Ча́сть в҃

Глава̀ деся́тая

Ѡ҆ є҆́же ꙗ҆́кѡ нѣ́сть ни во є҆ди́ной мі́ра сегѡ̀ ве́щи поко́я, то́чію во є҆ди́номъ гдⷭѣ бз҃ѣ вѣ́чный є҆́сть поко́й.

Въ мі́рѣ се́мъ вре́менномъ поко́я и҆ оѹ҆тѣше́нія не и҆щѝ, никогда́же бо є҆гѡ̀ ѡ҆бря́щеши: а҆́ще и҆ всѐ оѹ҆хищре́ніе пока́жеши, тишины̀ и҆ и҆звѣ́стнагѡ оѹ҆тѣше́нія въ вѣ́цѣ се́мъ не наслади́шися: не бо̀ мо́жетъ сіѐ тлѣ́нное и҆ вре́менное оѹ҆строе́ніе дарова́ти ми́ръ и҆ поко́й душѣ̀, а҆́ще не гдⷭь са́мъ бл҃года́тію свое́ю оѹ҆поко́итъ, и҆ ми́ръ є҆́й да́руетъ, ꙗ҆́коже са́мъ речѐ: ми́ръ мо́й даю̀ ва́мъ: ми́ръ мо́й ѡ҆ставля́ю ва́мъ (І҆ѡа́н. заⷱ м҃и). Во мнѣ̀ ми́ръ и҆мѣ́йте и҆ поко́й, а҆ не въ чесо́мъ и҆́номъ.

[в҃] Внемлѝ, а҆́ще гдѣ̀ ми́ръ и҆ поко́й въ чесо́мъ на́йдеши; а҆́ще гдѣ̀ тишину̀ и҆ и҆звѣ́стное оѹ҆тѣше́ніе получи́ши; въ сла́вѣ ли мі́ра сегѡ̀; въ бога́тствѣ ли вре́менномъ; въ пи́щи ли и҆ питіѝ; въ сласте́хъ ли и҆ по́хотехъ плотски́хъ; во снѣ̀ и҆лѝ лѣ́ности; въ красотѣ̀ ли и҆ любвѝ плотстѣ́й; и҆лѝ въ чесо́мъ и҆но́мъ; но нѣ́сть нигдѣ́же ѡⷮ си́хъ ни є҆ди́нагѡ ми́ра и҆ поко́я, то́чію непреста́нное душѝ томле́ніе и҆ мяте́жъ.

[г҃] Но оѹ҆́бѡ внемлѝ, а҆́ще є҆́сть во сла́вѣ и҆ почита́ніи сегѡ̀ мі́ра поко́й и҆ тишина̀; нѣ́сть вои́стинну: сла́ва бо мі́ра сегѡ̀ вско́рѣ и҆змѣня́ется, па́че же смѣше́нна є҆́сть съ безче́стіемъ и҆ ѡ҆болга́ніемъ. Дне́сь мно́гажды человѣ́цы почита́ютъ, оѹ҆́трѡ же безче́стятъ: дне́сь дѡ́брая вѣща́ютъ, оѹ҆́трѡ же ѕла̑я: є҆ди́ни сла́вятъ и҆ почита́ютъ, друзі́и же безче́стятъ и҆ ху́лятъ. Дне́сь нѣ́кто сла́вимъ и҆ почита́емъ бѣ̀, оѹ҆́трѡ же внеза́пу ѡ҆безче́стится. Не пребыва́етъ сла́ва мі́ра сегѡ̀ никогда́же ѡⷮвсю́ду ра́внѣ во є҆ди́ной мѣ́рѣ стоя́ща, но всегда̀ ꙗ҆́кѡ луна̀ непреста́ннѡ и҆змѣня́ется.

[д҃] Но въ бога́тствѣ ли и҆ и҆мѣ́ніи є҆́сть поко́й и҆ тишина̀; Нѝ оѹ҆̀бо: бога́тство бо вско́рѣ и҆счеза́емо и҆ погиба́емо быва́етъ, и҆ со ѕѣ́льнымъ попече́ніемъ и҆ молво́ю быва́ти ѡ҆бы́че, и҆ никогда́же ми́ра и҆ поко́я человѣ́ку да́руетъ. Є҆ли́кѡ вя́щшее бога́тство, толи́кѡ мно́жайшыя молвы̑ и҆ попечє́нія. А҆́ще кто̀ и҆ всегѡ̀ мі́ра бога́тство стя́жетъ, вся́кѡ ѡⷮ мо́лвъ и҆ ѡⷮ жела́нія никогда́же преста́нетъ: не оѹ҆довлева́ется си́мъ, но вя́щшагѡ є҆щѐ тре́буетъ: са́мъ себѣ̀ вѣ́ры не є҆́млетъ, всегда̀ въ болѣ́зни и҆ стра́сѣ є҆́сть, да ѡⷮ чесогѡ̀ не ѡ҆скудѣ́етъ. Ѡⷮ всѣ́хъ и҆́мать за̑висти, ѡⷮ всѣ́хъ и҆́мать рвє́нія, никогда́же ми́рну ду́шу во днѝ и҆ въ нощѝ бы́ти ѡ҆ставля́етъ.

