Стіхослѡ́вія пя̑тая,

прежела́тельнагѡ къ бг҃у благодаре́нія ѡ҆ благодѣя́ніяхъ є҆гѡ̀.

Благодарѝ гдⷭа, ꙗ҆́кѡ сотвори́лъ тя̀ є҆́сть.

а҃ Бл҃годарю̀ тебѐ гдⷭа моего̀, благода́теля преще́драго, ꙗ҆́кѡ сотвори́лъ мя̀ є҆сѝ по ѻ҆́бразу своему̀ и҆ по подо́бію, и҆ ѡⷮ небытія̀ въ бытіѐ приве́лъ мя̀ є҆сѝ, сла́вою и҆ че́стію вѣнча́лъ є҆сѝ. Не сотвори́лъ мя̀ є҆сѝ ѕвѣ́ремъ, ни ското́мъ, ни и҆нѣ́мъ ко́имъ живо́тнымъ, но человѣ́комъ, разу́мною тва́рію: безсме́ртіемъ и҆ самовла́стіемъ ду́шу мою̀ почти́лъ є҆сѝ. А҆́ще бо и҆ разлуча́емся вре́меннѡ пло́тію, но на лу́чшее преселе́ніе прехо́димъ, душе́ю же безсме́ртнѣ пребыва́емъ во вѣ́ки, не на ты́сящу лѣ́тъ, ни на двѣ̀, и҆лѝ трѝ ты́сящи, но во вѣ́ки вѣ́чныя конца̀ не и҆му́щыя. А҆́ще бо кто̀ благода́ренъ и҆ вино́венъ быва́етъ врачє́мъ за ма́лое то́чію нѣ́кое неду́га врачева́ніе, коли́кѡ а҆́зъ па́че, гдⷭи, и҆́же мя̀ всего̀ цѣ́ла, дѣ́йственна, жи́ва, здра́ва ѡⷮ небытія̀ въ бытіѐ приве́лъ є҆сѝ, и҆ во вѣ́ки безконє́чныя оѹ҆стро́илъ мя̀ є҆сѝ!

Бл҃годарѝ гдⷭа, ꙗ҆́кѡ вся̑ тебѐ ра́ди ѡⷮ небытія̀ въ бытіѐ приве́лъ є҆́сть.

[в҃] Бл҃годарю̀ тебѐ гдⷭа моего̀, благода́теля преще́драго, ꙗ҆́кѡ вся̑ менѐ ра́ди ту́не сотвори́лъ є҆сѝ: менѐ ра́ди нб҃о, земля̀, со́лнце, луна̀ и҆ всѐ ѕвѣ́здное небе́сное оѹ҆краше́ніе: менѐ ра́ди ѕвѣ́ріе, ско́ти, пти̑цы перна́ты, вся́кое живо́тно: менѐ ра́ди моря̀, рѣ́ки, и҆сто́чники, є҆зе́ра, ры̑бы, ки́ты превели́кія: менѐ ра́ди лѣ́сы, дубра̑вы, пусты̑ни разли̑чныя, древеса̀ плодонѡ́сна: менѐ ра́ди ѕє́лія, корє́нія, сѣ́мена, ѻ҆вѡ́щія разли̑чна: менѐ ра́ди вся̑ ви̑димая и҆ неви̑димая сотворє́на су́ть, ѡ бж҃е мо́й!

Бл҃годарѝ гдⷭа, ꙗ҆́кѡ вся̑ тебѣ̀ пра́веднымъ судо́мъ оѹ҆стро́и.

[г҃] Бл҃годарю̀ тебѐ гдⷭа моего̀, благода́теля преще́драго, ꙗ҆́кѡ вся̑ ѡ҆ мнѣ̀ пра́веднѣ и҆ милосе́рднѣ оѹ҆стро́илъ є҆сѝ, и҆ непреста́ннѡ промышля́еши ѡ҆ душѝ мое́й: защища́еши мя̀, сохраня́еши мя̀, покрыва́еши, заступа́еши ду́шу мою̀, да́руеши мѝ крѣ́пость, здра́віе, живи́ши мя̀, вразумля́еши мя̀, и҆ просвѣща́еши, посо́бствуеши, и҆ наставля́еши мя̀ на вся́кая дѣла̀ блага̑я: вся̑ пра́веднѣ, милосе́рднѣ и҆ бл҃гоутро́бнѣ ѡ҆ мнѣ̀ оѹ҆стро́илъ є҆сѝ.

Бл҃годарѝ гдⷭа, ꙗ҆́кѡ тебѐ ра́ди на зе́млю сни́де, и҆ взя́тъ пло́ть на́шу на ся̀.

