Ча́сть г҃

Глава̀ ѻ҆сма́я

Ѡ҆ є҆́же не лѣни́ву бы́ти, ни оѹ҆ныва́ти, но всегда̀, де́нь и҆ но́щь оѹ҆се́рдствовати и҆ пещи́ся ѡ҆ себѣ̀.

Оѹ҆се́рдствуй, человѣ́че, оѹ҆се́рдствуй де́нь и҆ но́щь: къ бг҃у вопі́й во днѝ и҆ въ нощѝ, непреста́нное попече́ніе ѡ҆ себѣ̀ и҆мѣ́й: дне́сь бо и҆́маши вре́мя, дне́сь и҆́маши ча́съ, и҆́нагѡ посе́мъ и҆мѣ́ти не бу́деши, а҆́ще и҆ хотѣ́лъ бы є҆сѝ. Не и҆знуря́й всу́е вре́мене да́ннагѡ тѝ на стяжа́ніе вѣ́чныхъ бла̑гъ: вре́мя бо ма́ло, дѣ́лъ же без̾ числа̀. То́ржище расходя́щееся, ку́пля же притру́дна: тщи́ся, трезви́ся, непреста́ннѡ ѡ҆ се́мъ попече́ніе и҆мѣ́й, да не на́гъ въ де́нь стра́шнагѡ суда̀ ѡ҆бря́щешися. Дне́сь сіѐ и҆спра́ви, оѹ҆́трѡ же и҆́но, и҆ та́кѡ никогда́же въ дѣ́лѣ престава́й, никогда́же пра́зденъ бу́ди. Помянѝ, ꙗ҆́кѡ ра́ди вре́менныя сла́вы, ра́ди тлѣ́ннагѡ бога́тства, ра́ди веще́й су́етныхъ, коли́кѡ стра́ждутъ, коли́кѡ тружда́ются, коли́кѡ тща́тся: ты́ же ѡ҆ толи́кихъ вѣ́чныхъ благи́хъ, ка́кѡ не тщи́шися; ка́кѡ не оѹ҆се́рдствуеши, но лѣни́шися и҆ почива́еши; Глаго́лю тѝ: оѹ҆се́рдствуй, труди́ся, тщи́ся, до́ндеже и҆́маши вре́мя, до́ндеже є҆́сть ча́съ, да не погуби́ши всу́е вре́мене да́ннагѡ тѝ на стяжа́ніе вѣ́чныя жи́зни.

[в҃] На путѝ є҆сѝ вѣ́ка сегѡ̀, ше́ствуй: на ле́дѣ є҆сѝ весе́нномъ, не бу́ди безпеча́ленъ: на бра́ни є҆сѝ сегѡ̀ мі́ра, бори́ся: на то́ржищи є҆сѝ вре́менномъ, купу́й: блюдѝ, да не то́щъ и҆ на́гъ въ до́мъ сво́й вѣ́чный возврати́шися: ви́диши бо, ꙗ҆́кѡ и҆ні́и непреста́ннѡ ѡⷮсю́ду ѡⷮхо́дятъ, и҆ ты̀ не вдо́лзѣ по́йдеши: непреста́ннѡ оѹ҆мира́ютъ, и҆ ты̀ не вдо́лзѣ оѹ҆́мреши: нижѐ па́ки вѣ́си ко́егѡ вре́мене, ко́егѡ часа̀, дне́сь ли, и҆лѝ оѹ҆́трѡ: ра́нѡ ли, и҆лѝ въ ве́черъ: въ полу́дни, и҆лѝ въ полу́нощи: сегѡ̀ ра́ди никогда́же бу́ди безбоя́зненъ: не ма́лая бо тѝ предлежи́тъ ве́щь, но вели́кая: не вре́менная, но вѣ́чная. Сегѡ̀ ра́ди подвиза́йся оѹ҆се́рднѣ, не лѣни́ся, не оѹ҆ныва́й, настои́тъ бо тѝ по́двигъ, предлежи́тъ тѝ побѣ́да, подвигополо́жникъ зри́тъ, вѣнцы̀ оѹ҆гото́вани, по́честь предлежи́тъ, сла́ва и҆ наслажде́ніе непремѣ́нно: ли́цы а҆́гг҃льстіи, и҆ а҆рха́гг҃льстіи, и҆ всѣ́хъ небе́сныхъ си́лъ, зря́тъ и҆ чудя́тся: всѣ́хъ ст҃ы́хъ собо́ри ѡ҆жида́ютъ, со ѕѣ́льнымъ жела́ніемъ прія́ти тя̀ надѣ́ющеся.

