Ча́сть в҃

Глава̀ четве́ртая

Ѡ҆ є҆́же во все́мъ всегда̀ смиря́тися пред̾ бг҃омъ и҆ человѣ́ки.

Пріиди́те ко мнѣ̀ всѝ тружда́ющіися и҆ ѡ҆бремене́нніи, и҆ а҆́зъ оѹ҆поко́ю вы̀: возми́те и҆́го моѐ на себѐ, и҆ научи́теся ѡⷮ менѐ, ꙗ҆́кѡ кро́токъ є҆́смь и҆ смире́нъ се́рдцемъ (Матѳ. заⷱ м҃г), но не го́рдости и҆ возноше́нія и҆́го: и҆ ѡ҆бря́щете поко́й душа́мъ ва́шымъ. Нигдѣ́же ѡ҆бря́щеши поко́я, то́чію въ смире́ніи, нижѐ смуще́нія, то́чію въ горды́ни. А҆́ще хо́щеши и҆мѣ́ти поко́й и҆ тишину̀, бу́ди смире́нъ: а҆́ще ли нѝ, въ молвѣ̀ и҆ мяте́жи: въ ско́рби же и҆ печа́ли и҆знури́ши жи́знь свою̀, и҆ кромѣ̀ паде́нія, никогда́же ѡ҆бря́щешися. бу́ди под̾ всѣ́ми смиря́яся, ꙗ҆́кѡ да ѡⷮ гдⷭа возвыше́нъ бу́деши. Ма́лѡ на се́мъ ꙗ҆́кѡ ты̀ са́мъ возвыша́тися бу́деши, а҆ не бг҃ъ возвыша́етъ тя̀. и҆́бо твоѐ возвыше́ніе, ѡⷮ бг҃а є҆́сть ѡⷮпаде́ніе: бж҃іе же возвыше́ніе во бл҃года́ти є҆гѡ̀ є҆́сть. А҆́ще ты̀ возвыша́тися бу́деши, бг҃ъ сни́зитъ тя̀: а҆́ще снижа́тися бу́деши, бг҃ъ возвы́ситъ тя̀, ѻ҆ба́че а҆́ще и҆ бг҃ъ возвыша́лъ бы тя̀, ты́ же є҆дина́че смире́нъ бу́ди, ꙗ҆́кѡ да во вѣ́ки ѡⷮ гдⷭа возвыше́нъ ѡ҆бря́щешися. Смири́теся бо пред̾ гдⷭемъ, и҆ вознесе́тъ вы̀, глаго́летъ а҆пⷭлъ (І҆а́кѡⷡ заⷱ н҃ѕ).

[в҃] Па́мятствуй смире́нія ѻ҆́бразъ: свою́ бо пло́ть ѡⷮ землѝ взя́лъ є҆сѝ, въ зе́млю же па́ки по́йдеши. Ѡⷮ небытія̀ въ бытіѐ приведе́нъ є҆сѝ, и҆ па́ки безвѣ́стно є҆́сть, ка́мѡ ѡ҆брати́шися, и҆ ѡⷮ бг҃а ка́мѡ оѹ҆стро́енъ бу́деши. Са́мъ себѐ въ бытіѐ не приве́лъ є҆сѝ, нижѐ вѣ́си, ка́мѡ ѡⷮ бытія̀ сегѡ̀ вре́меннагѡ пресели́шися: тѣ́мже бу́ди смире́нъ, да съ проро́комъ сіѐ при́снѡ гл҃еши: гдⷭи, не вознесе́ся се́рдце моѐ, нижѐ вознесо́стѣся ѻ҆́чи моѝ: ни ходи́хъ въ вели́кихъ, нижѐ въ ди́вныхъ, па́че менѐ (ѱало́мъ р҃л): и҆ па́ки: а҆́зъ є҆́смь че́рвь, а҆ не человѣ́къ, поноше́ніе человѣ́кѡвъ, и҆ оѹ҆ничиже́ніе люде́й, ꙗ҆́коже глаго́летъ прⷪро́къ (ѱало́мъ к҃а): ка́кѡ бо ты̀ не и҆́маши бы́ти смире́нъ, ничто́же ѡⷮ себѐ и҆мѣ́я; ка́кѡ и҆́маши возвыша́тися, ничто́же собо́ю, кромѣ̀ по́мощи бж҃ія, благоуго́дно содѣ́яти могі́й; Си́це смире́нъ бу́ди, ꙗ҆́коже смире́нъ ѡⷮ бг҃а сотворе́нъ є҆сѝ. Бг҃ъ смире́нна тя̀ сотворѝ, ты́ же возно́сишися: ничто́же тебѣ̀ кромѣ̀ себѐ что̀ благоуго́дно содѣ́яти попустѝ, ты́ же вся̑ себѣ̀ причита́еши, и҆ ѡ҆ себѣ̀ возно́сишися. Что̀ и҆́маши, є҆́же не прія́лъ є҆сѝ; а҆́ще же прія́лъ є҆сѝ, что̀ хва́лишися, ꙗ҆́кѡ не пріе́мь, глаго́летъ а҆пⷭлъ (а҃ Корі́н. заⷱ р҃л);

