Смире́ннагѡ нїки́ты мона́ха и҆ пресвѵ́тера свѧтѣ́йшїѧ ѻ҆би́тели стиѳа́та стꙋді́йскагѡ, ᲂу҆ченика̀ сѷмеѡ́на но́вагѡ бг҃осло́ва пе́рваѧ дѣ́ѧтельныхъ гла́въ со́тница.

а҃. Четы́ре непщꙋ́ю вины̑ бы́ти въ трⷪ҇цѣ соверше́ннѣй добродѣ́телей, подви̑жꙋщаѧ ко є҆́же писа́ти полє́знаѧ, ны́нѣ сре́днее нача́ла превозни́кшагѡ, и҆ къ трⷪ҇цѣ та́инственнагѡ дости́гшагѡ бг҃осло́вїѧ. И҆ пе́рвꙋю ᲂу҆́бѡ бы́ти свобо́дꙋ, са́мо то̀ глаго́лю безстра́стїе дꙋшѝ ѿ приболѣ́зненна дѣѧ́нїѧ на є҆сте́ственное пред̾ꙋспѣ́вшее видѣ́нїе тва́ри, и҆ во мра́къ бг҃осло́вїѧ вше́дшее ѿѻнꙋ́дꙋ. Вторꙋ́ю же, ꙗ҆́же ѿ сле́зъ и҆ моли́твы ᲂу҆ма̀ чистотꙋ̀: ѿ негѡ́же сло́во ражда́етсѧ благода́ти, и҆ стрꙋи̑ и҆стека́ютъ разꙋмѣ́нїй. Тре́тїю, є҆́же въ на́съ ст҃ы́ѧ трⷪ҇цы вселе́нїе: ѿ негѡ́же свѣтоли̑тїѧ дх҃а на по́льзꙋ въ ко́емждо ѡ҆чища́емыхъ быва̑ющаѧ, ꙗ҆вле́нїе та̑инъ ца́рствїѧ небе́снагѡ, и҆ ѿкрове́нїе сокрове́нныхъ въ дꙋшѝ сокро́вищъ бж҃їихъ. Четве́ртꙋю, належа́щꙋю нꙋ́ждꙋ всѧ́комꙋ прїе́мшемꙋ тала́нтъ сло́ва ра́зꙋма, преще́нїѧ бж҃їѧ, лꙋка́вый ра́бе, глаго́лющагѡ, и҆ лѣни́вый, подоба́ше тебѣ̀ вда́ти сребро̀ моѐ торжникѡ́мъ: и҆ а҆́зъ прише́дъ, и҆стѧза́лъ бы́хъ своѐ съ ли́хвою1210. є҆гѡ́же ра́ди ᲂу҆́бѡ и҆ даві́дъ па́че боѧ́сѧ, глаго́лаше: Сѐ ᲂу҆стна́мъ мои̑мъ не возбраню̀: гдⷭ҇и, ты̀ разꙋмѣ́лъ є҆сѝ. Пра́вдꙋ твою̀ не скры́хъ въ се́рдцѣ мое́мъ, и҆́стинꙋ твою̀ и҆ спасе́нїе твоѐ рѣ́хъ, не скры́хъ ми́лость твою̀ и҆ и҆́стинꙋ твою̀ ѿ со́нма мно́га1211.

в҃. Нача́ло є҆́же по бз҃ѣ житїѧ̀, соверше́нно мі́ра бѣ́гство: се́ же є҆́сть ѿверже́нїе во́лей дꙋшѝ, и҆ пе́рстнагѡ мꙋдрова́нїѧ преложе́нїе. И҆́мже на бж҃е́ственное восходѧ́ще мꙋдрова́нїе, дꙋхо́вни ѿ плотски́хъ быва́емъ: ᲂу҆мерщвлѧ́еми ᲂу҆́бѡ пло́ти и҆ мі́рови, животвори́ми же дꙋше́ю и҆ дх҃омъ ѡ҆ хрⷭ҇тѣ̀.

г҃. Вѣ́дѣнїе дꙋшѝ ѡ҆ бз҃ѣ не ло́жно, и҆ вѣ́ра завѣща́тельна, презрѣ́нїемъ ви́димыхъ, и҆ дѣѧ́нїе добродѣ́телей, самолю́бїѧ всѧ́кагѡ ѿлꙋче́ннѡ, треплете́на, по соломѡ́нꙋ, ве́рвь1212, ꙗ҆́же ско́рѡ не расто́ргнетсѧ ѿ дꙋхѡ́въ лꙋка́вствїѧ.

д҃. Вѣ́рою возмє́здїѧ трꙋдѡ́въ воспрїѧ́ти ᲂу҆пова́емъ: тѣ́мже и҆ те́рпимъ трꙋды̀ ᲂу҆до́бнѣ добродѣ́телей, ѿ бж҃е́ственнагѡ и҆звѣствꙋ́еми дх҃а любо́вїю воскрилѧ́емсѧ къ бг҃ꙋ.

є҃. Не є҆гда̀ ѿ пѡ́мыслъ стꙋжа́еми є҆смы̀ нечи́стыхъ, ᲂу҆жѐ и҆ дѣ́йствꙋющихъ ѕла̑ѧ, чи́сти быва́емъ. Но є҆гда̀ ѿ крѣ́пости своеѧ̀ ѡ҆слабѣ́вши дꙋша̀, и҆ ᲂу҆́мъ ѿ вознерадѣ́нна и҆ невозде́ржна пребыва́нїѧ, смꙋще́нна и҆мѣ́ти бꙋ́детъ и҆ сѣно́вна мечта̑нїѧ, и҆ трꙋды̀ добродѣ́тели лѣ́ностїю прилѣжа́нїѧ и҆ моли́твы прїѡскꙋдѣ́ютъ: тогда̀ и҆ не дѣ́ющи ѕла̑ѧ, въ странѣ̀ въ сласте́хъ во́лею блатовалѧ́ющихсѧ вчини́мсѧ.

ѕ҃. Разрѣшє́ннымъ же бы́вшымъ брозда́мъ влады́чественнѣйшихъ чꙋ́вствъ, а҆́бїе и҆ страсте́й воста́нїе быва́етъ, и҆ раболѣ́пнѣйшихъ чꙋ́вствъ дви́жетсѧ дѣ́йство: ѡ҆бы́че бо нѣ́какѡ си́хъ безслове́сїе, воздержа́нїѧ разрѣши́вшосѧ ᲂу҆́зъ, къ вина́мъ прилага́тисѧ страсте́й, и҆ ꙗ҆́коже въ сме́ртныхъ въ тѣ́хъ пасти́сѧ па́житехъ, и҆ толи́кѡ па́че, є҆ли́кѡ и҆ ѡ҆слабѣ́нїе косни́тельнѣе протѧза́етсѧ: не бо̀ терпи́тъ, на нѧ́же є҆сте́ственнѣ и҆́мать похотѣ́нїе, разрѣши́вшосѧ бро́здъ, прїѻбще́нїе ѿрази́ти.

з҃. Ѿ чꙋ́вствъ ѻ҆́ва ᲂу҆́бѡ и҆́хъ словє́сна сꙋ́ть, зрѣ́нїе, слꙋ́хъ, и҆ и҆ны́хъ любомꙋдрѣ́йша же и҆ влады́чественнѣйша: ѻ҆́ва же безсловє́сна и҆ скѡ́тна, вкꙋ́съ, ѡ҆бонѧ́нїе, ѡ҆сѧза́нїе, къ послꙋже́нїю слове́сныхъ: зри́мъ бо пе́рвѣе и҆ слы́шимъ, и҆ та́кѡ сло́вомъ дви́жимсѧ, прикаса́емсѧ же предлежа́щагѡ: и҆ ѡ҆бонѧ́юще вкꙋше́нїю дае́мъ. Тѣ́мже и҆ двою̀ скѡ́тнѣйша сꙋ́ть трѝ, и҆ ꙗ҆́вственнѣ раболѣ̑пнѣйша. Ѡ҆ ни́хже ѿ па́ственныхъ и҆ ѕвѣре́й чревонеи́стовнѣйшаѧ и҆ сочета́тельнѣйшаѧ трꙋдѧ́тсѧ па́че: чрез̾ ве́сь бо де́нь и҆ но́щь, и҆лѝ пи́щи несы́тнѣ насыщева́ютсѧ, и҆лѝ къ сочета́нїємъ ᲂу҆стремлѧ́ютсѧ.

и҃. И҆́же дѣ̑йствїѧ внѣ́шнихъ чꙋ́вствъ ко внꙋ̑треннимъ преложи́вый чꙋ́вствамъ, и҆ зрѣ́нїе ᲂу҆́бѡ, ко ᲂу҆мꙋ̀ зрѧ́щемꙋ свѣ́тъ живота̀ простры́й, слꙋ́хъ же, къ ра́зꙋмꙋ дꙋшѝ, вкꙋ́съ же, къ разсꙋжде́нїю словесѐ, ѡ҆бонѧ́нїе же къ мы́сли ᲂу҆ма̀, ѡ҆сѧза́нїе же, къ серде́чной предви́гнꙋвый бо́дрости: а҆́гг҃льскꙋ жи́знь на землѝ соверша́етъ, человѣ́къ ᲂу҆́бѡ человѣ́кѡмъ и҆ сы́й и҆ ви́димь: А҆́гг҃лъ же а҆́гг҃лѡмъ спребыва́ѧ и҆ разꙋмѣва́емь.

ѳ҃. Ви́дѧщымъ ᲂу҆́бѡ ᲂу҆мо́мъ свѣ́тъ бж҃е́ственныѧ жи́зни, сокрове́нныхъ та̑инъ бж҃їихъ ра́зꙋмъ прїе́млемъ: ра́зꙋмомъ же дꙋшѝ, восхожде́нїѧ въ се́рдцѣ пѡ́мыслъ располага́емъ съ вѣ́дѣнїемъ, различа́юще ѿ лꙋ́чшихъ го́ршыѧ, разсꙋжде́нїемъ же сло́ва, ви́ды разꙋмѣ́нїй вкꙋша́емъ. И҆ ꙗ҆̀же ᲂу҆́бѡ ѿ го́рька и҆зраста̑ющаѧ ко́рене, и҆лѝ претворѧ́емъ на сла́дкое и҆зваре́нїе дꙋшѝ, и҆лѝ всѧ́чески ѿме́щемъ, сꙋ́щыѧ же ѿ бы́лїѧ прили̑чна и҆ ѕла̑чна прїе́млемъ: всѧ́ко разꙋмѣ́нїе плѣнѧ́юще въ послꙋша́нїе хрⷭ҇то́во. Мы́слїю же ᲂу҆ма̀, мы́сленное мѵ́рѡ дꙋхо́вныѧ благода́ти ѡ҆бонѧ́емъ, весе́лїѧ и҆ ра́дованїѧ серде́чнагѡ и҆сполнѧ́ющесѧ. Бо́дрымъ же се́рдцемъ, ѡ҆роша́ющагѡ свы́ше дх҃а пла́мень жела́нїѧ на́съ до́брыхъ, и҆лѝ согрѣва́ющагѡ и҆зстꙋди́вшыѧсѧ си́лы на́шѧ хла́домъ страсте́й, благора́зꙋмнѡ ѡ҆щꙋща́емъ.

і҃. Ꙗ҆́коже тѣлесѝ на́шемꙋ чꙋ̑вства сꙋ́ть пѧ́ть: зрѣ́нїе, слꙋ́хъ, вкꙋ́съ, ѡ҆бонѧ́нїе, ѡ҆сѧза́нїе: та́кѡ и҆ дꙋшѣ̀ по томꙋ́жде числꙋ̀ пѧ́ть чꙋ́вствъ сꙋ́ть: ᲂу҆́мъ, сло́во, чꙋ́вство ᲂу҆́мно, ра́зꙋмъ, и҆ вѣ́жество: въ три́ же въ дꙋшѣ̀ дѣ̑йства сїѧ̑ собира́ютсѧ: во ᲂу҆́мъ, въ сло́во, въ чꙋ́вство. И҆ ᲂу҆мо́мъ ᲂу҆́бѡ размышле́нїѧ, сло́вомъ же сказа̑нїѧ, чꙋ́вствомъ же мечта̑нїѧ бж҃е́ственнагѡ вѣ́жества и҆ ра́зꙋма прїе́млемъ.

а҃і. И҆́же ᲂу҆́мъ и҆мы́й размышлє́нїѧ по́мыслѡвъ благоразсꙋжда́ющъ, и҆ бж҃е́ствєннаѧ разꙋмѣ̑нїѧ чи́стѣ прїе́млющъ, сло́во же и҆столкꙋ́ющо є҆стє́ственнаѧ движє́нїѧ ви́димагѡ всегѡ̀ созда́нїѧ, вины̑ си́рѣчь сꙋ́щихъ ᲂу҆ѧснѧ́ющо, ᲂу҆́мное же чꙋ́вство, под̾е́млющее небе́сныѧ премꙋ́дрости и҆ ра́зꙋма вѣ́жество, ѡ҆сїѧ́ньми со́лнца пра́вды, всѧ́ко преше́дъ чꙋ́вство, во є҆́же па́че чꙋ́вства дости́же, и҆ неви́димыхъ наслажда́етсѧ сла́дости.

в҃і. Нача́льнѣйшыѧ си̑лы ᲂу҆ма̀ сꙋ́ть четы́ре: ра́зꙋмъ, ѻ҆строꙋ́мїе, постиза́нїе, и҆ твердомы́слїе. И҆́же бо си̑мъ присовокꙋпи́вый пе́рвѣйшыѧ дꙋшѝ добродѣ́тєли, и҆ ра́зꙋмꙋ ᲂу҆́бѡ ᲂу҆ма̀ цѣломꙋ́дрїе дꙋшѝ приложи́вый, ѻ҆строꙋ́мїю же мꙋ́дрость, постиза́нїю же пра́вдꙋ: твердомы́слїю же мꙋ́жество соедини́вый, колесни́цꙋ пла́меннꙋ и҆ неботе́чнꙋ себѣ̀ сꙋгꙋ́бѡ соста́ви, на трѝ пє́рвѣйшаѧ нача̑ла и҆ си̑лы ѡ҆полчє́нїѧ страсте́й: сребролю́бїѧ, сластолю́бїѧ, и҆ славолю́бїѧ.

г҃і. И҆́же сребролю́бїе постиже́нїемъ зако́нныѧ пра́вды, ꙗ҆́же є҆́сть къ тождеро́дномꙋ ми́лостивно сострада́нїе, побѣди́вый, сластолю́бїе же, благоразꙋ́мнымъ цѣломꙋ́дрїемъ, є҆́же є҆́сть ѡ҆бдержи́тельное воздержа́нїе, ѡ҆долѣ́вый, славолю́бїе же ѻ҆строꙋ́мїемъ и҆ мꙋ́дростїю, є҆́же є҆́сть благоразꙋ́мное разсꙋжде́нїе бж҃е́ственныхъ и҆ человѣ́ческихъ веще́й, ꙗ҆́кѡ немощнѣ́йшее потреби́вый, и҆ кра́сными нога́ми ꙗ҆́кѡ пе́рстно сїѐ, и҆ ничесомꙋ́же досто́йно попра́вый, пе́рстное мꙋдрова́нїе ѡ҆долѣ̀ пло́ти, и҆ толи́кѡ, ꙗ҆́кѡ зако́нъ дꙋ́ха жи́зни преложи́ти то̀, и҆ зако́на мꙋчи́тельствꙋющїѧ пло́ти, свобо́днѡ содѣ́лати и҆ рещѝ: Благодарю̀ бг҃а, ꙗ҆́кѡ зако́нъ дх҃а жи́зни свободи́лъ мѧ̀ є҆́сть ѿ зако́на рабо́ты сме́рти1213.

д҃і. И҆́же сла́вꙋ человѣ́ческꙋ ꙗ҆́кѡ сꙋ́щꙋ, ника́коже сꙋ́щꙋ ᲂу҆своѧ́ѧй, и҆ сластолю́бїе несы́тства ра́ди дꙋшѝ ѡ҆б̾е́млѧй, и҆ сребролю́бїѧ лихои́мства ра́ди держа́йсѧ, и҆лѝ бѣсо́вственъ мнѣ́нїемъ и҆ горды́нею сотворѧ́етсѧ, и҆лѝ ско́тенъ сластьмѝ чре́ва и҆ подчре́вныхъ содѣ́ловаетсѧ, и҆лѝ ѕвѣ́рственъ быва́етъ бли̑жнимъ, лихои́мственнымъ и҆ безчеловѣ́чнымъ сребролю́бїемъ. Ѿпа́даѧ ᲂу҆́бѡ ѿ ꙗ҆́же къ бг҃ꙋ вѣ́ры, за є҆́же прїима́ти сла́вꙋ ѿ человѣ̑къ по словесѝ гдⷭ҇ню, и҆ ᲂу҆клонѧ́ѧсѧ ѿ цѣломꙋ́дрїѧ и҆ чистоты̀, за є҆́же возжига́ти несы́тствомъ подчрє́внаѧ, и҆ безчи̑ннымъ покарѧ́тисѧ стремле́нїемъ, и҆ ᲂу҆клонѧ́ѧсѧ ѿ любвѐ, за є҆́же є҆ди́номꙋ себѣ̀ храни́ти и҆ не даѧ́ти пѣ́нѧзи тре́бꙋющымъ бли̑жнимъ. И҆ та́кѡ многоѡбра́зенъ нѣ́кїй ѕвѣ́рь ѿ мно́гихъ сложе́ныхъ самѣ́мъ себѣ̀ сопроти́вныхъ таковы́й ви́димь є҆́сть, бг҃ꙋ и҆ человѣ́кѡмъ и҆ скотѡ́мъ непримири́теленъ.

є҃і. Ꙗ҆́рость и҆ жела́нїе и҆ слове́ство ᲂу҆ма̀, а҆́ще ᲂу҆́бѡ по є҆стествꙋ̀ въ себѣ̀ стоѧ́тъ и҆ дви́жꙋтсѧ, всегѡ̀ бж҃е́ственна нѣ́коего и҆ бг҃ови́дна человѣ́ка содѣ́ловаютъ, здра́вѡ си́рѣчь дви̑жима, и҆ ника́колюбо ѿ є҆сте́ственнагѡ стоѧ́нїѧ ᲂу҆клонѧ́ющасѧ. А҆́ще ли же проти́вꙋ є҆стества̀ ѿ подо́бнагѡ превратѧ́тсѧ, и҆ ѿ своегѡ̀ ѿдви́гнꙋтсѧ є҆стества̀ многоѡбра́зна нѣ́коегѡ сегѡ̀ (человѣ́ка), ꙗ҆́коже рече́сѧ, и҆ ѿ мно́гихъ самѣ́хъ себѣ̀ сопротивлѧ́ющихсѧ сложе́нна показꙋ́ютъ.

ѕ҃і. Ꙗ҆́рость, междопредѣ́лїе є҆́сть жела́нїѧ и҆ слове́ства дꙋшѝ, ꙗ҆́коже ѻ҆рꙋ́жїе комꙋ́ждо сꙋ́щи во є҆́же проти́вꙋ є҆стества̀ и҆лѝ и҆ по є҆стествꙋ̀ движе́нїи свое́мъ. Дви́жимꙋ бо жела́нїю и҆ слове́ствꙋ по є҆стествꙋ̀ на бж҃е́ствєннаѧ, ѻ҆рꙋ́жїе є҆́сть ꙗ҆́рость комꙋ́ждо пра́вды на є҆ди́наго свирѣ́пѣющаго и҆ нало́гствꙋющаго тѣ́мъ ѕмі́ѧ причаще́нїе сласте́й пло́ти, и҆ сла́вы человѣ́ческїѧ наслажде́нїе: превраща́ющымъ же ѿ є҆́же по є҆стествꙋ̀ движє́нїѧ, и҆ прелага́ющымъ во є҆́же проти́вꙋ є҆стества̀ си́лꙋ, и҆ ѿ ᲂу҆праздне́нїѧ ѡ҆ бж҃е́ственныхъ веще́хъ на человѣ́чєскаѧ преноси̑мымъ: ѻ҆рꙋ́жїе є҆́сть непра́вды въ грѣ́хъ, то́ю ра́тꙋющымъ и҆ напада́ющымъ на воспѧща́ющыѧ стремлє́нїѧ и҆ похотѣ̑нїѧ и҆́хъ. Ꙗ҆́кѡ ѿсю́дꙋ и҆лѝ дѣ́ѧтельнꙋ и҆ зри́тельнꙋ и҆ бг҃ослове́снѣйшꙋ показа́тисѧ человѣ́кꙋ томꙋ̀, посредѣ̀ це́ркве вѣ́рныхъ, по є҆стествꙋ̀ дви́жимꙋ, и҆лѝ ско́тнꙋ и҆ ѕвѣ́рственнꙋ и҆ бѣсо́вственнꙋ, во є҆́же проти́вꙋ є҆стества̀ прелага́ющꙋсѧ.

з҃і. А҆́ще кто̀ не пе́рвѣе си́лы дꙋшѝ своеѧ̀ приболѣ́зненнымъ покаѧ́нїемъ и҆ крѣ́пкимъ прилѣжа́нїемъ таковы̀ ѡ҆брати́въ соверши́тъ, ꙗ҆ковы̀ на́мъ ѿ нача́ла дадѐ бг҃ъ, а҆да́ма созда́въ, и҆ дыха́нїе жи́зни вдꙋ́нꙋвъ во́нь: нижѐ себѐ позна́ти возмо́жетъ когда̀, нижѐ по́мысла самоде́ржца страсте́мъ, без̾ киче́нїѧ, не любопы́тна, не лꙋка́вна, про́ста, смиренномꙋ́дра, за́висти и҆ клеветы̀ чꙋ́жда, стѧжа́ти: всѧ́ко разꙋмѣ́нїе плѣнѧ́юща въ послꙋша́нїе хрⷭ҇то́во. Но нижѐ дꙋ́шꙋ свою̀ возжига́емꙋ, и҆ воспалѧ́емꙋ ѡ҆брѧ́щетъ въ любо́вь бж҃їю, нижѐ предѣ́лы воздержа́нїѧ превосходѧ́щꙋ, и҆ дово́льнꙋ сꙋ́щꙋ предлежа́щими, и҆ ст҃ы́хъ жела́ющꙋ ᲂу҆покое́нїѧ. И҆ а҆́ще не си́це стѧ́жетъ сїѧ̑: ни се́рдце своѐ кро́тко, ми́рно, безгнѣ́вно, бла́го, нера́тꙋемо, и҆спо́лнено ми́лости и҆ ти́хости, стѧжа́ти когда̀ возмо́жетъ. Та́кѡ крамо́льствꙋющей на себѐ дꙋшѝ, и҆ смꙋще́нїѧ ра́ди си́лъ, невмѣща́тельной пребыва́ющей лꙋче́й дꙋ́ха.

и҃і. И҆́же не си́це дре́внѧгѡ благоро́дїѧ воспрїе́млѧй въ себѣ̀ благолѣ́тїе, и҆ начерта́нїѧ не воз̾ѡбража́ѧй при́снѡ ѡ҆́браза, и҆́же ѿ нача́ла тогѡ̀ по подо́бно своемꙋ̀ созда́вшагѡ, ка́кѡ мо́щно когда̀ соедини́тисѧ съ тѣ́мъ, є҆гѡ́же разлꙋчѝ себѐ, начерта́нїй неподо́бїемъ: и҆ є҆мꙋ́же свѣ́тъ вои́стиннꙋ ᲂу҆гаше́нъ бы́сть, свѣ́тꙋ проти́вное въ себѐ прито́рже. Не соедини́всѧ же съ тѣ́мъ, ѿ негѡ́же нача́ло и҆́мать соста́ва, и҆ ѿ негѡ́же ѿ не сꙋ́щихъ воззва́сѧ1214, и҆ сꙋ́щими ѡ҆блада́етъ, се́й ᲂу҆́бѡ посѣ́ченъ бы́въ, ꙗ҆́кѡ не подо́бенъ сотво́ршемꙋ вве́рженъ бꙋ́детъ, вѣ́стно є҆́сть зрѧ́щымъ, а҆́ще и҆ а҆́зъ ᲂу҆молчꙋ̀.

ѳ҃і. До́ндеже ᲂу҆́бѡ вещества̀ въ себѣ̀ и҆́мамы страсте́й и҆ вины̀ си́хъ самохо́тнѣ храни́мъ, ѿтрѧстѝ си́хъ не произволѧ́юще: возмога́етъ тѣ́хъ на ны̀ и҆ си́ла, крѣ́пость прїе́млюще си́рѣчь ѿ на́съ. Повнегда́ же сїѧ̑ ѿ себѐ ѿве́ржемъ, и҆ се́рдце слеза́ми покаѧ́нїѧ ѡ҆чи́стимъ возненави́дѣвше и҆ ви́димыхъ пре́лесть, тогда̀ ᲂу҆тѣ́шителева прише́ствїѧ въ причаще́нїи быва́емъ: бг҃а зрѧ́ще, въ свѣ́тѣ присносꙋ́щнѣ, и҆ зри́ми ѿ негѡ̀.

к҃. И҆́же всемі́рнагѡ чꙋ́вства разто́ргшїи ᲂу҆́зы, въ свобо́дѣ всѧ́кїѧ рабо́ты пребыва́ютъ чꙋ́вствъ, є҆ди́номꙋ дꙋ́хови живꙋ́ще, и҆ томꙋ̀ собесѣ́дꙋюще, ꙗ҆́кѡ ѿ ѻ҆́нагѡ дви́жими. И҆̀мже и҆ съ соединосꙋ́щныма ѻ҆ц҃е́мъ и҆ сло́вомъ соединѧ́тисѧ нѣ́какѡ ѡ҆быко́ша, и҆ є҆ди́нъ дꙋ́хъ, по па́ѵлꙋ, соверша́тисѧ. И҆̀же и҆ не то́чїю не ꙗ҆́ти сꙋ́ть бѣ́сы, но и҆ стра́шни, ꙗ҆́кѡ причасти́вшесѧ бж҃е́ственнагѡ ѻ҆гнѧ̀, и҆ ѻ҆́гнь вои́стиннꙋ бы́вше.

к҃а. Ѡ҆сѧза́нїе, не ѿ ча́сти что̀ є҆́сть въ тѣлесѝ во є҆ди́ной ча́сти своѐ дѣ́йство ꙗ҆́коже прѡ́чаѧ ѿ чꙋ́вствъ и҆мꙋ́що, но ѡ҆бдержи́тельно нѣ́кое, и҆ по всемꙋ̀ тѣлесѝ. Є҆гда̀ ᲂу҆́бѡ не по потре́бѣ прико́снетсѧ чесогѡ̀, є҆щѐ стра́ждꙋщо къ гла́дкостемъ, колеба́тисѧ ᲂу҆мꙋ̀ ѿ пѡ́мыслъ встра́ственныхъ, содѣ́ловаетъ: є҆гда́ же по потре́бѣ нꙋ́жднѣй є҆стествꙋ̀, нѣ́жностей ѿрече́тсѧ, и҆ чꙋ́вство превозни́кнетъ, не ѡ҆бы́че колеба́ти дꙋшє́внаѧ чꙋ̑вства.

к҃в. Оу҆мꙋ̀ во ꙗ҆̀же па́че є҆стества̀ прише́дшꙋ, чꙋ̑вства по є҆стествꙋ̀ стоѧ́ща, безстра́стнѣ съ вина́ми соѡбраща́ютсѧ: словеса̀ то́кмѡ и҆ є҆стества̀ и҆́хъ и҆спытꙋ́юща, и҆ нело́жнѡ разсꙋжда́юща дѣ̑йствїѧ си́хъ вкꙋ́пѣ и҆ ка́чєства. Не пристра́ствꙋюща, и҆лѝ ᲂу҆свои́тельнѣ проти́вꙋ є҆стества̀ дви́жима къ ни̑мъ.

к҃г. По́двизи и҆ трꙋды̀ дꙋхо́внїи ражда́ютъ дꙋшѣ̀ весе́лїе, ми́рꙋ си́рѣчь предвари́вшꙋ стра̑сти. Є҆́же ᲂу҆́бѡ сꙋ́щымъ под̾ чꙋ́вствомъ неꙋдо́бно: сїѐ дꙋшѣ̀ трꙋжда́ющейсѧ, и҆ любо́вь ѿ свѧще́нныхъ по́двигѡвъ къ бг҃ꙋ стѧжа́вшей, и҆ ᲂу҆ѧ́звленной бж҃е́ственна ра́зꙋма раче́нїемъ, ᲂу҆до́бное, и҆ па́че сладча́йше. Ѻ҆́нѣмъ бо ᲂу҆́бѡ трꙋды̀ и҆ по́двизи добродѣ́тели, а҆́ки поко́ю тѣ́ла и҆ сласте́й наслажде́нїю прилѣжа́щымъ неꙋдо́бни сꙋ́ть, и҆ ѕѣлѡ̀ мнѧ́тсѧ бы́ти жесто́цы, не предпоꙋчи́вшымсѧ сла́ность сласте́й потопи́ти стрꙋѧ́ми сле́зъ. Се́й же возгнꙋша́вшейсѧ сласте́й, вино́вныхъ болѣ́зней, и҆ благостра́стїе ѿтрѧ́сшей, съ самолю́бїемъ тѣле́снымъ, є҆ди́но печа́льно, ѡ҆сла́ба трꙋдѡ́въ, и҆ по́двигѡвъ пра́здность. Є҆́же ᲂу҆́бѡ вино́вно ѻ҆́нѣмъ є҆́сть въ весе́лїе тѣле́сно, сїѐ дꙋшѣ̀ преложи́вшей жела̑нїѧ на бж҃е́ствєннаѧ, печа́ли вино́вно: и҆ є҆́же се́й весе́лїѧ вино́вно дꙋхо́вна, ѻ҆́нѣмъ воздыха́нїй и҆ болѣ́зни є҆́сть вино́вно.

к҃д. Трꙋды̀, мнѧ́тсѧ ᲂу҆́бѡ ѿ нача́лъ, болѣ́зней бы́ти и҆сто́чницы всѣ̑мъ вводи̑мымъ въ по́ты и҆ по́двиги дꙋхо́вны. тща́щымсѧ же къ прїꙋмноже́нїю добродѣ́тели и҆ къ средѣ̀ простира́ющымсѧ тоѧ̀ сла́дости нѣ́кїѧ и҆ чꙋ́дныѧ ѿра́ды. Внегда́ же ме́ртвенное сїѐ пожре́тсѧ мꙋдрова́нїе пло́ти ѿ безсме́ртнагѡ живота̀ прибыва́ющагѡ прише́ствїемъ дꙋ́ха въ простира́ющихсѧ вои́стиннꙋ къ конце́мъ добродѣ́телей трꙋда́ми, ра́дости неизрече́нныѧ и҆ весе́лїѧ: разшири́вшꙋсѧ тѣ́мъ си́рѣчь и҆сто́чникꙋ чи́стомꙋ сле́зъ, и҆ сла́дкой стрꙋѝ свы́ше на нѧ̀ ѡ҆дожди́вшейсѧ ᲂу҆миле́нїѧ.

к҃є. А҆́ще хо́щеши на предѣ́лы взы́ти добродѣ́тели, и҆ къ бг҃ꙋ ведꙋ́щїй пꙋ́ть ѡ҆брѣстѝ незаблꙋ́днѣ, не да́ждь сна̀ ѻ҆чи́ма твои́ма, ни дрема́нїѧ вѣ́ждома твои́ма, и҆лѝ поко́ѧ скранїа́ма твои́ма, до́ндеже трꙋды̀ мно́гими и҆ слеза́ми мѣ́сто безстра́стїѧ ѡ҆брѧ́щеши ᲂу҆дрꙋче́нной дꙋшѝ твое́й, и҆ вни́деши во свѧти́лище ра́зꙋма бж҃їѧ и҆ ѵ҆поста́сною премꙋ́дростїю є҆гѡ̀ въ послѣ̑днѧѧ кончи́ны человѣ́ческихъ веще́й съ ра́зꙋмомъ позри́ши, и҆ дѡ́лнѧѧ презрѣ́въ, на высѡ́кїѧ го́ры видѣ́нїѧ, ꙗ҆́коже є҆ле́нь, и҆ са́мъ жа́жднѣйше востече́ши.

к҃ѕ. Пꙋ́ть ско́ръ къ вознесе́нїю добродѣ́тели, молча́нїе є҆́сть новонача̑льнымъ ᲂу҆сте́нъ, и҆ смѣже́нїе ѻ҆́чїю, и҆ ᲂу҆́шїю глꙋхота̀: прїе́мь бо ѿсю́дꙋ ᲂу҆́мъ си́хъ пра́здность, внѣ̑шнїѧ въ себѣ̀ затвори́въ вхо́ды, смотрѣ́ти себѐ начина́етъ, и҆ своѧ̑ движє́нїѧ. И҆ ка́ѧ ᲂу҆́бѡ сꙋ́ть а҆́бїе и҆спытꙋ́етъ ꙗ҆̀же въ мы́сленнѣмъ мо́ри по́мыслѡвъ пла̑вающаѧ помышлє́нїѧ; Ка́ѧ же ꙗ҆̀же въ горни́ло мы́сли є҆гѡ̀ влага́ємаѧ разꙋмѣ̑нїѧ; Чиста́ ли же и҆ не примѣ́сна сѣ́менъ го́рькихъ, и҆ ѿ а҆́гг҃ла свѣ́та, и҆лѝ пле́вели примѣ́сни же и҆ плѣ́вни и҆ ѿ сопроти́вныхъ свѣ́тꙋ. И҆ си́це ꙗ҆́коже нѣ́кїй влады́ка самоде́ржецъ посредѣ̀ стоѧ̀, мы́слемъ сꙋдѧ̀, и҆ раздѣлѧ́ѧ лꙋ́чшыѧ по́мыслы ѿ го́ршихъ. И҆ ѻ҆́ва ᲂу҆́бѡ, ѿ влага́емыхъ прїе́млѧ є҆́же ѿ негѡ̀ ѡ҆бꙋче́нїемъ и҆ движе́нїемъ во ᲂу҆́мныѧ влага́етъ жи̑тницы, ѻ҆гне́мъ и҆спе́кшасѧ дꙋ́ха и҆ воды̀ бж҃е́ственныѧ и҆спѡ́лненна, ѿ ни́хже и҆ пита́емь, возмога́етъ и҆ и҆сполнѧ́етсѧ свѣ́та: ѻ҆́ва же ѿсыла́етъ во глꙋбинꙋ̀ забве́нїѧ, го́ресть си́хъ ѿтрѧса́ѧ. Се́ же є҆ди́нагѡ дѣ́ло є҆́сть ѻ҆́нагѡ ᲂу҆́мнѣ коснꙋ́вшагѡсѧ ведꙋ́щагѡ къ небесе́мъ и҆ бг҃ꙋ незаблꙋ́днѡ, и҆ плаче́вныѧ ри́зы те́мныхъ совле́кшагѡсѧ страсте́й.

к҃з. Дꙋша̀ ꙗ҆́же є҆ди́ною ѿве́ргшаѧ лꙋка́вство и҆ любопы́тное мꙋдрова́нїе ѕлѣ́йшагѡ киче́нїѧ, просты́мъ же и҆ неѕло́бивымъ се́рдцемъ ѿ прише́ствїѧ ᲂу҆тѣ́шителѧ ѡ҆богатѣ́вшаѧ, а҆́бїе въ бз҃ѣ же и҆ въ себѣ̀ быва́етъ. И҆ ꙗ҆̀же зри́тъ и҆ слы́шитъ, вѣ́рна и҆ и҆́стинна непщꙋ́етъ несꙋмнѣ́ннѡ, ꙗ҆́кѡ превозше́дшаѧ лю̑тыѧ невѣ́рїѧ прѡ́пасти, и҆ вы́ше а҆́да за́висти носи́маѧ.

