Ча́сть г҃

Глава̀ шеста́я

Ѡ҆ є҆́же терпѣ́ти вся̑ находя̑щая до́блественнѡ.

Въ терпѣ́ніи ва́шемъ стяжи́те ду́шы ва́шя, глаго́летъ гдⷭь (Лукѝ заⷱ р҃ѕ): претерпѣ́вый до конца̀, то́й спасе́нъ бу́детъ (Матѳ. заⷱ л҃ѕ). Му́жъ терпѣли́въ, ꙗ҆́кѡ твердѣ́йшій є҆́сть а҆дама́нтъ, нетерпѣли́въ же, ꙗ҆́коже тро́сть, оѹ҆до́бь ѡⷮ вѣ́трѡвъ дви́жущаяся. Му́жъ нетерпѣли́въ, двоеду́шенъ и҆ наглоду́шенъ, неустро́енъ во всѣ́хъ путе́хъ свои́хъ, глаго́летъ а҆пⷭлъ (І҆а́к: заⷱ и҃): и҆ никогда́же пока́жетъ ку́ю побѣ́ду претерпѣва́яй же оѹ҆до́бь побѣди́тъ и҆ пріи́метъ вся̑. А҆́ще бы му́чєницы не и҆мѣ́ли терпѣ́нія, не бы̀ вѣнча́лися, не бы̀ толи́ку сла́ву и҆ че́сть получи́ли.

[в҃] Гдⷭь научѝ на́съ собо́ю терпѣ́нія, ѻ҆́бразъ на́мъ себѐ показа́въ: непови́ненъ бы́вши сме́рти, на́съ ра́ди на крⷭтѣ̀ оѹ҆́мре, ꙗ҆́кѡ да и҆ мы̀ є҆гѡ̀ ра́ди вся̑ съ ра́достію претерпѣва́емъ: и҆́же оѹ҆коря́емь, проти́ву не оѹ҆коря́ше, стражда̀ не преща́ше: и҆́же грѣхѝ на́ша са́мъ вознесѐ на тѣ́лѣ свое́мъ на дре́во, да ѡⷮ грѣ̑хъ и҆збы́вше пра́вдою поживе́мъ: є҆гѡ́же ꙗ҆́звою мы̀ всѝ и҆сцѣлѣ́хомъ, ꙗ҆́коже глаго́летъ а҆пⷭлъ (Петр: заⷱ н҃ѳ). Претерпѝ оѹ҆́бѡ и҆ ты̀ съ ра́достію вся̑, да оѹ҆слы́шиши гла́съ глаго́лющь: поне́же соблю́лъ є҆сѝ сло́во терпѣ́нія моегѡ̀, и҆ а҆́зъ тя̀ соблюду̀ ѡⷮ годи́ны и҆скуше́нія, хотя́щагѡ пріитѝ на всю̀ вселе́нную (А҆пока́л: глⷡа г҃).

[г҃] Хрⷭто́съ терпѣ́ніемъ на крⷭтѣ̀ побѣдѝ врага̀, терпѣ́ніемъ ѡ҆судѝ сме́рть, терпѣ́ніемъ разорѝ а҆́да, тму̀ прогна̀, спасе́ніе на́ше содѣ́я: и҆ ꙗ҆̀же невоздержа́ніемъ и҆ нетерпѣ́ніемъ пра́дѣдъ на́шъ а҆да́мъ погубѝ: сія̑ сп҃си́тель на́шъ вкуше́ніемъ го́рестнымъ, и҆ кре́стнымъ претерпѣ́ніемъ взыска̀. И҆ поне́же ѻ҆́нъ на́съ ра́ди толи́кѡ пострада̀, поне́же ѻ҆́нъ толи́кѡ на́съ ра́ди претерпѣ̀: ты́ же ни ма́лѡ є҆гѡ̀ ра́ди претерпи́ши; Не бу́ди то̀. Сегѡ̀ ра́ди му́жественнѣ претерпѣва́й во вре́менной се́й жи́зни вся̑кія ѡⷮ бг҃а наноси̑мыя скѡ́рби, ꙗ҆́кѡ да во гряду́щемъ вѣ́цѣ вѣ́чнѡ ѡ҆ се́мъ возра́дуешися. Не претерпѣва́яй бо кто̀ здѣ̀ ско́рбныхъ, ра́достныхъ посе́мъ не пріи́метъ.

