Ча́сть г҃

Глава̀ седма́я

Ѡ҆ є҆́же не лѣни́тися, но трезви́тися въ дѣ́лѣ бж҃іи вы́ну.

Бу́ди оѹ҆́бѡ, человѣ́че, те́плъ и҆ оѹ҆се́рденъ, ду́хомъ всегда̀ горя̀: не бу́ди студе́нъ и҆ оѹ҆ны́лъ, да не оѹ҆слы́шиши словесѐ рече́ннагѡ: поне́же ни те́плъ є҆сѝ ни студе́нъ, но ꙗ҆́кѡ ѡ҆б̾уморе́нъ, и҆зблева́ти тя̀ ѡⷮ оѹ҆́стъ мои́хъ и҆́мамъ (А҆пока́л. глⷡа г҃). Тщи́ся, трезви́ся, не и҆знуря́й всу́е твоея̀ жи́зни вре́мене, да́ннагѡ тѝ на и҆справле́ніе душѝ твоея̀, на стяжа́ніе вѣ́чныхъ бла̑гъ. Блюдѝ, да ниеди́нъ де́нь пре́йдетъ всу́е: а҆́ще бо всу́е погуби́ши, и҆на́гѡ посе́мъ и҆мѣ́ти не бу́деши: а҆́ще бо оѹ҆жѐ пре́йде, пре́йде, и҆ оѹ҆жѐ погубле́ннагѡ вре́мене вспя́ть возврати́ти не мо́жеши. Сегѡ̀ ра́ди не погубля́й всу́е дні́й твои́хъ, но да сравня́ются и҆справлє́нія твоя̑ съ тече́ніемъ дні́й твои́хъ: не ту́не бо тебѣ̀ дана̀ сія̀ вре́менная жи́знь, но да въ не́й на вся́къ де́нь при́снѡ поуча́ешися, и҆ преуспѣва́еши, и҆ и҆справля́еши добродѣ́телей по́двигъ, пра́зденъ же никогда́же да бу́деши.

[в҃] Вѣ́къ се́й нѣ́сть поко́й и҆ почива́ніе, но борьба̀ и҆ ра́ть, то́ржище, ку́пля, оѹ҆чи́лище, и҆ морско́е пла́ваніе: нѣ́сть ниеди́нъ ми́ръ въ ра́ти и҆ бра́ни, нижѐ поко́й во оѹ҆чи́лищи и҆ на то́ржищи, нижѐ па́ки въ морско́мъ пла́ваніи безпеча́ліе. Кто̀ на мо́ри без̾ стра́ха; кто̀ на то́ржищи, и҆ во оѹ҆чи́лищи въ поко́и; никто́же. Сегѡ̀ ра́ди не лѣни́ся въ дѣ́лѣ бж҃іи, нижѐ оѹ҆ныва́й, но подвиза́йся, труди́ся, дне́сь бо тѝ є҆́сть жа́тва, дне́сь то́ржище, дне́сь ку́пля: жнѝ, купу́й, да не то́щъ ѡ҆брѣ́тшися, ѕлѣ̀ ѡ҆су́дишися, да не бл҃года́ти бж҃ія чу́ждь бу́деши. Пріе́мый тала́нтъ, не погубѝ, но не оѹ҆мно́жи, сегѡ̀ ра́ди слы́ша: лука́вый ра́бе и҆ лѣни́вый, подоба́ше оѹ҆́бѡ тебѣ̀ вда́ти сребро̀ моѐ торжникѡ́мъ, и҆ прише́дъ а҆́зъ взя́лъ бы́хъ своѐ съ ли́хвою, по при́тчи є҆ѵⷢльской (Матѳ. заⷱ р҃є). Ты́ же то́чію не оѹ҆мно́жилъ є҆сѝ, но и҆ ѡⷮню́дъ лѣ́ности и҆ нечу́вствія ра́ди вся̑ погуби́лъ є҆сѝ. Что̀ оѹ҆́бѡ рече́ши въ де́нь стра́шнагѡ суда̀, є҆гда̀ подро́бну ѡ҆ все́мъ и҆спы́танъ бу́деши; внемлѝ себѣ̀.

