Ча́сть а҃

Глава̀ четве́ртая

[Зрѝ оѹ҆каза́ніе глава́мъ]

Ѡ҆ є҆́же дото́ль въ дѣ́ланіи дх҃о́вномъ тру́дъ є҆́сть и҆ по́двигъ, до́ндеже не пріи́детъ кто̀ въ просвѣще́ніе ра́зума.

Внѣ́шній чл҃вѣ́ческій мі́ра сегѡ̀ ра́зумъ, человѣ́ческагѡ внѣ́шнягѡ оѹ҆че́нія тре́буетъ: дх҃о́вный же вну́тренній, не человѣ́ческагѡ, но бж҃е́ственнагѡ оѹ҆че́нія, ѡⷮ сама́гѡ гдⷭа да взыску́етъ. И҆́на даска́лія человѣ́ческая, и҆́на же бж҃ія: ꙗ҆́коже человѣ́къ оѹ҆че́нія человѣ́ческагѡ ѡⷮ человѣ̑къ оѹ҆чи́тся, си́це и҆ ѡⷮ бг҃а бж҃е́ственнагѡ подоба́етъ оѹ҆чи́тися. Не оѹ҆чи́выйся кто̀ ѡⷮ человѣ̑къ человѣ́ческихъ, не мо́жетъ, ꙗ҆́кѡ подоба́етъ, разумѣ́ти человѣ́ческихъ, си́це ни ѡⷮ бг҃а, бж҃іихъ: чрез̾ дѣ́ланіе же оѹ҆́мное, и҆ чрез̾ моли́тву и҆ оѹ҆миле́ніе сле́зное, бж҃е́ственнагѡ ра́зума оѹ҆чи́тся душа̀: ѻ҆ба́че же научи́выйся кто̀ ѡⷮ бг҃а бж҃е́ственныхъ, возмо́жетъ и҆ кромѣ̀ оѹ҆че́нія чл҃вѣ́ческагѡ, разумѣ́ти вся̑ человѣ́чєская: ѡⷮ бг҃а же не оѹ҆чи́выйся бжⷭтвенныхъ, ни ма́лѡ мо́жетъ разумѣ́ти бжⷭтвенныхъ, то́чію плотска̑я человѣ́чєская. Дх҃ъ ст҃ы́й є҆́сть и҆сто́чникъ вся́кія прему́дрости и҆ ра́зума: получи́вый є҆го̀ кто̀, вся̑ вну́трєнняя и҆ внѣ̑шняя разумѣ́ти и҆ позна́ти мо́жетъ.

[в҃] А҆пⷭли не ѡⷮ человѣ̑къ оѹ҆чи́шася и҆нѣ́ми глаго́лати я҆зы́ки, но наше́ствіемъ прест҃а́гѡ дх҃а, внеза́пу разли́чными я҆зы́ки глаго́лаху, ꙗ҆́коже дх҃ъ дая́ше и҆̀мъ (Дѣя́н. заⷱ г҃). И҆ гдⷭь не кни́гу оѹ҆ч҃никѡ́мъ въ науче́ніе разгну̀, но оѹ҆́мъ ѡⷮве́рзе и҆̀мъ разумѣ́ти писа̑нія (Лукѝ заⷱ рд҃і). Сегѡ̀ ра́ди то́чію тща́нія и҆ по́двига со тща́ніемъ потре́ба є҆́сть, да пріи́мемъ и҆ получи́мъ бл҃года́ть. Вся̑, ꙗ҆̀же су́ть на́мъ ключи̑мая, оѹ҆до́бь ѡ҆бря́щемъ, и҆ и҆мѣ́ти бу́демъ, то́чію да прилѣ́жнѡ пече́мся: вся́ко бо оѹ҆че́ніе и҆ вся́ка ве́щь на тща́ніи и҆ на прилѣжа́ніи оѹ҆се́рдномъ залежи́тъ, тща́щійбося вся́кѡ и҆звы́кнетъ. Оѹ҆ча́йся, вся́кѡ навы́кнетъ и҆ научи́тся, ꙗ҆́коже во внѣ́шнемъ, си́це и҆ въ дх҃о́вномъ: не тща́йся же, и҆ попече́нія ѡ҆ се́мъ не творя́й, ничто́же навы́кнути мо́жетъ. Сегѡ̀ ра́ди поѡщря́я и҆ наказу́я на́съ гдⷭь, глаго́летъ: проси́те, и҆ да́стся ва́мъ, и҆щи́те, и҆ ѡ҆бря́щете, толцы́те, и҆ ѡⷮве́рзется ва́мъ. вся́къ бо прося́й пріе́млетъ, и҆ и҆ща́й ѡ҆брѣта́етъ, и҆ толку́щему ѡⷮве́рзется (Матѳ. заⷱ. к҃).

[г҃] Ꙗ҆́коже во внѣ́шнемъ оѹ҆че́ніи, су́ть разли̑чная преспѣ̑янія и҆ степє́ни, си́це и҆ въ дх҃о́вномъ дх҃ѡ́вная: и҆ по мѣ́рѣ тща́тельнагѡ по́двига и҆ преспѣ́янія, подае́тся просвѣще́ніе ра́зума: та́кожде и҆ по мѣ́рѣ просвѣще́нія ра́зума, подае́тся гдⷭня бл҃года́ть: є҆ли́кѡ бо кто̀ наипа́че подвиза́ется, толи́кѡ и҆ преспѣва́етъ, толи́кѡ и҆ просвѣща́ется, толи́кѡ и҆ соединя́ется гдⷭви. Преуспѣ́вый же, и҆ просвѣти́выйся душе́ю, и҆ соедини́выйся ра́зумомъ гдⷭви, спасе́нія своегѡ̀ и҆звѣ́стенъ є҆́сть, и҆ пре́жде воскресе́нія пло́ти, воскре́се душе́ю, и҆ живе́тъ всегда̀ гдⷭви.

[д҃] По є҆ли́ку кто̀ дѣ́лаетъ ра́зумомъ, по толи́ку познава́етъ свою̀ не́мощь, и҆ по є҆ли́ку познава́етъ свою̀ не́мощь, по толи́ку просвѣща́ется въ ра́зумѣ, по толи́ку и҆ преуспѣва́етъ во смире́ніи и҆ оѹ҆миле́ніи. Не позна́етъ же никто́же своея̀ не́мощи, то́чію до́лгимъ вре́менемъ, и҆ мно́гимъ и҆ску́сствомъ, до́ндеже соверше́ннѣ ѡⷮвсю́ду оѹ҆вѣ́сть своѐ неможе́ніе, и҆ са́мою ве́щію позна́етъ, ꙗ҆́кѡ ничто́же ѡⷮ себѐ и҆́мать.

[є҃] Не пе́рвѣе же кто̀ позна́етъ свою̀ не́мощь, до́ндеже не бу́детъ сотре́нъ и҆ сломле́нъ разли́чными и҆скуше́нія попуще́нми: и҆ до́ндеже всѣ́хъ си́хъ на себѣ̀ не и҆ску́ситъ, не мо́жетъ соверше́ннѡ пріитѝ въ позна́ніе себѐ и҆ своея̀ не́мощи, и҆ бы́ти смире́нъ. Сегѡ́ бо ра́ди бг҃ъ свои́хъ рабѡ́въ разли́чными и҆скуше́нми пе́рвѣе и҆скуша́ти ѡ҆бы́че, ꙗ҆́кѡ да позна́вше свою̀ не́мощь, пребу́дутъ всегда̀ смире́нни, ни ма́лѡ на себѐ надѣ́ющеся: зла́то бо и҆ сребро̀ кромѣ̀ и҆скуше́нія и҆ разжиза́нія не соверша́ется.

[ѕ҃] Ꙗ҆́коже бы́ліе, глаго́лемое ле́нъ и҆лѝ ко́нопль, а҆́ще не бу́дутъ сотре́нна и҆ сломле́нна въ древя́ныхъ на то̀ оѹ҆чине́нныхъ ѻ҆ру́діяхъ, ничто́же содѣ́яти ѡⷮ ни́хъ кто̀ мо́жетъ: ни ве́рви, ни ни́ти, ни платна̀, ни и҆́нагѡ ко́егѡлибо дѣ́ла въ тре́бованіе: си́це и҆ душа̀ не сотрена̀, и҆ не оѹ҆мягчена̀ разли́чными и҆скуше́нми, не возмо́жетъ пріитѝ въ соверше́нное своея̀ не́мощи позна́ніе и҆ смире́ніе. Сія̑ же вся̑ мно́гагѡ труда̀ и҆ по́двига тре́буютъ, и҆ оѹ҆́мнагѡ всегда́шнягѡ дѣ́ланія, до́ндеже кто̀ позна́етъ сама́го себѐ и҆ свою̀ не́мощь, и҆ пребу́детъ всегда̀ смиря́яйся.

