Троична глас 1

Плотскими образовании, безплотных сил на разумный безплотный возводими смысл, Трисвятым пением Трисоставнаго Божества, приемлюще сияние, херувимски Вышнему возопием: Свят, Свят, Свят:

Со всеми небесными силами, херувимски Вышнему возопием Трисвятую возсылающе песнь: Свят, Свят, Свят:

Тебе Царю сил и Зиждителю Богу небесных сил песнь приносим мы перстьни и недостойни и вопием: Свят, Свят, Свят:

Троична глас 2

Вышним силам подобящеся земнии, победную песнь приносим Ти, Благий: Свят, Свят, Свят:

Несоздано существо, всем Содетелю, устны наша отверзи, яко да возвестим хвалы Твоя вопиюще: Свят, Свят, Свят:

Полунощи возстающе, ангельскую песнь приносим Ти, Христе Боже, со Отцем и со Святым Духом: Свят, Свят, Свя:

Троична глас 3

Троице Единосущная и Нераздельная, и Присносущная, Тебе яко Богу ангельскую песнь поем: Свят, Свят, Свят:

Троице, естеством Единице, в Трех составех воспеваема, Тебе Вседетельней силе, дерзающе вопием земнии: Свят, Свят, Свят:

Отца Безначальна, Сына Собезначальна и Духа Присносущна, Божество Едино херувимски Вышнему возопием: Свят, Свят, Свят:

Троична глас 4

Безплотным умом подобящеся земнии, и словесней службе Бога Божеством херувимски возопием: Свят, Свят, Свят:

Яко чини ангельстии на небеси, и стояние со страхом человеческое на земли, победную песнь приносим Ти, Благий: Свят, Свят, Свят:

Безначальнаго Ти Отца, Тебе Христе Боже, и Пресвятый Твой Дух, херувимски Вышнему возопием: Свят, Свят, Свят:

Троична глас 5

Пению время и молитве час, прилежно возопием Единому Богу: Свят, Свят, Свят:

Напрасно помышляющи, Судии пришествие, убудися яко от сна, душе моя, полунощи востающи: Свят, Свят, Свят:

Во утробу Девую вместився, и ядр Отечь не отлучися, со ангелы нас приими, Христе Бже, вопиюща: Свят, Свят, Свят еси Боже, Богородицы ради спаси град и люди к Тебе прибегающая.

Троична глас 6

Безплотными усты, немолчными славословлении, шестокрильнии поют Ти Трисвятую песнь, Боже наш, с ними же и мы земнии пение Ти возсылаем недостойными устнами: Свят, Свят, Свят:

Предстояще со страхом херувими, и ужасающеся трепетом сеафими, Трисвятую песнь приносят Ти непрестающим гласом, с нимиже и мы вопием: Свят, Свят, Свят:

Троица, Единство Божество нераздельно, единством славима, ангельскую песнь вопием Ти: Свят, Свят, Свят:

Троична глас 7

Вышнею силою, херувимски воспеваемь божественою славою, ангельски покланяемь, приими ны земныя и недостойныя со умилением вопиюща: Свят, Свят, Свят:

Единому естеству, невилимому Божеству, херувими предстоят с вои ангельскими, Трисвятую песнь возсылающе: с ними же и мы земнии со страхом хвалим и вопием: Свят, Свят, Свят:

Яко сон и леность отвергши душе, исправление к соединению яви Судии, во страсе возопий: Свят, свят, Свят:

Троична глас 8

Зрети Тебе не смеют херувими, летяще вопиют восклицанием божественую песнь Трисвятым гласом, с нимиже и мы вопием: Свят, Свят, Свят:

Смиряющеся многими грехи своии, не смеюще взирати на высоту Твою, душу с телом поклоньше, со ангелы вопием: Свят, Свят, Свят:

Тя поют херувими и серафими, и мы от сна [воста]вше, ангельскую песнь приносим Ти: Свят, Свят, Свят: