Ча́сть а҃

Глава̀ пе́рвая

Ѡ҆ є҆́же пе́рвѣйшая вина̀ бы́сть а҆да́млю паде́нію, неразу́міе, и҆ всеконе́чное себѐ непозна́ніе.

[а҃] Мно́зи мнѡ́гія и҆ разли̑чныя предлага́ютъ а҆да́млю паде́нію вины̑: є҆ди́ны безвѣ́ріе, друзі́и преслуша́ніе, тре́тіи же горды́ню, и҆ славолю́біе, и҆ні́и же и҆́ны разли́чныя вины̑: мы́ же ни є҆ди́ну ѡⷮ си́хъ пе́рвѣйшую бы́ти мни́мъ, то́чію безу́міе и҆ всѣ́хъ веще́й неразсмотре́ніе. (Кни́га ѻ҆бѣ́дъ слⷡо в҃ на нлⷣю к҃ѕ)

[в҃] Пе́рвѣйшая а҆да́му въ раѝ бы́сть за́повѣдь, є҆́же дѣ́лати, и҆ храни́ти, си́рѣчь дѣ́лати ра́зумомъ, є҆́же разумѣ́ти до́брѣ, и҆ храни́ти заповѣ́даніе, є҆́же не преступа́ти. Но поне́же не дѣ́лаше ра́зумомъ, сегѡ̀ ра́ди не сохранѝ заповѣ́данія: ѡⷮ недѣ́ланія бо оѹ҆́мнагѡ, пе́рвѣе возрастѐ въ а҆да́мѣ невѣ́ріе, во є҆́же не вѣ́ровати бг҃у, и҆́же речѐ и҆ заповѣ́да: посе́мъ ѡⷮ невѣ́рія преслуша́ніе и҆ преступле́ніе, ѡⷮ преступле́нія же ѡⷮпаде́ніе гдⷭни блгⷣти, и҆ бж҃е́ственныя є҆гѡ̀ любвѐ ѡⷮчужде́ніе.

[г҃] А҆́ще бы разумѣ́лъ а҆да́мъ бл҃года́теля, и҆ предразсуди́лъ себѣ̀ заповѣ́даніе, не бы̀ не невѣ́ровалъ заповѣ́данію: а҆́ще бы вѣ́ровалъ, не бы̀ преслу́шалъ, не бы̀ вкуша́лъ заповѣ́даннагѡ дре́ва, не бы̀ и҆згна́нъ бы́лъ и҆з̾ рая̀, не бы̀ подпа́лъ сме́рти и҆ тлѣ́нію, не бы̀ бг҃ъ толи́кѡ ѡ҆ на́съ чудодѣ́йствовалъ дото́лѣ, доне́лѣ приведѐ на́съ въ дре́вній ра́зумъ, и҆ всѣ́хъ веще́й позна́ніе.

[д҃] Ꙗ҆́коже не и҆но́ю вино́ю ѡⷮпадѐ а҆да́мъ ѡⷮ бг҃а и҆ є҆гѡ̀ бл҃года́ти, то́чію безу́міемъ: си́це не и҆нѣ́мъ чи́мъ па́ки кто̀ присоедини́тся є҆му̀, то́чію ра́зумомъ, и҆ всѣ́хъ веще́й позна́ніемъ. Позна́вый бо кто̀ и҆́стиннѡ себѐ, позна̀ бг҃а, и҆ позна́вый бг҃а, позна̀ себѐ: съ бг҃омъ соедине́нъ є҆́сть, и҆ почи́въ ѡⷮ всѣ́хъ дѣ́лъ и҆ трудѡ́въ свои́хъ, вни́де во ст҃и́лище бж҃іе, и҆ прино́ситъ бг҃у всегда̀ оѹ҆́мную дх҃а слу́жбу.

[є҃] Ѻ҆ба́че никто́же мо́жетъ позна́ти бг҃а, доне́лѣ не позна́етъ пе́рвѣе себѐ, не позна́етъ же соверше́ннѣ себѐ, доне́лѣ не пріи́детъ пе́рвѣе въ позна́ніе тва́ри, и҆ всѣ́хъ веще́й въ мі́рѣ зри́мыхъ, и҆ разумѣва́емыхъ разсмотре́ніе. Є҆гда́ же пріи́де въ позна́ніе си́хъ, тогда̀ возмо́жетъ пріитѝ и҆ въ позна́ніе себѐ, та́же и҆ бг҃а, и҆ та́кѡ прихо́дитъ въ соверше́нное съ бг҃омъ любо́вію соедине́ніе.

