Тогѡ́жде дрꙋгі̑ѧ главы̑.

а҃. Всѧ́къ крести́выйсѧ во хрⷭ҇та̀ до́лженъ є҆́сть доспѣ́ти всѣ́хъ ѡ҆ хрⷭ҇тѣ̀ превозраще́нїй: предпрїѧ́лъ бо є҆́сть си́хъ си́лꙋ, и҆ посре́дствомъ за́повѣдей ѡ҆брѣстѝ сїѧ̑, и҆ навы́кнꙋти мо́жетъ. Зача́тїе ᲂу҆́бѡ є҆́сть, ѡ҆брꙋче́нїе дꙋ́ха: рожде́нїе же дѣ́йство ра́дованїѧ: креще́нїе же, чисти́тельнаѧ дꙋхо́внагѡ ѻ҆гнѧ̀ си́ла: преѡбраже́нїе же, бж҃е́ственнагѡ свѣ́та видѣ́нїе: распѧ́тїе же, є҆́же ѿ всѣ́хъ ᲂу҆мерщвле́нїе: погребе́нїе, хране́нїе въ се́рдцѣ бж҃е́ственнагѡ раче́нїѧ: воскресе́нїе, животво́рное дꙋшѝ воста́нїе: вознесе́нїе же, є҆́же къ бг҃ꙋ и҆зстꙋпле́нїе и҆ восхище́нїе ᲂу҆ма̀. Не ѡ҆брѣ́тшїй же сїѧ̑ и҆ не ѡ҆щꙋти́вшїй, младе́нецъ є҆щѐ є҆́сть и҆ тѣ́ломъ и҆ дꙋ́хомъ, а҆́ще и҆ сѣ́дъ є҆́сть, и҆ дѣ́ѧтельнымъ ѿ всѣ́хъ почита́етсѧ.

в҃. Стрⷭ҇ти хрⷭ҇тѡ́вы животво́рное и҆́мꙋтъ ᲂу҆мерщвле́нїе въ терпѧ́щихъ всѧ̑, а҆́ще во состра́ждемъ и҆ спросла́вимсѧ. Стра̑сти же сласте́й смертотво́рное ᲂу҆мерщвле́нїе и҆́мꙋтъ въ дѣ́йствꙋющихъ ѻ҆́ныѧ. Стрⷭ҇те́й бо хрⷭ҇то́выхъ во́льное страда́нїе, распѧ́тїѧ є҆́сть распѧ́тїе, и҆ ᲂу҆мерщвле́нїѧ ᲂу҆мерщвле́нїе.

г҃. Страда́ти ѡ҆ хрⷭ҇тѣ̀ є҆́сть, є҆́же терпѣ́ти и҆мꙋ̑щаѧ приключа́тисѧ. За́висть бо непови̑ннымъ къ по́льзѣ є҆́сть: ѡ҆бличе́нїе же ко ѡ҆браще́нїю, наказа́нїе гдⷭ҇не ѿверза́етъ на́мъ ᲂу҆шеса̀ пови́ннымъ сꙋ́щымъ: тѣ́мже и҆ вѣне́цъ терпѧ́щымъ ѡ҆бѣща́лъ є҆́сть гдⷭ҇ь во вѣ́къ вѣ́ка. Сла́ва тебѣ̀, бж҃е на́шъ, сла́ва тебѣ̀! Трⷪ҇це ст҃а́ѧ, всѣ́хъ ра́ди сла́ва тебѣ̀.

Ѡ҆ стра́стнѣмъ и҆змѣне́нїи.

д҃. Оу҆ны́нїе, неꙋдобопреѡбори́маѧ сꙋ́щи стра́сть ѡ҆слаблѧ́етъ тѣ́ло, ѡ҆слаблѧ́емꙋ же тѣ́лꙋ, ѡ҆слаблѧ́етсѧ и҆ дꙋша̀: ѻ҆бои̑мъ же разслабѣ́вшымъ, и҆змѣнѧ́ютъ сладостра́стїемъ растворе́нїе тѣле́сное: сладостра́стїе же дви́жетъ похотѣ́нїе: похотѣ́нїе, раждеже́нїе: раждеже́нїе, воста́нїе: воста́нїе дви́жетъ па́мѧть: па́мѧть, мечта́нїе: мечта́нїе, прило́гъ: прило́гъ, сочета́нїе: сочета́нїе, сосложе́нїе: сосложе́нїе же твори́тъ дѣѧ́нїе и҆лѝ тѣ́ломъ, и҆лѝ многоѡбра́зными прикоснове́ньми. И҆ та́кѡ человѣ́къ побѣжде́нъ бы́въ па́даетъ.

Ѡ҆ бла́зѣмъ и҆змѣне́нїи.

є҃. Терпѣ́нїе во всѧ́комъ дѣ́лѣ ражда́етъ мꙋ́жество: мꙋ́жество же, ᲂу҆се́рдїе: ᲂу҆се́рдїе же, пожда́нїе: пожда́нїе, протѧже́нїе: протѧже́нїе дѣ́ла, си́рѣчь приложе́нїе ᲂу҆толѧ́етъ неꙋдержа́нїе тѣле́сное, и҆ по́хѡти сладостра́стїѧ ᲂу҆кроща́етъ: похотѣ́нїе же дви́жетъ жела́нїе: жела́нїе, любо́вь: любы̀, ре́вность: ре́вность теплотꙋ̀: теплота̀, возбꙋжде́нїе: возбꙋжде́нїе, тща́нїе: тща́нїе, моли́твꙋ: мл҃тва, безмо́лвїе: безмо́лвїе ражда́етъ ᲂу҆мозрѣ́нїе: ᲂу҆мозрѣ́нїе, ра́зꙋмъ: ра́зꙋмъ, постиже́нїе та́инствъ: коне́цъ же та́инствъ, бг҃осло́вїе: пло́дъ же бг҃осло́вїѧ, соверше́ннаѧ любы̀: любви́ же, смире́нїе: смире́нїѧ, безстра́стїе: безстра́стїѧ, прозрѣ́нїе, и҆ проро́чество, и҆ пред̾ꙋвѣ́дѣнїе. Не бо̀ и҆́мать кто̀ совершє́нныѧ ѿсю́дꙋ добродѣ́тєли, нижѐ є҆ди́ною ᲂу҆малѧ́етъ ѕло́бы, но пома́лꙋ возраща́емѣй добродѣ́тели, пома́лꙋ и҆ ѕло́ба въ не сꙋ́щее прихо́дитъ.