Ча́сть в҃

Глава̀ девя́тая

Ѡ҆ є҆́же па́мятствовати всегда̀ сме́рть, и҆ не прельща́тися тлѣ́нными сегѡ̀ мі́ра вещмѝ.

Па́мятствуй, человѣ́че, всегда̀ сме́рть, и҆ всѣ́хъ веще́й и҆змѣне́ніе, и҆ никогда́же настоя́щымъ безслове́снѡ пригвозди́шися: помина́й послѣ̑дняя твоя̑, и҆ во вѣ́ки не согрѣши́ши, гл҃етъ сіра́хъ (Сіраⷯ глⷡа з҃). Па́мятствуй, ꙗ҆́кѡ по сме́рти и҆́нъ є҆́сть вѣ́къ, и҆́но пребыва́ніе, и҆ гото́въ бу́ди: ꙗ҆́кѡ да на сме́рть гото́въ бы́вши, ко гряду́щей жи́зни съ добродѣ́тельнымъ и҆справле́ніемъ оѹ҆се́рднѣ спѣши́ши.

[в҃] Па́мятствуй стра́шное и҆ тре́петное предста́ніе суди́щу хрⷭто́ву, и҆дѣ́же ца́рь и҆ кня́зь, во́инъ и҆ граждани́нъ, бога́тъ и҆ оѹ҆бо́гъ, всѝ ра́внѡ и҆ неѡбинове́ннѡ и҆стя́зани бу́дутъ, всѝ въ стра́сѣ и҆ тре́петѣ ѡ҆бря́щутся: всѝ да́же до пра́здна сло́ва, да́же до по́мысла то́нка воздадя́тъ сло́во: вся́ко помышле́ніе человѣ́ческо и҆сповѣ́стся тебѣ̀, гл҃етъ прⷪро́къ (ѱало́мъ ѻ҃є). Ничто́же та́мѡ ѡ҆ста́вятъ без̾ и҆стяза́нія и҆ ка́зни: ничто́же бо скве́рно и҆ нечи́сто вни́детъ въ црⷭтво нбⷭное, глаго́летъ гдⷭь (А҆покал. глⷡа к҃а).

[г҃] Пре́жде сме́рти ви́димыя оѹ҆мира́й неви́димѡ грѣху̀: оѹ҆мерщвля́й ра́зумомъ плотскі̑я по́хѡти, да ѡ҆живе́ши гдⷭви дх҃омъ: ѡⷮрѣва́й се́рдце твоѐ ѡⷮ земна́гѡ пристра́стія, да вмѣсти́лище дх҃у ст҃о́му бу́деши: ꙗ҆́кѡ да и҆звѣ́стенъ своегѡ̀ спасе́нія бы́вши, со дерзнове́ніемъ во вре́мя и҆схо́да рече́ши: гото́во се́рдце моѐ, бж҃е, гото́во се́рдце моѐ, воспою̀ и҆ пою̀ во сла́вѣ мое́й (ѱало́мъ н҃ѕ). Ѡⷮ тлѣ́нія и҆ грѣха̀ рожде́нъ бы́вши, и҆́накѡ ѡⷮ тлѣ́нія и҆ грѣха̀ не свободи́шися, нижѐ къ вѣ́чному животу̀ пре́йдеши, то́чію сме́ртію и҆ разлуче́ніемъ.

[д҃] Тѣ́мже пре́жде всѣ́хъ ѻ҆́бщагѡ воскресе́нія тщи́ся оѹ҆ме́ршую грѣхо́мъ и҆ страстьмѝ безгрѣ́шіемъ и҆ безстра́стіемъ воскреси́ти ду́шу, и҆ жи́въ бы́ти всегда̀ гдⷭви. Да си́це воскре́сши ду́хомъ, не оѹ҆бои́шися ктому̀ вре́менныя сме́рти пло́тію: но па́че са́мъ є҆я̀ возжела́еши, во є҆́же всегда̀ бы́ти съ гдⷭемъ: и҆ во вре́мя всѣ́хъ и҆з̾ ме́ртвыхъ воста́нія, вну́трь су́щею благода́тію, ѡⷮвнѣ́ же нетлѣ́нныя пло́ти прія́тіемъ, ꙗ҆́кѡ свѣтоза́рная луча̀ просія́еши.