к҃и. Всѣ̀ добродѣ̑тели предварѧ́етъ и҆звѣще́ннаѧ вѣ́ра, є҆гда̀ несꙋмнѣ́ненъ совѣ́тъ прино́ситъ дꙋша̀, и҆ всѧ́чески ѿме́щетъ самолю́бїе. Ничто́же бо та́кѡ и҆́но си́льно є҆́сть ны́нѣ къ по́двигѡмъ совле́кшагосѧ возбранѧ́ти ѿ дѣ́ланїѧ за́повѣдей, ꙗ҆́коже всеѕло́бнѣйшее самолю́бїе. Сїѐ є҆́сть препѧ́тїе предспѣ́ѧнїѧ тщали́выхъ. Сїѐ недꙋ́ги тѣ́мъ подме́щетъ, и҆ неꙋдобоисцѣ̑льны стра̑сти тѣ́ла, и҆́миже теплотꙋ̀ дꙋшѝ стꙋде́нꙋ содѣ́ловаетъ, и҆ є҆́же ѕлопострада́ти ѡ҆ добродѣ́тели нꙋ́дитъ ѡ҆ставлѧ́ти ꙗ҆́кѡ навѣ́тъ благопоко́йныѧ жи́зни. Самолю́бїе же є҆́сть, безслове́сное любле́нїе тѣ́ла: є҆́же и҆ самолюби́ва сотворѧ́ющи и҆́нока, си́рѣчь, дꙋшелюби́ва и҆ тѣлолюби́ва, ᲂу҆далѧ́етъ є҆го̀ ѿ бг҃а и҆ ца́рствїѧ є҆гѡ̀, по преподо́бномꙋ словесѝ: и҆́же лю́битъ дꙋ́шꙋ свою̀, погꙋби́тъ ю҆̀1215.

к҃ѳ. И҆́же болѣ́зненнѣ наче́ншїй дѣ́ланїе за́повѣдей бж҃їихъ, и҆ те́плымъ раче́нїемъ ле́гкїй ꙗ҆ре́мъ и҆́ночества на вы́ю взе́мшїй, не щади́тъ здра́вїѧ тѣле́сна, ни въ жесто́кости дѣ́лъ добродѣ́тели и҆знемога́етъ, ни въ трꙋдѣ́хъ печа́лꙋетъ, не зри́тъ къ и҆но́мꙋ комꙋ̀ ᲂу҆ны́лѡ ѡ҆ по́двизѣхъ и҆ неради́вѣ мы́слѧщꙋ: но горѧ́щею любо́вїю браздꙋ̀ сѣче́тъ добродѣ́телей во всѧ́комъ ѕлострада́нїи, къ себѣ̀ то́кмѡ зрѧ̀, и҆ къ бж҃їимъ за́повѣдемъ: и҆ на всѧ́къ де́нь со слеза́ми сѣ́мена своѧ̑ до́лꙋ мета́етъ во стра́нѣ живы́хъ, до́ндеже прозѧ́бнетъ томꙋ̀ ѕла́къ безстра́стїѧ, и҆ въ сте́бль возрасте́тъ ра́зꙋма бж҃е́ственна, и҆ кла́съ принесе́тъ зе́рно сло́ва приносѧ́щь, и҆ прїи́дꙋтъ жи̑та пра́вды є҆гѡ̀.

л҃. Ни ѿкꙋ́дꙋ же та́кѡ мню̀ предспѣ́ѧнїю бы́ти дꙋшѝ ско́рꙋ и҆ сокраще́ннꙋ, ꙗ҆́коже ѿ є҆ди́ныѧ вѣ́ры, вѣ́ры же, ни ꙗ҆́же въ бг҃а то́кмѡ, и҆ въ є҆диноро́днаго є҆го̀ сн҃а, но и҆ и҆звѣще́нныѧ: съ не́юже вѣ́рꙋемъ и҆́стинна бы́ти ѡ҆бѣтова̑нїѧ хрⷭ҇тѡ́ва, ꙗ҆̀же ѡ҆бѣща̀ и҆ ᲂу҆гото́ва лю́бѧщымъ є҆го̀, и҆ прещє́нїѧ и҆ мꙋ̑ки а҆́дѡвы ᲂу҆готѡ́ванныѧ дїа́волꙋ и҆ дѣ́лателємъ є҆гѡ̀. Сїѧ̀ вѣ́ра и҆звѣствꙋ́етъ дꙋ́шꙋ ᲂу҆пова́ти въ по́двизѣ сꙋ́щꙋ полꙋчи́ти ᲂу҆строе́нїе ст҃ы́хъ, блаже́нное и҆́хъ безстра́стїе, и҆ востещѝ къ высотѣ̀ свѧты́ни и҆́хъ, и҆ наслѣ́дницѣ є҆́й съ ни́ми бы́ти ца́рствїѧ бж҃їѧ. Си́це же и҆звѣствꙋ́ема, рачи́тельнѣ къ дѣ́ланїю за́повѣдей ᲂу҆стремлѧ́етсѧ, не сомнѧ́щисѧ въ себѣ̀, но подража́ющи трꙋда́мъ ѻ҆́нѣхъ, и҆ подо́бными по́двиги гонѧ́щи пости́гнꙋти соверше́нство и҆́хъ.

л҃а. Соизмѣнѧ́тисѧ ѻ҆бы́че внѣ́шнее лица̀ ᲂу҆строе́нїе съ внꙋ́треннимъ дꙋшѝ ᲂу҆строе́нїемъ, ꙗ҆ково́ бо ᲂу҆́мное движе́нїе є҆ѧ̀ дѣ́ланїе и҆́мать, таково̀ и҆ зра́къ лица̀ зрѧ́щымъ и҆з̾ѧвлѧ́етъ своѐ расположе́нїе: съ дѣ́йствꙋющими бо по́мыслы созавѣщаваѧ́йсѧ и҆ соизмѣнѧ́емь, ѻ҆вогда̀ ᲂу҆́бѡ зри́тсѧ свѣ́телъ, се́рдцꙋ веселѧ́щꙋсѧ, ѡ҆ восхожде́нїи благи́хъ помышле́нїй и҆ размышле́нїй ѡ҆ бз҃ѣ: ѻ҆вогда́ же дрѧ́хлъ и҆ мра́ченъ, ѡ҆ по́мыслѣхъ безмѣ́стїѧ ѡ҆горчава́емь. Въ ни́хже и҆ ᲂу҆таи́тисѧ нѣ́сть возмо́жно дѣ́йствꙋемомꙋ ѿ и҆мꙋ́щихъ чꙋ́вства дꙋшѝ ѡ҆бꙋчє́нна: занѐ, и҆лѝ и҆змѣ́на є҆́сть десни́цы вы́шнѧгѡ: ꙗ҆́вна є҆́сть тѣ́мъ, ꙗ҆́кѡ зна́ема и҆ любе́зна, є҆́юже поро́ждшесѧ ѿ дх҃а свы́ше, свѣ́тъ и҆ со́ль бы́ша бли̑жнимъ. И҆лѝ крамолы̀ є҆́сть си́лъ и҆ смꙋще́нїѧ помыслѡ́въ: ꙗ҆́вственно нѣ́кое є҆́сть си̑мъ, си́рѣчь, ѿме́щꙋщымъ то̀, и҆ начерта́нїе ѡ҆́браза сн҃а бж҃їѧ на себѣ̀ носѧ́щымъ свѣтлѣ́йшо бж҃е́ственными дарова́нїи.

л҃в. Внꙋ́треннее дѣ́ланїе, и҆лѝ вѣнцє́въ вино́вно быва́етъ дꙋшѝ, и҆лѝ томле́нїй и҆ мꙋ́къ: занѐ а҆́ще ᲂу҆́бѡ ѡ҆ бж҃е́ственныхъ ве́щехъ ᲂу҆пражнѧ́етсѧ, и҆ смиренномꙋ́дрїѧ любоꙋдобрѧ́етъ мѣста̀: и҆́мать напое́нїе свы́ше сле́зное, и҆ воздѣ́ловаетъ любо́вь ꙗ҆́же къ бг҃ꙋ, и҆ вѣ́рꙋ, и҆ є҆́же къ бли́жнемꙋ сострада́нїе. И҆́миже дꙋша̀ воз̾ѡбразꙋ́ющисѧ въ добро́тꙋ ѡ҆́браза хрⷭ҇то́ва, свѣ́тъ быва́етъ человѣ́кѡмъ, и҆ лꙋча́ми добродѣ́телей привлачи́тъ къ себѣ̀ зрѣ̑нїѧ и҆́хъ, и҆ подви́житъ всѣ́хъ къ славосло́вїю бж҃їю. А҆́ще же ѡ҆ до́льныхъ и҆ человѣ́ческихъ, и҆ ровє́нныѧ мѣста̀ возмꙋща́етъ и҆ возжиза́етъ грѣ́хъ, сни́зꙋ и҆мꙋ́щи ѕлосмра́дїе и҆ мра́къ: воздѣ́ловаетъ не́нависть и҆ ѿвраще́нїе блага́гѡ и҆́мже, пе́рстнымъ воѡбразꙋ́ющисѧ и҆ без̾ѡбра́знымъ ѡ҆́бразомъ ве́тхагѡ, тьма̀ всѧ́чески приближа́ющымсѧ быва́етъ: и҆ дѣ́ланїемъ ѕлы́хъ, и҆ бесѣ́дою растлѣва́етъ дꙋ́шы неле́стны и҆ неꙋтвержде́ны, и҆ подви́жетъ на бг҃а хꙋлꙋ̀. И҆ та́кѡ въ ни́хже ᲂу҆̀бо сме́ртїю постиже́на бꙋ́детъ дꙋша̀, и҆ воздаѧ́нїе по ра́венствꙋ ѡ҆брѣта́етъ.

л҃г. Воздѣ́лователь ѕлы́хъ мы́слей, мра́чны своѧ̑ твори́тъ и҆ дрѧ́хлы внѣ̑шнїѧ зра́ки, и҆ безгла́сенъ ѧ҆зы́къ и҆́мать бж҃е́ственныхъ пѣ́сней, и҆ неꙋдобосрѣ́тенъ є҆́сть всѣ̑мъ въ бесѣ́дꙋ. Воздѣ́латель же благи́хъ и҆ безсме́ртныхъ садѡ́въ се́рдца, радостовзо́рно и҆ возра́дованно и҆́мать лицѐ, сладкопѣ́снивъ же въ молє́нїѧ ѧ҆зы́къ сво́й, и҆ всего̀ себѐ въ бесѣ́дꙋ сладча́йша. Ꙗ҆́кѡ ꙗ҆вле́ннꙋ бы́ти и҆ быва́ти зрѧ́щымъ ѿсю́дꙋ до́брѣ и҆ самомꙋ̀ томꙋ̀ под̾ рабо́тою є҆щѐ нечи́стыхъ сꙋ́щемꙋ страсте́й, и҆ под̾ нꙋ́ждою зако́на сꙋ́щемꙋ земна́гѡ мꙋдрова́нїѧ: и҆ свобо́ждшемꙋсѧ таковы́ѧ рабо́ты, зако́номъ дꙋ́ха, по премꙋ́дромꙋ соломѡ́нꙋ: се́рдцꙋ веселѧ́щꙋсѧ, цвѣте́тъ лицѐ: въ печа́лехъ же сꙋ́щꙋ, сѣ́тꙋетъ1216.

л҃д. Дѣ́ѧтельнѣ соверша́ємыѧ стра̑сти, дѣ́ѧтельнѣ и҆ и҆сцѣлѧ́ютсѧ. Ꙗ҆́коже бо невоздержа́нїе сла́сть, и҆ ѡ҆б̾ѧде́нїе и҆ житїѐ неради́во и҆ разлїѧ́нно, ѡ҆стра́ственнѣйшее навыкнове́нїе соверша́ютъ въ дꙋшѝ, и҆ надѣ̑ѧнїѧ безмѣ̑стна тꙋ̀ ведꙋ́тъ: та́кѡ ᲂу҆тѣсне́нїе и҆ воздержа́нїе, трꙋды̀ и҆ по́двизи дꙋхо́внїи, безстра́стїе снабдѣва́ютъ є҆́й, и҆ ѿ пристра́стїѧ въ безстра́стїе тꙋ̀ приво́дѧтъ.

л҃є. Є҆гда̀, ѿ приболѣ́зненна кто̀ и҆ крѣ́пка подви́жничества, дарова́нїй вели́кихъ ѿ бг҃а смиренномꙋ́дрїемъ сподо́битсѧ, та́же низвлече́нъ бы́въ ѿѻнꙋ́дꙋ, страсте́мъ пре́данъ бꙋ́детъ и҆ бѣсѡ́мъ: наказа́телемъ да вѣ́сть себѐ возвы́сившасѧ, и҆ вели̑ка ѡ҆ себѣ̀ возмнѣ́вша, и҆ на и҆нѣ́хъ возне́сшасѧ. Ни ѿкꙋ́дꙋ же ᲂу҆̀бо ѿи́нꙋдꙋ таковы́й ѡ҆брѧ́щетъ и҆сцѣле́нїе и҆ свобожде́нїе ѿ содержа́щихъ живо́тъ є҆гѡ̀, ра́звѣ то́чїю ѡ҆ є҆́же востещѝ є҆мꙋ̀ покаѧ́нїемъ въ пе́рвое ᲂу҆строе́нїе, и҆ ᲂу҆потреби́ти хода́таѧ до́брѣ, смире́нїе и҆ позна́нїе свои́хъ мѣ́ръ: и҆́миже всѧ́къ стоѧ́й до́брѣ на ѡ҆снова́нїи добродѣ́телей, и҆́мать себѐ под̾ все́ю тва́рїю.

л҃ѕ. Ра́вно ѕло̀ є҆́сть пред̾ бг҃омъ и҆ человѣ́ки живꙋ́щими по бз҃ѣ, є҆́же и҆ встра́ственнꙋ комꙋ̀ бы́ти дѣѧ́нїи произволе́нїѧ неꙋдержа́нїемъ, и҆ возгордѣ́вшꙋсѧ въ добродѣ́телехъ дꙋ́хомъ мнѣ́нїѧ. И҆́мже бо ѡ҆́бразомъ пе́рвагѡ дѣ́ѧтельнѣ и҆ ѻ҆́тай быва́ющаѧ сра́мно є҆́сть и҆ глаго́лати: та́кѡ и҆ втора́гѡ возвыше́нїѧ се́рдца, ме́рзѡсти сꙋ́ть пред̾ бг҃омъ. И҆ ꙗ҆́коже ѻ҆́нъ ненави́димь є҆́сть бг҃ꙋ въ поко́й, за є҆́же бы́ти є҆мꙋ̀ пло́ть по бж҃е́ственномꙋ словесѝ: та́кѡ и҆ се́й пред̾ гдⷭ҇емъ нечи́стъ, за є҆́же бы́ти є҆мꙋ̀ го́рдꙋ.

л҃з. Не бо̀ є҆́же є҆́сть стра́сть, сїѐ и҆ дѣ́ѧтеленъ грѣ́хъ, но и҆́но сїѐ, и҆ дрꙋго́е ѻ҆́но. Про́чее стра́сть ᲂу҆́бѡ є҆́сть, въ дꙋшѝ дви́жимаѧ: дѣѧ́нїе же грѣха̀ въ тѣлесѝ зри́мое. Си́рѣчь, сластолю́бїе, сребролю́бїе и҆ славолю́бїе, стра́сти лю́ты сꙋ́ть дꙋшѝ: блꙋ́дъ же и҆ лихои́мство и҆ ѻ҆би́да, дѣѧ̑нїѧ грѣ̑шна пло́ти. Вожделѣ́нїе, ꙗ҆́рость, и҆ горды́нѧ стра̑сти сꙋ́ть дꙋшѝ, внѣ̀ є҆стества̀ си́ламъ є҆ѧ̀ дви́жꙋщымсѧ: прелюбодѣѧ́нїе же, и҆ ᲂу҆бі́йство, и҆ татьба̀, и҆ пїѧ́нство, и҆ а҆́ще что̀ и҆́но тѣ́ломъ содѣва́емо, дѣѧ̑нїѧ грѣ̑шна, и҆ люта̀ сꙋ́ть пло́ти.

л҃и. Трѝ сꙋ́ть пе́рвѣйшїи всѣ́хъ страсте́й нача̑льницы, и҆ трѝ ꙗ҆̀же на ни́хъ ѡ҆полчє́нїѧ, и҆ трѝ побѣжда́ющїи же си́хъ и҆ низлага́ющїи, новонача́льный, сре́днїй, соверше́нный, сластолю́бїѧ, сребролю́бїѧ и҆ славолю́бїѧ, трегла́внагѡ ѕмі́ѧ.

л҃ѳ. Не є҆ди́нъ и҆ то́йжде по́двигъ трїе́мъ над̾ тремѧ̀ нача́лами и҆ си́лами ѡ҆блада́ющагѡ дꙋ́ха, но и҆́нъ, и҆ и҆́нъ. И҆на́кѡ вою́емꙋ є҆ди́номꙋ и҆ є҆ди́номꙋ си́хъ нача́лꙋ, кі́имждо проти́внѡ бра́ни тогѡ̀ стоѧ́щымъ и҆ воѡрꙋжа́ющымсѧ є҆сте́ственнѣ пра́ведною ꙗ҆́ростїю.

