Стіхослѡ́вія трє́тія,

рачи́тельнагѡ къ бг҃у вопіе́нія.

Оѹ҆се́рднѣ ко хрⷭту̀ вопі́й, глаго́ля:

а҃ Почто̀ тебѐ гдⷭа моего̀ всѣ́мъ се́рдцемъ мои́мъ не люблю̀; Почто̀ всѐ жела́ніе моѐ, и҆ хотѣ́ніе моѐ тебѣ̀ не ѡⷮда́мъ; Почто̀ все́ю душе́ю мое́ю и҆ всѣ́мъ помышле́ніемъ мои́мъ во твою̀ прест҃у́ю любо́вь не оѹ҆глубле́нъ є҆́смь; Ты́ бо мя̀ всего̀ сотвори́лъ є҆сѝ, и҆ вся̑ ту́не мѝ дарова́лъ є҆сѝ: ве́сь є҆́смь ѡⷮ тебѐ, ве́сь є҆́смь тво́й, ве́сь да бу́ду въ тебѣ̀. Почто̀ ѡ҆тяза́юся, и҆ съ ѕѣ́льнымъ оѹ҆се́рдіемъ къ тебѣ̀ не припаду̀; ты́ бо ѡⷮ небытія̀ въ бытіѐ приве́лъ мя̀ є҆сѝ, и҆ непреста́ннѡ пече́шися ѡ҆ душѝ мое́й, ѡ бж҃е мо́й. Ты́ мя пита́еши, живи́ши мя̀, защища́еши, сохраня́еши, покрыва́еши ду́шу мою̀, да́руеши мѝ крѣ́пость, здра́віе, ѡ҆кормля́еши, вразумля́еши, просвѣща́еши, посо́бствуеши, руково́дствуеши, и҆ наставля́еши мя̀ на вся̑кая дѣла̀ блага̑я, вся̑ блага̑я и҆ спасє́нная ѡ҆ мнѣ̀ дѣ́еши, ѡ бж҃е мо́й!

Па́ки къ бг҃у те́плѣ вопі́й:

[в҃] Ка́кѡ оѹ҆́бѡ тебѐ а҆́зъ люби́ти не и҆́мамъ, гдⷭи мо́й; ка́кѡ къ тебѣ̀ не и҆́мамъ прилѣпля́тися; ты́ бо мѝ є҆сѝ бг҃ъ є҆ди́нъ, и҆сто́чникъ жи́зни, и҆ пода́тель всѣ́хъ бла̑гъ, творе́цъ мо́й и҆ гдⷭь. Всѝ оѹ҆даля́ющіися ѡⷮ тебѐ поги́бнутъ, всѝ невзыска́ющіи тебѐ не спасу́тся: потреби́лъ бо є҆сѝ вся́каго любодѣ́ющаго ѡⷮ тебѐ: всѝ бога́тіи въ плотски́хъ сласте́хъ, и҆́стиннѡ невзыска́ющіи тебѐ, ѡ҆бнища́ша и҆ взалка́ша: взыска́ющіи же тебѐ, не лиша́тся вся́кагѡ бла́га. Тѣ́мже де́нь и҆ но́щь къ тебѣ̀ да оѹ҆́треннюю, де́нь и҆ но́щь да тебѐ жа́жду, ѡ бж҃е мо́й! и҆ всѣ́мъ се́рдцемъ люблю́ тя: є҆ди́но проси́хъ ѡⷮ тебѐ гдⷭа моегѡ̀, то̀ да взыщу̀, є҆́же жи́ти мѝ въ дому̀ твое́мъ вся̑ дни̑ живота̀ моегѡ̀, є҆́же зрѣ́ти мѝ красоты̑ твоя̑, и҆ посѣща́ти цр҃ковь ст҃у́ю твою̀. Тебѣ̀ речѐ срⷣце моѐ: гдⷭа взыщу̀: взыска̀ тебѐ лицѐ моѐ, лица̀ твоегѡ̀ гдⷭи взыщу̀.