[д҃] Бл҃годарю̀ тебѐ гдⷭа моего̀, благода́теля преще́драго, ꙗ҆́кѡ ты̀ бг҃ъ всеси́ленъ сы́й: менѐ ра́ди чл҃вѣ́къ бы́лъ є҆сѝ, да менѐ соедини́ши себѣ̀ во є҆ди́но: не возгнуша́лся є҆сѝ взя́ти на̑ша на ся̀, ꙗ҆́кѡ да на́мъ всего̀ себѐ ѡⷮда́си. Менѐ ра́ди во ꙗ҆́слехъ положе́нъ бы́лъ є҆сѝ: менѐ ра́ди пелена́ми пови́тъ бы́лъ є҆сѝ, ѡ҆дѣва́яй нб҃о ѻ҆́блаки: менѐ ра́ди ѻ҆смодне́венъ ѡ҆брѣ́занъ бы́лъ є҆сѝ: менѐ ра́ди бѣжа́лъ є҆сѝ во є҆гѵ́петъ: менѐ ра́ди бо і҆ѻрда́не крⷭти́лся є҆сѝ: менѐ ра́ди пречи́стую главу̀ свою̀ прⷣте́чи приклони́лъ є҆сѝ, да менѐ вознесе́ши горѣ̀: не тре́буя креще́нія менѐ ра́ди крести́лся є҆сѝ, да мнѣ̀ ѡ҆чище́ніе креще́ніемъ пода́си.

Благодарѝ гдⷭа, ꙗ҆́кѡ тебѐ ра́ди вся̑ ѕла̑я претерпѣ̀.

[є҃] Бл҃годарю̀ тебѐ гдⷭа моего̀, благода́теля преще́драго, ꙗ҆́кѡ менѐ ра́ди біе́нъ, безче́стимь, ѡ҆плева́нъ, зауше́нъ, свя́занъ, терно́вымъ вѣнце́мъ оѹ҆вязе́нъ бы́лъ є҆сѝ: менѐ ра́ди ру́цѣ своѝ пригвозди́лъ є҆сѝ на крⷭтѣ̀, ѻ҆́цта и҆ же́лчи вкуси́лъ є҆сѝ, копіе́мъ во пречи́стое ребро̀ прободе́нъ бы́лъ є҆сѝ: менѐ ра́ди кро́вь свою̀ пречи́стую и҆злія́лъ є҆сѝ: менѐ ра́ди оѹ҆́мерлъ є҆сѝ пло́тію, да ѡ҆живи́ши мя̀ дх҃омъ, и҆ жи́знь вѣ́чную мѝ пода́си: менѐ ра́ди во гро́бѣ положе́нъ бы́лъ є҆сѝ: менѐ ра́ди тридне́внѡ и҆з̾ гро́ба воскре́слъ є҆сѝ, да все́мъ на́мъ и҆з̾ гро́ба воскресе́ніе да́руеши.

Благодарѝ гдⷭа, ꙗ҆́кѡ всегда̀ ка́ющагося тя̀ пріе́млетъ.

[ѕ҃] Бл҃годарю̀ тебѐ гдⷭа моего̀, благода́теля преще́драго, ꙗ҆́кѡ, а҆́ще и҆ тма́ми те́мъ пред̾ тобо́ю согрѣша́ю, ми́лостивнѣ пріе́млеши мя̀ ка́ющагося. Коли́ко а҆́зъ пред̾ тобо́ю согрѣша́ю; Ты́ же є҆дина́че мя̀ не ѡⷮмета́еши. Коли́кѡ пред̾ тобо́ю преступа́ю; Ты́ же не ѡⷮвраща́еши мя̀. Коли́кѡ па́даю; Ты́ же возставля́еши мя̀, долготерпи́ши, не а҆́біе сме́рти мя̀ предае́ши, да́же до послѣ́днягѡ и҆здыха́нія, да́же до послѣ́днія кончи́ны. Когда̀ ѡ҆бращу́ся къ тебѣ̀, когда̀ къ тебѣ̀ припаду̀ ка́яся: ты́ же ми́лостивнѣ ка́ющагося мя̀ пріе́млеши.

[з҃] Бл҃годарю̀ тебѐ гдⷭа моего̀, благода́теля преще́драго, ꙗ҆́кѡ да́лъ є҆сѝ зако́нъ тво́й пред̾ ѻ҆́чи моѝ, да́лъ мѝ є҆сѝ оѹ҆вѣ́дѣти во́лю твою̀ ст҃у́ю, не ѡⷮри́нулъ мя̀ є҆сѝ креще́нія, не ѡ҆ста́вилъ мя̀ є҆сѝ по и҆новѣ́рствѣ, и҆лѝ па́губной є҆́реси погруже́нну бы́ти, прича́стника мя̀ пречⷭтымъ твои́мъ та́йнамъ сотвори́лъ є҆сѝ, кро́вію свое́ю и҆скупи́лъ є҆сѝ, наслѣ́дника мя̀ црⷭтвія нбⷭнагѡ содѣ́лалъ є҆сѝ.

