Ча́сть в҃

Глава̀ ѻ҆сма́я

Ѡ҆ є҆́же всегда̀ ка́ятися и҆ пла́кати ѡ҆ согрѣше́ніихъ свои́хъ, во ю҆до́ли се́й плаче́внѣй.

Ка́йся, человѣ́че, на вся́къ де́нь ѡ҆ свои́хъ согрѣше́ніихъ, и҆ пла́чи ѡ҆ ни́хъ де́нь и҆ но́щь: ка́йся, не презира́й и҆ малѣ́йшагѡ согрѣше́нія. А҆́ще бо ма̑лая презира́ти бу́деши, и҆ ѡ҆ вели́кихъ по се́мъ вознеради́ши: но ка́йся, и҆ да́же до ма́ла не пре́зри согрѣше́нія, а҆́ще и҆ вся́кагѡ живо́тна малѣ́йше бу́детъ: ну́жда бо разоре́ніемъ є҆ди́ныя ма́лыя за́повѣди, прѡ́чимъ вели̑кимъ сопротивля́тися, ꙗ҆́коже нѣ́кто речѐ. Не глаго́ли: сіѐ ничто́же, ничто́же ѻ҆́но: но не пре́зри да́же до пра́здна сло́ва, да́же до по́мысла то́нка: и҆ ѡ҆ пра́зднѣмъ бо сло́вѣ ѡⷮвѣ́тъ да́ти и҆́маши въ де́нь су́дный, ꙗ҆́коже са́мъ гдⷭь речѐ (Матѳ. заⷱ м҃з). На вся́къ де́нь, на вся́кое вре́мя ка́йся: поне́же непреста́ннѡ пред̾ бг҃омъ согрѣша́еши, на вся́къ де́нь тма́ми те́мъ пред̾ ни́мъ беззако́ннуеши. Ка́йся, пла́чи и҆ рыда́й во все́й жи́зни твое́й, ничто́же бо досто́йно ра́дости и҆ весе́лія въ вѣ́цѣ се́мъ ѡ҆бря́щеши: ничто́же досто́йно благомы́слія и҆ благоде́нствія на́йдеши, то́чію пла́чь и҆ рыда́ніе: и҆ рожде́ніе бо твоѐ въ мі́ръ плаче́вно, и҆ жи́знь твоя̀ въ воздыха́ніи, кончи́на же твоегѡ̀ жи́тельства, сме́рть, ско́рбь, и҆ го́ресть душѝ.

[в҃] Нѣ́сть ничто́же и҆́но мі́ръ се́й со нра́вы свои́ми, то́чію ю҆до́ль грѣхо́вная, и҆ де́брь плаче́вная: ничто́же въ не́мъ є҆́сть благополу́чно, то́чію грѣ́хъ: ничто́же достохва́льно, то́чію преступле́ніе: ничто́же ра́достно, то́чію ско́рбь и҆ печа́ль, то́чію пла́чь и҆ воздыха́ніе: вся́ка глава̀ въ болѣ́зни, и҆ вся́кое се́рдце въ печа́ли: ѡⷮ но́гъ да́же до главы̀ нѣ́сть въ на́съ цѣ́лости, ꙗ҆́коже глаго́летъ прⷪро́къ: нѣ́сть пла́стыря, ни приложе́нія, нижѐ є҆ле́а (И҆са́іи а҃). Сегѡ̀ ра́ди да и҆злію́тъ твоя̑ ѻ҆чеса̀, ꙗ҆́кѡ водотѡ́чія, сле́зы де́нь и҆ но́щь: не да́ждь оѹ҆трезве́нія себѣ̀, и҆ да не премолца́етъ зѣ́ница ѻ҆́чію твое́ю, гл҃етъ прⷪро́къ (Плаⷱ І҆ерем. глⷡа в҃).

