Бл҃же́ннагѡ дїадо́ха, є҆пⷭ҇кпа фѡтїкі́йскагѡ і҆ллѷрі́ка словеса̀ по́стничєскаѧ глави́знъ, р҃: предѣ̑лъ же де́сѧть предглаго́леми.

Пе́рвый предѣ́лъ вѣ́ры, мы́сль ѡ҆ бз҃ѣ безстра́стїѧ.

Вторы́й предѣ́лъ наде́жды, и҆зше́ствїе ᲂу҆ма̀ ко ᲂу҆пова́ємымъ.

Тре́тїй предѣ́лъ терпѣ́нїѧ, неви́димагѡ ꙗ҆́кѡ ви́димагѡ зрѧ́ще мы́сленныма ѻ҆чи́ма, неѡскꙋ́днѡ терпѣ́ти.

Четве́ртый предѣ́лъ не сребролю́бїѧ, та́кѡ хотѣ́ти є҆́же не и҆мѣ́ти, ꙗ҆́коже хотѣ́ти є҆́же и҆мѣ́ти.

Пѧ́тый предѣ́лъ ра́зꙋма, не разꙋмѣ́ти себѐ, внегда̀ и҆зстꙋпи́ти ко бг҃ꙋ.

Шесты́й предѣ́лъ смиренномꙋ́дрїѧ, забве́нїе и҆справле́нїй внима́тельное.

Седмы́й предѣ́лъ безгнѣ́вїѧ, жела́нїе мно́го є҆́же не гнѣ́ватисѧ.

Ѻ҆смы́й предѣ́лъ чистоты̀, чꙋ́вство прилѣпле́но бг҃ꙋ.

Девѧ́тый предѣ́лъ любвѐ, возраще́нїе любле́нїѧ къ досажда́ющымъ.

Десѧ́тый предѣ́лъ соверше́ннагѡ и҆змѣне́нїѧ, во сла́дости бж҃їей, и҆ ра́дость вмѣнѧ́ти тѧ́жестное сме́рти.