Ча́сть в҃

Глава̀ пя́тая

Ѡ҆ є҆́же ни ма́ло что̀ ѡ҆ себѣ̀ мнѣ́ти.

Не бу́ди оѹ҆ловля́емь самомнѣ́ніемъ и҆ высокому́дріемъ, мня̀ ѡⷮ себе́ и҆лѝ собо́ю сотвори́ти что̀ бла́го: ѡⷮ тебе́ бо ничто́же бла́го кромѣ̀ по́мощи бж҃ія происходи́ти мо́жетъ, то́чію вся̑ ѕла̑я, вся́къ грѣ́хъ, поне́же въ беззако́ніи зача́тъ є҆сѝ, и҆ во грѣсѣ́хъ роди́ тя ма́ти въ мі́ръ (ѱало́мъ н҃). Ничто́же и҆́маши ѡⷮ себѐ а҆́ще не ѡⷮ гдⷭа: ꙗ҆́коже са́мъ ѡⷮ себѐ нѣ́си, си́це ни ѡⷮ себѐ что̀ бла́го и҆мѣ́ти мо́жеши. сегѡ̀ ра́ди не мнѝ ѡ҆ себѣ̀ ничто́же: мня́ бо себѐ бы́ти что̀, ничто́же сы́й, себѐ льсти́тъ, глаго́летъ а҆пⷭлъ (Гала́т. заⷱ сд҃і).

[в҃] А҆́ще и҆ предложе́ніе и҆мѣ́ти бу́деши благо́е, но грѣху̀ кромѣ̀ по́мощи бж҃ія собо́ю сопроти́въ ста́ти, и҆ побѣди́ти є҆гѡ̀ не мо́жеши: поне́же преступле́нія ра́ди ѡⷮ рожде́нія твоегѡ̀ подпа́лъ є҆сѝ под̾ и҆́го и҆ рабо́ту грѣха̀: тогѡ̀ ра́ди собо́ю свобо́дь є҆гѡ̀ бы́ти не мо́жеши, а҆́ще не гдⷭь помо́жетъ тѝ и҆ оѹ҆крѣпи́тъ тя̀. ѻ҆ба́че ты̀ ѡⷮ себѐ и҆ предложе́нія блага́гѡ и҆мѣ́ти не мо́жеши, а҆́ще не гдⷭь благода́тію свое́ю предвари́тъ є҆̀. ꙗ҆́коже и҆сто́чницы водні́и, а҆́ще не и҆спу́стятъ воды̀, не востеку́тъ рѣ́ки: си́це и҆ не поспѣшеству́ющей гдⷭни блгⷣти, вся̑ ѡ҆ста́нутъ пра̑здна.

[г҃] Ꙗ҆́коже вѣ̑тви ничто́же ѡⷮ себѐ ражда́ти мо́гутъ кромѣ̀ ко́рене: си́це нижѐ ты̀ что̀ бла́го и҆зво́лиши и҆лѝ содѣ́еши кромѣ̀ бж҃ія благода́ти. Гдⷭь є҆́сть ко́рень, ты́ же розга̀. Дото́лѣ что̀ бг҃оуго́дно твори́ти мо́жеши, доне́лѣ съ бг҃омъ є҆сѝ: є҆гда́ же ѡⷮ бг҃а ѡⷮлучи́шися, тогда̀ во вся̑ ѕла̑я впаде́ши. Ꙗ҆́коже розга̀ не мо́жетъ плода̀ сотвори́ти ѡ҆ себѣ̀, а҆́ще не бу́детъ на лозѣ̀: та́кѡ и҆ мы̀, а҆́ще въ гдⷭѣ не пребу́демъ. Без̾ мене́ бо не мо́жете ничесѡ́же твори́ти, речѐ гдⷭь (І҆ѡа́н. заⷱ и҃): ѻ҆́нъ бо є҆́сть ко́рень и҆ и҆сто́чникъ вся́кагѡ бла́га.