[и҃] Бл҃годарю̀ тебѐ гдⷭа моего̀, благода́теля преще́драго, ꙗ҆́кѡ и҆сто́ргнулъ мя̀ є҆сѝ ѡⷮ мо́лвъ и҆ мятє́жъ мі́ра сегѡ̀, и҆ приве́лъ мя̀ є҆сѝ во ѡ҆гра́ду слове́сныхъ ѻ҆ве́цъ твои́хъ, и҆ и҆збра́лъ мя̀ є҆сѝ себѣ̀ въ служе́ніе, служи́теля менѐ себѣ̀ содѣ́лалъ є҆сѝ, а҆́ще и҆ недосто́инъ є҆́смь: ѻ҆би́льнѡ благода́ть твою̀ надо мно́ю оѹ҆мно́жилъ є҆сѝ, ѻ҆би́льнѡ благода́ть твою̀ надо мно́ю просте́рлъ є҆сѝ, оѹ҆до́бенъ пу́ть ко спасе́нію мнѣ̀ показа́лъ є҆сѝ. Вся̑ мнѣ̀ ѡⷮкры́лъ є҆сѝ, вся̑ пред̾ ѻ҆́чи моѝ предложи́лъ є҆сѝ, ничто́же ѡⷮ менѐ оѹ҆тае́но ѡ҆ста́вилъ є҆сѝ.

[ѳ҃] Бл҃годарю́ тя гдⷭа моего̀, благода́теля преще́драго, ꙗ҆́кѡ ни въ че́мже мя̀ ску́дна ѡ҆ста́вилъ є҆сѝ, но во все́мъ и҆з̾ѻби́лую: не терплю̀ гла́да и҆ мра́за: тлѣ́нныхъ ра́ди веще́й, не волну́юся ни потопля́юся въ рѣка́хъ, не претерпѣва́ю бѣ́дъ на путѝ ра́ди жите́йскихъ веще́й, не смуща́ютъ мя̀ вели́кія долгѝ, не налега́ютъ мя̀ ца̑рскія ѕѣ̑льныя да̑ни, не и҆згоня́ютъ мя̀ на рабо́ту ну́жную, пла̑ванія ну̑жная морска̑я не предлежа́тъ мя̀, ничто́же ѡⷮ си́хъ претерпѣва́ю, ꙗ҆́коже про́чіи человѣ́цы те́рпятъ, и҆ тма́ми тє́мъ стра́ждутъ, да̑ни даю́ще мнѡ́ги, скѡ́рби и҆ напа̑сти терпя́ще: а҆́зъ же всегѡ̀ сегѡ̀ є҆́смь твое́ю прест҃о́ю благода́тію свобо́дь. а҆́ще бо и҆ потружду́ся въ че́мъ, и҆ претерплю̀ что̀ ма́ло, но и҆ сѐ не ра́ди тлѣ́нныхъ, но ра́ди пребыва́ющихъ во вѣ́ки. ѻ҆́вѡ глаго́лю оѹ҆до́бенъ пу́ть мѝ показа́лъ є҆сѝ ко спасе́нію, гдⷭи, оѹ҆до́бно ца́рство небе́сное оѹ҆стро́илъ є҆сѝ: ту́не вся̑ на́мъ дарова́лъ є҆сѝ.

[і҃] Бл҃годарю̀ тебѐ гдⷭа моего̀, благода́теля преще́драго, ꙗ҆́кѡ ма́лагѡ ра́ди нѣ́коегѡ благоугожде́нія, жи́знь вѣ́чную, ца́рство нбⷭное да́ти мѝ ѡ҆бѣща́лъ є҆сѝ: са́мъ сотвори́вый, са́мъ созда́вый мя̀, и҆ вся̑ ко благоугожде́нію да́вый, жи́знь вѣ́чную ту́не да́руеши, не на вре́мя нѣ́кое ма́ло, не на вре́мя нѣ́кое кра́тко, не на сто̀ лѣ́тъ, и҆лѝ на ты́сящу, и҆лѝ ты́сящы ты́сящей, но во вѣ́ки вѣ̑чныя, конца̀ не и҆му́щыя. Сла́ва неисповѣди́мому твоему̀ милосе́рдію, гдⷭи! Сла́ва пречу́дному оѹ҆строе́нію твоему̀, прест҃ы́й цр҃ю̀! Сла́ва неизрече́ннѣй и҆ непостижи́мѣй твое́й благосты́ни и҆ прему́дрости, чл҃вѣколю́бче гдⷭи! Ꙗ҆́кѡ тебѣ̀ подоба́етъ вся́кая сла́ва, че́сть и҆ держа́ва, со ѻ҆ц҃е́мъ, и҆ съ прест҃ы́мъ, бл҃ги́мъ и҆ животворя́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.