[є҃] Но въ пи́щи ли и҆ питіѝ и҆ сласте́хъ плотски́хъ є҆́сть поко́й; Ника́коже: что́ бо за поко́й є҆́сть ѡ҆б̾я́дшемуся и҆ оѹ҆пи́вшемуся; то́чію дме́ніе, рыга́ніе, хрехота́ніе, сири́ща ѡ҆тягче́ніе, чре́ву разсѣда́ніе: си́мъ оѹ҆слади́ся, си́мъ же ѡ҆горчи́ся: ѡ҆пи́вшемуся же та́кожде главоболѣ́ніе, рука́мъ трясе́ніе, ра́зума помраче́ніе, и҆змѣне́ніе зра́ка, къ мл҃твамъ ѡ҆каменѣ́ніе, и҆ ѡⷮчужде́ніе гдⷭни бл҃года́ти, послѣди́ же ско́рбь и҆ ѕѣ́льная печа́ль, па́че же и҆ са́мая та̀ пи́ща и҆ питіѐ со ѕѣ́льною молво́ю и҆ попече́ніемъ быва́ти ѡ҆бы́че.

[ѕ҃] Но во снѣ̀ ли и҆ лѣ́ности є҆́сть поко́й и҆ тишина̀; Нѣ́сть та́кѡ: нижѐ въ си́хъ и҆звѣ́стный поко́й и҆ тишина̀, но па́че разслабле́ніе, нечу́вствіе, оѹ҆ны́ніе, тма̀, помраче́ніе, тягота̀, безнаде́ждіе, тщета̀: ѡ҆сну́ша бо, речѐ сно́мъ свои́мъ, и҆ ничто́же ѡ҆брѣто́ша (ѱало́мъ ѻ҃є). И҆ са́мое то̀ плотско́е ѡ҆почива́ніе на мно́зѣ пріе́млемо, тя́жесть, нездра́віе и҆ разслабле́ніе прино́ситъ: и҆ па́че во снѣ̀ нѣ́сть и҆звѣ́стнагѡ поко́я, но мечта̑нія нощна́я помрачє́нная, мечта̑нія лѡ́жна, прелє́стна, бѣсѡ́вская, и҆́но ничто́же.

[з҃] Но въ любви́ ли плотско́й и҆ сладостра́стномъ безслове́сномъ похотѣ́ніи є҆́сть поко́й; Нѣ́сть оѹ҆́бѡ ни въ се́мъ поко́я: любо́вь бо плотска́я, нѣ́сть и҆́стинная любо́вь, но ло́жная, лицемѣ́рная, преле́стная, недоумѣ́нная, дото́лѣ, доне́лѣ вся̑ по во́ли и҆ по стра́сти су́ть. Є҆ли́кѡ наипа́че кого̀ пло́тски возлю́биши, толи́кѡ наипа́че безслове́снѡ тому̀ порабо́тишися: толи́кѡ наипа́че люби́мый лука́вствуетъ, оѹ҆хищря́етъ, растлѣва́ется, развраща́ется: пред̾ ѻ҆чи́ма си́це, за ѻ҆чи́ма и҆́накѡ, горди́тся, самолю́бствуетъ. И҆ та́кѡ соверше́нныя и҆́стинныя тишины̀ и҆ поко́я въ любвѝ плотско́й никогда́же ѡ҆бря́щеши, то́чію молву̀ и҆ смуще́ніе, пре́лесть же и҆ безслове́сное связа́ніе, и҆ ѡⷮ бг҃а ѡⷮчужде́ніе.

[и҃] Тѣ́мже всу́е мяте́тся вся́къ человѣ́къ живы́й, всу́е мяте́тся вся́къ земноро́дный, оѹ҆́бѡ ѻ҆́бразомъ хо́дитъ человѣ́къ, ѻ҆ба́че всу́е мяте́тся, глаго́летъ прⷪро́къ (ѱало́мъ л҃и). Всу́е вои́стинну мяте́тся вся́къ человѣ́къ живы́й, и҆ща̀ въ земны́хъ и҆ тлѣ́ющихъ ве́щехъ поко́я: но никогда́же ѡ҆бря́щетъ є҆гѡ̀. Сегѡ̀ ра́ди ми́луя и҆ щадя̀ гдⷭь своѐ созда́ніе, лу̑чшая ѡ҆ на́съ предзрѣ́вши, оѹ҆мы́сленнѡ сократѝ сію̀ жи́знь на́шу. да не на мно́зѣ всу́е тружда́емся и҆ безслове́снѡ ѡ҆ мимотеку́щихъ ве́щехъ пече́мся: ꙗ҆́коже и҆ са́мъ гдⷭь къ ма́рѳѣ многопеку́щейся глаго́лаше: ма́рѳо, речѐ, ма́рѳо, пече́шися, и҆ мо́лвиши ѡ҆ мно́зѣ, є҆ди́но же є҆́сть на потре́бу. Марі́а же немногопеча́льна, бл҃гу́ю ча́сть и҆збра̀ гдⷭа, ꙗ҆́же не ѡⷮи́мется ѡⷮ нея̀ во вѣ́ки (Лукѝ заⷱ н҃д). Показу́етъ гдⷭь, ꙗ҆́кѡ є҆ли́кѡ а҆́ще человѣ́къ, наипа́че всу́е мяте́тся, сокро́вищствуетъ, но не вѣ́сть кому̀ собира́етъ. Нѣ́сть оѹ҆́бѡ ни є҆ди́нагѡ въ мі́рѣ се́мъ и҆звѣ́стнагѡ, ни во є҆ди́ной ве́щи поко́я и҆ тишины̀, то́чію непреста́нный мяте́жъ и҆ ѕѣ́льное душѝ томле́ніе.