Па́ки ко хрⷭту̀ оѹ҆се́рднѣ взыва́й:

[г҃] Ка́кѡ тебѐ не и҆́мамъ люби́ти гдⷭа моего̀; Ты́ бо мо́й є҆сѝ живо́тъ, ты̀ є҆сѝ моѐ спасе́ніе, ты̀ є҆сѝ моя̀ сла́ва и҆ похвала̀, ты̀ є҆сѝ моѐ бога́тство и҆ вѣ́чное сокро́вище, ты̀ є҆сѝ моя̀ наде́жда и҆ оѹ҆пова́ніе, ты̀ є҆сѝ моѐ ра́дованіе и҆ вѣ́чный поко́й. Лу́чше ли мѝ люби́ти ве́щь су́етную, ве́щь неизвѣ́стну, ве́щь превра́тну, ве́щь поги́бельну, ло́жну, не́же тебѐ и҆́стиннаго живота̀ моего̀; Сегѡ̀ ра́ди всю̀ наде́жду мою̀, всѐ оѹ҆пова́ніе моѐ, всѐ жела́ніе моѐ въ тебѣ̀ є҆ди́номъ да полага́ю, гдⷭи: всѐ се́рдце моѐ, всю̀ ду́шу мою̀, вся̑ помышлє́нія моя̑ въ тебѣ̀ є҆ди́номъ да оѹ҆глублє́нна и҆́мамъ: вся̑ вну́трєнняя моя̑ чле́нове и҆ мо́зги тебѣ̀ є҆ди́ному да и҆злію̀, да ве́сь бу́ду въ тебѣ̀, ты́ же во мнѣ̀: да оѹ҆вѣ́мъ и҆ позна́ю тебѐ вои́стинну є҆ди́наго и҆́стиннаго бг҃а и҆ гдⷭа, и҆ є҆го́же посла́лъ є҆сѝ і҆и҃са хрⷭта̀, и҆ во свѣ́тѣ твое́мъ оѹ҆зрю̀ свѣ́тъ благода́ти твоегѡ̀ прест҃а́гѡ дх҃а.

Па́ки ко гдⷭу немо́лчнѡ восклица́й:

[д҃] Ка́мѡ пойду̀ ѡⷮ тебѐ гдⷭа моегѡ̀; и҆ ѡⷮ лица̀ твоегѡ̀ ка́мѡ бѣжу̀; А҆́ще взы́ду на нб҃о, ты̀ та́мѡ є҆сѝ: а҆́ще сни́ду во а҆́дъ, та́мѡ є҆сѝ: а҆́ще возму̀ крилѣ̀ моѝ ра́нѡ, и҆ вселю́ся въ послѣ́днихъ мо́ря, и҆ та́мѡ бо рука̀ твоя̀ наста́витъ мя̀, и҆ оѹ҆держи́тъ мя̀ десни́ца твоя̀ (ѱало́мъ рл҃и). Ка́мѡ пойду̀, и҆ гдѣ̀ ѡ҆бря́щу и҆́намѡ вѣ́чный живо́тъ, а҆́ще не въ тебѣ̀ созда́тели мое́мъ; Ка́мѡ ѡ҆бря́щу и҆́намѡ оѹ҆тѣше́ніе и҆ ра́дость, приста́нище и҆ поко́й душѝ мое́й, а҆́ще не въ тебѣ̀, гдⷭи бж҃е мо́й; ка́мѡ ѡⷮ тебѐ пойду̀; ты́ бо глаго́лы живота̀ вѣ́чнагѡ и҆́маши въ себѣ̀. Ты̀ є҆сѝ и҆сто́чникъ живота̀, и҆ пода́тель всѣ́хъ бла̑гъ. Возжада̀ тебѐ душа̀ моя̀, возжада̀ тебѐ се́рдце моѐ, бж҃е живота̀ моегѡ̀. Да оѹ҆слади́тмися твоѐ прест҃о́е и҆́мя, пресла́дкагѡ гдⷭа моегѡ̀ і҆и҃са, да оѹ҆ра́нена бу́детъ и҆́мъ душа̀ моя̀, да оѹ҆я́звено бу́детъ моѐ се́рдце, да ничто́же и҆́мамъ любе́знѣйше во все́мъ житіѝ мое́мъ, па́че твоегѡ̀ прест҃а́гѡ и҆́мене: да бу́дутъ сладча́йша словеса̀ твоя̀ горта́ни моему̀, и҆ оѹ҆стѡ́мъ мои́мъ па́че ме́да, и҆ ѡ҆правда́нія твоя̀ да вожделѣ́нна мѝ бу́дутъ гдⷭи, па́че зла́та и҆ ка́мене че́стна мно́га, и҆ сла̑ждша па́че ме́да и҆ со́та!