[г҃] Пла́чи оѹ҆̀бо, па́че же и҆ рыда́й: ничто́же бо и҆звѣ́стнѣйше въ мі́рѣ се́мъ и҆́маши, ра́звѣ пла́ча: ничто́же благопотре́бнѣйше на́йдеши, ра́звѣ рыда́нія. Не пла́ча ли досто́йна жи́знь твоя̀; не рыда́нія ли досто́йно твоѐ въ мі́рѣ пребыва́ніе; и҆́бо на вся́къ де́нь беззако́ннуеши. Ѡⷮвсю́ду сѣ̑ти, ѡⷮвсю́ду тенє́та: кто́ бо ѡⷮ на́съ грѣху̀ неприча́стенъ; кто̀ непови́ненъ; кто́ ли чи́стъ пред̾ бг҃омъ, а҆́ще и҆ є҆ди́нъ де́нь бу́детъ живота̀ є҆гѡ̀; Не вси́ ли ꙗ҆́кѡ пе́кла ѡ҆черни́хомся; ꙗ҆́кѡ срацы́ни бы́хомъ; Не вся́кія ли скве́рны и҆ лука́вства и҆спо́лнени є҆смы̀; Грѣсѝ мно́зи, пло́ть немощна̀, стра̑сти безчи́сленны, ра́тницы си́льніи, сме́рть безвѣ́стная, пред̾ ѻ҆чи́ма гро́бъ, по сме́рти су́дъ, по суду̀ паде́ніе жре́бія неизвѣ́стное.

[д҃] Всѝ ст҃і́и пла́каху и҆ рыда́ху во все́й жи́зни свое́й: бы́ша и҆̀мъ сле́зы хлѣ́бъ де́нь и҆ но́щь (ѱало́мъ м҃а), и҆ питіѐ своѐ пла́чемъ растворя́ху, ꙗ҆́коже гл҃етъ прⷪро́къ (ѱало́мъ р҃а). Пла́каху прⷪро́цы, пла́каху а҆пⷭли, пла́каху ст҃ли, мч҃ницы, страда́льцы, чернори́зцы, пустынножи́теліе, па́че же и҆ са́мъ хрⷭто́съ, сегѡ̀ не тре́буя, но на́ше ѻ҆кая́нство ѡ҆пла́кивая, сле́зы и҆спуща́ше: ви́дѣ бо гра́дъ І҆ерⷭли́мъ, и҆ пла́кася ѡ҆ не́мъ, глаго́ля: ѡ а҆́ще бы разумѣ́лъ є҆сѝ и҆ ты̀ въ де́нь се́й тво́й, є҆́же ко смире́нію твоему̀, ны́нѣ же скры́ся ѡⷮ ѻ҆́чію твое́ю (Лукѝ заⷱ ч҃з)! Никто́же ви́дѣ на землѝ гдⷭа смѣю́щася, но па́че пла́чущася. Сегѡ̀ ра́ди и҆ ты̀ всегда̀ пла́чи и҆ рыда́й во ю҆до́ли се́й.

[є҃] Пла́чи оѹ҆́бѡ, ꙗ҆́кѡ во грѣсѣ́хъ роди́лся є҆сѝ въ мі́ръ, и҆ непреста́ннѡ на вся́къ де́нь пред̾ гдⷭемъ тма́ми тє́мъ согрѣша́еши. Пла́чи, ꙗ҆́кѡ мно́ги и҆́маши ра́тники и҆ супоста́ты, гони́тели неви́димы, безсо́нны, невеще́ственны, ѻ҆́гнь въ рука́хъ держа́щыя, и҆ цр҃ковь бж҃ію пожещѝ хотя́щыя, ꙗ҆́коже нѣ́кто речѐ. Пла́чи, помина́я сме́рть, ꙗ҆́кѡ оѹ҆мре́ти и҆́маши, въ тлю̀ и҆ пе́пелъ ѡ҆брати́шися. Пла́чи, ꙗ҆́кѡ проитѝ и҆́маши стра́шная мыта̑рства духѡ́въ возду́шныхъ, и҆ и҆стя́занъ бы́ти да́же до пра́здна сло́ва, да́же до по́мысла то́нка.

