Чин како подобет пети нощныя часы.

Сице почни:

Господи Иисусе Христе Боже наш помилуй нас.

Царю небесный: Таже молитву сию:

Господи Иисусе Христе Сыне Бога Живаго, Имже вся створена суть, без неже милости никтоже не может терпети, не презри слабости человеча. Ты Милостивый Господи, приими сия псалмы, яже пою за мя аз раб Твой имярек и даждь ми Господи о прежде бывших ми грехов моих милость. И от будущих отпущение6 и всяк зол обычай отжени от мене. И вся скверны греховныя, имиже и еще негоден есмь. От сердца и от утробы потреби. И даждь ми Господи силу на добро дело и твердостояние в добрых делех души пребыати, и псети уже порабощая жизни душу мою. И к животу вечному приведи. Аминь.

Приидите, поклонимся: Трижды

Час первый нощи. Псалом 26

Госпо́дь просвеще́ние мое́ и Спаси́тель мой, кого́ убою́ся? Госпо́дь Защи́титель живота́ моего́, от кого́ устрашу́ся? Внегда́ приближа́тися на мя зло́бующым, е́же сне́сти пло́ти моя́, оскорбля́ющии мя, и врази́ мои́, ти́и изнемо́гоша и падо́ша. А́ще ополчи́тся на мя полк, не убои́тся се́рдце мое́, а́ще воста́нет на мя брань, на Него́ аз упова́ю. Еди́но проси́х от Го́спода, то взыщу́: е́же жи́ти ми в дому́ Госпо́дни вся дни живота́ моего́, зре́ти ми красоту́ Госпо́дню и посеща́ти храм святы́й Его́. Я́ко скры мя в селе́нии Свое́м в день зол мои́х, покры́ мя в та́йне селе́ния Своего́, на ка́мень вознесе́ мя. И ны́не се вознесе́ главу́ мою́, на враги́ моя́: обыдо́х и пожро́х в селе́нии Его́ же́ртву хвале́ния и воскликнове́ния, пою́ и воспою́ Го́сподеви. Тебе́ рече́ се́рдце мое́, Го́спода взыщу́. Взыска́ Тебе́ лице́ мое́, лица́ Твоего́, Го́споди, взыщу́. Не отврати́ лица́ Твоего́ от мене́ и не уклони́ся гне́вом от раба́ Твоего́: помо́щник мой бу́ди, не отри́ни мене́, и не оста́ви мене́, Бо́же Спаси́телю мой. Я́ко оте́ц мой и ма́ти моя́ оста́виста мя, Госпо́дь же восприя́т мя. Законоположи́ ми, Го́споди, в пути́ Твое́м и наста́ви мя на стезю́ пра́вую враг мои́х ра́ди. Не преда́ждь мене́ в ду́шы стужа́ющих ми, я́ко воста́ша на мя свиде́теле непра́веднии и солга́ непра́вда себе́. Ве́рую ви́дети блага́я Госпо́дня на земли́ живы́х. Потерпи́ Го́спода, мужа́йся и да крепи́тся се́рдце твое́, и потерпи́ Го́спода.

Псалом 31

Блаже́ни, и́хже оста́вишася беззако́ния и и́хже прикры́шася греси́. Блаже́н муж, eму́же не вмени́т Госпо́дь греха́, ниже́ есть во усте́х eго́ лесть. Я́ко умолча́х, обетша́ша ко́сти моя́, от е́же зва́ти ми весь день. Я́ко день и нощь отяготе́ на мне рука́ Твоя́, возврати́хся на страсть, егда́ унзе́ ми терн. Беззако́ние мое́ позна́х и греха́ моего́ не покры́х, рех: испове́м на мя беззако́ние мое́ Го́сподеви, и Ты оста́вил еси́ нече́стие се́рдца моего́. За то помо́лится к Тебе́ всяк преподо́бный во вре́мя благопотре́бно: оба́че в пото́пе вод мно́гих к нему́ не прибли́жатся. Ты еси́ прибе́жище мое́ от ско́рби обдержа́щия мя: ра́досте моя́, изба́ви мя от обыше́дших мя. Вразумлю́ тя и наста́влю тя на путь сей, во́ньже по́йдеши, утвержу́ на тя о́чи Мои́. Не бу́дите я́ко конь и меск, и́мже несть ра́зума: брозда́ми и уздо́ю че́люсти их востя́гнеши, не приближа́ющихся к тебе́. Мно́ги ра́ны гре́шному, упова́ющаго же на Го́спода ми́лость обы́дет. Весели́теся о Го́споде, и ра́дуйтеся, пра́веднии, и хвали́теся, вси пра́вии се́рдцем.

Псалом 56

Поми́луй мя, Бо́же, поми́луй мя, я́ко на Тя упова́ душа́ моя́, и на сень крилу́ Твое́ю наде́юся, до́ндеже пре́йдет беззако́ние. Воззову́ к Бо́гу Вы́шнему, Бо́гу, благоде́явшему мне. Посла́ с небесе́ и спасе́ мя, даде́ в поноше́ние попира́ющыя мя, посла́ Бог ми́лость Свою́ и и́стину Свою́, и изба́ви ду́шу мою́ от среды́ ски́мнов. Поспа́х смуще́н, сы́нове челове́честии, зу́бы их ору́жия и стре́лы, и язы́к их меч остр. Вознеси́ся на небеса́, Бо́же, и по всей земли́ сла́ва Твоя́. Сеть угото́ваша нога́м мои́м и сляко́ша ду́шу мою́, ископа́ша пред лице́м мои́м я́му и впадо́ша в ню. Гото́во се́рдце мое́, Бо́же, гото́во се́рдце мое́, воспою́ и пою́ во сла́ве мое́й. Воста́ни сла́ва моя́, воста́ни псалти́рю и гу́сли, воста́ну ра́но. Испове́мся Тебе́ в лю́дех, Го́споди, воспою́ Тебе́ во язы́цех, я́ко возвели́чися до небе́с ми́лость Твоя́, и да́же до о́блак и́стина Твоя́. Вознеси́ся на небеса́, Бо́же, и по всей земли́ сла́ва Твоя́.

Трисвятое по Отче наш:

Таже тропарь, глас 1

Объятия отча отверсти ми потщи блудно мое иждих житие, на богатство неизготоваемое взираю щедрот Твоих Спасе, ныне обнищавша не презри сердца, Тебе бо Господи покаянием вопию: Сгреших Отче на небо и пред Тобою.

Егда приидеши Боже на землю со славою и трепещут всяческая, река же огнена пред судищем течет. И книги разгибаются, и тайная обличаются. Тогда избави мя от огня негасимаго и сподобим я одесную Тебе, Судий праведный.

Матерь Тя Божию молим вси Деву во истину, в щедроты Твоя вопием. Любовию прибегающе во твою благодать. Тя бо имамы грешнии Заступницу. И тебе стяжахм в напастех спасение, Едину Непорочную.

[Таже молитву:]

Господи Боже нш, Отче истиннаго Света, Иже день украсив небесным светом и нощь просветивый зарями огнеными, и будущаго века покой уготова любящим Тя. И животным не престающим светом просвети наша сердца в разум истинный, без поткновения соблюди жиовт наш, подая нам яко во дне благообразно ходити и славити всечестное и велелепое имя Твое, Отц и Сына и Святаго Духа и ныне и присно [и во веки веков. Аминь.]

Господи помилуй, 30

[Приидите поклонимся: Трижды. Таже вторый час нощи.]