Ча́сть г҃

Глава̀ тре́тія

Ѡ҆ є҆́же не гнѣ́ватися, и҆ не памятоѕло́бствовати ни на кого́же.

Вся́къ гнѣ́ваяйся на бра́та своего̀ всу́е, пови́ненъ є҆́сть суду̀, глаго́летъ гдⷭь (Матѳ. заⷱ в҃і). Не гнѣ́вайся ни на є҆ди́наго человѣ́ка, а҆́ще и҆ ѕѣлѡ̀ ѡⷮ когѡ̀ ѡ҆скорбле́нъ бу́деши: гнѣ́въ бо му́жа пра́вды бж҃ія не содѣ́ловаетъ, глаго́летъ а҆пⷭлъ (І҆а́к. заⷱ н҃а). Со́лнце да не за́йдетъ во гнѣ́вѣ ва́шемъ: вся́ка го́ресть, и҆ гнѣ́въ, и҆ ꙗ҆́рость, и҆ хула̀ да во́змется ѡⷮ ва́съ во вся́кою ѕло́бою: быва́йте же другъдру́гу бла́зи, милосе́рди, проща́юще другъдру́гу, ꙗ҆́коже и҆ бг҃ъ во хрⷭтѣ̀ прости́лъ є҆́сть ва́мъ, глаго́летъ а҆пⷭлъ (Є҆феⷭ. заⷱ ск҃з).

[в҃] Блюди́ся и҆ благосло́вна гнѣ́ва, да не смути́ши ꙗ҆́ростію душе́внагѡ своегѡ̀ ѻ҆́ка: смяте́ся бо, речѐ, ѡⷮ ꙗ҆́рости ѻ҆́ко моѐ, ѡ҆бетша́хъ во всѣ́хъ вразѣ́хъ мои́хъ (ѱало́мъ ѕ҃), ни ѡ҆ че́мже ѡⷮню́дъ ни на кого̀ гнѣ́ватися до́лженъ є҆сѝ, то́чію а҆́ще кто̀ ѡⷮ бг҃а и҆ любвѐ є҆гѡ̀ ѡⷮлуча́лъ бы тя̀. А҆́ще же не ѡⷮлуча́етъ тя̀ никто́же, всу́е гнеѣ́ваешися: ѻ҆ба́че, никто́же никого́же ѡⷮ бг҃а и҆ ѡⷮ любвѐ є҆гѡ̀, не то́чію человѣ́къ, но нижѐ ѻ҆́гнь, ни ме́чь ѡⷮлучи́ти возмо́жетъ, глаго́летъ а҆пⷭлъ (Ри́м. заⷱ ч҃ѳ).

[г҃] Сегѡ̀ ра́ди преста́ни ѡⷮ гнѣ́ва, и҆ ѡ҆ста́ви ꙗ҆́рость: не ревну́й є҆́же лука́вновати, ꙗ҆́кѡ лука́внующіи потребя́тся, терпя́щіи же гдⷭа, ті́и наслѣ́дятъ зе́млю, глаго́летъ прⷪро́къ (ѱало́мъ л҃ѕ). Нѣ́сть въ мі́рѣ ниеди́ныя сицевы́я ве́щи, ѡ҆ не́йже благосло́внѣ раздража́тися, и҆ ѡ҆скорбля́тися безпа́мятнѡ на кого̀ и҆мѣ́лъ бы є҆сѝ, а҆́ще и҆ ѕѣлѡ̀ мни́ши бы́ти ну́жно и҆ потре́бно, но не ѡ҆бря́щеши, то́чію ѡ҆ сла́вѣ бж҃іей, и҆ ѡ҆ презрѣ́ніи є҆гѡ̀ за́повѣдей: ѻ҆ба́че и҆ сіѐ съ ра́зумомъ, да не ка́кѡ и҆справля́я и҆ны́хъ, сама́го себѐ повреди́ши.

