Стіхослѡ́вія пє́рвая,
любе́знагѡ къ бг҃у взыва́нія.
Возлюблю́ тя, гдⷭи, крѣ́посте моя̀: гдⷭь оѹ҆твержде́ніе моѐ, и҆ прибѣ́жище моѐ, и҆ и҆зба́витель мо́й, бг҃ъ мо́й, помо́щникъ мо́й, и҆ оѹ҆пова́ю на него̀: защи́титель мо́й, и҆ ро́гъ спасе́нія моегѡ̀, и҆ засту́пникъ мо́й. Хваля̀ призову̀ гдⷭа, и҆ ѡⷮ вра̑гъ мои́хъ спасу́ся (ѱало́мъ з҃і).
[в҃] Ко́ль возлю́блєнна селє́нія твоя̀, гдⷭи си́лъ; Жела́етъ и҆ скончава́ется душа̀ моя̀ во дворы̀ гдⷭни: срⷣце моѐ и҆ пло́ть моя̀ возра́довася ѡ҆ бз҃ѣ жи́вѣ (ѱало́мъ п҃г). Бл҃же́ни живу́щіи въ дому̀ твое́мъ: въ вѣ́ки вѣкѡ́въ восхва́лятъ тя̀. Лу́чше де́нь є҆ди́нъ во дво́рѣхъ твои́хъ, гдⷭи, па́че ты́сящъ: и҆зво́лихъ примета́тися въ дому̀ бг҃а моегѡ̀ па́че, не́же жи́ти мѝ въ селе́ніихъ грѣ́шничихъ (ѱало́мъ п҃г).
[г҃] Ко́ль возлюби́хъ зако́нъ тво́й, гдⷭи; ве́сь де́нь поуче́ніе моѐ є҆́сть. Ко́ль сладка̀ горта́ни моему̀ словеса̀ твоя̀, па́че ме́да оѹ҆стѡ́мъ мои́мъ; сегѡ̀ ра́ди возненави́дѣхъ вся́къ пу́ть непра́вды. Свѣти́льникъ нога́ма мои́ма зако́нъ тво́й, и҆ свѣ́тъ стезя́мъ мои́мъ. Ѡ҆правда̑нія твоя̀ вожделѣ́нна су́ть, гдⷭи, па́че зла́та и҆ ка́мене че́стна мно́га, и҆ сла́ждша па́че ме́да и҆ со́та (ѱало́мъ ри҃і).
[д҃] Ко́ль бла́гъ бг҃ъ І҆и҃левъ, пра̑вымъ се́рдцемъ (ѱало́мъ ѻ҃в); Ко́ль мно́гое мно́жество бла́гости твоея̀ гдⷭи, ю҆́же скры́лъ є҆сѝ боя́щымся тебѐ; содѣ́лалъ є҆сѝ оѹ҆пова́ющымъ на тя̀ пред̾ сы́ны чл҃вѣ́ческими; Скры́еши и҆̀хъ въ та́йнѣ лица̀ твоегѡ̀ ѡⷮ мяте́жа человѣ́ческа (ѱало́мъ л҃). Ѻ҆ба́че бг҃ови повини́ся, душѐ моя̀, ꙗ҆́кѡ ѡⷮ тогѡ̀ терпѣ́ніе моѐ: и҆́бо то́й бг҃ъ мо́й и҆ сп҃съ мо́й, засту́пникъ мо́й: не подви́жуся во вѣ́къ (ѱало́мъ ѯ҃а).
[є҃] Ѡ҆ бз҃ѣ спасе́ніе моѐ, и҆ сла́ва моя̀. Бг҃ъ по́мощи моея̀, и҆ оѹ҆пова́ніе моѐ на бг҃а. Оѹ҆пова́йте на него̀ ве́сь со́нмъ люде́й: и҆злія́йте пред̾ ни́мъ сердца̀ ва̑ша: ꙗ҆́кѡ бг҃ъ помо́щникъ на́шъ є҆́сть. Не оѹ҆пова́йте на непра́вду, и҆ на восхище́ніе не жела́йте: бога́тство а҆́ще тече́тъ, не прилага́йте се́рдца. Є҆ди́ною гл҃а бг҃ъ, дво́я сія̑ слы́шахъ, занѐ держа́ва бж҃ія, и҆ твоя̀, гдⷭи, млⷭть: ꙗ҆́кѡ ты̀ возда́си кому́ждо по дѣлѡ́мъ є҆гѡ̀ (ѱало́мъ ѯ҃а).
[ѕ҃] Бж҃е, бж҃е мо́й, къ тебѣ̀ оѹ҆́тренюю: возжада̀ тебѐ душа̀ моя̀, ко́ль мно́жицею тебѣ̀ пло́ть моя̀, въ землѝ пу́стѣ и҆ непрохо́днѣ и҆ безво́днѣ: та́кѡ во ст҃ѣ́мъ ꙗ҆ви́хся тебѣ̀, ви́дѣти си́лу твою̀ и҆ сла́ву твою̀. Ꙗ҆́кѡ лу́чши ми́лость твоя̀ па́че живѡ́тъ: оѹ҆стнѣ̀ моѝ похвали́тѣ тя̀, та́кѡ благословлю́ тя въ животѣ̀ мое́мъ: ѡ҆ и҆́мени твое́мъ воздѣжу̀ ру́цѣ моѝ. Прильпѐ душа̀ моя̀ по тебѣ̀, мене́ же прія́тъ десни́ца твоя̀ (ѱало́мъ ѯ҃в).
[з҃] И҆́мже ѻ҆́бразомъ жела́етъ є҆ле́нь на и҆сто́чники водны́я, си́це жела́етъ душа̀ моя̀ къ тебѣ̀, бж҃е. Возжада̀ душа̀ моя̀ къ бг҃у крѣ́пкому живо́му: когда̀ пріиду̀ и҆ ꙗ҆влю́ся лицу̀ бж҃ію; мл҃тва бг҃у живота̀ моегѡ̀. Реку̀ бг҃у: засту́пникъ мо́й є҆сѝ, почто́ мя забы́лъ є҆сѝ; и҆ вску́ю сѣ́туя хожду̀, внегда̀ ѡ҆скорбля́етъ вра́гъ (ѱало́мъ м҃а);
[и҃] Гдⷭь просвѣще́ніе моѐ и҆ сп҃си́тель мо́й, когѡ̀ оѹ҆бою́ся; гдⷭь защи́титель живота̀ моегѡ̀, ѡⷮ когѡ̀ оѹ҆страшу́ся; Є҆ди́но проси́хъ ѡⷮ гдⷭа, то̀ взыщу̀: є҆́же жи́ти мѝ въ дому̀ гдⷭни вся̑ дни̑ живота̀ моегѡ̀, зрѣ́ти мѝ красоту̀ гдⷭню, и҆ посѣща́ти хра́мъ ст҃ы́й є҆гѡ̀. Взыска̀ тебѐ лицѐ моѐ, лица̀ твоегѡ̀ гдⷭи взыщу̀ (ѱало́мъ к҃ѕ).
[ѳ҃] Гото́во срⷣце моѐ, бж҃е, гото́во срⷣце моѐ: воспою̀ и҆ пою̀ во сла́вѣ мое́й. Воста́ни сла́ва моя̀, воста́ни ѱалти́рю и҆ гу́сли, воста́ну ра́нѡ. И҆сповѣ́мся тебѣ̀ въ лю́дехъ гдⷭи, пою̀ тебѣ̀ во ꙗ҆зы́цѣхъ. Ꙗ҆́кѡ ве́лія верху̀ нб҃съ ми́лость твоя̀, и҆ до ѻ҆́блакъ и҆́стина твоя̀. Вознеси́ся на нб҃са̀, бж҃е, и҆ по все́й землѝ сла́ва твоя̀ (ѱало́мъ р҃з).
[і҃] Ты̀ є҆сѝ бж҃е, держа́ва моя̀, разжзѝ оѹ҆трѡ́бы моя̑ и҆ се́рдце моѐ. Ꙗ҆́кѡ ми́лость твоя̀ пред̾ ѻ҆чи́ма мои́ма є҆́сть (ѱало́мъ к҃є). Послѝ свѣ́тъ тво́й и҆ и҆́стину твою̀, та́ мя наста́виста, и҆ введо́ста мя̀ въ го́ру ст҃у́ю твою̀, и҆ въ селє́нія твоя̑. И҆ вни́ду къ же́ртвеннику бж҃ію, къ бг҃у веселя́щему ю҆́ность мою̀: и҆сповѣ́мся тебѣ̀ въ гу́слехъ бж҃е, бж҃е мо́й. Вску́ю приско́рбна є҆сѝ душѐ моя̀; и҆ вску́ю смуща́еши мя̀; оѹ҆пова́й на бг҃а, ꙗ҆́кѡ и҆сповѣ́мся є҆му̀, спасе́ніе лица̀ моегѡ̀, и҆ бг҃ъ мо́й (ѱало́мъ м҃в).