[д҃] Бл҃же́нъ му́жъ, и҆́же прете́рпитъ и҆скуше́ніе, занѐ и҆ску́сенъ бы́въ, пріи́метъ вѣне́цъ жи́зни, глаго́летъ а҆пⷭлъ (І҆а́кѡва заⷱ н҃). Не и҆мѣ̀ є҆ди́нъ ѡⷮ четы́ридесять му́чєникъ терпѣ́нія, и҆ а҆́біе ꙗ҆́кѡ вода̀ въ ба́ни и҆злія́ся: претерпѣ́вшіи же нетлѣ́нными вѣнцы̀ оѹ҆вязо́шася. Є҆ди́ною не претерпѣ́вый вся̑ погубѝ: до конца́ же вма́лѣ претерпѣ́вшіи, вѣ́чнѣ вѣнча́шася. Нетерпѣли́вый всегда̀ ꙗ҆́кѡ и҆зумле́нъ є҆́сть: а҆́ще случи́тся є҆му̀ что̀ сопроти́вно, не по во́ли се́рдца є҆гѡ̀, а҆́біе на всѣ́хъ наскаку́етъ, на всѣ́хъ ро́пщетъ, всѣ́хъ вино́вными твори́тъ, а҆ не себѐ, себе́ же вся́кѡ ѡ҆правда́етъ. Но ты̀ оѹ҆́бѡ бу́ди пригвожде́нъ всегда̀ на крⷭтѣ̀ терпѣ́нія, съ ра́достію вся̑ претерпѣва́й, а҆́ще и҆ по вся̑ дни̑ глаго́лютъ тѝ бѣ́си: сни́ди со креста̀ терпѣ́нія и҆ страда́нія, наслади́ся ѡ҆сла́бы, ꙗ҆́кѡ і҆уде́є ко хрⷭту̀ глаго́лаху: сни́ди, ре́кше, со крⷭта̀, и҆ вѣ́руемъ въ тя̀ (Матѳ. заⷱ ѯ҃и). Ты́ же никогда́же ѡ҆слабѣва́й, нижѐ и҆сходѝ, но пребу́ди всегда̀ на крⷭтѣ̀ терпѣ́нія и҆ му́жества, ꙗ҆́коже мѡѷсе́й, внегда̀ и҆мѣ̀ крⷭтоѻбра́знѡ просте́рты ру́цѣ, побѣжда́ше а҆мали́ка, є҆гда́ же ѡ҆слабля́ше, побѣжде́нъ быва́ше (И҆схоⷣ: глⷡа з҃і): и҆ ты̀ оѹ҆́бѡ є҆гда̀ пребу́деши всегда̀ въ неизмѣ́нномъ терпѣ́ніи и҆ му́жествѣ, преѡдолѣ́еши врага̀, мы́сленнаго а҆мали́ка: а҆́ще же ѡ҆слабѣ́еши, и҆ разлѣни́шися, побѣжде́нъ бу́деши ѡⷮ негѡ̀.

[є҃] Терпя̀ потерпѣ́хъ гдⷭа, и҆ вня́тъ мѝ, глаго́летъ прⷪро́къ (ѱало́мъ л҃ѳ): терпѣ́ніе оѹ҆бо́гихъ не поги́бнетъ до конца̀ (ѱало́мъ ѳ҃). Вне́млетъ гдⷭь терпѣ́нію, ѡⷮвраща́ется же наглоду́шія: терпѣли́віи въ слѣ́дъ є҆гѡ̀ ше́ствоваху, нетерпѣли́віи же наглоду́шніи, ѡⷮвраща́хуся: мно́зи бо речѐ, возвраща́хуся, и҆ ктому̀ не хожда́ху со і҆и҃сомъ, глаго́люще: же́стоко є҆́сть сло́во, кто̀ мо́жетъ є҆го̀ послу́шати (І҆ѡа́н. заⷱ к҃д); Го́ре ва́мъ погуби́вшымъ терпѣ́ніе, и҆ что̀ сотворитѐ, є҆гда̀ посѣти́тъ гдⷭь, глаго́летъ сіра́хъ (Сіраⷯ: глⷡа в҃). Му́жъ нетерпѣли́въ и҆ наглоду́шенъ, подо́бенъ є҆́сть на леду̀ и҆лѝ на песцѣ̀, а҆ не на ка́мени терпѣ́нія и҆ оѹ҆пова́нія хра́мину свою̀ зи́ждущему, по при́тчи є҆ѵⷢльской (Лукѝ заⷱ к҃и).