[д҃] Нигдѣ́же слы́шимъ гдⷭа ꙗ҆ря́щася, и҆ ѕѣ́льнѣ гнѣ́вающася на согрѣша́ющихъ, но кро́тка и҆ долготерпѣли́ва. Научи́теся, речѐ, ѡⷮ менѐ, не ꙗ҆́рости, ни гнѣ́ва, но ꙗ҆́кѡ кро́токъ є҆́смь и҆ смире́нъ се́рдцемъ, и҆ ѡ҆бря́щете поко́й душа́мъ ва́шымъ (Матѳ. заⷱ м҃г). И҆ є҆гда̀ оѹ҆ченицы̀ гнѣ́вающеся на согрѣша́ющихъ, глаго́лаху: гдⷭи, хо́щеши ли, рече́ма, да ѻ҆́гнь сни́детъ съ нб҃сѐ, и҆ потреби́тъ и҆̀хъ; Ѻ҆́нъ же запретѝ и҆́ма, ре́къ: не вѣ́ста, ко́егѡ дх҃а є҆ста̀ (Лукѝ заⷱ м҃и). И҆ на́съ наказу́я глаго́лаше: а҆́ще ѡⷮпуща́ете человѣ́кѡмъ согрѣшє́нія и҆́хъ, ѡⷮпу́ститъ и҆ ва́мъ ѻ҆ц҃ъ ва́шъ нбⷭный: а҆́ще ли не ѡⷮпуща́ете человѣ́кѡмъ согрѣше́ній и҆́хъ, ни ѻ҆ц҃ъ ва́шъ нбⷭный ѡⷮпу́ститъ ва́мъ согрѣше́ній ва́шихъ (Матѳ. заⷱ з҃і).

[є҃] Но оѹ҆́бѡ рече́ши: ѡ҆би́дѣлъ мѝ ѻ҆́нъ, ѕлосло́вилъ мя̀, безче́стилъ мя̀ пред̾ всѣ́ми, ѕла̑я мѝ мы́слитъ, ѕла̑я мѝ твори́тъ, вели́ко мѝ ѕло̀ содѣ́ла: кто́ оѹ҆́бѡ вя́щше ѡ҆би́дѣнъ бы́сть па́че бг҃а; кто̀ ѕлосло́вимь, безче́стимь, ху́лимь бы́сть па́че гдⷭа; ꙗ҆́кѡ біе́нъ зауше́нъ, ѡ҆плева́нъ бы́сть, ра́спятъ, и҆ копіе́мъ въ ре́бра прободе́нъ бы́сть: ѻ҆ба́че не памятоѕло́бствоваше, и҆ не гнѣ́вашеся, но и҆ на крⷭтѣ̀ оѹ҆мира́я моля́шеся за согрѣша́ющихъ, глаго́ля: ѻ҆́ч҃е, ѡⷮпустѝ и҆̀мъ, не вѣ́дятъ бо, что̀ творя́тъ (Лукѝ заⷱ р҃м).

[ѕ҃] Кто̀ памятоѕло́бствуя, и҆ безпа́мятнѣ гнѣ́ваяся, что̀ бла́го и҆спра́ви; кто̀ не и҆мѣ́яй кро́тости и҆ долготерпѣ́нія, ку́ю соверше́нну добродѣ́тель, и҆лѝ побѣ́ду показа̀; Никто́же. А҆пⷭли бо, а҆́ще бы безслове́снѡ ꙗ҆ри́лися, и҆ гнѣ́валися на согрѣша́ющихъ, ниеди́наго бы на пу́ть спасе́нія наста́вили, ниеди́наго бы ко хрⷭту̀ привлеклѝ. А҆́ще нѣ́когда и҆ ѡ҆жесточа́хуся на согрѣша́ющихъ, ѻ҆ба́че не ꙗ҆ря́щеся и҆ без̾ па́мяти гнѣ́вающеся, но благоразу́мнѡ съ долготерпѣ́ніемъ, бг҃у ѡ҆ согрѣша́ющихъ моля́щеся, и҆справля́ху и҆ нака́зоваху и҆̀хъ.

[з҃] Смотри́тельнѣ ѡⷮ бг҃а оѹ҆стро́ена є҆́сть ма́ти пчела́мъ, не и҆мѣ́ти въ себѣ̀ жа́ла: а҆́ще бо и҆мѣ́ла бы, всѣ́хъ бы оѹ҆мерщвля́ла свои́мъ оѹ҆грызе́ніемъ. Сѐ ѻ҆́бразъ є҆́сть старѣ́йшинамъ: старѣ́йшинѣ бо вся́ко ѡⷮрече́но є҆́сть и҆мѣ́ти въ себѣ̀ забве́нный гнѣ́въ и҆ ꙗ҆́рость, да не всѣ́хъ повину́ющихся оѹ҆мерщвля́етъ свои́мъ ꙗ҆́ростнымъ нападе́ніемъ. Бу́ди оѹ҆́бѡ ты̀ побѣжда́яй благи́мъ ѕло́е, а҆ не ѕло́е ѕлы́мъ: ѻ҆гне́мъ бо ѻ҆гня̀ не оѹ҆гаси́ши, но водо́ю: нижѐ ꙗ҆́рости ꙗ҆́ростію побѣди́ши, но кро́тостію и҆ долготерпѣ́ніемъ.

