Ча́сть г҃

Глава̀ перваяна́десять

Ѡ҆ є҆́же ко є҆ди́ному бг҃у и҆мѣ́ти любо́вь, и҆ ничто́же предпочита́ти па́че є҆гѡ̀ любвѐ.

Бжⷭтвенною любо́вію срⷣце твоѐ оѹ҆я́звенно всегда̀ и҆мѣ́й, да оѹ҆се́рднѣ де́нь и҆ но́щь въ слѣ́дъ хрⷭто́въ тече́ши. Всѣ́мъ срⷣцемъ твои́мъ, и҆ все́ю душе́ю твое́ю къ нему̀ прилѣпи́ся, ꙗ҆́кѡ да вся̑ тѝ бу́дутъ спѣ̑шна и҆ не па́датєльна, да вся̑ тѝ бу́дутъ благоувѣ̑тна и҆ ра́дѡстна, ꙗ҆́кѡ да и҆звѣ́стенъ спасе́нія твоегѡ̀ бу́деши.

[в҃] Бжⷭтвенною любо́вію жего́мь и҆ пали́мь бу́ди, да при́снѡ сіѐ и҆́маши себѣ̀ во оѹ҆тѣше́ніе. Всѐ раче́ніе и҆ жела́ніе своѐ въ не́мъ и҆мѣ́й, да ве́сь въ любо́вь є҆гѡ̀ оѹ҆глуби́шися, и҆ пребу́деши съ ни́мъ во є҆ди́но, никогда́же ѡⷮлуча́яся.

[г҃] Да ничто́же тя̀ ѡⷮто́ргнетъ ѡⷮ бжⷭтвенныя гдⷭни любвѐ, да ничто́же тѝ возбрани́тъ, да ничто́же тѝ пресѣче́тъ, ни ѻ҆́гнь, ни ме́чь, ни гла́дъ, ни гоне́ніе, ни глубина̀, ни высота̀, ни настоя̑щая, ни бу̑дущая, но то́чію сія̀ є҆ди́на да пребыва́етъ въ душѝ твое́й вы́ну.

[д҃] Тщи́ся, трезви́ся, и҆ оѹ҆се́рдіе ко оѹ҆се́рдію на вся́къ де́нь прилага́й, да при́снѡ къ нему̀ жела́ніемъ и҆ любо́вію восхо́диши, и҆ всегда̀ къ нему̀ разжиза́еши своѐ се́рдце, да ве́сь бу́деши въ бз҃ѣ, и҆ бг҃ъ въ тебѣ̀, ꙗ҆́кѡ да поко́й вѣ́чный и҆ ти́хое приста́нище душѝ свое́й ѡ҆бря́щеши, и҆ вѣ́чныхъ бла̑гъ сподо́бишися.

[є҃] Всѣ́мъ се́рдцемъ твои́мъ и҆ все́ю душе́ю твое́ю, де́нь и҆ но́щь гдⷭа взыску́й, да ѡ҆брѣ́тши є҆го̀, вѣ́чное сокро́вище и҆ бога́тство ѡ҆бря́щеши, и҆ всѣ́хъ бла̑гъ и҆спо́лнишися: взыска́ющіи бо є҆го̀ не лиша́тся вся́кагѡ бла́га, и҆ получа́тъ ве́лію благода́ть и҆ ми́лость.

[ѕ҃] Всѐ оѹ҆пова́ніе своѐ, всѐ сокро́вище, всѐ бога́тство своѐ въ бз҃ѣ и҆мѣ́й, всю̀ сла́ву и҆ наслажде́ніе своѐ въ не́мъ полага́й: си́мъ є҆ди́нымъ не прельсти́шися, нижѐ вотщѐ тече́ши, но сіѐ є҆ди́но съ тобо́ю пребу́детъ во гряду́щей вѣ́чной жи́зни, и҆ пріи́меши благу́ю ча́сть, ꙗ҆́же не ѡⷮи́мется ѡⷮ тебѐ во вѣ́ки.

