Ча́сть г҃

Глава̀ четве́ртая

Ѡ҆ є҆́же не ѕѣлѡ̀ скорбѣ́ти въ ско́рбныхъ.

Не скорбѝ, человѣ́че, безслове́снѡ ѡ҆ ве́щехъ мимотеку́щихъ, поне́же всѐ прехо́дитъ, всѐ мимои́детъ: нѣ́сть ниеди́ныя сицевы́я ве́щи, ѡ҆ не́йже безпа́мятнѡ скорбѣ́ти и҆мѣ́лъ бы є҆сѝ: не то́чію ѡ҆ ве́щехъ мимотеку́щихъ, но и҆ ѡ҆ самѣ́хъ пред̾ бг҃омъ вели́цѣхъ прегрѣше́ніихъ. А҆́ще бы и҆ вся́кое согрѣше́ніе превзоше́лъ тво́й грѣ́хъ, ѻ҆ба́че не ѕѣлѡ̀ ѡⷮча́ятельнѡ и҆ безпа́мятнѡ скорбѣ́ти до́лженъ є҆сѝ: нѣ́сть бо грѣ́хъ побѣжда́ющь милосе́рдіе бж҃іе. Не соравня́ются грѣсѝ на́ши пучи́нѣ бж҃іихъ щедро́тъ, и҆́же ту́не на́съ милосе́рдіемъ свои́мъ спаса́етъ.

[в҃] Бг҃ъ всегѡ̀ мі́ра грѣхѝ но́ситъ, и҆ покая́ніемъ кому́ждо грѣхѝ ѡⷮпуща́етъ: ты́ же мни́ши, ꙗ҆́кѡ тебѐ є҆ди́нагѡ человѣ́ка грѣхѡ́въ не понесе́тъ; Ѡ҆ все́мъ мі́рѣ кро́вь свою̀ и҆злія̀, тебѣ̀ ли є҆ди́ному ѡ҆ставле́нія кро́вію свое́ю не пода́стъ; То́чію ты̀ преста́ни ѡⷮ грѣха̀, то́чію ты̀ пока́йся: рцы̀ то́чію ты̀ грѣхѝ своя̑, ꙗ҆́кѡ да ѡ҆правди́шися. Рцы̀: и҆сповѣ́мъ на мя̀ беззако́ніе моѐ гдⷭви, и҆ а҆́біе ѡ҆ста́витъ нече́стіе се́рдца твоегѡ̀ (ѱало́мъ л҃а).

[г҃] Не на ско́рбь и҆ печа́ль призыва́етъ тя̀ къ себѣ̀ гдⷭь, но на ра́дость и҆ весе́ліе: ра́дуйтеся, речѐ, ѡ҆ гдⷭѣ всѝ пра́віи се́рдцемъ, ꙗ҆́коже и҆ са́мъ по воста́ніи свое́мъ и҆з̾ ме́ртвыхъ пе́рвѣйшее сло́во благовѣствова̀ жена́мъ: ра́дуйтеся (Матѳ. заⷱ рє҃і). Ра́доватися мѷроно́сицамъ повелѣ̀, а҆ не скорбѣ́ти: и҆́бо ѻ҆́нъ пла́чь пра́бабы є҆́ѵы оѹ҆ста́ви воскресе́ніемъ свои́мъ, ꙗ҆́кѡ бг҃ъ. Тогѡ̀ ра́ди и҆ ты̀ ра́дуйся ѡ҆ не́мъ, а҆ не скорбѝ, весели́ся ѡ҆ гдⷭѣ, а҆ не бу́ди смуще́нъ. Не скорбѝ са́мъ, нижѐ и҆нѣ́хъ безслове́снѡ ѡ҆скорбля́й, но къ коему́ждо бу́ди кро́токъ, долготерпѣли́въ. Другъдру́гу быва́имъ бла́зи, милосе́рди, не самолю́бствующе, но кі́йждо на́съ бли́жнему да оѹ҆гожда́етъ во благо́е, ꙗ҆́коже глаго́летъ а҆пⷭлъ (Ри́м. заⷱ рѕ҃і).

