И҆́же во свѧты́хъ ѻ҆тца̀ на́шегѡ а҆нтѡ́нїа вели́кагѡ ᲂу҆вѣща̑нїѧ, ѡ҆ нра́вахъ человѣ́ческихъ и҆ благо́мъ житїѝ, во р҃ѻ глава́хъ [состоѧ́щыѧ].

а҃. Лю́ди слове́сными ѕлоꙋпотреби́тельнѣ глаго́лютсѧ. Не сꙋ́ть же слове́снїи, и҆зꙋчи́вшїисѧ наꙋ́камъ и҆ кни́гамъ дре́внихъ мꙋдрецѡ́въ, но слове́снꙋю и҆мꙋ́щїи дꙋ́шꙋ, и҆ могꙋ́щїи разсꙋжда́ти, что́ є҆сть добро̀, и҆ что́ є҆сть ѕло̀, и҆ лꙋка́выхъ и҆ дꙋшевре́дныхъ ᲂу҆бѣга́ющїи, благи̑мъ же и҆ дꙋшеполє́знымъ тща́тельнѡ поꙋча́ющїисѧ, и҆ сїѧ̑ творѧ́щїи со мно́гимъ благодаре́нїемъ бг҃ꙋ. Сі́и є҆ди́ни слове́сными людьмѝ вои́стиннꙋ до́лженствꙋютъ нарица́тисѧ.

в҃. И҆́стиннѡ слове́сный человѣ́къ ѡ҆ є҆ди́номъ тщи́тсѧ, си́рѣчь, є҆́же повинова́тисѧ и҆ ᲂу҆гожда́ти бг҃ꙋ всѣ́хъ, и҆ семꙋ̀ то́чїю поꙋча́ти дꙋ́шꙋ свою̀, ꙗ҆́кѡ да бл҃гоꙋгоди́тъ бг҃ꙋ, бл҃годарѧ̀ за таковы́й и҆ толи́кїй про́мыслъ є҆гѡ̀, и҆ ᲂу҆правле́нїе всѣ́хъ тва́рей, во всѧ́комъ приключе́нїи жите́йскомъ. Безмѣ́стно бо врача́мъ благодари́ти ѡ҆ здра́вїи тѣ́ла, подаю́щымъ на́мъ и҆ гѡ́рькїѧ и҆ неꙋгѡ́дныѧ врачєвства̀: бг҃ꙋ же ѡ҆ мни́мыхъ на́мъ ско́рбѧхъ не благодари́ти и҆ не разꙋмѣ́ти, ꙗ҆́кѡ всѧ̑ достодо́лжнѡ, и҆ въ по́льзꙋ на́мъ по про́мыслꙋ є҆гѡ̀ быва́ютъ: позна́нїе бо и҆ вѣ́ра въ бг҃а, спасе́нїе и҆ соверше́нство є҆́сть дꙋшѝ.

г҃. Воздержа́нїе, неѕло́бїе, цѣломꙋ́дрїе, крѣ́пость и҆ терпѣ́нїе, и҆ подѡ́бныѧ си̑мъ вели̑кїѧ и҆ добродѣ́тєльныѧ си̑лы полꙋчи́хомъ ѿ бг҃а, противлѧ́ющыѧсѧ, и҆ противостоѧ́щыѧ, и҆ вспомоществꙋ́ющыѧ въ приско́рбностехъ ѻ҆́ныхъ: каковы̑ѧ си̑лы а҆́ще ѡ҆бꙋча́емъ и҆ готѡ́выѧ и҆мѣ́емъ, ничто̀ ᲂу҆жѐ лю̑тымъ, и҆лѝ болѣ́знєннымъ, и҆лѝ неснѡ́снымъ мни́мъ на́мъ бы́ти, помышлѧ́юще, ꙗ҆́кѡ всѧ̑ сꙋ́ть человѣ́чєскаѧ, и҆ побѣжда́ютсѧ ѿ добродѣ́телей, ꙗ҆̀же въ на́съ. Сегѡ̀ не мы́слѧтъ безꙋ́мнїи дꙋше́ю: не помышлѧ́ютъ бо, ꙗ҆́кѡ всѧ̑ до́брѣ и҆ достодо́лжнѡ быва́ютъ въ по́льзꙋ на́шꙋ, да возсїѧ́ютъ добродѣ́тєли, и҆ ᲂу҆вѣнча́емсѧ ѿ бг҃а.

д҃. Стѧжа́нїе и҆мѣ́нїй и҆ бога́тое ѻ҆́ныхъ ᲂу҆потребле́нїе, мечта́нїемъ є҆ди́нымъ маловре́меннымъ почита́ѧ, и҆ вѣ́даѧ, ꙗ҆́кѡ добродѣ́тельное и҆ бг҃оꙋго́дное житїѐ лꙋ́чше є҆́сть бога́тства: семꙋ̀ тве́рдѡ поꙋча́ѧсѧ, и҆ сїѐ въ па́мѧти содержѧ̀, не возстене́ши, не возрыда́еши, не ᲂу҆кори́ши никого́же, но ѡ҆ все́мъ бꙋ́деши благодари́ти бг҃ꙋ, ви́дѧ хꙋ́ждшихъ себѧ̀, и҆ въ сло́вѣ и҆ бога́тствѣ ᲂу҆твержда́ющихсѧ. Ѕла́ѧ бо стра́сть є҆́сть дꙋшѝ, по́хоть, и҆ сла́ва, и҆ невѣ́дѣнїе.

є҃. Слове́сный человѣ́къ, самаго̀ себѧ̀ разсма́триваѧ, и҆скꙋша́етъ подоба̑ющаѧ и҆ полє́знаѧ себѣ̀, и҆ что̀ со́бственно є҆́сть дꙋшѣ̀, и҆ поле́зно, и҆ что̀ чꙋ́ждо є҆ѧ̀. И҆ та́кѡ ᲂу҆бѣга́етъ поврежда́ющихъ дꙋ́шꙋ, ꙗ҆́кѡ чꙋжды́хъ, и҆ ѿлꙋча́ющихъ є҆го̀ ѿ безсме́ртїѧ.

ѕ҃. Є҆ли́кѡ кто̀ ᲂу҆мѣ́реннѣйшее и҆мѣ́етъ житїѐ, толи́кѡ є҆́сть благополꙋ́чнѣйшїй, ꙗ҆́кѡ не пече́тсѧ ѡ҆ мно́гомъ: ѡ҆ раба́хъ, земледѣ́льцахъ и҆ стѧжа́нїи скотѡ́въ. Си̑мъ бо са́ми себѐ пригвожда́юще, и҆ ѿ си́хъ слꙋча́ющымсѧ го́рестѧмъ подпа́дающе, ᲂу҆корѧ́емъ бг҃а. Ѿ самопроизво́льныѧ же по́хоти на́шеѧ сме́рть ᲂу҆си́ливаетсѧ, и҆ пребыва́емъ во тьмѣ̀ житїѧ̀ грѣхо́внагѡ, прельща́еми, не познаю́ще сами́хъ себѐ.

з҃. Не до́лженствꙋетъ кто́либо глаго́лати, ꙗ҆́кѡ не возмо́жно человѣ́кꙋ добродѣ́тельное житїѐ и҆мѣ́ти: но ꙗ҆́кѡ не ᲂу҆до́бно, нижѐ просты̑мъ ᲂу҆добопостижи́мо є҆́сть сїѐ. Добродѣ́тельнагѡ же житїѧ̀ прїѡбща́ютсѧ, є҆ли́цы сꙋ́ть въ лю́дехъ бл҃гочести́вы, и҆ бг҃олюби́вый и҆́мꙋтъ ᲂу҆́мъ: ѻ҆́бщїй бо ᲂу҆́мъ є҆́сть мїрскі́й и҆ превра́тный, помышлє́нїѧ подаю́щїй блага̑ѧ и҆ ѕла̑ѧ, премѣнѧ́ющїйсѧ є҆стество́мъ, и҆ въ вещество̀ и҆змѣнѧ́ющїйсѧ. Бг҃олюби́вый же ᲂу҆́мъ мсти́тель є҆́сть ѕло́бы, самопроизво́льнѡ быва́ющїѧ въ лю́дехъ ѿ лѣ́ности.

и҃. Ненака́заннїи и҆ невѣ̑жды, смѣшны́мъ дѣ́ломъ почита́ютъ наꙋ̑ки, и҆ не жела́ютъ ѻ҆́нымъ внима́ти, поне́же ѡ҆блича́етсѧ и҆́хъ ненака́занность, и҆ жела́ютъ всѣ̑мъ подо́бными себѣ̀ бы́ти: тѣ́мъ же ѡ҆́бразомъ и҆ невозде́ржнїи житїе́мъ и҆ нра́вами, тща́тсѧ, да бꙋ́дꙋтъ всѣ̀ хꙋ́ждшими и҆́хъ, неви́нность себѣ̀ ѿ мно́жества ѕѡ́лъ сниска́ти мнѧ́ще. Погиба́етъ и҆ смꙋща́етсѧ безси́льнаѧ дꙋша̀ ѿ ѕло́бы, и҆мꙋ́щїѧ въ себѣ̀ блꙋ́дъ, го́рдость, ненасы́тимость, гнѣ́въ, проде́рзость, неи́стовство, ᲂу҆бі́йство, во́пль, за́висть, лихои́мство, хище́нїе, трꙋ́дъ, ло́жь, сла́сть, лѣ́ность, печа́ль, стра́хъ, болѣ́знь, не́нависть, ᲂу҆коре́нїе, безси́лїе, ле́сть, невѣ́дѣнїе, пре́лесть, забве́нїе бг҃а. Си́ми и҆ си́мъ подо́бными мꙋ́читсѧ ѻ҆каѧ́ннаѧ дꙋша̀, ѿлꙋча́ющаѧ себѧ̀ ѿ бг҃а.

ѳ҃. Добродѣ́тельное и҆ благочести́вое и҆ сла́вное житїѐ провожда́ти хотѧ́щїи, не по притво́рномꙋ нра́вꙋ, и҆лѝ ло́жномꙋ житїю̀, до́лжны сꙋди́тисѧ: но ꙗ҆́коже хꙋдо́жники, живопи́сцы и҆ болванодѣ́ли, ѿ са́мыхъ дѣ́лъ показꙋ́ютъ ѻ҆нѝ добродѣ́тельное и҆ бг҃олюбе́зное житїѐ, и҆ ꙗ҆́коже сѣ́тей, си́це всѣ́хъ лꙋка́выхъ сласте́й ѿвраща́ютсѧ.

і҃. Бога́тый и҆ благоро́дный без̾ просвѣще́нїѧ дꙋше́внагѡ, и҆ всѧ́кїѧ добродѣ́тели жите́йскїѧ, мꙋ́дрствꙋющими до́брѣе познае́тсѧ ѕлоща́стенъ: ꙗ҆́коже ᲂу҆бо́гїй, и҆ ᲂу҆́частїю ра́бъ, ᲂу҆че́нїемъ и҆ добродѣ́тельнымъ житїе́мъ ᲂу҆кра́шенный, благополꙋ́ченъ є҆́сть. Но ꙗ҆́коже стра́нники на пꙋте́хъ заблꙋжда́ютъ: си́це и҆ добродѣ́тельномꙋ житїю̀ не прилѣжа́щїи, по́хотїю прельща́еми, погиба́ютъ.

а҃і. Человѣкотво́рнымъ до́лженствꙋетъ глаго́латисѧ, ненака́занныхъ ᲂу҆кроти́ти могꙋ́щїй, да возлю́бѧтъ наꙋ̑ки и҆ ᲂу҆че́нїе: тѣ́мъ же ѡ҆́бразомъ и҆ премѣнѧ́ющїи невозде́ржныхъ житїе́мъ къ добродѣ́тельномꙋ и҆ бг҃оꙋго́дномꙋ житїю̀, человѣкотво́рными до́лженствꙋютъ глаго́латисѧ, ꙗ҆́кѡ человѣ́кѡвъ претворѧ́ющїи: кро́тость бо и҆ воздержа́нїе благополꙋ́чїе є҆́сть, и҆ наде́жда блага́ѧ дꙋша́мъ человѣ́чєскимъ.

в҃і. Подоба́етъ лю́демъ, пои́стиннѣ, нра́вы и҆ житїѐ своѐ достодо́лжнѡ ᲂу҆строѧ́ти: семꙋ́ бо и҆спра́вившꙋсѧ, ᲂу҆до́бь познае́тсѧ бг҃ъ. Ѿ всегѡ́ бо се́рдца и҆ вѣ́ры чтꙋ́щїй бг҃а, промышлѧ́емь быва́етъ ѿ негѡ̀, ᲂу҆де́рживати ꙗ҆́рость и҆ по́хоть: занѐ всѣ́хъ ѕѡ́лъ вина̀ є҆́сть по́хоть и҆ ꙗ҆́рость.

г҃і. Человѣ́къ глаго́летсѧ и҆лѝ слове́сный, и҆лѝ и҆спра́витисѧ хотѧ́щїй. Неиспра́вленный бо не человѣ́комъ нарица́етсѧ: ꙗ҆́кѡ сїѐ не человѣ́ческое є҆́сть дѣ́ло, и҆ бѣ́гати подоба́етъ таковы́хъ. Живꙋ́щымъ бо со ѕло́бою не лѣ́ть є҆́сть въ числѣ̀ безсме́ртныхъ бы́ти когда́либо.

д҃і. Слове́сность на́мъ пои́стиннѣ соприсꙋ́тствꙋѧ, досто́йными на́съ твори́тъ, да и҆менꙋ́емсѧ человѣ́ки. Ѿмета́ющесѧ же слове́сности, є҆ди́нымъ расположе́нїемъ чле́нѡвъ, и҆ гла́сомъ ѿ безслове́сныхъ ра́знствꙋемъ. Да позна́етъ ᲂу҆̀бо ᲂу҆́мный человѣ́къ себѐ самаго̀ безсме́ртнымъ, и҆ да возненави́дитъ всѧ́кꙋю сра́мнꙋю по́хоть, вино́ю сме́рти быва́ющꙋю лю́демъ.

є҃і. Ꙗ҆́коже ко́еждо хꙋдо́жество, подлежа́щыѧ себѣ̀ вещєства̀ ᲂу҆краша́ѧ, добродѣ́тель свою̀ показꙋ́етъ, ꙗ҆́кѡ то̀ древодѣ́латель, мѣ́дникъ, злата́рь и҆ сре́бреникъ: та́кѡ и҆ мы̀ благо́е житїѐ и҆ добродѣ́тельное и҆ бг҃оꙋго́дное жи́тельствованїе слы́шѧ, до́лженствꙋемъ ꙗ҆влѧ́тисѧ, ꙗ҆́кѡ лю́ди вои́стиннꙋ слове́снїи є҆смы̀ дꙋше́ю, а҆ не и҆з̾ѡбраже́нїемъ тѣ́ла. Слове́снаѧ же пои́стиннѣ, и҆ бг҃олюби́ваѧ дꙋша̀ а҆́бїе житє́йскаѧ всѧ̑ познае́тъ, и҆ бг҃а ᲂу҆милостивлѧ́етъ любе́знѣ, и҆ благодари́тъ є҆мꙋ̀ во и҆́стинѣ, къ немꙋ̀ и҆мѣ́ѧ стремле́нїе и҆ мы́сль всю̀.

ѕ҃і. Ꙗ҆́коже ко́рмчїє къ цѣ́ли кора́бль ᲂу҆правлѧ́ютъ, да не къ подво́дномꙋ и҆лѝ ви́димомꙋ ка́мню приразѧ́тъ ѻ҆́ный: та́кѡ и҆ добродѣ́тельномꙋ житїю̀ ревнꙋ́ющїи прилѣ́жнѡ да разсма́триваютъ, что̀ подоба́етъ и҆̀мъ твори́ти, и҆ чегѡ̀ ᲂу҆бѣга́ти: и҆ и҆́стинныѧ и҆ бж҃е́ствєнныѧ зако́ны да почита́ютъ поле́зными себѣ̀, лꙋка̑выѧ помышлє́нїѧ ѿ дꙋшѝ ѿсѣка́ѧ.

з҃і. Ꙗ҆́коже ко́рмчїє и҆ ᲂу҆здодержа́тели ᲂу҆праждне́нїемъ и҆ прилѣжа́нїемъ и҆справлѧ́ютъ то̀, ѡ҆ не́мже тща́тсѧ: та́кѡ подоба́етъ и҆ къ пра́вомꙋ и҆ добродѣ́тельномꙋ житїю̀ прилѣжа́щымъ поꙋча́тисѧ и҆ пещи́сѧ, ꙗ҆́кѡ да достодо́лжнѡ и҆ бг҃оꙋго́днѡ поживꙋ́тъ: хотѧ́щїй бо и҆ помы́сливый, ꙗ҆́кѡ мо́жетъ, вѣ́рꙋѧ, къ безсме́ртїю прехо́дитъ.