[з҃] Де́нь и҆ но́щь къ бг҃у всегда̀ безпреста́ни вопі́й, де́нь и҆ но́щь къ бг҃у оѹ҆́тренюй, де́нь и҆ но́щь бг҃а взыску́й, ꙗ҆́кѡ да ѡ҆бря́щеши є҆го̀, ꙗ҆́кѡ да и҆ско́маго на́йдеши: и҆ща́й бо, вся́кѡ ѡ҆бря́щетъ, и҆ прося́й, вся́кѡ пріи́метъ, и҆ толку́щему ѡⷮве́рзется, гл҃етъ гдⷭь (Матѳ. заⷱ в҃). Па́мятствуй, ꙗ҆́кѡ всѝ ст҃і́и вели́кую ре́вность, и҆ любо́вь неутоли́му къ бг҃у и҆мѣ́ша, ꙗ҆́кѡ забыва́тися и҆̀мъ, а҆́ще въ тѣ́лѣ су́ть, ѡⷮ ѕѣ́льныя къ бг҃у любвѐ: ты́ же ни ма́лѡ и҆́маши, что̀ рече́ши въ де́нь суда̀;

[и҃] Почто̀ не оѹ҆слади́ттися прест҃о́е и҆́мя гдⷭа і҆и҃са: почто̀ не распаде́ттися и҆ не разжже́тся ѡ҆камене́нное се́рдце; почто̀ предпочита́еши суету̀ мра́чную преле́стную, па́че бо́дростнагѡ пресла́дкагѡ къ бг҃у вопіе́нія; почто̀ предпочита́еши ѻ҆кая́нную разсла́бленную лѣ́ность, па́че оѹ҆се́рднагѡ и҆ те́плагѡ къ бг҃у взыва́нія; Вопі́й оѹ҆́бѡ, вопі́й, не лѣни́ся, восклица́й, восклица́й къ нему̀ не не чу́вствуя, не да́ждь сна̀ твои́ма ѻ҆чи́ма, и҆ вѣ́ждома дрема́нія, до́ндеже ѡ҆бря́щеши и҆ско́маго, и҆ получи́ши жела́емаго, и҆ соедини́шися присносу́щному.

[ѳ҃] Возлюбѝ гдⷭа твоего̀ ѡⷮ всегѡ̀ се́рдца твоегѡ̀, ѡⷮ всея̀ крѣ́пости твоея̀, ѡⷮ всея̀ душѝ твоея̀, ꙗ҆́кѡ да на вся̑ бг҃оугѡ́дная дѣла̀ оѹ҆до́бенъ и҆ жела́теленъ бу́деши. Дне́сь бо тогѡ̀ ра́ди въ бг҃оуго́дномъ дѣ́лѣ ѡ҆тяза́ешися и҆ оѹ҆ныва́еши, ꙗ҆́кѡ и҆́стиннѡ гдⷭа твоего̀ не лю́биши: а҆́ще бо бы̀ и҆́стиннѡ бг҃а возлюби́лъ є҆сѝ, не бы̀ на славосло́віе прест҃а́гѡ є҆гѡ̀ и҆́мене лѣни́лся є҆сѝ, не бы̀ въ бг҃оуго́дномъ дѣ́лѣ оѹ҆ныва́лъ є҆сѝ. а҆́ще бы́сте, речѐ, люби́ли мя̀, возра́довалися бы́сте оѹ҆́бѡ ѡ҆ мнѣ̀ (І҆ѡа́н. заⷱ м҃ѳ). и҆ а҆́ще є҆го̀ всѣ́мъ срⷣцемъ возлю́биши, лѣни́тися не бу́деши: а҆́ще все́ю душе́ю твое́ю къ нему̀ прилѣпи́шися, вся̑ тѝ ра́дѡстна, люби̑ма и҆ жела̑тельна бу́дутъ: лю́бящему бо бг҃а, вся̑ є҆гѡ̀ ра́ди люби̑ма и҆ жела̑тельна су́ть.