[д҃] Не скорбѝ, а҆́ще что̀ не по во́ли се́рдца твоегѡ̀ дѣ́ется въ мі́рѣ: не бо̀ мо́гутъ вся̑ дѣ́ятися по мы́сли твое́й, ꙗ҆́коже ты̀ хо́щеши: поне́же не вся̀ хотѣ̑нія твоя̀ быва́ютъ бла̑га, нижѐ вся̑ получє́нія полє́зна: но содѣ́яся ли что̀ по твоему̀ хотѣ́нію и҆ жела́нію; до́брѣ: не содѣ́яся ли; во́ли гдⷭней ѡ҆ставля́й. А҆́ще та́кѡ содѣ́яся что̀, ꙗ҆́коже ты̀ хотѣ́лъ є҆сѝ, благодарѝ: а҆́ще не та́кѡ, не скорбѝ: не во вѣ́ки бо быва́ютъ вся̑ здѣ̀, но ѕѣлѡ̀ на ма́лое вре́мя ка́яждо є҆́сть ве́щь въ вѣ́цѣ се́мъ: тебѣ́ же є҆ди́но то́чію предлежи́тъ, да не бу́деши чу́ждь гдⷭа, и҆ є҆гѡ̀ прест҃ы́я благода́ти. Не оѹ҆си́льнѡ жела́й, да твоя̑ жела̑нія всегда̀ и҆сполня́ются, да вся̑ похотѣ̑нія твоя̑ быва́ютъ: сія̑ бо не въ твое́й вла́сти су́ть, но въ бж҃іей: па́че же и҆́на во́ля бж҃ія, и҆́на же твоя̀, и҆ судьбы̑ є҆гѡ̀ разли́чны, и҆̀хже ты̀ не вѣ́си, не бо̀ вся̑ разумѣ́ти мо́жеши. Сегѡ̀ ра́ди не скорбѝ ни ѡ҆ є҆ди́ной ве́щи, но на гдⷭа вся̑ возлага́й: Возве́рзи, речѐ, на гдⷭа печа́ль твою̀, и҆ то́й тя̀ препита́етъ, не да́стъ въ вѣ́къ молвы̀ пра́веднику (ѱало́мъ н҃д).

[є҃] Не бу́ди малоду́шенъ и҆ нетерпѣли́въ, а҆́біе внеза́пу всему̀ хотя̀ по во́ли твое́й содѣ́ятися: но благоду́шнѣ и҆ пожда́тельнѣ бг҃у моли́ся, во́ли є҆гѡ̀ во все́мъ бы́ти ѡ҆ставля́я, долготерпѣли́внѣ ѡ҆жида́й. Не ѕѣлѡ̀ жела́й, да вся̀ жела̑нія твоя̑ и҆сполня́ются: не вся́ко бо жела́ніе твоѐ є҆́сть бла́го, нижѐ вся́ко получе́ніе поле́зно: но ꙗ҆̀же су́ть по во́ли гдⷭни, сія̑ же и҆скуси́ти мо́жеши долговре́меннымъ пожда́ніемъ, и҆ протяже́нною къ бг҃у моли́твою. А҆́ще бу́детъ по во́ли гдⷭни, да́стъ тѝ и҆ поспѣши́тъ: а҆́ще ли нѝ, препне́тъ тѝ и҆ возбрани́тъ, и҆́миже вѣ́сть судба́ми, къ твое́й по́льзѣ: ты́ же, да́стъ ли, и҆лѝ не да́стъ, вся̑ въ кро́тости се́рдца благода́рнѣ пріе́мли.