и҃і. Свобо́дными да мнѧ́тсѧ тѝ, не по состоѧ́нїю свобо́дные, но житїе́мъ и҆ нра́вами свобо́дные. Не подоба́етъ бо нарица́ти свобо́дными вои́стиннꙋ кнѧзе́й ѕлы́хъ сꙋ́щихъ, и҆лѝ невозде́ржныхъ: раби́ бо сꙋ́ть страсте́й веще́ственныхъ. Свобо́да же и҆ благополꙋ́чїе дꙋшѝ є҆́сть и҆́скреннѧѧ чистота̀, и҆ привре́менныхъ презрѣ́нїе.

ѳ҃і. Напомина́й себѣ̀, ꙗ҆́кѡ непреста́ннѡ пока́зоватисѧ подоба́етъ благи́мъ житїе́мъ, и҆ дѣла́ми са́мыми. Та́кѡ бо и҆ болѧ́щїи враче́й не ѿ сло́въ, но ѿ дѣ́лъ спаси́телѧми и҆ благодѣ́телѧми нахо́дѧтъ и҆ признаю́тъ.

к҃. Зна́менїе слове́сныѧ и҆ добродѣ́тельныѧ дꙋшѝ є҆́сть взо́ръ, постꙋ́пка, гла́съ, смѣ́хъ, ѡ҆бхожде́нїе и҆ разгово́ры: всѧ̑ бо и҆змѣнѧ́ютсѧ, и҆ премѣнѧ́ютсѧ въ благоѡбра́знѣйшее. бг҃олюби́вый бо ᲂу҆́мъ слове́сныхъ люде́й, сы́й вра́тарь тре́звый, заключа́етъ вхо́дъ ѕлы̑мъ и҆ сра̑мнымъ помышле́нїѧмъ.

к҃а. Бг҃ъ дꙋ́шꙋ свобо́дною и҆ самовла́стною содѣ́ла въ дѣ́ланїи добра̀ и҆лѝ ѕла̀.

к҃в. Слове́снаѧ дꙋша̀ тщи́тсѧ и҆зба́витисѧ безпꙋ́тства, го́рдости, киче́нїѧ, пре́лести, ᲂу҆бі́йства, хище́нїѧ, и҆ подо́бныхъ, є҆ли̑ка дѣла̀ сꙋ́ть де́монѡвъ и҆ лꙋка́вагѡ произволе́нїѧ. Всѧ̑ же тща́нїемъ и҆ навыкнове́нїемъ постоѧ́ннымъ и҆справлѧ́етъ человѣ́къ, и҆мꙋ́щїй жела́нїе не стремѧ́щеесѧ къ ѕлы̑мъ сласте́мъ.

к҃г. Провожда́ющїи ма́лое и҆ несоверше́нное житїѐ, и҆ бѣ́дъ и҆збавлѧ́ютсѧ, и҆ стрегꙋ́щихъ не тре́бꙋютъ: побѣжда́ѧ же по́хоть во все́мъ, пꙋ́ть къ бг҃ꙋ ᲂу҆до́бь ѡ҆брѣта́ютъ.

к҃д. Словє́снымъ лю́демъ не подоба́етъ мнѡ́гимъ бесѣ́дамъ внима́ти, но полє́знымъ, и҆́миже ᲂу҆правлѧ́етъ во́лѧ бж҃їѧ. Та́кѡ бо къ животꙋ̀ и҆ свѣ́тꙋ вѣ́чномꙋ возвраща́ютсѧ лю́ди.

к҃є. Подоба́етъ добродѣ́тельнагѡ и҆ бг҃олюби́вагѡ и҆́щꙋщымъ житїѧ̀ и҆збы́ти ѿ многомы́слїѧ ѡ҆ себѣ̀, и҆ всѧ́кїѧ тще́тныѧ и҆ ло́жныѧ сла́вы, и҆ пещи́сѧ ѡ҆ благо́мъ и҆справле́нїи житїѧ̀ и҆ мы́сли: бг҃олюби́вый бо и҆ неизмѣ́нный ᲂу҆́мъ, возведе́нїе и҆ пꙋ́ть є҆́сть къ бг҃ꙋ.

к҃ѕ. Ни є҆ди́ныѧ же нѣ́сть по́льзы ᲂу҆чи́тисѧ наꙋ́камъ, а҆́ще не бꙋ́детъ благоꙋго́днагѡ и҆ бг҃оꙋго́днагѡ житїѧ̀ дꙋшѝ: вина́ же всѣ́хъ ѕѡ́лъ заблꙋжде́нїе, пре́лесть и҆ невѣ́дѣнїе бг҃а.

к҃з. Поꙋче́нїе до́бромꙋ житїю̀, и҆ тща́нїе ѡ҆ дꙋшѣ̀, благи́хъ и҆ бг҃олюби́выхъ мꙋже́й содѣ́ловаетъ. И҆́щꙋщїй бо бг҃а ѡ҆брѣта́етъ є҆го̀, побѣжда́ѧ по́хоть во все́мъ, ѿ моли́твы не ѿстꙋпа́ѧ: таковы́й бо бѣсѡ́въ не бои́тсѧ.

к҃и. Жите́йскими наде́ждами прельща́емїи, слове́снѡ то́чїю вѣ́дꙋщїи, ꙗ҆̀же по и҆зѧ́щномꙋ житїю̀ подоба́етъ твори́ти, подо́бное нѣ́что претерпѣва́ютъ стѧжа́вшымъ врачєвства̀, и҆ ѻ҆рꙋ́дїѧ врачє́бныѧ, ᲂу҆потреблѧ́ти же ѻ҆́ныѧ нижѐ вѣ́дꙋщымъ, нижѐ пекꙋ́щымсѧ. Тѣ́мже ᲂу҆чине́нныхъ на́ми грѣхѡ́въ да не поставлѧ́емъ вино́ю николи́же рожде́нїе, и҆лѝ дрꙋга́го нѣ́коего, но сами́хъ себѐ. А҆́ще бо сама̀ дꙋша̀ восхо́щетъ лѣни́тисѧ, непобѣди́ма бы́ти не мо́жетъ.

к҃ѳ. Невѣ́дꙋщемꙋ разсꙋжда́ти, что́ є҆сть бла́го, и҆ что́ є҆сть ѕло̀, не лѣ́ть є҆́сть сꙋди́ти благи́хъ и҆ ѕлы́хъ. Человѣ́къ бо вѣ́дꙋщїй бг҃а, є҆́сть благі́й: а҆́ще же кто̀ нѣ́сть бла́гъ, се́й ничто́же вѣ́сть, нижѐ ᲂу҆вѣ́стьсѧ когда́либо: занѐ спо́собъ ᲂу҆разꙋмѣ́ти бг҃а, є҆́сть бла́гость.

л҃. Благі́е и҆ бг҃олюби́вые мꙋ́жи присꙋ́тствꙋющихъ пред̾ лице́мъ люде́й во ѕлѣ̀ ѡ҆блича́ютъ, неприсꙋ́тствꙋющихъ же не ᲂу҆корѧ́ютъ, и҆ нижѐ предпрїе́млющымъ ѻ҆́нымъ глаго́лати что̀ позволѧ́ютъ.

л҃а. Въ бесѣ́дахъ ни є҆ди́ныѧ стропти́вости да не бꙋ́детъ: слове́сныхъ бо люде́й сты́дъ и҆ цѣломꙋ́дрїе, па́че не́же дѣ́въ, ᲂу҆краша́ти вѣ́сть. боголюби́вый бо ᲂу҆́мъ свѣ́тъ є҆́сть, ѡ҆сїѧва́ющїй дꙋ́шꙋ, ꙗ҆́коже со́лнце тѣ́ло.

л҃в. При всѣ́хъ прилꙋча́ющихсѧ тебѣ̀ дꙋше́вныхъ страсте́хъ, по́мни, ꙗ҆́кѡ пра́вѡ мы́слѧщымъ и҆ хотѧ́щымъ въ подоба́ющее и҆ без̾ѻпа́сное провестѝ положе́нїе до́мъ сво́й. не тлѣ́нное стѧжа́нїе бога́тства сла́достно и҆̀мъ ꙗ҆влѧ́етсѧ, но пра̑выѧ и҆ и҆́стинныѧ по́чєсти: сі́и и҆̀хъ благополꙋ́чными содѣ́ловаютъ. Бога́тство бо и҆ кра́детсѧ, и҆ ѿ си́льнѣйшихъ похища́етсѧ: добродѣ́тель же дꙋшѝ є҆́сть є҆ди́ное стѧжа́нїе и҆ без̾ѻпа́сное и҆ некра́домое, и҆ по сме́рти спаса́ющее стѧжа́вшихъ ѻ҆́ное. Та́кѡ бо мы́слѧщихъ не восхища́етъ мечта́нїе бога́тства и҆ про́чихъ сласте́й.

л҃г. Не подоба́етъ непостоѧ̑ннымъ и҆ ненаꙋчє́ннымъ и҆спы́товати слове́сныхъ мꙋже́й. Слове́сный же мꙋ́жъ є҆́сть богоꙋго́дный, и҆́же ѡ҆ мно́гомъ молчи́тъ, и҆лѝ ма́лѡ и҆ ѡ҆ нꙋ́жномъ и҆ богоꙋго́дномъ разсꙋжда́етъ.

л҃д. Добродѣ́тельномꙋ и҆ боголюбе́зномꙋ житїю̀ послѣ́дꙋющїй, добродѣ́телємъ дꙋшѝ прилѣжа́тъ ꙗ҆́кѡ со́бственномꙋ и҆́хъ стѧжа́нїю, и҆ вѣ́чномꙋ наслажде́нїю сꙋ́щꙋ. Привре́менными же наслажда́ютсѧ, є҆ли́кѡ вмѣсти́тельно, и҆ є҆ли́кѡ бг҃ъ дае́тъ, и҆ хо́щетъ, со всѧ́кимъ весе́лїемъ и҆ благодаре́нїемъ содѣ́ловающе себѣ̀ по́льзꙋ, а҆́ще бы и҆ вельмѝ была̀ ᲂу҆мѣ́ренна. Многоцѣ̑нныѧ бо ꙗ҆́ства тѣлеса̀ пита́ютъ, ꙗ҆́кѡ веще́ствєнныѧ: позна́нїе же бг҃а, и҆ воздержа́нїе, и҆ бла́гость, и҆ благотворе́нїе, и҆ благоче́стїе, и҆ кро́тость дꙋ́шꙋ ѡ҆боготворѧ́ютъ.

л҃є. Произволе́нїемъ слове́сный человѣ́къ ѡ҆блада́етъ ѡ҆ созда́вшемъ бз҃ѣ, и҆́же всѧ́кїѧ нꙋ́жды и҆ всѧ́кїѧ си́лы є҆́сть крѣ́плїй.

л҃ѕ. Неща́стїемъ почита́ющїи лише́нїе бога́тства, и҆лѝ ча̑дъ, и҆лѝ рабѡ́въ, и҆лѝ дрꙋга́гѡ и҆мѣ́нїѧ, да вѣ́дѧтъ, ꙗ҆́кѡ пе́рвѣе дово́льствоватисѧ подоба́етъ подае́мыми ѿ бг҃а, и҆ ꙗ҆́кѡ подоба́етъ ѿдава́ти ѻ҆́наѧ ѻ҆хо́тнѡ и҆ благомы́сленнѡ, ни ма́лѡ не ѡ҆скорблѧ́ѧсѧ лише́нїемъ сегѡ̀, па́че же рещѝ возвраще́нїемъ: попо́льзовавшесѧ бо несо́бственнымъ, па́ки ѻ҆́ное ѿдае́мъ.

л҃з. Дѣ́ло блага́гѡ человѣ́ка є҆́сть, не продава́ти свобо́дное произволе́нїе, внима́ѧ прїѧ́тїю бога́тства, а҆́ще вы̀ и҆ вельмѝ мно́го бы́ло подае́мо. Снꙋ́ бо подѡ́бна сꙋ́ть житє́йскаѧ, и҆ безвѣ̑стнаѧ и҆ маловре́мєннаѧ и҆́мать мечта̑нїѧ бога́тство.

л҃и. И҆̀же вои́стиннꙋ сꙋ́ть человѣ́цы, толи́кѡ да тща́тсѧ боголюбе́знѡ и҆ добродѣ́тельнѡ жи́тельствовати, ꙗ҆́кѡ да просїѧва́етъ добродѣ́тельное житїѐ и҆́хъ междꙋ̀ дрꙋги́ми людьмѝ, ꙗ҆́коже порфѵ́ра ма́лаѧ надѣ́таѧ на бѣ̑лыѧ ѻ҆дє́жды, ᲂу҆краша́ющаѧ ѻ҆́ныѧ, просїѧва́етъ и҆ ꙗ҆влѧ́етсѧ. Та́кѡ бо тве́рже добродѣ́телємъ дꙋшѝ прилѣжа́ти бꙋ́дꙋтъ.

л҃ѳ. Разꙋ̑мнымъ лю́демъ подоба́етъ разсма́тривати свою̀ си́лꙋ, и҆ прїꙋготовле́нїе сꙋ́щїѧ въ ни́хъ дꙋше́вныѧ добродѣ́тели, и҆ та́кѡ прїꙋготовлѧ́тисѧ, и҆ противлѧ́тисѧ срѣта́ющымсѧ страсте́мъ, по сꙋ́щей въ ни́хъ си́лѣ добродѣ́тели, дарова́нной и҆̀мъ, по є҆стествꙋ̀ ѿ бг҃а. Є҆́сть же проти́вꙋ красоты̀ и҆ всѧ́кїѧ по́хоти дꙋшевре́дныѧ, воздержа́нїе: проти́въ трꙋдѡ́въ и҆ скꙋ́дости, крѣ́пость, а҆ проти́вꙋ досажде́нїѧ и҆ ꙗ҆́рости, неѕло́бїе и҆ подѡ́бнаѧ си̑мъ.

м҃. Человѣ́кꙋ благи́мъ и҆ мꙋ́дрымъ скороспѣ́шнѡ содѣ́латисѧ не мо́жно, но трꙋдолю́бнымъ поꙋче́нїемъ, и҆ и҆з̾ꙋче́нїемъ и҆ и҆скꙋ́сомъ, со вре́менемъ и҆ по́двигомъ, и҆ жела́нїемъ блага́гѡ дѣ́ла. Благі́й же и҆ боголюби́вый человѣ́къ, вои́стиннꙋ вѣ́дꙋщїй бг҃а, не престае́тъ незави́стнѡ твори́ти всѧ̑ богоꙋгѡ́днаѧ. Рѣ́дки же таковы́е мꙋ́жи ѡ҆брѣта́ютсѧ.

м҃а. Не подоба́етъ несрѡ́днымъ по є҆стествꙋ̀ лю́дѧмъ, ѿчаѧва́ѧсѧ въ себѣ̀, ѡ҆слабѣва́ти въ боголюбе́зномъ и҆ добродѣ́тельномъ житїѝ, и҆ презира́ти ѻ҆́ное, ꙗ҆́кѡ непристꙋ́пное и҆ непостижи́мое и҆̀мъ, но подоба́етъ поꙋча́тисѧ и҆̀мъ по си́лѣ, и҆ прилѣжа́ти себѣ̀ сами́мъ. А҆́ще бо и҆ не мо́гꙋтъ соверше́ннѡ стѧжа́ти добродѣ́тель и҆ спасе́нїе: ѻ҆ба́че ѿ поꙋче́нїѧ, и҆ жела́нїѧ, и҆лѝ лꙋ́чшими быва́ютъ, и҆лѝ не хꙋ́ждшими, что̀ не ма́лаѧ є҆́сть по́льза дꙋшѣ̀.

м҃в. Человѣ́къ по ᲂу҆мꙋ̀ съ неизрече́нною ѻ҆́ною и҆ боже́ственною си́лою совокꙋплѧ́етсѧ: по тѣ́лꙋ же и҆мѣ́етъ сро́дство съ живо́тными. И҆ не мно́зи, є҆ли́цы то́чїю сꙋ́ть соверше́нные лю́ди, и҆ слове́сные, къ бг҃ꙋ сп҃си́телю мы́сль, и҆ съ ни́мъ сро́дство и҆мѣ́ти тща́тсѧ: и҆ сїѐ дѣла́ми и҆ добродѣ́тельнымъ житїе́мъ показꙋ́ютъ, мно́жайшїи же ѿ люде́й, безꙋ́мнїи дꙋше́ю, бж҃е́ственное ѻ҆́ное и҆ безсме́ртное сыноположе́нїе ѡ҆ста́вивше, къ ме́ртвомꙋ, и҆ бѣ́дственномꙋ, и҆ маловре́менномꙋ сро́дствꙋ тѣле́сномꙋ ᲂу҆клони́вшесѧ, ꙗ҆́кѡ безслове́снїи, мꙋ́дрствꙋѧ плотска̑ѧ, и҆ ѿ сласте́й разжиза́ѧсѧ, ѿлꙋча́ютъ са́ми себѐ ѿ бг҃а, и҆ низво́дѧтъ дꙋ́шꙋ съ нб҃съ въ про́пасть ѿ нбⷭ҇ныхъ є҆ѧ̀ жела́нїй.