[ѕ҃] Є҆ли́кѡ, человѣ́че, ѕлонра́венъ є҆сѝ, толи́кѡ и҆ страда́ти не ѡⷮрица́йся, да си́мъ ѕлострада́ніемъ ѕло́бы и҆збу́деши, глаго́летъ нѣ́кто. Є҆ли́ка ꙗ҆́зва, толи́ко и҆ врачева́ніе: є҆ли́кѡ вели́къ стру́пъ, толи́ка и҆́мать бы́ти и҆ цѣльба̀: є҆ли́кѡ вели́къ грѣ́хъ, толи́ко и҆́мать бы́ти и҆ страда́ніе. Сегѡ̀ ра́ди па́мятствуя своя̑ мнѡ́гая недоста́точєства, не ѡⷮрица́йся никогда́же цѣльбы̀ терпѣ́нія: ꙗ҆́кѡ да оѹ҆зрѣ́въ своѐ душе́вное здра́віе, ѕѣлѡ̀ посе́мъ ѡ҆ цѣльбѣ̀ терпѣ́нія возра́дуешися, и҆ бг҃у благодаре́ніе ѡ҆ се́мъ возда́си, ꙗ҆́кѡ и҆сцѣли́ тя.

[з҃] Претерпѣва́й оѹ҆́бѡ благода́рнѣ вся̑ находя̑щая: а҆́ще случи́ттися что̀ ѡⷮ когѡ̀ печа́льно, не ѻ҆́наго вино́вна творѝ, но себѐ: не ту́не бо бг҃ъ на тя̀ сіѐ попустѝ, но и҆́миже вѣ́сть судьба́ми, къ твоему̀ и҆справле́нію: ничто́же быва́етъ без̾ бг҃а. Бг҃ъ оѹ҆́бѡ мно́гажды врачу́я тя̀, разли́чна попуща́етъ и҆скушє́нія: ты́ же неблагода́рнѣ пріе́мля, и҆на́го вино́вна твори́ши, а҆ не себѐ. Не творѝ оѹ҆́бѡ ты̀ никого̀ вино́вна, но себѐ: ꙗ҆́кѡ по дѣлѡ́мъ прія́лъ є҆сѝ. Лу́чше му́жъ долготерпѣли́въ, не́же крѣ́покъ: терпѣли́въ му́жъ мно́гъ въ му́дрости, малоду́шенъ же крѣ́покъ без̾ оѹ҆ма̀ (При́тч: глⷡа ѕ҃і).

[и҃] Не скорбѝ на ѡ҆скорбля́ющаго тя̀, но па́че благода́рнѣ претерпѝ: лу́чше бо є҆́сть ѡ҆скорбля́ему бы́ти ѡⷮ когѡ̀, не́же кого̀ ѡ҆скорби́ти: лу́чше безче́ствуему бы́ти, не́же кого̀ безче́стити, оѹ҆коря́ему бы́ти, не́же оѹ҆коря́ти, ѡ҆би́диму, не́же ѡ҆би́дѣти. Не ве́ліе бо є҆́сть сѐ, є҆́же бы ты̀ ѡ҆би́дѣлъ кого̀, и҆лѝ безче́стилъ: се́ же ве́ліе, є҆́же ѡⷮ когѡ̀ ѡ҆би́димь и҆ безче́ствуемь бы́вши, благода́рнѣ претерпи́ши: за ѡ҆бидѣ́ніе бо и҆ безче́стіе, ка́знь, за терпѣ́ніе же ве́ліе ѡⷮ бг҃а возме́здіе и҆ по́честь.

[ѳ҃] Кто̀ хотя̀ чесогѡ̀ научи́тися, и҆ не претерпѣва́яй во оѹ҆че́ніи, что̀ навы́кнетъ; кто̀ не претерпѣва́яй лѣчбы̀, и҆сцѣли́тъ ꙗ҆́зву; кто̀ терпѣли́внѡ не нося́й на плещу̀ свое́ю крⷭта̀ терпѣ́нія, въ слѣ́дъ хрⷭта̀ ше́ствуетъ; никто́же. Всѝ є҆ли́цы въ слѣ́дъ є҆гѡ̀ ше́ствовати хотя́ху, оѹ҆гото́виша себѐ къ терпѣ́нію и҆ и҆скуше́нію, по ре́кшему: а҆́ще приступа́еши рабо́тати гдⷭви, оѹ҆гото́ви ду́шу свою̀ во и҆скуше́ніе: оѹ҆пра́ви се́рдце своѐ, и҆ потерпѝ, глаго́летъ сіра́хъ (Сіра́х: глⷡа в҃). Скорби́тъ и҆ смуща́ется ѻ҆троча̀ ѡ҆ свое́мъ оѹ҆че́ніи: є҆гда́ же и҆звы́кнетъ, ѕѣлѡ̀ посе́мъ ра́дуется. Скорби́тъ и҆ вопіе́тъ неду́гуяй, не хотя̀ претерпѣ́ти го́рькагѡ къ ꙗ҆́звамъ приложе́нія є҆гда́ же ѡ҆здра́вѣетъ, ѕѣлѡ̀ посе́мъ благодари́тъ врачу́ющаго: си́це и҆ въ се́мъ є҆́сть.

[і҃] Призыва́яй на́съ къ себѣ̀ гдⷭь, къ терпѣ́нію и҆ бра́ни поѡщря́етъ на́съ: а҆́ще кто̀, речѐ, хо́щетъ въ слѣ́дъ менѐ и҆тѝ, да ѡⷮве́ржется себѐ, си́рѣчь, самолю́бія во́ли своея̀, и҆ во́зметъ крⷭтъ сво́й, терпѣ́нія и҆ му́жества и҆ въ слѣ́дъ менѐ да и҆́детъ (Матѳ. заⷱ ѯ҃ѳ). не взима́яй же крⷭта̀ терпѣ́нія и҆ му́жества, нижѐ хотя́й ма́ло претерпѣ́ти что̀, ка́кѡ въ слѣ́дъ є҆гѡ̀ ше́ствуетъ; ника́коже. Не проше́дый бо кто̀ сквозѣ̀ ѻ҆́гнь и҆ во́ду терпѣ́нія, ка́кѡ вни́детъ въ поко́й, по прⷪро́ку глаго́лющему; проидо́хомъ сквозѣ̀ ѻ҆́гнь и҆ во́ду, и҆ и҆зве́лъ є҆сѝ ны̀ въ поко́й (ѱало́мъ ѯ҃є). Претерпѝ оѹ҆́бѡ и҆ ты̀ до́блественнѣ вся̑ находя̑щая и҆скушє́нія, ꙗ҆́кѡ да вни́деши въ поко́й, и҆ вѣнце́мъ нетлѣ́нія вѣнча́ешися. Пребу́ди всегда̀ въ неизмѣ́нномъ терпѣ́ніи, му́жествѣ же и҆ воздержа́ніи, ꙗ҆́кѡ да оѹ҆мертви́ши плотскі́я по́хѡти, ꙗ҆́кѡ да притупи́ши грѣхо́вное ѻ҆ру́жіе, да побѣди́ши а҆́да, мы́сленнаго а҆мали́ка: ничи́мъ бо та́кѡ побѣди́ти є҆го̀ мо́жеши, ꙗ҆́коже терпѣ́ніемъ и҆ воздержа́ніемъ: тѣ́мъ прожене́ши бѣ́сы, оѹ҆гаси́ши гее́нскій пла́мень, оѹ҆кроти́ши стра̑сти всеконе́чнѡ, му́ки и҆ го́рести и҆збу́деши, и҆ жи́знь вѣ́чную получи́ши, ктому̀ и҆ присносу́щныхъ бла̑гъ сподо́бишися, ѡ҆ хрⷭтѣ̀ і҆и҃сѣ гдⷭѣ на́шемъ.