[ѳ҃] Въ бз҃ѣ же то́чію є҆ди́номъ, и҆ въ бл҃года́ти дх҃а прест҃а́гѡ ми́ръ, тишина̀ и҆ вѣ́чный поко́й: та́мѡ ра́дость, та́мѡ весе́ліе, та́мѡ безпеча́ліе, безсме́ртіе, безбоя́знство: та́мѡ ми́ръ нера́тенъ, поко́й непремѣ́ненъ: ра́дость неконча́емая, присносу́щное наслажде́ніе, при́снѡ наслажда́ющее человѣ́ка. Возлюбѝ то́чію и҆́стиннѡ всѣ́мъ се́рдцемъ гдⷭа, и҆ вкуси́вши, и҆звѣ́стнѣ позна́еши, ꙗ҆́кѡ бла́гъ є҆́сть гдⷭь, и҆ са́мъ разлуче́нія ѡⷮ тѣ́ла, и҆ съ гдⷭемъ всегда́шнягѡ пребыва́нія ѕѣлѡ̀ возжела́еши. Ѻ҆́нъ бо є҆́сть ще́дръ и҆ ми́лостивъ, бл҃гоутро́бенъ, ѻ҆ц҃ъ щедро́тъ, и҆ бг҃ъ вся́кія оѹ҆тѣ́хи. Ѻ҆́нъ є҆́сть вѣ́чный поко́й, є҆ди́нъ то́чію ѻ҆́нъ са́мъ ду́шу на́шу оѹ҆поко́итъ и҆ оѹ҆тѣ́шитъ, и҆ рече́тъ є҆́й: пріидѝ вся̀ до́брая бли́жняя моя̀, и҆ поро́ка нѣ́сть въ тебѣ̀: грядѝ ѡⷮ лѷва́на, невѣ́сто, грядѝ ѡⷮ лѷва́на: оѹ҆се́рдны на́съ сотворѝ сестро̀ на́ша невѣ́сто, ꙗ҆́коже глаго́летъ соломѡ́нъ (Пѣ́снь пѣ́сней глⷡа д҃). и҆ та́кѡ всѣ́хъ бла̑гъ наслѣ́дницу ю҆̀ себѣ̀ сотвори́тъ.

[і҃] Сегѡ̀ ра́ди бг҃а є҆ди́наго взыску́й, бг҃а є҆ди́наго всѣ́мъ срⷣцемъ возлюбѝ, да поко́й вѣ́чный и҆ ти́хое приста́нище душѝ свое́й ѡ҆бря́щеши, и҆ присносу́щнагѡ наслажде́нія сподо́бишися. любо́вь бо бж҃ія є҆́сть присносу́щна, жела́ніе є҆гѡ̀ неисповѣди́мо, и҆ оѹ҆тѣше́ніе є҆гѡ̀ никогда́же престае́мо, при́снѡ оѹ҆веселя́ющее ду́шу человѣ́чу: вся́ку любо́вь плотску́ю, вся́ко жела́ніе земно́е, тма́ми тє́мъ превосходя́щее. любо́вь бж҃ія ненасы́тима є҆́сть, жела́ніе є҆гѡ̀ непрестае́мо, всю̀ ду́шу свѣ́тлу, зра́чну, просвѣще́нну, ра́достну, ве́селу, безстра́стну, безпеча́льну, нелѣ́ностну, неуны́лу твори́тъ, не сотре́нну, нижѐ скуча́ему, не а҆́лчну, не жа́ждну, но при́снѡ всѣ́хъ бла̑гъ преисполня́ему и҆ насыща́ему оѹ҆стро́итъ. Ѡ҆тре́тъ гдⷭь вся́ку сле́зу ѡⷮ ѻ҆́чію всѣ́мъ се́рдцемъ є҆гѡ̀ возлюби́вшихъ, и҆ ѡⷮи́метъ вся́кое воздыха́ніе (А҆пока́л. глⷡа з҃). Ѡ бжⷭтвенныя любвѐ! Ѡ бжⷭтвеннагѡ жела́нія! Ѡ бжⷭтвенныя сла́дости и҆ оѹ҆тѣше́нія! бл҃же́нъ є҆́сть, и҆́же сегѡ̀ сподо́бится: бл҃же́нъ є҆́сть, и҆́же сіѐ пріи́метъ ѡ҆ хрⷭтѣ̀ і҆и҃сѣ гдⷭѣ на́шемъ!