м҃. И҆́же пе́рвѣе къ подвигѡ́мъ благоче́стїѧ совлекі́йсѧ и҆ вводи́мь сы́й ко ѡ҆полче́нїю на стра̑сти, на дꙋ́ха сластолю́бїѧ всю̀ взе́млетъ бра́нь свою̀, и҆ си́льнѣ всѧ́кимъ ѕлострада́нїемъ на́нь вою́етъ. Пло́ть ᲂу҆́бѡ неѧде́нїемъ и҆стаева́ѧ, до́лꙋ лега́нїемъ, бдѣ́нїемъ, и҆ всено́щными моле́нми: дꙋ́шꙋ же сокрꙋша́ѧ па́мѧтїю а҆́довыхъ томле́нїй, и҆ размышле́нїемъ сме́рти, и҆ се́рдце ѡ҆чища́ѧ ѿ скве́рны и҆ сочета́нїй и҆ сосложе́нїй слеза́ми покаѧ́нїѧ.

м҃а. И҆́же къ средѣ̀, нача́ла преложи́вый восхоже́нїе, и҆ по́двиги, и҆́же на сластолюби́ваго дꙋ́ха гꙋ́бою пе́рвагѡ безстра́стїѧ ѡ҆те́рый, ны́нѣ же ѻ҆чи́ма є҆гѡ̀ ѿкрове́но бы́сть, и҆ є҆стества̀ зрѣ́ти сꙋ́щихъ нача́вый: на дꙋ́ха невѣ́рнаго сребролю́бїѧ взе́млетъ ѻ҆рꙋ̑жїѧ вѣ́ры. Оу҆́мъ бо возвыша́ѧ сво́й полꙋче́нїемъ бж҃е́ственныхъ веще́й, сло́вомъ же прикаса́ѧсѧ словесє́мъ тва́ри, и҆ во є҆́же є҆стества̀ и҆́хъ ска́зовати ᲂу҆ѧснѧ́ѧ: дꙋ́шꙋ же возводѧ̀ вѣ́рою ѿ ви́димыхъ, на высѡты̀ неви́димыхъ, и҆ вѣ́рꙋѧ, самаго̀ бы́ти промышлѧ́юща ѡ҆ дѣ́лѣхъ свои́хъ, и҆́же ѿ небытїѧ̀ въ бытїѐ всѧ̀ приве́дшаго бг҃а, и҆ всю̀ наде́ждꙋ творѧ̀ бж҃е́ственныѧ жи́зни.

м҃в. И҆́же сре́дꙋ видѣ́нїемъ и҆ безстра́стїемъ преше́дый, и҆ преле́стное возни́кїй всемі́рнагѡ чꙋ́вства, ны́нѣ же сло́вомъ ра́зꙋма и҆ ѵ҆поста́сныѧ бж҃їѧ премꙋ́дрости, во мра́къ бг҃осло́вїѧ вше́дый, на дꙋ́ха славолю́бїѧ взе́млетъ си́лою смиренномꙋ́дрїѧ ѻ҆рꙋ́жїѧ. Дꙋ́шꙋ свѧще́нными ѿкрове́нми ᲂу҆милѧ́ѧ, и҆ сле́зы пролива́ти неболѣ́зненни творѧ̀: мꙋдрова́нїе же є҆ѧ̀ па́мѧтїю низздага́ѧ человѣ́ческїѧ не́мощи, и҆ возвыша́ѧ то̀ бж҃е́ственнагѡ ра́зꙋма разꙋмѣ́нїй.

м҃г. Поще́нми ᲂу҆́бѡ и҆ бдѣ́нми и҆ моли́твами, долꙋлега́нми же и҆ трꙋды̀ тѣле́сными, и҆ ѿсѣче́нїемъ во́лей во смире́нїи дꙋшѝ, недѣ́йственна содѣва́емъ дꙋ́ха сластолю́бїѧ. Є҆́млемъ же є҆го̀ слеза́ми покаѧ́нїѧ, и҆ ко ᲂу҆зи́лищи ведꙋ́ще воздержа́нїѧ, недви́жна сего̀ и҆ недѣ́йственна соверша́емъ, во тщали́выхъ, си́рѣчь, двиза́ющихсѧ стоѧ́ще ѡ҆полче́нїи.

м҃д. Вѣ́ры ѻ҆рꙋ́жїемъ и҆ мече́мъ дꙋхо́внымъ, и҆́же є҆́сть глаго́лъ бж҃їй, дꙋ́ха среролю́бїѧ побѣди́вше, закала́емъ: ны́нѣ къ видѣ́нїю сꙋ́щихъ сло́вомъ премꙋ́дрости восте́кше, и҆ превы́шше смире́нїѧ бы́вше ви́димыхъ сло́вомъ ра́зꙋма, и҆ въ ца́рскихъ домѣ́хъ любвѐ съ многобога́тными сокро́вищи наде́жды ꙗ҆́же на бг҃а внꙋ́трь почи́вше.

м҃є. Крилы̀ безстра́стїѧ и҆ смиренномꙋ́дрїѧ на воздꙋ́сѣ та́интвеннагѡ бг҃осло́вїѧ пла́вающе, и҆ въ го́рнюю глꙋбинꙋ̀ ра́зꙋма та́инъ бж҃їихъ съ бж҃е́ственнымъ дх҃омъ входѧ́ще, мо́лнїѧми бж҃е́ственныхъ догма́тъ и҆ разꙋмѣ́нїй, славолю́бїѧ попалѧ́емъ дꙋ́ха. Тꙋ́чами же слѣ́зъ и҆ рѣка́ми ᲂу҆миле́нїѧ на кончи̑ны человѣ́ческихъ веще́й зрѧ́ще, трїста́ты є҆гѡ̀ потоплѧ́емъ бѣ́сы, мнѣ́нїемъ и҆ тщесла́вїемъ и҆ горды́нею на ны̀ вою́ющыѧ.

м҃ѕ. И҆́же по́хоть плотскꙋ́ю, и҆ по́хоть ѻ҆че́съ, и҆ го́рдость жите́йскꙋю, мїрскі̑ѧ сїѧ̑ непра̑вды, и҆́хже любле́нїемъ вразѝ быва́емъ бг҃ꙋ, ѿ дꙋшѝ возненави́дѣвый, и҆ си́хъ ѿрекі́йсѧ: мі́рꙋ себѐ распѧ̀, и҆ то́й распѧ́сѧ є҆мꙋ̀, разори́въ бы́вшꙋю междꙋ̀ бг҃омъ и҆ дꙋше́ю враждꙋ̀ во пло́ти свое́й, и҆ сотвори́въ во ѻ҆бои́хъ ми́ръ: и҆́же бо си́мъ въ совлече́нїи плотска́гѡ мꙋдрова́нїѧ ᲂу҆мертви́выйсѧ, примири́сѧ съ бг҃омъ, ᲂу҆би́въ враждꙋ̀ мі́ра ᲂу҆мерщвле́нїемъ сласте́й, распѧ́тою мі́рови жи́знїю, и҆ любо́вь со і҆и҃сомъ лобыза̀. Не ктомꙋ̀ ᲂу҆̀бо таковы́й вра́гъ, ꙗ҆́кѡ дрꙋ́гъ мі́рови, но дрꙋ́гъ бж҃їй быва́етъ, ꙗ҆́кѡ распѧ́сѧ мі́рови, и҆ могі́й глаго́лати: мнѣ̀ мі́ръ распѧ́сѧ, а҆ а҆́зъ мі́рꙋ1217.

м҃з. Всѧ́кѡ подвиза́ющымсѧ попꙋще́нїе си́хъ ра́ди быва́ти ѡ҆бы́че: тщесла́вїѧ ра́ди, ѡ҆сꙋжде́нїѧ ра́ди ко бли́жнемꙋ, и҆ возноше́нїѧ ра́ди є҆́же ѡ҆ добродѣ́телехъ. А҆́ще ᲂу҆́бѡ что̀ ѿ си́хъ въ дꙋша́хъ подвиза́ющихсѧ прибли́жившисѧ предвари́тъ, ѿ бг҃а си́мъ ѡ҆ставле́нїѧ вино́ю быва́етъ. И҆ сегѡ̀ ᲂу҆́бѡ пра́веднагѡ ѡ҆ паде́нїихъ не и҆збѣжа́тъ сꙋда̀, до́ндеже предвари́вшꙋю винꙋ̀ ѡ҆ставле́нїѧ ѿве́ргше, къ хра́мꙋ смиренномꙋ́дрїѧ прибѣ́гнꙋтъ.

м҃и. Не бо̀ є҆́же не бы́ти чи́стꙋ ѿ встра́ственныхъ помышле́нїй, сїѐ є҆́сть то́чїю се́рдца нечистота̀, и҆ скве́рна дꙋшѝ: но и҆ є҆́же ѡ҆ мно́жествѣ и҆справле́нїй возноси́тисѧ, и҆ є҆́же ѡ҆ добродѣ́телехъ кичи́тисѧ, и҆ є҆́же ве́лїѧ мнѣ́ти себѐ ѡ҆ премꙋ́дрости и҆ ра́зꙋмѣ бж҃їи, и҆ є҆́же ᲂу҆корѧ́ти ѿ бра́тїи лѣни̑выѧ и҆ неради̑выѧ: и҆ ѻ҆но̀ ᲂу҆́бѡ ꙗ҆́вственно є҆́сть ѿ фарїсе́евы и҆ мытаре́вы при́тчи.

м҃ѳ. Не мнѝ ѿ страсте́й ѡ҆сла́бꙋ прїѧ́ти, и҆ бы́вшихъ ѿѻнꙋ́дꙋ стра́стныхъ помышле́нїй скве́рны и҆збѣжа́ти, го́рдо є҆щѐ и҆мы́й мꙋдрова́нїе и҆ надмѣва́ющеесѧ ѡ҆ добродѣ́телехъ. Не бо̀ ᲂу҆́зриши ми́ра до́мъ, во благосты́ни помыслѡ́въ, нижѐ во хра́мъ любвѐ вни́деши съ ра́достїю во всѧ́кой бла́гости и҆ тишинѣ̀ се́рдца, до́ндеже на себѐ надѣ́ешисѧ и҆ на дѣла̀ твоѧ̑.

н҃. А҆́ще къ благоша́рїємъ тѣле́съ привлека́етсѧ дꙋша̀ твоѧ̀ стра́стнѣ, и҆ а҆́кибы ѿ ражда́ющихсѧ ѿѻнꙋ́дꙋ къ тебѣ̀ стра́стныхъ помыслѡ́въ мꙋчи́тельствꙋема є҆́сть, не мнѝ сїѧ̑ бы́ти вины̀ сꙋ́щагѡ въ тебѣ̀ смꙋще́нїѧ и҆ пристра́стнагѡ сїѧ̑ бы́ти движє́нїѧ: но сокрове́ннꙋ вѣ́ждь бы́ти винꙋ̀ внꙋ́трь дꙋшѝ твоеѧ̀, ꙗ҆́коже нѣ́кїй ка́мень магни́тъ, влекꙋ́щꙋ къ себѣ̀ си́лою навыкнове́нїѧ стра́стнагѡ и҆ лꙋка́ва ѻ҆бы́чаѧ вре́дъ ѿ ли́цъ, ꙗ҆́коже желѣ́зо. Занѐ и҆ созда̑нїѧ бж҃їѧ сꙋ́ть всѧ̑, и҆ ѕѣлѡ̀ свои́мъ сло́вомъ дѡбра̀, ни є҆ди́но же сло́во порица́тельно и҆мꙋ́ща на творе́нїе бж҃їе.

н҃а. Ꙗ҆́коже преходѧ́щїи мо́ре и҆ блюю́щїи, не ѿ є҆стества̀ мо́рѧ стра́ждꙋтъ сїѐ, но ѿ є҆стества̀ внꙋтрьꙋ́дꙋ предхрани̑мыѧ вины̀ согни́вшихъ мокро́тъ: та́кѡ и҆ дꙋша̀ не ѿ вины̀ ли́цъ, но ѿ вины̀ внꙋ́трь сокрове́ннагѡ є҆щѐ навыкнове́нїѧ ѕла́гѡ, въ себѣ̀ пристра́стнѣйшее те́рпитъ колеба́нїе и҆ смꙋще́нїе.

н҃в. Согла́снѡ внꙋ́треннемꙋ настрое́нїю дꙋшѝ, и҆змѣнѧ́тисѧ ѡ҆бы́че и҆ са́мое є҆стество̀ веще́й. Є҆гда̀ ᲂу҆́бѡ по є҆стествꙋ̀ стоѧ́тъ въ не́й ᲂу҆́мнаѧ чꙋ̑вства, и҆ ᲂу҆́мъ ѡ҆ словесѣ́хъ бы́вшихъ тва́рей незаблꙋ́днѡ ше́ствꙋетъ, сло́во и҆мѣ́ѧ и҆з̾ѧснѧ́ющее є҆стества̑ и҆ движє́нїѧ си́хъ, по є҆стествꙋ̀ зрѧ́тсѧ є҆́й и҆ ве́щы и҆ ли́ца, и҆ всѧ́ко є҆стество̀ веще́ственныхъ тѣле́съ, и҆ неимꙋ́ща нѣ́кꙋю тлѝ и҆лѝ вре́да внꙋ́трь сокрове́ннꙋю винꙋ̀. Є҆гда́ же проти́вꙋ є҆стества̀ тоѧ̀ си́лы дви́жꙋтсѧ са́ми на себѐ крамо́льствꙋюще, проти́вꙋ є҆стества̀ то́й и҆ сїѧ̑ зрѧ́тсѧ: не є҆сте́ственною свое́ю добро́тою къ ᲂу҆разꙋмѣ́нїю родосодѣ́телѧ сїю̀ возводѧ́ща, но стра́ственнѣйшимъ навыкнове́нїемъ є҆ѧ̀ во глꙋбинꙋ̀ поги́бели низводѧ́ща.

н҃г. А҆́ще па́лъ є҆сѝ ѡ҆ста́вленъ бы́въ паде́нїемъ пло́ти, и҆лѝ ѧ҆зы́ка, и҆лѝ по́мысла, приболѣ́зненнѡ влекі́й и҆ жесточа́йше житїѐ, да не стра́нно и҆ ᲂу҆диви́тельно тебѣ̀ ꙗ҆ви́тсѧ: твое́ бо є҆́сть паде́нїе и҆ ѿ твоеѧ̀ вины̀. А҆́ще бо не бы̀ са́мъ и҆лѝ но́во что̀ пе́рвѣе и҆ надме́нїѧ и҆спо́лненно, ꙗ҆́коже не до́лжно бѧ́ше, возмнѣ́лъ є҆сѝ ѡ҆ себѣ̀, и҆лѝ возне́слсѧ є҆сѝ на и҆но́го кичи́тельнымъ мꙋдрова́нїемъ, и҆лѝ ѡ҆сꙋди́лъ є҆сѝ въ не́мощи є҆стества̀ человѣ́ческа кого̀, не бы̀ ѡ҆ста́вленъ бы́въ сꙋдо́мъ пра́веднымъ бж҃їимъ, свою̀ позна́лъ є҆сѝ не́мощь. Позна́лъ же є҆сѝ, да ѿсю́дꙋ наꙋчи́шисѧ не ѡ҆сꙋжда́ти и҆ не мꙋ́дрствовати па́че, є҆́же подоба́етъ мꙋ́дрствовати, нижѐ над̾ кѣ́мъ возноси́тисѧ.

н҃д. Па́дъ во глꙋбины̑ ѕѡ́лъ, ника́коже воззва́нїѧ да ѿча́ешисѧ, а҆́ще и҆ во глꙋбинꙋ̀ низведе́нъ бы́лъ є҆сѝ послѣ́днюю а҆́да ѕло́бы. А҆́ще бо дѣ́ѧтельными добродѣ́тельми предхрани́мо те́плѣ ѡ҆снова́нїе и҆́маши ᲂу҆ тебѐ благоче́стїѧ, а҆́ще и҆ паде́нїе пострада̀ поколеба́вшеесѧ со́зданное сегѡ̀ жили́ще тобо́ю ѿ разли́чныхъ ка́меней добродѣ́тели, да́же до помо́ста стра́ственнѣйшїѧ землѝ ѕѡ́лъ, но не забꙋ́детъ дре́внихъ твои́хъ трꙋдѡ́въ и҆ по́двигѡвъ бг҃ъ, а҆́ще сокрꙋше́нно ѡ҆ паде́нїихъ твои́хъ се́рдце и҆́маши, помина́ющо дни̑ дрє́внїѧ и҆ своѐ воззыва́ющо паде́нїе съ воздыха́нїи пред̾ ни́мъ. Призира́ѧ бо при́зритъ скорѣ́е на тѧ̀ трепе́щꙋща слове́съ є҆гѡ̀, и҆ прико́снетсѧ ѻ҆́чїю твоє́ю неви́димѡ печа́льнагѡ се́рдца, и҆ на предположе́нномъ тобо́ю ѡ҆снова́нїи добродѣ́тели съ трꙋда́ми поста́витъ, и҆ да́стъ тѝ па́че пре́жнїѧ крѣ́пости, лꙋ́чшꙋ же и҆ соверше́ннѣйшꙋ крѣ́пость, съ теплото́ю горѧ́щагѡ дꙋ́ха, во є҆́же па́ки возстѧжа́ти низложє́ннаѧ за́вистїю лꙋка́вагѡ, съ терпѣ́нїемъ дѣ́лъ добродѣ́тели, и҆ воздви́гнꙋти въ дꙋ́сѣ смире́нїѧ до́мъ є҆ѧ̀ пре́жнѧгѡ свѣтлѣ́йшїй, въ поко́й, по пи́санномꙋ, вѣ́ченъ є҆гѡ̀1218.

н҃є. Всѧ̑ къ безче́стїю на́мъ приключа̑ющаѧсѧ, и҆лѝ ѿ человѣ̑къ и҆лѝ ѿ бѣсѡ́въ, сꙋдо́мъ пра́веднымъ бж҃їимъ по смотре́нїю приключа́ютсѧ къ смире́нїю сꙋ́етнагѡ дме́нїѧ дꙋ́шъ на́шихъ. Намѣ́ренїе бо є҆́сть бг҃ови ѡ҆корми́телю жи́зни на́шеѧ, є҆́же при́снѡ смире́ннымъ на́мъ бы́ти, и҆ не мꙋ́дрствовати па́че є҆́же подоба́етъ мꙋ́дрствовати1219, но мꙋ́дрствовати въ цѣломꙋ́дрїи. Нижѐ мнѣ́ти вели̑ка ѡ҆ себѣ̀, но къ немꙋ̀ взира́ти, и҆ подража́ти тогѡ̀ по возмо́жности блаже́нномꙋ смире́нїю. Поне́же кро́токъ бѣ̀ и҆ смире́нъ се́рдцемъ, таковы́хъ и҆ на́съ бы́ти жела́етъ претерпѣ́вый за ны̀ сме́рть непра́веднꙋ же и҆ безче́стнꙋ. Ничто́же бо и҆́но та́кѡ любе́зно томꙋ̀ и҆ ᲂу҆своѧ́емо во всѧ́цѣй вои́стиннꙋ добродѣ́тели, и҆ могꙋ́щее ѿ гно́ища страсте́й возвыша́ти, ꙗ҆́коже кро́тость и҆ смире́нїе и҆ любо́вь ко бли́жнемꙋ. Си̑мъ же не сꙋ́щымъ съ на́ми дѣ́лающими добродѣ́тєли, всѐ дѣ́ланїе на́ше сꙋ́етно, и҆ ве́сь трꙋ́дъ подви́жничества безполе́зенъ и҆ непрїѧ́тенъ.

н҃ѕ. Вводи̑мымъ ᲂу҆̀бо въ добродѣ́тельное житїѐ, стра́хъ мꙋче́нїй содѣ́йствꙋетъ къ дѣ́ланїю за́повѣдей, и҆ ᲂу҆клоне́нїю ѿ ѕѡ́лъ. Пред̾ꙋспѣ́вшымъ же добродѣ́телїю къ видѣ́нїю сла́вы бж҃їѧ, и҆́нъ подо́бнѣ припослѣ́дствꙋетъ стра́хъ, ѕѣлѡ̀ сы́й тѣ́мъ стра́шенъ ѿ любвѐ чи́стый, и҆́же и҆ содѣ́йствꙋетъ си̑мъ въ пребыва́нїи непоколеби́мѡ стоѧ́ти любвѐ бж҃їѧ, боѧ́щымсѧ ѿ сеѧ̀ стра́шнѣйшагѡ поползнове́нїѧ: ѻ҆́нѣмъ ᲂу҆́бѡ па́дшымъ ѿ сꙋ́щагѡ въ рꙋцѣ̀ намѣ́ренїѧ, раскаѧва́ющымсѧ и҆ па́ки востаю́щымъ, пе́рвый стра́хъ припослѣ́дствꙋетъ со ᲂу҆пова́нїи благи́ми. Си́мъ же за́вистїю сꙋпоста́та погрѣши́вшымъ паде́нїемъ, ѿ высоты̀ видѣ́нїѧ бж҃їѧ, не а҆́бїе вторы́й послѣ́дꙋетъ: но мгла̀ нѣ́каѧ и҆ тьма̀ ѡ҆сѧза́ема тѣ́хъ прее́млетъ, и҆спо́лнь сꙋ́щи печа́ли и҆ болѣ́зней и҆ го́рести съ пе́рвымъ мꙋче́нїй стра́хомъ. И҆ а҆́ще не бы̀ гдⷭ҇ь саваѡ́ѳъ дни̑ ѻ҆́ны пресѣ́клъ несно́сныѧ сеѧ̀ болѣ́зни, не бы̀ спа́слсѧ всѧ́къ и҆спада́ѧй ѿтꙋ́дꙋ.

н҃з. Внегда̀ пребыва́тельнагѡ стра́ственныхъ пѡ́мыслъ стꙋже́нїѧ дꙋша̀ ѡ҆сла́бꙋ прїи́метъ, и҆ пла́мень мꙋчи́тель пло́ти ᲂу҆вѧ́нетъ, бꙋ́ди тогда̀ вѣ́дый наи́тїю бы́ти ст҃а́гѡ дх҃а въ ны̀, возвѣща́ющꙋ ѡ҆ставле́нїе пре́жде согрѣше́нныхъ, и҆ да́рꙋющꙋ на́мъ безстра́стїе. А҆ доне́лѣже воню̀ и҆́хъ ча́стымъ стꙋже́нїемъ ѡ҆щꙋща́етъ, и҆ подчрє́внаѧ распалѧ́ютсѧ пло́ти, дале́че вѣ́ждь, ѿ сеѧ̀ бы́ти благово́нїю ст҃а́гѡ дх҃а, и҆ всю̀ под̾ ᲂу҆́зами держи́мꙋ бы́ти нерѣши́мыми страсте́й же и҆ чꙋ́вствъ.

н҃и. Ви́дѣхъ под̾ со́лнцемъ, глаго́летъ премꙋ́дрый, мꙋ́жа непщева́вша себѐ мꙋ́дра бы́ти1220, є҆го́же ви́дѣхъ и҆ а҆́зъ въ жи́зни человѣ́честѣй ᲂу҆пова́юща на дѣла̀ своѧ̑, и҆ вє́лїѧ мꙋ́дрствꙋюща ѡ҆ человѣ́честѣй премꙋ́дрости и҆ земно́й и҆ дꙋше́вной. И҆ не то́чїю сеѧ̀ ра́ди над̾ неле́стными взе́млющасѧ: но и҆ сꙋ́щымъ въ бж҃е́ственномъ поко́и ᲂу҆чи́телємъ хрⷭ҇тѡ́вымъ подсмѣва́ющасѧ же вкꙋ́пѣ и҆ рꙋга́ющасѧ за рече́нїѧ и҆́хъ грꙋбоѡбра́зность, и҆ занѐ не восхотѣ́ша послѣ́довати и҆збра́нїемъ ᲂу҆кра́шенныхъ рече́нїй внѣ́шнѧгѡ ра́зꙋма, нижѐ ѡ҆ благовчине́нїи положе́нїѧ и҆́хъ потща́шасѧ въ напи́санныхъ ᲂу҆че́нїихъ свои́хъ. Є҆мꙋ́же ꙗ҆́кѡ не ᲂу҆вѣ́дѣвшꙋ ꙗ҆́кѡ ᲂу҆бо́га, ни и҆зѡбрѣта́тели рече́нїй, ни благогла́сность гласѡ́въ, но благознамени́тельность предпочита́тельнѣйша є҆́сть и҆ любе́знѣйша разꙋмѣ́нїй. Сїю̀ прирекꙋ̀ при́тчꙋ: пе́съ живы́й, то́й бла́гъ па́че льва̀ ме́ртвагѡ1221: и҆, бла́гъ ѻ҆́трокъ ни́щъ и҆ мꙋ́дръ, па́че царѧ̀ ста́ра и҆ безꙋ́мна, и҆́же не разꙋмѣ̀ внима́ти є҆щѐ1222.

н҃ѳ. Люта̀ и҆ неꙋдобопобѣжда́ема є҆́сть стра́сть хꙋлы̀, и҆́мать же вины̀ ѿ го́рдыѧ мы́сли сатанины̀, ꙗ҆́же и҆ всѣ̑мъ ᲂу҆́бѡ по бз҃ѣ живꙋ́щымъ въ добродѣ́тели стꙋжа́етъ, мно́га же пред̾ꙋспѣва́ющымъ въ моли́твꙋ и҆ въ видѣ́нїе бж҃е́ственныхъ веще́й, є҆гѡ́же ра́ди подоба́етъ всѧ́цѣмъ хране́нїемъ чꙋ̑вства блюстѝ, и҆ благоговѣ́ѧти ѡ҆ всѣ́хъ стра́шныхъ та̑инъ бж҃їихъ, и҆ сщ҃е́нныхъ и҆зѡбраже́нїй и҆ слове́съ, и҆ внима́ти ѡ҆ наше́ствїи дꙋ́ха сегѡ̀: присѣди́тъ бо молѧ́щымсѧ и҆ пою́щымъ на́мъ, и҆ ѿрыга́етъ ѻ҆вогда̀ ᲂу҆стна́ми на́шими не внима́ющымъ, клѧ̑твы на ны̀ и҆ хꙋлы̑ неподѡ́бны на бг҃а вы́шнѧго, стїхо́мъ ѱалмѡ́въ и҆ глаго́ломъ мл҃твы приводѧ̀ ты̑ѧ, но ѡ҆браща́ти подоба́етъ на́нь сло́во хрⷭ҇то́во, внегда̀ таково̀ что̀ прино́ситъ во ᲂу҆стнѣ̀, и҆лѝ подсѣва́етъ въ мы̑сли на́шѧ. И҆, и҆дѝ за мно́ю сатано̀, рце́мъ къ немꙋ̀, всѧ́кагѡ ѕлосмра́дїѧ и҆спо́лненне и҆ пови́нне ѻ҆гню̀ вѣ́чномꙋ: на главꙋ̀ твою̀ хꙋла̀ твоѧ̀ да бꙋ́детъ: и҆ а҆́бїе ᲂу҆́мъ ѡ҆ и҆но́й ко́ей ве́щи бж҃е́ственной и҆лѝ чл҃вѣ́ческой ны́нѣ плѣне́нїемъ ᲂу҆праздни́мъ, и҆лѝ и҆ со слеза́ми къ небесє́мъ тогѡ̀, и҆ къ бг҃ꙋ возвы́симъ: и҆ та́кѡ, бг҃ꙋ помога́ющꙋ на́мъ, и҆зба́вимсѧ ѿ тѧготы̀ хꙋ́льныѧ.

ѯ҃. Тлѣтво́рна є҆́сть стра́сть печа́ль въ дꙋшѣ̀ и҆ тѣ́лѣ, и҆ самѣ́хъ каса́ющаѧсѧ мозгѡ́въ. Но ꙗ҆́же є҆́сть мі́ра сегѡ̀ привре́менныхъ ра́ди человѣ́кѡмъ прикаса́ющаѧсѧ, ꙗ҆́же мно́жицею тѣ̑мъ и҆ сме́рти вино́вна быва́етъ. Печа́ль же по бз҃ѣ, спаси́тельна же вкꙋ́пѣ, и҆ ѕѣлѡ̀ поле́зна сꙋ́щи, терпѣ́нїе въ болѣ́знехъ и҆ и҆скꙋше́нїѧхъ содѣ́ловаетъ, и҆сто́чникъ ᲂу҆миле́нїѧ разширѧ́ющи подвиза́ющемꙋсѧ, и҆ жа́ждꙋщемꙋ пра́вды бж҃їѧ, и҆ пита́ющи слеза́ми се́рдце є҆гѡ̀, ꙗ҆́коже и҆сполнѧ́тисѧ дв҃довꙋ на ѻ҆́нѣхъ словесѝ: Напита́еши на́съ, глаго́летъ, хлѣ́бомъ сле́знымъ, и҆ напои́ши на́съ слеза́ми въ мѣ́рꙋ, вїно́мъ ᲂу҆миле́нїѧ1223.

ѯ҃а. Снизпа́дшїѧ ча́сти дꙋшѝ ѿ ѕлы́хъ дѣ́ланїѧ, ѕѣлѡ̀ ꙗ҆́же по бз҃ѣ печа́ль востѧжава́етъ, и҆ во є҆́же по є҆стествꙋ̀ воззыва́етъ. Толи́кѡ бо зи́мꙋ страсте́й, и҆ ѻ҆́блаки грѣха̀ и҆стончава́етъ слеза́ми, и҆ ѿ мы́сленнагѡ дꙋшѝ ѿгонѧ́етъ воздꙋ́ха, ꙗ҆́кѡ ве́дрꙋ въ по́мыслѣхъ а҆́бїе ᲂу҆ма̀ на́шегѡ быва́ти, и҆ тишинѣ̀ въ мо́ри мы́сли, и҆ весе́лїю въ сердца́хъ на́шихъ, и҆ и҆змѣне́нїю на ꙗ҆вле́нїи лица̀ на́шегѡ: на не́же до́брѣ зрѧ́щїи, ꙗ҆́коже зра́ки и҆ завѣща́нїѧ своѧ̑ прїꙋпокоѧ́юще та́кѡ по дв҃дꙋ взыва́ютъ: сїѧ̀ и҆змѣ́на десни́цы вы́шнѧгѡ1224.

ѯ҃в. Не прїе́мли ѿ мнѣ́нїй подвсѣва́ємыѧ тѝ по́мыслы на бли́жнѧго: сꙋ́ть бо ло́жни и҆ гꙋби́тельни, и҆ всѧ́чески прельсти́тельни. Вѣ́ждь ᲂу҆̀бо, ꙗ҆́кѡ си́мъ намѣ́ренїемъ покꙋша́ютсѧ бѣ́сове въ ро́въ поги́бели ври́нꙋти дꙋ́шы творѧ́щихъ ᲂу҆жѐ предспѣ̑ѧнїѧ въ добродѣ́телехъ: и҆́нагѡ бо во глꙋбинꙋ̀ ѡ҆сꙋжде́нїѧ и҆ грѣха̀ дѣ́ѧтельна ѿ подвиза́ющихсѧ кого̀ воврещѝ не мо́гꙋтъ, а҆́ще не повинꙋ́тъ того̀ прїѧ́ти подзрѣва̑нїѧ лꙋка̑выѧ ѿ внѣ́шнихъ нра́вѡвъ же и҆ ᲂу҆строе́нїй бли́жнѧгѡ. Та́кѡ бо под̾ сꙋдо́мъ и҆ паде́нїемъ грѣха̀ сегѡ̀ сотво́рше, соѡсꙋди́тисѧ съ мі́ромъ дѣ́лаютъ, по преподо́бномꙋ словесѝ: а҆́ще бо бы́хомъ себѐ, глаго́летъ писа́нїе, разсꙋжда́ли, не бы́хомъ ѡ҆сꙋжде́ни бы́ли: сꙋди́ми же ѿ гдⷭ҇а наказꙋ́емсѧ, да не съ мі́ромъ ѡ҆сꙋ́димсѧ1225.

ѯ҃г. Є҆гда̀ ѿ ᲂу҆ны́нїѧ мѣ́сто дади́мъ бѣсовѡ́мъ глаго́лати во ᲂу҆́хо на́ше, ꙗ҆̀же на бра́тїю на́шꙋ подозрѣ̑нїѧ, не хранѧ́щесѧ си́рѣчь ѡ҆ движе́нїихъ ѻ҆́чїю, тогда̀ и҆ во є҆́же ѡ҆сꙋжда́ти поꙋща́еми є҆смы̀ ѿ ни́хъ, ѻ҆вогда̀ и҆ соверше́нныхъ добродѣ́телїю. А҆́ще бо радостовзо́рнѣ зрѧ́й ѡ҆склаблѧ́ющимсѧ лице́мъ, и҆ ᲂу҆добопристꙋ́пный всѣ̑мъ въ бесѣ́дꙋ сосложи́теленъ къ сласте́мъ и҆ страсте́мъ тебѣ̀ мни́тсѧ, да бꙋ́детъ тѝ всѧ́къ и҆ сѣ́тованнѡ зрѧ́й и҆ дрѧ́хлѡ, ꙗ҆́ростїю дыха́ѧ и҆ горды́ни и҆спо́лненъ. Но не подоба́етъ человѣ́чєскимъ внима́ти сво́йствамъ, погрѣ́шенъ бо є҆́сть всѣ́ми, и҆́же ѡ҆ таковы́хъ сꙋ́дъ. Сꙋ́ть бо человѣ́кѡмъ мнѡ́га вои́стиннꙋ разли̑чїѧ є҆сте́ствъ и҆ навыкнове́нїй и҆ тѣле́сныхъ положе́нїй, ꙗ҆̀же є҆ди́нѣмъ ѻ҆́нѣмъ въ лѣ́потꙋ сꙋ́ть под̾ видѣ́нїемъ и҆ сꙋдо́мъ и҆́стиннымъ чи́стѡ стѧжа́вшымъ ᲂу҆́мное ѻ҆́ко дꙋшѝ мно́гимъ ᲂу҆миле́нїемъ, и҆ все́льника и҆мꙋ́щымъ безконе́чный свѣ́тъ бж҃е́ственныѧ жи́зни: и҆̀мже и҆ вѣ́дѣти дано̀ є҆́сть та̑йны црⷭ҇твїѧ бж҃їѧ.

ѯ҃д. Самодѣ́лателїе ѕлы́хъ дѣ́лъ быва́юще пло́ти, сꙋ́щемꙋ проти́вꙋ є҆стества̀ жела́нїю и҆ ꙗ҆́рости дꙋше́внѣй слꙋ́жимъ: пло́ть ᲂу҆́бѡ сквернѧ́ще ѕлы́ми тече́нїи грѣха̀, дꙋ́шꙋ же го́рестїю ꙗ҆́рости помрача́юще, и҆ ѿчꙋжда́ющесѧ сн҃а бж҃їѧ. Подоба́етъ про́чее скве́рнꙋ ᲂу҆́бѡ сꙋще́ственнагѡ ѿ тѣлесѐ тече́нїѧ, пото́ки сꙋще́ственныхъ сле́зъ ѡ҆чища́ти. Да є҆́же сла́сть тече́нїемъ є҆сте́ственнымъ ѡ҆сквернѝ тѣ́ло, сїѐ болѣ́знь печа́ли тече́нїемъ па́ки сле́зъ є҆сте́ственнымъ ѡ҆чища́етъ. Мра́къ же дꙋшѝ, и҆́же ѿ го́рести ꙗ҆́ростныѧ свѣ́томъ ᲂу҆миле́нїѧ и҆ сла́достїю любвѐ, ꙗ҆́же по бз҃ѣ, ѿгонѧ́ти и҆ соединѧ́тисѧ па́ки съ тѣ́мъ, ѿ негѡ́же пе́рвѣе ѻ҆́нѣми ѿчꙋжди́хомсѧ.

