Ча́сть в҃

Глава̀ шеста́я

Ѡ҆ є҆́же не ѡ҆сужда́ти кого̀ и҆на́го, но па́че своя̑ зрѣ́ти ѕла̑я.

Не суди́те, да не суди́ми бу́дете, речѐ гдⷭь: и҆́мже бо судо́мъ су́дите, су́дятъ ва́мъ: и҆ въ ню́же мѣ́ру мѣ́рите, возмѣ́рится ва́мъ (Матѳ. заⷱ к҃). Не судѝ вся́кѡ, нижѐ восхища́й гдⷭня са́на: є҆ди́нъ бо є҆́сть судія̀ бг҃ъ, хотя́й суди́ти живы̑мъ и҆ мє́ртвымъ: ты́ же человѣ́къ зе́менъ сы́й, себѐ смотрѝ, себѣ̀ внима́й: и҆ ты́ бо и҆́маши, ѡ҆ не́мже суда̀ досто́инъ є҆сѝ: ты̀ са́мъ ѡ҆ свои́хъ суда̀ ѡ҆жида́еши, са́мъ своя̑ ѕла́я пред̾ собо́ю и҆́маши, и҆ на и҆на́го де́рзостнѣ наскаку́еши: но бг҃ъ вся̑ческая сотвори́вый, са́мъ вся̑ да су́дитъ, ты́ же себѐ смиря́й.

[в҃] Не судѝ, а҆́ще не хо́щеши бы́ти ѡ҆сужде́нъ: а҆́ще и҆ пресоверше́нъ бы́лъ бы є҆сѝ, друга́го вся́кѡ не ѡ҆сужда́й: а҆́ще же ѡ҆сужда́еши, и҆ ты̀ тому́жде суду̀ вино́венъ є҆сѝ, є҆му́же и҆ согрѣша́яй. А҆́ще ты̀ са́мъ цѣлому́дрствуеши, ѡ҆сужда́еши же нецѣлому́дрствующаго, ра́венъ є҆сѝ и҆ ты̀ блу́дъ творя́щему. А҆́ще ты̀ и҆ въ ма́лѣмъ не согрѣши́лъ бы є҆сѝ, и҆на́го же согрѣша́юща ненави́стнѣ ѡ҆сужда́еши, и҆ ты̀ та̑яжде ѕла̑я твори́ши, ꙗ҆̀же и҆ согрѣша́яй, па́че же и҆ вя́щше ѻ҆́нагѡ, восхища́яй на ся̀ са́нъ бж҃ій.

[г҃] Не зрѝ чужди́хъ грѣхѡ́въ, но своя̑ ѕла̑я смотря́й: не бо̀ ѡ҆ ѻ҆́нѣхъ и҆спы́танъ бу́деши, но ѡ҆ себѣ̀ вся́кѡ возда́си сло́во. Нѣ́сть тѝ никоея́же потре́бы и҆спы́товати и҆нѣ́хъ, ка́кѡ кто̀ живе́тъ, ка́кѡ согрѣша́етъ: но ты̀ себѣ̀ внемлѝ, а҆́ще ты̀ бг҃у оѹ҆гожда́еши, а҆́ще ты̀ бг҃оугѡ́дная твори́ши, а҆́ще ты̀ подража́еши ст҃ы́хъ житію̀, а҆́ще стопа́мъ и҆́хъ послѣ́дуеши, а҆́ще дѣ́ло твоѐ прія́тно є҆́сть пред̾ бг҃омъ. Человѣ́къ ѡ҆сужда́яй и҆нѣ́хъ, ꙗ҆́кѡ ѕлолука́вое зерца́ло є҆́сть, всѣ́хъ въ себѣ̀ и҆з̾ѡбража́етъ, себе́ же не ви́дитъ: и҆лѝ ꙗ҆́коже скверна́ва ба́ня, всѣ́хъ и҆змыва́етъ, сама́ же въ бла́тѣ стои́тъ. Си́це и҆нѣ́хъ судя́й, всѣ́хъ смотря́етъ, ка́кѡ кто̀ ꙗ҆́стъ, ка́кѡ піе́тъ, ка́кѡ согрѣша́етъ: вся̑ зри́тъ, себе́ же не ви́дитъ. А҆́ще кто̀ и҆ въ ма́лѣмъ чѣ́мъ согрѣши́тъ, ве́ліе є҆́сть, а҆ є҆́же ѻ҆́нъ и҆ вели́ко согрѣша́етъ, ничто́же є҆́сть: хо́щетъ бо да є҆гѡ̀ грѣха̀ никто́же вѣ́сть, никто́же зна́етъ, да є҆гѡ̀ вся̑ презира́ютъ и҆ молча́тъ, ѻ҆́нъ же всѣ́хъ ꙗ҆́вѣ ѡ҆глаго́луетъ, су́дитъ и҆ ѡ҆клевету́етъ.

[д҃] Не ѡ҆сужда́й, нижѐ чуди́ся человѣ́ческому согрѣше́нію, но па́че чуди́ся, а҆́ще кто̀ возмо́жетъ оѹ҆гонзну́ти ны́нѣшнягѡ вре́мене вра́жіихъ сѣте́й, а҆́ще кто̀ возмо́жетъ соблюстѝ себѐ пред̾ бг҃омъ чи́ста: и҆́бо хо́дитъ сатана̀ ꙗ҆́кѡ ле́въ рыка́я, и҆ и҆ща́й кого̀ поглоти́ти: тщи́тся, промышля́етъ ѡ҆ человѣ́ческой поги́бели: хо́щетъ да ни є҆ди́нъ кто̀ бу́детъ сѣте́й є҆гѡ̀ свобо́денъ (а҃ Петр. заⷱ ѯ҃г). Па́мятствуй оѹ҆́бѡ и҆ ты̀ своя̀ согрѣшє́нія, ꙗ҆́кѡ а҆́ще и҆ не хо́щеши, мно́гажды согрѣша́еши: и҆ ꙗ҆̀же ненави́диши, сія̑ любе́знѡ твори́ши: во́лею и҆ нево́лею плѣне́нъ є҆сѝ ко грѣху̀: во́лею и҆ нево́лею впа́даеши въ преступле́ніе.

[є҃] И҆ кто́же грѣха̀ є҆́сть свобо́дь; кто̀ ѡ҆бря́щется ни въ че́мже пови́ненъ; кто̀ неприча́стенъ є҆́сть грѣху̀, а҆́ще и҆ є҆ди́нъ де́нь бу́детъ живота̀ є҆гѡ̀; Въ беззако́ніихъ бо зача́ти є҆смы̀, и҆ во грѣсѣ́хъ родѝ на́съ ма́ти на́ша (ѱало́мъ н҃): А҆́ще не въ то́мъ грѣсѣ̀, то̀ въ и҆но́мъ: а҆́ще не въ вели́цѣмъ, то̀ въ ма́ломъ: ѻ҆ба́че всѝ согрѣша́емъ, всѝ преступа́емъ, всѝ грѣ́шни є҆смы̀, всѝ не́мощни, всѝ ко вся́кому грѣху̀ прекло́нни, всѝ тре́буемъ ми́лости бж҃ія, всѝ тре́буемъ человѣколю́бія є҆гѡ̀: не ѡ҆правди́тся бо пред̾ гдⷭемъ вся́къ живы́й, гл҃етъ прⷪро́къ (ѱало́мъ рм҃в).

[ѕ҃] Сегѡ̀ ра́ди не ѡ҆сужда́й согрѣша́ющагѡ, не восхища́й бж҃ія суда̀: є҆́же бо хрⷭто́съ себѣ̀ ѡ҆ста́ви, ты̀ сопроти́вникъ є҆му̀ не бу́ди. А҆́ще и҆ ꙗ҆́вѣ ѻ҆чи́ма свои́ма согрѣша́ющаго ви́диши, не поносѝ є҆му̀, ни го́рдостнѡ суда̀ и҆зносѝ, да не и҆ са́мъ сія̑ постра́ждеши: судя́й бо кто̀ кого̀ въ че́мъ, са́мъ сіѐ вся́ко пострада́ти и҆́мать: но и҆ ми́лостивнѣ согрѣше́ніе є҆гѡ̀ покры́й, и҆ человѣколю́бнѣ преступле́ніе, а҆́ще мо́жеши, и҆спра́ви: а҆́ще ли нѝ, то̀ молча́ніемъ, себѐ ѡ҆сужда́яй, преминѝ: довѡ́льна бо тебѣ̀ су́ть своя̑ ѕла̑я, не́же смотрѣ́ти и҆на́гѡ грѣхѝ.

