Ча́сть г҃

Глава̀ деся́тая

Ѡ҆ є҆́же всѐ жела́ніе своѐ и҆мѣ́ти къ бг҃у и҆ любо́вію къ нему̀ прилѣпля́тися.

Вопі́й всегда̀ безпреста́ни ко гдⷭу бг҃у твоему̀ всѣ́мъ се́рдцемъ твои́мъ, да съ ни́мъ соедини́шися: всѐ жела́ніе и҆ намѣ́реніе своѐ къ нему̀ и҆мѣ́й, да є҆го̀ при́снѡ и҆́маши съ собо́ю: де́нь и҆ но́щь къ нему̀ воздыха́й, да ве́сь въ любо́вь є҆гѡ̀ оѹ҆глуби́шися.

[в҃] Почто̀ къ бг҃у не вопіе́ши; почто̀ къ нему̀ не жела́еши; почто̀ є҆го̀ всѣ́мъ се́рдцемъ не возлю́биши; почто̀ все́ю душе́ю свое́ю и҆ все́ю крѣ́постію свое́ю не прилѣпи́шися; то́й бо є҆́сть бг҃ъ тво́й, то́й твоя̀ є҆́сть сла́ва, то́й твоѐ є҆́сть спасе́ніе, то́й є҆́сть вѣ́чный тво́й живо́тъ.

[г҃] Припадѝ любо́вію ко гдⷭу бг҃у твоему̀ те́плѣ, прилѣпи́ся къ нему̀ всѣ́мъ се́рдцемъ твои́мъ, возлюбѝ є҆го̀ ѡⷮ всея̀ душѝ твоея̀, и҆ ничто́же предпочита́й па́че є҆гѡ̀ любвѐ: се́ бо тѝ є҆́сть вѣ́чный живо́тъ, да позна́еши гдⷭа бг҃а твоего̀, и҆ возлю́биши є҆го̀ всѣ́мъ срⷣцемъ твои́мъ, и҆ прилѣпи́шися къ нему̀ все́ю душе́ю твое́ю.

[д҃] Горѣ̀ къ бг҃у и҆мѣ́й се́рдце, дѡ́льняя вся̑ ꙗ҆́кѡ неизвѣ̑стная и҆ лѡ́жная презира́я: та́мѡ се́рдце своѐ пригвожде́нно и҆мѣ́й, и҆дѣ́же съ ни́мъ и҆́маши бы́ти во вѣ́ки: та́мѡ лѣпи́ся, ѡⷮню́дуже нача́ло и҆ бытіѐ своѐ и҆́маши.

[є҃] Возведѝ ѻ҆́крестъ ѻ҆́чи твоѝ и҆ ви́ждь, ꙗ҆́кѡ ничто́же въ мі́рѣ є҆́сть и҆звѣ́стно, то́чію є҆́же бы́ти всегда̀ при бз҃ѣ и҆ съ ни́мъ наслажда́тися бжⷭтвенныя є҆гѡ̀ сла́вы, при́снѡ ѡ҆ не́мъ веселя́щися: вся̑ и҆́на су́єтна су́ть, вся̑ поги́бнутъ, то́чію сіѐ є҆ди́но ѡ҆ста́нетъ во вѣ́ки.

[ѕ҃] Не оѹ҆ныва́й человѣ́че, не оѹ҆ныва́й, нижѐ студе́нъ въ бжⷭтвенной гдⷭней любвѝ ꙗ҆вля́йся, но при́снѡ ко ѻ҆́нагѡ любвѝ жего́мь и҆ пали́мь бу́ди, при́снѡ разжиза́й своѐ се́рдце, при́снѡ вопі́й къ нему̀, да не когда̀ во тмѣ̀ нечу́вствія и҆ ѡ҆камене́нія ѡ҆ста́неши.

[з҃] Восходѝ человѣ́че, восходѝ любо́вію ко гдⷭу бг҃у твоему̀, восхождє́нія преспѣ̑ятельна на вся́къ де́нь въ се́рдцѣ твое́мъ полага́й, да при́снѡ къ нему̀ де́нь и҆ но́щь жела́ніемъ и҆ любо́вію восхо́диши, и҆ все́ю душе́ю свое́ю къ нему̀ прилѣпи́шися.

[и҃] Оѹ҆я́звенно се́рдце твоѐ любо́вію къ бг҃у и҆мѣ́й, да при́снѡ сія̑ рачи́тєльная словеса̀ къ нему̀ глаго́леши: оѹ҆я́звенъ є҆́смь любо́вію и҆ добро́тою твое́ю женишѐ мо́й сладча́йшій, въ слѣ́дъ тебѐ теку̀, въ воню̀ мѵ́ра твоегѡ̀, є҆гѡ́же вожделѣ̀ душа̀ моя̀, є҆го́же возлюбѝ моѐ срⷣце (Пѣ́снь пѣ́сней глⷡа д҃).

[ѳ҃] Всѐ жела́ніе и҆ оѹ҆тѣше́ніе своѐ въ бз҃ѣ и҆мѣ́й, да прⷭнѡ съ прⷪро́комъ къ нему̀ глаго́леши: и҆́мже ѻ҆́бразомъ жела́етъ є҆ле́нь на и҆сто́чники водны́я, си́це жела́етъ душа̀ моя̀ къ тебѣ̀ бж҃е (ѱало́мъ м҃а). (и҆) Бж҃е бж҃е мо́й, къ тебѣ̀ оѹ҆́тренюю, возжада̀ тебѐ душа̀ моя̀, ко́ль мно́жицею тебѣ̀ пло́ть моя̀ (ѱало́мъ ѯ҃в).

[і҃] Цѣ́ль твоя̀ и҆ намѣ́реніе гдⷭь є҆ди́нъ да бу́детъ, приста́нище и҆ оѹ҆пова́ніе прест҃а́я є҆гѡ̀ любо́вь: жела́ніемъ и҆ любо́вію къ нему̀ плѣне́нъ бу́ди, ꙗ҆́кѡ да получи́ши и҆ско́маго, и҆ дерзнове́ннѣ рече́ши: пріиди́те и҆ оѹ҆ви́дите, ꙗ҆́кѡ получи́хъ и҆ско́маго, и҆ ѡ҆брѣто́хъ жела́емаго, пресла́дкаго гдⷭа і҆и҃са.