Па́ки къ бг҃у те́плѣ вопі́й:

[є҃] Что̀ оѹ҆́бѡ душа̀ моя̀ возлю́битъ въ вѣ́цѣ се́мъ; что̀ возжела́етъ; ѡ҆ чесо́мъ восхо́щетъ оѹ҆тѣ́шитися, а҆́ще не ѡ҆ тебѣ̀ є҆ди́номъ гдⷭѣ бз҃ѣ мое́мъ; А҆́ще бо возлю́битъ пи́щу и҆ питіѐ, прельща́ется: вре́мєнна бо и҆ тлѣ̑нна су́ть: а҆́ще возлю́битъ сла́ву, красоту̀ и҆ почита́ніе мі́ра сегѡ̀, всу́е мяте́тся: прехо́дитъ бо и҆ погиба́етъ вско́рѣ. А҆́ще возлю́битъ зла́то и҆ сребро̀, не вѣ́сть кому̀ собира́етъ: вся́ бо здѣ̀ на землѝ ѡ҆ста́нутъ, въ пра́хъ и҆ пе́пелъ премѣня́тся. Нѣ́сть нигдѣ́же въ си́хъ и҆звѣ́стнагѡ оѹ҆тѣше́нія и҆ поко́я: душа́ бо ѡⷮ сво́йственнагѡ сво́йства ѡⷮто́ргшаяся, нигдѣ̀ и҆́мать ми́ра и҆ поко́я, а҆́ще не къ тебѣ̀ гдⷭу своему̀ па́ки ѡ҆брати́тся, ѡⷮню́дуже бытіѐ своѐ и҆́мать: а҆́ще не тебѐ всѣ́мъ се́рдцемъ свои́мъ возлю́битъ, а҆́ще бл҃года́ти прест҃а́гѡ твоегѡ̀ дх҃а не бу́детъ прича́стна, ничи́мже возмо́жетъ и҆звѣ́стнѡ оѹ҆тѣ́шитися и҆ оѹ҆весели́тися.

Па́ки те́плѣ ко гдⷭу рцы̀:

[ѕ҃] Всу́е мяте́тся вся́къ человѣ́къ живы́й (ѱало́мъ л҃и), не любя́й тебѐ гдⷭа своегѡ̀: всу́е тружда́ется вся́къ земноро́дный, не прилѣпля́яся къ тебѣ̀ всѣ́мъ се́рдцемъ свои́мъ, и҆ не взыску́яй тебѐ де́нь и҆ но́щь. Почто̀ и҆ живе́тъ человѣ́къ; почто̀ и҆ роди́лся є҆́сть въ мі́ръ, а҆́ще вотщѐ и҆знуря́етъ днѝ своя̀; вотще́ бо и҆ тече́ніе є҆гѡ̀ є҆́сть. Всу́е нарица́етъ и҆́мя твоѐ ст҃о́е, не любя́й тебѐ гдⷭа своегѡ̀, и҆сто́чника жи́зни и҆ пода́теля всѣ́хъ бла̑гъ! Оѹ҆язвѝ ду́шу мою̀ бж҃е́ственною твое́ю любо́вію, ѡ созда́телю мо́й! оѹ҆ра́ни се́рдце моѐ, содѣ́телю всея̀ тва́ри: а҆́ще бо къ тебѣ̀ не прилѣплю́ся гдⷭу моему̀, что̀ оѹ҆́бѡ твори́ти бу́ду; а҆́ще къ тебѣ̀ не присоедине́нъ бу́ду, что̀ содѣ́ю не вѣ́дя; а҆́ще ѡⷮ путѝ твоегѡ̀ пра́вагѡ ѡⷮвращу́ся, въ послѣ́дняя ѕла̑я впаду̀: къ тебѣ́ бо присоедине́ніе, живо́тъ є҆́сть: ѡⷮ тебѐ ѡⷮчужде́ніе, вѣ́чная сме́рть и҆ поги́бель и҆ безконе́чная му́ка. Присоедини́ мя ты̀ са́мъ, гдⷭи, и҆́миже вѣ́си судьба́ми, ꙗ҆́кѡ человѣколю́бецъ и҆ преще́дрый гдⷭь.

Па́ки къ бг҃у те́плѣ вопі́й:

[з҃] Почто̀ предпочита́ю суету̀ и҆ сла́сть тлѣ́нную; предпочита́ю сла́ву вре́менную, красоту̀ смра́дную, бога́тство и҆счезнове́нное; предпочита́ю вся́кую ѕлу́ю ве́щь, па́че тебѐ гдⷭа моегѡ̀, бл҃года́теля преще́драгѡ; Ко́е моѐ безу́міе; ка́я моя̀ слѣпота̀; оѹ҆вы̀ мнѣ̀ грѣ́шному! оѹ҆вы̀ мнѣ̀ ѻ҆кая́нному! оѹ҆вы̀ мнѣ̀ помраче́нному! но ѻ҆ба́че да́руй мѝ сіѐ, ѡ бж҃е мо́й! ꙗ҆́кѡ да ничто́же возлюблю̀ въ вѣ́цѣ се́мъ, кромѣ̀ тебѐ гдⷭа моего̀. Да не возлюблю̀ сла́вы, бога́тства, сла́сти, красоты̀ и҆ тлѣ́нія: но да тебѐ то́чію є҆ди́наго созда́теля моего̀ всѣ́мъ се́рдцемъ мои́мъ, и҆ все́ю душе́ю мое́ю возлюблю̀, и҆ ничто́же предпочита́ю па́че твоея̀ любвѐ.