[з҃] Почто̀ зри́ши суче́цъ въ ѻ҆́цѣ бра́та твоегѡ̀, въ свое́мъ же бервна̀ не чу́еши, речѐ гдⷭь (Матѳ. заⷱ к҃); Ви́диши чужды̑я грѣхѝ, своя̑ же презира́еши: не ѡ҆сужда́й оѹ҆́бѡ ты̀ ни є҆ди́наго, да не ꙗ҆́кѡ фарісе́й и҆ са́мъ ѡ҆су́дишися. Не глаго́ли, ꙗ҆́коже фарісе́й слѣпотству́я глаго́лаше: бж҃е, благодарю́ тя, ꙗ҆́кѡ нѣ́смь, ꙗ҆́коже про́чіи человѣ́цы: хи̑щницы, непра́вєдницы, прелюбодѣ́є, и҆лѝ ꙗ҆́коже се́й мыта́рь (Лукѝ заⷱ п҃ѳ): тогѡ́ бо ра́ди ѡⷮ негѡ̀ ѡ҆сужде́нный ѡ҆правди́ся, суди́вый же є҆го̀ го́рдостнѣ ѡ҆сужде́нъ бы́сть. Не мнѝ, ꙗ҆́кѡ всѝ грѣ́шніи, ты́ же то́чію є҆ди́нъ пра́веденъ є҆сѝ: всѝ ѕлі́и, ты́ же то́чію є҆ди́нъ бла́гъ є҆сѝ. Не и҆нѣ́хъ судѝ, но себѐ: не и҆нѣ́хъ оѹ҆коря́й, но ѕлѣ́йша всѣ́хъ себѐ бы́ти вмѣня́й никого́ бо та́кѡ вѣ́си, ꙗ҆́коже себѐ: ни чіѐ та́кѡ вѣ́дати мо́жеши согрѣше́ніе, ꙗ҆́коже своя̀ недоста́точєства.

[и҃] А҆́ще и҆ наиѕлѣ́йша кого̀ ви́диши, не ѡ҆сужда́й, нижѐ му́цѣ досто́йна согрѣша́ющаго бы́ти и҆мену́й, но ꙗ҆̀же недовѣ́дѡми ѡⷮ человѣ̑къ, бг҃у сія̑ ѡ҆ставля́й: ѻ҆́нъ сія̑ вѣ́сть, ꙗ҆́кѡ вся̑ созда́вый: ѻ҆́нъ є҆́же хо́щетъ, оѹ҆стро́итъ, ꙗ҆́коже вѣ́сть, ꙗ҆́кѡ бг҃ъ всеси́ленъ. Па́мятствуй принесе́нную а҆́гг҃ломъ ко ста́рцу ду́шу, и҆ вопроша́ющымъ: гдѣ̀ воврещѝ повели́тъ ю҆̀, поне́же въ по́мыслѣ ю҆̀ ѡ҆судѝ, ꙗ҆́коже во ѻ҆те́чникѣ гл҃етъ;

[ѳ҃] Не ревну́й, нижѐ зави́ди согрѣша́ющему, нижѐ оѹ҆тѣша́йся ѡ҆ чіе́мъ согрѣше́ніи, но па́че ми́лостивъ и҆ жа́лостивъ бу́ди ѡ҆ согрѣша́ющемъ. А҆́ще мо́жеши, помозѝ є҆му̀ къ воста́нію, пода́ждь ру́ку по́мощи: а҆́ще ли не мо́жеши, понѐ моли́тствуй ѡ҆ не́мъ: не вели́ко бо прія́тъ согрѣша́яй, нижѐ пресла́вно что̀ получѝ преступа́яй: не приѡбрѣ́теніе ко́е пріе́млетъ, но па́че тщету̀: не оѹ҆тѣше́ніе и҆ ра́дость, но ско́рбь и҆ печа́ль ну́жда вкуси́вши грѣха̀, вкуси́ти и҆ го́рести, здѣ́ ли, и҆лѝ ѻ҆на́мѡ: и҆́накѡ бо бы́ти нѣ́сть мо́щно.

[і҃] Не ра́дуйся ѡ҆ паде́ніи бли́жнягѡ, но па́че пла́чи и҆ рыда́й, вмѣня́я ѻ҆́нагѡ паде́ніе, ꙗ҆́коже своѐ: поне́же бли́жняго ꙗ҆́коже себѐ люби́ти заповѣ́дано бы́сть. А҆́ще паде́тъ вра́гъ тво́й, не ѡ҆бра́дуйся ѡ҆ не́мъ, нижѐ ѡ҆ соблазне́ніи є҆гѡ̀ возноси́ся, глаго́летъ соломѡ́нъ (При́тч. к҃д). Не оѹ҆тѣша́йся ѡ҆ согрѣше́ніи и҆ и҆на́гѡ, да и҆ ѡ҆ твое́мъ бѣ́си и҆ человѣ́цы не пора́дуются: не ве́лія бо ра́дость ѡ҆ согрѣше́ніи, но па́че печа́ль и҆ боя́знь ѡ҆ себѣ́: бѣ́си бо то́чію ра́дуются ѡ҆ поги́бели грѣ́шныхъ, поне́же и҆ са́ми всеконе́чнѣ погибо́ша: человѣ́къ же ѡ҆ спасе́ніи человѣ́ческомъ ра́доватися до́лженъ є҆́сть, да и҆ са́мъ спасе́ніе получи́тъ, и҆ ѡ҆бря́щетъ ѡⷮ бг҃а ми́лость, ны́нѣ, и҆ въ де́нь суда̀, а҆ми́нь.