Ча́сть г҃

Глава̀ пя́тая

Ѡ҆ є҆́же, ꙗ҆́кѡ всѝ ст҃і́и въ ско́рбехъ и҆ печа́лехъ и҆знури́ша всю̀ свою̀ жи́знь.

Мнѡ́ги скѡ́рби првⷣнымъ, и҆ ѡⷮ всѣ́хъ и҆́хъ и҆зба́витъ я҆̀ гдⷭь, глаго́летъ прⷪро́къ (ѱало́мъ л҃г). Мно́гими скорбмѝ подоба́етъ на́мъ вни́ти въ црⷭтвіе нбⷭное (Дѣя́н. заⷱ л҃є): въ мі́рѣ не ра́достни, но ско́рбни бу́дете, речѐ гдⷭь (І҆ѡа́н. заⷱ н҃є). Пра́ведніи всегда̀ су́ть въ ско́рби, грѣ́шніи же въ ра́дости: благі́и въ тѣснотѣ̀, ѕлі́и же въ простра́нствѣ: ѕлі́и бо всегда̀ го́нятъ благи́хъ, а҆ не благі́и ѕлы́хъ: лука́віи во ѻ҆би́ліи, благі́и же въ ску́дости. И҆ не чуди́ся сему̀: є҆го́же бо лю́битъ гдⷭь ꙗ҆́кѡ ѻ҆те́цъ ча́до, сего̀ и҆ наказу́етъ, и҆ біе́тъ вся́каго сы́на, є҆го́же пріе́млетъ. А҆́зъ, и҆̀хже а҆́ще люблю̀, ѡ҆блича́ю и҆ наказу́ю, глаго́летъ гдⷭь (А҆пок. глⷡа г҃), да не зави́дятъ пра́ведніи грѣ̑шнымъ, благі́и же ѕлы̑мъ: на ма́ло бо ѕѣлѡ̀ вре́мя и҆̀мъ сіѐ ѻ҆би́ліе и҆ простра́нство є҆́сть, посе́мъ внеза́пу пости́гнетъ и҆̀хъ вѣ́чная ско́рбь и҆ тѣснота̀. Не оѹ҆бо́йся, є҆гда̀ разбогатѣ́етъ человѣ́къ, и҆лѝ є҆гда̀ оѹ҆мно́жится сла́ва до́му є҆гѡ̀: ꙗ҆́кѡ внегда̀ оѹ҆мре́ти є҆му̀, не во́зметъ вся̑, глаго́летъ прⷪро́къ (ѱало́мъ л҃и).

[в҃] Оѹ҆дивля́ются мно́гажды благі́и ѕлы̑мъ, ꙗ҆́кѡ ѕлі́и во ѻ҆би́ліи и҆ наича́стѣе въ простра́нствѣ су́ть, благі́и же во оѹ҆тѣсне́ніи, ꙗ҆́коже глаго́летъ прⷪро́къ: мои́ же вма́лѣ не подвижа́стѣся но́зѣ, вма́лѣ не пролія́шася стопы̀ моя̀, ꙗ҆́кѡ возревнова́хъ на беззакѡ́нныя, ми́ръ грѣ́шникѡвъ зря̀ (ѱало́мъ ѻ҃в): ꙗ҆́кѡ нѣ́сть восклоне́нія въ сме́рти и҆́хъ, и҆ оѹ҆твержде́нія въ ра́нѣ и҆́хъ: въ трудѣ́хъ человѣ́ческихъ не су́ть, и҆ съ человѣ́ки не пріи́мутъ ра́нъ: храни́лища и҆́хъ и҆спо́лнєна, ѡⷮрыга̑ющая ѡⷮ сегѡ̀ въ сіѐ (ѱало́мъ рм҃г): ѻ҆́вцы и҆́хъ многоплѡ́дны, мно́жащыяся во и҆схо́дищахъ свои́хъ, воло́ве и҆́хъ то́лсти: нѣ́сть паде́нія ѡ҆пло́ту, нижѐ прохо́да, нижѐ во́пля въ сто́гнахъ и҆́хъ. оѹ҆блажи́ша лю́діе, и҆̀мже гдⷭь бг҃ъ и҆́хъ. І҆еремі́а глаго́летъ: почто̀ пу́ть нечести́выхъ спѣ́ется; насади́лъ є҆сѝ и҆̀хъ, и҆ оѹ҆корени́шася (І҆ерем. глⷡа в҃і).