ѯ҃є. Ꙗ҆́коже скве́рна, ꙗ҆́же ѿ сла́сти сатани́нское раче́нїе предвари́вшее и҆́мать во и҆сполне́нїе ѕло́бы: та́кѡ и҆ ѡ҆чище́нїе, є҆́же ѿ болѣ́зненныѧ печа́ли, теплотꙋ̀ и҆́мать покаѧ́нїѧ предварѧ́ющꙋю во и҆сполне́нїе пла́ча и҆ сле́зъ. И҆ сїѐ смотре́нїе є҆́сть, ꙗ҆́же къ на́мъ бж҃їѧ бла́гости, да трꙋды̀ болѣ́зненными трꙋ́дъ сла́сти, и҆ тече́нїи сле́зъ тече́нїе стꙋ́днѣйшее пло́ти ѿража́юще же и҆ ѡ҆чища́юще, и҆з̾ѡбражє́нїѧ ѕлы́хъ ѿ ᲂу҆ма̀, и҆ без̾ѡбра̑зныѧ ѡ҆́бразы ѿ дꙋшѝ безвѣ̑стны сотвори́мъ, и҆ свѣтлѣ́йшꙋ сїю̀ добро́тою є҆сте́ственною пока́жемъ.

ѯ҃ѕ. И҆́мже ѡ҆́бразомъ лꙋка́вымъ дꙋ́хомъ дѣ́йствꙋемь блꙋдѧ́й, мздꙋ̀ ѡ҆б̾е́млетъ сла́сть плотскꙋ́ю, и҆ коне́цъ тоѧ̀ ѕлы́хъ, скве́рна. Та́кѡ, и҆́же дх҃омъ свы́ше дѣ́йствꙋемый ст҃ы́мъ, мздꙋ̀ ѡ҆б̾е́млетъ ра́дость дꙋше́внꙋю: и҆ коне́цъ тогѡ̀ до́брыхъ, є҆́же ѿ сле́зъ ѡ҆чище́нїе и҆ порожде́нїе, и҆ є҆́же къ бг҃ꙋ соедине́нїе и҆ сопрѧже́нїе.

ѯ҃з. Двꙋ́мъ сꙋ́щымъ въ на́съ, ѿ тогѡ́жде сꙋщества̀, є҆сте́ствєннымъ тече́нїємъ сѣ́мене и҆ сле́зъ, и҆́мже на ри́зѣ дꙋше́внѣй ѡ҆сквернѧ́емсѧ, и҆ и҆́миже па́ки на то́й ѡ҆чища́емсѧ: нꙋ́жда є҆́сть сꙋ́щꙋю ѿ сꙋщества̀ на́шегѡ скве́рнꙋ ѡ҆мы́ти дви́жимыми ѿ тогѡ́жде сꙋщества̀ слеза́ми: и҆́накѡ бо сꙋ́щꙋю ѿ є҆стества̀ скве́рнꙋ ѡ҆чи́стити не возмо́жно.

ѯ҃и. Всѧ́ко дꙋшѝ согрѣша́ющїѧ ᲂу҆строе́нїе, ѕло́бою дви́жимо нра́вѡвъ, въ сла́сти кра́тцѣй разорѧ́етъ трꙋ́дъ: всѧ́ка же ѡ҆чища́ема дꙋша̀ ѕла́гѡ ѡ҆бы́чаѧ и҆ ᲂу҆строе́нїѧ, въ до́лгꙋ сла́сть весе́лїѧ простира́етъ трꙋды̀. И҆ чꙋ́до, ка́кѡ сла́сть, сла́сть ᲂу҆кроща́ющи, ражда́емꙋю ѿ сла́сти ᲂу҆слажда́етъ болѣ́знь.

ѯ҃ѳ. Ѻ҆вогда̀ ᲂу҆́бѡ го́ресть и҆ болѣ́знь прибыва́етъ ᲂу҆́мномꙋ се́рдца чꙋ́вствꙋ ѿ тече́нїѧ сле́зъ, ѻ҆вогда́ же весе́лїе и҆ ра́дованїе. Є҆гда̀ ᲂу҆́бѡ ѡ҆чища́емсѧ покаѧ́нїемъ ржѝ, и҆ скве́рны грѣха̀ теплото́ю ѻ҆гнѧ̀, подѡ́бны и҆мꙋ́ще ѿ сегѡ̀ сле́зы ѿ бж҃е́ственнагѡ ѻ҆гнѧ̀ разжига́еми, и҆ а҆́кибы млаты̑ тѧ́жкими на по́мыслѣ ᲂу҆ѧзвлѧ́еми, возсыла́еми и҆з̾ глꙋбины̀ воздыха́нїи серде́чными, го́рести и҆ бѡлѣ́зни ᲂу҆́мнѣ же и҆ чꙋ́вственнѣ ѡ҆щꙋща́емъ. Внегда́ же сицевы́ми дово́льнѣ ѡ҆чи́щшесѧ слеза́ми, въ свобо́дꙋ дости́гнемъ страсте́й, тогда̀ ѿ бж҃е́ственнагѡ ᲂу҆тѣша́еми дх҃а, ꙗ҆́кѡ ти́хо и҆ чи́сто се́рдце стѧжа́вшїи, сла́сти и҆ ра́дости неизрече́нныѧ и҆сполнѧ́емсѧ ѿ радостотво́рныхъ сле́зъ ᲂу҆миле́нїѧ.

ѻ҃. И҆́ны сле́зы сꙋ́ть, ꙗ҆̀же ѿ покаѧ́нїѧ, и҆ и҆́ны ꙗ҆̀же ѿ бж҃е́ственна пролива́ємыѧ ᲂу҆миле́нїѧ. Занѐ ѻ҆́во ᲂу҆́бѡ ꙗ҆́кѡ рѣка̀ потоплѧ́ющи и҆ низвлача́щи всѧ̑ грѣха̀ тверды̑ни: ѻ҆́вы же, ꙗ҆́кѡ тꙋ́ча на трѡ́стїѧ прихо́дѧтъ въ дꙋ́шꙋ, и҆ ꙗ҆́кѡ и҆́ней на сѣ́но: кла́съ ра́зꙋма воспитова́юще, и҆ плодови́та сего̀, и҆ плодоно́сна соверша́юще.

ѻ҃а. Не бо̀ є҆́же є҆́сть слеза̀, сїѐ и҆ ᲂу҆миле́нїе, но мно́го посре́дство сле́зъ и҆ ᲂу҆миле́нїѧ. Занѐ ѻ҆́ва ᲂу҆́бѡ ѿ раска́ѧнїѧ нра́вѡвъ, и҆ па́мѧти дре́внихъ дꙋшѝ паде́нїй прихо́дитъ, ꙗ҆́кѡ ѿ ѻ҆гнѧ̀ и҆ горѧ́щїѧ воды̀ ѡ҆чище́нїе се́рдца. Ѻ҆́во же, свы́ше ѿ бж҃е́ственныѧ росы̀ дꙋ́ха, во ᲂу҆тѣше́нїе и҆ прохлажде́нїе схо́дитъ дꙋшѝ, но́во во глꙋбинꙋ̀ смиренномꙋ́дрїѧ те́плѣ вше́дшїѧ, и҆ наслажда́ющїѧсѧ видѣ́нїй непристꙋ́пнагѡ свѣ́та, и҆ къ бг҃ꙋ си́це вопїю́щїѧ дв҃дски съ ра́достїю: проидо́хомъ сквозѣ̀ ѻ҆́гнь и҆ во́дꙋ, и҆ и҆зве́лъ ны̀ є҆сѝ въ поко́й1226.

ѻ҃в. Слы́шахъ глаго́лющихъ: не мо́щно комꙋ̀ въ навыкнове́нїе прїитѝ добродѣ́тели без̾ ѿше́льствїѧ дале́ка, и҆ бѣ́гства въ пꙋсты́ню, и҆ ᲂу҆диви́хсѧ, ка́кѡ неѡпредѣле́нное и҆зво́лисѧ тѣ̑мъ въ мѣ́стѣ ѡ҆предѣлѧ́ти. А҆́ще бо навыкнове́нїе добродѣ́тели, возпоставле́нїе є҆́сть си́лъ дꙋше́вныхъ въ дре́внее благоро́дство, и҆ вкꙋ́пѣ собра́нїе пе́рвѣйшихъ добродѣ́телей въ дѣ́йство є҆́же по є҆стествꙋ̀. Сїѧ̑ же ѿ внѣꙋ́дꙋ а҆́ки привводи̑ма, къ на́мъ прибыва́ютъ, но сꙋ́ть съ на́ми ѿ содѣ́тельства бж҃е́ственнымъ и҆ ᲂу҆́мнымъ чꙋ́вствомъ: и҆́миже и҆ съ ни́ми же по є҆стествꙋ̀ дви́жими, вхо́димъ въ ца́рствїе небе́сное. А҆́ще же внꙋ́трь на́съ є҆́сть по гла́сꙋ гдⷭ҇ню: ᲂу҆̀бо и҆зли́шнѧѧ ве́щь є҆́сть пꙋсты́нѧ, входѧ́щымъ на́мъ въ нѐ и҆ без̾ тоѧ̀ покаѧ́нїемъ и҆ всѧ́цѣмъ хране́нїемъ за́повѣдей бж҃їихъ. Є҆́же и҆ на всѧ́комъ мѣ́стѣ влады́чества є҆гѡ̀ по бж҃е́ственномꙋ дв҃дꙋ мо́жетъ бы́ти: бл҃гослови́ бо, глаго́летъ, дꙋшѐ моѧ̀, гдⷭ҇а на всѧ́комъ мѣ́стѣ влады́чества є҆гѡ̀1227.

ѻ҃г. И҆́же посредѣ̀ ца́рскагѡ ѡ҆полче́нїѧ под̾ воево́дами и҆ чинонача́льники защища́емый же и҆ вчинѧ́емый, не возмогі́й во бра́ни сꙋпоста́тѡвъ дерзнове́ннѡ что̀, и҆ хра́брѡ на сꙋпоста́ты показа́ти, и҆лѝ понѐ є҆ди́нагѡ ѿ си́хъ побѣди́ти, ка́кѡ є҆динора́товати и҆́мать, и҆ посредѣ̀ мно́гихъ тє́мъ врагѡ́въ воево́дственно нѣ́кое дѣ́ло пока́жетъ неискꙋ́сенъ сы́й во бра́ни; А҆́ще же сїѐ въ человѣ́ческихъ не возмо́жно є҆́сть: мно́гѡ па́че въ бж҃е́ственныхъ. Кто́ бо въ пꙋсты́ню бѣжа́въ натечє́нїѧ бѣсѡ́въ, и҆ страсте́й нашє́ствїѧ, безвѣ̑стнаѧ и҆ проѧвлє́ннаѧ позна́етъ: и҆лѝ нападе́нїе сотвори́тъ на тѣ́хъ, не пе́рвѣе до́брѣ ѡ҆бꙋчи́всѧ ѿсѣче́нїѧ во́ли посредѣ̀ собо́ра бра́тїй, под̾ и҆скꙋ́снымъ началовожде́мъ таковы́ѧ бра́ни, неви́димыѧ вои́стиннꙋ и҆ мы́сленныѧ; А҆́ще же сїѐ не возмо́жно є҆́сть, ᲂу҆̀бо ѿню́дъ не возмо́жно є҆́сть, ꙗ҆́кѡ да и҆нѣ́хъ таковы́й побѣди́тъ, и҆ и҆нѣ́хъ наꙋ́читъ на неви̑димыѧ врагѝ побѣ́дамъ.

ѻ҃д. Ѿимѝ ѿ себѐ поно́съ нерадѣ́нїѧ, и҆ ᲂу҆ничиже́нїе презрѣ́нїѧ за́повѣдей бж҃їихъ: ѿве́ржи самолю́бїе, и҆ на пло́ть неща́днѡ ᲂу҆стреми́сѧ: взыщѝ ѡ҆правда́нїй гдⷭ҇нихъ и҆ свидѣ́нїй є҆гѡ̀: пренебрезѝ сла́вꙋ и҆ безче́стїе: возненави́ждь сла̑стнаѧ похотѣ̑нїѧ тѣлесѐ: бѣжѝ сы́тости, є҆́юже подчрє́внаѧ распалѧ́ютсѧ: лобжѝ ᲂу҆бо́жество, ѕлострада́нїе: ста́ни проти́вꙋ страсте́й: ѡ҆братѝ чꙋ̑вства твоѧ̑ ко внꙋ́трєннимъ дꙋшѝ: воззрѝ внꙋ́трь къ дѣ́ланїю лꙋ́чшагѡ: ѡ҆гло́хни ѿ человѣ́ческихъ веще́й: и҆стощѝ всю̀ твою̀ крѣ́пость на дѣ́ланїе за́повѣдей: пла́чи, долꙋлега́й, пости́сѧ, ѕлопостраждѝ, безмо́лвствꙋй, ᲂу҆вѣ́ждь коне́чное, не ꙗ҆̀же ѡ҆ тебѣ̀, но самаго̀ себѐ: превы́шше смире́нїѧ ви́димыхъ бꙋ́ди: прострѝ ᲂу҆́мное твоѐ ѻ҆́ко къ видѣ́нїю бж҃їю, и҆ ви́ждь сла́дость гдⷭ҇ню ѿ добро́ты созда́нїй. И҆ ѿтꙋ́дꙋ сше́дъ повѣ́ждь бра́тїи твое́й, ꙗ҆̀же вѣ́чныѧ жи́зни, и҆ та̑йны црⷭ҇твїѧ бж҃їѧ. И҆ сѐ є҆́сть дѣ́ло бѣ́гства ѿ человѣ̑къ соверше́ннымъ прилѣжа́нїемъ, и҆ коне́цъ є҆́же въ пꙋсты́ни пребыва́нїѧ.

ѻ҃є. А҆́ще хо́щеши ᲂу҆ви́дѣти блага̑ѧ, ꙗ҆̀же ᲂу҆гото́ва бг҃ъ лю́бѧщымъ є҆го̀, въ пꙋсты́ни бꙋ́ди ѿверже́нїѧ своеѧ̀ во́ли и҆ бѣжѝ мі́ра. Кото́рагѡ же сегѡ̀; По́хоти ѻ҆че́съ, пло́ти, го́рдости по́мыслѡвъ, и҆ пре́лести ви́димыхъ. Сегѡ́ бо а҆́ще бѣжи́ши мі́ра, ра́нѡ возсїѧ́етъ на тѧ̀ свѣ́тъ1228, ᲂу҆зрѣ́нїемъ бж҃е́ственныѧ жи́зни, и҆ и҆сцѣлє́нїѧ дꙋшѝ твоеѧ̀, глаго́лю же, сле́зы ско́рѡ возсїѧ́ютъ, и҆ и҆змѣне́нїемъ и҆змѣни́шисѧ десни́цы вы́шнѧгѡ, и҆ ра́на ѿто́лѣ страсте́й не прибли́житсѧ тѣлесѝ твоемꙋ̀1229. И҆ та́кѡ посредѣ̀ мі́ра и҆ люде́й пребыва́ѧ, бꙋ́деши ꙗ҆́кѡ въ пꙋсты́ни живꙋ́щъ, и҆ человѣ́ка не ви́дѧ. А҆́ще ли же сегѡ̀ не та́кѡ бѣжи́ши мі́ра, ничто́же тебѣ̀ ѿ бѣ́гства є҆ди́нагѡ ви́димагѡ мі́ра къ соверше́нствꙋ добродѣ́телей и҆ соедине́нїю бж҃їю прибꙋ́детъ.

ѻ҃ѕ. Є҆́же бы́ти и҆́нокꙋ, не є҆́же внѣ̀ человѣ̑къ и҆ мі́ра бы́ти є҆́сть: но є҆́же ѡ҆ста́вити себѐ, внѣ̀ по́хотей пло́ти бы́ти, и҆ пойтѝ въ пꙋсты́ню страсте́й. А҆́ще бо и҆ къ вели́комꙋ ѻ҆́номꙋ рече́сѧ: бѣ́гай человѣ̑къ, и҆ спасе́шисѧ, но си́мъ ѡ҆́бразомъ рече́сѧ: занѐ и҆ по є҆́же бѣжа́ти ѻ҆́номꙋ, посредѣ̀ человѣ̑къ водворѧ́шесѧ, и҆ въ населє́ннаѧ приходѧ̀ бѣ̀, и҆ со ᲂу҆ченикѝ живѧ́ше: но мы́сленнымъ бѣ́гствомъ въ чꙋ́вственномъ спѣ́шнѡ бѣжа́въ, ничто́же ѿ человѣ́ческагѡ сочета́нїѧ поврежда́шесѧ: сїе́ же и҆ и҆́нъ нѣ́кто ѿ вели́кихъ вопїѧ́ше ѿ собра́нїѧ и҆сходѧ̀: бѣ́гайте бра́тїе, на ᲂу҆ста̀ пока́зоваше, вопроша́емь вины̀.

ѻ҃з. Є҆́же вкꙋ́пѣ во ѻ҆бщежи́тїи житїѐ, ᲂу҆едине́нїѧ є҆́сть ᲂу҆твержде́ннѣйше: занѐ ѡ҆ нꙋ́жднѣмъ ᲂу҆́бѡ є҆́же вкꙋ́пѣ житїѧ̀, свидѣ́тель є҆́сть свѧще́нное сло́во і҆и҃са и҆ бг҃а: и҆дѣ́же бо є҆ста̀ два̀ и҆лѝ трїѐ со́брани, глаго́летъ, во и҆́мѧ моѐ, тꙋ̀ є҆́смь посредѣ̀ и҆́хъ1230. Ѡ҆ прибѣ́дственности же ᲂу҆едине́нїѧ соломѡ́нъ, го́ре є҆ди́номꙋ, глаго́летъ, ꙗ҆́кѡ, є҆гда̀ паде́тъ, нѣ́сть воздви́жай є҆го̀1231. И҆́бо въ любвѝ и҆ є҆диномы́слїи бг҃а пою́щихъ, и҆ даві́дъ ᲂу҆блажа́етъ: блаже́ни, вопїѧ̀, лю́дїе вѣ́дꙋщїи воскликнове́нїе1232. И҆ є҆́же вкꙋ́пѣ житїѐ похвалѧ́етъ, глаго́лѧ: сѐ что̀ добро̀, и҆лѝ что̀ красно̀, но є҆́же жи́ти бра́тїи вкꙋ́пѣ1233; И҆ во ᲂу҆ченицѣ́хъ гдⷭ҇нихъ, є҆ди́на бѣ̀ въ ни́хъ дꙋша̀ и҆ се́рдце1234. Но и҆ є҆́же къ на́мъ бж҃їе соше́ствїе, не въ пꙋсты́ни бы́сть, но въ населе́нныхъ и҆ посредѣ̀ человѣ̑къ грѣ́шныхъ. Нꙋ́жно ᲂу҆̀бо є҆́сть є҆диномы́слїе, є҆́же вкꙋ́пѣ жи́зни: погрѣ́шно же ᲂу҆едине́нїе и҆ прибѣ́дственно.

ѻ҃и. Нꙋ́жда (є҆́сть) прїитѝ собла́знѡмъ, глаго́летъ гдⷭ҇ь, но го́ре томꙋ̀, и҆́мже собла́знъ прихо́дитъ1235. И҆́же ᲂу҆́бѡ благоговѣ́нїе погꙋби́вый, и҆ съ пренебреже́нїемъ и҆ безстра́шїемъ бж҃їимъ посредѣ̀ собо́ра бра́тїй пребыва́ѧй, мнѡ́гимъ ѿ простѣ́йшихъ дае́тъ собла́зны. Ѻ҆́во ᲂу҆́бѡ дѣ́лы, и҆ ѡ҆́бразы, и҆ ѕлѣ́йшими нра̑вы: ѻ҆́во же словесы̑ и҆ бесѣ́дою растлѣ́нною, и҆ растлѣва́етъ дꙋ́шы и҆ нра́вы бла́ги и҆ добры̀.

ѻ҃ѳ. Блюды́й за́пѡвѣди бж҃їѧ, не ка́мень собла́зна быва́етъ человѣ́кѡмъ, занѐ нижѐ собла́знъ є҆́сть въ не́мъ: ми́ръ бо мно́гъ лю́бѧщымъ зако́нъ тво́й, и҆ нѣ́сть и҆̀мъ собла́зна1236: но свѣ́тъ, и҆ со́ль и҆ жи́знь, по гдⷭ҇ню гла́сꙋ: вы̀ є҆стѐ свѣ́тъ мі́ра, и҆ со́ль жи́зни1237. Свѣ́тъ ᲂу҆́бѡ, ꙗ҆́кѡ житїе́мъ добродѣ́теленъ, и҆ свѣ́телъ сло́вомъ, и҆ премꙋ́дръ ᲂу҆мо́мъ: со́ль же, ꙗ҆́кѡ въ ра́зꙋмѣ бж҃е́ственномъ мно́гъ, и҆ си́ленъ въ премꙋ́дрости бж҃їей. Жи́знь же, ꙗ҆́кѡ глаго́лы бесѣ́ды своеѧ̀ животворѧ́й ᲂу҆мерщвле́нныхъ страстьмѝ, и҆ си́хъ ѿ а҆́да возставлѧ́ѧй ѿча́ѧнїѧ, и҆ свѣ́томъ ᲂу҆́бѡ дѣ́лъ свои́хъ пра́вды сїѧ́ѧй пред̾ человѣ́ки, и҆ просвѣща́ѧй и҆̀хъ. Сла́достїю же и҆ те́рпкостїю слове́съ, востѧга́ѧй тѣ́хъ ѿ разслабле́нїѧ, и҆ и҆збавлѧ́ѧй ѿ согни́тїѧ страсте́й: жи́знїю же глагѡ́лъ свои́хъ живо́тъ даѧ́й ᲂу҆мерщвлє́ннымъ ѿ грѣха̀ дꙋша́мъ.

п҃. Стра́сть тщесла́вїѧ треѻ́стенъ волче́цъ є҆́сть, тщесла́вїемъ и҆ мнѣ́нїемъ и҆ горды́нею ѿ бѣсѡ́въ разжига́емь же и҆ и҆ско́вываемь: но водворѧ́ющимисѧ въ кро́вѣ бг҃а небе́снагѡ, ви́димь быва́етъ, и҆ ѻ҆стны̀ сегѡ̀ сокрꙋша́ютсѧ, превозлета́ющими си́рѣчь сїѧ̑ смире́нїемъ, и҆ въ са́дѣ жи́зни внꙋ́трь почива́ющими.

п҃а. Внегда̀ нечи́стый се́й и҆ многоко́зненный бѣ́съ прило́гствꙋетъ тѝ предспѣ́ѧнїѧ творѧ́щꙋ въ добродѣ́тели, и҆ предгада́етъ тѝ престо́лѡвъ высотꙋ̀, ᲂу҆мышле́нїи, въ па́мѧтствованїе возводѧ̀ и҆ возносѧ̀ дѣ́ланїе твоѐ, ꙗ҆́кѡ превы́шше лежа́щее про́чихъ, но и҆ дꙋ́шы води́ти дово́льна тѧ̀ совѣ́тꙋетъ бы́ти: ᲂу҆держа́въ є҆го̀ мы́сленнѡ, не ѡ҆ста́ви ᲂу҆бѣ́гнꙋти, а҆́ще ᲂу҆́бѡ си́лꙋ прїѧ́лъ є҆сѝ съ высоты̀ та́кѡ твори́ти. И҆ пое́мь, пойдѝ мы́слїю, и҆ мнѣ́нїемъ къ нѣ́чесомꙋ нѣ́когда содѣ́ѧнномꙋ тобо́ю ѕлꙋ̀, и҆ сїѐ пред̾ ни́мъ ѡ҆бнажи́въ, рцы̀ къ немꙋ̀: дѣ́ющїи такѡва́ѧ досто́йни ли сꙋ́ть на таковꙋ̀ взы́ти предсѣда́нїѧ высотꙋ̀; и҆ довѡ́льны ли ті́и мнѧ́тсѧ бы́ти води́ти дꙋ́шы, и҆ приводи́ти спасє́ны ко хрⷭ҇тꙋ̀; ты̀ да рече́ши, а҆́зъ бо молчꙋ̀. Не и҆мѣ́ѧ ᲂу҆́бѡ ѻ҆́нъ что̀ ѿвѣща́ти тебѣ̀, ꙗ҆́кѡ ды́мъ ѿ стꙋда̀ ѿи́детъ, и҆ не ктомꙋ̀ съ си́лою стꙋжи́тъ тѝ. А҆́ще ли же что̀ содѣ́ѧнно, и҆лѝ глаго́ланно ѿ ѕлы́хъ нѣ́сть въ тебѣ̀, преми́рною жи́знїю твое́ю, то̀ понѐ за́повѣдьми себѐ и҆ страстьмѝ восприложѝ гдⷭ҇ꙋ: и҆ толи́кѡ себѐ ѡ҆брѧ́щеши соверше́нства недоста́точна сꙋ́ща, є҆ли́кѡ кꙋпѣ́ль воднꙋ́ю недоста́точнꙋ сꙋ́щꙋ мо́рѧ. Пра́вда бо человѣ́ческаѧ толи́кѡ пра́вды ѡ҆скꙋдѣва́етъ бж҃їѧ, є҆ли́кѡ къ вели́чествꙋ землѧ̀ небесѐ, и҆ кома́ръ льва̀.

п҃в. И҆́же во глꙋбинꙋ̀ ᲂу҆ѧзви́выйсѧ ѿ любвѐ бж҃їѧ, ѡ҆скꙋдѣва́ющꙋ и҆́мать предложе́нїѧ тѣле́снꙋю си́лꙋ: не бо̀ є҆́сть сы́тость сегѡ̀ предложе́нїю въ трꙋдѣ́хъ и҆ по́тѣхъ и҆́ночества. Подо́бнѡ бо томи̑мымъ жа́ждою сꙋ́щꙋ, разпале́нїе къ подви́жничествꙋ нѣ́сть врачество̀ въ сы́тость, но чрез̾ ве́сь де́нь же и҆ но́щь жа́ждетъ, є҆́же трꙋди́тисѧ, и҆ си́лою тѣлесѐ побѣжда́етсѧ. Мню́ же, ꙗ҆́кѡ па́че є҆сте́ственною се́ю стра́стїю и҆ мꙋ́чєницы хрⷭ҇тѡ́вы ѡ҆б̾ѧ́ти бы́вше, мꙋ́къ не ѡ҆щꙋща́хꙋ, и҆ сы́тости не и҆мѣ́ѧхꙋ си̑мъ прїѡбща́ющесѧ: но побѣжда́хꙋ са́ми себѐ распале́ннымъ къ бг҃ꙋ раче́нїемъ, и҆ при́снѡ ѡ҆стаю́щихсѧ зрѧ́хꙋ ѿ разжже́ннагѡ по є҆́же пострада́ти предложе́нїѧ.

п҃г. И҆́же себѐ по каково́мꙋлибо ѡ҆́бразꙋ примѣрѧ́ѧй ѿ подви́жничествꙋющихъ, и҆лѝ пребыва́ющихъ съ ни́мъ бра́тїй, ᲂу҆таи́сѧ ᲂу҆мопрельща́ѧ себѐ и҆ стра́ннымъ ѿ бг҃а ходѧ̀ пꙋте́мъ: занѐ и҆лѝ себѐ таковы́й не позна̀, и҆лѝ ᲂу҆клони́сѧ ѿ ведꙋ́щагѡ къ небесє́мъ. И҆́мже тщали́вїи долꙋпове́рженнымъ мꙋдрова́нїемъ текꙋ́тъ, и҆́мже и҆ сѣ̑ти превозлета́юще врага̀, въ мы́сленъ воздꙋ́хъ кри́лы безстра́стїѧ вхо́дѧтъ, и҆ въ свѣ́тлыхъ вѣснꙋ́ютъ мѣ́стехъ мѣрномꙋ́дрїемъ ᲂу҆кра́шени.

п҃д. Напыще́нный и҆ чрез̾ возноше́нїе ᲂу҆мо́мъ прельща́ѧйсѧ, никогда́ же смире́нїѧ во свѣ́тѣ ᲂу҆миле́нїѧ полꙋ́читъ благода́ть, є҆́юже любода́рствꙋетсѧ свѣ́тъ премꙋ́дрости бж҃їѧ сокрꙋше́ннымъ се́рдцемъ, по пи́санномꙋ: Во свѣ́тѣ твое́мъ ᲂу҆́зримъ свѣ́тъ: но но́щь того̀ покры́етъ страсте́й, въ не́йже всѝ ѕвѣ́рїе дꙋбра́внїи человѣ́ческагѡ є҆стества̀ прохо́дѧтъ, и҆ ски́мни мнѣ́нїѧ, тщесла́вїѧ, глаго́лю, и҆ блꙋда̀ бѣ́съ, рыка́юще и҆́щꙋтъ кого̀ поглоти́ти, и҆ во чре́во ѿча́ѧнїѧ воврещѝ.

п҃є. Живꙋ́щемꙋ по человѣ́кѡмъ и҆ дви́жимомꙋ дꙋ́хомъ мнѣ́нїѧ, мо́ре ѕѡ́лъ житїѐ сїѐ и҆ настоѧ́щаѧ жи́знь быва́етъ, полива́ющее ᲂу҆́мнꙋю ча́сть дꙋшѝ є҆гѡ̀ сла́ностїю сласте́й, и҆ свирѣ́пыми волна́ми страсте́й трича́стїе є҆гѡ̀ бїю́щее, ѿ дꙋхѡ́въ си́рѣчь лꙋка́вствїѧ неи́стовствꙋющеесѧ, на́нь же лю́тое недоꙋмѣ́нїе велича́йшїѧ печа́ли воспростира́етсѧ, внегда̀ ладїѧ̀ є҆гѡ̀ и҆ корми́ло дꙋше́вное ѿ сласте́й сокрꙋша́ютсѧ пло́ти, и҆ ко́рмчїй ᲂу҆́мъ под̾ глꙋбино́ю грѣха̀, и҆ мы́сленною сме́ртїю быва́етъ. До́ндеже мо́ре ᲂу҆́бѡ ѕѡ́лъ, въ бе́зднꙋ смире́нїѧ и҆ тишинꙋ̀ є҆мꙋ̀ ᲂу҆кроти́тъ во́лны: сла́ность же сласте́й въ тꙋ̑чи сле́зъ тече́нїѧ ѡ҆брати́тъ, и҆ въ сла́дость прело́житъ свѣтови́днѡ ᲂу҆миле́нїѧ.

п҃ѕ. Въ сы́тость сласте́мъ тѣ́ла и҆ дѣѧ́нїємъ того̀ порабо́тавъ, въ сы́тость ᲂу҆потребѝ и҆ трꙋдѡ́въ по́стничества въ по́тѣхъ ѕлострада́нїѧ: да сы́тость сы́тостїю, и҆ сла́сть болѣ́знїю, и҆ ѡ҆сла́ба трꙋды̑ тѣле́сными ѿрази́ттисѧ, и҆ сы́тость весе́лїѧ и҆ ра́дованїѧ во ᲂу҆покое́нїе ѡ҆брѧ́щеши: та́кѡ бо и҆ чистоты̀ наслади́шисѧ благоꙋха́нїѧ, и҆ цѣломꙋ́дрїѧ, и҆ сла́сти наслади́шисѧ неизрече́нныѧ безсме́ртныхъ плодѡ́въ дꙋхо́вныхъ. Поне́же и҆ ѡ҆чища̑ющаѧ бы̑лїѧ по подо́бїю ѡ҆быко́хомъ, на сквє́рны ри́зъ, во ѡ҆чище́нїе и҆́хъ налага́ти, внегда̀ скве́рною во глꙋбинꙋ̀ ѡ҆непотре́бствꙋютсѧ.

п҃з. Поле́зни сꙋ́ть недꙋ́зи вводи̑мымъ є҆щѐ къ добродѣ́тельномꙋ житїю̀, содѣ́йствꙋюще си̑мъ ко и҆ста́ѧнїю и҆ смире́нїю разжиза́емыѧ пло́ти: сі́и бо си́лꙋ ᲂу҆́бѡ пло́ти немощнѣ́йшꙋ дѣ́лаютъ, пе́рстное же мꙋдрова́нїе дꙋшѝ ѡ҆тончава́ютъ, са́мꙋ же тꙋ̀ крѣ́пость є҆ѧ̀, крѣ́пльшꙋ же и҆ си́льнѣйшꙋ по бж҃е́ственномꙋ соверша́ютъ а҆пⷭ҇лꙋ: є҆гда́ бо, глаго́летъ немоществꙋ́ю, тогда̀ си́ленъ є҆́смь1238. Но є҆ли́кѡ сі́и си̑мъ сꙋ́ть поле́зни, толи́кѡ привре́дни пред̾ꙋспѣ́вшымъ въ трꙋдѣ́хъ добродѣ́телей, и҆ ны́нѣ чꙋ́вство превозни́кшымъ, и҆ въ небє́снаѧ видѣ̑нїѧ вше́дшымъ: возбранѧ́ютъ бо тѣ́мъ ѿ ᲂу҆праждне́нїѧ ѡ҆ бж҃е́ственныхъ, и҆ ѡ҆дебелѧ́ютъ болѣ́зньми и҆ ѡ҆бстоѧ́нїи по́мысленное дꙋшѝ и҆́хъ: и҆ ѻ҆́блакомъ печа́ли возмꙋща́ютъ то̀, и҆ ᲂу҆миле́нїе сꙋ́шею болѣ́зней и҆зсꙋша́ютъ. Є҆́же па́ѵелъ вѣ́дый прилѣжѧ̀ до́брѣ ѡ҆ себѣ̀, зако́номъ разсꙋжде́нїѧ глаго́лаше: ᲂу҆мерщвлѧ́ю тѣ́ло моѐ по́двигами трꙋдѡ́въ, порабоща́ю є҆̀ послꙋша́нїѧмъ, да не ка́кѡ и҆ны̑мъ проповѣ́дꙋѧ, са́мъ неключи́мь бꙋ́дꙋ1239.

п҃и. Ѿ нестро́йнагѡ и҆ ра́вности неимꙋ́щагѡ ᲂу҆ста́ва пи́щи, мно́жицею ражда́ютсѧ мнѡ́гимъ недꙋ́зи: и҆лѝ къ кра́йнемꙋ неѧде́нїю тщали́вомꙋ, и҆лѝ къ трꙋдѡ́мъ добродѣ́телей безмѣ́рнѡ и҆ неразсꙋ́днѡ просте́ршꙋсѧ, и҆лѝ къ ѡ҆б̾ѧде́нїю и҆ сы́тости ᲂу҆кло́ншꙋсѧ є҆стествꙋ̀ сꙋпоста́тꙋ. Нꙋ́ждно ᲂу҆̀бо и҆ вводи̑мымъ къ добродѣ́тели є҆́сть воздержа́нїе, и҆ вы́шше среды̀ прело́жшымъ по́двиги къ соверше́ннѣйшемꙋ видѣ́нїѧ восхожде́нїю: ма́ти бо здра́вїѧ є҆́сть сїѐ, дрꙋ́гъ чистоты̀, и҆ смиренномꙋ́дрїѧ бла́гъ сожи́тель.