[є҃] Не оѹ҆води́ся по́хотію плотско́ю, ни красото́ю вре́менною: па́мятствуй, ꙗ҆́кѡ вся̑ сія̑ пра́хъ и҆ пе́пелъ су́ть. Па́мятствуй, ꙗ҆́кѡ вся́ка плотска́я по́хоть ражда́етъ тя́жесть: вся́ка плотска́я сла́сть прино́ситъ го́ресть. Па́мятствуй, ꙗ҆́кѡ всѝ оѹ҆мира́емъ, всѝ ꙗ҆́кѡ цвѣ́тъ оѹ҆вяда́емъ, и҆ ꙗ҆́кѡ сѣ́нь мимои́демъ, и҆дѣ́же ни ца́рь, ни кня́зь, ни бога́тъ, ни оѹ҆бо́гъ, ни во́инъ, ни граждани́нъ пощадѣ́нъ бу́детъ: но всѝ ра́внѣ серпо́мъ сме́ртнымъ пожа́ти бу́демъ.

[ѕ҃] Не мнѝ, ꙗ҆́кѡ дале́че є҆́сть сме́рть, ꙗ҆́кѡ є҆щѐ не ско́рѡ и҆ не а҆́біе оѹ҆́мреши: но помышля́й ꙗ҆́кѡ бли́зъ тебѐ оѹ҆жѐ є҆́сть: при ко́рени жи́зни твоея̀ сѣки́ра сме́ртная лежи́тъ, при две́рехъ суди́ще пред̾ ѻ҆чи́ма гро́бъ: земля̀ гото́ва, въ ню́же по́йдеши. Не мнѝ, ꙗ҆́кѡ и҆ні́и то́чію оѹ҆мира́ютъ, ты́ же не оѹ҆́мреши: и҆ кто̀ поживе́тъ и҆ не оѹ҆́зритъ сме́рти, глаго́летъ прⷪро́къ (ѱало́мъ п҃и); Оѹ҆мро́ша прⷪро́цы, оѹ҆мро́ша патріа́рси, а҆пⷭли, ст҃и́тели, оѹ҆мро́ша мч҃ницы, прпⷣбніи, оѹ҆мро́ша всѝ ст҃і́и, оѹ҆мро́ша кня́зи вели́цыи, велмо́жи, ца́ріе, и҆ всѝ ѡⷮ вѣ́ка бы́вшіи оѹ҆мро́ша: ты́ же ли то́чію є҆ди́нъ та́кѡ ѡ҆ста́неши; Не бу́ди безу́менъ и҆ слѣ́пъ: ꙗ҆́коже бо со и҆нѣ́ми зри́ши, си́це и҆ съ тобо́ю вся́кѡ неѡⷮмѣ́ннѡ то́жде сбу́дется.

[з҃] Бу́ди коегѡ́ждо днѐ, коегѡ́ждо часа̀ на сме́рть гото́въ: сме́рть вы́ну въ па́мяти свое́й и҆мѣ́й, не ѡ҆безпеча́йся никогда́же: въ ѻ҆́ньже бо ча́съ не мнитѐ, сн҃ъ чл҃вѣ́ческій пріи́детъ, глаго́летъ гдⷭь (Матѳ. заⷱ р҃г). Сме́рть ꙗ҆́кѡ та́ть є҆́сть, и҆ ꙗ҆́кѡ хи́щникъ: є҆гда̀ не ча́еши, тогда̀ наипа́че под̾и́детъ тя̀: тогда́ бо ѻ҆на̀ наипа́че подкрада́ти ѡ҆бы́че. Ꙗ҆́коже хотя́щему бо́льшую созда́ти жи́тницу, рече́но бы́сть: безу́мне, въ сію̀ но́щь и҆стя́жутъ ду́шу твою̀ ѡⷮ тебѐ, а҆ ꙗ҆̀же оѹ҆гото́ва, кому̀ бу́дутъ; та́кѡ собира́яй себѣ̀, а҆ не въ бг҃а богатѣ́яй (Лукѝ заⷱ ѯ҃ѕ).

