Ча́сть г҃

Глава̀ пе́рвая

Ѡ҆ є҆́же не сребролю́бствовати, но на бг҃а то́чію є҆ди́наго и҆мѣ́ти оѹ҆пова́ніе.

Бога́тство а҆́ще тече́тъ, не прилага́йте се́рдца, глаго́летъ прⷪро́къ (ѱало́мъ ѯ҃а). Ве́ліе є҆́сть безу́міе прилага́ти се́рдце ко зла́ту, и҆ оѹ҆пова́ти на ги́бнущее лихоима́ніе: не надѣ́йся оѹ҆́бѡ на тлѣ́нное бога́тство, нижѐ въ слѣ́дъ зла́та и҆дѝ, (любя́й, речѐ, зла́то, не ѡ҆правди́тся:) но на бг҃а жи́ва оѹ҆пова́ніе своѐ полага́й, и҆́же пребыва́етъ во вѣ́ки, и҆́же вся̑ сотворѝ: зла́то бо и҆ сребро̀ дѣла̀ су́ть ру́къ человѣ́ческихъ: скорѣ́е ѻ҆но̀ поги́бнетъ, не́же собра́лъ є҆сѝ.

[в҃] Не бу́ди ску́пъ, свя́занъ сы́й сребролю́біемъ, къ подая́нію тре́бующымъ, да не невѣ́ріемъ ѡ҆блада́нъ бу́деши. Не бо́йся, да не ѡ҆скудѣ́етъ тѝ что̀ въ мі́рѣ творя́щему бл҃го́е. Толи́кѡ бо мі́ръ стои́тъ, и҆ ничто́же въ не́мъ є҆щѐ досе́лѣ не ѡ҆скудѣва́етъ: ни со́лнце и҆змѣни́ся, ни рѣ́ки ѡⷮ тече́нія преста́ша, нижѐ земля̀, ꙗ҆̀же потрє́бная, ражда́ти преста̀: є҆ще́ бо зла́то и҆ сребро̀ ражда́етъ, нижѐ ражда́ти когда̀ преста́нетъ, доне́лѣже мі́ръ се́й стои́тъ. Є҆ди́но бо въ зе́млю вхо́дитъ, друго́е же ѡⷮ нея̀ ражда́ется, ꙗ҆́коже зла́то и҆ сребро̀, си́це и҆ вся̀ жи́зни на́шей потрє́бная.

[г҃] Не бо́йся ѡ҆скудѣ́нія въ че́мъ: не и҆мѣ́лъ бо є҆сѝ пре́жде си́хъ ничто́же, дне́сь же и҆́маши: а҆́ще не и҆́маши, и҆мѣ́ти бу́деши: не ѡ҆скудѣ́ бо вся̑ созда́вый, нижѐ когда̀ ѡ҆скудѣ́етъ: сему̀ крѣ́пкѡ вѣ́руй, не ѡ҆скудѣ̀ вся̑ ѡⷮ небытія̀ въ бытіѐ приведы́й, дая́й пи́щу а҆́лчущымъ, и҆ насыща́яй вся́кое живо́тно всегѡ̀ преиз̾ѻби́ленъ є҆́сть. Не бу́ди ску́пъ въ подая́ніи прося́щымъ, и҆ не ѡⷮвраща́йся, на є҆гѡ́же и҆́мя про́ситъ: да́й вся̑ тѝ даю́щему, да воспріи́меши ѡⷮ негѡ̀ стори́цею.