[д҃] Ка́кѡ возмо́жеши что̀ бг҃оуго́дно сотвори́ти, съ бг҃омъ предолже́ніемъ не соединя́яся, ни въ сла́ву є҆гѡ̀ что̀ творя̀. А҆́ще что̀ и҆ бы́ло бы мни́мо бла́го, не съ бг҃омъ же, нѣ́сть сіѐ бла́го, поне́же не съ бг҃омъ, ни во сла́ву є҆гѡ̀. мно́зи ѡⷮ себѐ мня́тся твори́ти что̀ бл҃го, но ѡⷮ гдⷭа непрія́тно: поне́же не съ бг҃омъ, ни во сла́ву бж҃ію. вся́ко благо́е не мо́жетъ бы́ти благи́мъ, а҆́ще не съ гдⷭемъ: нижѐ ѕло́е ѕлы́мъ, а҆́ще не кромѣ̀ гдⷭа: ѻ҆́нъ бо є҆́сть всему̀ благо́му нача́ло, и҆ коне́цъ безконе́чный.

[є҃] Никто́же въ пра́вду мо́жетъ твори́ти, не то́чію бла́го, но нижѐ ѕло̀, кромѣ̀ бж҃ія попуще́нія, и҆ благо́му посо́бствованія. Ѻ҆́нъ бо вся̑ сотворѝ, и҆ во вла́сти свое́й вся̑ соде́ржитъ. Но а҆́ще кто̀ что̀ ѕло̀ твори́тъ, не по́мощію бж҃іею, ни благоволе́ніемъ є҆гѡ̀ твори́тъ, но то́чію самовла́стіемъ и҆ попуще́ніемъ: бг҃ъ бо ѕлу̀ нѣ́сть помога́тель, но благо́му: ѻ҆ба́че же, ꙗ҆́коже ѕло́му въ ѕлы́хъ и҆ногда̀ содѣ́яти что̀ ѕло̀ попуща́етъ, и҆ногда́ же и҆ возбраня́етъ свои́мъ смотре́ніемъ: си́це и҆ благо́му и҆ препина́етъ и҆ногда̀, и҆ посо́бствуетъ, ꙗ҆́кѡ да ѻ҆бои́хъ ѕлы́хъ же и҆ благи́хъ и҆ску́сится самовла́стное предложе́ніе, и҆ позна́ется бж҃е́ственная вла́сть и҆ держа́ва.

[ѕ҃] Не вся́кое ѕло̀ ѕлы́й содѣ́яти мо́жетъ кромѣ̀ бж҃ія попуще́нія, нижѐ благі́й благо́е кромѣ̀ помога́нія. А҆́ще и҆ самовла́стіемъ ко́ждо ѡⷮ бг҃а почте́нъ є҆́сть, и҆ не то́чію человѣ́цы, но и҆ бѣ́си и҆́мутъ своѐ намѣ́реніе, и҆ предѣ̑лъ свои́хъ прескака́ти не мо́гутъ: но ѻ҆́вому въ ѕлы́хъ, ꙗ҆́коже вѣ́сть, благосло́вныхъ ра́ди ви́нъ мно́гажды не попуща́етъ: ѻ҆́вому же во благи́хъ не посо́бствуетъ: ꙗ҆́кѡ да по́мощи є҆гѡ̀ тре́буя оѹ҆бѣжи́тъ мнѣ́нія, и҆ познава́я свою̀ не́мощь, ꙗ҆́кѡ ѡⷮ себѐ ничто́же и҆́мать, пребу́детъ всегда̀ смиря́яся.

[з҃] Ꙗ҆́коже ѕло́му мно́гажды не вся́ко ѕло̀ благосло́вныхъ ра́ди ви́нъ попуща́етъ, си́це нижѐ благо́му благо́е: ѻ҆бои́хъ же предложе́ніе въ дѣ́ло напису́етъ. А҆́ще бо бы̀ ѕлы́й всѐ ѕло́е, благі́й же всѐ благо́е, кромѣ̀ попуще́нія бж҃ія, и҆ бл҃го́му помога́нія возмо́глъ бы, никто́же ни въ че́мже по́мощи бж҃ія жела́лъ бы, никто́же ѡ҆ мл҃твѣ и҆ моле́ніи радѣ́лъ бы: но всѐ кі́йждо по во́ли свое́й твори́лъ бы, ничто́же смотре́ніе бг҃а премышля́ющагѡ и҆ ѡ҆блада́ющагѡ мнѣ́лъ бы бы́ти, ни въ че́мъ вла́сти ра́зность творцу̀ ѡⷮ тва́ри была́ бы. Сегѡ̀ ра́ди не вели́ка себѐ разумѣ́й бы́ти, но мнѝ, ꙗ҆́кѡ ничто́же є҆сѝ: мня́й бо себѐ бы́ти что̀, себѐ льсти́тъ, слѣ́пъ сы́й душе́ю, непросвѣще́нъ въ ра́зумѣ, и҆ не вѣ́сть, ка́мѡ и҆́детъ.

[и҃] А҆́ще не гдⷭь сози́ждетъ до́мъ, всу́е труди́шася зи́ждущіи: а҆́ще не гдⷭь сохрани́тъ гра́дъ, всу́е бдѣ̀ стрегі́й, гл҃етъ прⷪро́къ (ѱало́мъ рк҃ѕ). Тщи́ся ты̀, и҆ трезви́ся во благо́мъ, на себе́ же оѹ҆пова́нія не полага́й, но бг҃у моля́ся по́мощи є҆гѡ̀ оѹ҆се́рднѣ всегда̀ взыску́й. А҆́ще помо́жетъ тѝ, и҆ поспѣши́тъ тѝ гдⷭь, соверши́тся дѣ́ло, а҆́ще ли нѝ, вся̑ твоя̑ разсы́плются. А҆́ще бы что̀ и҆ бы́ло мни́мо твоѐ бла́го, ѡⷮ гдⷭа же бу́детъ не прія́тно, ка́я тѝ є҆́сть по́льза; А҆́ще бы и҆ восхотѣ́лъ є҆сѝ въ возноше́ніи твое́мъ чи́мъ мни́мымъ свои́мъ пред̾ гдⷭемъ оѹ҆добри́тися, ѻ҆́нъ же не пріи́метъ, что̀ себѣ̀ помо́жеши; но рече́тъ тѝ: дру́же, не ѡ҆би́жу тебѐ, возмѝ своѐ, и҆ и҆дѝ по при́тчи є҆ѵⷢльской (Матѳ. заⷱ п҃). Сегѡ̀ ра́ди вся̑ и҆справлє́нія на̑ша, не си́це въ на́съ су́ть, ꙗ҆́коже въ ми́лости хрⷭто́вой. А҆́ще себѐ мни́ши бы́ти что̀, сегѡ̀ ра́ди пред̾ ни́мъ ничто́же є҆сѝ, поне́же себѐ си́це бы́ти разумѣ́еши. А҆́ще себѐ разу́мна и҆ бл҃гопотре́бна бы́ти мы́слиши, сегѡ̀ ра́ди весма̀ непотре́бенъ є҆сѝ. А҆́ще себѐ чи́ста и҆ пра́ведна и҆ свя́та разумѣ́еши, сегѡ̀ ра́ди ѻ҆кая́ннѣйшій, и҆ грѣ́шнѣйшій па́че всѣ́хъ человѣ̑къ пред̾ гдⷭемъ вмѣня́ешися, поне́же себѐ си́це разумѣ́еши: нечи́стъ бо пред̾ гдⷭемъ вся́къ высокосе́рдый, гл҃етъ соломѡ́нъ (При́тчей ѕ҃і).