м҃г. Слове́сный мꙋ́жъ спребыва́нїе съ бж҃ество́мъ, и҆ сою́зъ помышлѧ́ѧ, николи́же ничегѡ̀ земна́гѡ, и҆лѝ ᲂу҆ниже́ннагѡ не возлю́битъ: но къ небє́снымъ и҆ вѣ̑чнымъ и҆́мать ᲂу҆́мъ, и҆ разꙋмѣ́етъ, ꙗ҆́кѡ во́лѧ бж҃їѧ сїѧ̀ є҆́сть, дабы̀ спа́ссѧ человѣ́къ, ꙗ҆́кѡ ѻ҆на̀ є҆́сть вина̀ всѧ́кагѡ добра̀, и҆ и҆сто́чникъ вѣ́чныхъ бла̑гъ лю́демъ.

м҃д. Є҆гда̀ ѡ҆брѧ́щеши нѣ́коего любопрю́щасѧ и҆ борю́щасѧ съ тобо́ю проти́въ и҆́стины, ꙗ҆́внѡ преста́вши ѿ любопрѣ́нїѧ, ᲂу҆стꙋпѝ таково́мꙋ всѧ́кѡ ѡ҆камене́вшемꙋ ᲂу҆мо́мъ. Ꙗ҆́коже бо добро́тные ві́ны хꙋдѣ́йшаѧ вода̀ непотре́бными твори́тъ: тѣ́мъ же ѡ҆́бразомъ и҆ добродѣ́тельныхъ житїе́мъ и҆ мы́слїю, ѕлы̑ѧ бесѣ̑ды растлѣва́ютъ.

м҃є. А҆́ще всѐ тща́нїе и҆ и҆скꙋ́сство ᲂу҆потреблѧ́емъ длѧ и҆збѣжа́нїѧ тѣле́снагѡ ᲂу҆мерщвле́нїѧ: мно́гѡ па́че тща́тисѧ до́лженствꙋемъ ѡ҆ и҆збѣжа́нїи дꙋше́внагѡ ᲂу҆мерщвле́нїѧ. Хотѧ́щемꙋ во спасти́сѧ ни є҆ди́нагѡ нѣ́тъ препѧ́тствїѧ, ра́звѣ то́чїю нерадѣ́нїе, и҆ ᲂу҆ны́нїе дꙋшѝ.

м҃ѕ. Є҆ли́цы стꙋжа́ютъ мы́слити полє́знаѧ, и҆ добро́мъ глаго́лємаѧ, сі́и ѕлоща́стными бы́ти мнѧ́тсѧ. Є҆ли́цы же разꙋмѣва́ѧ и҆́стинꙋ, безстꙋ́днѡ любопрѧ́тсѧ, си́хъ разꙋмѣ́нїе ᲂу҆мертви́сѧ, и҆ ѕвѣ́рскимъ ᲂу҆чини́сѧ нра́въ и҆́хъ, и҆ не вѣ́дѧтъ бг҃а, нижѐ просвѣти́сѧ дꙋша̀ и҆́хъ.

м҃з. Ро́ды живо́тныхъ бг҃ъ ко взаи́мной нꙋ́ждѣ произведѐ сло́вомъ свои́мъ, и҆ны̑ѧ длѧ ᲂу҆потребле́нїѧ въ пи́щꙋ, и҆ны̑ѧ длѧ слꙋже́нїѧ: человѣ́ка же сотворѝ зри́телемъ ѻ҆́ныхъ, и҆ дѣ́лъ и҆́хъ, и҆ благода́рнымъ и҆столкова́телемъ. Тѣ́мже подоба́етъ тща́тисѧ лю́демъ, да не ка́кѡ неви́дѣвшими и҆ неразꙋмѣ́вшими бг҃а, и҆ дѣ́лъ є҆гѡ̀, ᲂу҆́мрꙋтъ ꙗ҆́кѡ ѕвѣ́ри безслове́снїи. Вѣ́дѣти же подоба́етъ человѣ́кꙋ, ꙗ҆́кѡ бг҃ъ всѧ̑ мо́жетъ, и҆ ничто́же є҆́сть проти́вно всѧ̑ могꙋ́щемꙋ: но и҆з̾ не сꙋ́щагѡ всѧ̑, ꙗ҆̀же восхотѣ̀, сотворѝ, и҆ твори́тъ сло́вомъ свои́мъ во спасе́нїе человѣ́кѡмъ.

м҃и. Сꙋ̑щаѧ на небесѝ безсмє́ртна сꙋ́ть, по бла́гости сꙋ́щей въ ѻ҆́ныхъ: сꙋ̑щаѧ же на землѝ смє́ртна, по сꙋществꙋ́ющей въ ѻ҆́ныхъ самопроизво́льной ѕло́бѣ, ꙗ҆́же прилꙋча́етсѧ безꙋ̑мнымъ ѿ лѣ́ности и҆́хъ, и҆ невѣ́дѣнїѧ бг҃а.

м҃ѳ. Сме́рть разꙋмѣва́ема людьмѝ, безсме́ртїе є҆́сть: не разꙋмѣва́ема же невѣ́ждами, сме́рть є҆́сть. И҆ сеѧ̀ сме́рти не подоба́етъ боѧ́тисѧ, но па́гꙋбы дꙋше́вныѧ, ꙗ҆́же є҆́сть невѣ́дѣнїе бг҃а. Сїе́ бо лю́то є҆́сть дꙋшѣ̀.

н҃. Ѕло́ба, стра́сть вещества̀ є҆́сть. Тѣ́мже не возмо́жно тѣ́лꙋ без̾ ѕло́бы бы́ти. Слове́снаѧ же дꙋша̀ помышлѧ́ѧ сїѐ, сотрѧса́етъ вещества̀ тѧ́жесть, ꙗ҆́же є҆́сть ѕло́ба, и҆ ѿ таковы́ѧ тѧ́жести возника́ѧ, познае́тъ бг҃а всѣ́хъ, и҆ ꙗ҆́коже врагꙋ̀, и҆ ра́таю вне́млетъ тѣ́лꙋ, не повинꙋ́ющисѧ є҆мꙋ̀. И҆ та́кѡ ᲂу҆вѣнчава́етсѧ дꙋша̀ ѿ бг҃а, ꙗ҆́кѡ стра̑сти ѕло́бы, и҆ вещества̑ побѣди́вшаѧ.

н҃а. Ѕло́ба позна́на дꙋше́ю ненави́дима быва́етъ, ꙗ҆́кѡ ѕвѣ́рь ѕлово́ннѣйшїй: не позна́нна же, люби́ма быва́етъ ѿ невѣ́дꙋщагѡ є҆ѐ, и҆ порабоща́ѧ люби́телѧ своего̀, и҆мѣ́етъ є҆го̀ плѣ́нникомъ. И҆ та́кѡ ѕлоща́стный и҆ ѻ҆каѧ́нный человѣ́къ нижѐ зри́тъ поле́зное себѣ̀, нижѐ разꙋмѣ́етъ, но мни́тъ ᲂу҆краша́тисѧ ѿ ѕло́бы, и҆ весели́тсѧ.

н҃в. Чи́стаѧ дꙋша̀, блага̀ сꙋ́щи, просвѣща́етсѧ, и҆ ѡ҆сїѧва́етсѧ ѿ бг҃а, и҆ тогда̀ ᲂу҆́мъ блага̑ѧ мы́слитъ, и҆ словеса̀ боголюби̑ваѧ ражда́етъ. Є҆гда́ же ѕло́бою ѡ҆скверни́тсѧ дꙋша̀, бг҃ꙋ ѿвраща́ющꙋсѧ є҆ѧ̀, па́че же дꙋшѣ̀ ѿлꙋча́ющей себѧ̀ ѿ бг҃а, лꙋка́вые бѣ́сы вше́дше въ по́мыслъ, на непра́вєдныѧ дѣѧ̑нїѧ под̾ꙋща́ютъ дꙋ́шꙋ: на прелюбодѣѧ̑нїѧ, ᲂу҆бі̑йства, хищє́нїѧ, свѧтота̑тства, и҆ подѡ́бнаѧ, є҆ли̑ка дѣла̀ бѣсѡ́вскаѧ сꙋ́ть.

н҃г. Вѣ́дѧщїи бг҃а и҆сполнѧ́ютсѧ всѧ́кїѧ благі́ѧ мы́сли, и҆ небе́сныхъ жела́юще, житє́йскаѧ презира́ютъ. Таковы́и же ни мнѡ́гимъ ᲂу҆гожда́ютъ, ни мнѡ́гимъ ᲂу҆гѡ́дны быва́ютъ, та́къ что̀ за сїѐ не то́кмѡ ненави́димы быва́ютъ, но и҆ посмѣва́емы мно́гими ѿ безꙋ́мныхъ. Всѧ̑ же терпѣ́ти ѿ ᲂу҆бо́жества и҆зволѧ́ютъ, вѣ́дѧще, ꙗ҆́кѡ мнѡ́гимъ ꙗ҆влѧ́ющаѧсѧ ѕло́мъ, ѻ҆́нымъ сꙋ́ть бла́го. Разꙋмѣва́ющїй бо небє́снаѧ, вѣ́рꙋетъ бг҃ꙋ, вѣ́даѧ, ꙗ҆́кѡ всѧ̑ творє́нїѧ зави́сѧтъ ѿ во́ли ѻ҆́нагѡ: не разꙋмѣва́ющїй же не вѣ́рꙋетъ николи́же, ꙗ҆́кѡ мі́ръ є҆́сть дѣ́ло бж҃їе: и҆ длѧ спасе́нїѧ человѣ́ка сотворе́нъ бы́сть.

н҃д. И҆спо́лненнїи ѕло́бы, и҆ невѣ́жествомъ ᲂу҆пива́ющїисѧ, не разꙋмѣ́ютъ бг҃а, не трезвѧ́тсѧ дꙋше́ю: бг҃ъ бо разꙋмѣва́емь є҆́сть, а҆ не ви́димь, вельми́ же ꙗ҆́венъ въ ви́димыхъ тва́рехъ, ꙗ҆́коже дꙋша̀ въ тѣ́лѣ: и҆ ꙗ҆́коже тѣ́лꙋ без̾ дꙋшѝ не возмо́жно состоѧ́ти, та́кѡ и҆ всемꙋ̀ ви́димомꙋ и҆ сꙋ́щемꙋ без̾ бг҃а состоѧ́ти не возмо́жно.

н҃є. Чесѡ̀ ра́ди со́зданъ человѣ́къ; Да творє́нїѧ бж҃їѧ разꙋмѣва́ѧ, ᲂу҆́зритъ є҆го̀, и҆ просла́витъ созда́вшаго ѻ҆́ныѧ длѧ человѣ́ка. Оу҆́мъ же боговозлю́бленный неви́димое є҆́сть бла́го, да́рꙋемый ѿ бг҃а достѡ́йнымъ по благо́мꙋ житїю̀.

н҃ѕ. Свобо́дный є҆́сть, не рабо́тающїй сластє́мъ, но ѿ мꙋ́дрости и҆ цѣломꙋ́дрїѧ ѡ҆блада́ющїй тѣ́ломъ, и҆ дово́льствꙋющїйсѧ со мно́гимъ благодаре́нїемъ подае́мымъ є҆мꙋ̀ ѿ бг҃а, а҆́ще бы и҆ вельмѝ бы́ло ма́лѡ. боголюби́вый бо ᲂу҆́мъ и҆ дꙋша̀, а҆́ще согла́сны бꙋ́дꙋтъ, ми́рно быва́етъ всѐ тѣ́ло, и҆ не хотѧ́щи. Дꙋшѣ́ бо хотѧ́щей, всѧ́кое тѣле́сное движе́нїе погаша́етсѧ.

н҃з. Не дово́льствꙋющїисѧ сꙋ́щимъ ᲂу҆ себѧ̀ и҆мѣ́нїемъ, но бо́льшагѡ жела́ющїи, порабоща́ютъ себѧ̀ страсте́мъ мѧтꙋ́щымъ дꙋ́шꙋ, и҆ влага́ющымъ въ ѻ҆́нꙋю по́мыслы и҆ мечта̑нїѧ, ꙗ҆́кѡ сі́и та̑ѧжде ѕла̑ѧ сꙋ́ть. И҆ ꙗ҆́коже безмѣ̑рныѧ ѻ҆дє́жды подвиза́ющымсѧ въ тече́нїи препѧ́тствꙋютъ: тѣ́мъ же ѡ҆́бразомъ и҆ жела́нїе чрезмѣ́рнагѡ и҆мѣ́нїѧ, дꙋша́мъ подвиза́тисѧ и҆лѝ спасти́сѧ не попꙋска́етъ.

н҃и. Въ че́мъ кто́либо принꙋжде́нъ и҆ нево́ленъ, сїѐ темни́ца є҆́сть є҆мꙋ̀ и҆ мꙋ́ка. Любѝ ᲂу҆̀бо прилꙋча́ющаѧсѧ тѝ, да не бꙋ́деши неблагода́рнѡ сносѧ̀, себѐ самаго̀ нечꙋвстви́тельнѡ мꙋ́чити. Є҆ди́нъ же пꙋ́ть є҆́сть къ семꙋ̀, презрѣ́нїе жите́йскихъ.

н҃ѳ. Ꙗ҆́коже видѣ́нїе и҆́мамы ѿ бг҃а длѧ позна́нїѧ ꙗ҆влѧ́емыхъ веще́й, что̀ бѣло̀, и҆ что̀ цвѣ́тꙋ че́рнагѡ: та́кѡ и҆ слове́сность дарова́на на́мъ ѿ бг҃а, во є҆́же разсꙋжда́ти полє́знаѧ дꙋшѣ̀. По́хоть же ѿ разсꙋ́дка ѿторга́ѧсѧ, сла́сть ражда́етъ, и҆ дꙋшѣ̀ спасти́сѧ и҆лѝ съ бг҃омъ соедини́тисѧ не попꙋска́етъ.

ѯ҃. Не по є҆стествꙋ̀ быва̑ющаѧ, сꙋ́ть грѣхѝ, но по произволе́нїю лꙋка̑ваѧ. Нижѐ ꙗ҆́сти є҆́сть грѣ́хъ, но неблагода́рнѡ, и҆ не благолѣ́пнѡ, и҆ невозде́ржнѡ ꙗ҆́сти: поне́же тѣ́ло сꙋществꙋ́етъ въ жи́зни без̾ всѧ́кагѡ лꙋка́вагѡ помышле́нїѧ. Нижѐ про́стѡ зрѣ́ти є҆́сть грѣ́хъ, но зави́стнѡ и҆ гордели́внѡ, и҆ ненасы́тнѡ зрѣ́ти: и҆ нѣ́сть грѣ́хъ слꙋ́шати ми́рнѡ, но гнѣвли́вѡ: и҆ нѣ́сть грѣ́хъ ѡ҆бꙋ́здывати ѧ҆зы́къ ко благодаре́нїю и҆ моли́твѣ, но ко ѡ҆клевета́нїю: и҆ нѣ́сть грѣ́хъ простира́ти рꙋ́ки къ ми́лостынѣ, но къ ᲂу҆бі́йствамъ и҆ хище́нїѧмъ. И҆ та́кѡ ка́ждый чле́нъ грѣши́тъ, лꙋка̑ваѧ вмѣ́стѡ благи́хъ, проти́въ во́ли бж҃їей, самопроизво́льнѡ дѣ́лающїй.

ѯ҃а. А҆́ще сомнѣва́ешисѧ, ꙗ҆́кѡ ка́ждое дѣ́ло назира́етсѧ ѿ бг҃а, разсꙋдѝ, что̀ ты̀ человѣ́къ сы́й, и҆ пра́хъ, мо́жеши вкꙋ́пѣ и҆ въ ѻ҆дно̀ вре́мѧ ѡ҆ всѧ́кихъ мѣста́хъ разсꙋжда́ти и҆ помышлѧ́ти: мно́гѡ па́че бг҃ъ, всѐ ви́дѧщїй, ꙗ҆́кѡ зе́рно горꙋ́шное, всѐ ѡ҆животворѧ́ющїй и҆ пита́ющїй, ꙗ҆́коже хо́щетъ.

ѯ҃в. Є҆гда̀ заключи́ши двє́ри хра́мины, и҆ є҆ди́нъ бꙋ́деши, зна́й, что̀ соприсꙋ́тствꙋетъ тѝ ѡ҆предѣле́нный ѿ бг҃а ка́ждомꙋ человѣ́кꙋ а҆́гг҃лъ, є҆го́же є҆́ллины домо́вымъ бѣ́сомъ нарица́ютъ. Се́й, неꙋсыпа́емь и҆ непрельща́емь бꙋ́дꙋчи, всегда̀ соприсꙋ́тствꙋетъ тѝ, всѐ ви́дитъ, и҆ мра́комъ не возбранѧ́етсѧ. Вкꙋ́пѣ съ си́мъ признава́й и҆ бг҃а, во всѧ́комъ мѣ́стѣ сꙋ́щаго. И҆́бо нѣ́тъ мѣ́ста, и҆лѝ ве́щи нѣ́кїѧ, въ не́йже бы не бы́лъ бг҃ъ, ꙗ҆́кѡ всѣ́хъ бо́льшїй, и҆ всѣ́хъ содержа́щи въ рꙋцѣ̀ свое́й.

ѯ҃г. А҆́ще во́ины вѣ́рность къ ке́сарю хранѧ́тъ, потомꙋ̀ что̀ подае́тсѧ ѿ негѡ̀ пи́ща: мно́гѡ па́че до́лженствꙋемъ мы̀ благодари́ти безпреста́ннѡ немо́лчными ᲂу҆сты̀, и҆ ᲂу҆гожда́ти бг҃ꙋ, всѧ̑ созда́вшемꙋ длѧ человѣ́ка.

ѯ҃д. Къ бг҃ꙋ благода́рность, и҆ благо́е жи́тельство, человѣ́ческїй пло́дъ є҆́сть бг҃оꙋго́дный. Плоды́ же земны̑ѧ не въ ѻ҆ди́нъ ча́съ созрѣва́ютъ, но по вре́мени, ѿ дожде́й, и҆ прилѣжа́нїѧ: тѣ́мъ же ѡ҆́бразомъ и҆ плоды̀ человѣ́чєскїѧ, по́двигомъ, и҆ поꙋче́нїемъ, со вре́менемъ, крѣ́постїю, и҆ воздержа́нїемъ, и҆ терпѣ́нїемъ ѡ҆свѣща́ютсѧ. А҆́ще же ѿ си́хъ пока́жешьсѧ нѣ́котѡрымъ когда́либо благочести́въ, не вѣ́рь самомꙋ̀ себѣ̀, до́ндеже въ тѣлесѝ, и҆ ничто́же ѿ твои́хъ мнѝ ᲂу҆го́днымъ бы́ти бг҃ꙋ. И҆́бо зна́й, что̀ не ᲂу҆до́бно человѣ́кꙋ до конца̀ сохрани́ти безгрѣ́шность.

ѯ҃є. Сло́ва ᲂу҆ люде́й ничто́же є҆́сть честнѣ́йше. Та́къ си́льно є҆́сть сло́во, что̀ сло́вомъ и҆ благодаре́нїемъ бг҃а чти́мъ: непотре́бное же и҆ безче́стное сло́во ᲂу҆потреблѧ́ѧ, ѡ҆сꙋжда́емъ на́шꙋ дꙋ́шꙋ. Нечꙋвстви́тельнагѡ ᲂу҆́бѡ человѣ́ка є҆́сть дѣ́ло, рожде́нїе своѐ и҆лѝ дрꙋга́го нѣ́коего ѡ҆бвинѧ́ти въ то́мъ, что̀ ѻ҆́нъ грѣши́тъ, ᲂу҆потреблѧ́ѧ самовла́стнѡ и҆лѝ сло́во и҆лѝ дѣ́ло лꙋка́вое.

ѯ҃ѕ. А҆́ще болѣ̑зни тѣлє́сныѧ цѣли́ти тщи́мсѧ за ѡ҆смѣѧ́нїе срѣта́ющихсѧ: мно́гѡ па́че потре́бно тща́тисѧ болѣ̑зни дꙋшє́вныѧ цѣли́ти, ꙗ҆́кѡ пред̾ лице́мъ бж҃їимъ и҆мѣ́емъ сꙋди́ми бы́ти, да не безче́стными ѡ҆брѧ́щемсѧ, и҆лѝ посмѣѧ́нїѧ досто́йными. И҆мѣ́ѧ бо самовла́стїе, а҆́ще восхо́щемъ, похотствꙋ́ѧ къ лꙋка̑вымъ дѣѧ́нїѧмъ, не и҆мѣ́ти ѻ҆́ныхъ, сїѐ сотвори́ти мо́жемъ, и҆ въ на́шей вла́сти є҆́сть бг҃оꙋго́днѡ пожи́ти: и҆ никто́же на́съ принꙋ́дитъ когда̀, про́тивъ во́ли сотвори́ти что̀ лꙋка́вое. Та́кѡ бо подвиза́ющесѧ, бꙋ́демъ досто́йнїи человѣ́цы бж҃їи, и҆ ꙗ҆́кѡ а҆́гг҃ли на небесѣ́хъ жи́тельствꙋющїи.

ѯ҃з. А҆́ще хо́щеши, ра́бъ бы́ти мо́жеши страсте́й: а҆́ще хо́щеши, свобо́денъ бы́ти, мо́жеши, и҆ не преклони́шисѧ къ страсте́мъ. Бг҃ъ бо тѧ̀ самовла́стнымъ сотворѝ. Побѣжда́ѧй стра̑сти плотскі̑ѧ, ᲂу҆вѣнчава́етсѧ нетлѣ́нїемъ. А҆́ще бо не бы̀ бы́ли стра̑сти, не бы̀ бы́ли добродѣ́тєли, нижѐ вѣнцы̀ да́рꙋємыѧ ѿ бг҃а достѡ́йнымъ ѿ человѣ̑къ.

ѯ҃и. Неви́дѧщїи по́льзы своеѧ̀, и҆ бла́га невѣ́дѧщїи слѣпотствꙋ́ютъ дꙋше́ю, и҆ разсꙋ́докъ и҆́хъ ѡ҆слѣпи́сѧ. Тѣ́мже не подоба́етъ къ си̑мъ ѡ҆браща́ти мы́сль, да не томꙋ́жде по нꙋ́ждѣ подпаде́мъ и҆ мы̀, не пред̾ꙋсмотрѣ́въ, ꙗ҆́кѡ слѣпы́е.

ѯ҃ѳ. На согрѣша́ющихъ не подоба́етъ гнѣ́ватисѧ, а҆́ще бы и҆ вины̑, ᲂу҆чинє́нныѧ и҆́ми, мꙋче́нїѧ достѡ́йны бы́ли: но по са́мой пра́вдѣ, ѡ҆браща́ти ѻ҆́ныхъ до́лженствꙋемъ, и҆ мꙋ́чити, а҆́ще та́кѡ слꙋчи́тсѧ, и҆лѝ чрез̾ себѧ̀ сами́хъ, и҆лѝ чрез̾ дрꙋги́хъ. Гнѣ́ватисѧ же и҆лѝ ꙗ҆ри́тисѧ не подоба́етъ. Занѐ гнѣ́въ по стра́сти твори́тъ то́чїю, а҆ не по сꙋдꙋ̀ и҆ пра́вдѣ. Тѣ́мже нижѐ све́рхъ до́лжнагѡ ми́лꙋющихъ похвали́ти подоба́етъ. По са́момꙋ добрꙋ̀, и҆ пра́вдѣ подоба́етъ нака́зывати лꙋка́выхъ, а҆ не по со́бственной стра́сти гнѣ́ва.

ѻ҃. Стѧжа́нїе дꙋше́вное є҆ди́но є҆́сть без̾ѻпа́сно и҆ некра́домо. Є҆́сть же ѻ҆но̀ добродѣ́тельное и҆ бг҃оꙋго́дное житїѐ, и҆ разꙋмѣ́нїе, и҆ творе́нїе благи́хъ дѣ́лъ. Бога́тство во слѣпы́й є҆́сть пꙋтеводи́тель, и҆ совѣ́тникъ безꙋ́мный, и҆ погꙋблѧ́етъ нечꙋвстви́тельнꙋю дꙋ́шꙋ, ѕлѣ̀ и҆ и҆збы́точнѡ бога́тство ᲂу҆потреблѧ́вшїй.

ѻ҃а. Подоба́етъ лю́демъ, и҆лѝ ничегѡ̀ ли́шше не стѧжева́ти, и҆лѝ и҆мѣ́ѧ, сїѐ вѣ́дѣти тве́рдѡ, ꙗ҆́кѡ всѧ̑ житє́йскаѧ, по є҆стествꙋ̀ тлѣ́нна и҆ ᲂу҆добоѿе́млєма сꙋ́ть, ѿмє́тна и҆ преломлѧ́єма: и҆ приклю́чшеесѧ презира́ти не до́лженствꙋютъ.

ѻ҃в. Тѣлє́сныѧ болѣ̑зни, зна́й, что̀ є҆сте́ственнѡ тѣ́лꙋ сво́йственны сꙋ́ть, ꙗ҆́кѡ тлѣ́нномꙋ и҆ веще́ственномꙋ. Подоба́етъ ᲂу҆́бѡ нака́занной дꙋшѣ̀ въ таковы́хъ страсте́хъ, крѣ́пость и҆ терпѣ́нїе, благода́рнѡ пока́зывати, а҆ не ᲂу҆корѧ́ти бг҃а, почто̀ ѻ҆́нъ сотворѝ тѣ́ло.

ѻ҃г. Подвиза́ющїисѧ на ѻ҆лѷмпі́йскихъ и҆́грахъ, не за пе́рвꙋю, и҆лѝ вторꙋ́ю, и҆лѝ тре́тїю побѣ́дꙋ ᲂу҆вѣнчава́ютсѧ: но є҆гда̀ всѣ́хъ съ ни́ми подвиза́ющихсѧ побѣдѧ́тъ. Та́кѡ ᲂу҆́бѡ подоба́етъ ка́ждомꙋ хотѧ́щемꙋ ѿ бг҃а ᲂу҆вѣнча́тисѧ, ѡ҆бꙋча́ти дꙋ́шꙋ свою̀ цѣломꙋ́дрїю, не то́чїю въ разсꙋжде́нїи тѣ́ла, но и҆ въ прибы́ткахъ, и҆ хище́нїѧхъ, и҆ за́висти, и҆ въ пи́щѣ, и҆ тще́тной сла́вѣ, и҆ ᲂу҆коре́нїѧхъ, и҆ сме́рти, и҆ є҆ли̑ка такѡва́ѧ сꙋ́ть.

ѻ҃д. Не человѣ́ческїѧ ра́ди похвалы̀ ѡ҆ благо́мъ и҆ боголюбе́зномъ житїѝ потщи́мсѧ, но спасе́нїѧ ра́ди дꙋшѝ, добродѣ́тельнꙋю жи́знь и҆збере́мъ. Сме́рть бо по всѧ́къ де́нь пред̾ ѻ҆ча́ми на́шими є҆́сть ви́дима, а҆ человѣ́чєскїѧ по́чєсти безвѣ́стны.

ѻ҃є. Въ на́шей вла́сти є҆́сть, цѣломꙋ́дреннѡ пожи́ти: богати́тисѧ же нѣ́сть въ на́шей вла́сти. Что̀ ᲂу҆́бѡ; не подоба́етъ ли ѡ҆сꙋжда́ти на́мъ дꙋ́шꙋ свою̀ за маловре́менное мечта́нїе бога́тства, є҆́же стѧжа́ти вла́сти не и҆́мамы, но жела́емъ то́чїю ѻ҆́нагѡ; ѽ ко́ль несмы́сленнѡ тече́мъ, не вѣ́дѧще, что̀ превы́ше всѣ́хъ добродѣ́телей є҆́сть смиренномꙋ́дрїе, ꙗ҆́коже превы́ше всѣ́хъ страсте́й є҆́сть чревобѣ́сїе и҆ по́хоть жите́йскаѧ!

ѻ҃ѕ. Па́мѧтовати подоба́етъ непреста́ннѡ разꙋ́мнымъ, ꙗ҆́кѡ ма̑лыѧ и҆ маловре́мєнныѧ трꙋды̀ сносѧ̀ въ жи́зни, велича́йшїѧ сла́дости и҆ весе́лїѧ вѣ́чнагѡ наслажда́емсѧ по сме́рти. Тѣ́мже борю́щїйсѧ со страстьмѝ, и҆ жела́ющїй ᲂу҆вѣнча́тисѧ ѿ бг҃а, а҆́ще паде́тъ, да не возмалодꙋ́шествꙋетъ, и҆ пребꙋ́детъ во грѣхѣ̀, ѿчаѧва́ѧсѧ въ себѣ̀: но воста́вши па́ки да побо́ретсѧ, и҆ попече́тсѧ ᲂу҆вѣнча́тисѧ, да́же до послѣ́днѧгѡ воздыха́нїѧ востаѧ̀ ѿ слꙋча́ющагѡсѧ паде́нїѧ. Тѣле́сные бо трꙋды̀ ѻ҆рꙋ̑дїѧ сꙋ́ть добродѣ́телей, и҆ спаси́тельны быва́ютъ дꙋшѣ̀.

ѻ҃з. Житє́йскїѧ ѕлоключє́нїѧ, мꙋже́й и҆ подви́жникѡвъ досто́йными творѧ́тъ ᲂу҆вѣнча́тисѧ ѿ бг҃а. Оу҆мертви́ти ᲂу҆̀бо подоба́етъ въ жи́зни свое́й ᲂу҆́ды ѿ всегѡ̀ жите́йскагѡ: ме́ртвый бо николи́же бꙋ́детъ пещи́сѧ ѡ҆ че́млибо жите́йскомъ.

ѻ҃и. Не подоба́етъ слове́сной и҆ подвиза́ющейсѧ дꙋшѣ̀, а҆́бїе ᲂу҆страша́тисѧ и҆ боѧ́тисѧ прилꙋча́ющихсѧ страда́нїй, да не посмѣ́ѧна бꙋ́детъ ꙗ҆́кѡ боѧзли́ваѧ. Ѿ жите́йскихъ бо мечта́нїй смꙋща́емаѧ дꙋша̀ вы́йдетъ и҆з̾ благочи́нїѧ. Къ вѣ̑чнымъ благи̑мъ ведꙋ́тъ дꙋшє́вныѧ добродѣ́тєли на́ши, мꙋче́нїй же вино́вны быва́ютъ самопроизвѡ́льныѧ ѕлѡ́бы человѣ́чєскїѧ.

ѻ҃ѳ. Слове́сный человѣ́къ, ѿ слове́сныхъ свои́хъ чꙋ́вствъ, чрез̾ стра̑сти дꙋшє́вныѧ ра́тꙋемь быва́етъ. Чꙋ̑вства же тѣлє́сныѧ сꙋ́ть пѧ́ть: зрѣ́нїе, ѡ҆бонѧ́нїе, слꙋ́хъ, вкꙋ́съ и҆ ѡ҆сѧза́нїе. Чрез̾ сі́и пѧ́ть чꙋ́вствъ, четы́ремъ страсте́мъ со́бствєннымъ подпа́даѧ ѻ҆каѧ́ннаѧ дꙋша̀, плѣнѧ́етсѧ. Стра̑сти же дꙋшє́вныѧ сꙋ́ть четы́ре: тщесла́вїе, ра́дость, ꙗ҆́рость и҆ стра́хъ. Є҆гда̀ ᲂу҆́бѡ мꙋ́дростїю и҆ разсꙋжде́нїемъ, до́брѣ во́инствовавшїй человѣ́къ, ѡ҆де́ржитъ и҆ побѣди́тъ стра̑сти: тогда̀ ᲂу҆жѐ не ра́тꙋемь быва́етъ, но ми́ръ и҆́мать въ дꙋшѣ̀, и҆ ᲂу҆вѣнчава́етсѧ ѿ бг҃а, ꙗ҆́кѡ побѣди́вшїй.

п҃. Ѻ҆́ви и҆з̾ находѧ́щихсѧ въ гости́нницахъ, постє́ли полꙋча́ютъ: ѻ҆́ви же не и҆мѣ́ѧ ѻ҆дра̀, но на землѝ спѧ̀ ни ма́лѡ не ме́нѣе, ка́къ и҆ спѧ́щїе на ѻ҆дрѣ̀, храпѧ́тъ, и҆ конца̀ но́чи дожда́вшесѧ, за ᲂу҆́тра постє́ли ѡ҆ста́вивше въ гости́нницѣ, всѣ̀ вкꙋ́пѣ и҆схо́дѧтъ, со́бственное то́чїю несѧ̀. Тѣ́мъ же ѡ҆́бразомъ, и҆ всѝ ходѧ́щїи въ жи́зни, и҆ посре́дственнѡ, и҆ въ сла́вѣ, и҆ въ бога́тствѣ жи́вшїи, ꙗ҆́коже и҆з̾ гости́нницы и҆з̾ жи́зни и҆схо́дѧтъ, ничто́же ѿ сла́дости жите́йскїѧ и҆ бога́тства взима́ѧ съ собо́ю, кромѣ̀ є҆ди́ныхъ со́бственныхъ дѣ́лъ, и҆лѝ до́брыхъ, и҆лѝ ѕлы́хъ, ᲂу҆чине́нныхъ и҆́ми въ жи́зни и҆́хъ.

п҃а. Въ преимꙋ́щественной бꙋ́дꙋчи вла́сти, да не ско́рѡ воспрети́ши комꙋ́либо сме́ртїю, вѣ́дѧщи, ꙗ҆́кѡ по є҆стествꙋ̀ и҆ ты̀ сме́рти подлежи́ши, и҆ ꙗ҆́кѡ дꙋша̀ ѡ҆блека́етсѧ тѣ́ломъ, ꙗ҆́коже ме́ртвенною ѻ҆де́ждою. Сїѐ ꙗ҆́снѡ вѣ́дѧщи, кро́тости поꙋчи́сѧ и҆ благотворѧ̀ благодарѝ бг҃а вы́нꙋ: не ми́лꙋѧй бо не и҆́мать добродѣ́тели въ себѣ̀.