[г҃] Всѝ ст҃і́и въ ско́рби и҆ печа́лехъ, въ страда́ніи, и҆ терпѣ́ніи, и҆ гоне́ніи и҆знури́ша всѐ своѐ житіѐ, ты́ же ли тако́въ є҆ди́нъ, кромѣ̀ вся́кагѡ страда́нія и҆ без̾ печа́ли бы́ти хо́щеши; ты̀ є҆ди́нъ то́чію ли́ка и҆збра́нныхъ бж҃іихъ ѡⷮве́рженъ бы́ти жела́еши, ничто́же претерпѣ́ти и҆зволя́я; Не бу́ди то̀, ѻ҆ба́че же не оѹ҆ныва́й душе́ю: нѣ́сть ско́рбь, ꙗ҆́же не пре́йдетъ, нижѐ ра́дость, ꙗ҆́же не и҆змѣни́тся, ве́черъ бо водвори́тся пла́чь, и҆ зау́тра ра́дость, глаго́летъ прⷪро́къ (ѱало́мъ л҃ѳ): ра́дость ра́дости не связа́ся, нижѐ ско́рбь ско́рби соедини́ся. Жи́знь сія̀ є҆́сть премѣни́тельна, ꙗ҆́коже нѣ́кій вѣне́цъ разли́чными премѣ́нными цвѣ́ты оѹ҆краше́нный. А҆́ще ско́рбь, не всегда̀ ско́рбь: а҆́ще ра́дость, не всегда̀ ра́дость: но во ѻ҆бои́хъ гдⷭь рабѡ́мъ свои̑мъ премѣ́ну твори́ти ѡ҆бы́че, да пребу́дутъ бг҃у є҆ди́ному всегда̀ придержа́щеся.

[д҃] Кі́й оѹ҆́бѡ святы́й во вся́комъ безпеча́ліи, простра́нствѣ и҆ поко́и въ вѣ́цѣ се́мъ поживѐ; Ни є҆ди́нъ. Не вси́ ли въ терпѣ́ніи, въ ско́рбехъ, въ бѣда́хъ, въ тѣснота́хъ, въ ра́нахъ, въ темни́цахъ, въ нестрое́ніихъ, въ трудѣ́хъ, во бдѣ́ніихъ, въ поще́ніихъ, во а҆́лчбѣ и҆ жа́ждѣ, въ долготерпѣ́ніи и҆знури́ша житіѐ, ꙗ҆́коже гл҃етъ а҆пⷭлъ (Корі́н. заⷱ рп҃в); Ѻ҆ба́че же святі́и, а҆́ще и҆ мнѡ́ги бѣды̑ и҆ напа̑сти претерпѣва́ху, но не ѡ҆скорбля́хуся, ни развраща́хуся: ты́ же ѡ҆ ма́ломъ смуща́ешися. Святі́и ма́лѡ согрѣши́вше, мно́гѡ претерпѣва́ху: ты́ же мно́гѡ и҆ без̾ числа̀ беззако́нновавши, ничто́же претерпѣ́ти хо́щеши. Ст҃і́и гони́ми бя́ху, безче́ствуеми, біе́ми, му́чими, раздробля́еми, ѡ҆ гдⷭѣ ра́довахуся: а҆пⷭли и҆дя́ху ра́дующеся ѡⷮ лица̀ собо́ра, ꙗ҆́кѡ за и҆́мя гдⷭа і҆и҃са сподо́бишася безче́стіе прія́ти (Дѣя́н. заⷱ є҃і): ты́ же ни ма́ло что̀ претерпѣ́вши, безпа́мятнѣ скорби́ши и҆ мяте́шися, и҆ ѡⷮчаява́ешися. Ве́ліе дѣ́йство твоегѡ̀ неразу́мія.

