Ча́сть в҃

Глава̀ седма́я

Ѡ҆ є҆́же блюсти́ся смѣ́ха, праздносло́вія же и҆ кощу́нствъ.

Блюди́ся смѣ́ха, праздносло́вія же и҆ кощу́нствъ, да не сѡ́бранная пла́чемъ, оѹ҆до́бнѣ безчи́ннымъ смѣ́хомъ и҆ кощу́нствы расточи́ши: смѣ́хъ безчи́нный сѡ́бранная расточа́етъ, и҆ оѹ҆страня́етъ гдⷭни бл҃года́ти, па́мять сме́ртную погубля́етъ, суда̀ стра́шнагѡ забы́тіе твори́тъ. Смѣ́хъ є҆́сть дѣ́тска нра́ва, сластолюби́ва се́рдца, сла́быя и҆ нему́жественныя душѝ зна́меніе: смѣ́хъ вся́кѡ непотре́бенъ є҆́сть.

[в҃] Блюди́ся смѣ́ха, да не раздража́еши пла́ча оѹ҆ча́щагѡ тя̀, да не пра́зденъ бу́деши вся́кія добродѣ́тели, да не ѡ҆б̾я́тъ бу́деши па́губнымъ презо́рствомъ, и҆ въ сѣ̑ти діа́воли впаде́ши. лу́чшій смѣ́ха пла́чь: и҆́бо хрⷭто́съ не блажи́тъ смѣю́щихся, но пла́чущихся. Блаже́ни, речѐ, не смѣю́щіися, но пла́чущіи, ꙗ҆́кѡ ті́и оѹ҆тѣ́шатся: и҆ па́ки: го́ре смѣю́щымся, ꙗ҆́кѡ ті́и воспла́чутся (Матѳ. заⷱ і҃): смѣ́ха бо дѣ́лателє во ѻ҆́номъ вѣ́цѣ постыдя́тся, и҆ во вре́мя весе́лія воспла́чутся и҆ возрыда́ютъ.

[г҃] Что̀ оѹ҆́бѡ человѣ́че, и҆́маши смѣ́ха, ра́дости же и҆ весе́лія досто́йно въ мі́рѣ се́мъ; Что̀ и҆́маши, ѡ҆ не́мже и҆звѣ́стнѡ оѹ҆тѣша́тися возмо́глъ бы є҆сѝ; Полна̀ жи́знь твоя̀ ско́рби, печа́ли же и҆ воздыха́нія: ты́ же въ смѣ́хахъ и҆ кощу́нствахъ вре́мя твоѐ и҆знуря́еши: полна̀ жи́знь твоя̀ пла́ча и҆ рыда́нія, ты́ же весели́шися и҆ благоде́нствуеши: дѣ́йство є҆́сть сѐ твоегѡ̀ неразу́мія. Не вѣ́си, ѡ҆ не́мже оѹ҆тѣша́тися и҆́маши: не вѣ́си, ꙗ҆̀же тѝ су́ть на по́льзу, и҆ на вѣ́чное твоѐ приѡбрѣ́теніе. Не ѡ҆ си́хъ ты̀ оѹ҆тѣша́йся, но ѡ҆ гдⷭѣ, ѡ҆ не́мже и҆́маши оѹ҆тѣша́тися во вѣ́ки.

[д҃] Блюди́ся смѣ́ха, праздносло́вія же и҆ кощу́нствъ, да не благода́ти бж҃ія ѡⷮтщети́шися, и҆ пу́сту ду́шу твою̀ сотвори́ши: смѣ́хъ бо и҆ кощу̑нства ѡⷮго́нятъ гдⷭню бл҃года́ть, оѹ҆стужа́ютъ се́рдце, ѡ҆тягча́ютъ ду́шу, помрача́ютъ со́вѣсть, ѡ҆печаля́ютъ а҆́гг҃лѡвъ, веселя́тъ бѣсѡ́въ: вся́кому дерзнове́нію вина̀, грѣху̀ хода́тай, блуду̀, и҆ вся́кой нечистотѣ̀ руково́ждь и҆ предводи́тель.