п҃в. Сме́рти и҆збѣжа́ти невозмо́жно и҆ неꙋдо́бно. Сїѐ вѣ́дѧще слове́снїи пои́стиннѣ человѣ́цы, и҆ ѡ҆бꙋче́нїи добродѣ́телемъ, и҆ бг҃олюбе́зномꙋ по́мыслꙋ, прїе́млютъ сме́рть без̾ стена́нїй, стра́ха и҆ пла́ча, неизбѣ́жность є҆ѧ̀ и҆ и҆збавле́нїе ѿ жите́йскихъ ѕѡ́лъ помышлѧ́ѧ.

п҃г. Забы́вшихъ благо́е жи́тельство, и҆ бг҃оꙋго́дное, и҆ не мꙋ́дрствꙋющихъ пра́вые и҆ бг҃олюбе́зные догма́ты, ненави́дѣти не подоба́етъ, сожалѣ́ти же па́че ꙗ҆́кѡ ѡ҆ лише́нныхъ разсꙋ́дка, и҆ слѣпы́хъ се́рдцемъ и҆ мы́слїю. Ѕло́ бо ꙗ҆́кѡ добро̀ прїе́мше, ѿ невѣ́дѣнїѧ погиба́ютъ, и҆ не вѣ́дѧтъ бг҃а треѻкаѧ́ннїи и҆ немы́сленнїи дꙋше́ю.

п҃д. Ѡ҆ благоче́стїи и҆ благожи́тїи со мно́гими разглаго́льствовати ѿрица́йсѧ: не за́висти ра́ди глаго́лю, но ꙗ҆́кѡ несмы́слєннымъ, посмѣѧ́нїѧ, мню̀, досто́йнымъ пока́жешисѧ. Подо́бный бо подо́бнаго лю́битъ: таковы̑ѧ же словеса̀ не мно́гихъ и҆мѣ́ютъ слꙋ́шателей, и҆ мо́жетъ бы́ть вельмѝ рѣ́дкихъ. Лꙋ́чше же не глаго́лати: ꙗ҆́кѡ не сегѡ̀ хо́щетъ бг҃ъ ко сп҃се́нїю человѣ́ка.

п҃є. Дꙋша̀ состра́ждетъ тѣ́лꙋ, тѣ́ло же не состра́ждетъ дꙋшѣ̀: ꙗ҆́коже тѣ́лꙋ сѣко́мꙋ, состра́ждетъ и҆ дꙋша̀, могꙋ́щꙋ же и҆ здра́вствꙋющꙋ тѣ́лꙋ, стра̑сти дꙋшє́вныѧ соꙋслажда́ютсѧ. Дꙋшѣ́ же помышлѧ́ющей, не помышлѧ́етъ ᲂу҆жѐ тѣ́ло, но пребыва́етъ са́мо по себѣ̀ ѻ҆со́бь. Помышле́нїе бо стра́сть є҆́сть дꙋше́внаѧ: ꙗ҆́коже невѣ́дѣнїе, горды́нѧ, невѣ́рїе, лихоима́нїе, не́нависть, за́висть, гнѣ́въ, нерадѣ́нїе, тщесла́вїе, че́сть, несогла́сїе, нечꙋ́вствїе бла́га. Сїѧ̑ бо дꙋше́ю дѣ́йствꙋютсѧ.

п҃ѕ. Помышлѧ́ѧ ѡ҆ бг҃ѣ, благочести́въ бꙋ́ди, незави́стенъ, бла́гъ, цѣломꙋ́дръ, кро́токъ, дарови́тъ по си́лѣ, ѡ҆бщи́теленъ, неспо́рливъ, и҆ прѡ́чаѧ. Сїе́ бо є҆́сть некра́домое стѧжа́нїе дꙋшѝ, є҆́же ᲂу҆гожда́ти бг҃ꙋ си́ми, и҆ никогѡ́же не сꙋди́ти, и҆ не глаго́лати ни ѡ҆ ко́мже, ꙗ҆́кѡ таковы́йто ѕо́лъ є҆́сть, и҆ согрѣши́лъ: но лꙋ́чше и҆спы́товати своѧ̑ ѕла̑ѧ, и҆ смотри́ти на самаго̀ себѧ̀, на своѐ житїѐ, ᲂу҆го́дно ли ѻ҆но̀ є҆́сть бг҃ꙋ. Что́ бо на́мъ нꙋ́жды, а҆́ще дрꙋгі́й є҆́сть лꙋка́въ;

п҃з. И҆́стинный человѣ́къ тщи́тсѧ благочести́въ бы́ти: благочести́вый же є҆́сть нежела́ющїй чꙋжды́хъ: а҆ чꙋ́ждо є҆́сть человѣ́ка всѐ созда́нное. Всѧ̑ ᲂу҆́бѡ презира́й ты̀, ꙗ҆́кѡ ѡ҆́бразъ бж҃їй. Ѡ҆́бразомъ же бж҃їимъ быва́етъ человѣ́къ, є҆гда̀ пра́вѡ и҆ бг҃оꙋго́днѡ жи́тельствꙋетъ. Но семꙋ̀ и҆на́че не возмо́жно бы́ти, а҆́ще не ѿстꙋ́питъ человѣ́къ ѿ жите́йскихъ. И҆мꙋ́щїй же ᲂу҆́мъ бг҃олюбе́зный, всѧ́кꙋю дꙋше́внꙋю по́льзꙋ и҆ всѧ́кое бл҃гоговѣ́инство ѿ негѡ̀ быва́ющее вѣ́сть. Бг҃олюби́вый мꙋ́жъ никогѡ̀ дрꙋга́гѡ не ᲂу҆корѧ́етъ въ че́мъ са́мъ согрѣша́етъ: а҆ сїѐ спаса́ющїѧсѧ дꙋшѝ є҆́сть зна́менїе.

п҃и. Є҆ли́цы привре́менное стѧжа́нїе наси́льственнѡ и҆мѣ́ти тща́тсѧ, и҆ похотѣ́нїе дѣ́лъ ѕло́бы лю́бѧтъ, не вѣ́дѧще сме́рти, и҆ па́гꙋбы своеѧ̀ дꙋшѝ, и҆ не смо́трѧтъ ѻ҆каѧ́ннїи на по́льзꙋ свою̀: таковы́и не мы́слѧтъ, є҆ли́кѡ стра́ждꙋтъ по сме́рти лю́ди ѿ ѕло́бы.

п҃ѳ. Ѕло́ба стра́сть вещества̀ є҆́сть. Бг҃ъ же ѕло́бы невино́венъ: но разꙋмѣ́нїе, зна́менїе, и҆ си́лꙋ ᲂу҆ма̀, раздѣлѧ́ющꙋю добро̀ ѿ ѕла̀, и҆ самовла́стїе дадѐ лю́демъ. Стра̑сти же ѕло́бы ражда́етъ нерадѣ́нїе, и҆ лѣ́ность человѣ́ческаѧ: неви́ненъ бо є҆́сть бг҃ъ всесоверше́ннѡ. Ѿ раздѣле́нїѧ же мы́сли содѣ́лашасѧ бѣ́си лꙋка́вїи, ꙗ҆́коже и҆ мно́жайшїи ѿ люде́й.

ч҃. Со бл҃гоче́стїемъ живꙋ́щїй человѣ́къ ѕло́бѣ вни́ти въ дꙋ́шꙋ не попꙋща́етъ. Ѕло́бѣ же не сꙋ́щей, безбѣ́дственнѡ и҆ невреди́мѡ быва́етъ дꙋшѣ̀: таковы́ми бо ни де́мѡнъ ѕлы́й, ни прилꙋ́чай не ᲂу҆правлѧ́етъ. Бг҃ъ бо и҆збавлѧ́етъ и҆́хъ ѿ ѕѡ́лъ, и҆ живꙋ́тъ невреди́мыми сохранѧ́еми равнобо́жны. А҆́ще бы кто̀ такова́го мꙋ́жа и҆ похвали́лъ, ѻ҆́нъ смѣе́тсѧ въ себѣ̀ самѣ́мъ похвалѧ́ющымъ є҆го̀: а҆́ще бы и҆ безче́стилъ, не ѿвѣща́етъ проти́вꙋ ᲂу҆корѧ́ющымъ, ниже́ бо негодꙋ́етъ на словеса̀ и҆́хъ.

ч҃а. Ѕло̀ є҆стествꙋ̀ послѣ́дꙋетъ, ꙗ҆́коже ржа̀ къ мѣ́ди, и҆ нечистота̀ къ тѣла́мъ. Но нижѐ ржа́вость дѣ́латель мѣ́ди сотвори́лъ, нижѐ нечистотꙋ̀ роди́вшїи: та́кѡ нижѐ ѕло́бꙋ бг҃ъ сотворѝ. Но дадѐ и҆ разꙋмѣ́нїе и҆ разсꙋжде́нїе человѣ́кꙋ, да и҆збѣжи́тъ ѕла̀, ꙗ҆́кѡ вѣ́дѧщїй, что̀ поврежда́етсѧ ѿ ѻ҆́нагѡ и҆ мꙋ́читсѧ. Блюдѝ ᲂу҆̀бо сохра́ннѡ, да нѣ́когда ви́дѣвъ нѣ́коего благополꙋ́чна, въ си́лѣ и҆ бога́тствѣ, ᲂу҆блажи́ши є҆го̀, ѿ мечта́нїѧ де́мѡнскагѡ. Но сме́рть да бꙋ́детъ тѝ а҆́бїе пред̾ ѻ҆ча́ми, и҆ николи́же ничесогѡ̀ ѕла́гѡ, и҆лѝ жите́йскагѡ да не пожела́еши.

ч҃в. Бг҃ъ на́шъ сꙋ́щымъ на нб҃сѣ́хъ безсме́ртїе дарова̀: сꙋ́щымъ же на землѝ премѣ́нꙋ дадѐ, всемꙋ́ же живо́тъ, и҆ движе́нїе дарова̀: и҆ всѐ длѧ человѣ́ка. Да не совосхища́етъ ᲂу҆́бѡ тебѧ̀ жите́йское мечта́нїе де́мѡна, под̾ꙋща́ющагѡ на лꙋка̑выѧ по́мыслы дꙋ́шꙋ, но нбⷭ҇наѧ блага̑ѧ помышлѧ́ѧ са́мъ въ себѣ̀, глаго́ли: а҆́ще хощꙋ̀: въ мое́й вла́сти є҆́сть побѣди́ти и҆ се́й по́двигъ стра́сти: не побѣждꙋ́ же, а҆́ще восхощꙋ̀ полꙋчи́ти своѐ жела́нїе. Въ се́мъ ᲂу҆́бѡ по́двигѣ подвиза́йсѧ, могꙋ́щемъ спастѝ дꙋ́шꙋ твою̀.

ч҃г. Жи́знь є҆́сть соедине́нїе и҆ совокꙋпле́нїе ᲂу҆ма̀, дꙋшѝ и҆ тѣ́ла: сме́рть же нѣ́сть поги́бель совокꙋ́пленныхъ, но разрѣше́нїе зна́нїѧ ѻ҆́ныхъ. Бг҃омъ бо всѧ̑ сохранѧ́ютсѧ и҆ по разрꙋше́нїи.

ч҃д. Оу҆́мъ нѣ́сть дꙋша̀, но да́ръ бж҃їй, спаса́ющїй дꙋ́шꙋ, и҆ предтече́тъ и҆ совѣ́тꙋетъ дꙋшѣ̀ ᲂу҆́мъ бг҃оꙋго́дный, презрѣ́ти привре́мєннаѧ, веще́ствєннаѧ и҆ тлѣ̑ннаѧ, возлюби́ти же вѣ̑чнаѧ, нетлѣ̑ннаѧ и҆ невеще́ствєннаѧ блага̑ѧ, и҆ ходи́ти въ тѣ́лѣ человѣ́кꙋ, нбⷭ҇наѧ и҆ бж҃їѧ, и҆ всѧ̑ вкꙋ́пѣ ᲂу҆мо́мъ помышлѧ́ющꙋ и҆ ви́дѧщꙋ. И҆ та́кѡ бг҃олюби́вый ᲂу҆́мъ є҆́сть благодѣ́тель, и҆ спасе́нїе человѣ́ческїѧ дꙋшѝ.

ч҃є. Дꙋша̀, бꙋ́дꙋчи въ тѣ́лѣ, а҆́бїе ѿ печа́ли и҆ сла́сти помрача́етсѧ и҆ погиба́етъ. Печа́ль и҆ сла́сть, ꙗ҆́коже мокрѡ́ты тѣ́лꙋ сꙋ́ть. Бг҃олюби́вый же ᲂу҆́мъ противлѧ́ѧсѧ, ѡ҆скорблѧ́етъ тѣ́ло, и҆ спаса́етъ дꙋ́шꙋ: ꙗ҆́кѡ вра́гъ сѣкꙋ́щїй и҆лѝ жгꙋ́щїй тѣлеса̀.

ч҃ѕ. Є҆ли́цы дꙋ́шы ра́зꙋмомъ не ѡ҆бꙋ́здываютсѧ и҆ не ᲂу҆правлѧ́ютсѧ ᲂу҆мо́мъ, та́къ что́бы се́й ᲂу҆де́рживалъ и҆ ᲂу҆правлѧ́лъ и҆́хъ стра̑сти, си́рѣчь, печа́ль и҆ сла́сть: сі́и дꙋ́шы, ꙗ҆́кѡ безсловє́сныѧ живѡ́тныѧ, погиба́ютъ, ѿвлека́ющꙋсѧ ра́зꙋмꙋ ѿ страсте́й, ꙗ҆́кѡ ᲂу҆здодержа́телю побѣжде́ннꙋ ѿ коне́й.

ч҃з. Ве́лїѧ болѣ́знь дꙋшѝ, поги́бель и҆ па́гꙋба є҆́сть, не вѣ́дѣти бг҃а, всѧ̑ сотвори́вшаго длѧ человѣ́ка, и҆ дарова́вшаго є҆мꙋ̀ ᲂу҆́мъ и҆ сло́во, и҆́миже возлета́ѧ человѣ́къ, съ бг҃омъ совокꙋплѧ́етсѧ, разꙋмѣва́ѧ и҆ прославлѧ́ѧ бг҃а.

ч҃и. Дꙋша̀ є҆́сть въ тѣ́лѣ, въ дꙋшѣ́ же є҆́сть ᲂу҆́мъ, въ ᲂу҆мѣ́ же є҆́сть сло́во, и҆́миже бг҃ъ разꙋмѣва́емь, и҆ прославлѧ́емь безсме́ртною твори́тъ дꙋ́шꙋ, нетлѣ́нїе є҆́й и҆ сла́дость вѣ́чнꙋю да́рꙋѧ. Бг҃ъ бо всемꙋ̀ сꙋ́щемꙋ бытїѐ по є҆ди́ной бла́гости дарова̀.

ч҃ѳ. Бг҃ъ самовла́стнымъ сотвори́вши человѣ́ка, ꙗ҆́кѡ незави́стный и҆ благі́й, дадѐ є҆мꙋ̀ и҆ возмо́жность, а҆́ще хо́щетъ, ᲂу҆гожда́ти є҆мꙋ̀. Оу҆гожда́етъ же человѣ́къ бг҃ꙋ, є҆гда̀ нѣ́сть въ не́мъ ѕло́бы. А҆́ще бо ᲂу҆ люде́й похвалѧ́ютсѧ дѡ́брыѧ дѣла̀, и҆ добродѣ́тєли преподо́бныѧ и҆ бг҃олюби́выѧ дꙋшѝ, ѡ҆сꙋжда́ютсѧ же сра̑мныѧ и҆ лꙋка̑выѧ дѣѧ̑нїѧ: мно́гѡ па́че ᲂу҆ бг҃а, хотѧ́щагѡ спасти́сѧ человѣ́кꙋ.

р҃. Блага̑ѧ ѿ бг҃а, ꙗ҆́кѡ блага́гѡ, прїе́млетъ человѣ́къ: сегѡ́ бо ра́ди и҆ сотворе́нъ ѿ бг҃а. Ѕла̑ѧ же себѣ̀ привлека́етъ человѣ́къ, ѿ себѧ̀ и҆ своеѧ̀ ѕло́бы, и҆ по́хоти, и҆ нечꙋ́вственности.

р҃а. Несмы́сленнаѧ дꙋша̀ безсме́ртна сꙋ́щи и҆ влады́чица тѣ́ла раболѣ́пствꙋетъ тѣ́лꙋ сластьмѝ, не помышлѧ́ѧ, ꙗ҆́кѡ сла́сть тѣле́снаѧ є҆́сть вре́дъ є҆ѧ̀: не чꙋ́вствꙋѧ же и҆ ю҆ро́дствꙋѧ, пече́тсѧ ѡ҆ сла́сти тѣле́сной.

р҃в. Бг҃ъ є҆́сть бла́гъ, человѣ́къ же ѕо́лъ. Ничегѡ̀ ѕла́гѡ нѣ́тъ на небесѝ: ничегѡ̀ блага́гѡ на землѝ. Слове́сный же человѣ́къ лꙋ̑чшаѧ и҆збира́етъ, и҆ вѣ́сть бг҃а всѣ́хъ. и҆ благодари́тъ и҆ воспѣва́етъ є҆го̀: и҆ пре́жде сме́рти мерзи́тъ тѣ́ломъ, и҆ лꙋка̑вымъ чꙋ́вствїѧмъ не позволѧ́етъ соверши́тисѧ, вѣ́даѧ и҆́хъ па́гꙋбꙋ и҆ си́лꙋ.