[д҃] Не ла́комися на чужды́я вє́щи, и҆ своя̑ бо вся̑ не въ до́лзѣ ѡ҆ста́виши: не ла́комися на су́етное лихоима́ніе ко́ихлибо веще́й: є҆гда́ бо ѡⷮсю́ду ѡⷮи́деши, ничто́же съ собо́ю во́змеши. На́гъ въ мі́ръ прише́лъ є҆сѝ, на́гъ ѡⷮи́деши: мно́зи бо мнѡ́гая и҆мѣ́яху, ѻ҆ба́че всѐ ѡ҆ста́вльше, тщи́ма рука́ма, и҆ наго́ю душе́ю ѡⷮсю́ду ѡⷮидо́ша. Не жела́й, нижѐ надѣ́йся на мнѡ́гая собра̑нія, да не оѹ҆подо́бишися бога́тому, ма́лую разо́ршему жи́тницу, и҆ бо́льшую созда́вшему, и҆ глаго́лющему: душѐ, и҆́маши мнѡ́га бла̑га лежа̑щая на лѣ̑та мнѡ́га, почива́й, ꙗ҆́ждь, пі́й, весели́ся, и҆ слы́шавшему: безу́мне, въ сію̀ но́щь и҆стя́жутъ ду́шу твою̀ ѡⷮ тебѐ, а҆ ꙗ҆̀же оѹ҆гото́валъ є҆сѝ, кому̀ бу́дутъ; глаго́летъ гдⷭь (Лукѝ заⷱ ѯ҃ѕ).

[є҃] Не мнѡ́гая гонѝ, но ѡ҆ ма́лыхъ благода́ренъ бу́ди. Вси́ бо мнѡ́гая го́нятъ, всѝ мно́гихъ взыску́ютъ, всѝ ѡ҆ все́мъ пеку́тся, ѻ҆ба́че и҆ малѣ̑йшая вся̑ ѡ҆ста́вльше, ничто́же ѡⷮсю́ду съ собо́ю взя́ти мо́гутъ. Лу́чше ма̑лая и҆мѣ́ти благода́рнѣ, не́же безслове́снѡ гони́ти вели̑кая: лу́чше ма́лое пра́веднику па́че бога́тства грѣ́шныхъ мно́га, глаго́летъ прⷪро́къ (ѱало́мъ л҃ѕ). Вся̑ бо, ꙗ҆̀же здѣ̀ стя́жеши, и҆ ꙗ҆̀же приѡбря́щеши, ѡ҆ста́нутъ на землѝ: ты́ же вся̑ ѡ҆ста́вльши, са́мъ во гро́бъ всели́шися, и҆ наго́ю душе́ю та́мѡ по́йдеши.

[ѕ҃] Не прилага́й се́рдца твоегѡ̀ ко зла́ту и҆ сребру̀, и҆ вся́кому земно́му лихоима́нію, да не и҆ са́мъ въ подземна̑я сни́деши: и҆дѣ́же бо, речѐ, сокро́вище ва́ше, та́мѡ и҆ се́рдце ва́ше бу́детъ (Матѳ. заⷱ з҃і). Не бу́ди свя́занъ сребролю́біемъ, да не ѡⷮ любвѐ бж҃ія ѡⷮве́рженъ бу́деши: не ску́пствуй въ раздая́ніи тре́бующымъ, да не и҆счезнове́ніе во свои́хъ сѝ пріи́меши: не стѣсня́й свои́хъ ру́къ твори́ти ми́лостыни, да не млⷭрдія бж҃ія двє́ри себѣ̀ затвори́ши, и҆ внѣ̀ черто́га Хрⷭто́ва ѡ҆ста́неши. Бл҃же́нъ разумѣва́яй на ни́ща и҆ оѹ҆бо́га, въ де́нь лю́тъ и҆зба́витъ є҆го̀ гдⷭь, глаго́летъ прⷪро́къ (ѱало́мъ м҃): и҆ бл҃же́ни ми́лостивіи, ꙗ҆́кѡ ті́и поми́ловани бу́дутъ, речѐ гдⷭь (Матѳ. заⷱ і҃).

[з҃] Не бу́ди ꙗ҆́тъ сребролю́біемъ, да не ꙗ҆́кѡ і҆дѡлослужи́тель оѹ҆ бг҃а вмѣни́шися: сребролю́біе бо второ́е є҆́сть і҆дѡлослуже́ніе, гл҃етъ а҆пⷭлъ. Сребролю́біемъ и҆ ску́постію ꙗ҆́тъ кто̀ бы́вый, ꙗ҆́коже а҆́дъ ненасы́тимь є҆́сть, всегда̀ ѡⷮ всѣ́хъ лю́битъ взима́ти, дая́ти же никому̀ ничесѡ́же: а҆́ще и҆ всегѡ̀ мі́ра бога́тство стяжа́лъ бы, не насыща́ется: ѻ҆́чи глубоча́йшыя и҆́мать про́пастнагѡ оѹ҆до́лія, никогда́же наполня́емы и҆ насыща́емы бы́ти могу́щыя. а҆́ще и҆ мнѡ́га и҆́мать человѣ́къ, ѻ҆ба́че є҆щѐ бо́льшихъ хо́щетъ: са́мъ себѣ̀ вѣ́ры не є҆́млетъ, а҆́ще и҆ безчи́сленное бога́тство пріи́метъ, ѻ҆ба́че є҆щѐ не наполня́ется, и҆ никогда́же ѡⷮ жела́нія престае́тъ, до́ндеже земле́ю покрове́нъ бу́детъ.