[є҃] Не хощѝ никогда́же что̀ рещѝ, и҆лѝ что̀ вѣща́ти кромѣ̀ ну́жды: ѡⷮ сегѡ́ бо мно́га ѕла̑я ражда́тися ѡ҆быко́ша: и҆ па́че и҆нѣ́хъ страсте́й сія̀ стра́сть наипа́че недовѣ́домѡ и҆ оѹ҆до́бнѡ подкрада́ти ѡ҆бы́че: мно́гажды бо наче́нше ѡ҆ бг҃осло́вныхъ словесѣ́хъ, прихо́димъ въ сквернослѡ́вія, кля̑твы, и҆ во вся̑ ѕла̑я. Сегѡ̀ ра́ди блюди́ся, да не бу́деши са́мъ себѣ̀ навѣ́тникъ и҆ вра́гъ: сме́рть бо и҆ живо́тъ въ руцѣ̀ я҆зы́ка є҆́сть, глаго́летъ соломѡ́нъ оѹ҆держава́ющіи є҆го̀, снѣдя́тъ плоды̀ є҆гѡ̀ (При́тч. и҃і).

[ѕ҃] Молча́ніе, ꙗ҆́кѡ нача́ло су́щее є҆́сть ѡ҆чище́нія душѝ, и҆ кромѣ̀ труда̀ вся̑ за́пѡвѣди оѹ҆строя́етъ хотя́щему, ꙗ҆́коже нѣ́кто речѐ: я҆зы́къ бо є҆́сть неудержи́мо ѕло̀, и҆спо́лнь ꙗ҆́да смертоно́сна: тѣ́мъ бл҃гословля́емъ бг҃а и҆ ѻ҆ц҃а̀, и҆ тѣ́мъ клене́мъ человѣ́ки (І҆а́к. заⷱ н҃д), глаго́летъ а҆пⷭлъ. А҆́ще кто̀ въ сло́вѣ не согрѣша́етъ, се́й соверше́нъ му́жъ, си́ленъ ѡ҆бузда́ти и҆ всѐ тѣ́ло. Ко глаго́ланію тре́бѣ є҆́сть ѻ҆па́снства мно́га: пе́рвѣе съ ко́имъ кто̀ нра́вомъ глаго́лати и҆́мать, и҆ ко́егѡ вре́мене, и҆ что̀ глаго́летъ, и҆ въ кі́й коне́цъ и҆́мать бы́ти то̀ глаго́ланіе: глаго́ляй вся̑ сія̑ до́лженъ и҆мѣ́ти въ па́мяти, молча́й же вся̑ соверши́лъ и҆ и҆спо́лнилъ є҆́сть.

[з҃] Храни́ся суесло́вія, смѣ́ха же и҆ кощу́нствъ да́же до ма́ла пра́здна сло́ва: и҆ ѡ҆ самѣ́мъ бо пра́зднѣмъ сло́вѣ ѡⷮвѣ́тъ и҆́маши да́ти въ де́нь суда̀, ꙗ҆́коже гдⷭь речѐ (Матѳ. заⷱ м҃з). Сегѡ̀ ра́ди и҆ дв҃дъ ѡ҆ се́мъ къ бг҃у моли́тствуя глаго́лаше: положѝ, гдⷭи, хране́ніе оѹ҆стѡ́мъ мои̑мъ, и҆ две́рь ѡ҆гражде́нія ѡ҆ оѹ҆стна́хъ мои́хъ. Не оѹ҆клонѝ се́рдце моѐ въ словеса̀ лука́вствія, непщева́ти вины̑ ѡ҆ грѣсѣ́хъ (ѱало́мъ р҃м). И҆ па́ки: рѣ́хъ сохраню̀ пути̑ моя̑, є҆́же не согрѣша́ти мѝ я҆зы́комъ мои́мъ: положи́хъ оѹ҆стѡ́мъ мои̑мъ храни́ло, внегда̀ воста́ти грѣ́шному предо мно́ю, ѡ҆нѣмѣ́хъ и҆ смири́хся и҆ оѹ҆молча́хъ (ѱало́мъ л҃и).