[г҃] Оѹ҆се́рдствуй оѹ҆́бѡ, человѣ́че, ко гдⷭу те́плѣ, не лѣни́ся, ꙗ҆́кѡ да вся̑ бу́дутъ тѝ спѣ̑шна и҆ ра́дѡстна: да вся̑ бу́дутъ тѝ жела́тєльна и҆ люби̑ма: дне́сь бо ты̀ сегѡ̀ ра́ди лѣни́шися и҆ оѹ҆ныва́еши, поне́же всѣ́мъ се́рдцемъ свои́мъ гдⷭа не лю́биши: тѣ́сенъ бо и҆ приско́рбенъ мни́тся бы́ти пу́ть вводя́щій въ живо́тъ не лю́бящымъ бг҃а: а҆́ще же кто̀ є҆го̀ и҆́стиннѡ возлю́битъ, ни є҆ди́нагѡ къ тому̀ труда̀ и҆мѣ́ти бу́детъ, но вся̑ є҆му̀ ра́дѡстна и҆ жела́тєльна бу́дутъ: ст҃і́и бо, и҆̀же и҆́стиннѡ и҆ прилѣ́жнѡ бг҃а возлюби́ша, вся́къ тру́дъ и҆̀мъ бы́лъ безтру́денъ, печа́ль без̾ печа́ль, ско́рбь без̾ ско́рби: нѣ́цыи бо разже́гшеся бжⷭтвенною любо́вію, нижѐ въ со́нномъ спа́ніи возмоглѝ оѹ҆толи́ти къ бг҃у своегѡ̀ жела́нія, та́кѡ ꙗ҆́коже и҆ са́мую пи́щу и҆ питіѐ презира́ти и҆̀мъ: не возмоглѝ насы́титися прест҃а́гѡ є҆гѡ̀ и҆́мени, пречⷭтыхъ є҆гѡ̀ бжⷭтвенныхъ слове́съ. Си́це возжго́ша ду́шы своя̑ бж҃е́ственною любо́вію, ꙗ҆́коже забыва́ти и҆̀мъ, а҆́ще въ тѣ́лѣ, и҆лѝ кромѣ̀ тѣ́ла су́ть: и҆ съ ра́достію хрⷭта̀ ра́ди предава́ли себѐ на сме́рть. Си́це нѣ́цыи разжего́шася бж҃е́ственною любо́вію, ꙗ҆́кѡ а҆́ки въ чужды́хъ тѣлесѣ́хъ подвиза́хуся, въ постѣ̀ и҆ моли́твѣ, и҆ бдѣ́ніи: предава́ху себѐ на ра̑ны и҆ оѹ҆біе́ніе, и҆ не чу́ша болѣ́зни ѡⷮ ѕѣ́льныя и҆́хъ къ бг҃у любвѐ: люби́магѡ бо ра́ди вся̑ люби̑ма и҆ жела́тєльна су́ть. Мы́ же, поне́же гдⷭа своегѡ̀ и҆́стиннѡ не лю́бимъ: сегѡ̀ ра́ди нетру́дное дѣ́ло мни́тся бы́ти тру́дно: и҆ нетя́жкое тя́жко мни́тся, и҆ оѹ҆до́бное неудо́бно. Возлю́бимъ оѹ҆́бѡ и҆́стиннѡ гдⷭа, да вся̑ бу́дутъ на́мъ спѣ̑шна и҆ оѹ҆гѡ́дна, да вся̑ бу́дутъ на́мъ ра́дѡстна и҆ любє́зна: лю́бящему бо бг҃а, вся̑ поспѣшеству́ютъ во благо́е, глаго́летъ а҆пⷭлъ (Ри́м: заⷱ ч҃и).