[ѕ҃] Не наглоду́шнѣ на ку́юлибо ве́щь напа́дай: но съ ве́ліимъ разсмотре́ніемъ вся̑ дѣ́лай: вся́ка бо ве́щь съ пожда́ніемъ и҆ разсмотре́ніемъ поле́знѣйша и҆ твержа́йша бы́ти ѡ҆бы́че. А҆́ще бо бы а҆́біе вся̀ вє́щи по жела́нію се́рдца твоегѡ̀ возмоглѝ соверша́тися, никогда́же свою̀ не́мощь въ че́мъ позна́ти возмо́глъ бы є҆сѝ, никогда́же бо что̀ съ по́льзу душѝ свое́й приѡбрѣ́лъ є҆сѝ, но вся̑ сопроти̑вная дѣ́ялъ бы є҆сѝ. Сегѡ̀ ра́ди ꙗ҆́кѡ всеви́децъ гдⷭь, ми́луя и҆ щадя̀ своѐ созда́ніе, оѹ҆строя́я кому́ждо полє́зная, не всегда̀ вся̑ дае́тъ тѝ по во́ли твое́й, но мно́гажды и҆ пресѣца́етъ и҆ возбраня́етъ, ꙗ҆́коже ѻ҆́нъ са́мъ вѣ́сть, ко твоему̀ вразумле́нію, ꙗ҆́кѡ да прознава́еши свою̀ не́мощь, ꙗ҆́кѡ да пребу́деши смире́нъ, кро́токъ, терпѣли́въ, а҆ не малоду́шенъ, во́ли гдⷭней вся̑ да ѡ҆ставля́еши.

[з҃] Ѡⷮтерза́я бо и҆ ѡⷮлуча́я оѹ҆́мъ на́шъ ѡⷮ земна́гѡ безслове́снагѡ пристра́стія гдⷭь, ꙗ҆́кѡ и҆́стинный вра́чь врачу́я ду́шу на́шу, ча́сто пресѣца́етъ жела̑нія и҆ похотѣ̑нія на́ша, мно́гажды прелага́етъ въ ско́рбь и҆ го́ресть, ꙗ҆́кѡ да безсме́ртнагѡ и҆ вѣ́чнагѡ оѹ҆тѣше́нія въ гдⷭѣ бз҃ѣ взыску́емъ, є҆́же не ѡⷮи́мется ѡⷮ на́съ во вѣ́ки. Сія̑ бо вся̑ су́ть на ма́лъ ча́съ, на ма́лое вре́мя, ѻ҆́на же во вѣ́ки вѣ́чныя конца̀ не и҆му́ще пребыва́ти и҆́мутъ. Ка́я бо тебѣ̀ бу́детъ по́льза, а҆́ще и҆ вся̑ хотѣ̑нія твоя̑ и҆спо́лнятся, ты́ же бг҃а на ча́съ прогнѣ́ваеши; Ко́е тѝ бу́детъ пріѡбрѣ́теніе, а҆́ще и҆ вся̑ жела̑нія твоя̑ сбу́дутся, ты́ же гдⷭни благода́ти чу́ждь бу́деши; Нико́еже.

[и҃] Сегѡ̀ ра́ди, є҆ли́кѡ благода́рнѣ претерпи́ши ѡⷮ гдⷭа наноси̑мыя непомы̑сльныя скѡ́рби, толи́ко посе́мъ оѹ҆тѣше́ніе ѡⷮ негѡ̀ пріи́меши: по мно́жеству бо, речѐ, болѣ́зней мои́хъ, въ срⷣцѣ мое́мъ оѹ҆тѣшє́нія твоя̑ возвесели́ша ду́шу мою̀ (ѱало́мъ ч҃г). Не скуча́й, грѣ̑хъ ра́ди, смотри́тельнѣ ѡⷮ бг҃а попуща́емою ско́рбію и҆ препина́ніемъ, но благода́рнѣ ꙗ҆́кѡ нѣ́кое ве́ліе душѝ врачева́ніе пріе́мли. Лу́чше бо здѣ̀ претерпѣва́ти вре́менную ско́рбь, не́же посе́мъ скорбѣ́ти вѣ́чнѡ: лу́чше здѣ̀, а҆ не ѻ҆на́мѡ: ѕѣлѡ́ бо ѻ҆кая́ненъ є҆́сть се́й, и҆́же мно́гѡ согрѣша́яй, не претерпѣва́етъ ѡ҆ грѣсѣ́хъ здѣ̀ благода́рнѣ ско́рбныхъ, и҆ непомы́сльныхъ, но всегда̀ хо́щетъ, да вся̑ дѣ́ются по во́ли се́рдца є҆гѡ̀. Вѣ́ждь, ꙗ҆́кѡ скорбѣ́ти и҆́мать во гряду́щей жи́зни и҆ не хотя́щи.