[и҃] Бу́ди ще́дръ и҆ ми́лостивъ, да млⷭтива гдⷭа въ де́нь суда̀ душѣ̀ свое́й ѡ҆бря́щеши, почто̀ и҆́маши ску́пствовати всу́е; ничто́же бо во́змеши, но на́гъ ѡⷮсю́ду ѡⷮи́деши. Мно́зи мнѡ́га и҆ безчи́слєнная сокрѡ́вища, безчи́слєнная бога̑тства сниска́ша, ѻ҆ба́че ничто́же съ собо́ю взе́мше, всѐ сокро́вище своѐ, всѐ бога́тство своѐ и҆нѣ̑мъ на землѝ ѡ҆ста́виша, тщи́ма же рука́ма и҆ посра́мленною душе́ю ѡⷮсю́ду ѡⷮидо́ша: и҆ са́ми во гро́бѣ и҆стлѣ́ша, бога́тство же и҆́хъ без̾ вѣ́сти и҆счезѐ, и҆ па́мять и҆́хъ съ шу́момъ поги́бе.

[ѳ҃] Всу́е мяте́тся вся́къ человѣ́къ живы́й, сокро́вищствуетъ, и҆ не вѣ́сть кому̀ собере́тъ я҆̀, гл҃етъ прⷪро́къ (ѱало́мъ л҃и). Вои́стинну всу́е мяте́тся, и҆́же на землѝ сокро́вищствуетъ, не вѣ́сть бо кому̀ та̑я ѡ҆ста́витъ, не вѣ́сть кто̀ и҆́хъ наслѣ́дникъ бу́детъ. Бл҃же́нъ человѣ́къ є҆́сть то́й, и҆́же всѐ своѐ сокро́вище, всѐ своѐ бога́тство, всѐ своѐ оѹ҆пова́ніе на бг҃а возлага́етъ, и҆́же сокро́вищствуетъ на нб҃сѝ, и҆дѣ́же ни че́рвь, ни тля̀ тли́тъ, и҆дѣ́же та́тіе не подко́пываютъ, ни кра́дутъ: и҆дѣ́же бо сокро́вище ва́ше, та́мѡ и҆ се́рдце ва́ше бу́детъ, гл҃етъ гдⷭь (Матѳ. заⷱ з҃і).

[і҃] Тѣ́мже не ла́комися на мно́гое собра́ніе зла́та и҆ сребра̀, дро́ждія земна́гѡ: вся̑ бо здѣ̀ ѡ҆ста́нутъ, ты́ же са́мъ въ зе́млю ѡ҆брати́шися, ѡⷮ нея́же взя́тъ є҆сѝ. Не ла́комися на вє́щи мимотеку́щыя: и҆ са́мъ бо невѣ́ченъ є҆сѝ. не ѕѣлѡ̀ гонѝ сія̑, ꙗ҆̀же и҆ не хотя̀ ѡ҆ста́виши, не прилага́й срⷣца твоегѡ̀ къ настоя́щымъ ве́щемъ, и҆́бо не вдо́лзѣ ты̑я ѡⷮ тебѐ ѡⷮи́дутъ. Презира́й дѡ́лняя, ꙗ҆́кѡ да го́рними ѡ҆богати́шися: презира́й мимотеку̑щая, ꙗ҆́кѡ да вѣ̑чная пріи́меши, и҆ присносу́щныхъ бл҃гъ сподо́бишися, ѡ҆ хрⷭтѣ̀ і҆и҃сѣ гдⷭѣ на́шемъ.