Приидите поклонимся: (Трижды)

Псалом 91

Бла́го есть испове́датися Го́сподеви, и пе́ти и́мени Твоему́, Вы́шний: возвеща́ти зау́тра ми́лость Твою́ и и́стину Твою́ на вся́ку нощь, в десятостру́ннем псалти́ри с пе́снию в гу́слех. Я́ко возвесели́л мя еси́, Го́споди, в творе́нии Твое́м, и в де́лех руку́ Твое́ю возра́дуюся. Я́ко возвели́чишася дела́ Твоя́, Го́споди, зело́ углуби́шася помышле́ния Твоя́. Муж безу́мен не позна́ет, и неразуми́в не разуме́ет сих. Внегда́ прозябо́ша гре́шницы я́ко трава́, и пронико́ша вси де́лающии беззако́ние: я́ко да потребя́тся в век ве́ка. Ты же Вы́шний во век, Го́споди. Я́ко се врази́ Твои́, Го́споди, я́ко се врази́ Твои́ поги́бнут, и разы́дутся вси де́лающии беззако́ние. И вознесе́тся я́ко единоро́га рог мой, и ста́рость моя́ в еле́и масти́те. И воззре́ о́ко мое́ на враги́ моя́, и востаю́щыя на мя лука́внующыя услы́шит у́хо мое́. Пра́ведник я́ко фи́никс процвете́т, я́ко кедр, и́же в Лива́не, умно́жится. Насажде́ни в дому́ Госпо́дни, во дво́рех Бо́га на́шего процвету́т, еще́ умно́жатся в ста́рости масти́те, и благоприе́млюще бу́дут. Да возвестя́т, я́ко прав Госпо́дь Бог наш, и несть непра́вды в Нем.

Псалом 112

Хвали́те, о́троцы, Го́спода, хвали́те и́мя Госпо́дне. Бу́ди и́мя Госпо́дне благослове́нно отны́не и до ве́ка. От восто́к со́лнца до за́пад хва́льно и́мя Госпо́дне. Высо́к над все́ми язы́ки Госпо́дь: над небесы́ сла́ва Его́. Кто я́ко Госпо́дь Бог наш? На высо́ких живы́й и на смире́нныя призира́яй на небеси́ и на земли́, воздвиза́яй от земли́ ни́ща и от гно́ища возвыша́яй убо́га, посади́ти eго́ с кня́зи, с кня́зи люде́й свои́х, вселя́я непло́довь в дом ма́терь о ча́дех веселя́щуся.

Псалом 45

Бог нам прибе́жище и си́ла, помо́щник в ско́рбех, обре́тших ны зело́. Сего́ ра́ди не убои́мся, внегда́ смуща́ется земля́ и прелага́ются го́ры в сердца́ морска́я. Возшуме́ша и смято́шася во́ды их, смято́шася го́ры кре́постию Его́. Ре́чная устремле́ния веселя́т град Бо́жий: освяти́л есть селе́ние Свое́ Вы́шний. Бог посреде́ eго́, и не подви́жится: помо́жет eму́ Бог у́тро зау́тра. Смято́шася язы́цы, уклони́шася ца́рствия: даде́ глас Свой Вы́шний, подви́жеся земля́. Госпо́дь Сил с на́ми, засту́пник наш Бог Иа́ковль. Прииди́те и ви́дите дела́ Бо́жия, я́же положи́ чудеса́ на земли́: отъе́мля бра́ни до коне́ц земли́, лук сокруши́т и сло́мит ору́жие, и щиты́ сожже́т огне́м. Упраздни́теся и разуме́йте, я́ко Аз есмь Бог: вознесу́ся во язы́цех, вознесу́ся на земли́. Госпо́дь Сил с на́ми, Засту́пник наш Бог Иа́ковль.

Трисвятое по Отче наш:

Таже тропраь:

Свету быти повелевый на всей твари, сотворивый тме уступати света пришествием, просвети наши сердечнии очи, да светом Твоим озарени, славим Тя Единого Человеколюбца, Милостиваго Бога, подающаго нам велию милость.

Слава и ныне:

Господи, мы есмы людие Твои, и овцы пажити Твоея заблуждьшая, яко Пастырь обрати ны, разшедшая истлением, собери ны, помилуй стадо Свое, Человеколюбче, умилосердися молитвами Богородицы, Едине Безгрешне.

Таже молитва:

Отче Святый, Иже Солнце праведное Господа нашего Иисус Христа, изволивый возсияти по нощи Закона, и сея совершение иже пророку Давиду водохнув рещи: Заутра предстану тебе, узриши Мя. Сам и ныне, на ны недостойныя Твоим человеколюбием предстати дерзнувшая, лицу славы Твоея, призри щедротами и благостию, и даждь нам пришедший день и всяко время живота нашего преити благобоязнено и благообразно, соблюдая нас от невидимых и видимых враг, и всяк помысл и деяние, без грешения деяти творяй всегда, якоже пред Твоима очима сущим и видимым на правость настави, молитвами Пречистыя Владычицы нашея Богородицы и присно Девы Марии, и божественых мысленых слуг Твоих, на нихже почиваеши престолех, перваго священства и украшения, во славу Единочадаго Сына Твоего, Пресвятаго и Благаго и Животворящаго Твоего Духа, и ныне и присно:

Таже, Господи помилуй, 50.

Благословите, святии.

Благослови, отче.

И кончай: Господи, Иисусе Христе Боже наш, помилуй нас. Аминь.

Таже сии молитвы пой по всяком пении.

Молитва ко Господу Иисус Христу:

Милостивый Господи, приими воздыхание мое, якоже прият блудницы слезы, и Петрово исповедание. Помилуй мя, Владыкой мой, Владыко, прости Спасе, не смею бо аз взирати на образ честнаго Твоего Креста, есть бо до небес милость Твоя и до облак истина Твоя. Господи, благослови, Отче, благослови воздыхание раб Твоих, ныне и присно:

Молитва ко святей Госпоже Богородице:

Ныне припадаю Ти, Госпоже, помилуй мя много Ти согрещшаго, и пение недостойно приимши изоуст сквернено приношаемое. Сына Си молящи, отпущение грехов даровати ми, Твоими молитвами ныне и присно и во веки:

Таже се глаголи со умиление:

Согреших Господи, прости мя имене ради Святаго Твоего.

Очисти мя грешнаго.

Создавый мя и помилуй мя.

И посем поклонися трижды, и ту конец.