[д҃] Восходѝ де́нь ѡⷮ днѐ къ гѡ́рнимъ степе́нємъ: преуспѣва́й въ добродѣ́телехъ и҆ по́двизѣхъ: не лѣни́ся, не не чу́вствуй, не да́ждь себѣ̀ поко́я, не да́ждь ѡ҆сла́бы, не да́ждь ѡ҆почива́нія: не поко́я бо дне́сь вре́мя, не почива́нія, но по́двига и҆ тща́нія: бѣ́си бо не почива́ютъ, но ретя́тся, и҆ оѹ҆готовля́ютъ непреста́ннѡ сѣ̑ти и҆ тенє́та по всѣ́мъ стезя́мъ твоегѡ̀ ше́ствія: назира́ютъ, смо́трятъ твоея̀ кончи́ны, ѡ҆жида́ютъ ѡⷮ пло́ти твоегѡ̀ разлуче́нія, оѹ҆хищря́ютъ разли́чнѣ препя́ти и҆ ꙗ҆́ти тя̀ чи́мъ хотя́ще, ꙗ҆́кѡ да сѣте́й и҆́хъ не оѹ҆гонзне́ши. Не мнѝ, ꙗ҆́кѡ ми́ръ и҆ поко́й въ вѣ́цѣ се́мъ є҆́сть, но ра́ть и҆ борба̀. Сегѡ̀ ра́ди бо́дрствуй всегда̀, и҆ никогда́же почива́й: почі́еши тогда̀, є҆гда̀ побѣди́ши, є҆гда̀ сѣте́й вра́жіихъ свободи́шися, є҆гда̀ всѣ́хъ ко́зней превы́шше бу́деши, є҆гда̀ бг҃у соедини́вшися, прест҃ы́я є҆гѡ̀ любвѐ и҆спо́лниши свою̀ ду́шу.

[є҃] Помянѝ оѹ҆́бѡ, коли́кѡ человѣ́цы ра́ди тлѣ́нныхъ и҆ мимотеку́щихъ веще́й стра́ждутъ и҆ тружда́ются: но́щи не досыпа́юще, никогда̀ ѡ҆почива́нія себѣ̀ даю́ще, въ купе́чествѣ, въ худо́жествѣ, въ хлѣ́бномъ ѻ҆ру́діи, въ во́инствѣ, въ морско́мъ пла́ваніи, въ путеше́ствіи въ да́льныя страны̑, и҆ во и҆ны́хъ разли́чныхъ попече́ніяхъ и҆ трудѣ́хъ: ты́ же ра́ди вѣ́чныхъ и҆ безсме́ртныхъ бла̑гъ ни ма́лѡ потруди́тися хо́щеши, но лѣни́шися и҆ не чу́вствуеши. Но оѹ҆́бѡ тщи́ся, трезви́ся, и҆ воспрянѝ ѡ҆ себѣ̀: почто̀ лѣни́шися; почто̀ не чу́вствуеши; почто̀ вре́мя своѐ пра́зднѣ и҆знуря́еши; и҆лѝ оѹ҆жѐ сконча́лъ є҆сѝ; и҆лѝ оѹ҆жѐ побѣди́лъ є҆сѝ; и҆лѝ оѹ҆жѐ без̾ бра́ни є҆сѝ; и҆лѝ оѹ҆жѐ съ бг҃омъ соедини́лся є҆сѝ; Что̀ дѣ́лаеши; что̀ купу́еши; Внемлѝ себѣ̀: то́ржище расходя́щееся, со́лнце къ ве́черу приближа́ется, су́дъ при две́рехъ ѡ҆жида́етъ, жа́тва прихо́дитъ, жи́знь твоя̀ де́нь по дню̀ скончава́ется: ты́ же что̀ сѣди́ши пра́зденъ; что̀ мяте́шися су́етнѣ; кто́ бо во вре́мя сѣ́янія спя́й, и҆лѝ сѣдя́й, пото́мъ наста́вшей жа́твѣ, нѣ́дро и҆спо́лни рукоя́тьми; Кто̀ ѡ҆б̾има́етъ віногра́дъ, ѡⷮ негѡ̀ не насажде́нный; Ѻ҆́нѣхъ су́ть плоды̀, и҆́хже и҆ труды̀: че́сть и҆ вѣнцы̀ побѣди́вшихъ су́ть, ꙗ҆́коже глаго́летъ нѣ́кто.

[ѕ҃] Почто̀ не вопіе́ши те́плѣ къ бг҃у, ѡⷮню́дуже ве́сь є҆сѝ; почто̀ не труди́шися: почто̀ не дѣ́лаеши; почто̀ не собира́еши, доне́лѣже є҆́сть вре́мя, доне́лѣ є҆́сть ча́съ; пріи́детъ безго́діе, є҆гда̀ ничто́же дѣ́лати возмо́жеши: вре́мя жи́зни твоея̀, ꙗ҆́кѡ є҆ди́нъ де́нь є҆́сть. Вопі́й къ бг҃у: труди́ся, трезви́ся, купу́й, дѣ́лай, собира́й, жнѝ, доне́лѣ є҆́сть жа́тва, доне́лѣ є҆́сть пого́дное вре́мя, доне́лѣ не на́йдетъ но́щь, доне́лѣ не пріи́детъ зима̀, въ не́йже а҆́ще и҆ хотѣ́лъ бы є҆сѝ что̀ дѣ́лати, не возмо́жеши. Кто̀ лѣня́ся и҆ не пекі́йся сни́скиваетъ вре́менное бога́тство; кто̀ не радя̀ и҆ не чу́вствуя, пріе́млетъ че́сть и҆ сла́ву; кто̀ ничто́же дѣ́лая пріе́млетъ возме́здіе; Никто́же. А҆́ще же сія̑ вре́мєнная не дана̀ быва́ютъ не тща́щемуся и҆ не пеку́щемуся, коли́кѡ па́че вѣ̑чная: а҆́ще бо вре́мєнная съ трудо́мъ быва́ютъ, коли́кѡ па́че, ꙗ҆̀же пребыва́ти и҆́мутъ во вѣ́ки.

