Прииди́те, поклони́мся Царе́ви на́шему Бо́гу.

Прииди́те, поклони́мся: (Трижды)

Псалом 5:

Глаго́лы моя́ внуши́, Го́споди, разуме́й зва́ние мое́. Вонми́ гла́су моле́ния моего́, Царю́ мой и Бо́же мой, я́ко к Тебе́ помолю́ся, Го́споди. Зау́тра услы́ши глас мой, зау́тра предста́ну Ти, и у́зриши мя. Я́ко Бог не хотя́й беззако́ния, Ты еси́: не присели́тся к Тебе́ лука́внуяй, ниже́ пребу́дут беззако́нницы пред очи́ма Твои́ма: возненави́дел еси́ вся де́лающыя беззако́ние. Погуби́ши вся глаго́лющыя лжу: му́жа крове́й и льсти́ва гнуша́ется Госпо́дь. Аз же мно́жеством ми́лости Твоея́, вни́ду в дом Твой, поклоню́ся ко хра́му свято́му Твоему́, в стра́се Твое́м. Го́споди, наста́ви мя пра́вдою Твое́ю, враг мои́х ра́ди испра́ви пред Тобо́ю путь мой. Я́ко несть во усте́х их и́стины, се́рдце их су́етно, гроб отве́рст горта́нь их: язы́ки свои́ми льща́ху. Суди́ им, Бо́же, да отпаду́т от мы́слей свои́х, по мно́жеству нече́стия их изри́ни я́, я́ко преогорчи́ша Тя, Го́споди. И да возвеселя́тся вси упова́ющии на Тя, во век возра́дуются, и всели́шися в них, и похва́лятся о Тебе́ лю́бящии и́мя Твое́. Я́ко Ты благослови́ши пра́ведника, Го́споди: я́ко ору́жием благоволе́ния венча́л еси́ нас.

Псалом 89:

Го́споди, прибе́жище был еси́ нам в род и род. Пре́жде да́же гора́м не бы́ти и созда́тися земли́ и вселе́нней, и от ве́ка и до ве́ка Ты еси́. Не отврати́ челове́ка во смире́ние, и рекл еси́: обрати́теся, сы́нове челове́честии. Я́ко ты́сяща лет пред очи́ма Твои́ма, Го́споди, я́ко день вчера́шний, и́же мимои́де, и стра́жа нощна́я. Уничиже́ния их ле́та бу́дут. Утро я́ко трава́ мимои́дет, у́тро процвете́т и пре́йдет: на ве́чер отпаде́т ожесте́ет и и́зсхнет. Я́ко исчезо́хом гне́вом Твои́м, и я́ростию Твое́ю смути́хомся. Положи́л еси́ беззако́ния на́ша пред Тобо́ю: век наш в просвеще́ние лица́ Твоего́. Я́ко вси дни́е на́ши оскуде́ша, и гне́вом Твои́м исчезо́хом, ле́та на́ша я́ко паучи́на поуча́хуся. Дни́е лет на́ших, в ни́хже се́дмьдесят лет, а́ще же в си́лах, о́смьдесят лет, и мно́жае их труд и боле́знь: я́ко прии́де кро́тость на ны, и нака́жемся. Кто весть держа́ву гне́ва Твоего́, и от стра́ха Твоего́, я́рость Твою́ исчести́? Десни́цу Твою́ та́ко скажи́ ми, и окова́нныя се́рдцем в му́дрости. Обрати́ся, Го́споди, доко́ле? И умоле́н бу́ди на рабы́ Твоя́. Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны их. И бу́ди све́тлость Го́спода Бо́га на́шего на нас, и дела́ рук на́ших испра́ви на нас, и де́ло рук на́ших испра́ви.

Псалом 100:

Ми́лость и суд воспою́ Тебе́, Го́споди. Пою́ и разуме́ю в пути́ непоро́чне, когда́ прии́деши ко мне? Прехожда́х в незло́бии се́рдца моего́ посреде́ до́му моего́. Не предлага́х пред очи́ма мои́ма вещь законопресту́пную: творя́щыя преступле́ние возненави́дех. Не прильпе́ мне се́рдце стропти́во, уклоня́ющагося от мене́ лука́ваго не позна́х. Оклевета́ющаго тай и́скренняго своего́, сего́ изгоня́х: го́рдым о́ком, и несы́тым се́рдцем, с сим не ядя́х. О́чи мои́ на ве́рныя земли́, посажда́ти я́ со мно́ю: ходя́й по пути́ непоро́чну, сей ми служа́ше. Не живя́ше посреде́ до́му моего́ творя́й горды́ню, глаго́ляй непра́ведная, не исправля́ше пред очи́ма мои́ма. Во у́трия избива́х вся гре́шныя земли́, е́же потреби́ти от гра́да Госпо́дня вся де́лающыя беззако́ние.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа (трижды).

Таже тропарь который будет.

Аще ли не будет тропаря, то сей пой: Заутра услыши глас мой, Царю мой и Боже [мой].

Стихи: Глаголы моя внуши Господи.

Стих: Яко к Тебе помолюся Господи.

Слава и ныне:

Что Тя наречем обрадова[нная].

А се пой в субботу, коли тропаря не будет:

Свет праведным присно святии Тобою просвещшеся, сияют выну яко светила, свещники неверных угашьше, ихже молитвами Спасе наш, Ты просветиши свещник мой, Господи, и спаси мя.

Слава:

Воистину суета всяческая, житие бо се сень и сон, ибо всуе мятется всяк живый, якоже реша книги, егда весь мир приобрящем, тогда и во гроб вселимся, идеже купно цари и убозии. Темже Христе Боже, преставленыя покой, яко Человеколюбец.

И ныне:

Что Тя наречем обрадованная? Небо ли? Яко возсияла еси Солнце праведное. Рай ли? Яко израстила еси Цвет неувядающий. Матерь ли? Но сохранися Непорочная Чистая. Деву ли? Но имела еси в руку своею Сыну и всех Бога. Того моли о спасении душ наших.

Стопы моя направи по словеси Твоему, да не одолеет ми всяко беззаконие.

Избави мя от клеветы человеческия, и сохраню заповеди Твоя.

Лице Твое просвети на раба Твоего, и научи мя оправданием.

Да исполнятся уста моя похвалы, яко да воспою славу Твою, весь день велелепоту Твою.

Трисвятое по Отче наш:

Таже сию молитву.

Благодарю Тя, Господи Боже мой, и славлю Тя Иже во свете Твоем свет возсиявый ми, нощную тьму и конец преити, и свет дневный видети, света до конца не надеюся достигнути. Сего ради молютися Рекшему: Да будет свет на прогнание тьмы. Укрепи мя всемогущею Твоею десницею, убивати заутреняя вся ихже ненавижу мысли, и истирати борющагося со мною врага главы, и сокрушити ему мышцу преславно в крепости десницею Твоею, Господи. Якоже избави мя от страха нощнаго, Владыко, избави мя от всякоя стрелы летящия дневныя, исполни мя заутреняя Твоея радости, сораспята Ти божественою Твоею любовию, яко благословен еси во веки. Аминь.

Таже Господи помилуй, 50.

Приидите поклонимся, трижды. И почасие перваго гласа.