[г҃] Не зако́пывай оѹ҆́бѡ да́ннагѡ тѝ тала́нта въ зе́млю лѣ́ности и҆ нечу́вствія, но тщи́ся, трезви́ся, бо́дрствуй, ѻ҆́гнь ко ѻ҆гню̀, теплоту̀ къ теплотѣ̀ непреста́ннѡ прилага́й, да оѹ҆сугу́биши є҆го̀, да оѹ҆мно́живши и҆ оѹ҆сугу́бивши да́нное тебѣ̀, со дерзнове́ніемъ пред̾ гдⷭемъ въ де́нь ѻ҆́нъ рече́ши: сѐ гдⷭи приѡбрѣто́хъ другі̑я пя́ть тала̑нтъ: ѡⷮ гдⷭа же оѹ҆слы́шиши пресла́дкій гла́съ глаго́лющь: благі́й ра́бе и҆ вѣ́рный, вма́лѣ бы́лъ є҆сѝ вѣ́ренъ, над̾ мно́гими тя̀ поста́влю, вни́ди въ ра́дость гдⷭа своегѡ̀ (Матѳ. заⷱ р҃є).

[д҃] А҆́ще же не бу́деши оѹ҆множа́ти да́ннагѡ тѝ ѡⷮ гдⷭа тала́нта, но оѹ҆маля́ти и҆ погубля́ти: а҆́ще не бу́деши преуспѣва́ти къ горѣ̀ добродѣ́телей, но нисходи́ти ни́зу: а҆́ще не бу́деши прилага́ти на вся́къ де́нь ѻ҆гня̀ ко ѻ҆гню̀, и҆ оѹ҆се́рдія ко оѹ҆се́рдію, но до конца̀ ѡ҆сты́неши и҆ ѡ҆каменѣ́еши, то̀ послѣдѝ бу́детъ паде́ніе твоѐ пла́ча и҆ рыда́нія досто́йно: но оѹ҆́бѡ лу́чше тѝ є҆́сть твори́ти благо́е, не́же ѕло́е, трезви́тися и҆ бо́дрствовати: поне́же за ѕло́е му́ка, за благо́е же ве́ліе возме́здіе: за трезве́ніе и҆ бо́дрость похвала̀: за лѣ́ность же ѡ҆сужде́ніе и҆ ка́знь. Сегѡ̀ ра́ди бдѝ на вся́къ де́нь и҆ трезви́ся: бу́ди вѣ́ренъ до сме́рти, и҆ да́мъ тѝ вѣне́цъ жи́зни (А҆пока́л. глⷡа в҃): бѣ́съ бо трезви́тся, бо́дрствуетъ, никогда́же почива́етъ, но хо́дитъ ꙗ҆́кѡ ле́въ рыка́яй, и҆ща́й кого̀ поглоти́ти ѡⷮ проти́вящихся є҆му̀. Тѣ́мже и҆ ты̀ всегда̀ трезви́ся, бо́дрствуй, и҆ никогда́же почива́й, да оѹ҆гонзне́ши сѣте́й є҆гѡ̀ тебѣ̀ сплета́емыхъ.

[є҃] Поѡщря́етъ и҆ оѹ҆́читъ тя̀ всегда̀ тружда́тися прему́дрый соломѡ́нъ, глаго́ля: и҆дѝ ко мра́вію, ѡ лѣни́ве! и҆ поревну́й ви́дѣвъ пути̑ є҆гѡ̀, и҆ бу́ди ѻ҆́нагѡ мудрѣ́йшій: ѻ҆́нъ бо не су́щу є҆му̀ земледѣ́льцу, нижѐ ну́дящаго є҆го̀ и҆му́щій, нижѐ под̾ влⷣкою сы́й, гото́витъ въ жа́тву пи́щу, и҆ мно́гое въ лѣ́то твори́тъ оѹ҆гото́ваніе, и҆лѝ и҆дѝ ко пчелѣ̀, и҆ оѹ҆вѣ́ждь ко́ль дѣ́лательница є҆́сть, дѣ́ланіе же ко́ль честно́е твори́тъ, є҆я́же трудѡ́въ ца́ріе и҆ прості́и во здра́віе оѹ҆потребля́ютъ, люби́ма же є҆́сть всѣ́ми и҆ сла́вна: а҆́ще си́лою и҆ немощна̀ су́щи, [но] прему́дростію почте́на произведе́ся. и҆ па́ки: доко́лѣ, речѐ, ѡ лѣни́ве лежи́ши! когда́ же ѡⷮ сна̀ воста́неши; ма́лѡ же дре́млеши, ма́лѡ же ѡ҆б̾е́млеши пе́рси рука́ма: пото́мже на́йдетъ тебѣ̀ а҆́ки ѕо́лъ пу́тникъ оѹ҆бо́жество: ску́дость же а҆́ки благі́й тече́цъ: а҆́ще же не лѣни́въ бу́деши, пріи́детъ ꙗ҆́кѡ и҆сто́чникъ жа́тва твоя̀, ску́дость же а҆́ки ѕлы́й тече́цъ [ѡⷮ тебѐ] ѡⷮбѣжи́тъ (При́тч. глⷡа ѕ҃). Сегѡ̀ ра́ди дѣ́лай всегда̀ благо́е, де́нь ѡⷮ днѐ преуспѣва́й, ны́нѣшнее бо вре́мя є҆́сть дѣ́ланію, тогда́ же возме́здію: ны́нѣшнее труда̀, тогда́ же поко́я: ны́нѣшнее ско́рби и҆ терпѣ́нія, тогда́ же вѣнча́нія и҆ по́чести: ны́нѣшнее пла́ча и҆ сѣ́тованія, тогда́ же ра́дости и҆ весе́лія.

[ѕ҃] Не почива́й оѹ҆́бѡ человѣ́че, нижѐ безпечаля́йся когда̀ въ вѣ́цѣ се́мъ: но всегда̀ бо́дръ, и҆ ѻ҆па́сенъ бу́ди, всегда̀ тщи́ся и҆ трезви́ся: є҆ди́но бо тѝ предлежи́тъ, и҆лѝ побѣди́ти врага̀, и҆лѝ побѣжде́нну ѡⷮ негѡ̀ бы́ти, и҆лѝ при бз҃ѣ бы́ти, и҆лѝ ѡⷮ негѡ̀ ѡⷮлучи́тися, и҆лѝ пасти́ся, и҆лѝ поги́бнути, и҆́накѡ бо нѣ́сть мо́щно: ми́ра бо и҆ поко́я въ вѣ́цѣ се́мъ никогда́же ѡ҆бря́щеши, нижѐ тишину̀ и҆ ѻ҆сла́бу наслѣ́диши. Сегѡ̀ ра́ди доне́лѣ жи́въ є҆сѝ въ вѣ́цѣ се́мъ, никогда́же безбоя́зненъ и҆ безпеча́ленъ быва́й, но всегда̀ ꙗ҆́кѡ на ра́ть и҆ бра́нь гото́въ бу́ди. Мі́ръ се́й оѹ҆стро́енъ є҆́сть не на поко́й и҆ ѡ҆почива́ніе, но на тру́дъ и҆ по́двигъ, не на тишину̀ и҆ оѹ҆тѣше́ніе, но на борбу̀ и҆ ра́ть. Сегѡ̀ ра́ди подвиза́йся, труди́ся, трезви́ся, до́ндеже и҆́маши вре́мя, до́ндеже и҆́маши ча́съ, ѕѣлѡ̀ жела́тельнѣ жела́лъ бы є҆сѝ дабы̀ возвращено̀ тебѣ̀ бы́ло всу́е погубле́нное вре́мя. ѻ҆ба́че сегѡ̀ не получи́ши, а҆́ще да́нное вре́мя погуби́ши: є҆ди́но тѝ є҆́сть вре́мя, и҆́нагѡ посе́мъ во вѣ́ки и҆мѣ́ти не бу́деши. Сегѡ̀ ра́ди потруди́ся ма́лѡ во́лею, ꙗ҆́кѡ да посе́мъ мно́гія бѣды̀ не постра́ждеши и҆ не во́лею, потруди́ся на ма́лъ ча́съ со оѹ҆се́рдіемъ, ꙗ҆́кѡ да посе́мъ мно́гую бл҃года́ть ѡⷮ гдⷭа пріи́меши, и҆ живота̀ вѣ́чнагѡ сподо́бишися.

