Ча́сть г҃

Глава̀ девя́тая

Ѡ҆ є҆́же возбужда́ти себѐ всегда̀ ко оѹ҆се́рдствованію и҆ теплотѣ̀ гдⷭней.

Пріидѝ, ѡ человѣ́че! и҆ ви́ждь: пріидѝ, гдⷭа своего̀ просла́ви, пріидѝ, гдⷭа своего̀ воспо́й, пріидѝ, припадѝ пред̾ гдⷭемъ, и҆ воспла́чися пред̾ сотво́ршимъ тя̀ (ѱало́мъ ч҃д): пріидѝ, припадѝ, и҆ и҆сповѣ́ждься пресвято́му є҆гѡ̀ и҆́мени: вкусѝ, и҆ оѹ҆вѣ́ждь ꙗ҆́кѡ бл҃гъ гдⷭь (ѱало́мъ л҃г), по́й и҆́мени є҆гѡ̀, ꙗ҆́кѡ добро̀.

[в҃] Пріидѝ а҆́лчущій и҆ жа́ждущій, насы́тися бжⷭтвенныя пи́щи пріидѝ ѡ҆мраче́нный, наслади́ся присносу́щнагѡ свѣ́та: пріидѝ во оѹ҆́захъ сы́й, наслади́ся свобо́ды: пріидѝ сме́ртный, прилѣпи́ся безсме́ртному, да вѣ́чныя сме́рти и҆збу́деши, и҆ живота̀ вѣ́чнагѡ сподо́бишися.

[г҃] Пріидѝ ско́рбный и҆ печа́льный, наслади́ся прⷭносу́щныя ра́дости: пріидѝ оѹ҆ны́лый и҆ ѡ҆камене́нный, да разже́шися ꙗ҆́кѡ ѻ҆́гнь: пріидѝ ни́щій, да ѡ҆богати́шися вѣ́чнымъ бога́тствомъ: пріидѝ нагі́й, да ѡ҆блече́шися безсме́ртною сла́вою, и҆ ѡ҆дѣ́ешися ꙗ҆́кѡ ри́зою свѣ́томъ благода́ти гдⷭни.

[д҃] Воспрянѝ, воспрянѝ, ѡ человѣ́че! и҆ и҆стрезви́ся, воспрянѝ и҆ припадѝ ко гдⷭу бг҃у сотво́ршему тя̀. возставля́й своя̑ чу̑вства, и҆ возжиза́й свѣти́льникъ се́рдца твоегѡ̀, да не когда̀ въ тебѣ̀ оѹ҆га́снетъ, и҆ ѡ҆ста́витъ тя̀ во тмѣ̀ нечу́вствія.

[є҃] Разве́рзи, разве́рзи, ѡ человѣ́че! ду́шу на прія́тіе гдⷭа сла́вы: се́ бо судія̀ стои́тъ при две́рехъ твоегѡ̀ срⷣца, и҆ толче́тъ, ꙗ҆́кѡ да ѡⷮве́рзеши є҆му̀, и҆ вни́детъ къ тебѣ̀, и҆ ꙗ҆́стъ съ тобо́ю, и҆ пребу́детъ съ душе́ю твое́ю во вѣ́ки вѣкѡ́въ, никогда̀ ѡⷮ тебѐ ѡⷮлуча́яся.

[ѕ҃] Возставля́й оѹ҆́бѡ человѣ́че, возставля́й вся̑ своя̑ чу̑вства, воспрянѝ не лѣня́щися и҆ не оѹ҆ныва́ющи, не пощадѝ пло́ти, не пощадѝ душѝ, да вѣнце́мъ нетлѣ́нія оѹ҆вязе́шися. Возводѝ ѻ҆́чи твоѝ къ бг҃у, и҆ оѹ҆ви́ждь є҆гѡ̀ бла́гость, и҆ всѐ є҆́же ѡ҆ тебѣ̀ та́инство.

[з҃] Не презира́й да́ннагѡ тѝ вре́мене на стяжа́ніе вѣ́чныхъ бла̑гъ: се́ бо гряде́тъ гдⷭь ско́рѡ на ѻ҆́блацѣхъ, со сла́вою и҆ си́лою мно́гою, возда́ти кому́ждо по дѣлѡ́мъ є҆гѡ̀, и҆ оѹ҆́зритъ є҆го̀ вся́ко ѻ҆́ко, и҆ и҆̀же є҆го̀ прободо́ша, и҆ пла́чь сотворя́тъ на ся̀ ѡ҆ не́мъ вся̑ колѣ̑на земна̑я: сѐ пріи́детъ ско́рѡ (А҆пока́л: глⷡа а҃). Блаже́нъ соблюда́яй за́пѡвѣди гдⷭни, блаже́нъ храня́й є҆гѡ̀ за́пѡвѣди: пріи́детъ бо, пріи́детъ и҆ не оѹ҆ме́длитъ.

[и҃] Возводѝ, возводѝ оѹ҆́мныя ѻ҆́чи се́рдца твоегѡ̀ къ бг҃у, ѡ человѣ́че и҆ разжиза́й своѐ се́рдце къ бжⷭтвенной є҆гѡ̀ любвѝ, возбужда́й свою̀ ду́шу къ бж҃е́ственному є҆гѡ̀ жела́нію, вопі́й безпреста́ни къ бг҃у, подо́бяся слѣпцу̀: сн҃е дв҃довъ, сн҃е бж҃ій поми́луй мя̀, оѹ҆ще́дри мя̀, вразуми́ мя, научи́ мя во́ли твоея̀ ст҃ы́я, за́повѣдей твои́хъ, и҆ жи́въ бу́ду.

[ѳ҃] Въ бз҃ѣ всѐ жела́ніе своѐ и҆ похотѣ́ніе да и҆́маши, въ бз҃ѣ всѐ оѹ҆пова́ніе и҆ наде́жду да полага́еши, та́мѡ ве́сь да пасе́шися, та́мѡ ве́сь всегда̀ да пребыва́еши, до негѡ́же конца̀ сотворе́нъ є҆сѝ, та́мѡ да спѣши́шися де́нь и҆ но́щь, ни ма́ла дая̀ себѣ̀ поко́я и҆ ѡ҆почива́нія, до́ндеже получи́ши и҆ско́мое, до́ндеже ѡ҆бря́щеши мѣ́сто гдⷭви, селе́ніе бг҃у і҆а́кѡвлю (ѱало́мъ рл҃а).

[і҃] Да ничто́же тя̀ ѡⷮто́ргнетъ, да ничто́же тѝ препне́тъ, да ничто́же тѝ возбрани́тъ, да ничто́же тя̀ ѡⷮсѣче́тъ ѡⷮ гдⷭни любвѐ и҆ бжⷭтвеннагѡ є҆гѡ̀ жела́нія, ни ско́рбь, ни тѣснота̀, ни гла́дъ, ни гоне́ніе, ни ѻ҆́гнь, ни ме́чь: то́й бо є҆́сть тво́й живо́тъ. То́й твоѐ є҆́сть спасе́ніе, то́й твоя̀ ра́дость и҆ весе́ліе, и҆ присносу́щное наслажде́ніе и҆ вѣ́чный поко́й.