Па́ки любе́знѣ къ бг҃у глаго́ли:

[и҃] Что̀ оѹ҆́бѡ и҆́но люби́ти и҆́мамъ, а҆́ще не тебѐ гдⷭа моего̀, и҆ созда́теля, и҆́же мя̀ всего̀ сотвори́лъ є҆сѝ, и҆ всего́ мя ма́ніемъ свои́мъ содержи́ши, пита́еши, живи́ши, и҆ вся̑ къ поле́зному оѹ҆строя́еши, ꙗ҆́коже са́мъ вѣ́си, гдⷭи; И҆лѝ лу́чше мѝ люби́ти ве́щь су́етную, ве́щь превра́тную, не́жели тебѐ гдⷭа моего̀ и҆ созда́теля; и҆лѝ лу́чше мѝ люби́ти тва́рь, не́же тебѐ творца̀ тва́ри; созда́ніе, не́же тебѐ созда́теля; А҆́ще бо тебѐ гдⷭа моегѡ̀ всѣ́мъ се́рдцемъ не возлюблю̀. что̀ оѹ҆́бѡ и҆́ное люби́ти и҆́мамъ; ко и҆но́му ли чесому̀ прилѣплю́ся; и҆лѝ и҆но́ю ко́ею ве́щію порабоще́нъ бу́ду;

Па́ки къ бг҃у оѹ҆се́рднѣ взыва́й:

[ѳ҃] Не лу́чше ли ка́пли при и҆сто́чницѣ, розгѣ̀ при ко́рени, оѹ҆́ду при главѣ̀; є҆́й, вся́кѡ лу́чше. Си́це и҆ при тебѣ̀ гдⷭѣ бз҃ѣ мое́мъ не лу́чше ли є҆́сть; ты́ бо мѝ є҆сѝ гдⷭь є҆ди́нъ, прибѣ́жище моѐ и҆ оѹ҆тѣше́ніе, ты́ ми є҆сѝ є҆ди́на наде́жда и҆ оѹ҆пова́ніе: и҆́нагѡ приста́нища и҆ оѹ҆тѣше́нія не и҆́мамъ, и҆ны́я наде́жды и҆ оѹ҆пова́нія, ра́звѣ тебѐ бг҃а моегѡ̀ не зна́ю. Ты́ є҆си мо́й засту́пникъ, и҆ покрови́тель: ты́ є҆си моя̀ сла́ва и҆ держа́ва и҆ присносу́щное ра́дованіе.

Па́ки прилѣ́жнѡ гдⷭа молѝ:

[і҃] Но оѹ҆́бѡ молю̀ твоѐ бл҃гоутро́біе, ѡ созда́телю мо́й гдⷭи! пріими́ мя въ любо́вь твою̀ ст҃у́ю, просвѣтѝ мою̀ ду́шу, оѹ҆яснѝ мо́й ра́зумъ, ѡ бл҃года́телю мо́й! да оѹ҆ра́нитмися твое́ю бж҃е́ственною любо́вію душа̀, да оѹ҆я́звенно бу́детъ моѐ се́рдце, да свя́жется є҆́ю крѣ́пцѣ, и҆ плѣне́на бу́детъ вся̀ въ твоѐ бжⷭтвенное жела́ніе и҆ любо́вь: да пронзе́тъ и҆ прони́четъ всю̀ ду́шу мою̀, всѣ́хъ часте́й да ни є҆ди́на ча́сть, ни є҆ди́на клѣ́ть душѝ мое́й ѡ҆ста́нетъ кромѣ̀ є҆я̀: да ѡⷮве́рзеши вся̀ закле́пы душѝ моея̀, да просвѣти́ши вся̀ моя̀ чу̑вства, да оѹ҆тверди́ши и҆ оѹ҆поко́иши сія̑ въ душѝ мое́й: да ве́сь бу́ду въ тебѣ̀, ты́ же во мнѣ̀: да твоѐ прест҃о́е и҆́мя сла́влю, воспѣва́ю и҆ велича́ю, со безнача́льнымъ твои́мъ ѻ҆ц҃е́мъ, и҆ съ прест҃ы́мъ и҆ бл҃ги́мъ и҆ животворя́щимъ твои́мъ дх҃омъ, всегда̀, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.