Ѡ҆ ча́дѣхъ во роди́телехъ.

Въ хі́нстѣмъ предѣ́лѣ Сꙋ́хвенъ рече́нномъ, бы́ліе Тꙋйхо́нъ и҆менꙋ́емое, (ꙗ҆́коже А҆ѳана́сій Кі́рхеръ въ кни́зѣ І҆ллюстра́ціа хі́нская гл҃емой, в̾ ча́сти д҃, во главѣ̀ и҃, повѣствꙋ́етъ) и҆зря́дныя, и҆ ѕѣлѡ̀ доброзра́чныя пти́цы ражда́етъ, ѻ҆́бразъ и҆ подо́біе цвѣ́та и҆мꙋ́щыя, но житіѐ пти́цъ ра́внѣ съ житіе́мъ цвѣ́та ѡ҆кончева́ется.

Нѣ́сть сіѐ но́во, нѣ́сть, нижѐ безвѣ́стно: ꙗ҆́кѡ мно́зи, доне́лѣже цвѣтꙋ́тъ роди́тели, ча́да и҆́хъ красꙋ́ются дото́лѣ, ꙗ҆́коже и҆ птенцы̀ ѻ҆́ніи. Но жела́лъ бы въ ни́хъ бы́ти подо́бію и҆ нра́вами, и҆ лѣ́ты ѻ҆́рліих птенцѡ́въ, и҆ на свѣ́тъ добродѣ́телей л. м҃а ѡ҆б. несмѣ́жнѣ прости́рати зрѣ́ніе своѐ. А҆́ще же лише́нъ кто̀ блгⷣти таковы́я, а҆́ще лише́нъ си́хъ, и҆̀же к̾ свѣ́тꙋ и҆ сія́нію добродѣ́телей и҆спра́вити мо́гꙋтъ ѹ҆́мныя зѣ́ницы ́є҆гѡ̀, па́че же не с̾ цвѣ́томъ сі́есть, с̾ животом роди́телей, и҆ са́мъ ѹ҆вя́днетъ, поле́зно ́є҆́сть Тові́ина держа́тися ѹ҆вѣща́нія сегѡ̀, ́є҆́же к̾ сн҃ꙋ [1] своемꙋ̀ вѣща́ше ѻ҆́нъ, гл҃я: Слы́ши сн҃е мо́й словеса̀ ѹ҆́стъ мои́хъ, и҆ сія̀ в̾ срⷣцы свое́мъ ꙗ҆́кѡ ѡ҆снова́ніе положѝ. Є҆гда̀ пріи́метъ бг҃ъ дш҃ꙋ мою̀, тѣ́ло моѐ погребѝ, и҆ в̾ че́сти и҆мѣ́й мт҃рь свою̀, вся̀ днѝ живота̀ ́є҆я̀. и҆ па́мятствꙋй, коли́ки болѣ́зни терпѣ́ла ́є҆́сть тебѐ ра́ди во чре́вѣ свое́мъ, ́є҆гда́ же и҆ та̀ совершит вре́мя живота̀ л. м҃в своегѡ̀, погребе́ши ю҆̀ бли́зъ менѐ. Во вся̀ днѝ живота̀ твоегѡ̀ да и҆мѣ́еши бг҃а, и҆ блюдѝ да не когда̀ грѣхꙋ̀ и҆зво́лиши, престꙋ́пиши за́пѡвѣди бг҃а на́шегѡ. ѿ и҆мѣ́нія же твоегѡ̀ творѝ млⷭ҇тыню, и҆ не ѿвратѝ лица̀ твоегѡ̀, ни ѿ ́є҆ди́нагѡ ѹ҆бо́гагѡ. а҆́ще сіѐ сотвори́ши: то̀ ни ѿ тебѐ ѿврати́тся лицѐ гдⷭ҇не. ́є҆ли́кѡ мо́жеши, толи́кѡ бꙋ́ди млⷭ҇рдъ. а҆́ще же мно́гѡ тебѣ̀ бꙋ́детъ, и҆зѡби́лнѡ и҆здава́й, а҆́ще ма́лѡ тебѣ̀ бꙋ́детъ, и҆ ма́лое бл҃гово́лнѡ ѹ҆ча́стити помы́сли, мзды́ бо бл҃ги тебѣ̀ сокро́вищствꙋеши, в̾ де́нь потре́бный, млⷭ҇тыня ѿ вся́кагѡ грѣха̀,и҆ ѿ сме́рти и҆збавля́етъ, и҆ не ѡ҆ста́вит дш҃ꙋ и҆ттѝ во тмꙋ̀. Ѹ҆пова́ніе ве́ліе бꙋ́дет пред̾ лицем л. м҃в ѡ҆б. бж҃іим млⷭ҇тыня всѣ́мъ сотворя́ющым ю҆̀. Вонмѝ себѣ̀ прилѣ́жнѡ сы́не мо́й ѿ вся́кагѡ дерзнове́нія, и҆ кромѣ̀ жены̀ твоея̀ никогда̀ ѡ҆сла́биши грѣха̀ позна́ти. Горды́ни никогда̀ в̾ твое́мъ чꙋ́вствѣ, и҆лѝ въ твое́мъ сло́вѣ вла́ствовати попꙋ́стиши, ѿ тоя́ бо нача́ло прія́тъ вся́кое гꙋби́тельство. Є҆ли́цы тебѣ̀ нѣ́что содѣ́лаютъ, ско́рѡ и҆̀мъ мздꙋ̀ возда́й, и҆ мзды̀ нае́мника твоегѡ̀ пред̾ тобо́ю не ѡ҆ста́ви. Что̀ ѿ и҆на́гѡ не нави́диши сотвори́ти тебѣ̀. зрѝ: да не ты̀ нѣ́когда дрꙋго́мꙋ сотвори́ши. Хлѣ́бъ тво́й съ а҆́лчꙋщими, и҆ съ тре́бꙋющими ꙗ҆́ждь. И҆ ѿ ѡ҆дѣя́ній твоих нагі́я ѡ҆дѣ́й. Хлѣ́бъ же тво́й, и҆ віно̀ твоѐ при погребе́ніи првⷣнагѡ л. м҃г дава́й, и҆ не ꙗ҆́ждь ́є҆го̀, нижѐ пі́й со грѣ́шники.

Совѣ́тъ всегда̀ ѿ мⷣрагѡ просѝ. Во вся́кое вре́мя блгⷭ҇вѝ бг҃а, и҆спросѝ ѿ негѡ̀: да пꙋтѝ твоя̀ ѹ҆пра́вит, и҆ вся̀ совѣ́ты твоя̀ в̾ не́мъ да пребыва́ютъ. Не ѹ҆бо́йся сн҃е мо́й, а҆́ще и҆ нище́тное житіѐ поживем, но мнѡ́га бл҃га и҆мѣ́ти бꙋ́демъ, а҆́ще ѹ҆бои́мся бг҃а, и҆ ѿстоим ѿ вся́кагѡ грѣха̀, и҆ сотворим бл҃га̑я. до здѣ̀ бесѣ́да Тові́ина к̾ сн҃ꙋ своемꙋ̀. Но и҆ вся́къ ю҆́ноша, а҆́ще к̾ таково́мꙋ преклони́шися совѣ́тꙋ: ми́рнѡ поживе́ши лѣ́та мнѡ́га, и҆ приложа́тся лѣ́та животꙋ̀ твоемꙋ̀.

л. м҃г ѡ҆б.