Ѡ҆ є҆́же то́чію ѡ҆ є҆ди́номъ гдⷭѣ ра́доватися подоба́етъ, а҆ не ѡ҆ тлѣ́нныхъ мі́ра сегѡ̀ ве́щехъ.

Ра́досте моя̀, и҆зба́ви мя̀ ѡⷮ ѡ҆быше́дшихъ мя̀, гл҃етъ прⷪро́къ (ѱало́мъ л҃а з҃), ꙗ҆́коже є҆гда̀ а҆́гг҃лъ къ тѡві́и гл҃аше: Ра́дуйся, речѐ тѡві́е, ра́дость тебѣ̀ всегда̀ да бу́детъ. Тѡві́а къ а҆́гг҃лу ѡⷮвѣща̀: Ка́я ра́дость мнѣ̀ бу́детъ, ꙗ҆́кѡ во тмѣ̀ сѣжу̀, свѣ́та небесѐ не ви́жду; (Тѡві҃ глⷡа є҃) Что̀ оѹ҆́бѡ за ра́дость и҆́мать бы́ти душѣ̀, во оѹ҆до́лѣ се́мъ плаче́внѣмъ, въ те́мныхъ и҆ сѣ́ни сме́ртнѣй, въ безслове́сныхъ наслѣ́діяхъ сѣдя̀, ничто́же и҆́но надѣ́яся, то́чію сме́рти, то́чію ѡⷮсю́ду разлуче́нія, то́чію безвѣ́стныя кончи́ны; Ка́я бо ра́дость и҆́мать бы́ти, въ ско́рби и҆ го́рести су́щему; Ко́е весе́ліе во тмѣ̀ сѣдя́щему; Ка́я прохла́да во оѹ҆́захъ ѡ҆брѣта́ющемуся; Ко́е оѹ҆тѣше́ніе го́рестныя сме́рти надѣ́ющемуся; Нико́еяже. Чи́мъ оѹ҆тѣ́шитися хо́щеши; Сла́вою ли мі́ра сегѡ̀ оѹ҆до́бь и҆счеза́ющею; И҆мѣ́ніемъ ли, и҆лѝ бога́тствомъ, вско́рѣ погиба́ющимъ; Сластьми́ ли, и҆лѝ похотьмѝ плотски́ми, въ смра́дъ и҆ гно́й ѡ҆браща́ющимися; Благолѣ́піемъ ли, и҆лѝ красото́ю пло́ти, оѹ҆до́бь тлѣ́емою, въ пра́хъ и҆ пе́пелъ прелага́емою; Не и҆́маши, человѣ́че, чи́мъ оѹ҆тѣ́шитися въ вѣ́цѣ се́мъ плаче́вномъ, но па́че пла́кати и҆ рыда́ти досто́итъ тѝ. Не во ѻ҆те́чествѣ бо сѣди́ши, но во и҆згна́ніи: не въ ми́рѣ и҆ поко́и, но въ борбѣ̀ ѕѣ́льныхъ ра́тей: не въ ра́дости и҆ весе́ліи, но во оѹ҆до́ли се́мъ плаче́вномъ. Кто̀ весели́тся, въ долга́хъ сы́й; Кто̀ оѹ҆тѣша́ется, въ темни́цѣ сѣдя̀; Кто̀ ра́дуется, сме́рти надѣ́яся; Никто́же. Мі́ръ бо се́й и҆спо́лненъ є҆́сть пла́ча, а҆ не весе́лія: ско́рби и҆ печа́ли, а҆ не ра́дости: тя́жести и҆ го́рести, а҆ не оѹ҆тѣше́нія: ничто́же въ не́мъ є҆́сть постоя́нно и҆ непрело́жно. Ра́дость є҆гѡ̀ смѣ́шена съ ско́рбію, весе́ліе съ печа́лію, сла́ва прело́жна, бога́тство и҆счеза́емо, красота̀ въ пра́хъ и҆ пе́пелъ прелага́ема, наслажде́ніе плотско́е въ смра́дъ и҆ гно́й претворя́емо. Послѣди́ же сія̑ вся̑ внеза́пною сме́ртію пресѣка́ются, и҆ скончева́ются. Ничто́же є҆́сть въ вѣ́цѣ се́мъ досто́йно ра́дости и҆ весе́лія, ничто́же досто́йно оѹ҆тѣше́нія и҆ благомы́слія: но вся̑ пла́ча и҆ рыда́нія и҆спо́лнєна: суета̀ су́етствъ вѣ́къ человѣ́ческій. Роди́тся оѹ҆́бѡ человѣ́къ ѡⷮ тлѝ, расте́тъ въ болѣ́знехъ и҆ неду́зѣ: и҆знуря́етъ же жи́знь свою̀ въ ско́рбѣхъ и҆ печа́лѣхъ, въ молвѣ̀, въ бу́рѣ и҆ безвѣ́стіи, и҆ вся́комъ непостоя́нствѣ: ѡⷮвсю́ду бо бѣды̑, ѡⷮвсю́ду навѣ̑тницы, ѡⷮвсю́ду гони́тели, ѡⷮвсю́ду ра́тницы и҆ сопротивобо́рцы, ѡⷮвсю́ду борбы̑ и҆ недоумѣ́ніе, ѡⷮвсю́ду боя́знь и҆ страхова́ніе: ѡⷮвсю́ду нѣ́сть ми́ра и҆ поко́я. Ве́сь мі́ръ и҆спо́лненъ бѣды̀ и҆ немирова́нія: и҆дѣ́же ѡ҆брати́шися, всю́ду борбу̀ и҆ ра́ть оѹ҆́зриши. Ѡⷮсю́ду ра́туетъ ѡ҆б̾яде́ніе, ѡⷮѻну́ду же пія́нство: ѡⷮсю́ду лѣ́ность, ѡⷮѻну́дуже нечу́вствіе: ѡⷮсю́ду по́хоть, ѡⷮѻну́дуже скве́рное раче́ніе: ѡⷮвсю́ду стра́хъ, ѡⷮвсю́ду грѣ́хъ и҆ преступле́ніе, ѡⷮвсю́ду небезбоя́знство: нѣ́сть ѡ҆ чесо́мъ ра́доватися во вѣ́цѣ се́мъ многоплаче́вномъ. Но па́ки пріи́детъ же сме́рть, пріи́детъ ѡⷮвсю́ду разлуче́ніе, пріи́детъ внеза́пное всѣ́хъ и҆змѣне́ніе: душа́ же по́йдетъ во и҆́нъ вѣ́къ, и҆ пріи́метъ ꙗ҆̀же здѣ̀ содѣ́я: а҆ пло́ть ѡ҆ста́нется че́рвію въ снѣде́ніе, въ смра́дъ и҆ гно́й ѡ҆брати́тся: ничто́же въ не́мъ є҆́сть ра́достно. Сегѡ̀ ра́ди не ра́дуйся ни ѡ҆ чесо́мже вре́менномъ въ вѣ́цѣ се́мъ плаче́вномъ: поне́же всѐ въ не́мъ непостоя́нно и҆ превра́тно, всѐ въ не́мъ ло́жно є҆́сть и҆ премѣ́нно. Но а҆́ще хо́щеши оѹ҆тѣ́шитися, ѡ҆ гдⷭѣ є҆ди́номъ оѹ҆тѣша́йся: а҆́ще хо́щеши ра́доватися, ѡ҆ гдⷭѣ є҆ди́номъ ра́дуйся: ра́дость бо плотска́я вско́рѣ погиба́етъ, ѡ҆ гдⷭѣ же ра́дость пребыва́етъ во вѣ́ки. Оѹ҆тѣше́ніе земно́е внеза́пу и҆счеза́етъ, и҆ въ го́ресть ѡ҆браща́ется: оѹ҆тѣше́ніе же прⷭта́гѡ дх҃а, ѡ҆ гдⷭѣ прⷭнѡ оѹ҆тѣша́етъ, и҆ во вѣ́ки вѣ́чныя оѹ҆тѣша́ти бу́детъ оѹ҆тѣше́ніемъ неизрече́ннымъ. Сегѡ̀ ра́ди ни ѡ҆ чесо́мъ и҆́номъ, но ѡ҆ гдⷭѣ ра́дуйся: Ра́дуйтеся бо ѡ҆ гдⷭѣ всѝ пра́віи срⷣцемъ, гл҃етъ прⷪро́къ (ѱало́мъ л҃а). и҆ па́ки а҆пⷭлъ: Всегда̀ [речѐ] ѡ҆ гдⷭѣ ра́дуйтеся, непреста́ннѡ моли́теся, ѡ҆ все́мъ благодари́те: (Солуⷩ заⷱ сѻ҃г) въ си́хъ бо тріе́хъ спасе́ніе на́ше быва́етъ. Ни ѡ҆ чесо́мъ и҆́номъ, то́чію ѡ҆ гдⷭѣ ра́дуйся: вся́ка бо ра́дость, а҆́ще не ѡ҆ гдⷭѣ, ло́жь є҆́сть, пре́лесть є҆́сть: вся́ко оѹ҆тѣше́ніе, а҆́ще не ѡ҆ бз҃ѣ, тя́жесть є҆́сть, и҆ смуще́ніе душѝ. Тѣ́мже не ѡ҆ пи́щи и҆ питіѝ, не ѡ҆ бога́тствѣ и҆ сла́вѣ мі́ра сегѡ̀ ра́дуйся, нижѐ ѡ҆ ко́ихъ красота́хъ, и҆ безслове́сныхъ по́хотехъ, но ѡ҆ гдⷭѣ ра́дуйся, ѡ҆ бз҃ѣ є҆ди́номъ весе́ліемъ весели́ся: въ си́хъ бо вре́менныхъ ра́дости и҆́стинныя нѣ́сть, то́чію ло́жная, вре́менная, безслове́сная. Во тмѣ́ бо свѣ́та нѣ́сть, въ сме́рти жи́зни не ѡ҆бря́щеши, во лжѣ̀ пра́вда не ꙗ҆ви́тся. Ра́дость мі́ра сегѡ̀ ло́жна, оѹ҆тѣше́ніе є҆гѡ̀ премѣ́нно, весе́ліе оѹ҆до́бь прелага́емо. Въ ма́лѣ ра́дость и҆ оѹ҆тѣше́ніе, а҆́біе внеза́пу пла́чь и҆ рыда́ніе: є҆щѐ оѹ҆тѣше́ніе є҆гѡ̀ не пре́йде, и҆ а҆́біе оѹ҆жѐ ско́рбь и҆ печа́ль пости́же. Тогѡ̀ ра́ди ѡ҆ гдⷭѣ є҆ди́номъ ра́достію ра́дуйся, и҆ весе́ліемъ весели́ся. Ра́дуйся ѡ҆ гдⷭѣ бз҃ѣ, ꙗ҆́кѡ бг҃ъ тво́й, бг҃ъ ве́лій є҆́сть, вѣ́чный, безсме́ртный, всемогі́й, вседержи́тель, бг҃ъ ще́дръ, млⷭтивъ, првⷣнъ, чл҃вѣколюби́въ и҆ премлⷭрдъ: ѻ҆ц҃ъ щедро́тъ, бг҃ъ вся́кія оѹ҆тѣ́хи. Є҆гѡ̀ є҆́сть нб҃о и҆ земля̀, го́ры, хо́лми, древеса̀, дубра̑вы: є҆гѡ̀ ѕвѣ́ріе, ско́ти, га́ди, пти̑цы перна́ты: є҆гѡ̀ вся́кое дыха́ніе и҆ вся̀ тва́рь, ви̑димая и҆ неви̑димая, ꙗ҆̀же на нб҃сѝ и҆ на землѝ: є҆гѡ̀ со́лнце и҆ мѣ́сяцъ, ѕвѣ́зды, и҆ вся̑ стіхі́я нбⷭная: є҆гѡ̀ во́ды, рѣ́ки, моря̀, є҆зе́ра, и҆сто́чницы, гра́ды, снѣ́зи, дожде́ве, вѣ́тры, гро́мове, мо́лнія: є҆гѡ̀ всѝ человѣ́цы, всѝ ро́ди земноро́дніи: є҆гѡ̀ а҆́гг҃ли, а҆рха́гг҃ли, прⷭто́ли, гдⷭьствія, херуві́ми и҆ серафі́ми, и҆ вся̑ нбⷭныя си̑лы. Та́мѡ пра́вда, та́мѡ су́дъ нелицемѣ́ренъ: та́мѡ бл҃гость и҆ чл҃вѣколю́біе: та́мѡ прему́дрость и҆ и҆сто́чникъ ра́зума: та́мѡ тишина̀, поко́й, безбоя́знство и҆ безпеча́ліе: та́мѡ сла́ва, бога́тство, сокро́вище, и҆ вѣ́чное наслажде́ніе: та́мѡ ра́дость, весе́ліе, свѣ́тъ, ѡ҆заре́ніе, красота̀, благолѣ́піе, сла́дость и҆ вся́кое оѹ҆тѣше́ніе: та́мѡ свобо́да, простра́нство, ѻ҆би́ліе и҆ вѣ́къ непремѣ́нный. А҆́ще что̀ то́чію въ человѣ́цѣхъ люби́мо, та́мѡ всѐ є҆́сть: то́чію ко гдⷭу бг҃у твоему̀ все́ю душе́ю твое́ю прилѣпи́ся, и҆ ѡ҆ не́мъ є҆ди́нѣмъ ра́достію ра́дуйся, и҆ весе́ліемъ весели́ся. Ра́дуйся ѡ҆ гдⷭѣ, и҆ благодаре́ніе є҆му̀ приносѝ: ꙗ҆́кѡ сотвори́ тя по ѻ҆́бразу и҆ по подо́бію своему̀, ѡⷮ небытія̀ въ бытіе́ тя, сла́вою и҆ че́стію тя̀ вѣнча̀: не сотвори́ тя ѕвѣ́ремъ, и҆ ни ки́томъ, ни и҆́нымъ ко́имъ живо́тнымъ, но человѣ́комъ, разу́мною тва́рію, безсме́ртіемъ и҆ самовла́стіемъ ду́шу твою̀ почтѐ. А҆́ще и҆ разлуча́емся вре́меннѡ пло́тію, но на лу́чшее преселе́ніе прехо́димъ, душе́ю же пребыва́емъ во вѣ́ки: не на ты́сящу и҆лѝ двѣ̀, и҆лѝ трѝ ты́сящи лѣ́тъ, но во вѣ́ки вѣ́чныя, конца̀ не и҆му́щыя. Ра́дуйся ѡ҆ гдⷭѣ, и҆ благодаре́ніе є҆му̀ приносѝ, ꙗ҆́кѡ вся̑ тебѐ ра́ди ту́не сотворѝ: тебѐ ра́ди нб҃о и҆ зе́млю, со́лнце и҆ луну̀, и҆ всѐ ѕвѣ́здное нбⷭное оѹ҆краше́ніе сотворѝ: тебѐ ра́ди ѕвѣ́ри, ско́ти, пти̑цы перна́ты, и҆ вся́ко живо́тно: тебѐ ра́ди моря̀, рѣ́ки, и҆сто́чники, є҆зе́ра, ры̑бы разли̑чныя, ки́ты превели́кія: тебѐ ра́ди лѣ́сы, дубра̑вы, пусты̑ни разли̑чныя: тебѐ ра́ди ви̑димая и҆ неви̑димая сотворє́на су́ть. Ра́дуйся ѡ҆ гдⷭѣ, и҆ благодаре́ніе є҆му̀ приносѝ, ꙗ҆́кѡ вся̑ ѡ҆ тебѣ̀ пра́веднѣ и҆ млⷭрднѣ оѹ҆стро́и, и҆ непреста́ннѡ промышля́етъ ѡ҆ душѝ твое́й: защища́етъ тя̀, сохраня́етъ тя̀, покрыва́етъ тя̀, заступа́етъ ду́шу твою̀, да́руетъ тѝ крѣ́пость, здра́віе, живи́тъ тя̀, вразумля́етъ тя̀, просвѣща́етъ тя̀ на вся́ка дѣла̀ бла́га, вся̑ пра́вєдная и҆ премлⷭрдная ѡ҆ тебѣ̀ дѣ́етъ. Ра́дуйся ѡ҆ гдⷭѣ, и҆ благодаре́ніе є҆му̀ приносѝ, ꙗ҆́кѡ ѻ҆́нъ бг҃ъ всеси́льный, пребога́тый, тебѐ ра́ди ѡ҆бнища̀, тебѐ ра́ди чл҃вѣ́къ бы́сть, да тебѐ соедини́тъ себѣ̀ во є҆ди́но: не возгнуша́ся на ся̀ взя́ти на̑ша, да на́мъ всего̀ себѐ ѡⷮда́стъ. Тебѐ ра́ди въ ꙗ҆́слѣхъ положе́нъ бы́сть: тебѐ ра́ди пелена́ми пови́тъ бы́сть, ѡ҆дѣва́я нб҃о ѻ҆́блаки: тебѐ ра́ди ѻ҆смодне́венъ ѡ҆брѣ́занъ бы́сть: тебѐ ра́ди бѣжа̀ во є҆гѵ́петъ: тебѐ ра́ди во і҆ѻрда́нѣ крⷭти́ся: тебѐ ра́ди главу̀ предте́чи приклонѝ, да тебѐ вознесе́тъ горѣ̀, не тре́буя кр҃ще́нія крⷭти́ся, да тебѣ̀ кр҃ще́ніемъ ѡ҆чище́ніе пода́стъ. Ра́дуйся ѡ҆ гдⷭѣ, и҆ благодаре́ніе є҆му̀ приносѝ, ꙗ҆́кѡ тебѐ ра́ди біе́нъ, безче́щенъ, и҆ ѡ҆плева́нъ, зауше́нъ, свя́занъ, терно́вымъ вѣнце́мъ оѹ҆я́звенъ бы́сть. Тебѐ ра́ди ру́цѣ своѝ на крⷭтѣ̀ пригвоздѝ, ѻ҆́цта и҆ же́лчи вкусѝ, копіе́мъ въ пречⷭтое своѐ ребро̀ прободе́нъ бы́сть: тебѐ ра́ди кро́вь свою̀ пречⷭтую и҆злія̀, кро́вію свое́ю и҆скупѝ: тебѐ ра́ди во гро́бѣ положе́нъ бы́сть: тебѐ ра́ди тридне́внѣ и҆з̾ гро́ба воскр҃се, да всѣ̑мъ на́мъ и҆з̾ гро́ба воскр҃се́ніе да́руетъ. Ра́дуйся ѡ҆ гдⷭѣ, и҆ благодаре́ніе є҆му̀ приносѝ, ꙗ҆́кѡ а҆́ще и҆ тма́ми тє́мъ пред̾ бг҃омъ согрѣша́еши, млⷭтивнѣ пріе́млетъ тя̀ ка́ющагося. Коли́кѡ пред̾ ни́мъ согрѣша́еши, ѻ҆́нъ же є҆дина́че не ѡⷮмета́етъ тя̀: коли́кѡ ты̀ преступа́еши, ѻ҆́нъ же не ѡⷮвраща́ется: коли́кѡ ты̀ па́даеши, ѻ҆́нъ же возставля́етъ тя̀, долготерпи́тъ тѝ не а҆́біе сме́рти тя̀ предае́тъ, но ѡ҆жида́етъ ѡ҆браще́нія твоегѡ̀, да́же до кончи́ны, когда̀ ты̀ ѡ҆брати́шися: дадѐ тебѣ̀ зако́нъ, и҆ вѣ́дѣніе во́ли своея̀: не ѡⷮри́ну тя̀ кр҃ще́нія, не ѡ҆ста́ви тя̀ во и҆новѣ́рствѣ, и҆лѝ па́губной є҆́реси погруже́нну бы́ти. Ра́дуйся ѡ҆ гдⷭѣ, и҆ благодаре́ніе є҆му̀ приносѝ, ꙗ҆́кѡ ма́лагѡ ра́ди нѣ́коегѡ бл҃гоугожде́нія, жи́знь вѣ́чную, црⷭтво нбⷭное ѡ҆бѣща̀ да́ти. Са́мъ сотвори́вый, са́мъ созда́вый, и҆ вся̑ ко благоугожде́нію да́вый, жи́знь вѣ́чную да́руетъ: не на вре́мя нѣ́кое ма́ло, не на вре́мя нѣ́кое кра́тко, не на сто̀ лѣ́тъ, и҆лѝ ты́сящу, и҆лѝ ты́сящъ ты́сящей, но во вѣ́ки вѣ́чныя, конца̀ не и҆му́щыя. Сла́ва неисповѣди́мому є҆гѡ̀ млⷭрдію, сла́ва прему́дрому є҆гѡ̀ оѹ҆строе́нію, сла́ва неизрече́нной и҆ непостижи́мой є҆гѡ̀ бл҃гости и҆ человѣколю́бію! Ꙗ҆́кѡ тому̀ подоба́етъ вся́кая сла́ва, че́сть и҆ держа́ва, со безнача́льнымъ ѻ҆ц҃е́мъ, и҆ съ прест҃ы́мъ и҆ бл҃ги́мъ, и҆ животворя́щимъ дх҃омъ, ны́нѣ и҆ прⷭнѡ, и҆ во вѣ́ки вѣкѡ́въ, а҆ми́нь.