[г҃] Бу́ди смире́ннѡ мы́сля, смире́ннѡ глаго́ля, смире́ннѡ му́дрствуя, смире́ннѡ вся̑ дѣ́я, ꙗ҆́кѡ да безпреткнове́нъ во всѣ́хъ стезя́хъ ѡ҆бря́щешися. Па́мять, пло́ть и҆ душа̀ ѡⷮку́ду взя́стася; кто̀ сія̑ сотворѝ, и҆ ка́мѡ па́ки по́йдутъ; но себѐ вну́трь оѹ҆ви́ждь, ꙗ҆́кѡ ве́сь тля̀ є҆сѝ. Вни́кни вну́трь и҆ позна́й, ꙗ҆́кѡ вся̑ су́ть въ тебѣ̀ су́єтна: ничто́же є҆сѝ кромѣ̀ бл҃года́ти гдⷭни, то́чію тро́сть пра́здна, дре́во непло́дно, трава̀ и҆зсо́хшая въ сожже́ніе ѻ҆гню̀, ру́бъ пове́рженъ на гно́ищи, де́лвь грѣхо́вна, всѣ̑мъ сквє́рнымъ и҆ безсловє́снымъ страсте́мъ вмѣсти́лище преиз̾ѻби́льно, и҆ и҆спо́лненъ вся́кагѡ беззако́нія сосу́дъ. Не и҆́маши ѡⷮ себѐ ничто́же бла́го, ничто́же благоуго́дно, то́чію грѣ́хъ и҆ преступле́ніе: нижѐ во́зрасту своему̀ приложи́ти мо́жеши ла́коть є҆ди́нъ, нижѐ сотвори́ти бѣ́ла и҆лѝ че́рна вла́са (Матѳ. заⷱ д҃і).

[д҃] Не возноси́ся са́номъ, а҆́ще и҆́маши є҆го̀, нижѐ старѣ́йшинства вели́чествомъ: не на са́ны бо та́мѡ зрѣ́ти бу́дутъ, но на добродѣ́тєльная и҆справлє́нія: не на велича́ніе и҆ горды́ню и҆ благоплемє́нства, но на кро́тость и҆ смире́ніе. не въ горды́ни бо и҆ велича́ніи, но во смире́ніи на́шемъ помяну́лъ ны̀ є҆́сть гдⷭь, и҆ и҆зба́вилъ ны̀ є҆́сть ѡⷮ вра̑гъ на́шихъ, глаго́летъ прⷪро́къ (ѱало́мъ рл҃є): ѡ҆бря́щутся бо мно́жайшіи, здѣ̀ несла́вни, та́мѡ сла́вни: здѣ̀ безче́стни, та́мѡ че́стни: сла́вни же и҆ че́стни здѣ̀, та́мѡ въ вели́цѣмъ безче́стіи бу́дутъ: благоро́дніи мі́ра сегѡ̀ ѡⷮве́ржени, худоро́дніи же прія́ти: го́рдіи и҆ бога́тіи въ гее́ннѣ, ни́щіи же въ небе́сномъ ца́рствіи: вознося́щіися съ бѣ́сы, смире́нніи же съ гдⷭемъ: не сицево́ бо та́мѡ лицемѣ́ріе, ꙗ҆́коже здѣ̀: премѣни́тъ бо та́мѡ кого́ждо гдⷭь, и҆ поста́витъ вся̑ въ свое́мъ пра́веднѣмъ и҆ нелицемѣ́рнѣмъ мѣ́рилѣ. тѣ́мже ни є҆ди́ною ве́щію возноси́ся, но во все́мъ всегда̀ смире́нъ бу́ди, смирє́нная гонѝ, смирє́нная му́дрствуй, ꙗ҆́кѡ да ѡⷮ гдⷭа сама́гѡ возвыше́нъ бу́деши.