р҃г. Лꙋка́вый человѣ́къ лихоима́нїе лю́битъ, пра́вдꙋ же презира́етъ, нижѐ неизвѣ́стность, и҆ непостоѧ́нство, и҆ маловре́менность житїѧ̀ помышлѧ́ѧ, нижѐ недаропрїе́мность, и҆ неизбѣ́жность сме́рти па́мѧтꙋѧ. А҆́ще же ста́ръ є҆́сть сра́менъ и҆ безꙋ́менъ: то̀, ꙗ҆́коже согни́вшее дре́во, ко всѧ́комꙋ ᲂу҆потребле́нїю є҆́сть недѣйстви́теленъ.

р҃д. Ꙗ҆́коже ᲂу҆довѡ́льствїѧ и҆ ра́дость чꙋ́вствꙋемъ тогда̀, є҆гда̀ и҆скꙋ́съ прїе́млемъ печа́лющихъ [веще́й]: ниже́ бо сла́дцѣ пїе́тъ не жажда́вшїй, нижѐ сла́дцѣ ꙗ҆́стъ не а҆лка́вшїй, нижѐ сла́дцѣ спи́тъ не вельмѝ дрема́вшїй, нижѐ чꙋ́вствїе ра́дости прїе́млетъ не ѡ҆скорбле́нный пре́жде: та́кѡ нижѐ вѣ́чныхъ бла̑гъ наслади́мсѧ, а҆́ще не пре́зримъ маловре́мєннаѧ.

р҃є. Сло́во ᲂу҆ма̀ слꙋжи́тель є҆́сть: є҆́же бо хо́щетъ ᲂу҆́мъ, сїѐ сло́во сказꙋ́етъ.

р҃ѕ. Оу҆́мъ всѧ̑ ви́дитъ, и҆ сꙋ̑щаѧ на нб҃сѣ́хъ: и҆ ничто́же ѻ҆́ный помрача́етъ, ра́звѣ то́чїю грѣ́хъ. Чи́стомꙋ ᲂу҆мꙋ̀ ничегѡ̀ нѣ́тъ непостижи́магѡ, ꙗ҆́коже сло́вꙋ ничегѡ̀ неизглаго́ланнагѡ.

р҃з. По тѣ́лꙋ человѣ́къ сме́ртенъ, по ᲂу҆мꙋ́ же и҆ сло́вꙋ безсме́ртенъ. Мо́лчѧ мы́слиши, помы́сливши глаго́леши: въ молча́нїи бо ᲂу҆́мъ ражда́етъ сло́во. Благода́рное же сло́во, бг҃ꙋ приноси́мое, є҆́сть спасе́нїе человѣ́кꙋ.

р҃и. Глаго́лющїй несмы́слєннаѧ, ᲂу҆ма̀ не и҆́мать: ничто́же бо мы́слѧ глаго́летъ. Но разсмотрѝ, что̀ по́льзꙋетъ тѝ твори́ти ко спасе́нїю дꙋшѝ.

р҃ѳ. Сло́во ᲂу҆́мное и҆ дꙋшеполе́зное, бж҃їй да́ръ є҆́сть: ꙗ҆́коже и҆ сло́во, бꙋесло́вїѧ и҆спо́лненное, и҆ и҆зы́скивающее мѣ́рꙋ, и҆ разстоѧ́нїе небесѝ и҆ землѝ, и҆ величинꙋ̀ со́лнца и҆ ѕвѣ́здъ: человѣ́ка всꙋ́е трꙋжда́ющагѡсѧ и҆з̾ѡбрѣ́тенїе є҆́сть. Ни ма́лѡ бо неполе́зныхъ всꙋ́е хвалѧ́сѧ и҆́щетъ, ꙗ҆́кѡ рѣшето́мъ во́дꙋ хотѧ́щїй че́рпати. Сегѡ́ бо лю́демъ не возмо́жно ѡ҆брѣстѝ.

р҃і. Никто̀ не́ба не ви́дитъ, и҆ сꙋ́щихъ въ не́мъ разꙋмѣ́ти не мо́жетъ, ра́звѣ є҆ди́нъ человѣ́къ, добродѣ́тельномꙋ житїю̀ прилѣжа́щїй, и҆ разꙋмѣва́ющїй, и҆ прославлѧ́ющїй сотво́ршаго є҆го̀ во сп҃се́нїе, и҆ живо́тъ є҆мꙋ̀ дарова́вшаго. Вѣ́сть бо несомнѣ́ннѡ бг҃олюби́вый и҆ таковы́й мꙋ́жъ, ꙗ҆́кѡ без̾ бг҃а ничто́же є҆́сть, но вездѣ̀ є҆́сть бг҃ъ, и҆ во всѣ́хъ, ꙗ҆́кѡ неѡпредѣли́мый.

ра҃і. Ꙗ҆́коже и҆з̾ ма́тернѧгѡ чре́ва и҆схо́дитъ человѣ́къ: та́кѡ и҆з̾ тѣ́ла дꙋша̀ на́га и҆схо́дитъ, и҆на́ѧ чиста̀: и҆на́ѧ свѣтла̀: и҆на́ѧ же сквє́рны и҆мѣ́ѧ грѣхѡ́вныѧ, дрꙋга́ѧ же черна̀ ѿ мно́гихъ прегрѣше́нїй. Тѣ́мже слове́снаѧ и҆ бг҃олюби́ваѧ дꙋша̀, па́мѧтꙋющи и҆ помышлѧ́ющи ѕла̑ѧ по сме́рти, благочести́вѡ жи́тельствꙋетъ, да не по томꙋ́жде ѡ҆сꙋди́вшисѧ подпаде́тъ. Невѣ́рꙋющїи бо, несмы́сленнїи дꙋше́ю, нече́ствꙋютъ и҆ согрѣша́ютъ, вѣ́чное презира́юще.

рв҃і. Ꙗ҆́коже и҆зше́дши и҆з̾ чре́ва, бы́вшихъ во чре́вѣ не по́мниши: та́кѡ и҆ и҆з̾ тѣ́ла и҆зше́дши, не помѧне́ши бы́вшихъ тѣ́лѣ.

рг҃і. Ꙗ҆́коже и҆зше́дши и҆з̾ чре́ва, лꙋ́чше и҆ бо́льше дѣ́лаешисѧ тѣ́ломъ: та́кѡ и҆ и҆з̾ тѣ́ла чи́стымъ и҆ нескве́рнымъ и҆зше́дши, лꙋ́чшимъ бꙋ́деши, и҆ нетлѣ́ннымъ на небесѣ́хъ пребыва́ѧ.

рд҃і. Ꙗ҆́коже во чре́вѣ тѣ́лꙋ соверши́вшꙋсѧ подоба́етъ роди́тисѧ: та́кѡ дꙋшѣ̀, въ тѣ́лѣ ѡ҆предѣле́нный ѿ бг҃а предѣ́лъ и҆спо́лнившей, подоба́етъ и҆зы́ти и҆з̾ тѣ́ла.

рє҃і. А҆́ще ка́кѡ содержа́ти бꙋ́деши дꙋ́шꙋ сꙋ́щꙋю въ тѣ́лѣ, та́кѡ и҆ ѻ҆на̀ и҆зше́дши и҆з̾ тѣ́ла содержа́ти бꙋ́детъ тебѧ̀. И҆́бо до́брѣ и҆ простра́ннѡ тѣ́ло здѣ́сь содержа́вшїй, ѕлѣ̀ са́мъ ѡ҆брѣта́етсѧ по сме́рти: ѡ҆сꙋди́ бо дꙋ́шꙋ свою̀ ꙗ҆́кѡ безꙋ́мный.

рѕ҃і. Ꙗ҆́коже тѣ́ло, и҆з̾ ма́тернѧгѡ чре́ва и҆зше́дши несоверше́ннымъ, ѡ҆брати́тисѧ не мо́жетъ: та́кѡ и҆ дꙋша̀, и҆зше́дши и҆з̾ тѣ́ла и҆ вѣ́дѣнїе бг҃а благи́мъ житїе́мъ не и҆спра́вившаѧ: спасти́сѧ и҆лѝ съ бг҃омъ соедини́тисѧ не мо́жетъ.

рз҃і. Тѣ́ло, соединѧ́ѧсѧ съ дꙋше́ю, и҆з̾ тьмы̀ чре́ва во свѣ́тъ и҆схо́дитъ: дꙋша́ же, соединѧ́ѧсѧ съ тѣ́ломъ, во мра́къ тѣ́ла заключа́етсѧ. Тѣ́мже подоба́етъ ненави́дѣти и҆ нака́зывати тѣ́ло, ꙗ҆́кѡ врага̀ и҆ проти́вника сꙋ́ща дꙋшѣ̀. Мно́жество бо снѣ́дей и҆ сладкоѧ̑стїѧ возбꙋжда́ютъ въ лю́дѣхъ ѕлы̑ѧ стра̑сти: воздержа́нїе же чре́ва ᲂу҆смирѧ́етъ стра̑сти, и҆ спаса́етъ дꙋ́шꙋ.

ри҃і. Тѣле́сное зрѣ́нїе, сꙋ́ть ѻ҆́чи: дꙋше́вное же зрѣ́нїе, є҆́сть ᲂу҆́мъ. И҆ ꙗ҆́коже тѣ́ло, ѻ҆че́й не и҆мꙋ́щее, є҆́сть слѣ́по, и҆ со́лнца, всю̀ зе́млю просвѣща́ющагѡ, и҆ мо́ре не ви́дитъ, нижѐ свѣ́та наслади́тисѧ мо́жетъ: та́кѡ и҆ дꙋша̀ до́брагѡ и҆ блага́гѡ житїѧ̀ не и҆мꙋ́щаѧ, слѣпа̀ є҆́сть, и҆ бг҃а творца̀ и҆ благодѣ́телѧ всѣ́хъ не разꙋмѣва́етъ, нижѐ прославлѧ́етъ, и҆ нетлѣ́нїѧ своегѡ̀, и҆ вѣ́чныхъ бла̑гъ наслади́тисѧ не мо́жетъ.

рѳ҃і. Нечꙋ́вствїе и҆ ю҆ро́дство дꙋшѝ, є҆́сть невѣ́дѣнїе бг҃а. Ѕло́ бо ѿ невѣ́дѣнїѧ ражда́етсѧ: бла́го же ѿ вѣ́дѣнїѧ бг҃а прилꙋча́етсѧ лю́демъ, и҆ спаса́етъ дꙋ́шꙋ. А҆́ще ᲂу҆́бѡ хотѣ̑нїѧ твоѧ̑ не твори́ти тщи́шисѧ, тре́звенъ сы́й, и҆ вѣ́дый бг҃а, мы́слиши ѡ҆ добродѣ́телехъ. А҆́ще же хотѣ̑нїѧ твоѧ̑ лꙋка̑выѧ сла́сти ра́ди тщи́шисѧ твори́ти: невѣ́дѣнїемъ бг҃а ᲂу҆пива́ѧсѧ, погиба́еши, ꙗ҆́кѡ безсловє́сныѧ живо́тныѧ, не помышлѧ́ѧ и҆мꙋ̑щаѧ тебѣ̀ слꙋчи́тисѧ по сме́рти ѕла̑ѧ.

р҃к. Про́мысла є҆́сть дѣ́ло, быва̑ющаѧ по предѣ́лꙋ бж҃е́ственномꙋ, ꙗ҆́коже по всѧ́къ де́нь восходи́ти и҆ заходи́ти со́лнцꙋ, и҆ плодоноси́ти землѣ̀: та́кѡ и҆ зако́номъ глаго́летсѧ быва́ющее по нꙋ́ждѣ человѣ́честѣй: всѧ̑ же человѣ́ка ра́ди быва́ютъ.

рк҃а. Є҆ли́ка бг҃ъ твори́тъ, ꙗ҆́кѡ благі́й, длѧ человѣ́ка твори́тъ: є҆ли̑ка же человѣ́къ твори́тъ, себѣ̀ самомꙋ̀ твори́тъ, и҆ дѡ́браѧ и҆ ѕла̑ѧ. Да не диви́шисѧ же благополꙋ́чїю ѕлы́хъ. Разꙋмѣ́й, что̀ ꙗ҆́коже гра́ды соде́ржатъ мꙋчи́телей, не похвалѧ́юще ѕло́е и҆́хъ произволе́нїе, но чрез̾ си́хъ досто́йныхъ мꙋ́чаще: тѣ́мъ же ѡ҆́бразомъ и҆ бг҃ъ лꙋка́вымъ житє́йскаѧ под̾ вла́стїю и҆мѣ́ти попꙋща́етъ, дабы̀ чрез̾ ѻ҆́ныхъ нака́зывалисѧ нечꙋ́вствꙋющїе: напослѣ́докъ же и҆ си́хъ предае́тъ сꙋдꙋ̀. Поне́же не ꙗ҆́кѡ бг҃ꙋ слꙋжа́ще, но своемꙋ̀ лꙋка́вствꙋ рабо́тающе, лю̑таѧ лю́демъ сотвори́ша.

рк҃в. Почита́ющїи і҆́дѡлѡвъ, а҆́ще бы разꙋмѣ́ли, и҆ ви́дѣли се́рдцемъ, что̀ почита́ютъ ѻ҆нѝ, то̀ не заблꙋжда́ли бы ѻ҆каѧ́ннїи ѿ благоче́стїѧ: но ви́дѧ благоꙋкраше́нїе, чи́нъ и҆ про́мыслъ бы́вшихъ, и҆ быва́ющихъ ѿ бг҃а, позна́ли бы сотво́ршаго ѻ҆́наѧ длѧ человѣ́ка.

рк҃г. Человѣ́къ, ꙗ҆́кѡ ѕлы́й и҆ непра́ведный, ᲂу҆би́ти мо́жетъ: бг҃ъ же живо́тъ дарова́ти и҆ недостѡ́йнымъ не престае́тъ. Ꙗ҆́кѡ бо незави́стный и҆ благі́й по є҆стествꙋ̀, восхотѣ̀ бы́ти мі́рꙋ, и҆ бы́сть, и҆ слꙋ́житъ человѣ́кꙋ ко спасе́нїю є҆гѡ̀.

рк҃д. Слове́сный человѣ́къ є҆́сть то́тъ, и҆́же ᲂу҆разꙋмѣ̀ тѣ́ло, что̀ ѻ҆но̀ є҆́сть, ꙗ҆́кѡ тлѣ́нно є҆́сть и҆ маловре́менно. Таковы́й бо и҆ дꙋ́шꙋ разꙋмѣ́етъ, ꙗ҆́кѡ бж҃е́ственна є҆́сть и҆ безсме́ртна, и҆ вдохнове́нїе бж҃їе сꙋ́щи, длѧ и҆скꙋше́нїѧ и҆ ѡ҆бг҃отворе́нїѧ свѧза́сѧ съ тѣ́ломъ. Оу҆разꙋмѣ́вшїи же дꙋ́шꙋ, пра́вѡ и҆ бг҃оꙋго́днѡ жи́тельствꙋетъ, тѣ́лꙋ не повинꙋ́ѧсѧ: но зри́тъ бг҃а ᲂу҆мо́мъ свои́мъ, и҆ да́рꙋємаѧ дꙋшѣ̀ ѿ бг҃а вѣ̑чнаѧ блага̑ѧ ви́дитъ ᲂу҆́мнѣ.

рк҃є. Бла́гъ и҆ незави́стенъ сы́й при́снѡ бг҃ъ, вла́сть дадѐ человѣ́кꙋ въ добрѣ̀ и҆ ѕлѣ̀, ра́зꙋмъ є҆мꙋ̀ дарова́вши, дабы̀ ви́дѧ мі́ръ, и҆ сꙋ̑щаѧ въ не́мъ, позна́лъ сотво́ршаго всѧ̑ длѧ человѣ́ка. Непра́ведномꙋ же мо́щно хотѣ́ти и҆ не разꙋмѣ́ти: мо́щно бо є҆мꙋ̀ и҆ не вѣ́ровати и҆ бѣ́дствовати, и҆ проти̑внаѧ и҆́стинѣ мы́слити. Толи́кꙋю и҆́мать человѣ́къ вла́сть и҆ въ добрѣ̀ и҆ ѕлѣ̀.

