Чин вечерни сице пой:

Господи Иисусе Христе Боже наш, помилуй нас. Аминь.

Таже: Царю Небесный, Утешителю:

Таже молитву: Владыко Господи Вседержителю: Песнь презаутре:

Таже: Приидите поклонимся: Трижды

Псалом 6:

Го́споди, да не я́ростию Твое́ю обличи́ши мене́, ни гне́вом Твои́м пока́жеши мене́.

Помилуй мя Господи, яко немощен есмь, исцели мя Господи, яко смятошася кости моя, и душа моя смятеся зело.

Ты Господи, доколе? Обрати Господи, избави душу мою и спаси мя милости Твоея ради, яко несть в смерти поминаяй Тебе, во аде же кто исповесть Ти ся. Утрудихся воздыханием моим, измыю на всяку нощь ложе мое, слезами моими постелю мою омочу. Смятеся от ярости око мое, обетшах во всех вразех моих. Отступите от мене вси творящии беззаконие.

Яко услыша Господь глас плача моего и услыша Господь молитву мою. Господь моление мое прият, да постыдятся и смятутся вси врази мои, возвратятся и устыдятся зело вскоре.

Трисвятое по Отче наш:

Таже сия молитва:

Господи Боже наш, Иже человеческому животу день и нощь бо устроивый да обема обдержими без престани хвалим и величаем Твое Царство и Господьство. И ныне вечернюю хвалу со страхом приносяща, приими Твоею благостию, милостивне нам прикланяя Пресвятое ухо Твое. Приимая наша молитвы, яже недостойно смеем Ти приносити. И не грех ради наших с гневом от нас уклонишися, но подаждь нам и до днешняго дне согрешившим прощение. Сведый немощь естества нашего ползское, и подаждь нам прочее дни преити без греха. Избави нас наставлением Твоим от деяния неприязнина, и грехопадения видмаго и невидимаго. Отче Милосердый, Иже светом дневным Твоим порождением нас породи, изволи яко сыны свету и дне Твое уподобление спасати чисто. И. к Тебе Единому без поткноения взирати. И не небрези во тме оставленым воздрематися очима ншима, но бдяща представи от дне живота сего ко дни оному безконечному. И престави ненасыщаемому свету лица Твоего. Молитвами Пресвятыя Владычицы нашея Богородицы и присно Девы Марии, и святых слуг Твоих, божественых нчал, конечнаго священства и украшения, да того сподобльшеся наслаждения, славим Тя во веки веком. Аминь.

Таже Господи помилуй, 12.

Приидите поклонимся, Трижды.

Псалом Давидов, 103.

// Отпел: Благословен еси Господи.

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю.

// Дивна дела Твоя, Господи

Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́.

// Слава Ти, Господи, Сотворившему вся

Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Слава и ныне: Аллилуия, Трижды.

Таже псалом Давидов, 140.

Отпел: Услыши мя, Господи

Го́споди, воззва́х к Тебе́, услы́ши мя: вонми́ гла́су моле́ния моего́, внегда́ воззва́ти ми к Тебе́. Да испра́вится моли́тва моя́, я́ко кади́ло пред Тобо́ю, воздея́ние руку́ мое́ю – же́ртва вече́рняя. Положи́, Го́споди, хране́ние усто́м мои́м, и дверь огражде́ния о устна́х мои́х. Не уклони́ се́рдце мое́ в словеса́ лука́вствия, непщева́ти вины́ о гресе́х, с челове́ки де́лающими беззако́ние, и не сочту́ся со избра́нными их. Нака́жет мя пра́ведник ми́лостию и обличи́т мя, еле́й же гре́шнаго да не нама́стит главы́ моея́, я́ко еще́ и моли́тва моя́ во благоволе́ниих их. Поже́рты бы́ша при ка́мени судии́ их: услы́шатся глаго́ли мои́, я́ко возмого́ша. Я́ко то́лща земли́ просе́деся на земли́, расточи́шася ко́сти их при а́де. Я́ко к Тебе́, Го́споди, Го́споди, о́чи мои́: на Тя упова́х, не отыми́ ду́шу мою́. Сохрани́ мя от се́ти, ю́же соста́виша ми, и от собла́зн де́лающих беззако́ние. Паду́т во мре́жу свою́ гре́шницы: еди́н есмь аз, до́ндеже прейду́.

Псалом 141

Отпел: Воззвах к Тебе, спаси мя

Гла́сом мои́м ко Го́споду воззва́х, гла́сом мои́м ко Го́споду помоли́хся. Пролию́ пред Ним моле́ние мое́, печа́ль мою́ пред Ним возвещу́. Внегда́ исчеза́ти от мене́ ду́ху моему́: и Ты позна́л еси́ стези́ моя́: на пути́ сем, по нему́же хожда́х, скры́ша сеть мне. Смотря́х одесну́ю и возгля́дах, и не бе зна́яй мене́: поги́бе бе́гство от мене́, и несть взыска́яй ду́шу мою́. Воззва́х к Тебе́, Го́споди, рех: Ты еси́ упова́ние мое́, часть моя́ еси́ на земли́ живы́х. Вонми́ моле́нию моему́, я́ко смири́хся зело́, изба́ви мя от гоня́щих мя, я́ко укрепи́шася па́че мене́. Изведи́ из темни́цы ду́шу мою́, испове́датися и́мени Твоему́. Мене́ ждут пра́ведницы, до́ндеже возда́си мне.