[є҃] Є҆ли́кѡ тѝ є҆́сть вели́къ са́нъ, толи́ко и҆́мать бы́ти и҆ смире́ніе: є҆ли́кѡ вели́ко почита́ніе, толи́ко и҆́мать бы́ти и҆ себѐ во смире́ніи презрѣ́ніе: є҆ли́кѡ человѣ́цы возно́сятъ тя̀, толи́кѡ смире́нъ бу́ди: є҆ли́кѡ почита́ютъ и҆ сла́вятъ, толи́кѡ безче́стна себѐ бы́ти вмѣня́й: не возвыша́йся ко́имлибо и҆справле́ніемъ, да не ѡⷮве́рженъ ѡⷮ бг҃а бу́деши: не помышля́й, нижѐ глаго́ли, ꙗ҆́кѡ сіѐ и҆спра́вихъ, и҆спра́вихъ ѻ҆́но, да не вся̑ твоя̑ пред̾ ѻ҆чи́ма твои́ма внеза́пу разсы́плются. А҆́ще бы что̀ и҆спра́вилъ є҆сѝ бл҃го́е, глаго́ли, ꙗ҆́кѡ не а҆́зъ, но благода́ть гдⷭня со мно́ю: не та́кѡ бо во и҆справле́ніи на́шемъ спасе́ніе на́ше є҆́сть, ꙗ҆́коже въ ми́лости хрⷭто́вѣ: є҆́же бо что̀ хо́щетъ, пріи́метъ бг҃ъ, а҆ є҆́же не хо́щетъ, ѡⷮве́ржетъ: бг҃у вся̑ причита́й, ꙗ҆́кѡ да и҆ ѻ҆́нъ вся̑ своя̑ тебѣ̀ привмѣни́тъ, и҆ во все́мъ тѝ бу́детъ ско́рый помо́щникъ. Не жела́й старѣ́йшинства, нижѐ ко́ея че́сти на землѝ, нижѐ че́стна и҆ досто́йна себѐ во все́мъ бы́ти разумѣ́й, но па́че всѣ́хъ худѣ́йша себѐ бы́ти вмѣня́й, Тогда́ бо че́стенъ и҆ досто́инъ бу́деши, є҆гда̀ безче́стна себѐ бы́ти возмни́ши: тогда̀ вели́къ бу́деши, є҆гда̀ ма́ла себѐ бы́ти оѹ҆разумѣ́еши: тогда̀ что̀ бу́деши, є҆гда̀ ничто́же себѐ бы́ти вмѣни́ши.

[ѕ҃] Ѻ҆́бразъ тебѣ̀ смире́нія собо́ю показа̀ гдⷭь: смири́лъ: себѐ послушли́въ бы́въ да́же до сме́рти, сме́рти же кре́стныя. Ѡⷮ смире́нія ражда́ется послуша́ніе и҆ повинове́ніе, ѡⷮ горды́ни же прерѣкова́ніе и҆ непоко́рство. Ѡⷮ смире́нія къ бг҃у присвое́ніе, ѡⷮ горды́ни же ѡⷮ негѡ̀ ѡⷮпаде́ніе. Не и҆́маши, человѣ́че, чи́мъ горди́тися, ничто́же бо и҆́маши ѡⷮ себѐ, ничто́же и҆́маши своѐ. Бы́лъ ли є҆сѝ когда̀ пре́жде въ вѣ́цѣ се́мъ; Не бы́лъ є҆сѝ. Вѣ́си ли, є҆гда̀ зачина́ше тя̀ во оѹ҆тро́бѣ ма́терь, и҆лѝ свои́мъ про́мысломъ та́кѡ рожде́нъ є҆сѝ; Вѣ́си ли, ко́егѡ вре́мене си́це возра́слъ є҆сѝ, и҆ въ коли́ку ѵ҆поста́сь прише́лъ є҆сѝ; разумѣ́еши ли, въ кі́й коне́цъ пріи́деши; А҆́ще ли си́хъ всѣ́хъ не вѣ́си, нижѐ разумѣ́еши, почто̀ оѹ҆́бѡ всу́е не во свои́хъ, но въ бж҃іихъ всѣ́хъ горди́шися;

[з҃] Бу́ди смире́нъ и҆ благоразу́менъ: а҆́ще что̀ тебѣ̀ человѣ́цы причита́ютъ, бг҃у сія̑ вся̑ привмѣня́й: ѡⷮ негѡ́ бо всѐ є҆́сть: ѻ҆́нъ вся̑ сотворѝ. Не чуди́ся, и҆́бо и҆ні́и не разумѣ́ютъ, нижѐ вѣ́дятъ, ꙗ҆̀же су́ть бж҃ія: ты́ же вѣ́дя не бу́ди безу́менъ: та́мѡ причита́й, и҆дѣ́же тѝ сво́йственно є҆́сть: та́мѡ привмѣня́й, ѡⷮку́ду всѐ є҆́сть. Ѡⷮ бг҃а всѐ є҆́сть, бг҃у вся̑ причита́й: ѻ҆́нъ є҆́сть всему̀ нача́ло, є҆му̀ вся̑ привмѣня́й: ѻ҆́нъ вся̑ содержи́тъ, та́мѡ вся̑ ѡ҆браща́й. Смире́нія є҆́сть мѣ́ра па́че всѣ́хъ лу́чша, вмѣня́ти себѐ худѣ́йша всея̀ тва́ри, вся́кагѡ созда́нія. А҆́ще бо всея̀ тва́ри худѣ́йша себѐ вмѣня́ти бу́деши, сегѡ̀ ра́ди всея̀ тва́ри худѣ́йшъ вмѣне́нъ не бу́деши: сегѡ̀ ра́ди всея̀ тва́ри ху́ждша себѐ бы́ти разумѣ́й, да всея̀ тва́ри лу́чшій ѡⷮ гдⷭа вмѣни́шися.

[и҃] Ѻ҆ба́че же смире́нъ бу́ди не безслове́снѡ, но въ ра́зумѣ пра́вѣ смиренному́дрствуяй: не безслове́снѡ вся́кому безслове́сію смиря́йся, да не безслове́сному скоту̀ оѹ҆подо́бишися. Смире́ніе бо съ ра́зумомъ, ꙗ҆́коже и҆ и҆́на вся̑ прія̑та су́ть: без̾ ра́зума же ѡⷮве́ржєна, и҆ безслове́сніи бо ско́ти мно́гажды смире́нни быва́ютъ, но не въ ра́зумѣ сегѡ̀ ра́ди нико́ея же су́ть досто́йни похвалы̀: но ты̀ въ ра́зумѣ смиренному́дрствуй, да не прельще́нъ и҆ посмѣя́нъ ѡⷮ сопроти́вныхъ во все́мъ пребу́деши. тѣ́мже въ ра́зумѣ пра́вѣ смиренному́дрствуй, ꙗ҆́кѡ да не преткнове́нъ во все́мъ ꙗ҆ви́шися. И҆ а҆́ще смире́нъ є҆сѝ, съ гдⷭемъ соедини́шися: а҆́ще же ли го́рдъ, ѡⷮве́рженъ ѡⷮ негѡ̀ бу́деши: ꙗ҆́коже бо смире́ніе мо́жетъ спастѝ, та́кѡ высокоу́мная горды́ня погуби́ти, є҆́же на мытарѣ̀ и҆ фарісе́и показа́ся, и҆ на и҆нѣ́хъ мно́зѣхъ.

[ѳ҃] Что́ є҆сть смире́ніе; Смире́ніе є҆́сть разумѣ́ти себѐ, и҆ ѡ҆ себѣ̀ ничто́же: пра́ведно же є҆́сть разумѣ́ти себѐ ничто́же, поне́же ѡⷮ ничесогѡ̀ и҆ створе́нъ є҆сѝ: нижѐ ѡ҆ себѣ̀ разумѣ́ти что̀, поне́же ничто́же и҆́маши ѡⷮ себѐ. Ѡ ко́ль нѣ́сть смире́нію досто́йно! ко́ль нѣ́сть досто́йно оѹ҆дивле́нію! поне́же ѡⷮ ничесогѡ̀ сотворе́ни є҆смы̀: нижѐ вѣ́мы, ка́мѡ по́йдемъ, и҆ оѹ҆стро́ени ѡⷮ гдⷭа бу́демъ. Ѡⷮ тли́ бо и҆ худа́гѡ всѣ́яннагѡ мра́чнагѡ сѣ́мене, ма́ніемъ гдⷭнимъ рожде́ни є҆смы̀, въ смра́дъ же, пра́хъ и҆ пе́пелъ премѣни́мся: душа́ же на́ша оѹ҆стро́ена бу́детъ, ꙗ҆́коже гдⷭь са́мъ є҆ди́нъ вѣ́сть, и҆́же всѣ́хъ є҆́сть творе́цъ и҆ зижди́тель.

[і҃] Да пріи́дутъ всѝ ра́зумы земноро́дніи, да прему́дрствуютъ всѝ філосо́фствующіи, и҆ оѹ҆дивя́тся бж҃іимъ чудесє́мъ, ко́ль є҆́сть ди́венъ гдⷭь, ко́ль си́ленъ, ко́ль є҆́сть млⷭтивъ и҆ првⷣнъ въ совѣ́тѣхъ па́че всѣ́хъ сынѡ́въ человѣ́ческихъ! ꙗ҆́кѡ ничто́же тре́буя созда̀ человѣ́ка, созда́въ же ничто́же тре́буетъ ѡⷮ негѡ̀, то́чію ра́зума пра́ва и҆ покая́нія и҆́стинна: ꙗ҆́кѡ да познава́я благодѣя̑нія є҆гѡ̀, къ нему̀ любо́вію прилѣпля́ется: и҆ ви́дя, ꙗ҆́кѡ ничто́же ѡⷮ себѐ и҆́мать, пребу́детъ всегда̀ смире́нъ, ѡ҆ все́мъ благодаре́ніе и҆ славосло́віе є҆му̀ вы́ну принося̀.