[з҃] Пла́ча досто́инъ то́й є҆́сть, и҆́же зри́тъ себѐ всего̀ согнива́ема, и҆ червмѝ снѣда́ема, и҆ не тщи́тся ѡ҆ цѣльбѣ̀ оѹ҆бива́тельной че́рвія: но лу́чше и҆зволя́етъ бы́ти согнива́емь, и҆ червмѝ снѣда́емь, не́же оѹ҆враче́ванъ и҆ и҆сцѣле́нъ: си́це пла́ча и҆ рыда́нія, па́че же ѡ҆сужде́нія досто́инъ є҆́сть се́й, и҆́же ви́дя себѐ всего̀ согнива́ема, и҆ червмѝ разли́чныхъ страсте́й снѣда́ема, не тщи́тся пріитѝ въ соверше́нное врачева́ніе своегѡ̀ душе́внагѡ неду́га, и҆ дости́гнути въ ти́хое приста́нище бжⷭтвенныя гдⷭни любвѐ и҆ позна́нія, и҆ не пече́тся все́ю душе́ю ѡ҆соли́тися со́лію прест҃а́гѡ дх҃а, во є҆́же бы́ти соверше́нное жили́ще гдⷭви: но лу́чше и҆зволя́етъ бы́ти согнива́емь, и҆ червмѝ разли́чныхъ бѣсо́вскихъ стра́стныхъ мучи́тельствъ всегда̀ му́чимь и҆ снѣда́емь, не́же и҆сцѣле́нъ и҆ соедине́нъ бы́ти бг҃у.

[и҃] Не щадѝ пло́ти, хрⷭта̀ ра́ди: поне́же ѻ҆́нъ ю҆̀ созда̀: не щадѝ страда́ти твоегѡ̀ є҆стества̀, поне́же ѻ҆́нъ раздробле́нное и҆ разсы́панное па́ки и҆сцѣли́тъ, и҆ ѡ҆бнови́тъ: не щадѝ є҆гѡ̀, є҆му̀ принестѝ, да па́ки ѡⷮ негѡ̀ сугу̑быя по́чєсти пріи́меши: не щадѝ оѹ҆́бѡ себѐ, но постраждѝ хрⷭта̀ ра́ди, ꙗ҆́коже и҆ ѻ҆́нъ тебѐ ра́ди пострада̀. Не ви́диши ли, ꙗ҆́кѡ друзі́и въ вели́цѣй бѣдѣ̀ и҆знуря́ютъ жи́знь свою̀, и҆ въ вели́цѣй бѣдѣ̀ въ мі́рѣ се́мъ ꙗ҆дя́тъ хлѣ́бъ; ни пи́щи дово́льныя и҆му́ще, нижѐ и҆му́ще чи́мъ прикры́ти свою̀ наготу̀: да̑ни вели̑кія даю́ще, мнѡ́ги скѡ́рби и҆ напа̑сти терпя́ще: ѻ҆ба́че ѡ҆ себѣ̀ всегда̀ пеку́тся, и҆ бг҃а не презира́ютъ, ты́ же ѡⷮ всегѡ̀ свобо́дь є҆сѝ, ѡⷮ всегѡ̀ ѡ҆блегче́нъ сы́й, ни ма́лѡ ѡ҆ душѣ̀ свое́й пече́шися, ни ма́лѡ бг҃у оѹ҆гожда́еши, но лѣни́шися и҆ оѹ҆ныва́еши, ни ма́лѡ подви́гнутися хо́щеши на землѝ, въ трудѣ̀ и҆́щеши поко́я: во тмѣ̀ и҆́щеши свѣ́та, въ сме́рти и҆́щеши жи́зни, но не ѡ҆бря́щеши, и҆ ника́коже оѹ҆ви́диши: то́чію бо въ гдⷭѣ бз҃ѣ є҆ди́номъ є҆́сть вѣ́чный поко́й.