[є҃] Воспомянѝ, наче́нъ ѡⷮ прⷪрѡ́къ и҆ а҆пⷭлъ, да́же до послѣ́днихъ бж҃іихъ рабѡ́въ, па́че же и҆ сама́гѡ гдⷭа всѣ́ми влады́чествующагѡ, коли́кѡ на́съ ра́ди пострада̀ и҆ претерпѣ̀ въ вѣ́цѣ се́мъ; Зауше́нъ бѣ̀, ѡ҆плева́нъ, влачи́мъ, послѣди́ же сме́рть го́рькую и҆ поно́сную на крⷭтѣ̀ претерпѣ̀. Хрⷭто́ва бо вся̀ жи́знь по пло́ти, терпѣ́ніе и҆ страда́ніе бѣ̀. И҆ оѹ҆ченицы̀ є҆гѡ̀ въ ско́рби и҆ гоне́ніи сконча́ша житіѐ своѐ: ѻ҆́віи въ ско́рбехъ и҆ гоне́ніихъ, ѻ҆́віи во ѡⷮя́тіи и҆мѣ́нія и҆ и҆згна́ніи, ѻ҆́віи въ болѣ́зни и҆ ра́нахъ, ѻ҆́віи во а҆́лчбѣ и҆ жа́ждѣ, и҆ послѣ́дней нищетѣ̀, проидо́ша въ ми́лотехъ и҆ ко́зіихъ ко́жахъ, лише́ни, скорбя́ще, ѡ҆ѕло́блени, и҆́хже не бѣ̀ досто́инъ (ве́сь) мі́ръ, въ пусты́няхъ скита́ющеся и҆ въ гора́хъ и҆ въ верте́пахъ и҆ въ про́пастехъ земны́хъ, ꙗ҆́коже глаго́летъ а҆пⷭлъ (Є҆вре́ємъ заⷱ т҃л). и҆ ни є҆ди́нъ въ мі́рѣ без̾ печа́ли пребы́сть: нѣ́сть бо мо́щно и҆на́кѡ прейтѝ ѡⷮ сме́рти къ животу̀, то́чію си́це. Не и҆злива́ется бо віно̀, и҆лѝ во́скъ, то́чію во оѹ҆тѣсне́ніи точи́ла: нижѐ быва́етъ ко́е дѣ́ло бла́го, то́чію въ по́двизѣ и҆ трудѣ́хъ. Всѝ пра́ведніи въ ско́рби и҆ страда́ніи вели́цѣ и҆спра́ша ри̑зы своя̑, и҆ оѹ҆бѣли́ша ѻ҆дє́жды своя̑ въ кро́ви а҆́гнчи, глаго́летъ та̑инъ ви́децъ (А҆пок. глⷡа з҃).

[ѕ҃] Не бу́ди оѹ҆́бѡ страшли́въ и҆ маловѣ́ренъ, боя́ся ско́рби и҆ терпѣ́нія, да не постыди́шися въ гряду́щей жи́зни. Бг҃а вся̑ содержа́щаго и҆мѣ́я себѣ̀ помо́щника, не бо́йся ско́рби и҆ терпѣ́нія, да не ꙗ҆́кѡ дѣ́тищь пору́ганъ бу́деши. Не оѹ҆бо́йтеся, речѐ, ѡⷮ оѹ҆бива́ющихъ тѣ́ло, души́ же косну́тися не могу́щихъ (Матѳ. заⷱ л҃з): но му́жествуй и҆ крѣпи́ся, ꙗ҆́кѡ му́жъ соверше́нъ, да пока́жеши побѣ́ду: побѣжда́яй бо, речѐ, наслѣ́дитъ вся̑, и҆ бу́ду є҆му̀ въ бг҃а, и҆ то́й бу́детъ мнѣ̀ въ сы́на. страшли̑вымъ же и҆ невѣ̑рнымъ, и҆ сквє́рнымъ и҆ оѹ҆бі́йцамъ, и҆ блу́дъ творя́щымъ, и҆ ча́ры творя́щымъ, і҆дѡложе́рцємъ, и҆ всѣ̑мъ лжи̑вымъ, ча́сть и҆̀мъ во є҆́зерѣ горя́щемъ ѻ҆гне́мъ и҆ жу́пеломъ, є҆́же є҆́сть сме́рть втора́я, речѐ гдⷭь (А҆пок. глⷡа к҃а).