[и҃] Лу́чше кого̀ и҆спра́виши кро́тостію, не́же ꙗ҆ря́ся: лу́чше ми́лостію, не́же гнѣ́вомъ: лу́чше є҆́сть, да па́че лю́бятъ тя̀ повину́ющіися, не́же боя́тся: ѡⷮ боя́зни бо ражда́ется ло́жь и҆ лицемѣ́ріе: ѡⷮ любве́ же и҆́стина и҆ оѹ҆се́рдіе. А҆́ще бо съ ꙗ҆́ростію и҆ гнѣ́вомъ и҆справля́еши кого̀, не то́чію не и҆спра́виши, но и҆ себѐ и҆ ѻ҆́наго повреди́ши: ꙗ҆ря́йся бо и҆ безпа́мятнѡ гнѣ́ваяйся, ничи́мже ра́знствуетъ ѡⷮ пія́нагѡ: и҆́бо ꙗ҆́рость и҆ гнѣ́въ, и҆зступле́ніе оѹ҆ма̀ творя́тъ, всегѡ̀ и҆змѣне́на человѣ́ка содѣ́ловаютъ: гнѣ́въ бо и҆ ꙗ҆́рость, сія̑ су́ть ме́рзость, глаго́летъ і҆ису́съ сіра́ховъ (Сіраⷯ. глⷡа к҃з).

[ѳ҃] Ꙗ҆ря́йся, и҆ безпа́мятнѡ гнѣ́ваяйся на кого̀, не вѣ́сть что̀ глаго́летъ: а҆́ще бо съ ꙗ҆́ростію и҆ гнѣ́вомъ когда̀ и҆зрече́тъ что̀, посе́мъ разсмотрѣ́въ со стыдѣ́ніемъ вспя́ть возвраща́етъ своя̀ словеса̀. Мно́зи, и҆̀же съ ꙗ҆́ростію и҆ гнѣ́вомъ когда̀ содѣ́яша что̀, посе́мъ ѕѣлѡ̀ ѡ҆ си́хъ раска́яшася: и҆́бо ꙗ҆́рость попуще́нная помрача́етъ ра́зумъ, ѡ҆печаля́етъ ду́шу, погубля́етъ разсужде́ніе и҆ па́мять: и҆ что̀ посе́мъ бы́ти и҆́мать, вѣ́дѣти не попуща́етъ. Ꙗ҆ря́йся и҆ безпа́мятнѡ гнѣ́ваяйся, во все́мъ слѣ́пъ є҆́сть: оѹ҆держава́яй же гнѣ́въ и҆ ꙗ҆́рость, оѹ҆до́бнѣ оѹ҆держи́тъ вся̑ ѕла̑я.

[і҃] Тѣ́мже а҆́ще случи́тся тѝ когда̀ раздражи́тися, и҆ разгнѣ́ватися на кого̀, тогда̀ наипа́че ничто́же глаго́ли, но и҆лѝ ѡⷮидѝ, и҆лѝ затворѝ оѹ҆ста̀ своя̀, да не и҆зско́читъ ꙗ҆́ростный пла́мень, и҆ ѡ҆пали́тъ ду́шу, и҆ су́щымъ съ тобо́ю сотвори́тъ напра́сенъ мяте́жъ: но є҆гда̀ оѹ҆га́снетъ ꙗ҆́ростный пла́мень, и҆ ми́рно бу́детъ се́рдце, тогда̀ по се́мъ ꙗ҆̀же ко и҆справле́нію ми́рнѡ глаго́ли: благопрія́тнѣйшее твоѐ сло́во бу́детъ въ кро́тости є҆ди́но, не́же въ ꙗ҆́рости глаго́лемыхъ ты́сяща. Мно́гѡ лу́чше и҆спра́виши кро́тостію, не́же ꙗ҆ря́ся и҆ раздража́яся: и҆ ѻ҆́наго бо благоразу́мнѣ вразуми́ши, и҆ себѐ сама́го по́льзуеши.