[ѳ҃] Хотя̀ гдⷭь и҆сцѣли́ти и҆ ѡ҆чи́стити ду́шу на́шу ѡⷮ грѣха̀, разли̑чны скѡ́рби и҆ печа̑ли здѣ̀ мно́гажды попуща́етъ на ны̀: ꙗ҆́кѡ да ѡ҆чи́щшеся, ꙗ҆́кѡ зла́то въ горни́лѣ, свѣ́тли ꙗ҆ви́мся: и҆ да здѣ̀ оѹ҆тѣсне́ни бы́вше въ ско́рбныхъ, всегда̀ оѹ҆се́рднѣ притека́емъ къ нему̀, по́мощи є҆гѡ̀ и҆́щуще. Ко гдⷭу внегда̀ скорбѣ́ти мѝ, воззва́хъ, и҆ оѹ҆слы́ша мя̀ (ѱало́мъ рѳ҃і). Оѹ҆мно́жишася не́мѡщи и҆́хъ, по си́хъ оѹ҆скори́ша, глаго́летъ прⷪро́къ (ѱало́мъ є҃і). Въ ско́рби бо мно́гажды къ бг҃у прибѣга́емъ, въ ра́дости же забыва́емъ є҆го̀: бг҃ъ же ꙗ҆́кѡ прему́дрый вра́чь, разли́чнѣ и҆сцѣля́я на́съ, ѻ҆боя̑ наво́дитъ на́мъ. А҆́ще въ ра́достныхъ и҆ помы́сльныхъ не благодари́мъ є҆го̀, скѡ́рбная попуща́етъ на ны̀, ꙗ҆́кѡ да во ѻ҆бои́хъ благоразу́мни, и҆ и҆ску́сни пребу́демъ.

[і҃] Бг҃ъ разли́чнѣ ми́луя и҆ щадя̀ своѐ созда́ніе, лу̑чшая ѡ҆ на́съ предзрѣ́вый, не хо́щетъ здѣ̀ да́ти на землѝ ни є҆ди́нагѡ простра́нства и҆звѣ́стнагѡ, поко́я и҆ оѹ҆тѣше́нія, но па́че тѣсноту̀ и҆ ско́рбь. Въ мі́рѣ бо, не ра́достни, но ско́рбни бу́дете, глаго́летъ гдⷭь (І҆ѡа́н. заⷱ н҃є). Хо́щетъ на́съ въ мі́рѣ се́мъ и҆мѣ́ти всегда̀ во оѹ҆тѣсне́ніи и҆ ско́рби, а҆ не въ простра́нствѣ и҆ благоде́нствіи, да не разлива́емся въ земны́хъ преле́стныхъ сласте́хъ: да ѡⷮ здѣ́шнягѡ оѹ҆тѣсне́нія и҆ ско́рби оѹ҆се́рднѣе и҆ спѣ́шнѣе восхо́димъ къ го́рнему и҆ вѣ́чному ѡ҆ гдⷭѣ простра́нству: и҆ та́мѡ во вѣ́ки вѣ́чныя оѹ҆тѣ́шени, при́снѡ ѡ҆ не́мъ ра́дующеся и҆ веселя́щеся, во вѣ́ки безконе́чныя бу́демъ. А҆ми́нь.