И҆́же во свѧты́хъ ѻ҆тца̀ на́шегѡ григо́рїа сїнаи́та главы̑, краегране́сїемъ въ гре́ческомъ писа́нїи расположє́нныѧ, ѕѣлѡ̀ полє́зныѧ. Словеса̀ разли̑чнаѧ ѡ҆ за́повѣдехъ, догма́тѣхъ, мꙋ́кахъ, и҆ ѡ҆бѣтова́нїѧхъ: є҆ще́ же ѡ҆ по́мыслѣхъ, страсте́хъ, добродѣ́телехъ, безмо́лвїи и҆ моли́твѣ.

а҃. Слове́снꙋ ᲂу҆̀бо бы́ти, и҆лѝ содѣ́латисѧ комꙋ̀ по є҆стествꙋ̀, ꙗ҆́коже бѣ̀ пре́жде въ чистотѣ̀ и҆ нетлѣ́нїи, невозмо́жно. То́ю бо чꙋ́вственное безслове́сїѧ навыкнове́нїе, се́ю же тлѣ́нное пло́ти состоѧ́нїе ѡ҆блада̀.

в҃. По є҆стествꙋ̀ слове́сными є҆ди́ни то́чїю чистото́ю свѧті́и ꙗ҆ви́шасѧ: сло́ва бо чи́ста никто́же ѿ мꙋ́дрыхъ въ сло́вѣ и҆мѣ̀, ѿ нача́ла слове́сность по́мыслы растли́вшихъ. Веще́ственный бо и҆ многоглаго́льный премꙋ́дрости мі́ра сегѡ̀ дꙋ́хъ, словеса̀ ᲂу҆̀бо на многовѣ́дѣнїе, по́мыслы же на дича́йшее наводѧ̀, водворѧ́етсѧ въ ни́хъ, лиши́въ и҆̀хъ воѷпоста́сныѧ премꙋ́дрости и҆ видѣ́нїѧ нераздѣ́льнагѡ и҆ є҆ди́нственнагѡ ра́зꙋма.

г҃. Ра́зꙋмъ и҆́стины, чꙋ́вство благода́ти со́бственнѡ бы́ти разꙋмѣ́й, прѡ́чїѧ же разꙋмѣ̑нїѧ, помышле́нїй ꙗ҆влє́нїѧ и҆ веще́й доказа̑нїѧ, нарица́ти подоба́етъ.

д҃. Є҆ли́цы благода́ти не полꙋча́ютъ, ра́ди невѣ́рїѧ и҆ нерадѣ́нїѧ сїѐ стра́ждꙋтъ: и҆ є҆ли́цы па́ки ѡ҆брѣта́ютъ вѣ́рою и҆ тща́нїемъ. Си́хъ ᲂу҆̀бо ра́ди въ прє́днѧѧ при́снѡ простира́ютсѧ, сопроти́вныхъ же ра́ди, вспѧ́ть соверше́ннѣ ѡ҆браща́ютсѧ.

є҃. Равно̀ є҆́сть и҆ ме́ртвꙋ и҆ нечꙋ́вственнꙋ бы́ти, и҆ ᲂу҆мо́мъ слѣ́пꙋ, и҆ тѣле́снѣ не зрѣ́ти. Ѻ҆́въ бо лиши́сѧ ᲂу҆́бѡ живы́ѧ и҆ дѣ́йствꙋющїѧ си́лы: ѻ҆́въ же лиши́сѧ, не ви́дѧ бжⷭ҇твеннагѡ свѣ́та, творѧ́щагѡ зрѣ́ти и҆ зрѣ́тисѧ.

ѕ҃. Си́лꙋ и҆ премꙋ́дрость, ѻ҆боѧ̑ ѿ бг҃а ма́ли прїе́млютъ: ѻ҆́на бо є҆́сть бж҃е́ственныхъ причаща́тєльна бла̑гъ: сїѧ̑ же и҆з̾ѧви́тєльна, воспрїима́ти же є҆ѐ и҆ преподаѧ́ти, бж҃е́ственный вои́стиннꙋ да́ръ и҆ вы́ше человѣ́ка.

з҃. Свѣти́лище и҆́стинно и҆ пре́жде бꙋ́дꙋщагѡ житїѧ̀ є҆́сть, є҆́же без̾ пѡ́мыслъ се́рдце дѣ́йствꙋемо дх҃омъ: всѧ̑ бо та́мѡ соверша́ютсѧ и҆ глаго́лютсѧ дх҃о́внѣ. И҆ не стѧжа́вый сїѐ ѿсю́дꙋ, ка́мень є҆́сть ра́ди и҆нѣ́хъ добродѣ́телей, потре́бенъ въ назида́нїе бж҃е́ственнагѡ хра́ма, а҆ не хра́мъ и҆ свѧщеннодѣ́йствитель дх҃а.

и҃. Нетлѣ́ненъ человѣ́къ со́зданъ бы́сть кромѣ̀ мокро́тъ, ꙗ҆ко́въ же и҆ воскре́снетъ. Не непремѣ́ненъ же, нижѐ па́ки премѣ́ненъ. Си́лꙋ и҆мѣ́ѧ во́льнагѡ хотѣ́нїѧ преложи́тисѧ, и҆лѝ нѝ: соверше́ннагѡ бо непреложе́нїѧ не твори́тъ къ є҆стествꙋ̀ хотѣ́нїе, то́ бо є҆́сть по́честь бꙋ́дꙋщагѡ непрело́жнагѡ ѡ҆боже́нїѧ.

ѳ҃. Тлѣ́нїе бо пло́ти рожде́нїе, ꙗ҆́сти же и҆ и҆зли́шество и҆зпромета́ти, и҆ свирѣ́пѣти и҆ спа́ти, є҆сте́ствєннаѧ ѕвѣре́й и҆ скотѡ́въ свѡ́йства, по ни́мже преслꙋша́нїѧ ра́ди скотѡ́мъ ᲂу҆подо́бльшесѧ, ѿпадо́хомъ свои́хъ и҆ бг҃ода́нныхъ бла̑гъ, и҆ ско́тни ѿ слове́сныхъ, и҆ ѕвѣ́рсти ѿ бж҃е́ственныхъ содѣ́лавшесѧ.

і҃. Ра́й сꙋгꙋ́бъ є҆́сть: чꙋ́вственный и҆ ᲂу҆́мный, си́рѣчь во є҆де́мѣ, и҆ благода́тный.

а҃і. Преходѧ́ща, си́рѣчь, тлѣ́нна тва́рь не бы́сть пе́рвѣе, сказꙋ́ютъ, сотворе́на: по́слѣжде же растли́вшисѧ, и҆ тлѣ́нїю подпа́дши, и҆ сꙋетѣ̀, по писа́нїю, повинꙋ́сѧ, си́рѣчь, человѣ́кꙋ, не во́лею, и҆ не хотѧ́щи, но за повинꙋ́вшаго ю҆̀, на ᲂу҆пова́нїи113 ѡ҆бновле́нїѧ и҆стлѣ́вшагѡ а҆да́ма. Ѡ҆бнови́вый того̀ и҆ ѡ҆свѧти́вый, а҆́ще и҆ тлѣ́нно но́ситъ то́й тѣ́ло, вре́менныѧ ра́ди жи́зни, и҆ сїю̀ ѡ҆бновѝ, но не ᲂу҆̀ ѿ тлѣ́нїѧ свободи́въ. Ѿ тлѣ́нїѧ же и҆збавле́нїе тва́ри, и҆́нїи глаго́лютъ, бы́ти на лꙋ́чшее премѣне́нїе, дрꙋзі́и же, соверше́нное чꙋ́вственныхъ преложе́нїе. Ѻ҆бы́чай бо є҆́сть писа́нїю, ѡ҆ недоꙋмѣва́емыхъ досе́лѣ твори́ти сказа́нїе про́стѡ и҆ немногопы́тнѣ.

в҃і. Благода́ть прїе́млющїи ꙗ҆́коже въ зача́тїи, и҆ непра́здни сꙋ́ще дх҃омъ, и҆лѝ чрез̾ падє́нїѧ бж҃е́ственное ѿмета́ютъ сѣ́мѧ, и҆лѝ вдо́вствꙋтъ ѿ бг҃а, прїѻбще́нїемъ врага̀ кры́ющагѡсѧ въ ни́хъ. И҆ ѡ҆ставле́нїе ᲂу҆́бѡ благода́ти, дѣ́йства ра́ди страсте́й, соверше́нное же лише́нїе, грѣхо́внагѡ ра́ди дѣѧ́нїѧ быва́етъ. Дꙋша́ бо страстолюби́ваѧ и҆ грѣхолюби́ваѧ, лише́на и҆ ѿве́ржена сꙋ́щи благода́ти и҆ вдо́вствꙋюща, жили́ще бꙋ́детъ страсте́мъ, да не рекꙋ̀ бѣсѡ́мъ, ны́нѣ и҆ въ бꙋ́дꙋщемъ вѣ́цѣ.

г҃і. Ꙗ҆́рость ти́хою и҆ кро́ткою ничто́же и҆́но твори́тъ, ꙗ҆́коже мꙋ́жество и҆ ми́лость: ѻ҆́ва ᲂу҆́бѡ внѣ̑шнїѧ: ѻ҆́ва же внꙋ́трєннїѧ, ꙗ҆́коже градое́мнїи хи́трѡсти сокрꙋша́ющи.

д҃і. Мно́зи за́пѡвѣди дѣ́лающе, мнѧ́тъ ше́ствовати, не ᲂу҆̀ гра́да дости́гше внѣꙋ́дꙋ пребыва́ютъ. И҆схожде́нїе бо ца́рскихъ пра́выхъ пꙋте́й, си́рѣчь подо́бныѧ добродѣ́телѧмъ ѕло́бы ѻ҆́тай взе́мше неꙋспѣ́шнѡ ше́ствꙋютъ. За́пѡвѣди бо тре́бꙋютъ нижѐ ᲂу҆мале́нїѧ, нижѐ превосхожде́нїѧ, но и҆ намѣ́ренїѧ бг҃оꙋго́дна, и҆ бж҃е́ственныѧ то́чїю и҆́щꙋще во́ли. А҆́ще ли не та́кѡ, всꙋ́е трꙋ́дъ, пра̑вы, по писа́нїю, не твори́ти стєзѝ бж҃їѧ: во всѧ́комъ бо дѣ́лѣ, намѣ́ренїе взыскꙋ́етсѧ ве́щи.

є҃і. Въ пꙋтѝ, си́рѣчь за́повѣдьми въ се́рдцѣ, взыскꙋ́й гдⷭ҇а. Є҆гда́ бо слы́шиши і҆ѡа́нна вопїю́ща, и҆ повелѣва́юща всѣ̑мъ ᲂу҆гото́вати пꙋ́ть гдⷭ҇нь: пра́вы твори́ти стєзѝ114 велѧ́ща, за́пѡвѣди, и҆ сердца̀ и҆ дѣѧ̑нїѧ бы́ти непщꙋ́й. Не возмо́жно бо сотвори́ти пꙋ́ть пра́въ за́повѣдей и҆ дѣѧ́нїе непогрѣ́шно, а҆́ще не серде́чнꙋ правотꙋ̀ сотвори́ши.

ѕ҃і. Же́злъ и҆ па́лицꙋ,115 є҆гда̀ ᲂу҆слы́шиши по проро́ческомꙋ словесѝ писа́нїе глаго́лющее, сꙋ́дъ и҆ про́мыслъ бы́ти непщꙋ́й: по нра́вственномꙋ же сло́вꙋ пѣ́нїе и҆ моли́твꙋ. Сꙋди́ми бо ѿ гдⷭ҇а жезло́мъ наказа́нїѧ, ко ѡ҆браще́нїю наказꙋ́емсѧ: наказꙋ́юще же востаю́щыѧ на ны̀ жезло́мъ мꙋ́жественнагѡ пѣ́нїѧ, моли́твою ᲂу҆твержда́емсѧ. И҆мꙋ́ще ᲂу҆̀бо же́злъ и҆ па́лицꙋ въ рꙋцѣ̀ дѣѧ́нїѧ ᲂу҆ма̀, не преста́немъ нака́зовати и҆ нака́зоватисѧ, до́ндеже под̾ про́мысломъ сꙋ́ще, соверше́ннѣ и҆збѣ́гнемъ сꙋда̀ ны́нѣшнѧгѡ и҆ бꙋ́дꙋщагѡ.

з҃і. Сво́йственно є҆́сть за́повѣдемъ, є҆́же предпочита́ти присноѡбде́ржнꙋю за́повѣдь, бж҃їю па́мѧть, глаго́лющꙋю: помѧнѝ гдⷭ҇а бг҃а твоего̀ вы́нꙋ,116 є҆́юже бо погибо́ша, се́ю и҆ сохрани́тисѧ мо́гꙋтъ. Забве́нїе бо погꙋбѝ бж҃їю и҆знача́ла па́мѧть, за́пѡвѣди помрачи́вши, и҆ та́кѡ на́га человѣ́ка ѿ всѧ́кагѡ бла́га содѣ́ла.

и҃і. Двѣма̀ за́повѣдьми подви́жники па́ки дре́внѧгѡ досто́инства достиза́ютъ: послꙋша́нїемъ и҆ посто́мъ. Ѿ несохране́нїѧ бо си́хъ всѧ́каѧ ѕло́ба ро́дꙋ человѣ́ческомꙋ привни́де. И҆ и҆̀же послꙋша́нїемъ ᲂу҆́бѡ хранѧ́щїи за́пѡвѣди, поспѣ́шнѣе къ бг҃ꙋ восхо́дѧтъ, а҆ и҆̀же посто́мъ и҆ моли́твою, косни́тельнѣе. И҆ послꙋша́нїе ᲂу҆́бѡ новонача̑льнымъ прили́чествꙋетъ: по́стъ же срє́днимъ, и҆ разꙋ̑мнымъ, и҆ мꙋ́жествєннымъ. Є҆́же бо соблюстѝ за́повѣдьми неле́стное послꙋша́нїе бг҃ꙋ, ѕѣлѡ̀ ма́лѣхъ є҆́сть, и҆ самѣ̑мъ тѣ̑мъ мꙋ́жествєннымъ притрꙋ́дно.

ѳ҃і. Зако́нъ дх҃а жи́зни, по а҆пⷭ҇лꙋ,117 є҆́сть, и҆́же въ се́рдцѣ дѣ́йствꙋѧй и҆ глаго́лѧй, ꙗ҆́коже и҆ пи́сьменный во пло́ти дѣ́йствꙋемый. То́й бо ᲂу҆́бѡ свобожда́етъ ᲂу҆́мъ ѿ зако́на грѣхо́внагѡ и҆ сме́рти: се́й же ѻ҆́тай фарїсе́а содѣ́ловаетъ, тѣле́снѣ зако́нъ творѧ́ща, и҆ помышлѧ́юща, и҆ во є҆́же ви́дѣнꙋ бы́ти за́пѡвѣди дѣ́лающа.

к҃. Составле́нїе всѣ́хъ за́повѣдей, слага́емыхъ и҆ соѡрꙋжа́емыхъ дꙋ́хомъ, человѣ́ка соверше́нна глаго́лютъ бы́ти, и҆лѝ несоверше́нна по предспѣ́ѧнїю быва́ема. И҆ за́пѡвѣди ᲂу҆́бѡ, ꙗ҆́коже тѣ́ло, добродѣ́тєли же а҆́ки кѡ́сти ка́чествъ навыкнове́нїѧ благода́ть же, ꙗ҆́кѡ дꙋ́шꙋ жи́вꙋ сꙋ́щꙋю, и҆ дви́жꙋщꙋсѧ и҆ дѣ́йствꙋющꙋ, ꙗ҆́коже тѣ́ло всѣ́хъ за́повѣдей дѣѧ́нїѧ. Нерадѣ́нїе бо и҆ тща́нїе къ превозраще́нїѧмъ хрⷭ҇тѡ́вымъ, показꙋ́ютъ человѣ́ка, младе́нца и҆лѝ соверше́нна, ны́нѣ же и҆ въ бꙋ́дꙋщемъ вѣ́цѣ.

к҃а. Хотѧ́й тѣ́ло за́повѣдей возрасти́ти, слове́снагѡ чи́стагѡ млека̀ ма́тернїѧ благода́ти жела́ти да тщи́тсѧ. Ѿтꙋ́дꙋ бо млекопита́етсѧ всѧ́къ, ѡ҆ хрⷭ҇тѣ̀ и҆́щꙋщїй и҆ хотѧ́щїй возраще́нїемъ возрасти́тисѧ. Млеко́ бо къ возраще́нїю премꙋ́дрость ѿ свои́хъ сосє́цъ ѡ҆ хрⷭ҇тѣ̀ младе́нцємъ теплотꙋ̀ подае́тъ: ме́дъ же пи́щный совершє́ннымъ весе́лїе своѐ ко ѡ҆чище́нїю дае́тъ. Ме́дъ, глаго́летъ, и҆ млеко̀ под̾ ѧ҆зы́комъ твои́мъ.118 Млекꙋ̀ ᲂу҆́бѡ и҆мѣ́ти пита́тельнꙋю и҆ возрасти́тельнꙋю, ме́дꙋ же ѡ҆чисти́тельнꙋю дꙋ́ха си́лꙋ, соломѡ́нъ речѐ. Вели́кїй же а҆пⷭ҇лъ, разли́чїе дѣ́йствъ назна́менꙋѧ, глаго́ла: ꙗ҆́кѡ младе́нцєвъ, млеко́мъ вы̀ напои́хъ, а҆ не бра́шномъ.119

к҃в. Слове́съ за́повѣдей, кромѣ̀ за́повѣдей взыскꙋ́ѧй, и҆ ᲂу҆че́нїемъ и҆лѝ чте́нїемъ ѡ҆брѣстѝ жела́ѧй, подо́бенъ є҆́сть воѡбража́ющемꙋ себѣ̀ сѣ́нь вмѣ́стѡ и҆́стины. Словеса̀ во и҆́стины въ прича́стницѣхъ и҆́стинѣ прича́ствꙋеми сꙋ́ть. И҆́стины бо неприча́стнїи и҆ невѣ́дꙋщїи, взыскꙋ́ѧ слове́съ, ѡ҆брѣта́ютъ ѧ҆̀ ѿ ѡ҆б̾юродѣ́вшїѧ премꙋ́дрости, и҆̀хже и҆ дꙋше́вными наре́клъ а҆пⷭ҇лъ, дх҃а не и҆мꙋ́щихъ, а҆́ще и҆ и҆́стиною не́гли велича́ютсѧ.

к҃г. Ꙗ҆́коже чꙋ́вственное ѻ҆́ко взира́етъ на пи́смѧ, и҆ ѿ пи́смене чꙋ́вствєннаѧ прїе́млетъ разꙋмѣ̑нїѧ: си́це и҆ ᲂу҆́мъ, є҆гда̀ ѡ҆чи́ститсѧ, и҆ въ первобы́тное дости́гнетъ досто́инство, на бг҃а зри́тъ, и҆ ѿ негѡ̀ прїе́млетъ бж҃е́ствєннаѧ разꙋмѣ̑нїѧ, и҆ вмѣ́стѡ ᲂу҆́бѡ кни́ги и҆́мать дх҃а, вмѣ́стѡ же тро́сти писа́тельныѧ, смы́слъ и҆ ѧ҆зы́къ. Ѧ҆зы́къ мо́й, глаго́летъ, тро́сть:120 свѣ́тъ же вмѣ́стѡ черни́ла. Погрꙋжа́ѧ ᲂу҆́бѡ мы́сль во свѣ́тѣ, и҆ свѣ́тъ соверша́ѧ, начертава́етъ словеса̀ дꙋ́хомъ въ чи́стыхъ сердца́хъ послꙋ́шающихъ. Тогда̀ позна́етъ рече́нное, ка́кѡ бꙋ́дꙋтъ вѣ́рнїи наꙋче́ни бг҃омъ, и҆ ка́кѡ ᲂу҆чи́тъ бг҃ъ человѣ́ка ра́зꙋмꙋ, по проро́чествꙋ, дх҃омъ.121

к҃д. Зако́нъ за́повѣдей, серде́чнѡ дѣ́йствꙋемꙋю вѣ́рꙋ непосре́дственнѡ бы́ти разꙋмѣ́й. Ѿ неѧ́ бо всѧ́ка за́повѣдь и҆сточа́етсѧ, и҆ дꙋша́мъ просвѣще́нїе дѣ́йствꙋетъ, и҆́хже плоды̀ и҆́стинныѧ и҆ дѣ́йствꙋемыѧ вѣ́ры сꙋ́ть: воздержа́нїе и҆ любо́вь, и҆ коне́цъ бг҃ода́рное смире́нїе, любвѐ нача́ло и҆ ᲂу҆твержде́нїе.

к҃є. Сла́ва сꙋществꙋ́ющихъ нело́жна, є҆́сть и҆́стинный ра́зꙋмъ ви́димыхъ и҆ неви́димыхъ. Ви́димыхъ ᲂу҆́бѡ, чꙋ́вственныхъ: неви́димыхъ же, мы́сленныхъ и҆ слове́сныхъ, и҆ ᲂу҆́мныхъ и҆ бж҃е́ственныхъ.

к҃ѕ. Предѣ́лы правосла́вїѧ сꙋ́ть два̀ вѣ́ры догма́та ѿ чистоты̀ вѣ́дѣти, и҆ позна́ти ѿ себѐ, трⷪ҇цꙋ глаго́лю и҆ дво́ицꙋ. Трⷪ҇цꙋ ᲂу҆́бѡ въ є҆ди́ницѣ, несли́тнѣ и҆ несѣко́мѣ зрѣ́ти и҆ познава́ти: дво́ицꙋ же хрⷭ҇то́выхъ є҆сте́ствъ во є҆ди́ной ѵ҆поста́си, си́рѣчь є҆ди́наго сн҃а и҆ пре́жде воплоще́нїѧ, и҆ по воплоще́нїи во двою̀ є҆стествꙋ̑ и҆сповѣ́довати, и҆ вѣ́дѣти, во двою̀ хотѣ̑нїю бж҃е́ственнагѡ же и҆ человѣ́ческагѡ, несли́тнѡ сла́вима.

к҃з. Рожде́нїе, и҆ нерожде́нїе, и҆ и҆схожде́нїе, трѝ недви́жима и҆ непрелѡ́жна свѡ́йства прест҃ы́ѧ трⷪ҇цы, потре́бно и҆сповѣ́довати благоче́стнѡ. Ѻ҆ц҃а̀ ᲂу҆́бѡ, нерожде́нїе и҆ безнача́лїе: сн҃а же, рожде́нїе и҆ собезнача́лїе: дх҃а же ст҃а́гѡ, и҆схожде́нїе ѿ ѻ҆ц҃а̀, сн҃омъ же, ꙗ҆́коже речѐ дамаски́нъ, соприсносꙋ́щнимъ подава́ема.

к҃и. Є҆ди́на бы благода́ти вѣ́ра довлѣ́ла ко спасе́нїю, за́повѣдьми дѣ́йствꙋема дꙋ́хомъ, а҆́ще бы храни́ли, а҆ не ме́ртвꙋ и҆ недѣ́йственнꙋ па́че живо́й и҆ дѣ́йствꙋемой ѡ҆ хрⷭ҇тѣ̀ предпоче́тше. Довлѣ́етъ бо вѣ́рномꙋ воѡбраже́нїе и҆ жи́знь ѡ҆ хрⷭ҇тѣ̀ дѣ́йствꙋемыѧ вѣ́ры. Вѣ́рѣ бо въ сло́вѣ ме́ртвой и҆ нечꙋ́вственной невѣ́жество, а҆ не є҆́йже во благода́ти вѣ́рѣ, благочести́выхъ ны́нѣ наꙋчи́ло є҆́сть.

к҃ѳ. Проста́ѧ є҆ди́ница є҆́сть трⷪ҇ца, поне́же нека́чественна и҆ несло́жна трⷪ҇ца во є҆ди́ницѣ. Трїѷпоста́сенъ бо є҆́сть бг҃ъ, несли́тно и҆мѣ́ѧ є҆́же дрꙋ́гъ дрꙋ́га вмѣще́нїе всѧ́чески.

л҃. Тро́ичнѣ во все́мъ бг҃ъ познава́етсѧ же и҆ глаго́летсѧ: неѡпи́санъ бо. Всѣ́хъ бо є҆́сть содержи́тель и҆ промысли́тель чрез̾ сн҃а, ѡ҆ ст҃о́мъ дс҃ѣ: и҆ нѣ́сть є҆ди́нъ внѣ̀, и҆лѝ без̾ дрꙋги́хъ ли́цъ глаго́лемь и҆ разꙋмѣва́емь, и҆дѣ́же а҆́ще и҆менꙋ́етсѧ.

л҃а. Ꙗ҆́коже въ человѣ́кѣ є҆́сть ᲂу҆́мъ, и҆ сло́во и҆ дꙋ́хъ, и҆ нижѐ ᲂу҆́мъ без̾ сло́ва, нижѐ сло́во без̾ дꙋ́ха, и҆ дрꙋ́гъ въ дрꙋ́зѣ сꙋ́ща, и҆ ѡ҆ себѣ̀. Оу҆́мъ бо сло́вомъ глаго́летъ, и҆ сло́во дꙋ́хомъ ꙗ҆влѧ́етсѧ. По примѣ́рꙋ семꙋ̀, те́менъ ѡ҆́бразъ без̾име́нныѧ и҆ началоѡбра́зныѧ трⷪ҇цы но́ситъ человѣ́къ: є҆́же по ѡ҆́бразꙋ сꙋ́щее вкра́тцѣ и҆ ѡ҆ се́мъ ꙗ҆влѧ́ѧ.

л҃в. Оу҆́мъ ᲂу҆́бѡ ѻ҆ц҃ъ, сло́во же сн҃ъ, дх҃ъ же ст҃ы́й, вои́стиннꙋ дх҃ъ, бг҃оно́снїи ѻ҆тцы̀ при́точнѣ ᲂу҆ча́тъ, пресꙋ́щнꙋю ст҃ꙋ́ю и҆ преесте́ственнꙋю догма́тствꙋюще трⷪ҇цꙋ. є҆ди́наго бг҃а въ трїе́хъ ѵ҆поста́сѣхъ, на́мъ вѣ́рꙋ и҆́стиннꙋю и҆ ко́твꙋ наде́жды ѡ҆ста́вльше. Є҆́же бо вѣ́дѣти є҆ди́наго, по писа́нїю, бг҃а, є҆́сть ко́рень безсме́ртїѧ, и҆ вѣ́дѣти держа́вꙋ трїѷпоста́сныѧ є҆ди́ницы всецѣ́лаѧ пра́вда. И҆лѝ па́ки, потре́бно є҆ѵⷢ҇льски рече́нное си́це разꙋмѣ́ти: Се́ же є҆́сть живо́тъ вѣ́чный, да зна́ютъ тебѐ є҆ди́наго и҆́стиннаго бг҃а въ трїе́хъ ѵ҆поста́сѣхъ, и҆ є҆го́же посла́лъ є҆сѝ і҆и҃са хрⷭ҇та̀,122 во двою̀ є҆стествꙋ̑ и҆ хотѣ̑нїю.

л҃г. Мꙋ̑ки разли́чни сꙋ́ть, ꙗ҆́коже и҆ благи́хъ возмє́здїѧ. Всѧ́ же мꙋ̑ки под̾ а҆́домъ, по писа́нїю глаго́лющемꙋ: въ землѝ те́мной и҆ мра́чной, въ землѝ тьмы̀ вѣ́чныѧ,123 и҆дѣ́же грѣ̑шницы и҆ пре́жде живꙋ́тъ сꙋда̀, и҆ и҆зрече́нїемъ па́ки въ ню̀ возвраща́ютсѧ. Є҆́же бо: да возвратѧ́тсѧ грѣ̑шницы во а҆́дъ:124 и҆, сме́рть ᲂу҆пасе́тъ и҆̀хъ,125 что̀ и҆́но є҆́сть, то́чїю коне́чный ѿвѣ́тъ и҆ ѡ҆сꙋжде́нїе вѣ́чно;

л҃д. Ѻ҆́гнь, и҆ тьма̀, и҆ че́рвь, и҆ та́ртаръ є҆́сть всѧ́кое сладостра́стїе, и҆ всеѻ́бщее тьмы̀ неразꙋ́мїе, и҆ є҆́же во всѣ́хъ движе́нїе любосла́стїѧ, и҆ тре́петъ, и҆ смра́дъ ѕлово́нный грѣха̀. Ꙗ҆̀же ᲂу҆́бѡ ѡ҆брꙋче́нїе и҆ нача́тки мꙋ́къ, ᲂу҆жѐ ѿсю́дꙋ въ дꙋша́хъ грѣ́шничихъ дѣ́йствꙋѧ, навыкнове́нїемъ ꙗ҆влѧ́ютсѧ

л҃є. Навыкновє́нїѧ страсте́й сꙋ́ть ѡ҆брꙋчє́нїѧ мꙋче́нїй, ꙗ҆́коже и҆ црⷭ҇твїѧ нбⷭ҇нагѡ дѣ̑йства добродѣ́телей. Потре́бно же разꙋмѣ́ти и҆ нарица́ти за́пѡвѣди ᲂу҆́бѡ дѣ́йства: добродѣ́тели же навыкновє́нїѧ, ꙗ҆́коже и҆ ѕло́бы, по ᲂу҆чаще́нїю навыкновє́нїѧми нарица́ютъ.

л҃ѕ. Ра̑вна возме́здїй воздаѧ̑нїѧ, ѿ мно́гихъ нера̑вна ви̑димаѧ сꙋ́ть. Си̑мъ ᲂу҆́бѡ вѣ́чнꙋю жи́знь, тѣ̑мже вѣ́чнꙋю мꙋ́кꙋ бж҃е́ственнаѧ пра́вда воздае́тъ. Ѻ҆бои́ же, ны́нѣшнїй вѣ́къ до́брѣ и҆лѝ ѕлѣ̀ преше́дше, по дѣлѡ́мъ воздаѧ̑нїѧ и҆мѣ́ти бꙋ́дꙋтъ. Коли́чество же и҆ ка́чество прича́стїѧ, по страсте́й и҆лѝ добродѣ́телей навыкнове́нїємъ и҆ дѣ́йствꙋ воспрїи́мꙋтъ.

л҃з. Є҆зє́ра ѻ҆́гненна сꙋ́ть сладостра́ствꙋющыѧ дꙋ́шы, въ ни́хже ꙗ҆́коже тимѣ́нїе смердѧ́щее, є҆́сть смра́дъ страсте́й. Неꙋсыпа́ющаго че́рвїѧ пита́етъ блꙋда̀ по́хотное пло́ти неꙋдержа́нїе, и҆ ѕмі́й, и҆ жа̑бъ, и҆ пїѧ́вицъ, по́хотей лꙋка́выхъ, скве́рныхъ и҆ ꙗ҆дови́тыхъ по́мыслѡвъ же и҆ бѣсѡ́въ. Сицево́е состоѧ́нїе ѿсю́дꙋ прїе́млетъ ѡ҆брꙋче́нїе та́мошнїѧ мꙋ́ки.

л҃и. Ꙗ҆́коже мꙋ́къ нача́тки въ дꙋша́хъ грѣ́шныхъ сокрове́нни сꙋ́ть: си́це и҆ благи́хъ ѡ҆брꙋчє́нїѧ въ сердца́хъ пра́ведныхъ, и҆ дѣ́йствꙋютъ дꙋ́хомъ и҆ прича́ствꙋютсѧ. Ца́рствїе бо небе́сное є҆́сть добродѣ́тельное житїѐ, ꙗ҆́коже и҆ мꙋ́ка страсте́й навыкнове́нїе.

л҃ѳ. Но́щь грѧдꙋ́щаѧ є҆́сть, по словесѝ гдⷭ҇ню, соверше́нное недѣ́ланїе бꙋ́дꙋщїѧ тьмы̀.126 И҆лѝ по дрꙋго́мꙋ ѡ҆́бразꙋ а҆нті́хрїстъ, но́щь и҆ тьма̀, и҆ є҆́сть и҆ нарица́етсѧ. И҆лѝ па́ки по нра́вственномꙋ сло́вꙋ, коегѡ́ждо днѧ̀ нерадѣ́нїе, є҆́же ꙗ҆́кѡ тьма̀ ᲂу҆мерщвлѧ́етъ дꙋ́шꙋ сно́мъ нечꙋ́вствїѧ. Ꙗ҆́коже бо но́щь ᲂу҆сыплѧ́етъ всѣ́хъ, и҆ ѡ҆́бразъ є҆́сть сме́рти по ᲂу҆мерщвле́нїю: си́це и҆ но́щь бꙋ́дꙋщїѧ тьмы̀ содѣ́ловаетъ грѣ́шникѡвъ ме́ртвыми нечꙋ́вственнымъ пїѧ́нствомъ болѣ́зней.

м҃. Сꙋ́дъ мі́ра сегѡ̀ є҆́сть, по є҆ѵⷢ҇льскомꙋ словесѝ, невѣ́рїе нечести́выхъ, по семꙋ̀: Не вѣ́рꙋѧй ᲂу҆жѐ ѡ҆сꙋжде́нъ є҆́сть:127 и҆ сꙋди́тєльнаѧ про́мысла къ воспѧще́нїю, и҆лѝ ко ѡ҆браще́нїю приведє́нїѧ, и҆ предложе́нїй на́шихъ во благи́хъ и҆лѝ ѕлы́хъ ᲂу҆клоне́нїе по дѣ́йствꙋ, по семꙋ̀: ѡ҆чꙋжде́ни бы́ша грѣ̑шницы ѿ ложе́снъ:128 къ невѣ́рїю бо и҆ наказа́нїю и҆ дѣѧ́нїю, пра́ведный бж҃їй сꙋ́дъ тогда̀ ꙗ҆влѧ́етсѧ. Ѻ҆́вѣхъ ᲂу҆́бѡ наказꙋ́ѧ, ѻ҆́вѣхъ же ми́лꙋѧ, ѻ҆́вѣмъ же вѣнцы̀ и҆лѝ мꙋ́кꙋ даѧ̀. Пе́рвїи бо сꙋ́ть всѧ́чески нечести́ви: вторі́и же, а҆́ще и҆ вѣ́рнїи, но неради́ви: сегѡ̀ ра́ди и҆ человѣколю́бнѣ наказꙋ́ютсѧ. Соверше́ннїи же, и҆лѝ въ добродѣ́телѣхъ и҆лѝ ѕлы́хъ паде́нїѧхъ бы́вше, воздаѧ̑нїѧ и҆мѣ́ти бꙋ́дꙋтъ.

м҃а. А҆́ще не соблюде́тсѧ нескве́рно, и҆лѝ не ѡ҆чи́ститсѧ, ꙗ҆́коже бѣ̀ є҆стество̀ дꙋ́хомъ, невозмо́жно бы́ти во є҆ди́но тѣ́ло и҆ дх҃ъ ѡ҆ хрⷭ҇тѣ̀, ны́нѣ же и҆ въ бꙋ́дꙋщее сочета́нїе. Рꙋ́бище бо ве́тхости страсте́й, къ но́вой ри́зѣ благода́ти къ восполне́нїю, содержи́тельнаѧ и҆ соедини́тельнаѧ дх҃а си́ла прилага́ти не ѡ҆бы́че.

м҃в. Равноче́стїе къ сꙋ́щемꙋ ѡ҆ хрⷭ҇тѣ̀ ѡ҆́бразꙋ и҆мѣ́ти бꙋ́детъ, ѡ҆бновле́нїе дх҃а прїѧ́вый тꙋ́не, и҆ сохрани́вый, преесте́ственное ѡ҆боже́нїе, тогда̀ стражда̀ неизрече́ннѡ: є҆ди́нъ бо ѡ҆ хрⷭ҇тѣ̀, и҆лѝ ᲂу҆́дъ хрⷭ҇то́въ не бꙋ́детъ, не содѣ́ѧвыйсѧ ѿсю́дꙋ благода́ти прича́стникъ, ѡ҆́браза ра́зꙋма и҆ и҆́стины, но а҆пⷭ҇лꙋ, не и҆мꙋ́щъ въ себѣ̀.129

м҃г. Оу҆подо́бисѧ ца́рствїе небе́сное ски́нїи бг҃осоѡрꙋже́ннѣй, по мѡѷсе́евой во двою̀ завѣ̑сꙋ, ᲂу҆ставле́нїѧ бꙋ́дꙋщагѡ вѣ́ка и҆мꙋ́щее. И҆ въ пе́рвꙋю ᲂу҆́бѡ ски́нїю всѝ, є҆ли́цы свѧще́нницы благода́ти вни́дꙋтъ: во вторꙋ́ю же, ꙗ҆́кѡ ᲂу҆́мнꙋю, є҆ли́цы ѿсю́дꙋ во мра́кѣ бг҃осло́вїѧ сщ҃еннонача́льнѣ въ соверше́нствѣ тро́ичнѣ слꙋжи́вшїи, і҆и҃са слꙋжбонача́льника и҆ свѧщеннонача́льника пе́рваго въ трⷪ҇цѣ и҆мꙋ́ще хода́таѧ, въ ски́нїю, ю҆́же водрꙋзѝ. входѧ́ще, и҆ свѣтлѣ́е зарѧ́ми тогѡ̀ ѡ҆сїѧва́еми.

м҃д. Мнѡ́ги ѻ҆би́тєли наречѐ сп҃си́тель,130 разли̑чнаѧ восхождє́нїѧ и҆ преспѣ̑ѧнїѧ та́мошнѧгѡ состоѧ́нїѧ. Є҆ди́но ᲂу҆́бѡ є҆́сть ца́рствїе, мнѡ́га же внꙋ́трь разли̑чїѧ и҆́мать: ꙗ҆́кѡ бы́ти небє́снымъ и҆ земны̑мъ, по добродѣ́тели же и҆ ра́зꙋмꙋ коли́чество ѡ҆боже́нїѧ и҆мꙋ́щымъ. И҆́на бо сла́ва со́лнцꙋ, и҆ и҆́на лꙋнѣ̀, и҆ и҆́на ѕвѣзда́мъ, и҆ ѕвѣзда̀ ѿ ѕвѣзды̀ ра́знствꙋетъ во сла́вѣ,131 ꙗ҆́коже глаго́летъ бж҃е́ственный а҆пⷭ҇лъ: а҆́ще и҆ всѝ на є҆ди́ной бж҃е́ственной тве́рди сїѧ́ютъ.

м҃є. Вма́лѣ человѣ́къ неединожи́теленъ а҆́гг҃лѡмъ быва́етъ, и҆ а҆́ки безпло́тенъ нетлѣ́ненъ, и҆́же ᲂу҆́мъ слеза́ми ѡ҆чи́стивый, дꙋ́шꙋ же ѿсю́дꙋ воскреси́вый дх҃омъ: пло́ть же ра́зꙋмꙋ и҆ покори́вый и҆ повинꙋ́вый, свѣтови́денъ же и҆ ѻ҆́гненъ ѡ҆́бразъ бж҃е́ственныѧ красоты̀ сотвори́вый є҆стество́мъ бре́нное человѣкоподо́бїе своѐ. Поне́же нетлѣ́нїе тѣле́съ є҆́сть, мокро́тъ ѡ҆скꙋдѣ́нїе и҆ дебельства̀.

м҃ѕ. Зе́млено бꙋ́детъ тѣ́ло нетлѣ́нїѧ, не и҆мꙋ́щее мокро́тъ и҆ дебе́лости, претворѧ́емо неизрече́ннѡ и҆з̾ дꙋше́внагѡ въ дꙋхо́вно тѣ́ло, ꙗ҆́кѡ и҆ пе́рстнꙋ бы́ти є҆мꙋ̀ и҆ небе́снꙋ то́нкостїю бг҃овидѣ́нїѧ. Ꙗ҆ково́ бо со́здано бѣ̀ ѿ нача́ла, таково̀ и҆ воскре́снетъ: ꙗ҆́кѡ да соѡбра́зно бꙋ́детъ ѡ҆́бразꙋ сн҃а бж҃їѧ, по всецѣ́ломꙋ ѡ҆боже́нїѧ прича́стїю.

м҃з. Землѧ̀ кро́ткихъ є҆́сть ца́рствїе небе́сное, и҆лѝ бг҃омꙋ́жное сн҃а бж҃їѧ жи́тельство, въ не́же взыдо́хомъ, и҆лѝ восхо́димъ, ѿ негѡ́же и҆ назда́ни бы́хомъ, є҆́же бо благода́ти рожде́нїе сыноположе́нїѧ, и҆ воскресе́нїемъ ѡ҆бновле́нїе прїѧ́вше, и҆лѝ па́ки: землѧ̀ ст҃а́ѧ є҆́сть, ѡ҆божи́вшеесѧ є҆стество̀, и҆лѝ не́гли и҆ ѡ҆чи́щшаѧсѧ землѧ̀ сїѧ̀, ᲂу҆ землены́хъ по досто́инствꙋ сицевы́хъ: и҆лѝ по дрꙋго́мꙋ ᲂу҆мышле́нїю: землѧ̀ наслѣ́дствꙋемаѧ є҆́сть вои́стиннꙋ ст҃ы́ми, безво́лненнаѧ є҆́же сꙋ́щагѡ па́че ᲂу҆ма̀ ми́ра бж҃е́ственнаѧ тишина̀, въ ню́же ро́дъ пра́выхъ всели́тсѧ, нечесомꙋ́ же ѿ ꙗ҆̀же въ сꙋ́щихъ ѻ҆́крестъ шꙋмѧ́щꙋ и҆лѝ смꙋща́ющꙋ и҆̀хъ.

м҃и. Ѻ҆бѣтова́нїѧ землѧ̀ є҆́сть безстра́стїе, въ не́мже и҆стека́етъ, ꙗ҆́кѡ ме́дъ и҆ млеко̀, весе́лїе дꙋ́ха.

м҃ѳ. Внꙋ́треннее сло́во ст҃і́и дрꙋ́гъ въ дрꙋ́зѣ въ бꙋ́дꙋщемъ вѣ́цѣ вѣща́ютъ та́йнѡ, дх҃омъ ст҃ы́мъ и҆зглаша́емо.

н҃. А҆́ще не ᲂу҆вѣ́мы, ꙗ҆ковы́хъ на́съ сотворѝ бг҃ъ, не позна́емъ, ꙗ҆ковы́хъ на́съ сотворѝ грѣ́хъ.

н҃а. Ра́вни во́зрастомъ сꙋ́ть въ дс҃ѣ, є҆ли́цы и҆сполне́нїе хрⷭ҇то́ва соверше́нства ѿсю́дꙋ воспрїѧ́ша.

н҃в. И҆́хже трꙋды̀, си́хъ и҆ воздаѧ̑нїѧ. Коли́чество же и҆лѝ ка́чество, си́рѣчь мѣ́рꙋ, ꙗ҆кова̀ є҆́сть, чи́нъ и҆ состоѧ́нїе, та́мѡ прича́стїемъ ꙗ҆влѧ́ютъ.

н҃г. Оу҆мы̀, си́рѣчь равноа́гг҃ли, глаго́летъ писа́нїе, бꙋ́дꙋтъ сы́нове воскресе́нїѧ хрⷭ҇то́ва,132 нетлѣ́нїемъ и҆ ѡ҆боже́нїемъ ст҃і́и.

н҃д. Въ бꙋ́дꙋщемъ вѣ́цѣ а҆́гг҃ли и҆ ст҃і́и, глаго́лютъ, преꙋспѣва́юще въ приложе́нїи дарова́нїй никогда́же преста́нꙋтъ и҆лѝ ѡ҆слабѣ́ютъ въ жела́нїи благи́хъ. Оу҆мале́нїѧ бо и҆лѝ и҆змѣне́нїѧ ѿ добродѣ́тели на ѕло́бꙋ ѻ҆́ный вѣ́къ не и҆́мать.

н҃є. Соверше́нна мꙋ́жа непщꙋ́й бы́ти ны́нѣ, и҆́же подо́бїе хрⷭ҇то́выхъ превозраще́нїй прїѧ̀ въ себѣ̀, ꙗ҆́кѡ во ѡ҆брꙋче́нїи: въ бꙋ́дꙋщемъ же вѣ́цѣ соверше́ннымъ показꙋ́етъ ѡ҆боже́нїѧ си́ла.

н҃ѕ. Ра́вно и҆́мать є҆динови́дныхъ и҆ досто́инство и҆ ѡ҆боже́нїе въ бꙋ́дꙋщемъ вѣ́цѣ, по добродѣ́тели ѿсю́дꙋ къ превозраще́нїѧмъ дꙋхѡ́внымъ содѣ́лавшїйсѧ соверше́нъ.

н҃з. Сла́ва и҆́стинна є҆́сть ра́зꙋмъ и҆лѝ бг҃олѣ́пное зрѣ́нїе дꙋхо́вно, и҆лѝ догма́тѡвъ и҆звѣ́ствованное вѣ́дѣнїе, и҆ вѣ́ры и҆́стинныѧ позна́нїе.

н҃и. Оу҆́жасъ є҆́сть, є҆́же къ ᲂу҆разꙋмѣ̑ннымъ же и҆ соединє́ннымъ великолѣ́пныѧ сла́вы дꙋше́вныхъ си́лъ соверше́нное возвыше́нїе. И҆лѝ па́ки: ᲂу҆́жасъ є҆́сть чи́стое и҆ всецѣ́лое къ сꙋ́щей во свѣ́тѣ безконе́чнѣй си́лѣ просте́ртїе: и҆зстꙋпле́нїе же не то́чїю дꙋше́вныхъ си́лъ къ нб҃сѝ восхище́нїе, но и҆ са́магѡ чꙋ́вства всѧ́чески по всемꙋ̀ и҆зстꙋпле́нїе: раче́нїе же сꙋгꙋ́бое є҆́сть жела́нїѧ подви́жное дх҃о́вное пїѧ́нство.

н҃ѳ. Вои́стиннꙋ два̀ сꙋ́ть ѡ҆ дс҃ѣ и҆зстꙋпи́тєльнаѧ рачє́нїѧ: серде́чное и҆ и҆зстꙋпи́тельное. Ѻ҆́но ᲂу҆́бѡ є҆щѐ просвѣща́емыхъ є҆́сть: сїе́ же въ любвѝ ᲂу҆соверши́вшихсѧ: ѻ҆боѧ́ же дѣ́йствꙋемый ᲂу҆́мъ ѿ чꙋ́вства и҆згонѧ́ютъ. Занѐ раче́нїе бж҃е́ственно є҆́сть, пїѧ́нство дꙋ́ха къ лꙋ́чшемꙋ є҆сте́ственныхъ смы́слѡвъ, и҆́мже пїѧ́нство и҆ чꙋ́вство ѿе́млетсѧ ѿ ѡ҆держа́нїй.

ѯ҃. Нача́ло по́мыслѡвъ и҆ вина̀ є҆́сть раздѣ́льшаѧсѧ престꙋпле́нїемъ человѣ́ка є҆динови́днаѧ проста́ѧ па́мѧть, є҆́юже и҆ бж҃е́ственнꙋю погꙋбѝ, содѣ́лавшисѧ свои́ми си́лами сло́жна и҆з̾ просто́й, и҆ разли́чна ѿ є҆динови́дной поги́бе.

ѯ҃а. И҆сцѣле́нїе є҆́сть началобы́тныѧ па́мѧти, ѿ лꙋка́выѧ по́мыслѡвъ пагꙋборо́дныѧ па́мѧти, къ дре́вней простотѣ̀ є҆ѧ̀ возвраще́нїе: ѻ҆рꙋ́дїе бо ѕло́бы преслꙋша́нїе, не то́чїю дꙋшѝ ко благо́мꙋ простꙋ́ю па́мѧть погꙋбѝ, но и҆ всѣ̀ є҆ѧ̀ си̑лы растлѝ, є҆сте́ственныѧ жела̑нїѧ къ добродѣ́тели ѡ҆мрачи́вшо. И҆сцѣлѧ́етъ же па́мѧть вои́стиннꙋ бж҃е́ственнаѧ ᲂу҆тверди́вшаѧсѧ пребыва́тельнаѧ моли́твою па́мѧть ѿ є҆́же по є҆стествꙋ̀ сꙋ́щагѡ ко є҆́же вы́ше є҆стества̀ сꙋ́щемꙋ раствори́вшисѧ дх҃омъ.

ѯ҃в. Страсте́мъ ᲂу҆́бѡ вины̑ сꙋ́ть грѣхѡ́внаѧ дѣѧ̑нїѧ, по́мыслѡмъ же стра́сти, мечта́нїѧмъ же по́мыслы, мы́слемъ же па́мѧть, па́мѧти же забве́нїе, забве́нїе же ражда́етъ невѣ́жество: невѣ́жествꙋ же вина̀ разлѣне́нїе, разлѣне́нїе же ражда́етъ по́хоти вожделѣ́нїе, вожделѣ́нїй же ма́ти превраще́нїѧ движе́нїе, движе́нїѧ же дѣ́йство дѣѧ̑нїѧ, дѣѧ́нїе же є҆́сть ѕла̀ безслове́сное жела́нїе и҆ прилѣпле́нїе къ чꙋ́вствєннымъ и҆ къ чꙋ́вствамъ.

ѯ҃г. Во слове́снѣмъ ᲂу҆́бѡ по́мыслы, въ ꙗ҆́ростнѣмъ же ѕвѣ̑рскїѧ стра̑сти, въ жела́тельнѣмъ же па́мѧть ско́тскагѡ похотѣ́нїѧ, во ᲂу҆мѣ́ же мечта́тєльнаѧ воѡбражє́нїѧ, въ размышле́нїи же мы̑сли дѣ́йствꙋютъ и҆ возсїѧва́ютъ.

ѯ҃д. Тече́нїе рѣ́чное є҆́сть наше́ствїе помыслѡ́въ лꙋка́выхъ, въ ни́хже прило́гъ, съ прило́гомъ же сосложе́нїе грѣха̀, ꙗ҆́коже наводне́нїе волнꙋ́емо быва́етъ, покрыва́ющо се́рдце.

ѯ҃є. Тимѣ́нїе глꙋбины̀, мокро́тнꙋю разꙋмѣ́й сла́сть, и҆лѝ блꙋ́днꙋю нечистотꙋ̀, и҆лѝ и҆ веще́ственныхъ стѧжа́нїй ѡ҆бремене́нїе: и҆́миже ѡ҆тѧгоща́емь встра́стный ᲂу҆́мъ во глꙋбинꙋ̀ ѿча́ѧнїѧ по́мыслами себѐ погрꙋжа́етъ.

ѯ҃ѕ. По́мыслами мно́жицею и҆ словеса̀ веще́й писа́нїе нарица́етъ, ꙗ҆́коже и҆ помышлє́нїѧ словеса́ми, и҆ словеса̀ противоѡбра́тнѣ помышле́нїѧми. Сїе́ же быва́етъ, поне́же движе́нїе таковы́хъ са́мо ѡ҆ себѣ̀ невеще́ственно є҆́сть: веща́ми же воѡбража́етсѧ въ ви́дъ, и҆ претворѧ́етсѧ: и҆ си́мъ ѡ҆́бразомъ прило́гъ ꙗ҆влѧ́емый познава́етсѧ и҆ глаго́летсѧ.

ѯ҃з. По́мыслы, словеса̀ бѣсѡ́въ сꙋ́ть и҆ страсте́й предте́чи, ꙗ҆́коже и҆ дѣ́лъ словеса̀ и҆ помышлє́нїѧ: невозмо́жно бо є҆́сть, бла́го и҆лѝ ѕло̀ содѣ́ѧти, не прїѧ́въ пе́рвѣе своегѡ̀ по́мысла. Поне́же по́мыслъ є҆́сть, безви́днагѡ прило́га движе́нїе ꙗ҆ковы́хъ ли́бо веще́й.

ѯ҃и. Вещество̀ веще́й ражда́етъ просты̑ѧ по́мыслы, бѣсо́вскїй же прило́гъ лꙋка́выми содѣ́лываетъ. Разли́чїе ᲂу҆́бѡ и҆́мꙋтъ є҆сте́ственнїи словеса̀ и҆ по́мыслы ѿ чрезъесте́ственныхъ и҆ вышеесте́ственныхъ по сравне́нїю.

ѯ҃ѳ. По́мыслы ра́вное и҆́мꙋтъ дѣ́йство по сꙋ́щемꙋ во мгнове́нїи и҆змѣне́нїю, є҆сте́ственнїи ᲂу҆́бѡ къ чрезъесте́ственнымъ, чрезъесте́ственнїи же къ вышеесте́ственнымъ а҆́бїе ѡ҆браща́еми: вино́вни же сꙋ́ть по́мыслы сꙋ́щемꙋ дрꙋ́гъ въ дрꙋ́зѣ превраще́нїю и҆ рожде́нїю, и҆̀же ѿ вещества̀, на бѣсѡ́вскїѧ превраща́ющесѧ: а҆ и҆̀же ѿ прило́га по́мыслы на веще́ственные: ꙗ҆́коже и҆ є҆сте́ственнїи по́мыслы бж҃е́ственни, бж҃е́ственнїи же вышеесте́ственни ражда́ютъ: ко́еждо бо къ сро́дномꙋ себѣ̀ своѐ дви́жительное и҆змѣне́нїе и҆́мать по четвери́чнѡ раздѣле́ннѣй винѣ̀ и҆ рожде́нїю.

ѻ҃. Вѣ́ждь ꙗ҆́кѡ вины̑ предположе́ни сꙋ́ть помыслѡ́мъ, по́мыслы же мечта́нїѧмъ, мечта̑нїѧ же страсте́мъ, стра̑сти же бѣсовѡ́мъ, ꙗ҆́коже цѣ́пь нѣ́каѧ и҆ чи́нъ въ безчи́нныхъ дꙋсѣ́хъ, лꙋка́внѣ, и҆ є҆ди́на дрꙋгі́ѧ держа́щисѧ свѧ́зани сꙋ́ть. Ѻ҆ба́че стра́нное и҆ несро́дное человѣ́кꙋ, ничто́же дѣ́йствꙋетъ са́мо ѡ҆ себѣ̀, но ѿ бѣсѡ́въ дѣ́йствꙋемо є҆́сть: ниже́ бо по́мыслъ прило́гствꙋетъ когда̀, нижѐ мечта́нїе і҆дѡлотвори́тсѧ, нижѐ стра́сть дѣ́йствꙋетъ, кромѣ̀ ѻ҆́тай сокрове́нныѧ бѣсо́вскїѧ си́лы. А҆́ще бо и҆ падѐ сатана̀ сокрꙋши́всѧ, но мно́жае крѣпи́тсѧ на́шею лѣ́ностїю, кича́сѧ ѡ҆ на́съ.

ѻ҃а. Воѡбража́ютъ ᲂу҆́мъ на́шъ, па́че же воѡбража́ютсѧ ѿ на́съ сами́хъ, и҆ прило́гствꙋютъ по навыкнове́нїю, ѡ҆блада́ющыѧ и҆ дѣ́йствꙋющыѧ въ дꙋшѣ̀ стра̑сти: винꙋ́ бо къ і҆дѡлотворе́нїю стра́стное навыкнове́нїе бѣ́сове и҆́мꙋтъ. И҆́мать же винꙋ̀ мечта́нїе тро́йственнѣ, и҆змѣнѧ́ющꙋю зра́ки дꙋхѡ́въ, по прича́стномꙋ дꙋшѝ сво́йствꙋ: ꙗ҆́коже и҆ мечта́нїю тро́йственнꙋ бы́ти во пти́цахъ, ѕвѣре́хъ, скотѣ́хъ, къ жела́тельной, ꙗ҆́ростной и҆ слове́сной дꙋшє́внымъ си́ламъ. Трі́и бо нача́льнїи стра̑сти, на трїе́хъ при́снѡ воѡрꙋжа́ютсѧ, и҆ въ не́йже дꙋша̀ ᲂу҆ка́чествисѧ стра́сти, къ то́й по сро́дствꙋ воѡбража́ютсѧ на́мъ и҆ прихо́дѧтъ.

ѻ҃в. Ꙗ҆́кѡ ѻ҆́гнь ᲂу҆́бѡ мно́гажды и҆ ꙗ҆́кѡ ᲂу҆́глїе, бѣ́сове сласте́й прихо́дѧтъ. Занѐ сластолю́бнїи дꙋ́си жела́тельное разжиза́ютъ, ꙗ҆́ростное возмꙋща́ютъ, слове́сное же смꙋща́юще помрача́ютъ дꙋ́шꙋ: разжже́нїѧ бо, смꙋще́нїѧ и҆ тьмы̀ вина̀ нача́льнѣйшаѧ и҆з̾ страсте́й сла́сть.

ѻ҃г. Но́щь страсте́й, неразꙋ́мїѧ тьма̀ є҆́сть. И҆лѝ па́ки: но́щь є҆́сть, роди́тельное страсте́й держа́вствованїе, въ не́мже ца́рствꙋетъ тьмы̀ нача́льникъ.

ѻ҃д. Во вре́мѧ дѣ́йства страсте́й ѻ҆́вїи по́мыслы пред̾и́дꙋтъ, ѻ҆́вїи же послѣ́дꙋютъ. Пред̾и́дꙋтъ ᲂу҆́бѡ по́мыслы мечта́нїй, мечта́нїѧмъ же послѣ́дꙋютъ стра̑сти, стра̑сти ᲂу҆́бѡ бѣсѡ́въ предварѧ́ютъ, бѣ́сове же послѣ́дꙋютъ страсте́мъ.

ѻ҃є. Нача́ло страсте́й и҆ вина̀, є҆́сть ѕлоꙋпотребле́нїе: ѕлоꙋпотребле́нїѧ же, превраще́нїе: превраще́нїѧ же, преклоне́нїе во́льнагѡ навыкнове́нїѧ: хотѣ́нїѧ же и҆скꙋ́съ є҆́сть прило́гъ: прило́га же бѣ́сове, про́мысломъ попꙋща́еми пока́зовати, каково̀ на́ше є҆́сть самовла́стїе.

ѻ҃ѕ. Ꙗ҆́дъ жа́ла грѣхо́внагѡ, приводѧ́щагѡ къ сме́рти, є҆́сть стра́стное навыкнове́нїе дꙋшѝ: неподви́женъ бо и҆́мать и҆ непрело́женъ нра́въ, и҆́же страстьмѝ ᲂу҆ка́чествовавыйсѧ во́льнѣ.

ѻ҃з. Стра̑сти глаго́лютсѧ многоѡбра́знѣ: раздѣлѧ́ютсѧ же на тѣлє́сныѧ и҆ дꙋшє́вныѧ. Тѣлє́сныѧ раздѣлѧ́ютсѧ на болѣ́знєнныѧ и҆ согрѣши́тєльныѧ: болѣ́знєнныѧ раздѣлѧ́ютсѧ на недꙋ̑жныѧ и҆ наказа́тєльныѧ: дꙋшє́вныѧ же па́ки дѣлѧ́тсѧ на ꙗ҆́рѡстныѧ, по́хѡтныѧ и҆ словє́сныѧ: словє́сныѧ раздѣлѧ́ютсѧ на мечта́тєльныѧ и҆ размысли́тєльныѧ. И҆з̾ си́хъ ᲂу҆́бѡ ѻ҆́вїи сꙋ́ть по ѕлоꙋпотребле́нїю во́льни, ѻ҆́вїи же по нꙋ́ждѣ нево́льни, и҆ ꙗ҆́кѡ незазѡ́рны стра̑сти бы́ти глаго́лютсѧ, ꙗ҆̀же и҆ припослѣ́дѡванїѧ, и҆ є҆сте́ствєнна свѡ́йства ѻ҆тцы̀ нареко́ша.

ѻ҃и. И҆́ны сꙋ́ть тѣлє́сныѧ стра̑сти, и҆ и҆́ны дꙋшє́вныѧ, жела́тєльныѧ и҆́ны, и҆ ꙗ҆́рѡстныѧ и҆́ны, дрꙋгі̑ѧ сꙋ́ть стра̑сти слове́сности, и҆ и҆́ны ᲂу҆ма̀ и҆ мы́сли: прїѡбща́ютсѧ же дрꙋ́гъ дрꙋ́гꙋ, и҆ содѣ́йствꙋютъ є҆ди́ны дрꙋги̑мъ. Тѣлє́сныѧ ᲂу҆́бѡ жела́тєльнымъ, дꙋшє́вныѧ же ꙗ҆́рѡстнымъ. И҆ па́ки помы́слєнныѧ ко ᲂу҆́мнымъ, и҆ ᲂу҆́мныѧ къ мы́слєннымъ и҆ па̑мѧтнымъ страда́нїѧмъ.

ѻ҃ѳ. Ꙗ҆́ростныѧ ᲂу҆́бѡ ча̑сти стра̑сти сꙋ́ть: гнѣ́въ, го́ресть, во́пль, ѡ҆строже́лчїе, де́рзость, киче́нїе, надме́нность, и҆ а҆́ще что̀ дрꙋго́е. Жела́тєльныѧ ча̑сти: лихои́мство, нечистота̀, неѡбꙋзда́нїе, неꙋдержа́нїе, ненасыще́нїе, сластолю́бїе, сребролю́бїе, самолю́бїе, є҆́же всѣ́хъ страсте́й лютѣ́йшее. Плотскі̑ѧ же: блꙋ́дъ, прелюбодѣѧ́нїе, нечистота̀, стꙋдодѣѧ́нїе, непра́вда, чревобѣ́сїе, ᲂу҆ны́нїе, превозноше́нїе, любоꙋкраше́нїе, и҆ а҆́ще что̀ дрꙋго́е. Словє́сныѧ же ча̑сти сꙋ́ть: невѣ́рїе, хꙋла̀, лꙋка́вство, кова́рство, многопы́тство, двоедꙋ́шїе, ᲂу҆кори́зна, клевета̀, ѡ҆сꙋжде́нїе, ᲂу҆ничиже́нїе, кощꙋ́нство, лицемѣ́рїе, лжа̀, скверносло́вїе, бꙋесло́вїе, ле́сть, нарꙋга́нїе, ꙗ҆влѧ́тельство, человѣкоꙋго́дїе, выше́нїе, клѧтвопрестꙋпле́нїе, праздносло́вїе, и҆ прѡ́чаѧ. Оу҆́мныѧ же: мнѣ́нїе, возноше́нїе, велехвале́нїе, ра́спрѧ, рве́нїе, самоꙋго́дїе, пререка́нїе, непослꙋша́нїе, мечта̑нїѧ, примышлє́нїѧ, любопоказа̑нїѧ, славолю́бїе, горды́нѧ, пе́рвое и҆ послѣ́днее и҆з̾ всѣ́хъ ѕѡ́лъ. Мы́слєнныѧ же сꙋ́ть сїѧ̑: парє́нїѧ, глꙋмлє́нїѧ, плѣнє́нїѧ, помраче́нїе, ѡ҆слѣпле́нїе, ѿведє́нїѧ, прило́зи, сосложє́нїѧ, ᲂу҆клонє́нїѧ, превращє́нїѧ, препарє́нїѧ, и҆ подѡ́бнаѧ си̑мъ. И҆ кра́ткѡ рещѝ: всѧ̑, ꙗ҆̀же внѣ̀ є҆стества̀, ѕла̑ѧ трїе́мъ си́ламъ дꙋшє́внымъ сопримѣси́шасѧ, ꙗ҆́коже и҆ блага̑ѧ въ ни́хъ всѧ̑ совокꙋ́пнѣ быва́ютъ по є҆стествꙋ̀.

п҃. Ѽ дв҃дова къ бг҃ꙋ со ᲂу҆́жасомъ восклица́нїѧ! Оу҆диви́сѧ, глаго́люща, ра́зꙋмъ тво́й ѿ менѐ.133 Не возмога́ю бо къ немꙋ̀ крѣпча́йшꙋ сꙋ́щꙋ и҆ непости́жнꙋ, па́че моегѡ̀ немощна́гѡ ра́зꙋма и҆ си́лы сꙋ́щїѧ во мнѣ̀, ка́кѡ и҆ пло́ть сїѧ̀ непости́жна є҆́сть по сложе́нїю созда́нїѧ.

п҃а. Зако́ны є҆стества̀ сꙋ́ть ка́чествєннаѧ дѣ́йствꙋемыхъ ᲂу҆дѡ́въ сложє́нїѧ, є҆́же и҆ разли́чїѧ сло́во наречѐ, а҆́ки многоча̑стїѧ свои́хъ сво́йствъ. И҆лѝ па́ки: зако́нъ є҆сте́ственный є҆́сть, коегѡ́ждо ви́да и҆ ᲂу҆́да дѣ́йство въ си́лѣ. Ꙗ҆́коже бо бг҃ъ все́ю тва́рїю, си́це и҆ дꙋша̀ тѣле́сными ᲂу҆́ды и҆ дѣ́йствꙋетъ и҆ дви́жетъ кі́йждо ко своемꙋ̀ дѣ́йствꙋ. Здѣ̀ вопроси́ти потре́бно, кі́имъ ѡ҆́бразомъ ꙗ҆́рость и҆ вожделѣ́нїе бг҃оно́снїи мꙋ́жи, ѻ҆вогда̀ плотски́ми си́лы нарица́ютъ, ѻ҆вогда́ же дꙋше́вными; глаго́лемъ: ꙗ҆́кѡ ни коегѡ́ждо и҆́мꙋтъ разногла́сїѧ словеса̀ ст҃ы́хъ во и҆звѣ́стнѡ вѣ́дѧщихъ ѧ҆̀, но ѻ҆боѧ̑ и҆́стинствꙋютъ, и҆ по прили́чїю нарече́нїѧ премѣнѧ́ютъ ѕѣлѡ̀ премꙋ́дрѣ: неизрече́ннагѡ ра́ди ѻ҆бою̀ бытїѧ̀, во є҆́же бы́ти по вкꙋ́пѣ бытїѧ̀ ѡ҆́бразꙋ. Ꙗ҆́кѡ бы́ти соверше́ннѣй ᲂу҆́бѡ ѿсю́дꙋ дꙋшѣ̀, тѣ́лꙋ же несоверше́ннꙋ пита́тельнагѡ ра́ди возраще́нїѧ. Дꙋша́ бо сама̀ ѡ҆ себѣ̀ и҆́мать си́лꙋ и҆ жела́тєльна хотѣ̑нїѧ, и҆ ꙗ҆́ростнꙋ къ мꙋ́жествꙋ раче́нїѧ дви́жительнꙋ, ѿ созда́нїѧ є҆ѧ̀, слове́снѣй и҆ ᲂу҆́мнѣй со́зданнѣй бы́вшей. Не бы́сть бо создана̀ вкꙋ́пѣ съ не́ю ꙗ҆́рость безслове́сна и҆ безꙋ́мно жела́нїе, ꙗ҆́коже нижѐ бѣ̀ во пло́ти пе́рвѣе: но созда́нно нетлѣ́нно бѣ̀ кромѣ̀ мокро́тъ, ѿ ни́хже послѣ́дова жела́нїе и҆ ꙗ҆́рость ѕвѣ́рскаѧ. По преслꙋша́нїи бо, па́дшꙋ человѣ́кꙋ во тлю̀ и҆ дебельство̀ безслове́сныхъ, по нꙋ́ждѣ и҆ ꙗ҆́рость и҆ вожделѣ́нїе въ не́мъ возни́че. Сегѡ́ бо ра́ди и҆ сопротивлѧ́етсѧ хотѣ́нїю дꙋше́вномꙋ по ꙗ҆́рости же и҆ жела́нїю, є҆гда̀ ѡ҆блада́етъ. Внегда́ же покори́тсѧ ме́ртвенное слове́сномꙋ, послѣ́дꙋетъ дꙋшѣ̀ ко дѣ́йствꙋ благи́хъ. Є҆гда́ бо смѣси́шасѧ и҆ совокꙋ́пна бы́ша плотска̑ѧ приведє́ннаѧ съ дꙋше́ю свѡ́йства: тогда̀ ᲂу҆подо́бисѧ скотѡ́мъ, повинꙋ́всѧ зако́нꙋ грѣха̀, є҆сте́ственныѧ ра́ди нꙋ́жды, ско́тъ ѿ слове́снагѡ и҆ ѕвѣ́рь ѿ человѣ́ка бы́въ.

п҃в. Ꙗ҆́коже дꙋша̀ вдꙋнове́нїемъ сотворена̀ слове́сною, и҆ ᲂу҆́мною жи́зненнымъ вдохнове́нїемъ, ꙗ҆́рость и҆ по́хоть ско́тскꙋ не созда̀ съ не́ю бг҃ъ, но жела́нїѧ си́лꙋ вожделѣ́тельнꙋ и҆ къ не́й любле́нїѧ рачи́тельно мꙋ́жество. Си́це нижѐ тѣлесѝ созда́ннꙋ ꙗ҆́рость и҆ по́хоть безслове́снꙋ въ нача́лѣ вложѝ, послѣди́ бо сїѧ̑ преслꙋша́нїѧ ра́ди прїѧ̀ ме́ртвенно и҆ тлѣ́нно и҆ ско́тско, и҆́мже и҆ ᲂу҆подо́бисѧ, бы́вшо. Тѣ́ло бо, ꙗ҆́коже глаго́лютъ бг҃осло́вы, нетлѣ́нно создано̀ бы́сть, ꙗ҆ково́же и҆ воскре́снетъ, ꙗ҆́коже и҆ дꙋша̀ безстра́стна, а҆́ще и҆ прїѧ́тно тлѣ́нїѧ. Растлѣ́шасѧ же ѻ҆боѧ̑, и҆ сраствори́шасѧ ра́ди є҆сте́ственнагѡ зако́на вмѣще́нїѧ дрꙋ́гъ въ дрꙋ́га и҆ преподаѧ́нїѧ, си́рѣчь дꙋша̀ и҆ тѣ́ло. Ѻ҆́на ᲂу҆́бѡ страстьмѝ, па́че же бѣ́сы ᲂу҆ка́чествовавшисѧ: сїе́ же безсловє́снымъ скотѡ́мъ ᲂу҆подоблѧ́ѧсѧ, состоѧ́нїѧ дѣ́йствомъ и҆ ѡ҆блада́нїемъ тлѣ́нїѧ, и҆ къ є҆ди́номꙋ ѻ҆бои́хъ си́ламъ ᲂу҆стремле́ннымъ сꙋ́щымъ: є҆ди́нъ ско́тъ безслове́сенъ и҆ безꙋ́менъ ꙗ҆́ростїю и҆ по́хотїю бы́въ соверши́сѧ. И҆ си́це приложи́сѧ скотѡ́мъ, по писа́нїю, и҆ ᲂу҆подо́бисѧ и҆̀мъ,134 по всѧ́комꙋ ѡ҆́бразꙋ.

п҃г. Нача́ло добродѣ́телей и҆ и҆сто́чникъ є҆́сть благо́е предложе́нїе, си́рѣчь жела́нїе добра̀. Ꙗ҆́коже бг҃ъ є҆́сть вина̀ и҆ и҆сто́чникъ всѧ́кагѡ бла́га, добра́ же нача́ло вѣ́ра, па́че же хрⷭ҇то́съ ка́мень вѣ́ры, є҆гѡ́же нача́ло и҆ ѡ҆снова́нїе и҆́мамы всѣ́хъ добродѣ́телей: ѡ҆ не́мже стои́мъ, и҆ зи́ждемъ всѧ́кое дѣ́ло бла́го. Се́й є҆́сть ка́мень краеꙋго́льный, свѧзꙋ́ѧй на́съ съ собо́ю, и҆ многоцѣ́нный би́серъ, є҆гѡ́же и҆ща̀, во глꙋбинꙋ̀ безмо́лвїѧ входѧ́щїй и҆́нокъ, всѧ̑ хотѣ̑нїѧ своѧ̑ продае́тъ послꙋша́нїемъ за́повѣдей, ꙗ҆́кѡ да стѧ́жетъ є҆го̀ ѿсю́дꙋ.

п҃д. Добродѣ́тєли и҆́мꙋтъ междꙋ̀ собо́ю ра́вность, и҆ всѧ̑ во є҆ди́но соединѧ́ютсѧ, и҆ є҆ди́нъ ᲂу҆ста́въ и҆ ви́дъ добродѣ́тели и҆сполнѧ́ютъ. Сꙋ́ть бо добродѣ́тєли, и҆ добродѣ́телей бо́льшыѧ добродѣ́тєли, ꙗ҆́кѡ ѡ҆бдержи́тєльныѧ и҆ содержи́тєльныѧ мно́жайшихъ, и҆лѝ и҆ всѣ́хъ: ꙗ҆́кѡ бж҃е́ственныѧ любы̀ и҆ смире́нїе, и҆ бж҃е́ственное терпѣ́нїе. Глаго́летъ бо ѡ҆ не́мъ гдⷭ҇ь: въ терпѣ́нїи ва́шемъ стѧжи́те дꙋ́шы ва́шѧ135: и҆ не речѐ, въ постѣ̀ ва́шемъ, и҆лѝ бдѣ́нїи ва́шемъ. Ѡ҆ терпѣ́нїи же глаго́лю, по бг҃ꙋ быва́емомъ, нача́лѣ добродѣ́телей, ѡ҆снова́нїи мꙋжедо́блестїй. Ѻ҆но́ бо є҆́сть са́мое, во бра́нехъ ми́ръ, въ бꙋ́ри тишина̀, и҆ во и҆спра́вльшихъ ѻ҆́ное сто́лпъ непревратноводрꙋже́нный: є҆го́же ѡ҆ хрⷭ҇тѣ̀ і҆и҃сѣ стѧжа́вша ни ѻ҆рꙋ̑жїѧ, ни лꙋ́цы, ни кѡ́пїѧ, ни вѡ́инства попꙋща́ема, ни са́мое бѣсѡ́въ ѡ҆полче́нїе, ни те́мнїи сопроти́вныхъ полцы̀ вреди́ти возмо́гꙋтъ.

п҃є. Добродѣ́тєли, а҆́ще и҆ є҆ди̑ны дрꙋгі̑ѧ ражда́ютъ, но ѿ трїе́хъ дꙋше́вныхъ си́лъ бытїѐ и҆́мꙋтъ, кромѣ̀ бж҃е́ственныхъ. Вина́ бо и҆ нача́ло четы́ремъ пе́рвѣйшымъ во є҆сте́ственныхъ и҆ бж҃е́ственнымъ добродѣ́телємъ, ѿ ни́хже и҆ и҆́миже прѡ́чїѧ составлѧ́ютсѧ: мꙋ́дрости же и҆ мꙋ́жества, цѣломꙋ́дрїѧ же и҆ пра́вды є҆́сть бж҃е́ственнаѧ бг҃осло́вѡвъ дх҃одви́жнаѧ премꙋ́дрость, во ᲂу҆мѣ̀ четвери́чнѡ дви́жимаѧ: Не всѧ́ же кꙋ́пнѡ дѣ́йствꙋетъ, но ѻ҆со́бь кꙋ́юждо во вре́мѧ є҆ѧ̀, ꙗ҆́коже хо́щетъ: и҆ ѻ҆́вꙋ ᲂу҆́бѡ, ꙗ҆́кѡ свѣ́тъ: ѻ҆́вꙋ же, ꙗ҆́кѡ си́лꙋ ѻ҆стрꙋ̀ и҆ приснодви́жно вдохнове́нїе: ѻ҆́вꙋ же, ꙗ҆́кѡ ѡ҆свѧти́тельнꙋ си́лꙋ и҆ чисти́тельнꙋ: ѻ҆́вꙋ же, ꙗ҆́кѡ ро́сꙋ чистоты̀ весели́тельнꙋ, и҆ зно́й страсте́й прохлажда́ющꙋ. Кꙋ́юждо комꙋ́ждо, ꙗ҆́коже предрече́но бы́сть, соверше́нномꙋ соверше́нное и҆ дѣ́йство по преспѣ́ѧнїю да́рꙋетъ.

п҃ѕ. Си́лы соверше́нной дꙋшѣ̀ не да́рꙋютъ ѿ своегѡ̀ тща́нїѧ добродѣ́телей начина̑нїѧ, а҆́ще не сꙋще́ственнѣ въ навыкнове́нїи бл҃года́тїю прїи́дꙋтъ. Ка́ѧждо бо и҆́мать дарова́нїе сво́йственно, дѣ́йство ѡ҆ себѣ̀, ꙗ҆́кѡ мощѝ и҆ нехотѧ́щихъ привлача́ти прича́стникѡвъ свои́хъ къ себѣ̀, навыкнове́нїемъ и҆ є҆стество́мъ блага́гѡ. И҆ є҆гда̀ на́мъ да́стсѧ да́ръ се́й, непремѣ́ненъ и҆ непрело́женъ ѿто́лѣ соблюда́етсѧ: жи́вꙋ бо, ꙗ҆́коже дꙋ́шꙋ, є҆́же дѣ́йствовати ѻ҆́ныѧ во ᲂу҆десѣ́хъ свои́хъ, и҆́мꙋтъ бл҃года́ть дх҃а. Тѣ́мже и҆ ме́ртвъ добродѣ́телей собо́ръ без̾ ѻ҆́ныѧ быва́етъ. И҆ мнѧ́щымсѧ соверше́ннѣ и҆мѣ́ти, и҆лѝ и҆сполнѧ́ти ѧ҆̀, є҆ди̑ны сꙋ́ть сѣ̑ни и҆ ѡ҆́бразы добра̀, а҆ не и҆́стины начерта̑нїѧ.

п҃з. Сꙋ́ть ᲂу҆́бѡ четы́ре нача̑льныѧ добродѣ́тєли: мꙋ́жество, мꙋ́дрость, цѣломꙋ́дрїе и҆ пра́вда. Ѻ҆́смь же, по преꙋмноже́нїю и҆ ѡ҆скꙋдѣ́нїю ѻ҆́ныхъ близпослѣ́дꙋющыѧ: ѕлѡ́бы ᲂу҆́бѡ ѿ на́съ, добродѣ́тєли же ѿ сꙋ́щихъ въ мі́рѣ и҆ нарица́ємы и҆ разꙋмѣва́ємы. Мꙋ́жества ᲂу҆́бѡ, де́рзость и҆ страхова́нїе: мꙋ́дрости же, лꙋка́вство и҆ неразꙋ́мїе, цѣломꙋ́дрїѧ же, невоздержа́нїе и҆ ѡ҆камене́нїе: пра́вды же, лишшеи́мство и҆ непра́вда, си́рѣчь меньшеи́мство. Среди́ бо си́хъ сꙋ́ть добродѣ́тєли, не то́чїю нача̑льныѧ и҆ є҆сте́ствєнныѧ, и҆ всѧ́кагѡ приꙋмноже́нїѧ и҆ ѡ҆скꙋдѣ́нїѧ превы́шшыѧ, но и҆ дѣ́ѧтєльны сꙋ́ть. И҆ ѻ҆́вы ᲂу҆́бѡ добродѣ́тєли произволе́нїе совѣ́та нра́востїю. ѻ҆́вы же превраще́нїе и҆ мнѣ́нїе содѣ́йственно стѧжа́ша. Ѡ҆ тѣ́хъ бо, ꙗ҆́кѡ средѝ сꙋ́ть добродѣ́тели пра́вости, свидѣ́тельствꙋетъ при́тча, си́це глаго́лющи: и҆ и҆спра́виши всѧ̑ ѻ҆́си бла́ги. Всѧ̑ ᲂу҆́бѡ въ трїе́хъ си́лахъ дꙋше́вныхъ состоѧ́тъ и҆ ражда́ютсѧ и҆ зи́ждꙋтсѧ, ꙗ҆́коже бо ѡ҆снова́нїе своегѡ̀ зда́нїѧ четы́ре нача̑льныѧ добродѣ́тєли, па́че же хрⷭ҇та̀ и҆́мꙋтъ, да є҆сте́ствєнныѧ дѣ́ѧтельными воз̾ѡчища́ютсѧ: бж҃е́ствєнныѧ же и҆ па́че є҆стества̀ бл҃гостїю дх҃а да́рꙋютсѧ.

п҃и. Добродѣ́тєли ѻ҆́вы сꙋ́ть дѣ́ѧтєльны, ѻ҆́вы же є҆сте́ствєнны, ѻ҆́выѧ бж҃е́ствєнны и҆ дꙋхѡ́вны. И҆ дѣ́ѧтєльныѧ ᲂу҆́бѡ сꙋ́ть произволе́нїѧ, є҆сте́ствєнныѧ же сложє́нїѧ, бж҃е́ствєнныѧ же благода̑ти.

п҃ѳ. Ꙗ҆́коже добродѣ́телей рожде́нїе и҆́мать дꙋша̀, си́це и҆ страсте́й. Но ты̑ѧ ᲂу҆́бѡ по є҆стествꙋ̀: сїѧ̑ же внѣ̀ є҆стества̀ ражда́ти ѻ҆бы́че. Винꙋ́ бо къ рожде́нїю до́брагѡ и҆лѝ ѕла́гѡ дꙋша̀ и҆́мать преклоне́нїе хотѣ́нїѧ, ꙗ҆́коже ѻ҆сте́нъ нѣ́кїй къ черта́мъ, и҆лѝ возложе́нїе чегѡ́либо на вѣсы̀, а҆́може а҆́ще прекло́нитсѧ, то̀ къ содѣ́йствїю и҆ прїе́млетъ и҆ дѣ́йствꙋетъ. Подлежа́ще бо є҆́сть ѻ҆бѣ́ма дѣ́йствамъ предложе́нїе: поне́же и҆ сїѧ̑ и҆ ѻ҆́наѧ въ себѣ̀ содержи́тъ. Тꙋ̀ ᲂу҆́бѡ рожде́нїемъ: сїю́ же самопроизво́льнымъ преклоне́нїемъ хотѣ́нїѧ.

ч҃. Ѻ҆трокови́цами писа́нїе нарица́етъ добродѣ́тєли136, раствори́тельнагѡ ра́ди и҆́хъ съ дꙋше́ю соедине́нїѧ быва́ющагѡ, и҆ зане́же и҆̀мъ во є҆ди́нъ дꙋ́хъ и҆ тѣ́ло съ не́ю ви́дитисѧ. Любви́ бо зна́менїе ѻ҆трокови́цы ви́дъ, и҆ чистоты̀ и҆ ѡ҆свѧще́нїе свидѣ́тельство, ѡ҆́бразъ свѧще́нныхъ си́хъ дѣ́въ. Ѡ҆бы́че бо бж҃е́ственнаѧ преѡбража́ти благода́ть, къ немꙋ́же ᲂу҆ка́чествишасѧ, и҆ къ сро́дномꙋ непреле́стнѣ въ могꙋ́щихъ видотвори́ти.

ч҃а. Ѻ҆́смь ᲂу҆́бѡ сꙋ́ть ꙗ҆́кѡ пе́рвѣйшыѧ всѣ́хъ страсте́й, трѝ ᲂу҆́бѡ вели́цыи, ꙗ҆̀же сꙋ́ть: чревобѣ́сїе, сребролю́бїе и҆ тщесла́вїе. Пѧ́ть же си̑мъ послѣ́дꙋющыѧ: блꙋ́дъ и҆ гнѣ́въ, печа́ль, и҆ ᲂу҆ны́нїе, и҆ го́рдость. Си́це же сꙋ́ть и҆ проти̑вныѧ си̑мъ трѝ ѡ҆бде́ржныѧ добродѣ́тєли: нестѧжа́нїе, воздержа́нїе и҆ смире́нїе. Съ ни́ми же и҆ тѣ̑мъ послѣ́дꙋющыѧ: чистота̀, и҆ кро́тость, ра́дость, и҆ мꙋ́жество, и҆ ᲂу҆ничиже́нїе, и҆ всѐ добродѣ́телей послѣ́дованїе. Си́лꙋ же и҆ дѣ́йство и҆ ᲂу҆ха́нїе сво́йственно ко́ейждо добродѣ́тели и҆лѝ ѕло́бѣ навы́кнꙋти и҆ позна́ти тꙋ̀, не всѧ́кагѡ хотѧ́щагѡ є҆́сть, но творѧ́щагѡ и҆ подвиза́ющасѧ дѣ́ломъ и҆ сло́вомъ, и҆ ѿ дх҃а да́ръ вѣ́дѣнїѧ и҆ разсꙋжде́нїѧ прїе́мшагѡ.

ч҃в. Добродѣ́тєли, ѻ҆́вы ᲂу҆́бѡ дѣ́йствꙋютъ, ѻ҆́вы же дѣ́йствꙋеми сꙋ́ть, и҆ дѣ́йствꙋютъ ᲂу҆́бѡ сїѧ̑ въ на́съ приходѧ́ще, є҆гда̀ подоба́етъ, и҆ внегда̀, и҆ є҆ли́кѡ хотѧ́тъ, и҆ ꙗ҆́коже. Мы̀ дѣ́йствꙋемъ ты̑ѧ по произволе́нїю и҆ нра́вственномꙋ навыкнове́нїю на́шегѡ ѡ҆бꙋче́нїѧ. Но ѻ҆́ныѧ ᲂу҆́бѡ сꙋще́ственнѣ, мы́ же ѡ҆бра́знѣ по пра́вꙋ воѡбража́еми: занѐ ѡ҆́бразъ є҆́сть всѣ́хъ на́шихъ дѣ́ланїй спо́собъ къ та́мошнемꙋ началоѡбра́зномꙋ. Ма́лѣми бо ѕѣлѡ̀ сꙋще́ственнѡ мы́слєннаѧ прича́ствꙋютсѧ, пре́жде бꙋ́дꙋщагѡ непрело́жнагѡ наслажде́нїѧ. Трꙋды́ бо здѣ̀ и҆ ѡ҆́бразы, а҆ не са̑мыѧ добродѣ́тєли вои́стиннꙋ дѣ́йствꙋемъ и҆ прїе́млемъ.

ч҃г. Свѧщеннодѣ́йствꙋетъ є҆ѵⷢ҇лїе по па́ѵлꙋ, и҆́же причаща́тисѧ и҆ преподаѧ́ти могі́й дѣ́йствомъ, и҆ дрꙋги̑мъ просвѣще́нїе хрⷭ҇то́во, ꙗ҆́коже нѣ́кое сѣ́мѧ бж҃е́ственно сѣ́етъ сло́во, въ дꙋше́вныхъ слꙋ́шателей ни́вахъ. Сло́во ва́ше, глаго́летъ писа́нїе, да быва́етъ всегда̀ во благода́ти, со́лїю растворе́но бж҃е́ственныѧ бл҃гости137, ꙗ҆́кѡ да да́стъ бл҃года́ть вѣ́рою слы́шащымъ138. Земледѣ́латели же па́ки, и҆ земледѣ́ланїемъ, ᲂу҆чи́телей и҆ ᲂу҆чи́мыхъ наре́къ, ѕѣлѡ̀ мꙋ́дрѣ ꙗ҆влѧ́етъ. Ѻ҆́выхъ ᲂу҆́бѡ, ꙗ҆́кѡ ѻ҆ра́таєвъ и҆ сѣ́ѧтелей бж҃е́ственнагѡ сло́ва: ѻ҆́выхъ же ꙗ҆́кѡ зе́млю добродѣ́телей плодоно́снꙋ, тꙋ́чнꙋ и҆ благокла́снꙋ. Свѧщеннодѣ́йство бо и҆звѣще́нно, не то́чїю бж҃е́ственныхъ є҆́сть дѣ́йство, но и҆ прича́стїе благи́хъ и҆ преподаѧ́нїе.

ч҃д. Разли́чно є҆́сть произноше́нїемъ къ поꙋче́нїю происходѧ́щее сло́во, и҆ разли́чнѣ ѿ мно́гихъ ѡ҆́бразѡвъ собира́етсѧ, ѿ четы́рехъ ви́дѡвъ. Ѻ҆́во ᲂу҆́бѡ быва́етъ ѿ ᲂу҆че́нїѧ, ѻ҆́во ѿ чте́нїѧ: и҆́но ѿ дѣѧ́нїѧ, и҆ и҆́но ѿ благода́ти. И҆ ꙗ҆́коже вода̀ є҆ди́на є҆́сть є҆стество́мъ, претворѧ́етсѧ же и҆ премѣнѧ́етсѧ во своѐ ка́чество по разли́чїю подлежа́щагѡ пе́рстнагѡ вещества̀, ꙗ҆́кѡ и҆ вкꙋ́сомъ познава́етсѧ. Ѻ҆́ва ᲂу҆́бѡ горька̀, ѻ҆́ва же сладка̀, и҆ и҆́на сла́на и҆ смра́дна: си́це и҆ по нра́вственномꙋ навыкнове́нїю коегѡ́ждо происходѧ́щее сло́во и҆змѣнѧ́емо, дѣ́йствомъ познава́етсѧ и҆ по́льзꙋ прино́ситъ.

ч҃є. Поне́же сло́во въ наслажде́нїе дано̀ бы́сть всѧ́кагѡ слове́снагѡ є҆стества̀, и҆ ꙗ҆́коже ꙗ҆́стїѧ нѣ̑каѧ мнѡ́гаѧ и҆ разли̑чна дꙋша̀ прїе́млющи, сла́дость и҆́хъ разли́чнѣ ѡ҆щꙋща́етъ. Хꙋдо́жественное бо сло́во и҆́мать ꙗ҆́кѡ пѣ́стꙋна, ко нра́вꙋ воѡбража́ющи. Чита́емое же, ꙗ҆́кѡ во́дꙋ ᲂу҆спокое́нїѧ даю́ще дѣ́ѧтельное же, ꙗ҆́кѡ мѣ́сто ѕла́чно тꙋчнѧ́щее. Благода́ти же, ꙗ҆́кѡ ча́шꙋ ᲂу҆поѧ́щꙋю и҆ веселѧ́щꙋю. Неизрече́нное же тоѧ̀ ра́дованїе, ꙗ҆́кѡ є҆ле́й ᲂу҆маща́ющїй лицѐ, и҆ свѣ́тло содѣ́ловающїй.

ч҃ѕ. Вои́стиннꙋ, не то́чїю ꙗ҆́кѡ живо́тъ въ себѣ̀ дꙋша̀ сїѧ̀ и҆́мать, но є҆гда̀ и҆ ѿ и҆нѣ́хъ послꙋ́шаетъ та́ ко ᲂу҆че́нїю, ѡ҆щꙋща́етъ: внегда̀ предварѧ́етъ ѻ҆бою̀ любы̀ и҆ вѣ́ра. И҆ се́й ᲂу҆́бѡ вѣ́рою слы́ша, то́йже любо́вїю наказꙋ́ѧ, кромѣ̀ киче́нїѧ и҆ сла́вы словеса̀ добродѣ́телей творѧ̀. Є҆́же ᲂу҆́бѡ ѿ ᲂу҆че́нїѧ сло́во, ꙗ҆́кѡ пѣ́стꙋна прїе́млетъ: а҆ є҆́же ѿ чте́нїѧ, ꙗ҆́кѡ пита́телѧ: є҆́же ѿ дѣѧ́нїѧ, ꙗ҆́кѡ зало́гъ, ꙗ҆́кѡ невѣстокраси́телѧ сладча́йшаго: а҆ є҆́же ѿ дх҃а просвѣще́нїе, ꙗ҆́кѡ женихо́во сло́во соединѧ́ющее и҆ веселѧ́щее. Всѧ́къ бо глаго́лъ и҆сходѧ́щъ ѿ ᲂу҆́стъ бж҃їихъ є҆́сть, и҆лѝ ꙗ҆̀же дх҃омъ ѿ ᲂу҆́стъ ст҃ы́хъ произшє́дшаѧ словеса̀, и҆лѝ сладча́йшее дѣ́йствомъ дх҃а вдохнове́нїе, но є҆ди́ни ст҃і́и. И҆ поне́же наслажде́нїе слове́снїи и҆́мꙋтъ въ сло́вѣ, здѣ̀ ᲂу҆́бѡ дх҃омъ дѣ́йственнѡ веселѧ́щїисѧ, ѕѣлѡ̀ ма́ли сꙋ́ть: ѡ҆́бразы бо то́чїю дꙋхо́вныхъ слове́съ мно́зи па́мѧтїю вѣ́дѧтъ, и҆ причаща́ютсѧ и҆̀мъ, хлѣ́ба и҆́стиннагѡ бꙋ́дꙋщагѡ [вѣ́ка], въ чꙋ́вствѣ бг҃а сло́ва не ᲂу҆̀ причасти́вшесѧ. Є҆ди́нъ бо то́й та́мѡ предлежи́тъ во всѧ́кꙋ достѡ́йнымъ дово́льнѣ. сла́дость, нижѐ и҆ждива́емь, и҆лѝ и҆з̾ѧда́емь когда̀.

ч҃з. Кромѣ̀ ᲂу҆́мнагѡ чꙋ́вства, невозмо́жно вкꙋси́ти въ чꙋ́вствѣ сла́дости бж҃е́ственныѧ. Ꙗ҆́коже бо чꙋ̑вства притꙋпи́вый, недѣ́йствєнна та̑ къ чꙋ́вствєннымъ содѣ́ла, и҆ нижѐ зри́тъ, нижѐ слы́шитъ, нижѐ ѡ҆бонѧ́етъ, разсла́бленъ сы́й, па́че же полꙋме́ртвъ: си́це и҆ дꙋшє́вныѧ по є҆стествꙋ̀ си̑лы ᲂу҆мертви́вый страстьмѝ, нечꙋ́вствєнны сотворѝ къ дѣ́йствꙋ и҆ прича́стїю та́инствъ дх҃а. Не зрѧ́й и҆ не слы́шай и҆ не ѡ҆щꙋща́ѧй дх҃о́внѣ, ме́ртвъ є҆́сть: не живе́тъ бо въ не́мъ хрⷭ҇то́съ, нижѐ са́мъ ѡ҆ не́мъ дви́жетсѧ и҆ дѣ́йствꙋетъ.

ч҃и. Ра́вно и҆ то́жде са́мо, да не рекꙋ̀, є҆ди́но дѣ́йство и҆́мꙋтъ чꙋ̑вства къ дꙋшє́внымъ си́ламъ, и҆ па́че же є҆гда̀ здра̑ва сꙋ́ть: и҆́ми бо сїѧ̑ и҆ живꙋ́тъ и҆ дѣ́йствꙋютъ, и҆ ѻ҆вои̑мъ живи́тельный сраствори́сѧ дꙋ́хъ. Недꙋ́гꙋетъ бо вои́стиннꙋ человѣ́къ, є҆гда̀ собо́рнꙋю страсте́й въ не́мощь въ себѣ̀ но́ситъ, въ больни́цѣ лѣ́ности при́снѡ лежѧ̀. Чꙋ̑вства ᲂу҆́бѡ чꙋ́вствєннаѧ, ѻ҆́ныѧ же дꙋшє́вныѧ си̑лы, мы́слєннаѧ ꙗ҆́снѣ зрѧ́тъ: и҆ па́че є҆гда̀ нѣ́сть въ ни́хъ кі́ѧлибо сатани́нныѧ ра́ти, зако́нꙋ ᲂу҆ма̀ и҆ дꙋ́ха сопротивлѧ́ющейсѧ. Є҆гда́ же во є҆ди́но совокꙋпѧ́тсѧ дх҃омъ, є҆динови̑дны бы́вше: тогда̀ бж҃е́ствєннаѧ и҆ человѣ́чєскаѧ непосре́дственнѣ и҆ сꙋще́ственнѣ, ꙗ҆́коже сꙋ́ть, є҆стества̀ вѣ́дѧтъ, и҆ словеса̀ и҆̀хъ ꙗ҆́вственнѣ ви́дѧтъ, и҆ є҆ди́нꙋю винꙋ̀ всѧ́ческихъ трⷪ҇цꙋ, ꙗ҆́коже мо́щно, чи́стѣ зрѧ́тъ.

ч҃ѳ. Безмо́лвствꙋющемꙋ ᲂу҆́бѡ пе́рвѣе до́лжно и҆мѣ́ти, ꙗ҆́кѡ ѡ҆снова́нїе, сі́и пѧ́ть добродѣ́телей, на не́мже и҆ дѣ̑ланїѧ созида́ти: си́рѣчь, молча́нїе, воздержа́нїе, бдѣ́нїе, смире́нїе и҆ терпѣ́нїе. Дѣ́ланїй же бг҃оꙋго́дныхъ трѝ: ѱалмопѣ́нїе, моли́твꙋ, и҆ чте́нїе, и҆ рꙋкодѣ́лїе, а҆́ще є҆́сть не́мощенъ. Предречє́нныѧ бо добродѣ́тели не то́чїю всѣ̀ прѡ́чїѧ въ себѣ̀ ѡ҆бдержа́тъ, но и҆ є҆ди́на дрꙋгꙋ́ю составлѧ́ютъ. И҆ ѿ ᲂу҆́тра ᲂу҆́бѡ пребыва́ти въ па́мѧти бж҃їей моли́твою и҆ безмо́лвїемъ серде́чнымъ, терпѣли́внѣ моли́тисѧ ча́съ пе́рвый: пото́мъ вторы́й честѝ: тре́тїй пѣ́ти: четве́ртый моли́тисѧ: пѧ́тый честѝ: шесты́й пѣ́ти: седьмы́й моли́тисѧ: ѻ҆сьмы́й честѝ, девѧ́тый пѣ́ти: десѧ́тый ꙗ҆́сти: є҆динонадесѧ́тый спа́ти, а҆́ще потре́бꙋ и҆́мать: дванадесѧ́тый пѣ́ти вечє́рнѧѧ. И҆ та́кѡ до́брѣ преходѧ̀ дневно́е по́прище, ᲂу҆гожда́етъ бг҃ꙋ.

р҃. Ѿ всѣ́хъ добродѣ́телей ꙗ҆́кѡ пчелѣ̀, полє́знѣйшаѧ собира́ти подоба́етъ, и҆ та́кѡ причаща́ѧсѧ ѿ всѣ́хъ пома́лꙋ, вели́кое добродѣ́телей дѣ́ланїѧ твори́ти сложе́нїе: ѿ ни́хже ме́дъ премꙋ́дрости прїѡбрѣта́етсѧ къ благора́дованїю дꙋше́вномꙋ.

р҃а. А҆́ще хо́щеши ᲂу҆до́бѣе и҆ нощно́е разстоѧ́нїе прейтѝ, внемлѝ, ꙗ҆́кѡ трѝ жи́тєльства и҆́мать бдѣ́нїе нощно́е новонача́льныхъ, сре́днихъ и҆ соверше́нныхъ. И҆ пе́рвое ᲂу҆́бѡ жи́тельство є҆́сть сїѐ: полно́щи спа́ти, и҆ полно́щи бдѣ́ти, и҆лѝ ѿ ве́чера до полꙋ́нощи, и҆лѝ ѿ полꙋ́нощи да́же до ᲂу҆́тра. Второ́е же жи́тельство є҆́сть сїѐ: бдѣ́ти ѿ ве́чера ча́съ є҆ди́нъ и҆лѝ два̀, та́же спа́ти часѡ́въ четы́ре, возстава́ти же на ᲂу҆́треню, поѧ̀ и҆ молѧ́сѧ часѡ́въ ше́сть, да́же до ᲂу҆́тра. Та́же пѣ́ти пе́рвый ча́съ, и҆ сѣдѣ́ти безмо́лвствꙋѧ, ꙗ҆́коже предрече́сѧ, и҆лѝ ᲂу҆ста́вы дѣ́ланїй храни́ти часа́ми, и҆лѝ ча́стость, си́рѣчь, моли́твꙋ неразлꙋ́чнꙋ соблюда́ти, є҆́юже навыкнове́нїе быва́етъ по жи́тельствꙋ. Тре́тїе же жи́тельство, всено́щное и҆́мать стоѧ́нїе и҆ бо́дрствованїе.

р҃в. Сѐ ᲂу҆́бѡ и҆ ѡ҆ снѣ́ди рече́мъ, ꙗ҆́кѡ лі́тра хлѣ́ба довлѣ́етъ всѧ́комꙋ подвиза́ющемꙋсѧ ѡ҆ безмо́лвїи, и҆ вїна̀ нерастворе́нна двѣ̀ ча́ши и҆спива́ти, воды́ же трѝ, и҆ ѿ ѡ҆брѣта́ющихсѧ бра́шенъ снѣда́ти, не є҆ли́кѡ є҆стество̀ и҆́щетъ жела́тельнѣ, но є҆ли́кѡ про́мыслъ ᲂу҆строѧ́етъ, ᲂу҆потреблѧ́ти съ воздержа́нїемъ. И҆зрѧ́днѣйшее же и҆ кратча́йшее вѣ́дѣнїе ѡ҆ тре́звеннѣ жи́тельствовати хотѧ́щихъ, є҆́сть хране́нїе тре́хъ добродѣ́телей, ꙗ҆̀же и҆ прѡ́чїѧ въ себѣ̀ ѡ҆бдержа́тъ: по́стъ, глаго́лю, бдѣ́нїе и҆ мл҃твꙋ, и҆звѣствꙋ́ющыѧ держа́внѣйшее всѣ́хъ добродѣ́телей ᲂу҆твержде́нїе.

р҃г. Безмо́лвїе па́че всегѡ̀ вѣ́ры и҆ терпѣ́нїѧ тре́бꙋетъ, любве́ же и҆ наде́жды, и҆ ꙗ҆́же ѿ всегѡ̀ се́рдца, и҆ крѣ́пости и҆ си́лы. Вѣ́рꙋѧй бо а҆́ще здѣ̀ и҆ско́мое и҆ не полꙋ́читъ нерадѣ́нїѧ ра́ди мо́жетъ бы́ть, и҆лѝ и҆ны́ѧ нѣ́кїѧ вины̀, но во и҆схо́дѣ всѧ́чески невозмо́жно є҆́сть не прїѧ́ти и҆звѣще́нїѧ ѡ҆ плодѣ̀ вѣ́ры и҆ по́двига, и҆ не ᲂу҆зрѣ́ти свобо́ды, и҆́же є҆́сть і҆и҃съ хрⷭ҇то́съ, дꙋ́шъ и҆скꙋпле́нїе и҆ спасе́нїе, бг҃очл҃вѣ́къ сло́во. Не вѣ́рꙋѧй же всѧ́кѡ ѡ҆сꙋжде́нъ бꙋ́детъ во и҆схо́дѣ, но ᲂу҆жѐ и҆ ѡ҆сꙋжде́нъ є҆́сть139, по глаго́лꙋ гдⷭ҇ню. Сласте́мъ бо рабо́таѧй, и҆ сла́вꙋ ѿ человѣ̑къ взыскꙋ́ѧй,140 а҆ не ѿ бг҃а, невѣ́ренъ є҆́сть, глаго́летъ, а҆́ще сло́вомъ вѣ́ренъ бы́ти мни́тсѧ: просты́мъ и҆сповѣ́данїемъ и҆ вѣ́рою таковы́й ѻ҆́тай прельстѝ самаго̀ себѐ. Оу҆слы́шитъ бо, ꙗ҆́кѡ занѐ не прїѧ́лъ мѧ̀ є҆сѝ въ се́рдцѣ твое́мъ, но ѿве́рглъ мѧ̀ є҆сѝ вспѧ́ть хребта̀ твоегѡ̀, и҆ а҆́зъ ѿри́нꙋ тѧ̀: вѣ́рнꙋ бо, бл҃гонаде́жнꙋ подоба́етъ бы́ти, и҆ вѣ́ровати бж҃їей и҆́стинѣ, свидѣ́тельствꙋемой во всѣ́хъ писа́нїѧхъ. И҆сповѣ́дати свою̀ не́мощь, да не сꙋгꙋ́бо воз̾имѣ́етъ ѡ҆сꙋжде́нїе и҆ неизбѣ́жное.

р҃д. Ничто́же та́кѡ твори́тъ се́рдце сокрꙋше́нно и҆ дꙋ́шꙋ смире́ннꙋ, ꙗ҆́кѡ є҆́же ᲂу҆единѧ́тисѧ въ ра́зꙋмѣ, и҆ ѿ всѣ́хъ молча́нїе. Не и҆́но бо вои́стиннꙋ є҆́сть что̀ гꙋбѧ́щее ᲂу҆строе́нїе безмо́лвїѧ, и҆ бж҃е́ственнꙋю ѿ негѡ̀ ѿе́млетъ си́лꙋ, ꙗ҆́коже сі́и ше́сть ѡ҆бдє́ржныѧ стра̑сти: дерзнове́нїе, чревобѣ́сїе, многослове́сїе же и҆ молва̀: надме́нїе, и҆ влады́чица страсте́й мнѣ́нїе, въ ни́хже со ᲂу҆се́рдїемъ навы́кнꙋвый соверше́ннѣ, и҆ по преспѣ́ѧнїи па́че ѡ҆мрача́етсѧ, и҆ нечꙋ́вственъ быва́етъ. И҆ а҆́ще ᲂу҆́бѡ возни́кнетъ па́ки нача́ло положи́ти съ вѣ́рою и҆ ᲂу҆се́рдїемъ, па́ки ѡ҆брѧ́щетъ и҆ско́мое, па́че же смирѧ́ѧсѧ и҆ и҆щѧ̀. А҆́ще ли же что̀ ѿ предрече́нныхъ и҆ є҆ди́но нерадѣ́нїемъ воцари́тсѧ въ не́мъ, тогда̀ всѣ́хъ ѕѡ́лъ собо́ръ съ па́гꙋбнымъ невѣ́рствїемъ ѡ҆полчи́вшись, пꙋ́стꙋ добродѣ́телей дꙋ́шꙋ и҆ и҆спо́лненнꙋ страсте́й содѣ́ловаетъ: ꙗ҆́кѡ и҆́нъ нѣ́кїй вавѷлѡ́нскїй гра́дъ бѣсо́вскими ѡ҆пꙋстѣ́вшїй молва́ми и҆ мѧте́жми, ꙗ҆́кѡ бы́ти послѣ̑днимъ го́ршымъ пе́рвыхъ: и҆ врагꙋ̀ ꙗ҆рови́днꙋ и҆ клеветникꙋ̀, на безмо́лвствꙋющихъ быва́емꙋ, и҆ ѧ҆зы́кꙋ ꙗ҆́кѡ стрѣлѣ̀, и҆ ꙗ҆́кѡ мечꙋ̀ ѻ҆бою́дꙋ ѻ҆́стрꙋ на нѧ̀ и҆з̾ѡщрѧ́тисѧ.

р҃є. Во́ды страсте́й, и҆́миже мꙋ́тное и҆ возмꙋще́нное безмо́лвїѧ мо́ре наводнѧ́етъ дꙋ́шꙋ, нѣ́сть возмо́жно и҆на́кѡ прейтѝ, а҆́ще не на кораблѝ пра́зднѣмъ и҆ ле́гцѣмъ ѡ҆бдержа́щагѡ нестѧжа́нїѧ и҆ воздержа́нїѧ: ѿ невоздержа́нїѧ бо и҆ веществолю́бїѧ, страсте́й пото́цы зе́млю се́рдца потоплѧ́ютъ, и҆ всѧ́кꙋю нечистотꙋ̀, и҆ вещество̀ по́мыслѡвъ вне́сше въ ню̀, смꙋще́нїе ᲂу҆́бѡ ᲂу҆мꙋ̀, мѧте́жъ мы́сли, тѧ́гость тѣлесѝ творѧ́тъ, и҆ лѣ́ность и҆ мра́къ и҆ нечꙋ́вствїе въ дꙋшѣ̀ и҆ се́рдцѣ содѣва́ютъ, и҆ сво́йственное по є҆стествꙋ̀ навыкнове́нїе и҆ чꙋ́вство и҆стреблѧ́ютъ.

р҃ѕ. Ничто́же и҆́но та́кѡ сла́бꙋ, неради́вꙋ и҆ безꙋ́мнꙋ дꙋ́шꙋ подвиза́ющихсѧ твори́тъ, ꙗ҆́коже самолю́бїе, сїе́ бо вои́стиннꙋ страсте́й пита́тельница. Внегда́ бо тѣле́сное ᲂу҆спокое́нїе предпочита́етъ па́че сꙋ́щихъ ѡ҆ добродѣ́тели трꙋдѡ́въ и҆ пред̾ꙋсмотри́тельнꙋ ра́зꙋмꙋ то̀ восписꙋ́етъ, є҆́же не трꙋди́тисѧ въ дѣ́лѣхъ во́лею, па́че же ᲂу҆до́бныхъ и҆ ма́лѣхъ по́тѣхъ за́повѣдей, тогда̀ сла́бꙋ твори́тъ дꙋ́шꙋ къ прохожде́нїю безмо́лвнагѡ по́прища, и҆ безси́лїе въ дѣ́лѣхъ крѣ́пко и҆ непреѡбори́мо содѣ́ловаетъ.

р҃з. И҆зрѧ́днѣйшїй и҆ пе́рвый вра́чь ра́ди немощствꙋ́ющихъ къ за́повѣдемъ, и҆ мꙋ́тное потемнѣ́нїе ᲂу҆до́бнѡ и҆зблева́ти хотѧ́щымъ, ничто́же и҆́но є҆́сть, ꙗ҆́кѡ неразсꙋ́дное и҆ съ вѣ́рою во все́мъ послꙋша́нїе. Врачевство́ бо є҆́сть живи́тельно многосло́жнѡ ѿ добродѣ́телей пїю́щымъ, и҆ но́жъ, зна́мєнїѧ ꙗ҆́звєнныѧ є҆ди́ною ѡ҆чища́ющь, є҆́же послꙋша́нїе съ вѣ́рою и҆ простото́ю предпочти́вый па́че всѣ́хъ дѣ́йствовати, всѧ̑ стра̑сти є҆ди́ною ѿсѣчѐ: и҆ не то́чїю безмо́лвїѧ дости́гъ, но ᲂу҆жѐ то̀ и҆ послꙋша́нїемъ совершѝ, ѡ҆брѣ́тъ хрⷭ҇та̀, и҆ подража́тель є҆гѡ̀ и҆ ра́бъ, и҆ бы́въ и҆ глаго́лемь.

р҃и. Кромѣ̀ плаче́внагѡ дѣ́ланїѧ и҆ жи́тельства, невозмо́жно є҆́сть претерпѣ́ти безмо́лвїѧ ва́ра. Пла́чꙋщїй бо и҆ размышлѧ́ющїй ѡ҆ ꙗ҆̀же пре́жде сме́рти и҆ по сме́рти лю́тыхъ, пре́жде не́же са́ми ѡ҆ себѣ̀ прїи́дꙋтъ, и҆ терпѣ́нїе и҆мѣ́ти бꙋ́детъ и҆ смире́нїе, два̀ ѻ҆́наѧ безмо́лвїю ѡ҆снова́нїѧ. Кромѣ́ же предрече́нныхъ безмо́лвствꙋѧй, соѻ́бщника и҆́мать при́снѡ, нерадѣ́нїю мнѣ́нїе: ѿ ни́хже плѣнє́нїѧ и҆ парє́нїѧ ᲂу҆множа́ютсѧ, и҆ къ сла́бости на́съ спорѣва́ютъ. Ѿсю́дꙋ разлѣне́нїѧ и҆сто́чникъ невоздержа́нїе, сла́бо ᲂу҆́бѡ и҆ не́мощно содѣ́ловаетъ тѣ́ло, ᲂу҆́мъ же помраче́нъ и҆ ѡ҆жесточе́нъ твори́тъ. Тогда́ же и҆ і҆и҃съ ᲂу҆клонѧ́етсѧ, наро́дꙋ сꙋ́щꙋ помышле́нїй и҆ по́мыслѡвъ на ᲂу҆́мнѣмъ мѣ́стѣ.

р҃ѳ. Со́вѣсти мꙋчє́нїѧ ны́нѣшнїѧ и҆лѝ бꙋ́дꙋщїѧ вкꙋси́ти въ чꙋ́вствѣ всѣ̑мъ невозмо́жно. Є҆ди́нѣмъ бо тѣ̑мъ сво́йственнѣ быва́етъ, и҆̀мже сла́ва и҆ любы̀ здѣ̀ и҆лѝ та́мѡ ѡ҆скꙋдѣва́етъ. Ꙗ҆́коже бо мꙋчи́тель нѣ́кїй стра́шенъ, пови́нныхъ многоѡбра́знѣ мꙋ́чѧ, и҆ ре́вность и҆лѝ ѡ҆бличе́нїе, ꙗ҆́кѡ ме́чь ѻ҆́стръ мꙋчи́тельски ѡ҆бнажа́ѧ при́снѡ ꙗ҆влѧ́етсѧ. Треѡбра́знѡ ᲂу҆́бѡ двиза́тисѧ къ сопроти̑внымъ и҆ є҆стествꙋ̀ и҆ дꙋшѣ̀, дана̀ бы́сть со́вѣсть, глаго́лемаѧ ре́вность, ѿ и҆нѣ́хъ же є҆сте́ственнаѧ ꙗ҆́рость: ю҆́же ꙗ҆́рость, ꙗ҆́кѡ ме́чь лю́тый на врагѝ и҆з̾ѡщрѧ́ти на́мъ повелѣва́етъ, и҆ а҆́ще ᲂу҆́бѡ побѣди́вши покори́тъ два̀ та̑ є҆ди́номꙋ, ᲂу҆ста́въ мꙋ́жества тогда̀ претворѧ́емь къ бг҃ꙋ быва́етъ. А҆́ще же покори́тсѧ двѣма̀ си́ма дꙋша̀, грѣхꙋ̀, глаго́лю, и҆ пло́ти, наконе́цъ та́мѡ мꙋ́ка є҆́й неми́лостива быва́етъ, ꙗ҆́кѡ порабо́тившейсѧ самоизво́льнымъ разꙋмѣ́нїемъ сопроти́внымъ. Здѣ̀ содѣва́ющи стꙋ̑днѣйшаѧ, и҆ ꙗ҆́кѡ добродѣ́тельное ᲂу҆строе́нїе погꙋ́бльши ѿпа́даетъ, ѿлꙋчи́вшисѧ ѿ бг҃а.

р҃і. Вои́стиннꙋ, и҆з̾ всѣ́хъ страсте́й двѣ̀ сꙋ́ть жесто́цы и҆ тѧжча́йшыѧ стра̑сти: блꙋ́дъ и҆ ᲂу҆ны́нїе, и҆̀же ѡ҆блада́ѧ ѻ҆каѧ́нною дꙋше́ю, разслаблѧ́ютъ ю҆̀. Ѻ҆́бщее и҆́мꙋтъ междꙋ̀ собо́ю є҆ди́на дрꙋго́й содержа́нїе и҆ сопрѧже́нїе дрꙋ́гъ со дрꙋ́гомъ, неꙋдобопреѡбори́мы и҆ неѡдолѣ́ємы сꙋ́ть, и҆ соверше́ннѣ ѿ на́съ непобѣди́ми. И҆ и҆на́ѧ ᲂу҆́бѡ ᲂу҆множа́етсѧ въ по́хоти, ѡ҆бде́ржитъ же вещество̀ є҆стество́мъ нераздѣ́льнѣ ѻ҆бои́хъ, дꙋшѝ, глаго́лю, и҆ тѣ́ла, растворе́ннꙋ и҆мѣ́ѧ всю̀ во всѣ́хъ ᲂу҆́дѣхъ сла́сть свою̀. И҆на́ѧ же, свы́ше влады́чественное держа̀ всю̀ дꙋ́шꙋ и҆ пло́ть ꙗ҆́коже смі́лаѯъ, ѿвсю́дꙋ ѡ҆б̾е́млющи, ко́сно и҆ безси́льно и҆ разсла́бленно є҆стество̀ твори́тъ. И҆згонѧ́ютсѧ же, а҆ не соверше́ннѣ побѣжда́ютсѧ, пре́жде блаже́ннагѡ безстра́стїѧ, внегда̀ дꙋша̀ прїе́мши моли́твою дх҃а ст҃а́гѡ си́лꙋ, творѧ́щꙋю є҆́й ѿра́дꙋ и҆ крѣ́пость, и҆ ми́ръ глꙋбо́кїй въ се́рдцѣ безмо́лвїемъ весели́тсѧ. Сїѧ̀ є҆́сть нача́ло и҆ цари́ца, и҆ госпожа̀, и҆ ѡ҆бдержа́щаѧ прѡ́чїѧ сла̑сти, сла́сть, и҆ дрꙋги́нѧ є҆ѧ̀ разлѣне́нїе трїста́ты фараѡ́нѡвы, наводѧ́щаѧ непобори́мꙋю колесни́цꙋ: и҆́миже вины̑ страсте́й житїю̀ ѻ҆каѧ̑ннымъ на́мъ привнидо́ша.

ра҃і. Нача́ло ᲂу҆́мныѧ моли́твы є҆́сть дѣ́йство, си́рѣчь чисти́тельнаѧ дх҃а си́ла, и҆ та́йное ᲂу҆ма̀ сщ҃еннодѣ́йствїе: ꙗ҆́коже нача́ло безмо́лвїѧ, безпопече́нїе. Среди́на же, просвѣти́тельнаѧ си́ла и҆ видѣ́нїе. Коне́цъ же, и҆зстꙋпле́нїе и҆ восхище́нїе ᲂу҆ма̀ ко бг҃ꙋ.

рв҃і. Свѧти́лище дꙋхо́вное є҆́сть, пре́жде бꙋ́дꙋщагѡ па́че ᲂу҆ма̀ наслажде́нїѧ, ᲂу҆́мное дѣ́йство ᲂу҆ма̀ свѧщеннодѣ́йствꙋющагѡ и҆ причаща́ющагѡсѧ та́йнѡ на дꙋше́внѣмъ же́ртвенницѣ а҆́гнца во ѡ҆брꙋче́нїи бж҃їи. Ꙗ҆́сти же а҆́гнца на ᲂу҆́мнѣмъ дꙋшѝ же́ртвенницѣ, не то́чїю є҆́сть, є҆́же ᲂу҆разꙋмѣ́ти и҆лѝ причасти́тисѧ, но и҆ є҆́же бы́ти ꙗ҆́коже а҆́гнецъ по ѡ҆бразова́нїю въ бꙋ́дꙋщемъ. Здѣ̀ ᲂу҆́бѡ словеса̀, дѣла́ же та̑инъ та́мѡ воспрїѧ́ти ᲂу҆пова́емъ.

рг҃і. Въ новонача́льныхъ ᲂу҆́бѡ моли́тва є҆́сть, ꙗ҆́кѡ ѻ҆́гнь весе́лїѧ ѿ се́рдца и҆здава́емь: въ соверше́нныхъ же, ꙗ҆́кѡ свѣ́тъ благоꙋха́ющїй дѣ́йствꙋемь. И҆лѝ па́ки: мл҃тва є҆́сть, а҆по́столѡвъ проповѣ́данїе, вѣ́ры дѣ́йствїе, па́че же непосре́дственнаѧ вѣ́ра, ᲂу҆пова́емыхъ составле́нїе, дѣ́йствꙋемаѧ любы̀, а҆́гг҃льское движе́нїе, си́ла безпло́тныхъ, дѣ́ло и҆ весе́лїе и҆́хъ, благовѣствова́нїе бж҃їе, и҆звѣще́нїе се́рдца, спасе́нїѧ наде́жда, ѡ҆свѧще́нїѧ зна́менїе, свѧ́тости ѡ҆бразова́нїе, бж҃їе позна́нїе, креще́нїѧ ꙗ҆вле́нїе, ба́ни ѡ҆чище́нїе, дх҃а ст҃а́гѡ ѡ҆брꙋче́нїе, і҆и҃сово ра́дованїе, весе́лїе дꙋшѝ, ми́лость бж҃їѧ, примире́нїѧ зна́менїе, хрⷭ҇то́ва печа́ть, лꙋ́чь мы́сленнагѡ со́лнца, денни́ца серде́цъ, хрїстїа́нства ᲂу҆твержде́нїе, примире́нїѧ бж҃їѧ ꙗ҆вле́нїе, благода́ть бж҃їѧ, премꙋ́дрость бж҃їѧ, па́че же самопремꙋ́дрости нача́ло, бж҃їе ꙗ҆вле́нїе, и҆́нокѡвъ дѣ́ло, безмо́лвствꙋющихъ жи́тельство, безмо́лвїѧ вина̀, а҆́гг҃льскагѡ жи́тельства зна́менїе. И҆ что̀ мно́жайше глаго́лати; Моли́тва є҆́сть бг҃ъ, дѣ́йствꙋѧй всѧ̑ во всѣ́хъ, за є҆́же є҆ди́нꙋ бы́ти ѻ҆ц҃а̀, и҆ сн҃а, и҆ ст҃а́гѡ дх҃а дѣ́йствꙋ, дѣ́йствꙋющагѡ всѧ̑ ѡ҆ хрⷭ҇тѣ̀ і҆и҃сѣ.

рд҃і. А҆́ще мѡѷсе́й не бы̀ прїѧ́лъ ѿ бг҃а жезла̀ си́лы, не бы̀ бг҃ъ фараѡ́на ᲂу҆́бѡ и҆ є҆гѵ́пта и҆̀мъ порази́лъ: и҆ ᲂу҆́мъ а҆́ще не си́лꙋ моли́твеннꙋ въ рꙋцѣ̀ и҆мѣ́ти бꙋ́детъ, грѣ́хъ и҆ сопроти̑вныѧ си̑лы сокрꙋши́ти не возмо́жетъ.

рє҃і. Глаго́лющїи и҆лѝ творѧ́щїи что̀ кромѣ̀ смире́нїѧ, ᲂу҆подо́бишасѧ зи́ждꙋщемꙋ хра́минꙋ въ зимѣ̀, и҆лѝ без̾ бре́нїѧ. И҆скꙋ́сомъ же и҆ ра́зꙋмомъ ѡ҆брѣстѝ и҆ позна́ти смире́нїе, ѕѣлѡ̀ ма́лѣхъ є҆́сть: сло́вомъ бо ѡ҆ не́мъ повѣ́дающїи подо́бни сꙋ́ть и҆змѣрева́ющымъ бе́зднꙋ. Мы́ же слѣпі́и, ѻ҆́трочески ѡ҆ вели́цѣмъ се́мъ свѣ́тѣ ма́лѡ мечта́юще, глаго́лемъ: смире́нїе вои́стиннꙋ ни смиренносло́вїе и҆́мать, ни смиренноѡбра́зїе ꙗ҆влѧ́етъ, нижѐ мꙋ́дрствовати смирє́ннаѧ нꙋ́дитсѧ, нижѐ себѐ ᲂу҆корѧ́етъ смирѧ́ѧсѧ, а҆́ще и҆ сїѧ̑ вины̑ и҆ ѡ҆́бразы смире́нїѧ сꙋ́ть, ꙗ҆́коже разли́чнїи спо́собы, но благода́ть є҆́сть сїѐ и҆ да́ръ свы́ше. Два́ же сꙋ́ть, ꙗ҆́коже глаго́лютъ ѻ҆тцы̀, смирє́нїѧ: є҆́же непщева́ти себѐ ме́ньша всѣ́хъ, и҆ є҆́же бг҃ꙋ припи́сывати и҆справлє́нїѧ своѧ̑. И҆ пе́рвое ᲂу҆́бѡ нача́ло, второ́е же коне́цъ. Взыскꙋ́ющымъ же смире́нїѧ, съ ра́зꙋмомъ подоба́етъ и҆мѣ́ти и҆ помышлѧ́ти трѝ сїѧ̑ въ себѣ̀: є҆́же па́че всѣ́хъ человѣ̑къ грѣ́шна бы́ти, и҆ па́че всѣ́хъ тва́рей стꙋ́дна, ꙗ҆́кѡ внѣ̀ є҆стества̀ сꙋ́ща, и҆ па́че бѣсѡ́въ ѻ҆каѧ́ннѣйша, ꙗ҆́кѡ раба̀ сꙋ́ща бѣсовѡ́мъ. Глаго́лати же си́це досто́итъ: гдѣ́ бо вѣ́мъ а҆́зъ и҆звѣ́стнѡ человѣ́ческїѧ грѣхѝ, какѡвы̀ сꙋ́ть и҆ коли́цы; превосхо́дѧтъ ли и҆лѝ ра́вны сꙋ́ть мои̑мъ беззако́нїѧмъ; И҆ невѣ́жества ра́ди, ѽ дꙋшѐ! ме́ньшїи па́че всѣ́хъ человѣ̑къ є҆смы̀, ꙗ҆́кѡ землѧ̀ и҆ пе́пелъ, и҆ под̾ нога́ми и҆́хъ. Ка́кѡ же и҆ не мнѣ́ти себѐ сквернѣ́йша всѣ́хъ тва́рей, во є҆́же по є҆стествꙋ̀ сꙋ́щихъ, ꙗ҆́коже бы́ша, а҆́зъ же ра́ди безмѣ́рныхъ беззако́нїй, во є҆́же внѣ̀ є҆стества̀; Вои́стиннꙋ бо и҆ ѕвѣ́рїе и҆ ско́ти чистѣ́йшы менѐ грѣ́шнагѡ сꙋ́ть: и҆ сегѡ̀ ра́ди є҆́смь ме́ньши всѣ́хъ, ꙗ҆́кѡ во а҆́дъ и҆ пре́жде сме́рти низведы́йсѧ, низлежꙋ̀. Кто́ же не вѣ́сть въ чꙋ́вствѣ, ꙗ҆́кѡ и҆ бѣсѡ́въ го́ршїй є҆́сть грѣ́шный, ꙗ҆́кѡ ра́бъ и҆́хъ, и҆ тѣ́хъ послꙋ́шающїй, и҆ ѿсю́дꙋ съ ни́ми во тьмѣ̀ бе́здны заключе́нъ; Вои́стиннꙋ го́ршїй и҆ бѣсѡ́въ є҆́сть, ѿ ни́хъ ѡ҆блада́емый: и҆ сегѡ̀ ра́ди съ ни́ми бе́зднꙋ, дꙋшѐ, наслѣ́довала є҆сѝ ѻ҆каѧ́ннаѧ. Въ землѣ́ же и҆ а҆́дѣ и҆ бе́зднѣ пре́жде сме́рти ѡ҆бита́ѧ, ка́кѡ себѐ пра́ведна нарица́ѧ прельща́ешисѧ ᲂу҆мо́мъ, грѣ́шна сотвори́въ себѐ и҆ скве́рна и҆ бѣ́са ѕлы́ми дѣ́лы; Оу҆вы̀ прельще́нїѧ твоегѡ̀ и҆ заблꙋжде́нїѧ, ѽ ѕлобѣ́сне! псѐ нечи́сте же и҆ всескве́рне, во ѻ҆́гнь и҆ тьмꙋ̀ си́хъ ра́ди ѿсыла́емь!

рѕ҃і. Премꙋ́дрость дꙋходви́жна є҆́сть, по разсꙋжде́нїю бг҃осло́вѡвъ, си́ла ᲂу҆́мныѧ и҆ чи́стыѧ и҆ а҆́гг҃льскїѧ мл҃твы, є҆ѧ́же зна́менїе є҆́сть, є҆́же внегда̀ моли́тисѧ, ᲂу҆мꙋ̀ безви́днꙋ всѧ́чески зрѣ́тисѧ, и҆ нижѐ себѐ ни и҆́но что̀ въ дебельствѣ̀ ви́дѣти, но и҆ чꙋ́вствѡмъ мно́гажды ѿ свѣ́та ѻ҆́нагѡ сокрыва́ємымъ: ᲂу҆́мъ бо невеще́ственъ и҆ свѣтови́дѣнъ тогда̀ быва́етъ, бг҃ꙋ неизрече́ннѡ во є҆ди́нъ дꙋ́хъ прилѣплѧ́емь.

рз҃і. Се́дмь сꙋ́ть разли́чнїи ѡ҆́бразы привводѧ́щїи и҆ пꙋтево́дствꙋющїи въ то̀ бг҃ода́нное смире́нїе, составлѧ́ющїи дрꙋ́гъ дрꙋ́га и҆ ражда́ющїи: молча́нїе, смиренномꙋ́дрїе, смиренносло́вїе, смиренноѡдѣѧ́нїе, самоꙋкоре́нїе, сокрꙋше́нїе, послѣ́дность. И҆ молча́нїе ᲂу҆́бѡ въ ра́зꙋмѣ ражда́етъ смиренномꙋ́дрїе, ѿ смиренномꙋ́дрїѧ же ражда́ютсѧ трѝ ѡ҆́бразы смире́нїѧ: смирє́нна вѣща́ти, смирє́нна и҆ хꙋ́да носи́ти, и҆ себѐ всегда̀ ᲂу҆корѧ́ти. Сі́и же трѝ ѡ҆́бразы ражда́ютъ сокрꙋше́нїе, ѿ попꙋще́нїѧ и҆скꙋше́нїй быва́емое, є҆́же и҆ смотри́тельное наказа́нїе глаго́лютъ, и҆ ѿ бѣсѡ́въ смире́нїе. Сокрꙋше́нїе же ᲂу҆до́бь дѣ́ломъ твори́тъ дꙋ́шꙋ ме́ньшꙋ всѣ́хъ бы́ти и҆ послѣ́днѣйшꙋ, ꙗ҆́кѡ ѿ всѣ́хъ ѡ҆блада́емꙋ. Два́ же сі́и ѡ҆́бразы, соверше́нное и҆ бг҃ода́рное прино́сѧтъ смире́нїе, є҆́же си́лꙋ, соверше́нство всѣ́хъ добродѣ́телей нарица́ютъ: и҆ то̀ бг҃ꙋ приписꙋ́етъ и҆справлє́нїѧ. Пе́рвое всѣ̑мъ и҆ ѡ҆снова́нїе є҆́сть молча́нїе, ѿ негѡ́же ражда́етсѧ смиренномꙋ́дрїе: сїе́ же ражда́етъ трѝ ѡ҆́бразы смире́нїѧ: трїе́ же ражда́ютъ є҆ди́нъ сокрꙋше́нїѧ: а҆ ѡ҆́бразъ сокрꙋше́нїѧ ражда́етъ седьмы́й, ме́ньшїй всѣ́хъ пе́рвагѡ смире́нїѧ ѡ҆́бразъ, є҆го́же и҆ смотри́тельно смире́нїе глаго́лютъ. Смотри́тельное же прино́ситъ бг҃ода́рное и҆ соверше́нное и҆ безви́дное и҆ и҆́стинное смире́нїе. И҆ пе́рвое ᲂу҆́бѡ быва́етъ си́це: а҆́ще человѣ́къ не бꙋ́детъ ѡ҆ста́вленъ, и҆ побѣжде́нъ, и҆ ѡ҆блада́нъ, порабо́тившись всѧ́кой стра́сти и҆ по́мыслꙋ, и҆ дꙋ́хомъ побѣжда́емь, и҆ ни ѿ дѣ́лъ ѿню́дъ по́мощи не ѡ҆брѣта́ѧ, ни ѿ бг҃а, ни ѿ и҆на́гѡ когѡ̀, ꙗ҆́кѡ ма́лѡ и҆ не во ѿча́ѧнїе прїитѝ и҆скꙋша́емꙋ во всѣ́хъ, не мо́жетъ сокрꙋши́тисѧ, и҆ и҆мѣ́ти себѐ ме́ньша всѣ́хъ, и҆ послѣ́днѣйша и҆ раба̀ всѣ́хъ, и҆ са́мыхъ бѣсѡ́въ неключи́мѣйша, ꙗ҆́кѡ мꙋ́чима и҆ побѣжда́ема. И҆ сїѐ є҆́сть смотри́тельное про́мысла наказа́тельно смире́нїе, и҆́мже второ́е и҆ высо́кое ѿ бг҃а дае́тсѧ, є҆́же є҆́сть бж҃е́ственнаѧ си́ла дѣ́йствꙋющаѧ и҆ творѧ́щаѧ всѧ̑ тѣ́мъ: ѻ҆рꙋ́дїе то̀ себѣ̀ ви́дѧщи вы́нꙋ, и҆ тѣ́мъ чꙋдеса̀ бж҃їѧ дѣ́ющи.

ри҃і. Ѵ҆поста́сное свѣ́та дꙋхо́вное видѣ́нїе, ᲂу҆́мъ безмечта́теленъ и҆ не вы́сѧщїйсѧ, дѣ́йство моли́твы и҆́стинное, и҆ ѿ среды̀ се́рдца приснотекꙋ́щее, дꙋшѝ воскресе́нїе и҆ воспросте́ртїе, ᲂу҆́жасъ бж҃е́ственный, и҆ въ гѡ́рнѧѧ ше́ствїе ѿ си́хъ всѣ́хъ, и҆зстꙋпле́нїе мы́сли въ дꙋ́сѣ соверше́нно ѿ чꙋ́вствъ, восхище́нїе ᲂу҆ма̀ ѿ свои́хъ си́лъ, дꙋшѝ а҆́гг҃льское движе́нїе бг҃одви́жное, къ безконе́чномꙋ же и҆ горено́сномꙋ дви́жимо, въ ро́дѣ на́шемъ ѡ҆брѣстѝ невозмо́жно, страсте́й мꙋчи́тельствꙋ на́ми ѡ҆блада́ющꙋ ны́нѣ, мно́гихъ ра́ди и҆скꙋше́нїй. Ѡ҆бы́че бо ᲂу҆́мъ въ легча́йшихъ па́че, и҆ пре́жде вре́мени сїѧ̑ мечта́ти, ꙗ҆́кѡ да и҆ да́нное є҆мꙋ̀ ѿ бг҃а ма́лое ᲂу҆строе́нїе погꙋби́тъ, и҆ ме́ртвъ ѿ всѣ́хъ бꙋ́детъ. Тѣ́мже подоба́етъ со мно́гимъ разсꙋжде́нїемъ, ни ꙗ҆́же вре́мени пре́жде вре́мене и҆ска́ти, ни ꙗ҆́же въ рꙋкꙋ̀ ѿверга́ти, и҆́на и҆ мечта́ти. Є҆стество́мъ бо ᲂу҆́мъ вышерече́нныхъ ᲂу҆до́бь мечты̑ твори́тъ и҆ преѡбража́етъ, и҆ во ꙗ҆̀же не пред̾ꙋспѣ̀. Сегѡ̀ ра́ди нема́лъ стра́хъ є҆́сть, ꙗ҆́кѡ да не и҆ да́нныхъ таковы́й лиши́тсѧ, и҆ смы́слъ мно́гажды погꙋби́тъ прельсти́всѧ, бы́въ мечта́тель, а҆ не безмо́лвникъ.

рѳ҃і. Благода́ть нѣ́сть вѣ́ра то́чїю, но и҆ дѣ́йствꙋемаѧ моли́тва: любо́вїю бо дѣ́йствꙋемаѧ дꙋ́хомъ, вѣ́рꙋ и҆́стиннꙋ и҆мꙋ́щꙋю, живо́тъ і҆и҃совъ ꙗ҆влѧ́емь показꙋ́етъ. Тѣ́мже вѣ́рꙋ и҆́мать сопроти́внꙋ и҆ ме́ртвꙋ и҆ неживо́тнꙋ, не и҆мы́й тꙋ̀ дѣ́йствꙋющꙋ въ себѣ̀, но нижѐ вѣ́ренъ вои́стиннꙋ глаго́летсѧ, и҆́же сло́вомъ то́чїю є҆ди́нѣмъ вѣ́рꙋетъ, а҆ не дѣ́йствꙋемꙋ тꙋ̀ за́повѣдьми и҆лѝ дꙋ́хомъ и҆́мать. Достои́тъ ᲂу҆̀бо тꙋ̀ ꙗ҆влѧ́ти преспѣ́ѧнїѧми дѣ́лъ, и҆лѝ дѣ́лы дѣ́йствꙋемꙋ во свѣ́тѣ, и҆ сїѧ́ющꙋ и҆мѣ́ти, ꙗ҆́коже речѐ бж҃е́ственный а҆пⷭ҇лъ: покажи́ ми вѣ́рꙋ твою̀ ѿ дѣ́лъ твои́хъ, и҆ а҆́зъ тебѣ̀ покажꙋ̀ ѿ дѣ́лъ мои́хъ вѣ́рꙋ мою̀141. Ꙗ҆влѧ́ѧ си́мъ, ꙗ҆́кѡ дѣла̀ за́повѣдей показꙋ́ютъ благода́тнꙋю вѣ́рꙋ, ꙗ҆́коже дѣ́йствꙋеми сꙋ́ть за́пѡвѣди сꙋ́щею во благода́ти вѣ́рою, и҆ сїѧ́ютъ. Ко́рень бо за́повѣдей є҆́сть вѣ́ра, па́че же и҆сто́чникъ къ возраще́нїю напаѧ́ющъ сїѧ̑ за́повѣдей, раздѣлѧ́ѧсѧ на дво́е: на и҆сповѣ́данїе и҆ благода́ть, а҆́ще и҆ нераздѣ́льна є҆стество́мъ є҆́сть.

р҃к. Ма́лаѧ и҆ вели́каѧ и҆ сокраще́ннаѧ повинꙋ́ющихсѧ лѣ́ствица пѧ́ть и҆́мать степе́нїй, къ соверше́нствꙋ ведꙋ́щихъ: пе́рвый, ѿверже́нїе: вторы́й, повинове́нїе: тре́тїй, послꙋша́нїе: четве́ртый, смире́нїе: пѧ́тый, бж҃е́ственнаѧ любы̀, ꙗ҆́же є҆́сть бг҃ъ. И҆ ѿверже́нїе ᲂу҆́бѡ ѿ а҆́да возво́дитъ лежа́щаго, и҆ порабоще́ннаго ѿ вещества̀ свобожда́етъ: повинове́нїе же хрⷭ҇та̀ ѡ҆брѣта́етъ, и҆ томꙋ̀ слꙋ́житъ, ꙗ҆́коже са́мъ глаго́летъ: а҆́ще кто̀ мнѣ̀ слꙋ́житъ, мнѣ̀ да послѣ́дствꙋетъ: и҆ и҆дѣ́же є҆́смь а҆́зъ, тꙋ̀ и҆ слꙋга̀ мо́й бꙋ́детъ142. Гдѣ́ же є҆́сть хрⷭ҇то́съ; на нб҃сѣ́хъ сѣди́тъ ѡ҆деснꙋ́ю ѻ҆ц҃а̀. Тѣ́мже та́мѡ подоба́етъ бы́ти и҆ слꙋзѣ̀, и҆дѣ́же и҆ слꙋжи́мый, возводѧ́щїй но́гꙋ къ восхожде́нїю, и҆лѝ и҆ пре́жде восхожде́нїѧ ѻ҆́нѣми ѡ҆́бразы, со хрⷭ҇то́мъ восходѧ́щꙋ и҆ совоз̾идꙋ́щꙋ. Послꙋша́нїе же, дѣ́йствꙋемо за́повѣдьми, всѧ́кѡ зи́ждетъ лѣ́ствицꙋ ѿ разли́чныхъ добродѣ́телей, и҆ сїѧ̑ добродѣ́тєли, ꙗ҆́кѡ восхождє́нїѧ въ дꙋшѣ̀ полага́етъ: ѿ негѡ́же послꙋша́нїѧ высокотво́рное ражда́етсѧ смире́нїе, тꙋ̀ ѡ҆б̾е́млѧ, и҆ горѣ̀ возносѧ̀ къ небесѝ, цари́цѣ добродѣ́телей любвѝ предае́тъ, и҆ ко хрⷭ҇тꙋ̀ приводѧ̀, представлѧ́етъ. И҆ та́кѡ сокраще́нною лѣ́ствицею во и҆́стинѣ повинꙋ́ѧйсѧ, ᲂу҆до́бь на не́бо восхо́дитъ.

рк҃а. Нѣ́сть и҆на́гѡ кратча́йшагѡ пꙋтѝ, къ вы̑шнимъ черто́гамъ ма́лою лѣ́ствицею добродѣ́телей ведꙋ́щагѡ, ꙗ҆́коже ᲂу҆мерщвле́нїе пѧтѝ послꙋша́нїю сопротивлѧ́ющихсѧ страсте́й: преслꙋша́нїѧ глаго́лю, и҆ прекосло́вїѧ, самоꙋго́дїѧ же и҆ ѡ҆правда́нїѧ, и҆ па́гꙋбнагѡ мнѣ́нїѧ. Сїѧ̑ бо сꙋ́ть ᲂу҆́ди и҆ ча̑сти непокори́вагѡ бѣ́са, поглоща́ющагѡ прелюбодѣ́йчищныхъ послꙋ́шникѡвъ, и҆ ѿсыла́ющагѡ ко ѕмі́ю въ бе́зднꙋ. И҆ преслꙋша́нїе ᲂу҆́бѡ є҆́сть, а҆́дскаѧ ᲂу҆ста̀: прекосло́вїѧ же, ѧ҆зы́къ є҆гѡ̀ ꙗ҆́кѡ ме́чь ѻ҆́стръ: самоꙋго́дїе же, и҆з̾ѡщре́ннїи є҆гѡ̀ зꙋ́бы: ѡ҆правда́нїе же, горта́нь є҆гѡ̀: ѿдыха́нїе же всепожира́ющагѡ чре́ва є҆гѡ̀ є҆́сть мнѣ́нїе сопровожда́ющее ко а҆́дꙋ. И҆́же ᲂу҆́бѡ пе́рвое послꙋша́нїемъ побѣжда́ѧй, прѡ́чаѧ є҆ди́ною ѿсѣка́етъ, и҆ на нб҃са̀ є҆ди́нѣмъ степе́немъ бы́стрѣ востека́етъ! Чꙋ́до же вои́стиннꙋ, и҆ ѿ неизрече́нныхъ сꙋ́щее и҆ непостижи́мое, є҆гѡ́же и҆ чл҃вѣколю́бецъ на́шъ сотворѝ гдⷭ҇и, дабы̀ є҆ди́ною добродѣ́телїю, и҆лѝ па́че за́повѣдїю, неко́сненнѡ востещѝ на нб҃са̀, ꙗ҆́коже и҆ є҆ди́нымъ преслꙋша́нїемъ снидо́хомъ, и҆ низхо́димъ во а҆́дъ.

рк҃в. Ꙗ҆́коже и҆́нъ нѣ́кїй сꙋгꙋ́бый мі́ръ є҆́сть человѣ́къ, и҆ но́въ и҆менꙋ́етсѧ по бж҃е́ственномꙋ а҆пⷭ҇лꙋ, си́це ре́кшемꙋ: а҆́ще ка́ѧ ѡ҆ хрⷭ҇тѣ̀, нова̀ тва́рь143. И҆́бо и҆ и҆́бо и҆ землѧ̀, и҆ всѧ̑, є҆ли̑ка сꙋ́ть мі́ръ, человѣ́къ же по добродѣ́тели быва́етъ и҆ и҆менꙋ́етсѧ: ѡ҆ не́мже всѧ́ко сло́во и҆ всѧ́ко та́инство, ꙗ҆́коже бг҃осло́въ речѐ. Поне́же бо бра́ни на́шей бы́ти не къ кро́ви и҆ пло́ти, но къ нача́лѡмъ и҆ ко властє́мъ тьмы̀ вѣ́ка сегѡ̀, къ дꙋховѡ́мъ ѕло́бы ѡ҆ нбⷭ҇ныхъ кнѧ́зѧ, воздꙋ́шнагѡ144, а҆пⷭ҇лꙋ глаго́лавшꙋ. Прили́чествꙋетъ, ꙗ҆́кѡ во и҆но́мъ мі́рѣ вели́цѣ є҆стества̀ дꙋ́шъ на́шихъ си́лъ, бы́ти сопротивоборю́щымсѧ та́йнѡ съ на́ми, и҆ на трїе́хъ трїѐ кнѧ́зи подви́жникѡвъ противовостаю́ще, во́євъ ᲂу҆готовлѧ́ютъ, и҆ въ не́мже кто̀ пред̾ꙋспѣ̀, и҆ въ не́мже дѣ́лаетъ, си́ми бори́мь быва́етъ. Ѕмі́й ᲂу҆́бѡ кнѧ́зь бе́здны, противꙋсерде́чнѣ внима́ющихъ вою́ѧ, противобо́рствꙋетъ ꙗ҆́кѡ къ чреслꙋ̀ по́хоти и҆ пꙋ́па, и҆́мать крѣ́пость, и҆ сла́стнымъ и҆споли́номъ забве́нїѧ пали́тєльныѧ раждеже́нныхъ стрѣ́лъ пꙋща́етъ на нѧ̀ си̑лы, ꙗ҆́коже и҆́но мо́ре и҆ бе́зднꙋ и҆мѣ́ѧ по́хоть, захо́дитъ, пресмыка́етсѧ, возмꙋща́етъ тꙋ̀ по́хоть, и҆ распѣнѧ́етъ, и҆ возжиза́етъ, и҆ ко смѣше́нїѧмъ воспалѧ́етъ, и҆ сласте́й пото́ками наводнѧ́етъ тꙋ̀, и҆ ꙗ҆́кѡ ненасы́тнꙋ не насыща́етъ. Кнѧ́зь же мі́ра сегѡ̀, къ проходѧ́щымъ дѣ́ѧтельнꙋю добродѣ́тель, сопротивлѧ́етсѧ, и҆ къ ꙗ҆́ростной ча́сти борьбꙋ̀ и҆мѣ́ѧ, лѣ́ности и҆споли́номъ, всѧ́чєскаѧ страсте́й ѕлохи̑трства ꙗ҆́кѡ въ и҆но́мъ мі́рѣ, и҆лѝ позо́рищѣ же и҆ по́прищѣ боре́нїе ᲂу҆́мнѣ твори́тъ, побѣжда́етъ при́снѡ съ ни́мъ мꙋ́жественнѡ борю́щихсѧ, и҆лѝ побѣжда́етсѧ, и҆ вѣнцє́въ и҆лѝ стꙋда̀ пред̾ а҆́гг҃лы тѣ́мъ вино́венъ быва́етъ, и҆ полкѝ своѧ̑ на ны̀ вы́нꙋ воѡрꙋжа́ѧ, съ ни́ми ра́тꙋетсѧ. Кнѧ́зь же воздꙋ́ха, на тща́щихсѧ мы́слїю къ прѣ́нїю нахо́дитъ: мечта́нїѧми видѣ́нїе ᲂу҆ма̀ и҆спытꙋ́етъ, къ слове́сной и҆ ᲂу҆́мной ча́сти приближа́ѧсѧ съ воздꙋ́шными дꙋ́хи лꙋка́вствїѧ, и҆ неразꙋ́мїѧ и҆споли́номъ, возница́тельнꙋю мы́сль ꙗ҆́кѡ и҆но́е слове́сное не́бо возмꙋща́етъ: мечта́тєльныѧ же ꙗ҆влѧ́ѧ мглѧ̑ныѧ дꙋхѡ́въ ѡ҆́бразы и҆ преѡбражє́нїѧ преле́стнѣ, ꙗ҆́коже мѡ́лнїи и҆ гро́мы, бꙋ̑ри и҆ звꙋ́ки, страхова́нїе наво́дитъ. Кі́йждо комꙋ́ждо, си́рѣчь тремѝ къ трича́стномꙋ дꙋшѝ приража́ѧсѧ, сопротивлѧ́етсѧ, и҆ къ ко́ей ча́сти бра́нь и҆́мать, къ то́й и҆ по́двигъ стѧжава́етъ.

рк҃г. Оу҆мы́ бо нѣ́когда сꙋ́щїи и҆ ті́и, и҆ безвеще́ствїѧ ѻ҆́нагѡ и҆ то́нкости ѿпа́дше, веще́ственнꙋю нѣ́кꙋю дебе́лость кі́йждо и҆́мать, по чи́нꙋ и҆лѝ дѣ́йствꙋ втѣлесева́емь, по немꙋ́же дѣ́йствꙋ ᲂу҆ка́чествисѧ: поне́же бо и҆ ті́и, подо́бнѣ человѣ́кꙋ, а҆́гг҃льскꙋю сла́дость погꙋ́бльше, наслажде́нїѧ бж҃е́ственнагѡ лиши́шасѧ, и҆ въ пе́рсти, ꙗ҆́коже и҆ мы̀, наслажде́нїе и҆́мꙋтъ, веще́ственни нѣ́какѡ и҆ ті́и бы́вше веще́ственныхъ страсте́й навыкнове́ньми. И҆ чꙋди́тисѧ не досто́итъ, поне́же и҆ на́ша дꙋша̀, создана̀ бы́вши по ѡ҆́бразꙋ бж҃їю, слове́сна же и҆ ᲂу҆́мна, не позна́вши же бг҃а, ско́тна содѣ́ласѧ и҆ нечꙋ́вственна, и҆ ма́лѡ небезꙋ́мна веще́ственныхъ дѣ́лъ наслажде́ньми: ѡ҆бы́че бо навыкнове́нїе претворѧ́ти є҆стество̀, и҆ и҆змѣнѧ́ти дѣ́йство къ произволе́нїю. И҆ні́и же ле́гцы и҆ то́нцы, ꙗ҆́кѡ воздꙋ́шнїи дꙋ́си сꙋ́ще, зрѣ́нїе дꙋшѝ развлека́ютъ вѣ́тры нѣ̑кїѧ бꙋ́рны и҆ мечта̑нїѧ наводѧ̀, ѻ҆вогда̀ и҆ во а҆́гг҃лы преѡбразꙋ́ютсѧ, прельща́ютъ дꙋ́шꙋ, па̑мѧти видотворѧ́тъ, зна́емыхъ нѣ́кїихъ преѡбразꙋ́ѧ и҆ превраща́ѧ всѧ́кое дꙋхо́вное видѣ́нїе, па́че же въ подвиза́ющихсѧ є҆щѐ пре́жде чистоты̀ и҆ разсꙋжде́нїѧ дꙋхо́внагѡ. Ничто́же бо є҆́сть дꙋхо́вно, въ не́же не преѡбразꙋ́ютсѧ ѻ҆́тай, ꙗ҆́коже по мечта́нїю. И҆ ті́и бо воѡрꙋжа́ютсѧ проти́вꙋ ᲂу҆строе́нїѧ и҆ мѣ́ры предспѣ́ѧнїѧ, пре́лесть вмѣ́стѡ и҆́стины, и҆ мечта̑нїѧ вмѣ́стѡ видѣ́нїѧ приводѧ́ще вно́сѧтъ.

рк҃д. Воста́нїе страсте́й и҆ воздвиза́ющаѧсѧ плотска́ѧ бра́нь на дꙋ́шꙋ, пѧтьмѝ ѡ҆́бразы въ на́съ прихо́дитъ. Ѻ҆вогда̀ ᲂу҆́бѡ пло́ть ѕлоꙋпотреблѧ́ющи сꙋ̑щаѧ, ѻ҆вогда́ же внѣесте́ствєннаѧ, ꙗ҆́кѡ по є҆стествꙋ̀, взыскꙋ́етъ дѣ́ѧти: ѻ҆вогда́ же и҆ ѿ бѣсѡ́въ воѡрꙋжа́етсѧ на дꙋ́шꙋ, ꙗ҆́кѡ сла́дцѣ содрꙋ́жествꙋѧ си̑мъ: и҆ногда́ же дꙋша̀ ѿ сладостра́стїѧ преднавыкнове́ннагѡ и҆ сама̀ ѡ҆ себѣ̀ безчи́нствꙋетъ, ꙗ҆́кѡ вка́чествившаѧсѧ страстьмѝ: послѣди́ же быва́етъ бра́нь и҆ ѿ за́висти бѣсѡ́въ, по попꙋще́нїю сопротивлѧ́ющихсѧ на́мъ смире́нїѧ ра́ди, є҆гда̀ не ᲂу҆спѣ́ютъ во всѣ́хъ предрече́нныхъ.

рк҃є. Пе́рвѣйшыѧ же вины̑ бра́ни трѝ сꙋ́ть, ѿ всѣ́хъ и҆ всѣ́ми на́мъ пребыва́ющыѧ: ѕлоꙋпотребле́нїе сꙋ́щихъ, за́висть и҆ бра́нь бѣсѡ́въ, ꙗ҆́же по попꙋще́нїю. А҆ є҆́же востава́ти, и҆ вожделѣ́ти пло́ти на дꙋ́шꙋ, и҆ дꙋшѣ̀ на пло́ть, то́йжде ѡ҆́бразъ по навыкнове́нїю и҆ дѣ́йствꙋ и҆́мꙋтъ плѡтскі́ѧ на дꙋ́шꙋ стра̑сти, и҆ дꙋшє́вныѧ проти́вꙋ пло́ти борє́нїѧ. И҆ са́мъ же сꙋпоста́тъ и҆ногда̀ без̾ разсмотрѣ́нїѧ и҆ вины̀, ꙗ҆́кѡ безстꙋ́денъ, дерза́ѧ проти́вꙋ на́съ ра́тꙋетъ. Не да́ждь ᲂу҆́бѡ, ѽ дрꙋ́же, пїѧ́вицѣ ꙗ҆́кѡ кровора́дꙋющейсѧ и҆зсыса́ти крѡ́вныѧ жи̑лы, и҆ не и҆́мать блева́ти кро́вь: нижѐ пе́рсти попꙋска́й въ сы́тость ѕмі́ю и҆ драко́нꙋ, и҆ ᲂу҆до́бь попере́ши горды́ню льва̀ и҆ ѕмі́ѧ. Воздыха́й, до́ндеже совле́кшисѧ ѻ҆блече́шисѧ въ вы́шнее жи́тельство, и҆ ѡ҆бразова̑нїѧ по ѡ҆́бразꙋ созда́вшагѡ тѧ̀, і҆и҃са хрⷭ҇та̀.

рк҃ѕ. Вои́стиннꙋ, и҆̀же са́мымъ дѣ́ломъ пло́ть сꙋ́щїи и҆ самолю́бїемъ влеко́ми, сла́сти и҆ тщесла́вїю при́снѡ рабо́таютъ, въ ни́хже за́висть ᲂу҆корени́сѧ: печа́лїю бо та́ѧ, и҆ бли́жнѧгѡ благополꙋ́чїемъ ѡ҆горча́ѧсѧ, ѡ҆блыга́ютъ дѡ́браѧ ꙗ҆́кѡ ѕла̑ѧ, и҆ пре́лести сꙋ́щаѧ порождє́нїѧ, ни ꙗ҆̀же сꙋ́ть дх҃а, прїе́млютъ и҆лѝ вѣ́рꙋютъ, ни бг҃а ᲂу҆вѣ́дѣти и҆лѝ позна́ти маловѣ́рїемъ свои́мъ мо́гꙋтъ. Такові́и, по ѡ҆слѣпле́нїю своемꙋ̀ и҆ маловѣ́рїю, впра́вдꙋ та́мѡ ᲂу҆слы́шатъ: є҆́же не вѣ́мъ ва́съ145. Вѣ́рномꙋ бо вопроша́ющемꙋ подоба́етъ и҆лѝ вѣ́ровати, ꙗ҆̀же не вѣ́дѧше, слы́ша и҆лѝ ᲂу҆чи́тисѧ, и҆̀мже вѣ́рꙋетъ, и҆лѝ ᲂу҆чи́ти, ꙗ҆̀же ᲂу҆вѣ́дѣ, и҆ ᲂу҆множа́ти незави́стнѣ въ воспрїе́млющихъ вѣ́рнѣ тала́нтъ. А҆́ще ли же не вѣ́рꙋетъ, ꙗ҆̀же не вѣ́сть, и҆ ᲂу҆ничижа́етъ, ꙗ҆̀же не ᲂу҆вѣ́дѣ, и҆ ᲂу҆́читъ, и҆̀мже не наꙋчи́сѧ, клеве́ща на ᲂу҆ча́щихъ си̑мъ дѣ́ѧтельнѣ, бꙋ́детъ ча́сть є҆гѡ̀ всѧ́кѡ со и҆мꙋ́щими же́лчь го́рести въ наказа́нїе.

рк҃з. Вѣті́й є҆́сть, по мнѣ́нїю и҆́стиннѡ премꙋ́дрыхъ, и҆́же кра́ткѡ ѻ҆́бщимъ вѣ́жествомъ сꙋ̑щаѧ ѡ҆б̾е́млетъ, и҆ ꙗ҆́кѡ є҆ди́но тѣ́ло и҆ раздѣлѧ́етъ та̑ и҆ совокꙋплѧ́етъ, ꙗ҆влѧ́ѧ сїѧ̑ ꙗ҆́кѡ є҆диноси́льна принѧ̑таѧ въ и҆́накомъ и҆ то́мъ же смы́слѣ: и҆лѝ и҆́же пои́стиннѣ доказа́теленъ глаго́летсѧ. И҆лѝ па́ки, вѣті́й є҆́сть вои́стиннꙋ дꙋхо́венъ, и҆́же раздѣлє́ннаѧ собѡ́рнаѧ сꙋ́щихъ ѻ҆́бщаѧ свѡ́йства, ꙗ҆̀же вочл҃вѣ́чившеесѧ сло́во совокꙋпи́ло, раздѣлѧ́етъ и҆ соединѧ́етъ ѡ҆б̾ѧ́тнымъ сло́вомъ ка́чественнагѡ гла́са: ꙗ҆́кѡ вѣті́й не то́чїю ѡ҆б̾е́млетъ всѐ є҆ди́нымъ доказа́тельнымъ сло́вомъ, по внѣ́шности показꙋ́ѧ и҆нѣ̑мъ та̑, но ѿ ꙗ҆влѧ́ющихсѧ є҆мꙋ̀ дꙋ́хомъ сꙋ́щихъ видѣ́нїй и҆ дрꙋги́хъ просвѣти́ти мо́жетъ. И҆́стинный же любомꙋ́дрецъ є҆́сть, и҆́же ѿ сꙋ́щихъ винꙋ̀ сꙋ́щихъ вѣ́дый, и҆лѝ ѿ вины̀ сꙋ̑щаѧ познава́ѧй, по соедине́нїю вы́ше ᲂу҆ма̀ и҆ непосре́дственнѣй вѣ́рѣ бы́сть любомꙋ́дръ, не то́чїю навы́къ бж҃е́ствєннымъ, но и҆ прїѧ́въ та̑. И҆лѝ па́ки: и҆́стинный любомꙋ́дрецъ є҆́сть, дѣ́йствꙋющїй и҆ зри́тельнѣ жи́тельствꙋющїй ᲂу҆́мъ. Соверше́ннѣ же ᲂу҆́мъ любомꙋ́дрый є҆́сть, и҆́же нра́вственное и҆ є҆сте́ственное и҆ бг҃осло́вное и҆спра́ви любомꙋ́дрїе, па́че же бг҃олю́бїе, и҆ нра́вственнагѡ ᲂу҆́бѡ любомꙋ́дрїѧ дѣѧ́нїѧмъ, є҆сте́ственнагѡ же словесє́мъ, бг҃осло́вскагѡ же видѣ́нїѧ и҆ догма́тѡвъ правотѣ̀ ѿ бг҃а и҆зꙋчи́лсѧ є҆́сть. И҆лѝ па́ки: въ бж҃е́ственныхъ бж҃е́ственный вѣті́й є҆́сть, и҆́же и҆́стиннѡ сꙋ̑щаѧ ѿ сꙋ́щихъ и҆лѝ ѿ не сꙋ́щихъ раздѣлѧ́етъ, и҆ словеса̀ ᲂу҆́бѡ ѻ҆́нѣхъ ѿ си́хъ показꙋ́етъ, и҆ ѿ си́хъ ѻ҆́нѣхъ ѡ҆боже́ннѣйше зри́тъ словеса̀: и҆ ѡ҆ мы́сленномъ ᲂу҆́бѡ мі́рѣ и҆ неви́димомъ, ѿ чꙋ́вственнагѡ и҆ ви́димагѡ, ѡ҆ чꙋ́вственномъ же и҆ ви́димомъ, ѿ неви́димагѡ и҆ мы́сленнагѡ сказꙋ́етъ, ѡ҆ ви́димомъ ꙗ҆́кѡ ѡ҆́бразѣ неви́димагѡ, ѡ҆ неви́димомъ же ꙗ҆́кѡ первоѡбра́зномъ ви́димагѡ. Предположи́сѧ бо, глаго́летъ, невоѡбраже́нныхъ ѡ҆́бразы, ѡ҆бразова̑нїѧ неѡбразꙋ́емыхъ, ꙗ҆́кѡ ѡ҆ не́мъ семꙋ̀, и҆ си̑мъ ѡ҆ не́мъ ꙗ҆влѧ́тисѧ дх҃о́внѣ, и҆ ꙗ҆́вѣ ѻ҆дномꙋ̀ дрꙋга́го дрꙋ́гъ въ дрꙋ́зѣ зрѣ́ти, и҆ ꙗ҆вле́нна и҆́стины сло́вомъ твори́ти, не возводѧ́щими и҆лѝ и҆носказа́тельными словесы̑ назида́ти, подо́бнѣ со́лнцꙋ сїѧ́ющїй ра́зꙋмъ и҆́стины, но вѣ́дѣнїемъ и҆ си́лою дх҃о́вною и҆з̾ѧсни́ти, пока́зоваѧ ꙗ҆вле́ннѣйше и҆́стины словеса̀ ѻ҆бои́хъ мїрѡ́въ. Ꙗ҆́кѡ семꙋ̀ ᲂу҆́бѡ пѣ́стꙋномъ на́шимъ бы́ти, ѻ҆́номꙋ же вѣ́чнымъ бж҃е́ственнымъ до́момъ на́съ ра́ди ꙗ҆́вственнѣ бы́вшꙋ. Любомꙋ́дрецъ же бж҃е́ственный є҆́сть, и҆́же дѣѧ́нїемъ и҆ видѣ́нїемъ несре́дственнѣ соедини́выйсѧ бг҃ꙋ, и҆ дрꙋ́гъ томꙋ̀ є҆́сть и҆ глаго́летсѧ, ꙗ҆́кѡ пе́рвꙋю и҆ тво́рческꙋю и҆ и҆́стиннꙋю премꙋ́дрость возлюби́въ, па́че всѧ́кагѡ и҆на́гѡ дрꙋ́жества и҆ премꙋ́дрости и҆ ра́зꙋма. Любосло́вецъ же є҆́сть, а҆ не и҆́стиннѡ любомꙋ́дрецъ, а҆́ще и҆ сла́ва любомꙋ́дрїѧ и҆́мѧ ѻ҆́тай ᲂу҆сво́и, ꙗ҆́коже речѐ вели́кїй григо́рїй. И҆́же премꙋ́дрость творе́нїѧ бж҃їѧ и҆ лю́битъ и҆ и҆спытꙋ́етъ, по послѣ́днемꙋ и҆зглаше́нїю: но ѡ҆бꙋча́етсѧ любомꙋ́дрїю семꙋ̀ не похвалы̀ и҆ сла́вы ра́ди человѣ́ческїѧ показа́тельнѣ, ꙗ҆́кѡ да невеществолю́бецъ бꙋ́детъ и҆ не любомꙋ́дрецъ є҆стествосло́вныѧ бж҃їѧ премꙋ́дрости. Кни́жникъ же є҆́сть, и҆́же въ ца́рствїи бж҃їи наꙋчи́выйсѧ, всѧ́къ, и҆́же дѣѧ́нїемъ въ видѣ́нїи ѡ҆ бз҃ѣ трꙋжда́етсѧ, и҆ въ безмо́лвїи претерпѣва́етъ, и҆́же и҆зно́ситъ ѿ серде́чнагѡ своегѡ̀ сокро́вища нѡ́ваѧ и҆ вє́тхаѧ, си́рѣчь є҆ѵⷢ҇льскаѧ и҆ проро́чєскаѧ, и҆лѝ ѿ но́вагѡ и҆ ве́тхагѡ завѣ́та, и҆лѝ поꙋчи́тєльнаѧ и҆ дѣ́ѧтєльнаѧ, и҆лѝ закѡ́ннаѧ и҆ а҆пⷭ҇льскаѧ. Сїѧ̑ бо сꙋ́ть нѡ́ваѧ и҆ вє́тхаѧ та̑инства, ꙗ҆̀же дѣ́ѧтельный кни́жникъ и҆зно́ситъ, въ бг҃оꙋго́дномъ наꙋчи́всѧ жи́тельствѣ. Кни́жникъ па́ки є҆́сть, всѧ́къ дѣ́ѧтельный, є҆щѐ тѣле́снѣ въ дѣ́ланїѧхъ ᲂу҆пражнѧ́ѧсѧ. Вѣті́й же бж҃е́ственный є҆́сть, и҆́же є҆сте́ственнѣ средѝ стои́тъ къ ра́зꙋмамъ и҆ словесє́мъ сꙋ́щихъ и҆ доказꙋ́етъ всѧ̑ въ дꙋ́сѣ раздѣли́тельною сло́ва си́лою. Любомꙋ́дрецъ же и҆́стинный є҆́сть, и҆́же преесте́ственное бж҃їе соедине́нїе вѣ́домѣ и҆ непосре́дственнѣ въ себѣ̀ и҆́мать.

рк҃и. И҆̀же кромѣ̀ дх҃а пи́шꙋще же и҆ глаго́люще, и҆ це́рковь созида́ти хотѧ́ще, сꙋ́ть дꙋше́вни, ꙗ҆́кѡ и҆́же нѣ́гдѣ глаго́летъ бж҃е́ственный а҆пⷭ҇лъ, дх҃а не и҆мꙋ́ще146. Такові́и бо пови́нни сꙋ́ть клѧ́твѣ глаго́лющей: го́ре, и҆̀же мꙋ́дри въ себѣ̀ сами́хъ, и҆ пред̾ собо́ю разꙋ́мни! ѿ себе́ бо глаго́лютъ, а҆ не дх҃ъ бж҃їй въ ни́хъ є҆́сть глаго́лѧй147, по гдⷭ҇ню словесѝ. Ѿ свои́хъ бо пѡ́мыслъ пре́жде чистоты̀ глаго́лющїи прельсти́шасѧ дꙋ́хомъ мнѣ́нїѧ. Ѡ҆ се́мъ бо при́тча глаго́летъ: ви́дѣхъ мꙋ́жа непщева́вша себѐ мꙋ́дра бы́ти, ᲂу҆пова́нїе же и҆́мать безꙋ́мный па́че є҆гѡ̀148. И҆ є҆́же: не быва́йте мꙋ́дри ѡ҆ себѣ̀149. Премꙋ́дрость на́мъ заповѣ́даетъ. Но и҆ са́мъ и҆спо́лненный дх҃а бж҃е́ственный а҆пⷭ҇лъ и҆сповѣ́дꙋетъ, глаго́лѧ: Не бо̀ дово́льни є҆смы̀ ѿ себѐ помы́слити что̀, ꙗ҆́кѡ ѿ себѐ, но дово́льство на́ше ѿ бг҃а150. И҆ є҆́же: но ꙗ҆́кѡ ѿ бг҃а пред̾ бг҃омъ, ѡ҆ хрⷭ҇тѣ̀ глаго́лемъ151. Таковы́хъ бо словеса̀ несла́дѡстны и҆ непросвѣщє́нны, не ѿ жива́гѡ бо и҆сто́чника дх҃а прїе́млюще глаго́лютъ, но ꙗ҆́кѡ ѿ нѣ́коегѡ є҆́зера тиме́нна, ѿ се́рдца и҆мꙋ́щагѡ и҆ пита́ющагѡ пїѧ́вицъ и҆ ѕмі́й, и҆ жа́бъ по́хотей и҆ киче́нїѧ, и҆ невоздержа́нїѧ, и҆ вода̀ ра́зꙋма и҆́хъ смердѧ́ща, мꙋ́тна же и҆ теплохла́дна, ѿ неѧ́же пїю́щїи на недꙋгова́нїе и҆ гнꙋ́сность и҆ блева́нїе премѣнѧ́еми ѡ҆браща́ютсѧ.

рк҃ѳ. Тѣ́ло хрⷭ҇то́во мы̀ є҆смы̀, глаго́летъ бж҃е́ственный а҆пⷭ҇лъ, и҆ ᲂу҆́ди ѿ ча́сти152. И҆ па́ки: є҆ди́но тѣ́ло, є҆ди́нъ дх҃ъ є҆́сть, ꙗ҆́коже и҆ зва́ни бы́сте153. Ꙗ҆́коже бо тѣ́ло без̾ дꙋ́ха мертво̀ є҆́сть154 и҆ нечꙋ́вственно, си́це ᲂу҆мертви́выйсѧ страстьмѝ за́повѣдей небреже́нїемъ по креще́нїи, недѣ́йственъ быва́етъ, и҆ непросвѣще́нъ ст҃ы́мъ дх҃омъ, и҆ бл҃года́тїю хрⷭ҇то́вою. И҆́мать ᲂу҆́бѡ дꙋ́ха вѣ́рою и҆ па́ки рожде́нїемъ, недѣ́йственна и҆ недви́жительна ра́ди дꙋше́вныѧ ме́ртвенности. Ꙗ҆́коже бо и҆ дꙋша̀ є҆ди́на є҆́сть, ᲂу҆́ди же тѣле́сни мно́зи, и҆ всѧ̑ та̑ дꙋша̀ держи́тъ, и҆ животвори́тъ и҆ дви́жетъ прїе́млющее жи́знь: а҆ ꙗ҆̀же по нѣ́коей слꙋча́йной не́мощи ᲂу҆вѧ́дшыѧ ᲂу҆́ди, ꙗ҆́кѡ мє́ртвы и҆ неподви̑жны, а҆́ще и҆ но́ситъ въ себѣ̀, ѻ҆ба́че неживѡ́тны и҆ нечꙋ́вствєнны. Си́це ве́сь во всѣ́хъ несмѣ́шаннѣ хрⷭ҇то́выхъ ᲂу҆десѣ́хъ є҆́сть хрⷭ҇то́въ дх҃ъ, дѣ́йствꙋѧй и҆ животворѧ́й причаща́тисѧ живота̀ могꙋ́щыѧ, но и҆ не могꙋ́щыѧ причаща́тисѧ немощны̑ѧ, человѣколю́бнѣ ꙗ҆́кѡ своѧ̑ ѡ҆бде́ржитъ. Тѣ́мже и҆ всѧ́къ вѣ́рный прича́стенъ ᲂу҆́бѡ є҆́сть вѣ́рою сыноположе́нїѧ дх҃о́внагѡ, недѣ́йственъ же быва́етъ и҆ непросвѣще́нъ, ме́ртвостїю страсте́й и҆ небреже́нїемъ и҆ невѣ́рїемъ, лиша́емь свѣ́та и҆ жи́зни і҆и҃совы. Ꙗ҆́кѡ всѧ́къ вѣ́рный є҆́сть ᲂу҆́дъ хрⷭ҇то́въ, и҆ дх҃а хрⷭ҇то́ва и҆́мать. Недѣ́йственъ же и҆ неподви́женъ ко прича́стїю благода́ти, неключи́мь.

р҃л. Ѻ҆́смь собо́рныхъ видѣ́нїй глаго́лемъ бы́ти: пе́рвое, є҆́же бг҃а безви́дна и҆ безнача́льна, и҆ несозда́нна, и҆ всѣ́хъ вины̀, трⷪ҇цы є҆ди́ныѧ, и҆ пресꙋ́щественна бж҃ества̀. Второ́е, ᲂу҆́мныхъ си́лъ чи́на и҆ ᲂу҆строе́нїѧ. Тре́тїе, сꙋ́щихъ составле́нїѧ. Четве́ртое, смотри́тельнагѡ сло́ва снисхожде́нїѧ. Пѧ́тое, всеѻ́бщагѡ воскресе́нїѧ. Шесто́е, стра́шнагѡ и҆ втора́гѡ хрⷭ҇то́ва прише́ствїѧ. Седьмо́е, вѣ́чнагѡ мꙋче́нїѧ. Ѻ҆сьмо́е, црⷭ҇твїѧ нбⷭ҇нагѡ. И҆ четы́ре ᲂу҆́бѡ преше́дшихъ и҆ бы́вшихъ сꙋ́ть, четы́ре же бꙋ́дꙋщихъ, и҆ не ᲂу҆̀ ꙗ҆влѧ́ющихсѧ: ви̑дима же сїѧ̑ сꙋ́ть ꙗ҆́внѣ, и҆ ѡ҆брѣта́ютсѧ ᲂу҆ стѧжа́вшихъ бл҃года́тїю мно́гꙋю ᲂу҆ма̀ чистотꙋ̀. Кромѣ́ же свѣ́та къ си̑мъ пристꙋпа́ѧй да вѣ́сть, мечта̑нїѧ воѡбража́ти, а҆ не видѣ̑нїѧ, мечта́тельнымъ дꙋ́хомъ мечта́емь и҆ мечта́ѧ.

рл҃а. Сѐ и҆ ѡ҆ пре́лести нꙋ́жно по си́лѣ рещѝ, ꙗ҆́кѡ сꙋ́щей мно́зѣмъ, по многоко́зненной и҆ многоѡбра́знѣй є҆ѧ̀ подса́дѣ, неꙋдобьразꙋмѣва́емой, и҆ вма́лѣ непости́жнѣй. Пре́лесть, глаго́летсѧ, во двою̀ ѡ҆́бразꙋ ꙗ҆влѧ́етсѧ, и҆лѝ па́че нахо́дитъ и҆ прибыва́етъ по мечта́нїю и҆ дѣ́йствꙋ, а҆́ще и҆ ѿ є҆ди́ныѧ го́рдости нача́ло и҆́мать и҆ винꙋ̀. И҆ пе́рваѧ ᲂу҆́бѡ нача́ло вторы́ѧ: втора́ѧ же, нача́ло, ꙗ҆́же по и҆зстꙋпле́нїю, тре́тїѧ є҆́сть. Нача́ло бо сꙋ́щаго по мечта́нїю видѣ́нїѧ, мнѣ́нїе, є҆́же бж҃е́ственное ꙗ҆́кѡ ѡ҆́бразъ нѣ́кїй мечта́тисѧ твори́тъ, ѿ негѡ́же мнѣ́нїѧ послѣ́дꙋетъ ꙗ҆́же по мечта́нїю къ заблꙋжде́нїю пре́лесть, є҆́юже хꙋле́нїе ражда́етсѧ, съ ни́миже по мечта́нїю быва́ющаѧ пре́лесть ражда́етъ страхова́нїе безмѣ́стныхъ ме́чтъ, и҆ во бдѣ́нїи и҆ во снѣ̀, є҆́же тре́петъ и҆ колеба́нїе дꙋшѝ нарица́ютъ. Го́рдости во послѣ́дꙋетъ пре́лесть, пре́лести хꙋла̀, хꙋ́лѣ страхова́нїе, страхова́нїю тре́петъ, тре́петꙋ же и҆зстꙋпле́нїе по є҆стествꙋ̀ сꙋ́щагѡ смы́сла. Се́й є҆́сть, є҆́же по мечта́нїю, пре́лести пе́рвый ѡ҆́бразъ, по дѣ́йствꙋ же вторы́й. Нача́ло бо и҆́мать чрез̾ сладостра́стїе, ѿ є҆сте́ственнагѡ похотѣ́нїѧ ражда́емо. Ѿ сла́сти бо ражда́етсѧ неꙋдержа́нїе неизглаго́ланныхъ нечисто́тъ: разгрѣва́ѧ бо то̀ всѐ є҆стество̀, и҆ возмꙋти́въ влады́чественное привидѣ́нїй сочета́нїемъ, во и҆зстꙋпле́нїе ᲂу҆́мъ приво́дитъ, пїѧ́нствомъ пали́тельнагѡ дѣ́йства къ безꙋ́мїю є҆го̀ приводѧ̀, и҆ прорица́ти твори́тъ лжепроро́чествїе, прорица́ющее а҆́ки видѣ̑нїѧ ст҃ы́хъ нѣ́кїихъ, и҆ словеса̀ ѻ҆́нѣхъ чрез̾ него̀ ѿкрыва́ющее, ᲂу҆пи́вшасѧ твори́тъ ѡ҆мраче́нїемъ стра́сти, и҆ нра́въ премѣ́ненъ и҆ бѣснова́тъ. Кова́рствомъ пре́лести води́мїи, въ мі́рѣ таковы́хъ дꙋ̑шицы нарица́ютъ, и҆̀же присѣдѧ́тъ и҆ пребыва́ютъ во хра́мѣ ст҃ы́хъ нѣ́кїихъ. И҆ ꙗ҆́кѡ си́рѣчь дꙋ́хи ѡ҆бдержи́ми, и҆ ѿ сами́хъ и҆́хъ дѣ́йствꙋеми и҆ мꙋ́чими, и҆ чрез̾ ни́хъ лю́дѧмъ провозглаша́ютъ: и҆̀хже бѣснꙋ́ющимисѧ па́че и҆ заблꙋ́ждшими, и҆ пре́лести порабоще́нными нарица́ти досто́итъ, а҆ не проро́ки и҆ предглаго́лющими настоѧ̑щаѧ и҆ бꙋ̑дꙋщаѧ. Са́мъ бо блꙋ́дный бѣ́съ, помрачи́въ и҆́хъ ᲂу҆́мъ сла́стнымъ ѻ҆гне́мъ, во и҆зстꙋпле́нїе приво́дитъ смы́слѡвъ, ꙗ҆влѧ́ѧ и҆̀мъ въ мечта́нїи ст҃ы́хъ нѣ́кїихъ, и҆ бесѣ̑ды и҆ видѣ̑нїѧ показꙋ́ѧ. И҆ногда́ же и҆ са́ми ѻ҆́нїи бѣ́сове ꙗ҆влѧ́ютсѧ, страхова́нїемъ смꙋти́ти тѣ́хъ. И҆́гомъ бо велїа́ровымъ ѡ҆тѧгчи́въ тѣ́хъ, ко грѣхꙋ̀, и҆́же по дѣ́йствꙋ, нꙋ́дѧ порѣва́етъ, и҆ ꙗ҆́кѡ рабѡ́въ и҆́мать пре́данныхъ да́же до сме́рти, въ мꙋ́кꙋ и҆мы́й препосла́ти.

рл҃в. Подоба́етъ вѣ́дати, ꙗ҆́кѡ пре́лесть трѝ первонача̑льныѧ вины̑ и҆́мать, и҆́миже нахо́дитъ на человѣ́ки: ѿ го́рдости, ѿ за́висти бѣсо́вскїѧ, и҆ ѿ наказа́тельнагѡ попꙋще́нїѧ. Си́хъ же вины̑ сꙋ́ть: го́рдости ᲂу҆́бѡ ле́гкость, преспѣ́ѧнїю же за́висть: наказа́тельномꙋ же попꙋще́нїю, грѣхо́вное житїѐ. И҆ ѿ за́висти ᲂу҆́бѡ, и҆ є҆ди́нагѡ мнѣ́нїѧ ско́рое и҆́мать и҆сцѣле́нїе, па́че же є҆гда̀ смири́тсѧ человѣ́къ. А҆ є҆́же ѿ наказа́нїѧ грѣха̀ ра́ди сатанѣ̀ преда́нїе, мно́жицею да́же до сме́рти бг҃ъ попꙋща́етъ ѻ҆́ное свои́мъ ѡ҆ставле́нїемъ. И҆ногда̀ и҆ непови̑ннымъ мꙋ́читисѧ ко спасе́нїю попꙋща́етъ. Вѣ́дати же подоба́етъ, ꙗ҆́кѡ и҆ са́мъ то́й мнѣ́нїѧ бѣ́съ предглаго́летъ въ невнима́ющихъ до́брѣ своемꙋ̀ се́рдцꙋ.

рл҃г. Всѝ благочести́вїи сщ҃е́нницы и҆ ца́рїе и҆́стиною помазꙋ́ютсѧ во ѡ҆бновле́нїи, ꙗ҆́коже и҆ дре́внїи тогда̀ по проѡбразова́нїю. Ѡ҆́бразы бо ѻ҆́ныѧ бы́ша на́шей и҆́стинѣ не ѿ ча́сти, но всѝ на́съ всѣ́хъ назна́меновахꙋ. Не бо̀ по ѻ҆́нѣмъ ѡ҆бразова́нїѧмъ на́ше ца́рство и҆ сщ҃е́нство подобоѡбра́зно є҆́сть и҆ є҆динови́дно, а҆́ще и҆ сꙋ́ть ті́иже ѡ҆́бразы: нижѐ распредѣлѧ́етъ на́ми є҆стество̀ разли́чїѧ пома́занныхъ, и҆лѝ благода́ть и҆ зва́нїе къ пома́занїю, но є҆ди́ное и҆ то́жде зва́нїе и҆ вѣ́рꙋ и҆ пома́занїе и҆ ѡ҆бразова́нїе и҆́мамы. Показꙋ́етъ же и҆ ꙗ҆влѧ́етъ по сло́вꙋ и҆́стины чи́стое и҆ безстра́стное, и҆ всего̀ ѡ҆сщ҃е́нна бы́ти бг҃ꙋ, ны́нѣ же и҆ въ бꙋ́дꙋщемъ вѣ́цѣ.

рл҃д. Тогда̀ глаго́летъ ᲂу҆сты̀ премꙋ́дрость и҆ поꙋче́нїемъ се́рдца ра́зꙋмъ, и҆́же бг҃а сло́ва, и҆ ѻ҆ц҃а̀ ѵ҆поста́снꙋю премꙋ́дрость ꙗ҆́снѡ ѿ сꙋ́щихъ ꙗ҆влѧ́етъ, ꙗ҆́кѡ словеса̀ первоѡбра́зныхъ въ сꙋ́щихъ начертава́ющыѧ и҆мы́й, и҆ дѣ́йствомъ живꙋ́щагѡ сло́ва, премꙋ́дрость ѿ премꙋ́дрости ᲂу҆сты̀ глаго́летъ: се́рдцемъ же ѡ҆сїѧва́емъ си́лою претвори́тельнагѡ ра́зꙋма, поꙋча́емагѡ дꙋ́хомъ, твори́ти и҆ просвѣща́ти мо́жетъ ра́зꙋмъ вѣ́рнѡ слы́шащыѧ.

рл҃є. Вели́каѧ и҆́стинѣ противобо́рница и҆ къ поги́бели влекꙋ́щаѧ дне́сь человѣ́ки пре́лесть, є҆́юже неразꙋ́мїе тьмы̀, въ дꙋша́хъ лѣ́ностныхъ воцари́сѧ, ѿчꙋжди́вши и҆̀хъ ѿ бг҃а. И҆ ᲂу҆̀бо невѣ́дꙋщїи бы́ти бг҃а, породи́вшаго ны̀ и҆ просвѣти́вшаго, и҆лѝ сло́вомъ є҆ди́нѣмъ то́чїю вѣ́рꙋема и҆ познава́ема, а҆ не дѣ́ломъ, и҆лѝ дрє́внимъ є҆ди́нѣмъ ꙗ҆влѧ́ема, а҆ не и҆ на́мъ, и҆ свидѣ́тєльства ѡ҆ бз҃ѣ писа́нїй и҆нѣ́мъ, а҆ не и҆зре́кшымъ восписꙋ́етъ, и҆ сла́вꙋ, ꙗ҆́коже глаго́летъ писа́нїе, ѡ҆ бз҃ѣ, хꙋ́лѧтъ155. Позна́нїе же благоче́стїѧ всѧ́кѡ ѿмета́ѧ, и҆ тѣле́снѣ то́чїю, да не рекꙋ̀ і҆ꙋде́йски, чтꙋ́тъ писа̑нїѧ, и҆лѝ и҆ познава́ютъ: воскресе́нїѧ же ра́ди дꙋшѝ ѿсю́дꙋ воста́нїе ѿме́щꙋще, при́снѡ во гробѣ́хъ вселѧ́тисѧ неразꙋ́мнѣ жела́ютъ. Трѝ сїѧ̑ стра̑сти сꙋ́ть: невѣ́рїе, лꙋка́вство и҆ разлѣне́нїе: ражда́ютъ же и҆ соде́ржатъ дрꙋ́гъ дрꙋ́га. Невѣ́рїе бо лꙋка́вствїю ᲂу҆чи́тель, лꙋка́вство же сопꙋ́тникъ разлѣне́нїю, є҆гѡ́же соверше́ннаѧ лѣ́ность є҆́сть зна́менїе. И҆лѝ па́ки: разлѣне́нїе лꙋка́вства роди́тель, ꙗ҆́коже речѐ гдⷭ҇ь: лꙋка́вый ра́бе и҆ лѣни́вый156! лꙋка́вство же ѻ҆те́цъ невѣ́рїю, всѧ́къ во лꙋка́вый невѣ́ренъ. Невѣ́рꙋѧй же и҆ небг҃обоѧ́зливъ є҆́сть: ѿ негѡ́же разлѣне́нїе ражда́етсѧ, ма́ти презрѣ́нїю, и҆́мже всѧ́кое благо́е небреже́тсѧ, и҆ всѧ́кое ѕло̀ содѣва́етсѧ.

рл҃ѕ. И҆́стиннаѧ ѡ҆ бз҃ѣ сла́ва, и҆ ра́зꙋмъ сꙋ́щихъ нело́женъ, соверше́нное догма́тѡвъ правосла́вїе составлѧ́ютъ. Тѣ́мже и҆ славосло́вити таковы́й си́це до́лженъ є҆́сть: сла́ва тебѣ̀, хрⷭ҇тѐ бж҃е на́шъ, сла́ва тебѣ̀! ꙗ҆́кѡ на́съ ра́ди вочл҃вѣ́чилсѧ є҆сѝ, бг҃ъ сло́во пресꙋ́щественное. Сегѡ̀ ра́ди вели́ко є҆́сть та́инство смотре́нїѧ твоегѡ̀, сп҃се на́шъ, сла́ва тебѣ̀!

рл҃з. Списꙋ́емыхъ ᲂу҆́бѡ слове́съ, по вели́комꙋ маѯі́мꙋ, сꙋ́ть трѝ разли́чнїи ѡ҆́бразы, незазо́рные же и҆ нижѐ ѡ҆сꙋжде́нїѧ достѡ́йны. Пе́рвый, па́мѧти ра́ди своеѧ̀: вторы́й, по́льзы ра́ди дрꙋги́хъ: тре́тїй, послꙋша́нїѧ ра́ди пи́шемый, и҆́мже и҆ премнѡ́гаѧ ѿ писа́нїй сложи́шасѧ ра́ди смире́ннѣ взыскꙋ́ющихъ сло́во. А҆́ще же кто̀ ᲂу҆гожде́нїѧ ра́ди и҆ сла́вы, и҆ показа́нїѧ ра́ди добродѣ́телей списꙋ́етъ, ѿстои́тъ, глаго́летъ, мзды̀ своеѧ̀, нико́еѧ здѣ̀ и҆мѣ́ѧ по́льзы, и҆лѝ мзды̀ въ бꙋ́дꙋщемъ вѣ́цѣ, но ꙗ҆́кѡ человѣкоꙋго́дникъ и҆ льсте́цъ корче́мствꙋѧ сло́во бж҃їе, ѡ҆сꙋжде́нъ бꙋ́детъ.