Ча́сть а҃

Глава̀ втора́я

Ѡ҆ є҆́же дѣ́лати подоба́етъ ра́зумомъ и҆ храни́ти гдⷭня за́пѡвѣди.

Реко́хомъ, ꙗ҆́кѡ пе́рвѣйшая вина̀ и҆ нача́ло бы́сть а҆да́млю паде́нію безу́міе, благо́му же дѣ́ланію и҆ начина́нію ра́зумъ, ѻ҆ба́че же пра́въ и҆ и҆́стиненъ ра́зумъ глаго́лю: ра́зумъ бо со и҆́стиною прія́тенъ є҆́сть, кромѣ́ же и҆́стины, ѡⷮве́рженъ є҆́сть. Пра́въ же ра́зумъ возраста́етъ и҆ оѹ҆множа́ется ѡⷮ дѣ́ланія оѹ҆́мнагѡ, и҆ ѡⷮ хране́нія гдⷭнихъ за́повѣдей, ꙗ҆́коже и҆ въ раѝ а҆да́му заповѣ́дано бы́сть дѣ́лати и҆ храни́ти: но поне́же не дѣ́лаше ра́зумомъ, сегѡ̀ ра́ди не сохранѝ заповѣ́данія.

[в҃] И҆ бѣ́си бо мня́тся бы́ти прему́дри и҆ разу́мни, ѻ҆ба́че не пребыва́ютъ, нижѐ пребы́ти хо́щутъ во и҆́стинѣ, сегѡ̀ ра́ди ѡⷮве́ржени су́ть. Ꙗ҆́коже непрія́тна є҆́сть ми́лость кромѣ̀ и҆́стины, си́це нижѐ прему́дрость непра́ведна: но ѻ҆боя̀ ѻ҆со́бнѡ да соравнє́на бу́дутъ, ꙗ҆́коже гл҃етъ прⷪро́къ: млⷭть и҆ су́дъ воспою̀ тебѣ̀, гдⷭи, пою̀ и҆ разумѣ́ю въ путѝ непоро́чнѣ (ѱало́мъ р҃). Си́це и҆ ра́зумъ ра́венъ съ пра́вдою, воспѣва́ти и҆ и҆мѣ́ти подоба́етъ безпоро́чнѡ.

[г҃] Ничесѡ́же бг҃ъ та́кѡ тре́буетъ и҆ лю́битъ ꙗ҆́коже ра́зумъ пра́въ и҆ и҆́стину, ѡ҆ се́мъ бо и҆ по́двигъ на́мъ є҆́сть, ѡ҆ се́мъ и҆ труды̀, ѡ҆ се́мъ и҆ попечє́нія, да получи́мъ пра́въ ра́зумъ, и҆ содержи́мъ и҆́стину, и҆ пребу́демъ въ не́й несовра́тнѡ да́же до кончи́ны. Бу́ди мѝ вѣ́ренъ до сме́рти, и҆ да́мъ тѝ вѣне́цъ жи́зни, гл҃етъ гдⷭь (А҆пок. глⷡа в҃). Развра́тнѡ же сопроти́въ и҆́стинѣ вся̑ му́дрствующе и҆ гл҃юще, а҆́ще и҆ велему́дрствуютъ, а҆́ще и҆ многоко́знствуютъ, лжу̀ вмѣ́стѡ и҆́стины представля́ютъ: ѻ҆ба́че лжа̀ пра́вдою никогда́же бы́ти мо́жетъ, нижѐ гдⷭви прія́та є҆́сть.

[д҃] Мня́тся же и҆ є҆ретіцы̀, и҆ всѝ ѕлѣ̀ му́дрствующіи бы́ти премⷣри и҆ разу́мни: но оѹ҆́бѡ не пребыва́ютъ, нижѐ пребы́ти хо́щутъ во и҆́стинѣ. Помрачи́шася бо въ ра́зумѣ, и҆ ѡ҆слѣпо́ша лже́ю: сегѡ̀ ра́ди му́дрость и҆́хъ ѡⷮве́ржена, и҆ поглощена̀ бы́сть. Не прія́та є҆́сть му́дрость со лже́ю, нижѐ філосо́фіа съ непра́вдою: ꙗ҆́коже и҆ за́паднагѡ сосло́вія любому́дрцы, сопроти̑вная цр҃кви му́дрствующіи, и҆́стину въ непра́вдѣ содержа́ще, ка́кѡ прія́ты и҆́мутъ ѡⷮ бг҃а бы́ти; Ника́коже.