[з҃] Вѣ́къ тво́й скончава́ется, сме́рть бли́зъ тебѐ є҆́сть, гро́бъ и҆ су́дъ гото́въ, бѣ́си ретя́тся: ты́ же что̀ сѣди́ши пра́зденъ; что̀ глуми́шися су́етнѣ, и҆ ꙗ҆́кѡ безсме́ртенъ пребыва́еши; Воспрянѝ, воспрянѝ и҆стрезви́ся, ѡⷮве́рзи ѻ҆́чи, ѡⷮве́рзи слу́хъ, разве́рзи па́мять, пріидѝ въ чу́вство: воззрѝ на со́лнце, воззрѝ на луну̀, воззрѝ на стіхі̑и нбⷭныя, ꙗ҆́кѡ непреста́ннѡ теку́тъ, оѹ҆мале́ніе твоея̀ жи́зни творя́ще, не ѡ҆почива́ютъ никогда́же: ты́ же почто̀ лѣни́шися; почто̀ ѡ҆почива́еши; Помянѝ, ка́кѡ ст҃і́и труди́шася, какову̀ ре́вность и҆ жела́ніе къ бг҃у и҆мѣ́ша: помянѝ, коли́ки по́двиги и҆ и҆справлє́нія показа́ша, и҆ ꙗ҆́кѡ въ чужди́хъ тѣлесѣ́хъ подвиза́шася: презрѣ́ша сла́ву, бога́тство, сла́сть тлѣ́нную: презрѣ́ша пло́ть, и҆ са́мое то̀ здра́віе. ничто́же въ мі́рѣ се́мъ возлюби́ша, ничто́же па́че любвѐ хрⷭто́вы предпочто́ша: ты́ же что̀ та́кѡ студе́нъ є҆сѝ и҆ оѹ҆ны́лъ; но оѹ҆́бѡ воспрянѝ, воспрянѝ и҆ непреста́нное попече́ніе ѡ҆ себѣ̀ и҆мѣ́й. Не дне́сь то́чію оѹ҆се́рдствуй, оѹ҆́трѡ же преста́ни: не дне́сь бо́дрствуй, оѹ҆́трѡ же лѣни́ся: но всегда̀ ра́внѣ бо́дрствуй, ра́внѣ трезви́ся, и҆ никогда́же ѡ҆почива́й, ꙗ҆́кѡ да жи́зни вѣ́чныя сподо́бишися.

[и҃] Оѹ҆се́рднѡ спѣшѝ ко хрⷭту̀, ничи́мже вре́меннымъ запина́ющися: те́плѣ тецы̀ въ слѣ́дъ є҆гѡ̀: ви́диши бо, ꙗ҆́кѡ мі́ръ се́й преле́стенъ є҆́сть и҆ превра́тенъ: ви́диши, ꙗ҆́кѡ ничто́же въ не́мъ є҆́сть постоя́нно и҆ непремѣ́нно: но вся̑ ꙗ҆́кѡ въ со́нномъ мечта́ніи и҆змѣня̑ющаяся. Дне́сь тишина̀, оѹ҆́трѡ смуще́ніе: дне́сь ра́дость, оѹ҆́трѡ пла́чь: дне́сь весе́ліе, оѹ҆́трѡ ско́рбь: дне́сь здра́віе, оѹ҆́трѡ неду́гъ: дне́сь живо́тъ, оѹ҆́трѡ сме́рть: ничто́же въ не́мъ є҆́сть постоя́нно и҆ непрело́жно. Кі́йждо де́нь влече́тъ съ собо́ю и҆змѣне́ніе: а҆́ще дне́сь ра́достенъ є҆сѝ, оѹ҆́трѡ ѡ҆жида́й печа́ли: а҆́ще дне́сь здра́въ є҆сѝ, оѹ҆́трѡ надѣ́йся болѣ́зни: а҆́ще дне́сь жи́въ є҆сѝ, оѹ҆́трѡ ча́й оѹ҆мре́ти. Не всегда́ бо си́це бу́деши, ꙗ҆́коже дне́сь є҆сѝ: но на вся́къ де́нь ѡ҆жида́й внеза́пнагѡ и҆змѣне́нія. Сегѡ̀ ра́ди оѹ҆се́рднѣ тецы̀ ко хрⷭту̀: въ не́мъ бо то́чію є҆ди́номъ неѡⷮмѣ́нная тишина̀ и҆ вѣ́чный поко́й: въ не́мъ то́чію є҆ди́номъ непремѣ́нная ра́дость и҆ присносу́щное наслажде́ніе, и҆́ндѣ же нигдѣ̀: но всѐ суета̀, всѐ пре́лесть, ло́жь и҆ непостоя́нство.

