Приидите поклонимся: Трижды.
Таже час четвертый нощи.
Псалом Давидов 101
Го́споди, услы́ши моли́тву мою́, и вопль мой к Тебе́ да прии́дет. Не отврати́ лица́ Твоего́ от мене́: во́ньже а́ще день скорблю́, приклони́ ко мне у́хо Твое́: во́ньже а́ще день призову́ Тя, ско́ро услы́ши мя. Я́ко исчезо́ша я́ко дым дни́е мои́, и ко́сти моя́ я́ко суши́ло сосхо́шася. Уя́звен бых я́ко трава́, и и́зсше се́рдце мое́, я́ко забы́х сне́сти хлеб мой. От гла́са воздыха́ния моего́ прильпе́ кость моя́ пло́ти мое́й. Уподо́бихся нея́сыти пусты́нней, бых я́ко нощны́й вран на ны́рищи. Бдех и бых я́ко пти́ца осо́бящаяся на зде. Весь день поноша́ху ми врази́ мои́, и хва́лящии мя мно́ю кленя́хуся. Зане́ пе́пел я́ко хлеб ядя́х, и питие́ мое́ с пла́чем растворя́х. От лица́ гне́ва Твоего́ и я́рости Твоея́: я́ко возне́с низве́ргл мя еси́. Дни́е мои́ я́ко сень уклони́шася, и аз я́ко се́но изсхо́х. Ты же, Го́споди, во век пребыва́еши, и па́мять Твоя́ в род и род. Ты воскре́с уще́дриши Сио́на, я́ко вре́мя уще́дрити eго́, я́ко прии́де вре́мя. Я́ко благоволи́ша раби́ Твои́ ка́мение eго́, и персть eго́ уще́дрят. И убоя́тся язы́цы и́мене Госпо́дня, и вси ца́рие зе́мстии сла́вы Твоея́. Я́ко сози́ждет Госпо́дь Сио́на, и яви́тся во сла́ве Свое́й. Призре́ на моли́тву смире́нных, и не уничижи́ моле́ния их. Да напи́шется сие́ в род ин, и лю́дие зи́ждемии восхва́лят Го́спода. Я́ко прини́че с высоты́ святы́я Своея́, Госпо́дь с небесе́ на зе́млю призре́, услы́шати воздыха́ние окова́нных, разреши́ти сы́ны умерщвле́нных, возвести́ти в Сио́не и́мя Госпо́дне, и хвалу́ Его́ во Иерусали́ме. Внегда́ собра́тися лю́дем вку́пе, и царе́м, е́же рабо́тати Го́сподеви. Отвеща́ eму́ на пути́ кре́пости eго́: умале́ние дней мои́х возвести́ ми. Не возведи́ мене́ в преполове́ние дней мои́х: в ро́де родо́в ле́та Твоя́. В нача́лех Ты, Го́споди, зе́млю основа́л еси́, и дела́ руку́ Твое́ю суть небеса́. Та поги́бнут, Ты же пребыва́еши: и вся, я́ко ри́за обетша́ют, и я́ко оде́жду свие́ши я́ и изменя́тся. Ты же то́йжде еси́, и ле́та Твоя́ не оскуде́ют. Сы́нове раб Твои́х вселя́тся, и се́мя их во век испра́вится.
Молитва Манасиина, царя жидовска (дается также по современному изданию в Часослове):
Го́споди Вседержи́телю, Бо́же отец на́ших, Авраа́мов, и Исаа́ков, и Иа́ковль, и се́мене их пра́веднаго: сотвори́вый не́бо и зе́млю со все́ю ле́потою их, связа́вый мо́ре сло́вом повеле́ния Твоего́, заключи́вый бе́здну, и запеча́тствовавый ю́ стра́шным и сла́вным и́менем Твои́м, его́же вся боя́тся, и трепе́щут от лица́ си́лы Твоея́, я́ко никто́же постои́т пред великоле́пием сла́вы Твоея́, и нестерпи́мь гнев, е́же на гре́шники преще́ния Твоего́. Безме́рна же и неизсле́дованна ми́лость обеща́ния Твоего́: Ты бо еси́ Госпо́дь Вы́шний, благоутро́бен, долготерпели́в и многоми́лостив, и ка́яйся о зло́бах челове́ческих. Ты Го́споди, по мно́жеству бла́гости Твоея́, обеща́л еси́ покая́ние и оставле́ние согреши́вшим Тебе́, и мно́жеством щедро́т Твои́х, определи́л еси́ покая́ние гре́шником во спасе́ние. Ты у́бо Го́споди Бо́же сил, не положи́л еси́ покая́ние пра́ведным, Авраа́му и Исаа́ку и Иа́кову, не согреши́вшим Тебе́. Но положи́л еси́ покая́ние на мне, гре́шнем: зане́ согреши́х па́че числа́ песка́ морска́го. Умно́жишася беззако́ния моя́, Го́споди, умно́жишася беззако́ния моя́: и несмь досто́ин воззре́ти, и ви́дети высоту́ небе́сную от мно́жества непра́вд мои́х. Сля́чен есмь мно́гими у́зами желе́зными, во е́же не возвести́ главы́ моея́, и несть ми ослабле́ния: зане́ прогне́вах я́рость Твою́, и лука́вое пред Тобо́ю сотвори́х, не сотвори́вый во́ли Твоея́, и не сохрани́вый повеле́ний Твои́х. И ны́не приклоня́ю коле́на се́рдца, тре́буя от Тебе́ бла́гости. Согреши́х, Го́споди, согреши́х, и беззако́ния моя́ аз вем, но прошу́ моля́ся, осла́би ми, Го́споди, осла́би ми, и не погуби́ мене́ со беззако́ньми мои́ми. Ниже́ в век враждова́в соблюде́ши зол мои́х, ниже́ осу́диши мя в преиспо́дних земли́. Зане́ Ты еси́ Бо́же, Бог ка́ющихся, и на мне яви́ши всю бла́гость Твою́, я́ко недосто́йна су́ща спасе́ши мя, по мно́зей ми́лости Твое́й, и восхвалю́ Тя вы́ну во днех живота́ моего́, я́ко Тя пое́т вся си́ла небе́сная, и Твоя́ есть сла́ва во ве́ки веко́в, ами́нь. Таже: Помилуй мя Боже по велицей милости Твоей: Таже Трисвятое по Отче наш: Таже тропарь во глас 8:
Оком милосердым Господи виждь мое смирение, яко помалу жизнь моя кончается, и от дел несть ми спасения. Темже молю Тя, оком милосердым, Господи, виждь мое смирение и спаси мя. Слава: Век мой скочнавается, и страшный престол готовится. Житие мимоходит, суд предстоит, претя ми огненою мукою и пламенем негасимым. Сле тучу посли ми, хотяй спастися всем человеком. И ныне: Рождейся нас ради от Девы, распятие пострадав: Таже молитва четвертаго часа: Господи, видиши беду мою, принуди мя Господи, любо хощу, любо не хощу, спаси мя. Аз бо яко берние грех люблю, но Ты яко Бог возбрани ми яко силен. Аще бо праведника спасеши, токмо ничтоже велие. Аще ли чиста помилуеши, то ничтоже дивно. Но на мне Владыко недостойнем и грешнем и скверненем, удиви милсоть Свою, о сем яви человеколюбие Свое, яко Тебе оставлен есть нищий.
