Ча́сть а҃

Глава̀ пя́тая

Ѡ҆ є҆́же во все́мъ послѣ́довати ра́зуму, и҆ разсужде́нію, не́же безслове́сной пло́ти.

Пред̾ всѣ́ми вещмѝ и҆ во всѣ́хъ ве́щехъ да предваря́етъ и҆ предхо́дитъ пред̾ тобо́ю всегда̀ пра́въ ра́зумъ, и҆ разсужде́ніе: и҆ никогда́же ни въ че́мъ прельсти́шися, но па́че всѣ́хъ пре́лестей превы́шше бу́деши. ꙗ҆́коже внѣ̑шнія вся̑ вє́щи не мо́гутъ бы́ти зри̑мы, то́чію ѻ҆чи́ма, си́це нижѐ вну̑тренняя дх҃ѡ́вная мо́гутъ бы́ти разумѣ̑нна, то́чію ра́зумомъ и҆ оѹ҆́мнымъ разсмотре́ніемъ.

[в҃] Да не начина́еши, нижѐ что̀ когда̀ дѣ́еши, до́ндеже бг҃у моли́твою соединя́яйся, разсу́диши: ничто́же бо си́це во всѣ́хъ ве́щехъ непреткнове́нна, и҆ непоползнове́нна человѣ́ка твори́ти ѡ҆бы́че, ꙗ҆́коже пра́въ ра́зумъ и҆ разсужде́ніе. Да смы́слиши ѡ҆ всѣ́хъ, ꙗ҆̀же а҆́ще дѣ́еши, речѐ ко і҆ису́су наѵі́ну гдⷭь (І҆исуⷭ Наѵⷩ. глⷡа а҃).

[г҃] Ꙗ҆́коже не безбѣ́днѡ слѣпы́й ше́ствуетъ, си́це нижѐ безу́мный что̀ твори́тъ бла́го: сегѡ̀ ра́ди не повину́йся плотстѣ́й по́хоти и҆ жела́нію, но то́чію во всѣ́хъ ве́щехъ ра́зуму и҆ разсужде́нію всегда̀ послѣ́дуй.

[д҃] Пе́рвѣйшая вина̀ бы́сть а҆да́млю паде́нію, ꙗ҆́коже реко́хъ, безу́міе: а҆́ще бы предразсуди́лъ себѣ̀ заповѣ́даніе, а҆́ще бы послѣ́довалъ ра́зуму, не бы̀ преслу́шалъ, не бы̀ вкуше́ніемъ дре́ва заповѣ́даннагѡ прельсти́лся.

[є҃] Никто́же мо́жетъ па́сти, и҆ согрѣши́ти, ра́зуму и҆ разсужде́нію послѣ́дуя: нижѐ содѣ́яти что̀ бла́го, не и҆мѣ́яй пра́вагѡ ра́зума. Ꙗ҆́коже нача́ло и҆ ко́рень вся́кому грѣху̀ безу́міе є҆́сть, и҆ безслове́сное себѐ непозна́ніе, си́це и҆ нача́ло вся́кому бла́гу пра́въ ра́зумъ и҆ разсужде́ніе.

[ѕ҃] Слѣпы́й внѣ́шнима ѻ҆чи́ма во всѣ́хъ стезя́хъ свои́хъ мно́гажды и҆ разли́чнѡ претыка́ется, си́це и҆ не и҆мѣ́яй пра́вагѡ ра́зума, нижѐ слѣ́дуя разсужде́нію, во тмѣ̀ неразу́мія и҆ грѣха̀ всегда̀ ше́ствуетъ, позна́вый же себѐ, и҆ зря́й мы́сленный свѣ́тъ, всегда̀ во все́мъ непреткнове́нъ є҆́сть.

[з҃] Что́ є҆сть грѣ́хъ; то́чію плотскі́я по́хоти дѣ́йствіе. плотскі́я же по́хоти дѣ́йствіе, что́ є҆сть; Ничто́же и҆́но, то́чію безу́міе: и҆ никто́же согрѣшѝ, то́чію въ безу́міи и҆ неразсужде́ніи: нижѐ содѣ́етъ что̀ бла́го, то́чію въ ра́зумѣ: нижѐ что̀ ѕло́е, а҆́ще не въ безу́міи.

[и҃] Вся́кагѡ грѣха̀ всегда̀ предваря́етъ безу́міе, добродѣ̑тели же и҆ благодѣя̑нія ра́зумъ, не да́руетъ никогда́же безу́міе человѣ́ку поко́я, нижѐ соверше́ннагѡ оѹ҆тѣше́нія, а҆́ще не са́мъ ра́зумъ оѹ҆поко́итъ, и҆ просвѣще́ніемъ свои́мъ оѹ҆тѣ́шитъ ду́шу. Ꙗ҆́коже бо слѣпо́му не мо́щно и҆мѣ́ти поко́я, доне́длѣ не зри́тъ свѣ́та, си́це ни безу́мному, до́ндеже не пріи́детъ въ ра́зумъ.

[ѳ҃] Тѣ́мже па́че всѣ́хъ добродѣ́телей да предпочте́ни бу́дутъ, ра́зумъ и҆ разсужде́ніе: се́ бо є҆́сть нача́ло и҆ вина̀ всему̀ благо́му. ни бо̀ добродѣ́тель добродѣ́телію, ꙗ҆́кѡ подоба́етъ, бы́ти мо́жетъ, а҆́ще разсужде́ніе и҆ ра́зумъ спомога́теленъ и҆ предводи́теленъ дѣ́лу не бу́детъ.

[і҃] Ꙗ҆́коже всѣ́хъ є҆сте́ственныхъ чу́вствъ, честнѣ́йшее и҆ ра́достнѣйшее є҆́сть въ ви́димыхъ зрѣ́ніе, си́це и҆ въ мы́сленныхъ разумѣва́емыхъ, честнѣ́йшій и҆ оѹ҆тѣ́шнѣйшій є҆́сть ра́зумъ, и҆ всѣ́хъ веще́й позна́ніе: се́ бо є҆́сть и҆ живо́тъ вѣ́чный, се́ же и҆ ѡⷮпаде́ніе, и҆ прія́тіе томле́нія.