[ѳ҃] Бу́ди ꙗ҆́кѡ на пу́ть всегда̀ гото́въ, непреста́ннѡ ѡ҆ се́мъ попече́ніе и҆мѣ́й. Кто̀ на пу́ть вре́менный дале́кій ше́ствовати хотя̀, не съ прилѣжа́ніемъ гото́вится; кто̀ на ку́плю земну́ю и҆ды́й, не приготовля́етъ потре́бныхъ; ты́ же на пу́ть неизбѣ́жный, на то́ржище вѣ́чное и҆тѝ и҆мы́й, не гото́вишися; почто̀ ѡ҆ се́мъ лѣни́шися и҆ оѹ҆ныва́еши; Дѣ́йство є҆́сть твоегѡ̀ нечу́вствія: къ безсме́ртію бо восходя̀ лѣни́шися: къ вѣ́чной сла́вѣ ше́ствуя оѹ҆ныва́еши: ко присносу́щному наслажде́нію поспѣша́я сѣ́туеши. Кто̀ лѣни́тся, на земно́е пи́ршество и҆ды́й; кто̀ скорби́тъ, сегѡ̀ мі́ра че́сть и҆ сла́ву прія́ти и҆мы́й; кто̀ ѡ҆паса́ется, вре́менное бога́тство прія́ти жела́яй; Никто́же: но па́че всѝ ретя́тся, всѝ оѹ҆се́рднѡ ѡ҆ се́мъ тща́ніе и҆ попече́ніе творя́тъ. Но поне́же сѐ су́етно и҆ маловре́менно є҆́сть: сегѡ̀ ра́ди ты̀ всегда̀ оѹ҆се́рдствуй въ дѣ́лѣ бж҃іи, а҆ не скорбѝ и҆ не оѹ҆ныва́й: весели́ся, а҆ не бу́ди смуще́нъ поне́же за ма́лъ тру́дъ ве́ліе и҆ вѣ́чное предлежи́тъ тѝ возме́здіе.

[і҃] Тѣ́мже гото́вися, человѣ́че, непреста́ннѡ къ срѣ́тенію нбⷭнагѡ жениха̀, пресла́дкагѡ гдⷭа і҆и҃са: ꙗ҆́кѡ да оѹ҆срѣ́сти є҆го̀ съ горя́щимъ се́рдца твоегѡ̀ свѣти́льникомъ и҆ те́плою душе́ю возмо́жеши: се́ бо то́чію є҆ди́но съ тобо́ю ѡ҆ста́ти и҆́мать во вѣ́ки. Воспаля́й всегда̀ свѣти́льникъ се́рдца твоегѡ̀: блюдѝ, да не когда̀ въ тебѣ̀ оѹ҆га́снетъ, и҆ во тмѣ̀ нечу́вствія и҆ лѣ́ности ѡ҆ста́витъ тя̀: блюдѝ, да не затворя́ттися млⷭрдія гдⷭня двє́ри, и҆ внѣ̀ черто́га хрⷭто́ва ѡ҆ста́неши. Гото́вися на прія́тіе вну́трь тебѐ гдⷭа сла́вы, разве́рзи се́рдце твоѐ, разширѝ ду́шу твою̀, пріимѝ при две́рехъ се́рдца твоегѡ̀ стоя́щаго, и҆ непреста́ннѡ до душѝ твое́й толку́щаго и҆ гл҃ющаго: сѐ стою̀ при две́рехъ и҆ толку̀: а҆́ще кто̀ оѹ҆слы́шитъ гла́съ мо́й, и҆ ѡⷮве́рзетъ двє́ри се́рдца, вни́ду къ нему̀, и҆ вечеря́ю съ ни́мъ, и҆ то́й со мно́ю, глаго́летъ гдⷭь (А҆пок. глⷡа г҃). Є҆му́же сла́ва и҆ че́сть да бу́детъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.