рк҃ѕ. Повелѣ́нїе є҆́сть бж҃їе, да растꙋ́щꙋ тѣ́лꙋ, дꙋша̀ и҆сполнѧ́етсѧ ᲂу҆ма̀, да человѣ́къ ѿ добра̀ и҆ ѕла̀ ᲂу҆го́дное себѣ̀ и҆збере́тъ. Дꙋша́ же не и҆збира́ющаѧ добра̀, ᲂу҆ма̀ не и҆́мать. Тѣ́мже всѣ̀ тѣла̀ дꙋ́шꙋ и҆́мꙋтъ: но не всѧ́каѧ дꙋша̀ глаго́летсѧ ᲂу҆́мъ и҆мѣ́ти. Бг҃олюби́вый бо ᲂу҆́мъ быва́етъ въ цѣломꙋ́дренныхъ, и҆ преподо́бныхъ, и҆ пра́ведныхъ, и҆ непоро́чныхъ, и҆ благи́хъ, и҆ ми́лостивыхъ, и҆ благочести́выхъ. Присꙋ́тствїе ᲂу҆ма̀ быва́етъ человѣ́кꙋ по́мощь къ разꙋмѣ́нїю бг҃а.

рк҃з. Є҆ди́но то́чїю не возмо́жно человѣ́кꙋ, си́рѣчь, є҆́же бы́ти безсме́ртнымъ. Съ бг҃омъ соедини́тисѧ возмо́жно є҆мꙋ̀, а҆́ще помы́слитъ, ꙗ҆́кѡ мо́жетъ. Хотѧ́щїй бо, разꙋмѣва́ющїй, вѣ́рꙋющїй, и҆ лю́бѧщїй человѣ́къ, чрез̾ благо́е житїѐ бг҃ꙋ соѻ́бщникъ быва́етъ.

рк҃и. Ѻ҆́ко ꙗ҆влѧ́ємаѧ ви́дитъ, ᲂу҆́мъ же неви̑димаѧ разꙋмѣва́етъ. Бг҃олюби́вый бо ᲂу҆́мъ свѣ́тъ є҆́сть дꙋшѝ. И҆мꙋ́щїй ᲂу҆́мъ бг҃олюби́вый се́рдцемъ просвѣти́сѧ, и҆ зри́тъ бг҃а ᲂу҆мо́мъ свои́мъ.

рк҃ѳ. Ни є҆ди́нъ благі́й нѣ́сть сра́менъ: недо́брый же коне́чнѡ ѕо́лъ и҆ тѣлолюби́въ є҆́сть. Пе́рваѧ же добродѣ́тель человѣ́ческаѧ є҆́сть, презрѣ́нїе пло́ти. Ѿ привре́менныхъ бо, и҆ тлѣ́нныхъ, и҆ веще́ственныхъ ѿлꙋче́нїе произво́льное, а҆ не по ᲂу҆бо́жествꙋ, вѣ́чныхъ и҆ нетлѣ́нныхъ благи́хъ наслѣ́дниками на́съ твори́тъ.

р҃л. И҆мꙋ́щїй ᲂу҆́мъ вѣ́сть себѧ̀, что̀ ѻ҆́нъ є҆́сть, ꙗ҆́кѡ тлѣ́нный є҆́сть человѣ́къ: вѣ́дый же себѧ̀, всѧ̑ вѣ́сть, ꙗ҆́кѡ творє́нїѧ бж҃їѧ сꙋ́ть, и҆ длѧ спасе́нїѧ человѣ́ческагѡ созда́шасѧ: Всѧ̑ бо разꙋмѣ́ти, и҆ вѣ́рити пра́вѡ, во вла́сти человѣ́ческой є҆́сть. Вѣ́сть же по́длиннѡ таковы́й мꙋ́жъ, ꙗ҆́кѡ житє́йскаѧ презира́ющїи, трꙋ́дъ наималѣ́йшїй и҆́мꙋтъ, сла́дость же и҆ поко́й вѣ́чный полꙋча́ютъ ѿ бг҃а по сме́рти.

рл҃а. Ꙗ҆́коже тѣ́ло без̾ дꙋшѝ мертво̀ є҆́сть: та́кѡ и҆ дꙋша̀ без̾ ᲂу҆ма̀ пра́здна є҆́сть, и҆ ца́рствїѧ бж҃їѧ наслѣ́дити не мо́жетъ.

рл҃в. Є҆ди́нагѡ человѣ́ка бг҃ъ слꙋ́шаетъ: є҆ди́номꙋ человѣ́кꙋ бг҃ъ ꙗ҆влѧ́етсѧ. Человѣколюби́въ є҆́сть бг҃ъ, и҆дѣ́же бы а҆́ще бы́лъ человѣ́къ, та́мѡ є҆́сть и҆ бг҃ъ. Є҆ди́нъ человѣ́къ досто́йный є҆́сть покло́нникъ бг҃а. Человѣ́ка ра́ди бг҃ъ преѡбразꙋ́етсѧ.

рл҃г. Бг҃ъ длѧ человѣ́ка всѐ сотвори́лъ, не́бо, и҆ ᲂу҆кра́силъ ѻ҆́ное ѕвѣзда́ми, длѧ человѣ́ка сотвори́лъ зе́млю. Лю́ди воздѣ́лываютъ зе́млю длѧ себѧ̀. Нечꙋ́вствꙋющїи толи́кагѡ бж҃їѧ про́мысла, безꙋ́мни сꙋ́ть дꙋше́ю.

рл҃д. Добро̀ не ꙗ҆́вно є҆́сть, ꙗ҆́коже не ꙗ҆́вна сꙋ̑щаѧ на небесѝ: ѕло̀ ꙗ҆́вно є҆́сть, ꙗ҆́коже ꙗ҆́вна сꙋ̑щаѧ на землѝ. Добро̀ не и҆́мать сравне́нїѧ. И҆мꙋ́щїй же ᲂу҆́мъ человѣ́къ лꙋ́чшее и҆збира́етъ. Є҆ди́номꙋ бо человѣ́кꙋ бг҃ъ и҆ творє́нїѧ є҆гѡ̀ вразꙋми́тєльна сꙋ́ть.

рл҃є. Оу҆́мъ въ дꙋшѣ̀ ꙗ҆влѧ́етсѧ, а҆ є҆стество̀ въ тѣ́лѣ: и҆ ᲂу҆́мъ дꙋше́вный ѡ҆боже́нїе є҆́сть, є҆стество́ же тѣ́ла, разли́тїе є҆́сть. Во всѧ́комъ тѣ́лѣ є҆стество̀ є҆́сть, но не во всѧ́кой дꙋшѣ̀ ᲂу҆́мъ є҆́сть. Тѣ́мже и҆ не всѧ́каѧ дꙋша̀ спаса́етсѧ.

рл҃ѕ. Дꙋша̀ въ мі́рѣ є҆́сть, ꙗ҆́кѡ рожде́ннаѧ: ᲂу҆́мъ же и҆ превы́ше мі́ра, ꙗ҆́кѡ нерожде́нный. Разꙋмѣва́ющаѧ же мі́ръ, и҆ хотѧ́щаѧ спасти́сѧ дꙋша̀, по всѧ́къ ча́съ и҆́мать зако́нъ непрестꙋ́пнымъ, помышлѧ́ѧ въ себѣ̀, ꙗ҆́кѡ дне́сь по́двигъ и҆ и҆спыта́нїе, и҆ не мо́жно ᲂу҆держа́ти [ ᲂу҆моли́ти] сꙋдїю̀, и҆ ꙗ҆́кѡ погиба́етъ и҆ храни́тсѧ дꙋша̀ ѿ ма́лыѧ и҆ сра́мныѧ сла́сти.

рл҃з. На землѝ созда́сѧ ѿ бг҃а гее́нна и҆ сме́рть, на небеси́ же про́мыслъ и҆ неизмѣнѧ́емость. Всѧ̑ же длѧ человѣ́ка и҆ спасе́нїѧ є҆гѡ̀ сотвори́шасѧ. Бг҃ъ, не тре́бꙋѧй никаки́хъ бла̑гъ, длѧ человѣ́ка сотвори́лъ не́бо, и҆ зе́млю, и҆ стїхі̑и, чрез̾ сі́и всѧ́кое наслажде́нїе бла̑гъ да́рꙋѧ є҆мꙋ̀.

рл҃и. Сме́ртное безсмє́ртнымъ подлежи́тъ, безсме́ртное же смє́ртнымъ: слꙋ́жатъ, си́рѣчь, стїхі̑и человѣ́кꙋ, по человѣколю́бїю, и҆ врожде́нной въ ни́хъ бла́гости созда́вшагѡ бг҃а.

рл҃ѳ. Оу҆бо́гїй, и҆ вре́дъ причини́ти не могꙋ́щїй, во благочести́выхъ дѣѧ́нїемъ не вмѣнѧ́етсѧ, но могꙋ́щїй вре́дъ причини́ти, и҆ си́лꙋ свою̀ во ѕло̀ не ᲂу҆потреблѧ́ющїй, щадѧ́щїй же смире́нныхъ за благоче́стїе къ бг҃ꙋ: се́й благі̑ѧ мзды̑ стѧжева́етъ и҆ по сме́рти.

р҃м. По человѣколю́бїю созда́вшагѡ на́съ бг҃а вельмѝ мнѡ́гїѧ сꙋ́ть лю́демъ ко спасе́нїю пꙋтѝ, ѡ҆браща́ющыѧ дꙋ́шы, и҆ возводѧ́щыѧ и҆̀хъ на нб҃са̀. Полꙋча́ютъ бо дꙋ́шы человѣ́чєскїѧ за добродѣ́тель возмє́здїѧ, за престꙋплє́нїѧ же наказа̑нїѧ.

рм҃а. Сн҃ъ во ѻ҆ц҃ѣ̀, и҆ дх҃ъ въ сн҃ѣ, ѻ҆ц҃ъ же во ѻ҆бои́хъ є҆́сть. Вѣ́рою всѧ̑ неви̑димаѧ и҆ разꙋмѣва́ємаѧ познае́тъ человѣ́къ. Вѣ́ра же є҆́сть произво́льное дꙋшѝ согла́сїе.

рм҃в. Ꙗ҆́коже по нѣ̑кїимъ тре́бамъ и҆лѝ ѻ҆бстоѧ́тельствамъ, въ велича́йшихъ рѣка́хъ пла́вати принꙋжда́ющїисѧ, є҆́стьли тре́звы сꙋ́ть, то̀ сохранѧ́ютсѧ, а҆́ще бы и҆ си̑льныѧ бы́ли стрꙋи̑, ма́лѡ поколеба́вшисѧ сохранѧ́ютсѧ, є҆́стьли что̀ ѿ быва́ющихъ ѻ҆быкнове́ннѡ при брега́хъ и҆зловлѧ́ютъ. Є҆ли́цы же пїѧ́ни ѡ҆брѧ́щꙋтсѧ, а҆́ще бы и҆ тьмокра́тнѡ на кра́й плы́ти стара́лисѧ, но вїно́мъ побѣжда́емы, во стрꙋѧ́хъ потоплѧ́ютсѧ. Тѣ́мже ѡ҆́бразомъ ᲂу҆мерщвлѧ́етсѧ и҆ дꙋша̀, въ нечистѡты̀ и҆ развлече́нїе во́лнъ жите́йскихъ впа́даѧ, а҆́ще ѿ ѕло́бы вещества̀ возни́кнꙋвши, не позна́етъ себѧ̀, ꙗ҆́кѡ бж҃е́ственна бꙋ́дꙋчи, и҆ безсме́ртна со маловре́меннымъ, многостра́стнымъ, и҆ сме́ртнымъ вещество́мъ и҆скꙋше́нїѧ ра́ди свѧза́сѧ, є҆́же привлека́тисѧ ѿ тѣле́сныхъ сласте́й въ па́гꙋбꙋ: презира́ѧ себѧ̀, и҆ невѣ́дѣнїемъ ᲂу҆пива́ѧсѧ, и҆ не воспрїе́млѧ попече́нїе ѡ҆ себѣ̀ погиба́етъ, и҆ внѣ̀ живꙋ́щихъ ѡ҆брѣта́етсѧ. На подо́бїе бо рѣкѝ ча́стѡ привлека́етъ на́съ тѣ́ло къ нелѣ̑пымъ сласте́мъ.

рм҃г. Слове́снаѧ дꙋша̀ въ до́бромъ произволе́нїи неподви́жима стоѧ̀, ѡ҆бꙋ́здываетъ ꙗ҆́коже конѧ̀, ꙗ҆́рость и҆ по́хоть, безсловє́сныѧ своѝ стра̑сти, и҆ побѣжда́ѧ, и҆ ᲂу҆кроща́ѧ, и҆ превосходѧ̀ ѻ҆́ныѧ, ᲂу҆вѣнчава́етсѧ и҆ небе́снагѡ сподоблѧ́етсѧ житїѧ̀, сїю̀ мздꙋ̀ за побѣ́дꙋ и҆ трꙋды̀ прїе́млѧ ѿ созда́вшагѡ є҆ѐ бг҃а.

рм҃д. Слове́снаѧ пои́стиннѣ дꙋша̀ ви́дѧ благополꙋ́чїе лꙋка́выхъ, и҆ благоде́нствїе недосто́йныхъ, не смꙋща́етсѧ представлѧ́ѧ и҆̀хъ въ жи́зни се́й наслажде́нїе, ꙗ҆́коже несмы́сленные лю́ди. Вѣ́сть бо по́длиннѡ и҆ ща́стїѧ непостоѧ́нство, и҆ житїѧ̀ неизвѣ́стность, и҆ жи́зни маловре́менность, и҆ сꙋда̀ недаропрїе́мность, и҆ вѣ́рꙋетъ такова́ѧ дꙋша̀, ꙗ҆́кѡ бг҃ъ ѡ҆ нꙋ́жной пи́щи длѧ неѧ̀ пече́тсѧ.

рм҃є. Жи́знь тѣле́снаѧ, и҆ въ бога́тствѣ мно́гомъ, и҆ си́лѣ житїѧ̀ сегѡ̀ наслажде́нїе, сме́рть быва́етъ дꙋшѝ. Трꙋ́дъ же и҆ терпѣ́нїе, и҆ ᲂу҆бо́жество со благодаре́нїемъ, и҆ ᲂу҆мерщвле́нїе тѣ́ла, живо́тъ є҆́сть и҆ сла́дость вѣ́чнаѧ дꙋшѝ.

рм҃ѕ. Слове́снаѧ дꙋша̀ веще́ственное созда́нїе, и҆ маловре́меннꙋю жи́знь презира́ѧ и҆збира́етъ небе́снꙋю сла́дость, и҆ вѣ́чнꙋю жи́знь, благи́мъ житїе́мъ ѿ бг҃а сїю̀ полꙋча́ѧ.

рм҃з. И҆мꙋ́щїи ѡ҆черне́ннꙋю грѧ́зїю ѻ҆де́ждꙋ, ѡ҆сквернѧ́ютъ ѻ҆де́ждꙋ прикаса́ющихсѧ къ ни̑мъ. Тѣ́мъ же ѡ҆́бразомъ и҆ ѕлы́е произволе́нїемъ, и҆ житїе́мъ непра́вые со простѣ́йшими ѡ҆браща́ѧсѧ, глаго́лѧ съ ни́ми неподоба̑ющаѧ, наподо́бїе ти́ны чрез̾ слꙋ́хъ ѡ҆сквернѧ́ютъ дꙋ́шꙋ.

рм҃и. Нача́ло грѣха̀ є҆́сть по́хоть, ѿ неѧ́же погиба́етъ слове́снаѧ дꙋша̀. Нача́ло же спасе́нїѧ и҆ ца́рствїѧ небе́снагѡ быва́етъ дꙋшѣ̀ любо́вь.

рм҃ѳ. Ꙗ҆́коже мѣ́дь небрего́маѧ, и҆ подоба́ющагѡ прилѣжа́нїѧ не ᲂу҆досто́иваемаѧ, ѿ ражда́ющїѧсѧ ржа́вости, ѿ долговре́меннагѡ свѧза́нїѧ, и҆ неꙋпотребле́нїѧ, согнива́етъ, и҆ непотре́бною и҆ недобро́тною дѣ́лаетсѧ: тѣ́мъ же ѡ҆́бразомъ и҆ дꙋша̀ пра́зднаѧ, и҆ не пекꙋ́щаѧсѧ ѡ҆ благо́мъ житїѝ и҆ ѡ҆браще́нїи къ бг҃ꙋ, ѿлꙋча́ющаѧ себѧ̀ чрез̾ лꙋка̑выѧ дѣѧ̑нїѧ ѿ покро́ва бж҃їѧ, по ѕло́бѣ ражда́ющейсѧ ѿ лѣ́ности, вещество́мъ тѣ́ла, ꙗ҆́кѡ мѣ́дь ѿ ржа́вщины потреблѧ́етсѧ, и҆ недобро́тною и҆ непотре́бною ѡ҆брѣта́етсѧ.

р҃н. Бг҃ъ є҆́сть бла́гъ, безстра́стенъ и҆ непремѣ́ненъ. А҆́ще же кто̀ за благосло́вное почита́етъ и҆ и҆́стинное, ꙗ҆́кѡ бг҃ъ не премѣнѧ́етсѧ, но недоꙋмѣва́етъ, ка́кѡ благи́ми ѻ҆́нъ ᲂу҆веселѧ́етсѧ, ѕлы́хъ же ѿвраща́етсѧ, и҆ на согрѣша́ющихъ гнѣ́ваетсѧ, почита́емь же милосе́рдъ быва́етъ: подоба́етъ рещѝ, ꙗ҆́кѡ нижѐ ра́дꙋетсѧ бг҃ъ, нижѐ гнѣ́ваетсѧ: ра́дость бо и҆ печа́ль сꙋ́ть стра̑сти: нижѐ дара́ми ᲂу҆гожда́етсѧ: сла́стїю бо побѣжда́лсѧ бы. Не лѣ́по є҆́сть, ѿ человѣ́ческихъ дѣ́лъ благи̑мъ и҆лѝ хꙋды̑мъ бы́ти бг҃ꙋ. Но ѻ҆́нъ бла́гъ є҆́сть, и҆ по́льзꙋетъ то́чїю, а҆ николи́же вреди́тъ, то́йжде и҆ є҆дина́ковъ сы́й. Мы́ же благи́ми пребыва́ѧ по подо́бїю съ бг҃омъ соединѧ́емсѧ: ѕлы̑ же бꙋ́дꙋчи по несхо́дствꙋ, ѿлꙋча́емсѧ ѿ бг҃а. И҆ добродѣ́тельнѡ живѧ̀ де́ржимсѧ бг҃а: ѕлы̑ же бꙋ́дꙋчи, враго́мъ на́мъ твори́мъ ѻ҆́наго, не всꙋ́е гнѣ́вающимсѧ, но на грѣхѝ, непопꙋща́ющыѧ бг҃ꙋ въ на́съ возсїѧ́ти, со де́мѡнами же мꙋчи́тельными соединѧ́ющыѧ. А҆́ще же моли́твами и҆ благотворе́нїѧми разрѣше́нїе грѣхѡ́въ ѡ҆брѣта́емъ, не чти́мъ бг҃а, и҆ не премѣнѧ́емъ, но дѣла́ми, и҆ ѡ҆браще́нїемъ къ бг҃ꙋ, ѕло́бꙋ на́шꙋ и҆сцѣлѧ́ѧ, па́ки бж҃їѧ бла́гости причаща́емсѧ. Тѣ́мже бг҃ъ та́кожде ѿвраща́етсѧ ѕлы́хъ, ꙗ҆́коже и҆ со́лнце ѿ лише́нныхъ зрѣ́нїѧ сокрыва́етсѧ.

рн҃а. Благочести́ваѧ дꙋша̀ вѣ́сть бг҃а всѧ́ческихъ. Благоче́стїе бо не что̀ и҆но́е є҆́сть, ра́звѣ творе́нїе во́ли бж҃їѧ, въ че́мъ состои́тъ вѣ́дѣнїе бг҃а, си́рѣчь: є҆́же незави́стнымъ бы́ти, цѣломꙋ́дреннымъ, кро́ткимъ, благода́тнымъ по си́лѣ, ѡ҆бщи́тельнымъ, несварли́вымъ, и҆ твори́ти, є҆ли̑ка сꙋ́ть ᲂу҆гѡ́дна во́ли бж҃їей.

рн҃в. Вѣ́дѣнїе бг҃а, и҆ стра́хъ є҆гѡ̀, и҆сцѣле́нїе є҆́сть страсте́й веще́ственныхъ. Невѣ́дѣнїю бо бж҃їю, дꙋшѣ̀ соприсꙋ́тствꙋющꙋ, пребыва́ющыѧ неисцѣ̑льныѧ стра̑сти согно́иваютъ дꙋ́шꙋ, ꙗ҆́коже ѿ долговре́меннагѡ гно́ѧ согнива́ющей є҆́й ѿ ѕло́бы, є҆ѧ́же неви́ненъ бг҃ъ, зна́нїе и҆ ра́зꙋмъ низпосла́вшїй лю́демъ.

рн҃г. Человѣ́ка позна́нїѧ и҆ ра́зꙋма и҆спо́лнилъ бг҃ъ, стра̑сти и҆ самопроизво́льнꙋю ѕло́бꙋ ѡ҆чи́стити тща́сѧ, и҆ сме́ртное къ безсме́ртїю, по свое́й бла́гости, преложи́ти хотѧ̀.

рн҃д. Оу҆́мъ, сꙋ́щїй въ чи́стой и҆ боголюби́вой дꙋшѣ̀, вои́стиннꙋ зри́тъ бг҃а нерожде́ннаго, и҆ неви́димаго, и҆ неизглаго́ланнаго, є҆ди́наго чи́стаго длѧ чи́стыхъ се́рдцемъ.

рн҃є. Вѣне́цъ нетлѣ́нїѧ, и҆ добродѣ́тель, и҆ спасе́нїе человѣ́ка є҆́сть, благодꙋ́шнѡ и҆ благода́рнѡ сноси́ти ѕлоключє́нїѧ: ᲂу҆де́рживати же ꙗ҆́рость, ѧ҆зы́къ, чре́во и҆ сла̑сти, ве́лїѧ є҆́сть по́мощь дꙋшѣ̀.

рн҃ѕ. Соде́ржитъ мі́ръ про́мыслъ бж҃їй, и҆ нѣ́тъ мѣ́ста ниеди́нагѡ, не и҆мꙋ́щагѡ про́мысла. Про́мыслъ же є҆́сть самоконе́чное сло́во бж҃їе, и҆з̾ѡбразꙋ́ющее грѧдꙋ́щее въ мі́ръ вещество̀, и҆ творе́цъ и҆ хꙋдо́жникъ всегѡ̀ быва́ющагѡ. Ниже́ бо возмо́жно веществꙋ̀ ᲂу҆краси́тисѧ без̾ разсꙋжда́ющїѧ си́лы сло́ва, є҆́же є҆́сть ѡ҆́бразъ и҆ ᲂу҆́мъ и҆ премꙋ́дрость, и҆ про́мыслъ бж҃їй.

рн҃з. Сꙋ́щаѧ ѡ҆ помышле́нїѧ по́хоть, ко́рень є҆́сть страсте́й сро́дныхъ тьмѣ̀: и҆ дꙋша̀ сꙋ́щаѧ въ помышле́нїи по́хоти, не вѣ́сть себѧ̀, ꙗ҆́кѡ бж҃їе вдꙋнове́нїе є҆́сть, и҆ та́кѡ несе́тсѧ ко грѣхꙋ̀, не помышлѧ́ѧ безꙋ̑мнаѧ ѡ҆ ѕлы́хъ, по сме́рти и҆мѣ́ющихъ бы́ти.

рн҃и. Ве́лїѧ и҆ неисцѣ́льнаѧ болѣ́знь дꙋшѝ и҆ поги́бель, є҆́сть безбо́жїе и҆ славолю́бїе. Похотѣ́нїе бо ѕла̀, лише́нїе є҆́сть бла́га. Бл҃го же є҆́сть є҆́же незави́стнѡ дѡ́браѧ всѧ̑ твори́ти, є҆ли̑ка ᲂу҆гѡ́дна сꙋ́ть бг҃ꙋ всѣ́хъ.

рн҃ѳ. Человѣ́къ є҆ди́нъ богопрїе́млющь є҆́сть. Съ си́мъ бо є҆ди́нѣмъ живо́тнымъ бесѣ́дꙋетъ бг҃ъ, но́щїю чрез̾ сновидѣ̑нїѧ, дне́мъ же чрез̾ ᲂу҆́мъ: и҆ чрез̾ всѧ̑ достѡ́йнымъ свои̑мъ лю́демъ предглаго́летъ, и҆ предзна́менꙋетъ бꙋ̑дꙋщаѧ блага̑ѧ.

р҃ѯ. Ничто́же неꙋдо́бно є҆́сть вѣ́рꙋющемꙋ, и҆ жела́ющемꙋ разꙋмѣ́ти бг҃а. А҆́ще же хо́щеши є҆го̀ и҆ зрѣ́ти, ви́ждь благоꙋкраше́нїе и҆ про́мыслъ всегѡ̀ бы́вшагѡ, и҆ быва́ющагѡ сло́вомъ є҆гѡ̀. Всѧ́ же длѧ человѣ́ка.

рѯ҃а. Ст҃ы́мъ и҆менꙋ́етсѧ чи́стый ѿ ѕло́бы и҆ грѣхѡ́въ.Тѣ́мже и҆ ве́лїе є҆́сть дꙋшѝ и҆справле́нїе, и҆ ᲂу҆го́дно бг҃ꙋ, є҆гда̀ нѣ́сть ѕло́бы въ человѣ́кѣ.

рѯ҃в. И҆́мѧ є҆́сть знаменова́нїе є҆ди́нагѡ ѿ мно́гихъ. Тѣ́мже безꙋ́мно мы́слити, ꙗ҆́кѡ бг҃ъ, є҆ди́нъ бꙋ́дꙋчи и҆ є҆дина́ковъ, и҆но́е и҆́мать и҆́мѧ. И҆́мѧ бо сїѐ, бг҃ъ, зна́менꙋетъ безнача́льнаго, всѧ̑ сотво́ршаго длѧ человѣ́ка.

рѯ҃г. А҆́ще свѣ́дꙋщъ ты̀ въ себѣ̀ ѡ҆ дѣѧ́нїѧхъ лꙋка́выхъ, ѿсѣцы̀ ѻ҆́ныѧ ѿ дꙋшѝ твоеѧ̀ ча́ѧнїемъ до́брымъ. Пра́веденъ бо бг҃ъ и҆ человѣколюби́въ.

рѯ҃д. Позна́етъ бг҃а человѣ́къ, и҆ позна́етсѧ ѿ бг҃а тща́щїйсѧ вы́нꙋ неразлꙋ́ченъ бы́ти съ бг҃омъ. Неразлꙋ́ченъ же съ бг҃омъ быва́етъ человѣ́къ благі́й во все́мъ, и҆ всѧ́кꙋю побѣжда́ющїй сла́сть, не по скꙋ́дости подаѧ́нїѧ ѻ҆́ныхъ, но по и҆зволе́нїю и҆ воздержа́нїю своемꙋ̀.

рѯ҃є. Благотворѝ ѡ҆би́дѧщемꙋ тѧ̀, и҆ дрꙋ́гомъ и҆мѣ́ти бꙋ́деши бг҃а. Ни пред̾ кѣ́мъ не ѡ҆клеве́тывай врага̀ твоего̀: и҆мѣ́й любо́вь, цѣломꙋ́дрїе, терпѣ́нїе, воздержа́нїе, и҆ подѡ́бнаѧ. Сїе́ бо є҆́сть вѣ́дѣнїе бг҃а, си́рѣчь, смиренномꙋ́дрїемъ и҆ таковы́ми дѣла́ми послѣ́дованїе бг҃ꙋ. Дѣла́ же сїѧ̑ сꙋ́ть не просты́хъ люде́й, но разꙋ́мныѧ дꙋшѝ.

рѯ҃ѕ. Ѡ҆ нечести́вѡ дерза́ющихъ называ́ти ѡ҆дꙋшевле́нными прозѧбє́нїѧ и҆ ѕє́лїѧ, написа́хъ главꙋ̀ простѣ́йшымъ длѧ свѣ́дѣнїѧ. Тра́вы жи́знь и҆мѣ́ютъ є҆сте́ственнꙋю, дꙋши́ же не и҆мѣ́ютъ. Слове́снымъ же живо́тнымъ человѣ́къ глаго́летсѧ, ꙗ҆́кѡ ᲂу҆́мъ и҆́мать, и҆ наꙋ̑ки вмѣща́етъ. Дрꙋгі̑ѧ живѡ́тныѧ земны̑ѧ и҆ воздꙋ̑шныѧ гла́съ въ себѣ̀ и҆мѣ́ютъ, ꙗ҆́кѡ дꙋ́хъ въ ни́хъ є҆́сть и҆ дꙋша̀: и҆ всѣ̀ живѡ́тныѧ сꙋ́ть растꙋ́щыѧ и҆ ᲂу҆меньша́ющыѧсѧ, ꙗ҆́кѡ живꙋ́тъ и҆ растꙋ́тъ, но не всѣ̀ и҆мѣ́ютъ дꙋ́шꙋ. Разли̑чїѧ же четы́ре сꙋ́ть живо́тныхъ. И҆ны̑ѧ бо и҆з̾ ѻ҆́ныхъ безсмє́ртны сꙋ́ть и҆ ѡ҆дꙋшевлє́нны, ка́къ-то а҆́гг҃ли: и҆ны̑ѧ же ᲂу҆́мъ, дꙋ́шꙋ и҆ дꙋ́хъ и҆мѣ́ютъ, ка́къ-то лю́ди: и҆ны̑ѧ же дꙋ́хъ и҆мѣ́ютъ и҆ дꙋ́шꙋ, ка́къ-то живѡ́тныѧ: и҆ны̑ѧ же то́кмѡ жи́знь и҆мѣ́ютъ, ка́къ-то прозѧбє́нїѧ: то́чїю жи́знь въ прозѧбе́нїѧхъ, без̾ дꙋшѝ, и҆ дꙋ́ха, и҆ ᲂу҆ма̀, и҆ безсме́ртїѧ состои́тъ. И҆ всѧ̑ прѡ́чаѧ без̾ жи́зни не мо́гꙋтъ бы́ти. Всѧ́каѧ же дꙋша̀, си́рѣчь человѣ́ческаѧ, всегда̀ дви́житсѧ съ ѻ҆дногѡ̀ мѣ́ста на дрꙋго́е.

рѯ҃з. Є҆гда̀ сла́сти нѣ́кїѧ мечта́нїе воспрїи́меши, блюдѝ себѐ, да не а҆́бїе совосхище́нъ бꙋ́деши ѿ ѻ҆́нагѡ: но ма́лѡ ѿложи́вши, помѧнѝ сме́рть, и҆ помы́сли, ка́кѡ лꙋ́чше є҆́сть свѣ́дѣти въ себѣ̀, что̀ сїю̀ пре́лесть сла́сти побѣди́вшꙋ.

рѯ҃и. Ꙗ҆́коже въ са́момъ рожде́нїи є҆́сть стра́сть, быва́ющее бо въ жи́зни и҆ растлѣва́етсѧ: та́кѡ и҆ въ стра́сти є҆́сть ѕло́ба. Да не рече́ши ᲂу҆́бѡ, не мо́гъ бг҃ъ ѕло́бꙋ ѿсѣщѝ: сїе́ бо глаго́лющїи, и҆ безчꙋ́вственнѡ и҆ безꙋ́мнѡ глаго́лютъ. Не подоба́ше бг҃ꙋ ѿсѣщѝ вещество̀: вещєства́ бо сꙋ́ть сі́и стра̑сти. Бг҃ъ же по́льзы ра́ди ѿсѣчѐ ѕло́бꙋ ѿ люде́й, ᲂу҆́мъ, зна́нїе и҆ ра́зꙋмъ, и҆ разсꙋжде́нїе добра̀ дарова́вши и҆̀мъ, да ви́дѧще ѕло́бꙋ, ꙗ҆́кѡ поврежда́емсѧ є҆́ю, бѣжи́мъ ѿ неѧ̀. Безꙋ́мный же человѣ́къ послѣ́дꙋетъ ѕло́бѣ, и҆ хва́литсѧ є҆́ю, и҆ ꙗ҆́коже во мре́жꙋ попа́дшисѧ, ра́тꙋемь быва́етъ ѿ неѧ̀, въ не́й пови́тъ бꙋ́дꙋчи, и҆ николи́же ѿрещи́сѧ можѧ̀, и҆ ви́дѣти, и҆ позна́ти бг҃а, всѧ̑ сотво́ршаго во спасе́нїе и҆ ѡ҆боже́нїе человѣ́ка.

рѯ҃ѳ. Сме́ртное са́мо себѧ̀ ненави́дитъ, что̀ пред̾ꙋзна́етъ свою̀ сме́рть. И҆ безсме́ртное, занѐ є҆́сть бла́го, прилꙋча́етсѧ преподо́бной дꙋшѣ̀: сме́ртное же, занѐ є҆́сть ѕло̀, прилꙋча́етсѧ безꙋ́мной и҆ ѻ҆каѧ́нной дꙋшѣ̀.

р҃ѻ. Є҆гда̀ со благодаре́нїемъ на своѐ ло́же ѡ҆брати́шисѧ, благодѣѧ̑нїѧ и҆ толи́кїй про́мыслъ бж҃їй ѡ҆ себѣ̀ помышлѧ́ѧ, и҆спо́лнившисѧ благі́ѧ мы́сли, па́че да весели́шисѧ, и҆ бꙋ́детъ тѝ со́нъ тѣле́сный, трезве́нїе дꙋшѝ, и҆ смеже́нїе ѻ҆че́й твои́хъ, и҆́стинное видѣ́нїе бг҃а, и҆ молча́нїе твоѐ, и҆спо́лнено бꙋ́дꙋчи бла́га, возда́стъ ѿ всеѧ̀ дꙋшѝ и҆ си́лы воспарѧ́ющꙋю, ѡ҆щꙋти́тельнꙋю сла́вꙋ бг҃ꙋ всѣ́хъ. ѕло́бѣ бо не сꙋ́щей ѿ человѣ́ка и҆ благодаре́нїе є҆ди́ное, па́че всѧ́кїѧ многоцѣ́нныѧ же́ртвы, ᲂу҆го́дно бг҃ꙋ, є҆мꙋ́же сла́ва во вѣ́ки вѣкѡ́въ, а҆ми́нь.