[з҃] Ѻ҆ба́че не скорбѝ на ѡ҆скорбля́ющихъ тя̀, а҆́ще въ че́мъ тя̀ кто̀ ѡ҆скорбѝ, но па́че бг҃у въ покая́ніи и҆ смире́ніи моли́ся: не ту́не бо бг҃ъ на тя̀ сіѐ попустѝ, но па́че къ твоему̀ спасе́нію и҆ и҆справле́нію. Безу́менъ є҆́сть се́й, и҆́же скорби́тъ на пѣ́стуна, и҆лѝ на наказа́теля є҆гѡ̀ и҆справле́нію. Не скорбѝ, а҆́ще и҆ без̾ вины̀ что̀ ѡⷮ когѡ̀ претерпѣва́еши, но па́че вино́вна себѐ тому̀ творя́щи, ꙗ҆́кѡ цѣльбу̀ нѣ́кую душѝ твое́й благода́рнѣ претерпѣва́й: лу́чше бо без̾ вины̀ претерпѣва́ти что̀, не́же вино́внѣ: лу́чше непра́веднѣ, не́же пра́веднѣ: лу́чше здѣ̀, не́же ѻ҆на́мѡ: лу́чше, ꙗ҆́кѡ да ты̀ бг҃а ра́ди ѡⷮ когѡ̀ претерпи́ши что̀, не́же кто̀ ѡⷮ тебѐ. Не ве́ліе бо є҆́сть сіѐ, а҆́ще бы ты̀ что̀ ѕло̀ кому̀ сотвори́лъ: сіе́ же ве́ліе, а҆́ще ты̀ ѡⷮ когѡ̀ бг҃а ра́ди без̾ вины̀ что̀ ѕло̀ претерпи́ши: а҆́ще вины̀ ра́ди терпи́ши что̀, не вѣнча́ешися: а҆́ще ли без̾ вся́кія вины̀ пра́вды ра́ди, бл҃же́нъ є҆сѝ. Ка́я бо похвала̀, а҆́ще согрѣша́юще му́чими терпитѐ; но а҆́ще дѡ́брая творя́ще и҆ стра́ждуще терпитѐ, сіѐ оѹ҆го́дно пред̾ бг҃омъ: на сіе́ бо и҆ зва́ни бы́сте, глаго́летъ а҆пⷭлъ (Петр. заⷱ н҃и).

[и҃] Терпѣ́ніе и҆мѣ́йте ко всѣ̑мъ: ниеди́номуже ѕла̀ за ѕло̀ воздаю́ще, промышля́юще дѡ́брая пред̾ всѣ́ми человѣ́ки, не себѐ ѡⷮмща́юще, возлю́бленніи, но дади́те мѣ́сто гнѣ́ву: пи́сано бо є҆́сть: Мнѣ̀ ѡⷮмще́ніе, а҆́зъ возда́мъ, глаго́летъ гдⷭь. Не побѣжде́нъ быва́й ѡⷮ ѕла̀, но побѣжда́й благи́мъ ѕло́е, глаго́летъ а҆пⷭлъ (Ри́м: заⷱ р҃і). А҆́ще бо є҆ди́нъ бу́детъ ѕо́лъ, вся́кѡ другі́й да бу́детъ бла́гъ: а҆́ще є҆ди́нъ безу́менъ, вся́кѡ другі́й да бу́детъ разу́менъ: а҆́ще же ѻ҆боѝ бу́дутъ безу́мни, ꙗ҆́ри, ѻ҆боѝ бу́дутъ ѕлѝ, неразруши́мо є҆́сть ѕло̀, непримири́тельно вражды̀ средостѣ́ніе: терпѣ́нія бо, речѐ, и҆́мате потре́бу, да во́лю бж҃ію сотво́рше, пріи́мете ѡ҆бѣтова́ніе, гл҃етъ а҆пⷭлъ (Є҆вр: заⷱ тк҃ѕ). Є҆гда́ бо мы̀, мно́гажды самолю́біемъ и҆ самоуго́діемъ помрача́емся, то̀ ско́рбію и҆ терпѣ́ніемъ оѹ҆ясня́емся: є҆гда̀ че́стію и҆ сла́вою возно́симся, то̀ безче́стіемъ и҆ ѡ҆глаго́ланіемъ человѣ́ческимъ смиря́емся: є҆гда̀ пра́хомъ сладостра́стія и҆ плотиуго́дія посыпа́емся, то̀ оѹ҆ничиже́ніемъ и҆ поноше́ніемъ ѡ҆тира́емся. Сегѡ̀ ра́ди не ѕѣлѡ̀ раздража́йся на ѡ҆скорбля́ющаго тя̀, но па́че на грѣ́хъ сво́й, возбужда́ющь се́рдце твоѐ на него̀.