[з҃] Сіѐ тру́дъ є҆́сть предо мно́ю, до́ндеже вни́ду въ ст҃и́лище бж҃іе, глаго́летъ прⷪро́къ (ѱало́мъ ѻ҃в). Дото́лѣ бо тру́дъ, дото́лѣ по́двигъ, доне́лѣже не про́зриши, доне́лѣже въ соверше́нное позна́ніе себѐ не пріи́деши, доне́лѣ любо́вію себѐ съ бг҃омъ не соедини́ши. Є҆гда́ же себѐ позна́еши, є҆гда̀ любо́вію бг҃у соверше́ннѡ соедини́шися, тогда̀ ни є҆ди́нагѡ по́двига и҆ труда̀ и҆мѣ́ти бу́деши, тогда̀ въ поко́и, ра́дости же и҆ весе́ліи всегда́шнемъ ѡ҆бря́щешися.

[и҃] Дото́лѣ тру́дъ є҆́сть слѣпо́му, до́ндеже не про́зритъ: дото́лѣ болѣ́знь неду́гующему, до́ндеже не ѡ҆здра́вѣетъ: дото́лѣ ну́жда оѹ҆ча́щемуся, до́ндеже не навы́кнетъ: є҆гда́ же до́брѣ навы́кнетъ, никоегѡ́же труда̀ и҆́мать. Что́ бо за тру́дъ є҆́сть зря́щему, до́брѣ зрѣ́ти свѣ́тъ; Что̀ за тру́дъ є҆́сть позна́вшему себѐ, позна́вшему бг҃а, зна́ти вся̑ су̑щая; Что̀ за тру́дъ є҆́сть и҆ по́двигъ лю́бящему, люби́ти люби́маго; Нико́егѡже: но па́че вся̑ є҆му̀ ра́дѡстна, и҆ жела́тєльна су́ть. Бы́вый кто̀ слѣ́пъ, и҆ прозрѣ́вый, гнуша́ется ктому̀ слѣпоты̀, нижѐ и҆́мать труда̀ въ зрѣ́ніи, но па́че ра́достнѡ наслажда́ется свѣ́та: позна́вый и҆ просвѣти́выйся въ ра́зумѣ, гнуша́ется безу́мія: стяжа́вый кто̀ бога́тство, не ктому̀ хо́щетъ бы́ти оѹ҆бо́гъ.

[ѳ҃] Премѣни́вый безслове́сіе на позна́ніе и҆ просвѣще́ніе ра́зума, ꙗ҆́рость и҆ гнѣ́въ претвори́вый на кро́тость, сла́сть и҆ по́хоть плотску́ю безслове́сную на бжⷭтвенное жела́ніе и҆ любо́вь, въ ми́рѣ и҆ поко́и бу́деши, въ ра́дости и҆ тишинѣ̀ всегда̀ ѡ҆бря́щешися. Тогда̀ трича́стное душѝ во глубинѣ̀ безстра́стія, и҆ просвѣще́нія ра́зума потопле́но ви́дѣвши, ꙗ҆́кѡ въ тѷмпа́нѣ во оѹ҆мерщвле́нномъ тѣлесѝ воспое́ши дх҃омъ ра́дуяся гдⷭви, побѣ́дное воспѣва́ніе.

[і҃] Дото́лѣ не мо́жеши бы́ти без̾ ско́рби, дото́лѣ не мо́жеши бы́ти без̾ печа́ли, дото́лѣ не мо́жеши бы́ти без̾ стра́ха и҆ боя́зни, доне́лѣ себѐ соверше́ннѡ не позна́еши: доне́лѣ соверше́ннѡ не вски́снетъ трича́стное душѝ въ позна́ніи и҆ просвѣще́ніи ра́зума, и҆ ѡ҆чище́ніи страсте́й, доне́лѣ съ бг҃омъ не примире́нъ бу́деши, доне́лъ съ ни́мъ во є҆ди́нъ ду́хъ не соедини́шися. Є҆гда́ же соедини́шися. и҆ є҆гда̀ є҆го̀ всѣ́мъ се́рдцемъ возлю́биши, тогда̀ без̾ боя́зни и҆ печа́ли всегда̀ бу́деши: ѡ҆ бз҃ѣ є҆ди́номъ бу́деши ду́хомъ всегда̀ ра́дуяся и҆ веселя́ся во вѣ́ки вѣ́чныя.