Ча́сть а҃

Глава̀ тре́тія

Ѡ҆ є҆́же не дѣ́лаяй кто̀ ра́зумомъ, и҆ не ѡ҆чища́яй є҆гѡ̀, не пра́въ и҆ не и҆́стиненъ є҆́сть ра́зумъ.

Ра́зумъ недѣ́ланъ, и҆ до́лгимъ вре́менемъ не ѡ҆чище́нъ, ра́зумъ не разу́менъ є҆́сть, не пра́въ и҆ не и҆́стиненъ є҆́сть ра́зумъ. Є҆́сть же ра́зума разли́чіе, ꙗ҆́коже и҆ всѣ́хъ внѣ́шнихъ веще́й. Є҆́сть бо ра́зумъ соверше́нъ, духо́венъ, є҆́сть же посре́дній, дш҃е́венъ, є҆́сть же ѡⷮню́дъ гру́бъ, плотскі́й. Ꙗ҆́коже оѹ҆́бѡ внѣ́шнягѡ оѹ҆че́нія, и҆лѝ ко́егѡ худо́жества, никто́же навы́кнетъ, не всегда̀ ѡ҆ не́мъ поуча́яся и҆ попече́ніе творя̀: си́це и҆ соверше́ннагѡ дх҃о́внагѡ ра́зума и҆ ѡ҆чище́нія оѹ҆́мнагѡ кто̀ и҆зучи́тся, не всегда̀ ѡ҆ се́мъ прилѣжа́ніе творя̀;

[в҃] Не потща́выйся кто̀ пройтѝ собо́ю тѣ́сный пу́ть є҆ѵⷢльскій, и҆ ѡ҆ ѡ҆чище́ніи оѹ҆ма̀ вознебре́гъ, а҆́ще и҆ всю̀ внѣ́шнюю му́дрость и҆звы́че, слѣ́пъ є҆́сть душе́ю: писма̀ то́чію оѹ҆бива́тельнагѡ придержи́тся, дх҃а же ѡ҆живля́ющагѡ не пріе́млетъ: и҆ не то́чію и҆нѣ́хъ, но нижѐ себѐ соверше́ннѡ и҆спра́вити мо́жетъ. И҆́нъ бо є҆́сть ра́зумъ мі́ра сегѡ̀, и҆́нъ же є҆́сть дх҃о́венъ: дх҃о́внаго бо ра́зума ѡⷮ прест҃а́гѡ дх҃а оѹ҆чи́шася всѝ ст҃і́и, и҆ просвѣти́шася ꙗ҆́кѡ сл҃нце въ мі́рѣ. Дне́сь же не ѡⷮ дх҃а ст҃а, но ѡⷮ а҆рісто́теля, цицеро́на, платѡ́на, и҆ про́чіихъ ꙗ҆зы́ческихъ любому́дрцєвъ ра́зума оѹ҆ча́тся. Сегѡ̀ ра́ди до конца̀ ѡ҆слѣпо́ша лже́ю, и҆ прельсти́шася ѡⷮ путѝ пра́вагѡ въ ра́зумѣ. Ст҃і́и за́повѣдей хрⷭто́выхъ, и҆ оѹ҆́мнагѡ дѣ́ланія оѹ҆чи́шася: сі́и же то́чію слове́съ и҆зглаго́ланій оѹ҆ча́тся: вну́трь душѝ мра́къ и҆ тма̀, на я҆зы́цѣ же вся̀ и҆́хъ прему́дрость.

[г҃] Не мо́жетъ пра́въ и҆ и҆́стиненъ ра́зумъ, оѹ҆до́бь въ ду́шу бы́ти оѹ҆глубле́нъ, а҆́ще не до́лгимъ вре́менемъ, и҆ ѕѣ́лнымъ трудо́мъ, и҆ по́двигомъ, и҆ та́кѡ по мѣ́рѣ по́двига и҆ труда̀, оѹ҆мерщвля́ются плотскі́я по́хѡти, и҆ по є҆ли́ку оѹ҆мерщвля́ются по́хѡти, по толи́ку процвѣта́етъ и҆ возраста́етъ и҆́стиненъ ра́зумъ. Сугу́багѡ же всѣ̑мъ тре́бѣ є҆́сть по́двига, ꙗ҆́коже внѣ́шнягѡ труда̀, си́це и҆ дѣ́ланія оѹ҆́мнагѡ: є҆ди́нъ бо кромѣ̀ друга́гѡ не соверша́ется.

[д҃] Навы́кнувый кто̀ внѣ́шнія му́дрости, дх҃о́вную же вознебре́гъ, подо́бенъ є҆́сть ѡ҆ є҆ди́номъ ѻ҆́цѣ, и҆лѝ ѡ҆ є҆ди́ной нозѣ̀ су́щему. Внѣ́шняя мі́ра сегѡ̀ му́дрость и҆ тѣле́сный тру́дъ, кромѣ̀ оѹ҆́мнагѡ дѣ́ланія, ꙗ҆́кѡ сосцы̀ су́хи, ꙗ҆́кѡ дре́во неплодови́то, глаго́летъ нѣ́кто. Тогѡ̀ ра́ди не престава́ху ст҃і́и, на є҆ди́номъ внѣ́шнемъ то́чію трудѣ̀ и҆ оѹ҆че́ніи, но потща́шася навы́кнути и҆ вну́треннягѡ, си́рѣчь ѡ҆чище́нія оѹ҆́мнагѡ. А҆́ще бы во внѣ́шнемъ оѹ҆че́ніи то́чію бы́ли оѹ҆чи́лися, въ дх҃о́вномъ же нѝ, не бы́ли бы свя́ти, нижѐ блгⷣть прест҃а́гѡ дх҃а пребыва́ла бы въ душа́хъ и҆́хъ.

[є҃] Всѝ є҆ли́цы внѣ́шнягѡ наказа́нія навы́кше, ѡ҆ дх҃о́вномъ вну́треннемъ дѣ́ланіи, ѡ҆ ѡ҆чище́ніи и҆ просвѣще́ніи ра́зума неради́ша, всеконе́чнѡ ѡ҆безуми́шася, и҆ разврати́шася въ разли́чныя стра̑сти, и҆лѝ въ є҆́рєси поги́бельныя впадо́ша, ꙗ҆́коже а҆́рій, саве́ллій, є҆ѵті́хій, и҆ про́чіи мно́зи, и҆̀же не и҆скуси́ша, ни позна́ша бг҃а и҆мѣ́ти во свое́мъ ра́зумѣ: сегѡ̀ ра́ди предадѐ и҆̀хъ бг҃ъ въ неиску́сенъ оѹ҆́мъ, твори́ти неподѡ́бная, глаго́летъ а҆пⷭлъ (Ри́м. заⷱ п҃а).

[ѕ҃] А҆́ще кто̀ и҆ всю̀ му́дрость мі́ра сегѡ̀ и҆звы́кнетъ, не ѡ҆чи́ститъ же оѹ҆ма̀, нижѐ просвѣти́тся душе́ю, бг҃у соедини́тися не возмо́жетъ. Не соедини́выйся же гдⷭви въ ра́зумѣ дх҃омъ, въ стезя́хъ безвѣ́стныхъ є҆́сть. ѡ҆чища́ется же и҆ просвѣща́ется оѹ҆́мъ сугу́бымъ по́двигомъ, ꙗ҆́коже реко́хъ: хране́ніемъ гдⷭнихъ за́повѣдей, и҆ оѹ҆́мнымъ всегда́шнимъ дѣ́ланіемъ, па́че же всегда́шними те́плыми слеза́ми. И҆на́кѡ бо до просвѣще́нія оѹ҆́мнагѡ никто́же пріитѝ возмо́жетъ.

[з҃] Вся́къ оѹ҆́мъ не дѣ́ланъ, не просвѣще́нъ, не ѡ҆соле́нъ бы́вши со́лію бл҃года́ти прест҃а́гѡ дх҃а, ѡ҆безуми́тся, и҆ разли́чными стра́стными дѣя́нми и҆ помышле́ньми возсмерди́тся. Ра́зумъ бо кому́ждо є҆сте́ственнѡ ѡⷮ гдⷭа всажде́нъ є҆́сть, ѻ҆ба́че не дѣ́лаяй кто̀ и҆́мъ, помрача́ется и҆ потемнѣва́етъ: дѣ́лаяй же оѹ҆ясня́ется, и҆ въ соверше́нное просвѣще́ніе прихо́дитъ.

