Ѡ҆ молча́ніи со внима́ніемъ.

[1] Бꙋ́ди [вся́къ] ѹ҆твержден в̾ ра́зꙋмѣ твое́мъ, и҆ ́є҆ди́но тебѣ̀ бꙋ́ди сло́во твоѐ. бꙋ́ди ско́ръ въ послꙋша́ніи твое́мъ, и҆ долготерпѣ́ніемъ ѿвѣщава́й ѿвѣ́тъ. а҆́ще ́є҆́сть въ тебѣ̀ ра́зꙋмъ, ѿвѣща́й и҆́скреннемꙋ твоемꙋ̀, а҆́ще ли нѝ: то̀ л. ѻ҃г бꙋ́ди рꙋка̀ твоя̀ на ѹ҆стѣ́хъ твоих. Сла́ва бо и҆ безче́стіе въ бесѣ́дѣ, и҆ я҆зы́къ человѣ́чъ впаде́ніе ́є҆мꙋ̀. Си́це гада́телствꙋетъ І҆исꙋ́съ Сира́хоⷡ҇. Ѿ негѡ́ же и҆з̾ꙋча́емся, ꙗ҆́кѡ съ вели́кимъ разсмотре́ніемъ, и҆ разсꙋжде́ніемъ до́лгимъ, а҆ не ́є҆́же ѹ҆́мъ принесе́тъ, подоба́етъ сло́во произноси́ти. Добродѣ́тель сію̀, па́че же ДОБРОДѢ́ТЕЛЕЙ[2] соверше́ніе, и҆ дре́вніи філосо́фи ѹ҆мно́жити хотя́ще, мно́гъ ѡ҆ сем трꙋ́дъ под̾е́мляхꙋ. Є҆гѵ́птяне же А҆рпокра́та Філо́софа, и҆́же бы́сть молча́нію ѹ҆чи́тель, в̾ бо́ги почто́ша, и҆ ѻ҆́бразъ и҆зва́янъ приложе́ннꙋ ко ѹ҆стѡ́мъ рꙋ́кꙋ и҆мꙋ́ща, съ надписа́ніемъ: ВНИМА́Й СЕБѢ̀, в̾ че́сть л. ѻ҃г ѡ҆б. ́є҆гѡ̀ сотво́рше въ ка́пищи вели́комъ боги́ни І҆́ѕіди поста́виша, тѣ́мъ зна́менателствꙋюще: да вся́къ внима́етъ пре́жде себѣ̀, и҆ та́кѡ ѿверза́етъ ѹ҆ста̀ своя̀, и҆ ