Чин Нефимону сице пой

Господи Иисусе Христе Боже наш помилуй нас. Аминь.

Таже: Царю небесный.

Таже: Приидите, поклонимся, трижды.

Псалом Давидов, 9:

Внегда́ призва́ти ми, услы́ша мя Бог пра́вды моея́, в ско́рби распространи́л мя еси́, уще́дри мя и услы́ши моли́тву мою́. Сы́нове челове́честии, доко́ле тяжкосе́рдии? Вску́ю лю́бите суету́ и и́щете лжи? И уве́дите, я́ко удиви́ Госпо́дь преподо́бнаго Своего́: Госпо́дь услы́шит мя, внегда́ воззва́ти ми к Нему́. Гне́вайтеся, и не согреша́йте, я́же глаго́лете в сердца́х ва́ших, на ло́жах ва́ших умили́теся. Пожри́те же́ртву пра́вды и упова́йте на Го́спода. Мно́зи глаго́лют: кто яви́т нам блага́я? Зна́менася на нас свет лица́ Твоего́, Го́споди. Дал еси́ весе́лие в се́рдце мое́м: от плода́ пшени́цы, вина́ и еле́а своего́ умно́жишася. В ми́ре вку́пе усну́ и почи́ю, я́ко Ты, Го́споди, еди́наго на упова́нии всели́л мя еси́.

Таже: Господи, да не яростию Твоею обличиши мене: Псалом 37.

Псалом 12

Доко́ле, Го́споди, забу́деши мя до конца́? Доко́ле отвраща́еши лице́ Твое́ от менé? Доко́ле положу́ сове́ты в души́ мое́й, боле́зни в се́рдце мое́м день и нощь? Доко́ле вознесе́тся враг мой на мя? При́зри, услы́ши мя, Го́споди Бо́же мой, просвети́ óчи мои́, да не когда́ усну́ в смерть, да не когда́ рече́т враг мой, укрепи́хся на него́. Стужа́ющии ми возра́дуются, а́ще подви́жуся. Аз же на ми́лость Твою́ упова́х, возра́дуется се́рдце мое́ о спасе́нии Твое́м, воспою́ Го́сподеви благоде́явшему мне и пою́ и́мени Го́спода Вы́шняго.

Слава и ныне: Аллилуия трижды

Таже псалом 24: К Тебе Господи воздвигох: (писан в часах, псалом Давидов 30)

Псалом 30

На Тя, Го́споди, упова́х, да не постыжу́ся во век: пра́вдою Твое́ю изба́ви мя и изми́ мя. Приклони́ ко мне у́хо Твое́, ускори́ изъя́ти мя, бу́ди ми в Бо́га Защи́тителя, и в дом прибе́жища, е́же спасти́ мя. Я́ко держа́ва моя́ и прибе́жище мое́ еси́ Ты, и и́мене Твоего́ ра́ди наста́виши мя, и препита́еши мя. Изведе́ши мя от се́ти сея́, ю́же скры́ша ми, я́ко Ты еси́ Защи́титель мой, Го́споди. В ру́це Твои́ предложу́ дух мой: изба́вил мя еси́, Го́споди Бо́же и́стины. Возненави́дел еси́ храня́щыя суеты́ вотще́: аз же на Го́спода упова́х. Возра́дуюся и возвеселю́ся о ми́лости Твое́й, я́ко призре́л еси́ на смире́ние мое́, спасл еси́ от нужд ду́шу мою́, и не́си мене́ затвори́л в рука́х вра́жиих, поста́вил еси́ на простра́нне но́зе мои́. Поми́луй мя, Го́споди, я́ко скорблю́: смяте́ся я́ростию о́ко мое́, душа́ моя́ и утро́ба моя́. Я́ко исчезе́ в боле́зни живо́т мой и ле́та моя́ в воздыха́ниих, изнемо́же нището́ю кре́пость моя́ и ко́сти моя́ смято́шася. От всех враг мои́х бых поноше́ние, и сосе́дом мои́м зело́, и страх зна́емым мои́м: ви́дящии мя вон бежа́ша от мене́. Забве́н бых я́ко мертв от се́рдца, бых я́ко сосу́д погубле́н. Я́ко слы́шах гажде́ние мно́гих, живу́щих о́крест, внегда́ собра́тися им вку́пе на мя, прия́ти ду́шу мою́ совеща́ша. Аз же на Тя, Го́споди, упова́х, рех: Ты еси́ Бог мой. В руку́ Твое́ю жре́бии мои́: изба́ви мя из руки́ враг мои́х и от гоня́щих мя. Просвети́ лице́ Твое́ на раба́ Твоего́, спаси́ мя ми́лостию Твое́ю. Го́споди, да не постыжу́ся, я́ко призва́х Тя: да постыдя́тся нечести́вии и сни́дут во ад. Не́мы да бу́дут устны́ льсти́выя, глаго́лющыя на пра́веднаго беззако́ние, горды́нею и уничиже́нием. Коль мно́гое мно́жество бла́гости Твоея́, Го́споди, ю́же скрыл еси́ боя́щымся Тебе́, соде́лал еси́ упова́ющым на Тя пред сы́ны челове́ческими. Скры́еши их в та́йне лица́ Твоего́ от мяте́жа челове́ческа, покры́еши их в кро́ве от пререка́ния язы́к. Благослове́н Госпо́дь, я́ко удиви́ ми́лость Свою́ во гра́де огражде́ния. Аз же рех во изступле́нии мое́м: отве́ржен есмь от лица́ о́чию Твое́ю: сего́ ра́ди услы́шал еси́ глас моли́твы моея́, внегда́ воззва́х к Тебе́. Возлюби́те Го́спода, вси преподо́бнии Его́, я́ко и́стины взыска́ет Госпо́дь, и воздае́т изли́ше творя́щым горды́ню. Мужа́йтеся, и да крепи́тся се́рдце ва́ше, вси упова́ющии на Го́спода.

Таже, псалом 90:

Живы́й в по́мощи Вы́шняго, в кро́ве Бо́га небе́снаго водвори́тся. Рече́т Го́сподеви: Засту́пник мой еси́ и прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи и от словесе́ мяте́жна, плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стрелы́ летя́щия во дни, от ве́щи во тьме преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тьма одесну́ю тебе́, к тебе́ же не прибли́жится, оба́че очи́ма твои́ма смо́триши и воздая́ние гре́шников у́зриши. Я́ко Ты, Го́споди, упова́ние мое́, Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́, я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва и зми́я. Я́ко на Мя упова́, и изба́влю и́, покры́ю и́, я́ко позна́ и́мя Мое́. Воззове́т ко Мне, и услы́шу eго́, с ним есмь в ско́рби, изму́ eго́ и просла́влю eго́, долгото́ю дний испо́лню eго́ и явлю́ eму́ спасе́ние Мое́.

Слава и ныне: Аллилуия трижды

С нами Бог. Разумейте языцы и покаряйтеся яко с нами Бог. Услы́шите до после́дних земли́: Яко с на́ми Бог. Крепцыи покаря́йтеся: Яко с на́ми Бог. Аще бо па́ки возмо́жете, и па́ки побежде́ни бу́дете: Яко с на́ми Бог. И и́же а́ще сове́т совещава́ете, и ражденет вы Госпо́дь: Яко с на́ми Бог. И сло́во, е́же а́ще возглаго́лете, не имать пребыти в вас: Яко с на́ми Бог. Стра́ха же ва́шего не убои́мся, ниже́ смятемся: Яко с на́ми Бог. Го́спода же Бо́га на́шего Того́ освяти́м, и Той бу́дет нам в боязнь: Яко с на́ми Бог. И а́ще Нань уповающе будем, и Той бу́дет мне во освяще́ние: Яко с на́ми Бог. Уповая нань буду, и спасу́ся Его ради: Яко с на́ми Бог. Се аз и де́ти, я́же ми есть дал Бог: Яко с на́ми Бог. Лю́дие ходя́ще во тьме, ви́деша свет ве́лий: Яко с на́ми Бог. Живу́щии во стране́ и се́ни сме́ртней, и свет возсия́ет на вы: Яко с на́ми Бог. Яко Отроча́ роди́ся нам, Сын нам дан бысть: Яко с на́ми Бог. Емуже власть бысть на ра́ме Его́: Яко с на́ми Бог. И ми́рови Его́ несть преде́ла: Яко с на́ми Бог. И нарица́ется Имя Его́, Вели́ка Сове́та Ангел: Яко с на́ми Бог. Чу́ден Сове́тник: Яко с на́ми Бог. Бог кре́пок, Владыка, Князь ми́ра: Яко с на́ми Бог. Оте́ц бу́дущаго ве́ка: Яко с на́ми Бог. Слава Отцу и Сыну и Святому Духу: Яко с на́ми Бог. И ныне и присно и во веки веков. Аминь. Яко с на́ми Бог. Разуме́йте язы́цы, и покаря́йтеся: Яко с на́ми Бог.

Глаголи трижды: День пребыв, благодарю Тя Господи, вечер молю Тя, в нощи без греха сохрани мя и помилуй мя. Слава: День пребыв благодарю Тя Владыко, и вечер молю тя и в нощи: И ныне: День пребыв, благодарю Тя Святый, вечер молю тя и в нощи:

Безплотно естество херувимско, немолчными песньми славят, шестокрильнии животи серафими, непрестанными Тя гласы превозносят, ангел же всех воинства, Трисвятыми Тя песньми славят. Первее бо всех еси сый Отец, и Собезначалне имаши Свой Сын, и раен честен нося Дух жизни. Троицу являющи нераздельну. Пресвятая Дево, Мати Христова, иже Словеси самовидцы и слуги, пророк, мученик вси ликове, яко безсмертну имуще жизнь, о всех молите очищении, яко вси мы есмы в бедах. Льсти же избывше лукаваго, ангельскую песнь возопием: Святый, Святый, Святый, Трисвятый Господи, спаси ны.

Таже: Верую в Единаго Бога Отца:

Таже се:

Пресвятая Госпоже Богородице Владычице Милостивая, моли Бога за ны грешныя Вся небесныя силы святии ангели и архангели, молите Бога за ны грешныя. Святый Иоанне пророче и Предтече, Крестителю, моли Богаза ны грешныя. Святии апостоли, пророцы, мученицы, молите: Вси святии праведнии и преподобнии, молите: Непобедимая сила честнаго и животворящаго Креста Господня, не остави нас [грешных]. Боже, милостив буди нам грешником. Боже, очисти грехи моя и помилуй мя.

Трисвятое по Отче наш: Невидимых враг моих неусыпание веси ты Господи, окаянныя плотимоея изнеможение веси Создавый мя. Тем в руце Твои предаю Тебе дух мой. Покрый мя крилома Своея си благостын, и да не усну в смерти. Умнеи мои очи просвети насыщением божественых словес Ти. И воздвигни мене из глубока сна к Твоему славословию, яко Един Благ и Человеколюбец.

Слава: Яко страшен суд Твой Господи.ангелом предстоящим и человеком собранным, книгам разгибающимся и делом испытаемым. Помышлением ответ дающим. Как суд будет мне зачатому во гресех? Кто ми пламень угасит? Кто ми тьму просветит, аще не Ты Господи помилуеши ми, яко Един Благ и Человеколюбец.

И ныне: Непостыдную Богородицу, надежду Тя имый спасуся. Заступление Твое стяжав Пречистая, не убоюся. Но пожену враги моя и побежду я. [Во] един [оболкийся] яко щит кров Твой. И всесильную помощь Твою. И млюся опия Госпоже, спаси мя мольбами си, и воздвигни мене от мрачнаго сна к песнословию, силою из Тебе воплощена Бога.

Таже сию молитву: Господи Боже наш, вечныя жизни подателю. Иже временную сию содержай жизнь нашу, во очищение нощи и дне, от обою на приятие да во обою убо поданием благих Твоих насыщают сердца. В сию же от дневных болезний плоти дарует покой. См и ныне понеже множества ради щедрот Твоих, изволивый нам преити версту денвную. И на пределы наступати нощныя, подаждь нм души и телу покой, и сон безмятежен, от сякого вреда и от всякого диаволя искушения, без злобы и без злолености, и без мятежа. Избави нас от страха нощнаго и от лености, и от темных помысл, да не к смерти уснем. Воздвигни нас от сна, и от молчания ложа ншего, просвещны очима душевныма. Чувствия наша невредна и без пакости от неправды и от немощи, да просвещени совестию и языком бодрым и устнами, пред Твоим станем благодарением, молитвами Святыя Владычицы нашея Богородицы и присно Девы Марии, божественых и мысленых слуг Твоих, архангел [коньнаяго] священства и украшения, славим Пресвятое имя Твое Отца и Сына и Святаго Духа.

Господи помилуй, 40

Таже Приидите поклонимся, трижды:

Таже: Господи да не яростию:

Таже Трисвятое по Отче наш:

Таже молитва: Господи, Господи, избави нас от всякия стрелы летящия во дне, избави нас от всякоя вещи во тме приходящая. Приими вечернюю жерту рук наших воздение. Сподоби ны нощное поприще без порока преити, неикусным от злых. Избави нас от всякого мятежа и страха от диавола нам пребывающаго. Но дажд душам нашим умиление и помыслом нашим попечение, еже на страшнем и праведнем Суде Твоем испытания. Пришвзди в страсе Твое плоть мою, умертви уды моя сущая на земли, да и сонным безмолвием просветимся и ведением судеб Твоих. Отстави от мене всяко мечтание нелепое и похоть вредну. Востави же мя во время молитве утвержена в вере, напреждеспеюща в заповедех твоих, благоволением и благостию Единочадаго Сына Твоего, с Нимже благословен еси во веки. Аминь.

Господи помилуй, 12:

И ту конец.