[ѳ҃] Є҆́же бо претерпѣ́ти хрⷭта̀ ра́ди, бо́лши є҆́сть всѣ́хъ по́двигѡвъ и҆ добродѣ́тельныхъ и҆справле́ній: а҆ є҆́же ничто́же претерпѣва́ти, ꙗ҆́вѣ є҆́сть твори́ти всѐ ѕло̀: и҆ вся́кѡ то́й чу́ждь є҆́сть гдⷭни благода́ти. Мню́ бо, ꙗ҆́кѡ а҆́ще кто̀ въ ко́емлибо мни́момъ благо́мъ дѣ́лѣ не и҆́мать препина́нія и҆ ско́рби, ꙗ҆́вѣ, ꙗ҆́кѡ дѣ́ло є҆гѡ̀ нѣ́сть є҆щѐ благоуго́дно, нижѐ бѣ́су сопроти́вно: а҆ є҆́же бы́ти всегда̀ бг҃а ра́ди въ терпѣ́ніи и҆ ско́рбехъ, сіѐ є҆ди́но мо́жетъ на́съ присоединя́ти бг҃ови: кромѣ́ же си́хъ, не и҆звѣ́стно є҆́сть. Тѣ́мже претерпѣ́вши благода́рнѡ бг҃а ра́ди вся̑ скѡ́рбная, ѡⷮ гдⷭа вѣ́чнѡ вѣнча́ешися. Не бѣ́гай терпѣ́нія и҆ ско́рби, занѐ тѣ́ми въ ра́зумъ и҆́стинный восхо́диши: не бѣ́гай терпѣ́нія и҆ ско́рби, занѐ тѣ́ми ѡⷮ грѣ̑хъ ѡ҆чища́ешися: нижѐ разлива́йся въ горды́ни и҆ сласте́хъ плотски́хъ, да не оѹ҆подо́бишися женѣ̀ на ѕвѣ́ри любодѣя́нія и҆ вся́кихъ вре́менныхъ сласте́й сѣдя́щей, и҆ глаго́лющій: сѐ сѣжу̀ цари́цею, и҆ вдова̀ нѣ́смь, и҆ рыда́нія ни и҆́мамъ ви́дѣти: но а҆́біе пріи́дутъ на ню̀ вся̑ ѕла̑я, и҆ поги́бель є҆я̀ всѣ̑мъ ѡⷮкры́ется, глаго́летъ тайнови́децъ (А҆пок: глⷡа и҃і).

[і҃] Ѻ҆ба́че же, да не предае́ши са́мъ себѐ въ напа́сть, нижѐ вме́щеши себѐ во и҆скуше́ніе, но па́че моли́ся гдⷭу глаго́ля: не введи́ мя, гдⷭи, во и҆скуше́ніе, но и҆зба́ви мя̀ ѡⷮ лука́вагѡ: ѡ҆ се́мъ бо є҆́же не вмета́ти кому̀ себѐ самоизво́льнѡ въ напа́сть, наво́дитъ и҆ прⷪро́къ: не да́ждь во смяте́ніе ногѝ твоея̀, нижѐ воздре́млетъ храня́й тя̀ (ѱало́мъ р҃к). Не ѕѣлѡ̀ ты̀ жела́й напа́сти, ꙗ҆́кѡ да посе́мъ претерпи́ши ю҆̀: нижѐ да себѐ са́мъ вме́щеши въ ню̀, но попуще́нную смотри́тельнѡ ѡⷮ гдⷭа благода́рнѡ да претерпѣва́еши: и҆ гдⷭь бо на́съ оѹ҆чя̀, и҆ показу́я человѣ́ческое, моля́ся ѻ҆ц҃у̀ глаго́лаше: ѻ҆́ч҃е! а҆́ще возмо́жно є҆́сть, да мимои́детъ ѡⷮ менѐ ча́ша сія̀ (Матѳ: заⷱ р҃и): и҆схожда́ше мно́гажды, и҆ храня́шеся напа́сти: и҆ па́ки же показу́я благоизволи́тельное и҆ благопослушли́вое, глаго́лаше: ѻ҆ба́че, не моя̀ во́ля, но твоя̀ да бу́детъ (Лукѝ заⷱ р҃ѳ). Сія̑ творя̀ гдⷭь, ѻ҆́бразъ на́мъ себѐ показу́етъ, да и҆ мы̀ та́кѡ твори́мъ.