, въ зе́млю же па́ки по́йдеши. Ѡⷮ ничесогѡ̀ сотворе́нъ є҆сѝ, нижѐ па́ки вѣ́си, ка́мѡ ѡ҆брати́шися, и҆ ку́ю ча́сть получи́ши: тѣ́мже не горди́ся сла́вою, прехо́дитъ бо: ни бога́тствомъ, и҆счеза́етъ бо: ни благоро́діемъ плотски́мъ, вси́ бо є҆смы̀ тля̀ и҆ пе́пелъ: ни си́лою, ни прему́дростію, нижѐ красото́ю пло́ти: нѣ́сть бо сіѐ ѡⷮ тебѐ: нижѐ чи́мъ и҆́нымъ: ничто́же бо и҆́маши своѐ, но вся̑ су́ть бж҃ія. А҆́ще бо ра́зумомъ и҆ прему́дростію горди́тися восхо́щеши, но бг҃ъ ю҆̀ дадѐ: а҆́ще си́лою и҆ красото́ю пло́ти, но бг҃ъ вся̑ оѹ҆стро́и: а҆́ще и҆мѣ́ніемъ и҆лѝ бога́тствомъ, но бг҃ъ всѐ дарова̀: а҆́ще благоро́діемъ, но всѝ є҆смы̀ земля̀ и҆ пе́пелъ: а҆́ще са́на вели́чествомъ, но бг҃ъ є҆́сть содержа́й вся̑: а҆́ще ко́имъ либо добродѣ́тельнымъ и҆справле́ніемъ, но бг҃ъ помо́же, и҆ оѹ҆стро́и и҆ оѹ҆крѣпѝ. Вся̑ бж҃ія су́ть, а҆ не на́ша: не и҆́маши чи́мъ взима́тися, нижѐ над̾ и҆ны́ми горди́тися, но па́че всѣ́хъ худѣ́йша себѐ да вмѣня́еши. Бг҃у вся̑ своя̑ привмѣня́й, да съ ни́мъ во все́мъ соедине́нъ бу́деши: съ бг҃омъ бо вся̑ твоя̑ бу́дутъ, без̾ бг҃а же всегѡ̀ чу́ждь є҆сѝ.
[і҃] Го́рдый не пра́вымъ путе́мъ и҆ не просты́мъ ше́ствуетъ но стро́потнымъ, те́рнія и҆ волчца̀ и҆спо́лненнымъ. Го́рдіи законопреступова́ху до ѕѣла̀, и҆ ѡⷮ зако́на твоегѡ̀ оѹ҆клони́шася, глаго́летъ прⷪро́къ (ѱало́мъ ри҃і). Са́мое сіѐ и҆́стое преступле́ніе, и҆ оѹ҆клоне́ніе ѡⷮ зако́на безслове́сное, въ непозна́ніи своея̀ не́мощи, возгордѣ́ніе є҆́сть. не чре́зъ и҆́но что̀ та́кѡ быва́етъ преступле́ніе и҆ паде́ніе, ꙗ҆́коже чре́зъ горды́ню: ни въ чу́вство чре́зъ и҆́но что̀ быва́етъ сицево̀ и҆справле́ніе, ꙗ҆́коже чре́зъ смире́ніе и҆ простоту̀. И҆дѣ́же содѣ́яся поде́ніе, та́мѡ вся̑ предвари́ша. Горды́ни ра́ди сатанаи́лъ съ нб҃сѐ све́рженъ бы́сть. Фарісе́й вся̑ добродѣ́тєли разсы́па. Навуходоно́соръ ца́рствія ѡⷮпадѐ, и҆ со скоты̀, ꙗ҆́кѡ ско́тъ се́дмь лѣ́тъ траву̀ ꙗ҆дѐ: и҆ ты́сяща ты́сящей падє́нія горды́ни ра́ди и҆сполне́ніе пріе́млютъ. тѣ́мже пребу́ди смире́нъ, да бл҃года́тію бж҃іею покрыва́емь и҆ сохраня́емь всегда̀ бу́деши без̾ вся́кагѡ поро́ка, и҆ без̾ преткнове́нія ѡ҆бря́щешися.