[ѕ҃] Кто̀ не воздыха́етъ го́рцѣ въ долга́хъ сы́й; кто̀ не пла́чется въ темни́цѣ сѣдя̀; кто̀ не рыда́етъ сме́рти надѣ́яся; ты́ же во всѣ́хъ си́хъ ѡ҆брѣта́яйся, ка́кѡ не и҆́маши пла́кати, па́че же и҆ рыда́ти во ю҆до́ли се́й плаче́внѣй, въ те́мныхъ и҆ сѣ́ни сме́ртнѣй пребыва́я, ѡ҆тягче́нъ сы́й разли́чными долгѝ, и҆ безчи́сленными беззако́ніи и҆ грѣхѝ, ничесѡ́же и҆на́гѡ надѣ́яся, то́чію сме́рти, то́чію ѡⷮсю́ду разлуче́нія; ка́кѡ когда̀ и҆́маши бы́ти безпеча́ленъ и҆ безбоя́зненъ во все́й жи́зни твое́й; ка́кѡ не и҆́маши всегда̀ пла́кати и҆ рыда́ти, ви́дя толи́ки бѣды̀ предлѣжа́щыя; Сегѡ̀ ра́ди да и҆зведу́тъ ѻ҆́чи на́ши сле́зы, и҆ вѣ́жди на́шя и҆злію́тъ во́ды: занѐ гла́съ пла́ча слы́шанъ ѡⷮ сіѡ́на, глаго́летъ прⷪро́къ (І҆ерем. глⷡа ѳ҃).

[з҃] Ѡ҆бразова́ше тѝ и҆спе́рва а҆да́мъ плаче́вное сіѐ житіѐ: а҆́біе бо по и҆згна́ніи ра́йскомъ сѣ́дъ пря́мѡ восто́ка, не смѣя́шеся, но пла́каше го́рькѡ: ничто́же и҆́но бѣ̀ оѹ҆пражне́ніе є҆гѡ̀, то́чію рыда́ніе: и҆ ту́ю пѣ́снь всегда̀ во оѹ҆стѣ́хъ свои́хъ ѡ҆бнося̀ глаго́лаше: оѹ҆вы̀ жи́зни моея̀ ѡⷮпаде́ніе! оѹ҆вы̀ мнѣ̀! что̀ пострада́хъ; коли́кихъ бла̑гъ лиши́хся; вмѣ́стѡ рая̀, тлѣ́нный се́й мі́ръ, вмѣ́стѡ бг҃а и҆ а҆́гг҃лѡвъ є҆гѡ̀, съ бѣ́сы пребыва́ніе: вмѣ́стѡ поко́я, тру́дъ: вмѣ́стѡ жи́зни, сме́рть: вмѣ́стѡ ра́дости и҆ весе́лія, пла́чь и҆ рыда́ніе.

[и҃] Ꙗ҆́коже прⷪро́къ і҆еремі́а сему̀ согласу́я гл҃аше: кто̀ да́стъ главѣ̀ мое́й во́ду, и҆ ѻ҆чи́ма мои́ма и҆сто́чникъ сле́зъ, да воспла́чуся де́нь и҆ но́щь люде́й си́хъ; путіѐ, речѐ, сіѡ́ни рыда́ша, ꙗ҆́кѡ нѣ́сть ходя́щихъ по ни́хъ: ѡ҆скудѣ́ста ѻ҆́чи моѝ слеза́ми, смути́ся срⷣце моѐ, разсы́пася на землѝ сла́ва моя̀, разсы́пася на землѝ ра́дость серде́цъ на́шихъ: и҆збра́нніи ѡⷮ пѣ́сней свои́хъ оѹ҆молко́ша, ѡ҆брати́ся въ пла́чь ли́къ на́шъ (І҆ерем. ѳ҃). Ка́кѡ не лѣ́по є҆́сть пла́кати и҆ рыда́ти въ се́мъ житіѝ, толи́ки вины̀ пред̾ ѻ҆чи́ма и҆му́ще; и҆дѣ́же бо а҆́ще ѻ҆́чи своя̑ ѡ҆брати́ши, ничто́же и҆́но, то́чію пла́чь оѹ҆́зриши: и҆дѣ́же оѹ҆́ши своя̑ простре́ши, то́чію рыда́ніе оѹ҆слы́шиши. Ѡⷮвсю́ду бо бѣды̑, ѡⷮвсю́ду во́пли и҆ воздыха̑нія: бѣды̑ во гра́дѣ, бѣды̑ въ пусты́ни, бѣды̑ въ рѣка́хъ, бѣды̑ въ мо́ри, бѣды̑ ѡⷮ разбѡ́йникъ, бѣды̑ ѡⷮ лжебра́тій, ꙗ҆́коже глаго́летъ а҆пⷭлъ (Корі́н. заⷱ рч҃г). ѻ҆́во глаго́лю: ѡⷮвсю́ду пла́чь и҆ рыда́ніе.