[ѳ҃] А҆́ще бы тѝ предлежа́ло ѡⷮ є҆ди́ныя страны̀ вре́менное страда́ніе, ѡⷮ другі́я же вѣ́чное, ѡⷮ є҆ди́ныя на ма́лъ ча́съ, ѡⷮ другі́я же во вѣ́ки: оѹ҆̀бо ко́е ѡⷮ си́хъ и҆зво́лилъ бы є҆сѝ, рцы́ ми; вѣ́мъ, ꙗ҆́кѡ вся́ко вре́менное, а҆́ще и҆ ѕѣлѡ̀ тя́жко бы́ло бы, и҆лѝ а҆́ще бы тѝ кто̀ ре́клъ потруди́ся мѝ де́нь є҆ди́нъ, и҆лѝ седми́цу є҆ди́ну, и҆ вѣ́рнѣ послужи́ ми, а҆́зъ же тѝ за сія̑ да́мъ вся́кагѡ бога́тства, вся́кагѡ ѻ҆би́льнагѡ наслажде́нія на ты́сящу лѣ́тъ: оѹ҆́бѡ не восхотѣ́лъ ли бы є҆сѝ; є҆́й вся́кѡ восхотѣ́лъ бы є҆сѝ, а҆́ще и҆ ѕѣлѡ̀ вели́къ бы́лъ бы тру́дъ. Бг҃ъ же тебѣ̀ за настоя́щій ма́лый по́двигъ, ꙗ҆́кѡ за є҆ди́нъ де́нь, и҆лѝ годи́ще, ѡ҆бѣща̀ да́ти мно́гѡ вся́кагѡ бога́тства и҆ наслажде́нія, и҆́хже ѻ҆́ко не ви́дѣ, и҆ оѹ҆́хо не слы́ша, и҆ на се́рдце человѣ́ку не взыдо́ша (а҃ Корі́н: заⷱ рк҃з), не на ты́сящу лѣ́тъ, нижѐ на двѣ̀, нижѐ на трѝ, но на вѣ́ки вѣ̑чныя, конца̀ не и҆му́щыя: почто̀ оѹ҆́бѡ ѡ҆ се́мъ не оѹ҆се́рдствуеши;

[і҃] До́брѣ є҆́сть, є҆ди́ною въ маловре́менномъ се́мъ вѣ́цѣ потруди́вшися сниска́ти вѣ́чный поко́й: є҆ди́ною научи́вшися и҆ просвѣти́вшися, сіѐ и҆мѣ́ти съ собо́ю во вѣ́ки: до́брѣ є҆́сть, є҆ди́ною сниска́вши вѣ́чное бога́тство, никогда́же во вѣ́ки бы́ти ѻ҆ску́дну: до́брѣ є҆́сть, є҆ди́ною въ ма́лѣ поскорбѣ́ти, и҆ хрⷭта̀ ра́ди ѡ҆печа́литися въ ма́ло вре́мя, ра́доватися же и҆ весели́тися во вѣ́ки вѣ̑чныя. Бл҃же́нъ є҆́сть, и҆́же а҆́ще сегѡ̀ сподо́бится: бл҃же́нъ, и҆́же а҆́ще сіѐ пріи́метъ: бл҃же́нъ є҆́сть се́й, и҆́же въ ма́лѣмъ се́мъ вре́мени, и҆ ма́лымъ си́мъ трудо́мъ и҆ по́двигомъ ѡ҆бря́щетъ вѣ́чный живо́тъ, и҆ присносу́щное наслажде́ніе и҆ бога́тство.