[і҃] Вся́ка сла́ва и҆ бога́тство сегѡ̀ мі́ра суета̀ є҆́сть: вся́ко наслажде́ніе и҆ по́хоть плотска́я пре́лесть є҆́сть: вся́ка любо́вь внѣ́шняя земна́я ло́жь є҆́сть и҆ лицемѣ́ріе: сіѐ то́чію є҆ди́но не преле́стно, є҆́же є҆ди́наго бг҃а возлюби́ти всѣ́мъ се́рдцемъ свои́мъ, все́ю душе́ю свое́ю и҆ все́ю крѣ́постію свое́ю: къ нему̀ прилѣпи́тися, и҆ ничто́же предпочита́ти па́че є҆гѡ̀ любвѐ: сіе́ ти є҆́сть и҆ живо́тъ вѣ́чный, сіе́ же и҆ неконча́емая ра́дость, и҆ присносу́щное наслажде́ніе. Ѻ҆́нъ тѝ са́мъ є҆ди́нъ оѹ҆тѣше́ніе и҆ наслажде́ніе твоѐ вѣ́чнѣ да бу́детъ: ра́дость же и҆ весе́ліе прест҃а́я є҆гѡ̀ любо́вь: сегѡ́ бо ничто́же лу́чшее и҆ честнѣ́йшее ни на землѝ, нижѐ на нб҃сѝ ѡ҆бря́щеши. сіѐ и҆мѣ́й па́че сокро́вищъ честнѣ́йше, и҆ па́че многоцѣ́нныхъ маргари̑тъ и҆ а҆дама́нтѡвъ дража́йше. сіѐ тебѣ̀ є҆ди́но да бу́детъ въ вѣ́чное оѹ҆тѣше́ніе, и҆ ра́дость, и҆ весе́ліе, сла́ву же и҆ наслажде́ніе, ꙗ҆́кѡ тому̀ подоба́етъ вся́кая сла́ва, че́сть и҆ держа́ва, со безнача́льнымъ є҆гѡ̀ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворя́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

До здѣ̀ три́десятимъ и҆ тре́мъ глава́мъ сконча́ніе.

Во є҆ли̑ка лѣ̑та по пло́ти бы́сть гдⷭь, въ толи́кая чи́сла и҆ пред̾иду́щыя главы̑ соста́влены су́ть, да прочита́яй кто̀ потщи́тся, ѡ҆ста́вь младе́нчєская мудрова̑нія, пріитѝ и҆ дости́гнути въ му́жа соверше́нна, въ мѣ́ру во́зраста и҆сполне́нія хрⷭто́ва. сія̑ же послѣ̑дующія пятичу́вствєнныя главы̑, ѻ҆со́бь внѣ̀ числа̀ въ концѣ̀ положены̀, тогѡ̀ ра́ди, да на вся́къ де́нь прочита́яй кто̀, пяточи́слєнная сугу̑бая чу̑вства къ бг҃у всегда̀ возво́дитъ, и҆ вся̑ ви̑димая и҆ разумѣва́ємая превозше́дъ, вы́спрь оѹ҆мо́мъ воскрили́вся, во вну́треннюю же глубину̀ ра́зума и҆ позна́нія та́инственнагѡ погруже́нъ бы́въ, ктому̀ неизрече́ннѣ и҆ недовѣ́домѣ неви́димому въ та́йнѣмъ соедине́ніи, соедине́нъ сы́й, безпреста́ни, се́рдцемъ и҆ оѹ҆мо́мъ, всегда̀ сія̑ стіхослѡ́вія те́плѣ возопіе́тъ, глаго́ля: возлюблю̀ тя̀, гдⷭи, крѣ́посте моя̀, гдⷭь оѹ҆твержде́ніе моѐ: и҆ прѡ́чая.