Псалом 129

Отпел: Христе Спасе, помилуй нас.

Из глубины́ воззва́х к Тебе́, Го́споди, Го́споди, услы́ши глас мой. Да бу́дут у́ши Твои́ вне́млюще гла́су моле́ния моего́. А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть. И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода. От стра́жи у́тренния до но́щи, от стра́жи у́тренния да упова́ет Изра́иль на Го́спода. Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

[Псалом 116]

Хвали́те Го́спода вси язы́цы, похвали́те Его́ вси лю́дие, я́ко утверди́ся ми́лость Его́ на нас, и и́стина Госпо́дня пребыва́ет во век.

Свете Тихий святыя славы, Безсмертнаго Отца Небеснаго, Святаго Блаженна Господа Иисуса Христа, пришедше на запад солнца, видевшесвет вечерний. Поем Отца, и Святаго Духа, Боже достоин еси во вся времена, пету быти гласы преподобны. Сыне Божий, живот дая всему миру, егоже ради весь мир славит тя.

В субботу вечер прокимен: Господь воцарися:

Стих: Облечеся Господь.

В неделю: Се ныне:

Стих: Стояще во храме:

В понедельник: Господь услышит мя:

{k|Стих:: Внегда воззвати:

Во вторник: Милость Твоя Господи поженет:

Стих: Господь пасет мя:

В среду: Боже, во имя Твое:

{k|Стих:: Боже, услыши молитву:

В четверток: Помощь моя от Господа

Стих: Возведох очи:

В пяток: Боже, Заступник:

Стих: Изми мя от враг:

А сий прокимен пой коли тропаря несть.

В понедельник Алилуия, трижды.

Таже стих: Господи, не яростию Твоею обличи мене, ни гневом Твоим покажи мене.

Во вторник: Аллилуия: Возносите Господа Бога нашего и кланяйтеся подножию ногу Его, яко Свят есть. Аллилуия.

В среду: Аллилуия: Во всю землю изыдоша вещания их и в конец Вселеныя глаголи их. Аллилуия.

В четверток: Аллилуия: Вознесися на небеса Боже, по всей земли [слава Твоя].

В пяток: Аллилуия: Дивен Бог во святых Своих, Бог Израилев.

Сподоби Господи в сий вечер без греха сохранитися нам. Благословен еси Господи Боже отец нашых. Хвалим и прославляем имя Твое во веки. Буди Господи милость Твоя на нас, якоже уповахом на Тя. Благословен еси Господи, научи мя оправданием Твоим. Благословен еси Владыко, вразуми мя оправданием Твоим. Благословен еси Святый, просвети мя оправданием Твоим.

Господи, милости твоя во веки. Господи, твари руку Твоею не презри. Тебе подобает хвала, Тебе подбает пение, Тебе слава подобает Отцу и Сыну и Святому Духу, и ныне и присно:

К Тебе возведох очи мои живущему на небеси. Се яко очи раб в руку господий своих, яко очи рабыни в руце госпожи своея, тако очи наши ко Господу Богу нашему, дондеже ущедрит ны.

Помилуй ны Господи, помилуй ны, яко помногу исполнихомся уничижения. Наипаче наполнися душа наша, поношения гобзуюзих, и уничижения гордым.

Ныне отпущаеши раба Своего, Владыко, по глаголу Твоему с миром, яко видеста очи мои спасение Твое, еже еси уготовал пред лицем всех людий, свет во откровение языком, и в славу людий Твоих Израиля.

Трисвятое по Отче наш:

Таже тропарь, который будет. Аще ли несть:

…Избавит мя Господь муки кромешняя, и грозы несогреемыя. Помилуй мя грешнаго раба Своего, имярек, якоже помиловал еси апостола Своего иже возлеже на перси Твоя, егоже возлюби паче всех. И от мене убогаго не отврати лица Твоего в день он страшный, егоже трепещет душа моя и состави телесе моего ужасаются. Избави мя Господи, от страшнаго Суда, да не отпаду милости Твоея, но молю святыя ангелы и архангелы, апостолы, пророки и мученики и вся святыя, да молят за мя убогаго, моего ради спасения, и возвратит Гоподь гнев Свой от мене грешнаго. Но ты Пречистая Дево, имущи дерзновение к Сыну Своему, о рабе Своем помолися, да не отлучен буду райския пищи. Не забуди Владыко раба Своего имярек, и убогия души моея. Тебе ся молю, Спасе мой, да обратиши серцде мое от печали грехов моих, в радость безконечнаго живота, всегда и ныне и присно и во веки веком. Аминь.

Господи помилуй, 50.

И ту конец.