Стіхослѡ́вія втора̑я,

любе́знагѡ къ бг҃у бесѣ́дованія.

Оѹ҆се́рднѣ ко хрⷭту̀ возопі́й глаго́ля:

[а҃] Оѹ҆я́звенно и҆ оѹ҆ра́ненно срⷣце моѐ твое́ю бжⷭтвенною любо́вію всегда̀ да бу́детъ гдⷭи: да съ прⷪро́комъ при́снѡ сія̑ рачи́тєльная словеса̀ глаго́лю: оѹ҆я́звенъ є҆́смь добро́тою твое́ю, женишѐ мо́й сладча́йшій, въ слѣ́дъ тебѐ теку̀, въ воню̀ мѵ́ра твоегѡ̀, є҆гѡ́же вожделѣ̀ душа̀ моя̀ (Пѣ́снь пѣ́сней глⷡа а҃). Гдѣ̀ пасе́ши; и҆ гдѣ̀ почива́еши въ полу́дни; гдѣ̀ возсіява́еши свѣ́тъ; гдѣ̀ просвѣща́еши тму̀; гдѣ̀ оѹ҆тѣша́еши люби̑мыя; гдѣ̀ рачи́тєли твоя̑ оѹ҆покоя́еши, и҆ и҆сполня́еши и҆́хъ бж҃е́ственное жела́ніе;

Па́ки къ бг҃у любе́знѣ глаго́ли:

[в҃] Ѡ превожделѣ́ннѣйшій гдⷭи господе́й! Ѡ пресладча́йшій въ сла́достехъ преми́рныхъ! Ѡ прелюбезнѣ́йшій въ любе́зныхъ, вся́къ оѹ҆́мъ, вся́ку мы́сль превосходя́щій! Ѡ любы̀, кто́жъ тя̀ досто́йнѣ возлю́битъ; кто̀ досто́йнѣ къ тебѣ̀ всѣ́мъ се́рдцемъ прилѣпи́тся; кто́ тя досто́йнѣ до срⷣца своегѡ̀ пріи́метъ; Ѡ бжⷭтвеннагѡ твоегѡ̀ жела́нія! Ѡ бжⷭтвенныя сла́вы присносу́щнагѡ твоегѡ̀ ѡ҆сѣя́нія!

Па́ки къ бг҃у те́плѣ вопі́й:

[г҃] Что́ ми є҆́сть на нб҃сѝ; и҆ что̀ вя́щше ѡⷮ тебѐ восхотѣ́хъ на землѝ (ѱало́мъ ѻ҃в), ѡ бж҃е мо́й! то́чію є҆́же жи́ти мѝ въ бжⷭтвенномъ твое́мъ жела́ніи; Сіѐ то́чію є҆ди́но да бу́детъ мѝ сокро́вище и҆ вѣ́чное бога́тство: сіѐ то́чію є҆ди́но да бу́детъ мѝ пи́ща и҆ питіѐ, и҆ присносу́щное наслажде́ніе: сіѐ то́чію є҆ди́но да бу́детъ мѝ сла́ва и҆ похвала̀, велелѣ́піе же, и҆ ѡ҆дѣя́ніе свѣ́тло: да совле́кшися пло́ти, не на́гъ въ де́нь стра́шнагѡ твоегѡ̀ суда̀ ѡ҆бря́щуся: но съ тобо́ю, гдⷭемъ мои́мъ бг҃омъ во вѣ́ки вѣ́чныя пребу́ду, никогда́же ѡⷮлуча́яся.

Па́ки оѹ҆се́рднѣ къ бг҃у взыва́й:

[д҃] Всѐ жела́ніе моѐ, и҆ воздыха́ніе моѐ въ тебѣ̀ да бу́детъ, гдⷭи: всѐ жела́ніе моѐ, и҆ раче́ніе моѐ въ тебѣ̀ є҆ди́номъ да бу́детъ, спаси́телю мо́й: всѐ и҆зволе́ніе моѐ, и҆ помышле́ніе моѐ въ тебѣ̀ да оѹ҆глуби́тся, и҆ вся̑ кѡ́сти моя̑ да реку́тъ: гдⷭи, гдⷭи, кто̀ подо́бенъ тебѣ̀; кто̀ соравни́тся си́лѣ, бл҃года́ти и҆ прему́дрости твое́й; вся̑ бо прему́дрѣ, и҆ пра́веднѣ, и҆ бл҃гоутро́бнѣ ѡ҆ на́съ оѹ҆стро́илъ є҆сѝ.

Па́ки прилѣ́жнѡ гдⷭа молѝ:

[є҃] Разжзѝ оѹ҆трѡ́бы моя̑ и҆ се́рдце моѐ, ꙗ҆́кѡ млⷭть твоя̀ пред̾ ѻ҆чи́ма мои́ма є҆́сть (ѱало́мъ к҃є). Разжзѝ оѹ҆трѡ́бы моя̑ и҆ се́рдце моѐ, бж҃е живота̀ моегѡ̀: разжзѝ и҆ оѹ҆мягчѝ ду́шу мою̀, ꙗ҆́кѡ да вся̑ и҆ста́етъ, и҆ и҆зліе́тся пред̾ тобо́ю гдⷭи, да ве́сь бу́ду въ тебѣ̀, ты́ же во мнѣ̀, бл҃года́телю мо́й. Да си́це съ тобо́ю бг҃омъ мои́мъ соедине́нъ бы́въ, никогда́же ѡⷮ тебѐ и҆ бж҃е́ственныя твоея̀ любвѐ оѹ҆страня́юся.