[и҃] Ꙗ҆́коже и҆ малѣ́йшее ѻ҆троча̀, не тре́буетъ оѹ҆че́нія, тѣле́сныма ѻ҆чи́ма зрѣ́ти свѣ́тъ, (а҆́ще не неду́жно є҆́сть зрѣ́ніемъ) си́це не тре́буетъ кто̀ и҆ внѣ́шнягѡ оѹ҆че́нія ко прему́дрости дх҃о́внѣй, и҆ соедине́нію ра́зумомъ гдⷭви, то́чію ѡ҆чище́нія и҆ просвѣще́нія оѹ҆́мнагѡ. Мно́зи бо не то́чію внѣ́шнягѡ оѹ҆че́нія неиску́сни, но и҆ ѡⷮню́дъ препро́сти бы́вше, прему́дрости дх҃о́вныя оѹ҆́мнымъ дѣ́ланіемъ и҆ хране́ніемъ гдⷭнихъ за́повѣдей научи́шася, и҆ вели́кимъ дарѡ́мъ прича̑стницы бы́ша, ꙗ҆́коже а҆нтѡ́ній, пахѡ́мій, па́ѵелъ препро́стый, и҆ и҆ні́и.

[ѳ҃] Пе́рвѣйшій є҆́сть оѹ҆́мъ па́че оѹ҆че́нія внѣ́шнягѡ и҆ пи́смене. Не бо̀ ѡⷮ пи́смене, и҆ оѹ҆че́нія внѣ́шнягѡ ѡ҆брѣ́теся и҆ возрастѐ оѹ҆́мъ: но ѡⷮ оѹ҆ма̀ вся̑ сія̑ роди́шася и҆ возрасто́ша. Бг҃ъ є҆сте́ственнѡ оѹ҆́мъ кому́ждо дадѐ, внѣ́шнягѡ же оѹ҆че́нія ра́зумъ ѡⷮ человѣ̑къ прибы́сть: тогѡ̀ ра́ди па́че всѣ́хъ, до́лжни є҆смы̀ и҆мѣ́ти тща́ніе ѡ҆ ѡ҆чище́ніи ра́зума. Оѹ҆́мъ ѡ҆чище́нъ и҆ просвѣще́нъ бы́вши, вся̀ внѣ̑шняя и҆ вну̑тренняя разумѣ́ти и҆ востяза́ти мо́жетъ: дх҃о́венъ бо, востязу́етъ оѹ҆́бѡ вся̑, а҆ са́мъ то́й ни ѡⷮ є҆ди́нагѡ востязу́ется, речѐ а҆пⷭлъ (Коⷬ заⷱ рк҃з).

[і҃] Вся́ка же́ртва со́лію ѡ҆соли́тся, речѐ гдⷭь: не ѡ҆солена́ же бы́вши возсмерди́тся (Маⷬ заⷱ м҃в). Си́це и҆ душа̀, є҆́сть сво́йственна бг҃у же́ртва, по ре́кшему: же́ртва бг҃у дх҃ъ сокруше́нъ (ѱало́мъ н҃). не ѡ҆солена́ же бы́вши со́лію блгⷣти прест҃а́гѡ дх҃а, вся́кѡ возсмерди́тся безу́міемъ, и҆ и҆спо́лнится разли́чныхъ страсте́й. А҆́ще и҆ всю̀ му́дрость мі́ра сегѡ̀ кто̀ и҆звы́кнетъ, не ѡ҆соли́тся же со́лію ст҃а́гѡ дх҃а, и҆ не бу́детъ прича́стенъ гдⷭни бл҃года́ти, весьма̀ непотре́бенъ пребу́детъ, ꙗ҆́коже не и҆мѣ́яй въ себѣ̀ начерта́нна ѻ҆́браза црⷭка, внѣ̀ и҆зме́щется черто́га хрⷭто́ва: а҆́ще кто̀, речѐ, дх҃а хрⷭто́ва не и҆́мать, се́й нѣ́сть є҆гѡ̀, глаго́летъ а҆пⷭлъ (Ри́м. заⷱ ч҃ѕ).