[ѳ҃] Пла́чите и҆ рыда́йте, ꙗ҆́кѡ нѣ́сть ѡⷮвраще́нъ гнѣ́въ ꙗ҆́рости гдⷭни, глаго́летъ прⷪро́къ (І҆ерем. глⷡа а҃). Ка́кѡ не и҆́маши пла́кати во все́й жи́зни свое́й; ка́кѡ не и҆́маши рыда́ти, ви́дя толи́ки бѣды̑ и҆ неудѡ́бства, скѡ́рби же и҆ печа̑ли; Ѡⷮвсю́ду бо вразѝ, ѡⷮвсю́ду навѣ̑тницы, ѡⷮвсю́ду боя́знь и҆ стра́хъ, ѡⷮвсю́ду тре́петъ и҆ недоумѣ́ніе. Пріи́детъ бо сме́рть, пріи́детъ разлуче́ніе, и҆ стра́шное на возду́сѣ ѡⷮ духѡ́въ и҆стяза́ніе, и҆ получе́ніе ча́сти недовѣ́домыя. Кто́ бо та́мѡ и҆звѣ́стнѡ вѣ́сть, что̀ пріи́метъ; кто̀ ѡ҆ се́мъ и҆звѣще́ніе и҆́мать; Пріи́детъ бо та́мѡ душа̀, и҆дѣ́же є҆щѐ никогда́же бѣ̀: оѹ҆ви́дитъ та́мѡ, є҆гѡ́же є҆щѐ никогда́же ви́дѣ: оѹ҆слы́шитъ та́мѡ, є҆гѡ́же є҆щѐ никогда́же слы́ша.

[і҃] Тѣ́мже пла́чи, па́че же и҆ рыда́й: ничто́же предпочте́ннѣйше въ вѣ́цѣ се́мъ па́че пла́ча и҆ те́плыхъ сле́зъ и҆мѣ́й: пла́чь бо ѡ҆мыва́етъ ду́шу, оѹ҆бѣля́етъ вся́ко потемнѣ́ніе, ѡ҆чища́етъ со́вѣсть, просвѣща́етъ оѹ҆́мъ, растерза́етъ грѣхѡ́вныя оѹ҆́зы, заглажда́етъ рукописа́ніе вся́кихъ беззако́ній. Пла́чи оѹ҆́бѡ, и҆ те́плыя сле́зы и҆злива́й, да ѡ҆мы́ешися ѡⷮ мно́гихъ беззако́ній, да ѡ҆чи́стишися ѡⷮ вся́кагѡ грѣха̀, да оѹ҆бѣли́шися па́че снѣ́га (ѱало́мъ н҃), да душе́вныя слѣпоты̀ и҆збы́вши, оѹ҆́мныма ѻ҆чи́ма свѣтлѣ́е про́зриши, да потопи́ши въ мо́ри сле́зномъ мы́сленнаго гони́теля фараѡ́на, да оѹ҆гаси́ши гее́нскій пла́мень, да вѣ́чную свобо́ду оѹ҆лучи́ши. и҆ присносу́щнагѡ живота̀ сподо́бишися ѡ҆ хрⷭтѣ̀ і҆и҃сѣ гдⷭѣ на́шемъ: є҆му́же сла́ва, че́сть и҆ держа́ва, со ѻ҆ц҃е́мъ, и҆ ст҃ы́мъ є҆гѡ̀ дх҃омъ, во вѣ́ки вѣкѡ́въ да бу́детъ.