Слава в вышних Богу и на земли мир, в человецех: Таже: Господи прибежище бысть нам в род и род. И: Сподби Господи [в] сию нощь без греха: Таже: Покаяния наставшаго гласа: (Зри далее) Таже Трисвятое по Отче наш. И тропарь, глас 1: Спаси Господи, люди Твоя, и благослови достояние Свое, победу князю нашему на супостаты даруя, и Своя сохраняя крестом люди. Глас 1 В Рождестве девство сохранила еси, во успении всего мира не остави Богородице. Преставибося к животу, Мати сущи Животу, молитвами Твоими избавляющи от смерти душа наша. Глас 4. Небесных вой воеводо, молимтися ныне недостойнии, да твоими молитвами покрыеши ны кровом крилу твоею, безплотныя ти славы. Сохраняеми припадающе, прилежно ти вопием: от бед избави нас, сый чиноначальник вышним силам. Покаянию быв великий проповедатель Крестителю, покаятимися от души молютися Предтече, яко да отложив душевную скверну, рад явлюся Судии всех. тобою роди огненаго и вечнаго избуду мучения. Глас 4 Иже апостолом первопрестольницы, сей вселеней учители, Владыку всех умолите, мир вселеней даровати и душам нашим велию милость. Боже отец наших творяй присно с нами по Твоему смотрению, не отстави милости твоея от нас, но молитвами их в мире устрой живот наш. Апостоле Христу Богу возлюблене, потщися избавити люди без ответа, приемлет бот я припадающа, приимый тя на перси возлегша, Егоже молит Богослое облак поганский разоряя, прося нам мира и велия милости. Честное пророка Твоего торжество небо церкви показася, ангели с человеки ликуют. Тех молитвами, Христе Боже, в мире устрой живот наш, да поем Ти: Аллилуия. Страстьми святых яже по Тебе прияша умолен буди Господи, вся болезни и страсти наша исцели, Человеколюбче, молимтися. Глас 4 Исправление вере, образ кротоести, пощению наставника, яви тя людем Своим, дянии ти истина, сего ради стяжав смирением высокая, а убожеством богатая, отче Николае, моли Христа Бога, да спасет душа наша. Глас 1 Терпению столп бысть, ревновав отцем, Иову во страстех Иосифу в напастех, безплотных слуг житие имый в телеси, отче преподобне Симеоне, моли Христа Бога, да спасет душа наша. Правоверию наставниче, благочестия учителю чистоте, вселеней проповедателю, иереем богодуховное удобрение, отче наш Феодоре, премудрый учителю, учении своими вся просветил еси, цевнице духовная, моли Христа Бога, да спасет душа наша. Глас 8 Слез твоих течением источники, пустыни безщадная возделали есте, из глубины воздыхания, во сто труды разплодили есте, и бысть светильницы вселеней, сияюще чудесы, отцы наши преподобнии, блажении, Антоние, Ларионе, Еуфимие, Саво, Арсение, Феодоре, Феодосие печерскый и вси святии молите Христа Бога, да спасет душа наша. Помяни Господи яко Благ рабы Своя, елико в житии сем согрешиша отдаждь им, никтоже бо без греха, токмо Ты Един, Всемогий, преставльшимся от нас даси им покой. И ныне: Тя град и станище имамы молитву благоприятну, к рождшемуся из Тебе Богу Богородице, безмужная верным спасение. Таже молитва: Даждь нм Владыко на сон грядущим, покой телу и сохрани ны от мрачныя тмы греховныя, избави ны от всякия скверны плоти и духа, даждь нам святыню творити во страсе Твоем, избави ны от всего темнаго нощнаго сластолюбия, устави стремление страстей, угаси телесное раждежение, плотная востания упраздни, телесныя страсти и мудрование плотное успи, даждь нам Господи бодр ум и целомудрен помысл трезвящься, ложе покойно и постелю тиху, да неприяти будем тяжким сном, но воздвигни ны на нощное пение, и на утреняя служения Твоя, и всенощное нам славословие Твое даруй, хвалити и пети и кланятися и пресвятому и велелепному имени Твоему, Отцу и Сыну и Святому Духу, и ныне, [и присно, и во веки