[ѕ҃] Тѣ́мже, а҆́ще кто̀ и҆́стиннѡ хо́щетъ позна́ти гдⷭа, позна́ти себѐ, и҆ съ ни́мъ любо́вію соедини́тися: да позна́етъ пе́рвѣе всю̀ тва́рь, ви́димую и҆ разумѣва́емую, да оѹ҆вѣ́сть всѣ́хъ веще́й, и҆ всея̀ тва́ри разсмотре́ніе, ѡⷮ когѡ̀, и҆ чесѡ̀ ра́ди сія̑ су́ть, во є҆́же ни є҆ди́ной ве́щи оѹ҆тае́ннѣй и҆ недоумѣ́ннѣй бы́ти ѡⷮ негѡ̀, та́же себѐ, и҆ всѐ є҆́же ѡ҆ себѣ̀ та́инство, та́же бг҃а, и҆ вся̀ є҆гѡ̀ неизречє́нная благодѣя̑нія, и҆ та́кѡ прихо́дитъ въ соверше́нное всегѡ̀ позна́ніе: и҆́бо подоба́етъ дѡ́лняя вся̑ разумѣ́ти, та́же гѡ́рняя: не бо̀ ѡⷮ го́рнихъ на ни̑жняя восходи́ти до́лжни є҆смы̀: но ѡⷮ до́лнихъ на вы̑шняя. Тогѡ́ бо ра́ди всю̀ тва́рь, и҆ всѐ мірско́е оѹ҆строе́ніе, ꙗ҆́коже нѣ́кое оѹ҆чи́лище, и҆лѝ зерца́ло, пред̾ ѻ҆́чи на́ши бг҃ъ положѝ, ꙗ҆́кѡ да оѹ҆ча́щеся, ѡⷮ до́лнихъ восхо́димъ на вы̑шняя: а҆́ще же до́лнихъ не познава́емъ, то̀ ка́кѡ гѡ́рняя разумѣ́ти и҆́мамы;

[з҃] Ѡⷮ ра́зума и҆ позна́нія ражда́ется вѣ́ра, ѡⷮ вѣ́ры же за́повѣдей бж҃іихъ хране́ніе, ѡⷮ хране́нія же за́повѣдей бж҃іихъ оѹ҆пова́ніе на бг҃а, ѡⷮ оѹ҆пова́нія же на бг҃а бж҃е́ственная любо́вь: се́й же оѹ҆мно́женнѣй бы́вшей, соверше́нное быва́етъ съ бг҃омъ соедине́ніе, и҆ и҆сполне́ніе зако́на и҆ прⷪро́кѡвъ.

[и҃] По є҆ли́ку процвѣта́етъ ра́зумъ, по толи́ку возраста́етъ и҆ вѣ́ра: и҆ по є҆ли́ку возраста́етъ вѣ́ра, по толи́ку оѹ҆множа́ются добродѣ́тєли, по толи́ку ражда́ется и҆ оѹ҆пова́ніе на бг҃а: и҆ по є҆ли́ку кто̀ оѹ҆пова́етъ, по толи́ку и҆ бг҃а лю́битъ, и҆ по є҆ли́ку лю́битъ, по толи́ку и҆ съ бг҃омъ соединя́ется, наслажда́ющися бжⷭтвенныя є҆гѡ̀ сла́вы.

[ѳ҃] Ѡⷮ безу́мія ражда́ется невѣ́ріе, ѡⷮ невѣ́рія же преслуша́ніе, ѡⷮ преслуша́нія же вся́къ грѣ́хъ и҆ преступле́ніе. Ка́кѡ кто̀ мо́жетъ вѣ́ровати, ничто́же разумѣ́яй; не вѣ́руяй же, нижѐ разумѣ́яй ничто́же, ка́кѡ мо́жетъ сохраня́ти гдⷭни за́пѡвѣди; не сохраня́яй же гдⷭни за́пѡвѣди, ка́кѡ мо́жетъ и҆мѣ́ти на бг҃а оѹ҆пова́ніе и҆ любо́вь; Ника́коже.

[і҃] Тѣ́мже пре́жде всегѡ̀, подоба́етъ оѹ҆чи́тися, не то́чію внѣ́шнему труду̀, но и҆ дѣ́ланію оѹ҆́мному, ра́зуму, и҆ всѣ́хъ веще́й позна́нію, оѹ҆до́бнѣ всему̀ вѣ́ру є҆́млетъ, сохраня́етъ вся̀ гдⷭни за́пѡвѣди, оѹ҆пова́етъ на бг҃а, лю́битъ є҆го̀ всѣ́мъ срⷣцемъ свои́мъ, и҆ соединя́ется съ ни́мъ во є҆ди́но, во є҆́же бы́ти є҆му̀ всему̀ въ бз҃ѣ, и҆ бг҃у въ не́мъ. Сицевы́й пре́жде воскрⷭнія, воскресе́ніе душѝ пріе́млетъ, и҆ пре́жде жи́зни, жи́знь вѣ́чную наслѣ́дуетъ, во є҆́же поже́ртой бы́ти безслове́сія сме́рти, ра́зума и҆ позна́нія жи́знію: се́ бо, речѐ, є҆́сть живо́тъ вѣ́чный, да позна́емъ гдⷭа, се́ же и҆ сме́рть, не разумѣ́ти ѡ҆ не́мъ.