[ѕ҃] Гдѣ́ бо мое́й душѝ и҆́мать бы́ти непремѣ́нное ѡ҆почива́ніе; гдѣ̀ оѹ҆му̀ приста́нище; гдѣ̀ се́рдцу непрело́жная тишина̀ и҆ поко́й, а҆́ще не въ тебѣ̀, гдⷭи, а҆́ще не ты̀ са́мъ ду́шу мою̀ оѹ҆поко́иши, и҆ присносу́щное оѹ҆тѣше́ніе да́руеши; Вся́ка бо мі́ра сегѡ̀ ра́дость, пла́чь є҆́сть: вся́ко оѹ҆тѣше́ніе є҆гѡ̀, ско́рбь и҆ печа́ль: вся́ко наслажде́ніе земно́е, го́ресть и҆ тя́жесть душѝ: вся́ка любо́вь плотска́я, ло́жь є҆́сть и҆ лицемѣ́ріе: нѣ́сть сво́йственна и҆ и҆звѣ́стна душѝ мое́й ниеди́на мі́ра сегѡ̀ сла́дость: но ты̀ є҆ди́нъ да бу́деши мѝ ра́дость и҆ весе́ліе, и҆ вѣ́чное присносу́щное наслажде́ніе.

Па́ки къ бг҃у мольбу̀ сотворѝ:

[з҃] Да не любодѣ́йствую въ се́рдцѣ мое́мъ ѡⷮ тебѐ гдⷭа моегѡ̀ съ тва́рію, но да всѣ́мъ се́рдцемъ мои́мъ прилѣпля́юся тебѣ̀, всю̀ тва́рь сотво́ршему. Да ничто́же предпочита́ю па́че тебѐ: да ничто́же возлюблю̀ кромѣ̀ тебѐ гдⷭа моегѡ̀, и҆сто́чника жи́зни: да не возлюблю̀ сла́вы мі́ра сегѡ̀, и҆ бога́тства и҆счезнове́ннагѡ, ни красоты̀ тлѣ́нныя, ни наслажде́нія плотска́гѡ вре́меннагѡ: но ты̀ є҆ди́нъ да бу́деши моя̀ сла́ва и҆ похвала̀, бога́тство и҆ сокро́вище, пи́ща и҆ питіѐ, и҆ присносу́щное оѹ҆тѣше́ніе.

Па́ки те́плѣ ко гдⷭу рцы̀:

[и҃] Ка́кѡ тебѐ не и҆́мамъ люби́ти гдⷭа моего̀, и҆́же мя̀ всего̀ созда́лъ є҆сѝ, ѡ бж҃е мо́й; ка́кѡ не и҆́мамъ къ тебѣ̀ прилѣпля́тися, и҆́же мя̀ всего̀ сотвори́лъ є҆сѝ; ка́кѡ не и҆́мамъ къ тебѣ̀ присоедини́тися, и҆́же мя̀ всего̀ содержи́ши, живи́ши, пита́еши, насыща́еши, пече́шися и҆ промышля́еши, вся̑ бл҃га̑я и҆ спасє́нная ѡ҆ мнѣ̀ дѣ́еши, и҆ ма́ніемъ свои́мъ, ꙗ҆́коже вѣ́си, оѹ҆строя́еши мнѣ̀ вся̑ къ поле́зному; ка́кѡ не распаде́тмися ѻ҆кая́нное се́рдце; ка́кѡ не разжже́тмися мра́чная душа̀; ка́кѡ вся̀ вну́трєнняя моя̀ не распаля́тся къ бжⷭтвенному твоему̀ жела́нію и҆ любвѝ;

Па́ки къ бг҃у немо́лчнѡ восклица́й:

[ѳ҃] Ка́кѡ же оѹ҆́бѡ трава̀ сы́й присоедине́нъ бу́ду бжⷭтвенному тѝ ѻ҆гню̀, ѡ бж҃е мо́й; Ка́кѡ тлѣ́ніе вре́менное соединю́ся тебѣ̀ всегда̀ присносу́щному; Ка́кѡ, мра́ченъ сы́й, прилѣплю́ся невече́рнему свѣ́ту; Ка́кѡ сме́ртенъ, присоедине́нъ бу́ду безсме́ртному; Присоедини́ мя ты̀ са́мъ, гдⷭи, ꙗ҆́коже вѣ́си, бл҃года́телю мо́й: просвѣтѝ, научи́ мя во́ли твоея̀ ст҃ы́я: распалѝ, разжзѝ ду́шу мою̀ бж҃е́ственною твое́ю любо́вію, да ничто́же и҆́но возлюблю̀, то́кмѡ тебѐ є҆ди́наго и҆сто́чника жи́зни и҆ безсме́ртія.

Па́ки къ бг҃у прилѣ́жнѡ мольбу̀ сотворѝ:

[і҃] Возсія́й мѝ свѣ́тъ твоегѡ̀ ра́зума, ѡ бж҃е мо́й! Просвѣтѝ мра́чную мѝ ду́шу, распалѝ и҆ разжзѝ се́рдце моѐ, и҆ оѹ҆трѡ́бы моя̑, ꙗ҆́кѡ ѻ҆́гнь, къ бж҃е́ственной твое́й любвѝ, ѡ созда́телю мо́й! да вы́ну сла́влю, велича́ю и҆ воспѣва́ю твоѐ прест҃о́е и҆́мя, и҆ неизрече́нное человѣколю́біе: ꙗ҆́кѡ ты̀ на́съ при́снѡ ми́луеши, оѹ҆щедря́еши, и҆ защища́еши оѹ҆пова́ющихъ и҆ надѣ́ющихся на тя̀. Ꙗ҆́кѡ тебѣ̀ подоба́етъ вся́кая сла́ва, че́сть и҆ поклоне́ніе со безнача́льнымъ тѝ ѻ҆ц҃е́мъ, и҆ прест҃ы́мъ, и҆ благи́мъ, и҆ животворя́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.