веков. Аминь.] Молитва святаго Евстратия: Величая, возвеличу Тя Господи Боже мой, яко призрел еси на смирение мое, и неси мене затворил в руках вражиих, но спасл еси от бед душу мою, и ныне покрый мя рукою Твоею, да приидет на мя милость Твоя, Господи, зане болезнена ми есть душа моя, и смятеся разумных ради и неразумных бывших ми грехов. Милостив же буди мне грешному, и да не узрит душа моя омраченаго лица лукавных бесов, внегда разлучитися ей от тела, и да не срящет ея рука князь тмы века сего, ниже приимет ея лукавный свет противнаго, но да приимут ю ангели Твои светлии, и даждь славу имени Твоему святому, и Твоею силою, возведи мя на божественый суд. И внегда осуждену ми быти, да не рука князя мира сего постигнет мя, исторгнут имя во глубину адову, но предстани ми и буди ми Спас и Заступник, плотския бо си муки велия уть рабом твоим. Таже се глаголи трижды: Господи, помилуй оскверншуся страстьми жития сего душу мою, и чисту приими ю, яко благословен еси во веки. Аминь. Таже молитва за вся христианы: Владыко, Господи Боже наш, приклони ухо Твое ко мне, услышим я припадающа имени Твоему, о всем и всяческих вонми ми, и вопию к державе Твоей, власти и силе. Молю Тя, Господи Боже мой, даром божественым внимай мне, услыши моего худаго моления, помилуй Господи вся плавающая по воде и впуть ходящая и труждающаяся пленники, спасению их промысл сотвори. Помяни Господи вдовицы и сироты, странствующая, алчущая, милостию Твоею божественою. Помяни Господи сущая в темницах, и во узах, и в бедах и в плачи, во стужениих всех, и вболезнех тяжцех одержимых. Великая Твоя милость, да ны окружит Человеколюбче. Помяни Господи скорбящих и душевне болящих, и язвляемых лукавными стрелами греховными. Помяни Господи мучащихся и в тесноте пребывающих, иже в бедах и в напастех страждущих. Излей каплю сладости на сердца их, да от Святаго и Животворящаго Духа, да наслаждаеми и насыщаеми славят Твою благостыню. Да не в хле истлеют. Тобою видехом благоухание Твое подаемое воистину терпящим Тя. Помяни Господи в трудех и в болезнех, в напастех и в бедах, во утешениих самовольных. Помяни Господи митрополиты, архиепсикопы, и епископы, и епископа нашего имярек, иереи идиаконы, четца и певца, и всякого чина церковнаго, черноризца, и черноризиц. Тех молитвами вниди в сердце мое, недостойнаго раба Твоего имярек, Милостиве, прости множество согрешений. Помяни Господи рабы Своя, игумены, и игумена нашего имярек, ив сех яже о Христе братию. Помяни Господи сущая в пустынях, в горах и в пещерх, и впропастех земных, и всякого честнаго образа и честных черноризец, молитвами их помяни мя Владыко. Помяни Господи преставленыя к Тебе рабы Своя имярек, верою и упованием. Облегчи тяготу окаянных и не приимших таин Твоих. Помяни Господи цари и князи, и князя нашего имярек, до скончания века. Аминь. Помяни Гоподи мирскую братию нашу имярек, о здравии, о спасении. Приими Господи молитвою мою, недостойнаго раба Твоего имярек, молящагося Тебе Владыце. И услыши нас Господи Боже наш, недостойных раб Своих молящихтися о всех и за вся. Когождо во своем чину благочестне славящих Тебе, Истиннаго Бога, всяческим Содетеля. Излей на ны великую Твою милость и щедрот Твоих не отъими от нас, и страх Твой в серцда наша и разум истины Твоея. И остави нам всяка согрешения. И исцели болезни души и телес, и покой Господи отца духовныя и создателя места сего, на месте радости, и братию нашу отшедшую, силою и властию божественою. Вся ны неосужденно предстати сподоби страшному суду Твоему. Тебе бо есть миловати и спасати нас, Господи Боже наш, и Тебе славу восылаем, Отцу и Сыну и Святому Духу, [ныне и присно и во веки веков. Аминь.].