п҃ѳ. Сꙋгꙋ́бо бы́ти безстра́стїе вѣ́ждь, и҆ сꙋгꙋ́бо во тщали́выхъ па́че быва́ти: и҆ пе́рвѣе ᲂу҆́бѡ, ѿ конца̀ дѣ́ѧтельнагѡ любомꙋ́дрїѧ пе́рвое быва́етъ тщали̑вымъ безстра́стїе, є҆́же ѿ зако́ннагѡ по́двига трꙋды̀ многоѡбра́знѡ пред̾ꙋспѣ́вшымъ, ᲂу҆мерщвлѧ́ти ᲂу҆́бѡ вѣ́сть а҆́бїе стра̑сти, и҆ стремлє́нїѧ пло́ти недѣ́йствєнна поставлѧ́ти, и҆ двиза́тисѧ ко є҆́же по є҆стествꙋ̀ дꙋшє́внымъ си́ламъ твори́тъ, и҆ ᲂу҆́мъ въ поꙋче́нїи бж҃е́ственныхъ съ ра́зꙋмомъ воспоставлѧ́етъ. Та́же ѿ нача́ла є҆сте́ственнагѡ видѣ́нїѧ, второ́е и҆ соверше́ннѣйшее премꙋ́дрѣ тѣ́мъ прибыва́етъ. Є҆́же ѿ ᲂу҆́мнагѡ безмо́лвїѧ помыслѡ́въ, въ ми́рное ᲂу҆ма̀ возвы́сившосѧ ᲂу҆строе́нїе, прозри́тельнѣйшъ же и҆ предзри́тельнѣйшъ вѣ́сть ᲂу҆́мъ содѣ́ловати. Прозри́тельнѣйшъ ᲂу҆́бѡ, въ ве́щехъ бж҃е́ственныхъ, и҆ во видѣ́нїихъ лꙋ́чшагѡ, и҆ въ ѿкрове́нїихъ та̑инъ бж҃їихъ: презри́тельнѣйшъ же, въ ве́щехъ человѣ́ческихъ, ѿдале́че грѧдꙋ́щихъ, и҆ и҆мꙋ́щихъ быва́ти, въ ни́хже є҆ди́нъ и҆ то́йжде дꙋ́хъ дѣ́йствꙋѧй є҆́сть, держа́й ᲂу҆́бѡ и҆ содержа́й по пе́рвомꙋ безстра́стїю, ѿпꙋща́ѧй же по второ́мꙋ въ свобо́дꙋ вѣ́чныѧ жи́зни, ꙗ҆́коже па́ѵелъ глаго́летъ1240.

ч҃. И҆́же безстра́стїѧ прибли́живыйсѧ предѣ́лѡмъ, и҆́стинна ᲂу҆́бѡ ѡ҆ бз҃ѣ, и҆ ѡ҆ є҆стества́хъ сꙋ́щихъ, творѧ̀ зрѣ̑нїѧ, ѿ добро́ты созда́нїй по мѣ́рѣ своеѧ̀ чистоты̀ ко творцꙋ̀ востека́ѧ, прїе́млетъ свѣтоли̑тїѧ дх҃а: бла̑га же мнѣ̑нїѧ и҆мѣ́ѧ ѡ҆ всѣ́хъ, приснопомышлѧ́етъ ѡ҆ всѣ́хъ дѡ́браѧ: ст҃ы́ми же всѣ́хъ зри́тъ и҆ чи́стыми, и҆ ѡ҆ бж҃е́ственныхъ и҆ человѣ́ческихъ ве́щехъ сꙋ́дъ пра́въ и҆зно́ситъ: и҆ рачи́тельствꙋетъ ᲂу҆́бѡ ничесогѡ́же ѿ ꙗ҆̀же ѡ҆ веществѣ̀ мі́ра и҆ человѣ́кѡмъ тщи́мыхъ. И҆зше́дъ же ᲂу҆мо́мъ всемі́рнагѡ чꙋ́вства, къ небесє́мъ и҆ бг҃ꙋ востече́тъ чи́стъ всѧ́кїѧ ти́ны, и҆ всѧ́кїѧ рабо́ты свобо́дь, и҆ ве́сь быва́етъ мы́сленныхъ бж҃їихъ благи́хъ во є҆ди́номъ дс҃ѣ, и҆ бж҃е́ственнꙋю добро́тꙋ зри́тъ и҆ бг҃олѣ́пнѡ пребыва́етъ въ бж҃е́ственныхъ мѣ́стѣхъ блаже́нныѧ бж҃їѧ сла́вы въ неизрече́ннѣмъ молча́нїи и҆ ра́дости: и҆ чꙋ́вствами всѣ́ми и҆змѣне́нъ бы́въ, ꙗ҆́кѡ а҆́гг҃лъ въ веще́ственнѣмъ тѣ́лѣ невеще́ственъ съ человѣ́ки соѡбраща́етсѧ.

ч҃а. Чꙋ̑вства вѣ́сть сло́во пѧ́ть и҆ ѡ҆бꙋчє́нїѧ: бдѣ́нїе, поꙋче́нїе, моли́твꙋ, воздержа́нїе, и҆ безмо́лвїе. Си̑мъ чꙋ̑вства своѧ̑ присовокꙋпи́вый: зрѣ́нїе ᲂу҆́бѡ, бдѣ́нїю: слꙋ́хъ же поꙋче́нїю: ѡ҆бонѧ́нїе мл҃твѣ: вкꙋ́съ, воздержа́нїю: и҆ ѡ҆сѧза́нїе спрѧгі́й безмо́лвїю, ско́рѡ ѡ҆чища́етъ ᲂу҆́мъ своеѧ̀ дꙋшѝ, и҆ ѡ҆тончи́въ си́ми є҆го̀, безстра́стна и҆ прозри́тельна є҆го̀ содѣ́ловаетъ.

ч҃в. Оу҆́мъ безстра́стенъ є҆́сть, своѧ̑ побѣди́вый стра̑сти, и҆ превы́ше печа́ли и҆ ра́дости бы́вый, и҆́же ни ѡ҆ печа́лехъ, ꙗ҆̀же ѿ нанесе́нїй, ᲂу҆ныва́етъ, ни ра́достїю ꙗ҆̀же ѿ благодꙋ́шїѧ, разлива́етсѧ: но во ско́рбехъ ᲂу҆́бѡ ра́дꙋющꙋюсѧ и҆мѣ́ѧ дꙋ́шꙋ, во благодꙋ́шїихъ же воздержа́ющꙋюсѧ, и҆ не внѣ̀ мѣ́ры дѣ́йствꙋющꙋю.

ч҃г. Мно́го на творѧ́щихъ въ видѣ́нїе предспѣ́ѧнїѧ неи́стовство бѣсѡ́въ: подсѣда́ютъ бо на тѣ́хъ но́щь и҆ де́нь. И҆ пребыва́ющими ᲂу҆́бѡ съ ни́ми, и҆скꙋшє́нїѧ лю̑та на нѧ̀ воздвиза́ютъ: собо́ю же то́поты творѧ́тъ въ страхова́нїе, и҆ на спѧ́щихъ си́хъ навѣ́тꙋютъ, ѻ҆тра́дѣ и҆́хъ зави́дѧще, и҆ разли́чнѡ ѡ҆печалѧ́ютъ и҆̀хъ, а҆́ще и҆ не мо́гꙋтъ ѡ҆би́дѣти прилѣпле́нныхъ сꙋ́щихъ бг҃ꙋ. И҆ а҆́ще не бы̀ а҆́гг҃лъ гдⷭ҇а вседержи́телѧ хранѧ́й и҆̀хъ бы́лъ, не бы́ша навѣ́та и҆́хъ и҆ сме́ртныхъ сѣ́тей ᲂу҆гонзнꙋ́ли.

ч҃д. Подвиза́ѧйсѧ въ дѣ́ѧтельнѣмъ любомꙋ́дрїи добродѣ́тели, внемлѝ и҆звѣ́стнѡ ѡ҆ навѣ́тѣхъ гꙋби́тельныхъ бѣсѡ́въ: є҆ли́кѡ бо восхождє́нїѧ предспѣ́ѧнїй въ высѡ́кїѧ добродѣ́тєли полага́еши, и҆ свѣ́тъ ᲂу҆множа́еттисѧ бж҃е́ственный въ моли́твахъ, и҆ ко ѿкрове́нїѧмъ грѧде́ши и҆ видѣ́нїѧмъ неизречє́ннымъ, дх҃омъ: толи́кѡ ѻ҆нѝ, восходѧ́ща тѧ̀ зрѧ́ще на не́бо, скреже́щꙋтъ зꙋбы̑, и҆ ѕло́бы своеѧ̀ многоплетє́нныѧ мрє́жи по мы́сленномꙋ воздꙋ́хꙋ тща́тельнѡ простира́ютъ. Не то́чїю бо по́хотнїи и҆ ꙗ҆́ростнїи и҆ плотолюби́вїи же и҆ ѕвѣ́рстїи на тѧ̀ дхнꙋ́тъ бѣ́си, но и҆ хꙋле́нїѧ за́вистїю го́рькою на тѧ̀ воста́нꙋтъ. И҆ къ си̑мъ ꙗ҆вле́ннѡ же и҆ неѧвле́ннѡ воздꙋ́шнїи и҆ нача̑ла и҆ вла̑сти летѧ́щїи, по мечта́нїю є҆ди́номꙋ въ ви́дахъ стра́нныхъ и҆ стра́шныхъ представлѧ́ющїисѧ, во ѡ҆ѕлобле́нїе твоѐ, є҆ли́кѡ мо́щно є҆́сть тѣ̑мъ, воздви́гнꙋтсѧ. Но во ᲂу҆́мномъ дѣ́ланїи моли́твы бо́дрымъ ѻ҆́комъ ᲂу҆ма̀ ᲂу҆пражнѧ́ѧсѧ, и҆ мы́слѧми є҆сте́ственнагѡ ᲂу҆мозрѣ́нїѧ въ творе́нїихъ бж҃їихъ поꙋча́ѧсѧ, не ᲂу҆бои́шисѧ ѿ стрѣлы̀ и҆́хъ летѧ́щїѧ во днѝ: ниже́ бо тѣлесѝ твоемꙋ̀ приближа́тисѧ возмо́гꙋтъ, ѿ сꙋ́щагѡ въ тебѣ̀ свѣ́та ꙗ҆́кѡ тьма̀ прогонѧ́еми, и҆ ѿ бж҃е́ственнагѡ ѻ҆гнѧ̀ пожига́еми.

ч҃є. Благода́ти бж҃е́ственнагѡ дх҃а боѧ́тсѧ ѕѣлѡ̀ лꙋка́вїи дꙋ́си, и҆ наипа́че є҆гда̀ бога́тнѣ на́йдетъ на ны̀ ѡ҆чища́ющихсѧ поꙋче́нїемъ и҆ чи́стою моли́твою: не дерза́юще бо прибли́житисѧ тѣлесѝ ѡ҆сїѧва́емыхъ ѿѻнꙋ́дꙋ, є҆ди́нѣми мечта́нїи и҆ стра́шными то́поты, и҆ безвѣ́стными гла̑сы ᲂу҆страша́ти и҆ смꙋща́ти покꙋша́ютсѧ, и҆ ѿ дѣ́лъ ѿводи́ти бдѣ́нїѧ и҆ моли́твы. Но и҆ спѧ́щымъ тѣ̑мъ на землѝ не щадѧ́тъ, и҆ зави́дѧще кратча́йшемꙋ трꙋдѡ́въ и҆́хъ поко́ю навѣ́тꙋютъ, и҆ торга́нїи нѣ́кїими взе́млютъ со́нъ ѿ вѣ́ждей и҆́хъ, притрꙋ́днѣйшїй си́хъ живо́тъ и҆ болѣ́зни и҆спо́лненъ твори́ти таковы́ми ᲂу҆мышлѧ́юще.

ч҃ѕ. Ѡ҆тѣлесѣва́тисѧ мнѧ́тсѧ то́нцѣ нѣ́какѡ дꙋ́си тьмы̀, ꙗ҆́коже сло́во ѿ и҆скꙋ́са мнѣ́ти дае́тъ. И҆лѝ сїѐ мечта́ющи чꙋ́вствꙋ подꙋкра́дꙋемꙋ, и҆лѝ въ сїѐ и҆ ѡ҆сꙋжде́нни бы́вше, ѿ дре́внѧгѡ ѿпаде́нїѧ. Но ѻ҆ба́че сосража́тисѧ съ подви́жною ᲂу҆стремлѧ́ютсѧ дꙋше́ю, клонѧ́щꙋсѧ тоѧ̀ ко снꙋ̀ ле́стномꙋ тѣ́лꙋ, є҆́же и҆ и҆скꙋше́нїе нѣ́кое мни́тмисѧ бы́ти дꙋшѝ, ны́нѣ быва́ющїѧ превы́шше смире́нїѧ тѣлесѐ, ꙗ҆́кѡ да ꙗ҆рови́дное тоѧ̀ и҆ мꙋ́жественное, ка́кѡ є҆́сть, на таковы́хъ пока́жетсѧ, претѧ́щымъ то́й стра́шными съ ꙗ҆́ростїю и҆ неи́стовствомъ мно́гимъ. И҆́миже въ раче́нїе ᲂу҆ѧ́звленна бж҃їе, и҆ ѡ҆бдержи́тельными добродѣ́тельми ѡ҆б̾ѧ́та дꙋша̀, не то́чїю пра́ведною ꙗ҆́ростїю сопротивлѧ́етсѧ, но и҆ бїе́тъ си́хъ, а҆́ще ко́е тѣ̑мъ є҆́сть чꙋ́вство, ꙗ҆́коже мни́тсѧ, неща́днѡ ѡ҆землени́вшымсѧ ѿпаде́нїемъ пе́рвагѡ и҆ бж҃е́ственнагѡ свѣ́та.

ч҃з. Пре́жде сраже́нїѧ и҆ побѣ́ды мно́жицею бѣ́сове чꙋ́вство дꙋшѝ смꙋща́ютъ, и҆ со́нъ ѿ вѣ́ждей восхища́ютъ. Но де́рзости и҆ мꙋ́жества ѿ дх҃а ст҃а́гѡ и҆спо́лненнаѧ дꙋша̀ небреже́тъ ᲂу҆́бѡ си́хъ нахожде́нїѧ и҆ го́рькагѡ неи́стовства: животворѧ́щымъ же то́чїю воѡбраже́нїемъ, и҆ призыва́нїемъ і҆и҃са и҆ бг҃а, и҆ мечта̑нїѧ и҆́хъ разрꙋша́етъ, и҆ си́хъ кꙋ́пнѡ бѣглецы̀ соверша́етъ.

ч҃и. А҆́ще коры̑сти плѣни́ти сꙋпоста́тныхъ дꙋхѡ́въ ѿ дѣ́ѧтельнагѡ и҆зше́лъ є҆сѝ любомꙋ́дрїѧ, зрѝ и҆ внемлѝ, ѻ҆рꙋ́жїи себѐ ѿвсю́дꙋ дꙋхо́вными воѡрꙋжи́въ. Вѣ́си бо, кі́ихъ сосꙋ́ды расхи́тити воз̾ꙋсе́рдствовалъ є҆сѝ. Сꙋпоста̑тъ ᲂу҆́бѡ, но мы́сленныхъ и҆ безпло́тныхъ, съ тѣ́ломъ є҆щѐ царе́ви дꙋхѡ́въ и҆ бг҃ꙋ во́инствꙋѧй. Вѣ́ждь бо, ꙗ҆́кѡ горча́е, не́жели пе́рвѣе вою́ютъ на тѧ̀, и҆ мно́зи на тѧ̀ прїи́дꙋтъ ко́зньми: до́ндеже и҆лѝ ᲂу҆таи́вшесѧ, внегда̀ коры́сти припогꙋблѧ́ти, съ си́ми тѧ̀ плѣ́нника восхи́тѧтъ и҆ мно́гїѧ го́рести дꙋ́шꙋ твою̀ и҆спо́лнѧтъ, и҆лѝ ѕлы̑мъ тѧ̀ и҆ болѣ́знєннымъ подве́ргнꙋтъ и҆скꙋше́нїѧмъ, во ѡ҆скорбле́нїе пло́ти твоеѧ̀ и҆ ѡ҆ѕлобле́нїе.

ч҃ѳ. Не мо́жетъ и҆сто́чникъ бла́гъ, во́ды мꙋ̑тны и҆ смра̑дны и҆сточа́ти, вещество́мъ мїрски́мъ смердѧ́щѧ: нижѐ се́рдце, внѣ̀ ца́рствїѧ сꙋ́ще небе́снагѡ, стрꙋи̑ жи́зни когда̀ бж҃е́ствєннаѧ и҆сточа́ти, благоꙋха́нїе мѵ́ра мы́сленна возсыла́ющыѧ. Є҆да́ ли бо, глаго́летъ, и҆сто́чникъ ѿ є҆ди́нагѡ ᲂу҆́стїѧ и҆сточа́етъ сла́дкое и҆ го́рькое1241; Є҆да̀ мо́жетъ кꙋпина̀ ма̑слины сотвори́ти, и҆лѝ же́лꙋди ма́слина; Та́кѡ нижѐ и҆сто́чникъ є҆ди́нъ се́рдца, лꙋка́въ и҆ бла́гъ вкꙋ́пѣ роди́ти ра́зꙋмъ. Но благі́й ᲂу҆́бѡ человѣ́къ ѿ блага́гѡ сокро́вища се́рдца своегѡ̀ и҆зно́ситъ блага̑ѧ: лꙋка́вый же ѿ лꙋка́вагѡ сокро́вища се́рдца своегѡ̀ и҆зно́ситъ лꙋка̑ва, по гдⷭ҇ню гла́сꙋ1242.

р҃. Ꙗ҆́коже невозмо́жно є҆́сть без̾ є҆ле́а и҆ ѻ҆гнѧ̀ свѣти́льникꙋ горѣ́ти, и҆ свѣти́ти сꙋ́щымъ въ хра́минѣ: та́кѡ и҆ дꙋшѝ не возмо́жно є҆́сть без̾ бж҃е́ственна дх҃а и҆ ѻ҆гнѧ̀, бж҃е́ствєннаѧ ꙗ҆вле́ннѣе вѣща́ти, и҆ просвѣща́ти человѣ́ки: всѧ́къ бо да́ръ соверше́нъ свы́ше є҆́сть ѿ ѻ҆ц҃а̀ свѣ́тѡвъ, раздѣлѧ́емь всѧ́кой бг҃олюби́вой дꙋшѝ: въ не́мже нѣ́сть, по словесѝ, и҆змѣне́нїѧ и҆лѝ преложе́нїѧ сѣ́нь.