[є҃] Ра́зумъ оѹ҆клоня́яйся и҆́стины, непра́въ, нижѐ ѡⷮ бг҃а прія́тенъ є҆́сть ра́зумъ: и҆ ѡ҆брѣта́яйся кто̀ въ не́мъ, въ ѕлолука̑вная дѣ̑йства нисхо́дитъ, и҆ бѣ́су подпа́даетъ во вла́сть ѻ҆тцу̀ лжѣ̀, и҆ въ разли́чіе впа́даетъ є҆реті́ческое. Взыску́яй же пра́вагѡ и҆ и҆́стиннагѡ ра́зума, взыску́етъ гдⷭа, и҆ ѡ҆бря́щетъ є҆гѡ̀: нигдѣ́же бо никто́же ѡ҆брѣстѝ є҆гѡ̀ мо́жетъ, то́чію въ ра́зумѣ пра́вѣ и҆ и҆́стинѣ.

[ѕ҃] Ꙗ҆́коже стрѣля́ющіи непра́вѡ, дале́че погрѣша́ютъ цѣ́ля, си́це и҆ непра́вѡ му́дрствующіи, дале́че ѡⷮстоя́тъ ра́зума бж҃ія: и҆ приближе́нія є҆гѡ̀ мно́зи жела́ютъ, мно́зи ра́тятся, мно́зи ѡ҆ се́мъ тща́ніе и҆́мутъ, ѻ҆ба́че не всѝ ра́внѡ, и҆ пра́вѡ въ цѣ́ль намѣря́ютъ. сегѡ̀ ра́ди дале́че цѣ́ля ѡⷮстоя́тъ въ безвѣ́стіи.

[з҃] Рожде́нное ѡⷮ пло́ти, пло́ть є҆́сть: рожде́нное же ѡⷮ дх҃а, дх҃ъ є҆́сть, гл҃етъ гдⷭь (І҆ѡаⷩ заⷱ и҃). Ꙗ҆́коже пло́ть пло́ти сочета́яся, ражда́етъ пло́ть: си́це и҆ пра́въ и҆ и҆́стиненъ ра́зумъ, соединя́яся въ позна́ніи всѣ́хъ веще́й ра́зуму бж҃ію, зачина́етъ нача́токъ дх҃а, и҆ по пожда́тельномъ вре́мени, въ води́мыхъ по́двизѣхъ всегда̀ пребыва́яй, ражда́етъ дх҃ъ. Стра́ха бо, речѐ, ра́ди твоегѡ̀ во чре́вѣ прія́хомъ и҆ поболѣ́хомъ, и҆ роди́хомъ дх҃ъ спасе́нія гдⷭни бл҃года́ти, и҆ бж҃е́ственныя любвѐ є҆гѡ̀, глаго́летъ прⷪро́къ (И҆са́іи глⷡа к҃ѕ). Не и҆мѣ́яй же пра́вагѡ ра́зума, никогда́же сегѡ̀ получи́тъ.

[и҃] Ѻ҆ба́че же, хотя́й кто̀ и҆мѣ́ти пра́въ ра́зумъ, дѣ́ланія оѹ҆́мнагѡ всегда̀ тре́буетъ, не дѣ́лаяй бо оѹ҆ма̀ ра́зумомъ, нижѐ тща́йся ѡ҆ се́мъ, а҆́ще и҆ є҆́сть є҆сте́ственный, и҆лѝ ѡⷮ внѣ́шнихъ любому́дрцєвъ оѹ҆чи́мый ра́зумъ, ничто́же по́льзуетъ: ꙗ҆́коже зла́то въ землѝ су́щее, недѣ́ланное же и҆ непережже́нное въ ма́лой цѣнѣ̀ є҆́сть: и҆лѝ ꙗ҆́коже дре́во не и҆счища́емо, не прицѣпля́емо, не пресажда́емо, ма́лъ и҆ не сла́докъ пло́дъ прино́ситъ. Є҆ли́кѡ же и҆̀мъ кто̀ наипа́че дѣ́лати бу́детъ, толи́къ пло́дъ и҆ простра́нство оѹ҆́зритъ.

[ѳ҃] Дѣ́ланіе оѹ҆́мное, и҆́мже и҆́мамы прибли́житися, и҆ соверше́ннѡ присоедини́тися гдⷭви, сіѐ є҆́сть: є҆́же позна́ти пе́рвѣе всю̀ тва́рь, ви́димую и҆ разумѣва́емую, ѡⷮ когѡ̀ и҆ чесѡ̀ ра́ди сотворена̀ бы́сть, и҆ ка́мѡ дви́жима, и҆ ѡ҆браща́ема є҆́сть, и҆ оѹ҆вѣ́ритися ѡ҆ се́мъ и҆́стиннѡ. Та́же себѐ, и҆ всѐ є҆́же ѡ҆ себѣ̀ та́инство, та́же и҆ вся̑ є҆гѡ̀ бл҃годѣя̑нія. Ѻ҆́вѡ, глаго́лю, ра́зумъ пра́въ, и҆ и҆́стиненъ є҆́сть, позна́ти вся̑ сія̑ подро́бну, во є҆́же ни є҆ди́ной ве́щи ѡⷮ негѡ̀ оѹ҆тае́ннѣй, и҆ недоумѣ́ннѣй бы́ти, и҆ оѹ҆глуби́ти сіѐ въ себѐ до́лгимъ вре́менемъ, во є҆́же бы́ти є҆му̀ съ си́мъ, ꙗ҆́кѡ є҆диносра́сльну, и҆ во є҆ди́но соедине́нну. Не доспѣ́вый же въ сія̑, и҆ дерза́яй высѡ́кая ѡ҆ себѣ̀ му́дрствовати, и҆ бг҃осло́вити, а҆́ще и҆ всю̀ му́дрость мі́ра сегѡ̀ и҆звы́че, безу́менъ и҆ во все́мъ слѣ́пъ є҆́сть, и҆ сѣте́й ѕлоко́зненнагѡ не оѹ҆бѣжи́тъ.

[і҃] Ѻ҆ба́че хотя́й кто̀ оѹ҆до́бнѣе пріитѝ въ позна́ніе тва́ри, въ позна́ніе себѐ, та́же и҆ гдⷭа, да чте́тъ наича́стѣе кни́жицу, нарече́нную седмодне́вникъ, въ не́мже ѡ҆ се́мъ простра́ннѣе начерта́хомъ. Сія̑ же вся̑ не мо́гутъ бы́ти кромѣ̀ труда̀, и҆ ѕѣ́льнагѡ по́двига, и҆ оѹ҆́мнагѡ всегда́шнягѡ дѣ́ланія, и҆ пожда́тельнагѡ долговре́меннагѡ вре́мене. Ꙗ҆́коже зе́рно пшени́чно въ зе́млю вве́ржено бы́вши, не а҆́біе возраща́етъ кла́съ: и҆лѝ ква́съ въ мукѝ са́ти трѝ вложе́нъ бы́вши не а҆́біе вскиса́етъ, по при́тчи є҆ѵⷢльской: є҆го́же пріе́мши жена̀ душа̀, ква́съ сло́ва бж҃ія скры̀ въ мукѝ са́тахъ тре́хъ трича́стномъ душѝ, согрѣва́я и҆ ква́ся въ себѣ̀ сло́во бж҃іе, до́лгимъ вре́менемъ, до́ндеже вскисѐ всѐ, въ позна́ніи и҆ просвѣще́ніи ра́зума, и҆ всегѡ̀ ѡ҆ себѣ̀ та́инства (Матѳ. заⷱ н҃г).