Предисло́віе къ любе́зному чита́телю.

Пре́жде сея̀ ма́лыя кни́жицы, а҆лфави́тъ дх҃о́вный, вмѣ́стѡ предисло́вія, любе́зный чита́телю, къ поѡщре́нію и҆ наказа́нію, кому́ждо сама́го себѐ, напредѝ положи́хомъ: ꙗ҆́кѡ да пре́жде а҆лфави́тъ до́брѣ и҆звы́кше, къ про́чіихъ слове́съ и҆звыча́нію, и҆ и҆сполня́ти та̑ дѣ́ломъ оѹ҆гото́вимся. Сія́ бо ма́лая кни́жица на поѡщре́ніе наипа́че, и҆ и҆сполне́ніе гдⷭнихъ за́повѣдей, а҆ не ꙗ҆́кѡ что̀ велему́дрствующе ѡ҆ ве́щехъ безмѣ́стныхъ, и҆ и҆зли́шнихъ начерта́ся, ꙗ҆́кѡ да оѹ҆се́рднѣ и҆сполня́емъ я҆̀. Всѝ вѣ́мы гдⷭни за́пѡвѣди, и҆сполня́ти же та̑ дѣ́ломъ не и҆́мамы теплоты̀ и҆ оѹ҆се́рдія, но ѻ҆кая́ннѣ хотя̀ и҆ не хотя̀ лѣни́мся и҆ не чу́вствуемъ. Тѣ́мъ ꙗ҆́кѡ да наича́стѣе сію̀ кни́жицу чту́ще, во́лею и҆ нево́лею возбужда́ти себѐ ко и҆сполне́нію гдⷭнихъ за́повѣдей, и҆ ко ѡ҆чище́нію страсте́й понужда́емся: ꙗ҆́коже бо кромѣ̀ разжиза́нія ѻ҆гня̀ дре́во не гори́тъ, разжиза́емо же наича́стѣе, а҆́ще и҆ сы́ро бу́детъ, возгара́тися понужда́ется. Си́це и҆ наича́стѣе кто̀ себѐ поѡщря́етъ и҆ возбужда́етъ, а҆́ще и҆ ѡⷮню́дъ оѹ҆ны́лъ и҆ ѡ҆камене́нъ є҆́сть, ꙗ҆́кѡ во́скъ растопля́ется, и҆ ко преуспѣва́нію понужда́ется приходи́ти, де́нь ѡⷮ днѐ восходя̀ на лу̑чшая бжⷭтвєнная жела̑нія и҆ разумѣ̑нія. По́йдутъ бо, речѐ, сі́и ѡⷮ си́лы въ си́лу, гл҃етъ прⷪро́къ, и҆ ꙗ҆ви́тся и҆̀мъ бг҃ъ богѡ́въ въ сіѡ́нѣ позна́нія и҆ просвѣще́нія ра́зума. (ѱало́мъ п҃г) Начерта́хомъ же сію̀ кни́жицу, не си́це и҆нѣ́мъ къ возбужде́нію, и҆̀же не тре́буютъ ни є҆ди́нагѡ возбужде́нія, ꙗ҆́коже а҆́зъ наипа́че мое́й ѻ҆кая́ннѣй душѣ̀, ѕѣлѡ́ бо ѡ҆камене́нъ и҆ оѹ҆ны́лъ є҆́смь. Ѡ҆брѣта́яйсяже кто̀ мнѣ̀ подобостра́стенъ, а҆́ще и҆зво́литъ и҆ оѹ҆се́рдствуетъ, да пріе́млетъ себѣ̀ всегда̀ поѡщре́ніе и҆ возбужде́ніе, проти́ву стра́стнагѡ наси́лованія, мню̀ ꙗ҆́кѡ по́льзоватися и҆́мать: не гл҃ати, ꙗ҆́кѡ прочто́хъ а҆́зъ є҆ди́ною и҆лѝ два́жды: вѣ́мъ оѹ҆жѐ въ не́й вся̑ начерта̑нная, и҆ дово́льно мѝ є҆́сть. Ни оѹ҆́бѡ, не бо̀ то́чію на оѹ҆вѣ́даніе сія̑ начерта̑нная су́ть, но да и҆ всегда̀ въ возбужде́ніе и҆ поѡщре́ніе пріе́млемся: и҆́бо непреста́ннѡ лѣ́ностію, нечу́вствіемъ, мнѣ́ніемъ, горды́нею, сластолю́біемъ, и҆ про́чіими страстьмѝ бори́ми є҆смы̀. Сегѡ̀ ра́ди поѡщря́ти и҆ возбужда́ти себѐ не престае́мъ, не є҆ди́ною, но и҆ всегда̀, въ се́й ли борбѣ̀, и҆лѝ въ и҆но́й, да пріе́млемъ себѣ̀ посо́біе, и҆ прили́чное неду́гу на́шему врачева́ніе. Кра́ткими же стіхосло́гами написа́шася сія̑ глави̑зны, ꙗ҆́кѡ да возмо́жетъ кто̀ оѹ҆до́бь наизу́сть навы́кнути себѣ̀ въ тре́бованіе стра́стнагѡ сопротивобо́рца: не всегда̀ и҆мѣ́яй вре́мя взира́ти въ са́мую кни́жицу.

Про́чее, здра́вствуй ѡ҆ гдⷭѣ любе́зный чита́телю.