[и҃] Почто̀ и҆́маши оѹ҆тѣша́тися ѡ҆ смѣ́хѣ и҆ кощу́нствахъ, ꙗ҆̀же не су́ть тѝ въ по́льзу; є҆ще́ бо не преплы́лъ є҆сѝ мі́ра сегѡ̀ бѣ́дъ, и҆ оѹ҆жѐ въ смѣ́хѣ и҆ кощу́нствахъ оѹ҆тѣше́ніе своѐ полага́еши; не оѹ҆̀ пла́ча и҆збы́лъ є҆сѝ, а҆ смѣ́хомъ и҆ праздносло́віемъ оѹ҆тѣша́ешися; ничто́же досто́йно ра́дости въ мі́рѣ се́мъ и҆́маши, и҆ смѣ́хомъ порабоща́ешися; Не вѣ́мъ, ко́егѡ є҆сѝ внима́нія: не вѣ́си ли, ꙗ҆́кѡ вся̑ въ мі́рѣ се́мъ пла́ча достѡ́йна, а҆ не смѣ́ха, рыда́нія достѡ́йна, а҆ не ра́дованія; въ де́брѣ бо плаче́вной є҆сѝ, а҆ не во оѹ҆тѣше́ніи: во и҆згна́ніи, а҆ не во ѻ҆ч҃ествѣ. До́лженъ є҆сѝ скорбѣ́ти, а҆ не весели́тися: пла́кати и҆ рыда́ти, а҆ не смѣя́тися и҆ кощу́нствовати.

[ѳ҃] Погуби́вый кто̀ ма́лую ве́щь, смуща́ется и҆ скорби́тъ ѕѣлѡ̀: ты́ же вѣ́чное своѐ ѻ҆ч҃ество погуби́въ, смѣе́шися и҆ весели́шися: ни ма́лѡ ѡ҆ се́мъ скорби́ши, нижѐ взыску́еши: во и҆згна́ніи се́мъ ꙗ҆́кѡ въ вѣ́чномъ ѻ҆ч҃ествѣ простира́ешися: и҆дѣ́же тѝ пла́кати и҆ рыда́ти досто́итъ, та́мѡ смѣе́шися и҆ весели́шися: и҆дѣ́же пещи́ся и҆ тща́тися подоба́етъ ѡ҆ и҆скупле́ніи твоея̀ рабо́ты, та́мѡ ѡ҆безпечаля́ешися и҆ почива́еши. Плѣне́нъ кто̀ въ чужду́ю страну̀, ѡⷮ землѝ въ зе́млю, во вре́менной рабо́тѣ су́щи, скорби́тъ и҆ смуща́ется ѕѣлѡ̀: ты́ же ѡⷮ рая̀ въ мі́ръ се́й, ѡⷮ живота̀ въ сме́рть, ѡⷮ свобо́ды въ рабо́ту плѣне́нъ є҆сѝ, въ вѣ́чной рабо́тѣ є҆сѝ, въ безслове́сныхъ наслѣ́діяхъ, въ далеча́йшей странѣ̀ сы́й, не чу́вствуеши: ѡ҆ свое́мъ ми́рномъ, люби́момъ, свобо́дномъ, вѣ́чномъ ѻ҆ч҃ествѣ не скорби́ши: ѡ҆ и҆скупле́ніи и҆ свобожде́ніи не пече́шися, и҆ не чу́вствуеши: дѣ́йство є҆́сть сѐ твоегѡ̀ неразу́мія и҆ слѣпоты̀.

[і҃] Тѣ́мже блюди́ся смѣ́ха, да не пла́чь вѣ́чный пости́гнетъ тя̀: блюди́ся праздносло́вія и҆ кощу́нствъ, да не по се́мъ ѕѣлѡ̀ раска́ешися, є҆гда̀ во и҆схо́дѣ душѝ своея̀ нищету̀ оѹ҆́зриши: да не тогда̀ раска́ешися, є҆гда̀ ничто́же себѣ̀ помощѝ возмо́жеши. ѡ дабы̀ є҆сѝ позна́лъ! ѡ дабы̀ є҆сѝ оѹ҆вѣ́далъ, что̀ и҆́мать бы́ти по си́хъ! никогда́же въ че́мъ безпечаля́тися восхотѣ́лъ бы є҆сѝ: никогда́же въ смѣ́хѣ и҆ кощу́нствахъ вре́мя своѐ и҆знуря́лъ бы є҆сѝ. Смѣя́хуся ѻ҆́ни, и҆̀же дне́сь пла́чутъ, ра́довахуся ѻ҆́ни, и҆̀же дне́сь рыда́ютъ, нижѐ рыда́ти когда̀ преста́нутъ. По насыще́ніи трапе́зномъ наипа́че смѣ́ха блюди́ся: тогда́ бо ѻ҆́нъ наипа́че приходи́ти ѡ҆бы́че: а҆́ще же и҆ случи́ттися когда̀ въ се́мъ поползну́тися, но кромѣ̀ ѕѣ́льнагѡ раска́янія никогда́же тогѡ̀ ѡ҆ста́ви.