[ѳ҃] Сегѡ̀ ра́ди бу́ди смире́нъ, разумѣ́й свою̀ не́мощь: па́мятствуй, ꙗ҆́кѡ вся̑ су́ть бж҃ія, а҆ не на̑ша, вся̑ ѡⷮ бг҃а су́ть, а҆ не ѡⷮ тебѐ, вся́ко дая́ніе бл҃го и҆ вся́къ да́ръ соверше́нъ, свы́ше є҆́сть, сходя́й ѡⷮ ѻ҆ц҃а̀ свѣ́тѡвъ, глаго́летъ а҆пⷭлъ (І҆а́кѡⷡ заⷱ и҃). Па́мятствуй, ꙗ҆́кѡ всѐ въ ми́лости хрⷭто́вой є҆́сть, а҆ не въ твое́й си́лѣ и҆ вла́сти: па́мятствуй, ꙗ҆́кѡ во́лею и҆ нево́лею ко грѣху̀ преклоне́нъ є҆сѝ: вѣ́си, ꙗ҆́кѡ кромѣ̀ по́мощи бж҃ія и҆ є҆гѡ̀ бл҃года́ти ꙗ҆́кѡ паучи́нная сѣ́ть. Не бу́ди го́рдъ и҆ самомни́теленъ, да не оѹ҆подо́бишися бѣ́су: бѣ́съ бо си́мъ ѡⷮ бг҃а ѡⷮпадѐ. ꙗ҆́кѡ вся̑ себѣ̀ причитова́ше, бг҃у же вся̑ сотво́ршему ничто́же: сегѡ̀ ра́ди всегѡ̀ ѡⷮпадѐ, и҆ ѡ҆бнажи́ся гдⷭни бл҃года́ти, и҆ вѣ́чному томле́нію пред̾угото́ва себѐ сосу́дъ. Не мнѝ себѐ бы́ти пра́ведна и҆ свя́та, прему́дра и҆ вся́кія че́сти досто́йна: не мнѝ себѐ лу́чша и҆ благопотре́бнѣйша и҆нѣ́хъ, но па́че всѣ́хъ грѣ́шнѣйша и҆ безу́мнѣйша, и҆ неключи́ма бы́ти себѐ вмѣня́й: ты́ бо пред̾ бг҃омъ без̾ смире́нія ничто́же є҆сѝ: преспѣ́яніе бо смире́нія, є҆́сть преспѣ́яніе добродѣ́тели и҆ вся́кагѡ и҆справле́нія.

[і҃] Не бу́ди ѡ҆ себѣ̀ высокому́дрствуяй, мня̀, ꙗ҆́кѡ ты̀ є҆ди́нъ свои́мъ ра́зумомъ и҆ прему́дростію всѣ́хъ превозше́лъ є҆сѝ, и҆ вся̑ є҆ди́нъ са́мъ ѡ҆б̾я́ти могі́й: но внемлѝ, ꙗ҆́кѡ ве́лій є҆́сть мі́ръ, и҆ всѝ концы̀ землѝ, въ ни́хже разли́чныхъ во ѻ҆бои́хъ са́нахъ ли́цъ, дх҃о́вныхъ и҆ мірски́хъ, неисче́тное мно́жество прему́дрыхъ и҆ разу́мныхъ, вся́кагѡ преподо́бія и҆ че́сти досто́йныхъ ѡ҆брѣта́ется, и҆̀хже бл҃года́ть прест҃а́гѡ дх҃а пречу́днѣ оѹ҆прему́дри, и҆ разли́чнѣ оѹ҆добрѝ, и҆̀мже ты̀ ни въ слѣ́дъ ше́ствовалъ є҆сѝ, и҆̀хже ты̀ не вѣ́си, нижѐ ра́зумомъ твои́мъ пости́гнути мо́жеши, коли́кѡ є҆́сть безчи́сленное мно́жество тма́ми тє́мъ во все́мъ превосходя́щихъ тебѐ. Бѣ́гаяй мни́тъ, ꙗ҆́кѡ скорѣ́е всѣ́хъ тече́тъ са́мъ, є҆гда́ же со и҆нѣ́ми спряже́тся, тогда̀ познава́етъ свою̀ не́мощь.