[и҃] Нико́еже є҆́сть ѕло̀ благи̑мъ сме́рть, но ѡⷮ страсте́й ѡ҆блегче́ніе, и҆ съ гдⷭемъ безпрепина́тельное дх҃омъ соедине́ніе, и҆ сожи́тіе: ве́лія бо тягота̀ є҆́сть душѝ во пло́ти жи́ти, и҆ страсте́й наси́лованіе и҆мѣ́ти. Не бо́йся ты̀ сме́рти, то́чію въ безгрѣ́шіи гото́въ на ню̀ бу́ди: а҆́ще бо на сме́рть гото́въ бу́деши, сме́рти не оѹ҆бои́шися: а҆́ще гдⷭа всѣ́мъ се́рдцемъ возлю́биши, са́мъ є҆я̀ пре́жде жела́тельнѡ возжела́еши. Не бо́йся ты̀ сме́рти пло́тію, то́чію грѣха̀, и҆ ѡⷮ бг҃а ѡⷮлуче́нія ѕѣлѡ̀ блюди́ся. Не мню́ бо и҆́ныя му́ки вя́щшія, то́чію стра́стное грѣхо́вное связа́ніе, и҆ ѡⷮ бг҃а ѡⷮчужде́ніе: нижѐ и҆́но ца́рствіе небе́сное, то́чію ѡⷮ страсте́й свобожде́ніе, и҆ съ гдⷭемъ любо́вію соедине́ніе. Не боя́шеся се́й сме́рти, и҆́же си́це глаго́лаше: и҆зведѝ и҆з̾ темни́цы пло́ти и҆ страсте́й ду́шу мою̀, и҆сповѣ́датися и҆́мени твоему̀ (ѱало́мъ рм҃а). Не ма́лъ бо є҆́сть мра́къ и҆ тма̀ пло́ть и҆ страсте́й наси́лованіе. Что́ бо є҆́сть сме́рть; то́чію всеконе́чное ѡⷮ бг҃а ѡⷮчужде́ніе. Что̀ ли живо́тъ; то́чію къ бг҃у соверше́нное присоедине́ніе.

[ѳ҃] Гдѣ̀ ны́нѣ сла́вніи; гдѣ̀ бога́тіи; гдѣ̀ пи́щи и҆ питія̀ наслажда́ющіися; гдѣ̀ красото́ю и҆ благолѣ́піемъ лица̀ крася́щіися; гдѣ̀ по́хѡти и҆ жела̑нія своя̀ и҆сполня́ющіи; не вси́ ли сі́и сме́ртію сконча́шася; не всѣ́хъ ли земля̀ покры̀, и҆ па́мять и҆́хъ съ шу́момъ и҆счезѐ; Нѣ́сть ничто́же и҆звѣ́стно, люби́ти въ мі́рѣ, кромѣ̀ бг҃а. А҆́ще бо возлю́биши сла́ву, и҆счеза́етъ: а҆́ще возлю́биши бога́тство, погиба́етъ: а҆́ще возлю́биши сла̑сти и҆ красоту̀ плотску́ю, въ смра́дъ и҆ гно́й ѡ҆браща́ется. Ничто́же по сме́рти сія̑ помо́гутъ, то́чію ко́ждо на́съ ѡⷮ дѣ́лъ, и҆лѝ просла́вится, и҆лѝ ѡ҆су́дится.

[і҃] Зрѝ, ꙗ҆́кѡ всю́ду суета̀ є҆́сть, всю́ду и҆счезнове́ніе: нѣ́сть нигдѣ́же въ мі́рѣ се́мъ и҆звѣ́стнагѡ наслажде́нія и҆ поко́я, то́чію въ са́момъ гдⷭѣ бз҃ѣ. Мі́ръ бо се́й превра́тенъ є҆́сть, и҆ оѹ҆до́бь премѣни́теленъ: ра́дость є҆гѡ̀ со ско́рбію, весе́ліе съ печа́лію, сла́ва прело́жна, бога́тство и҆счеза́емо, красота̀ въ пра́хъ и҆ пе́пелъ прелага́ема, наслажде́ніе плотско́е въ смра́дъ и҆ гно́й претворя́емо, послѣди́ же вся̑ сія̑ внеза́пною сме́ртію пресѣка́ются и҆ скончава́ются: ничто́же благонаде́жно, ничто́же вѣ́чно, то́чію гдⷭь бг҃ъ є҆ди́нъ, и҆ є҆гѡ̀ прест҃а́я бл҃года́ть.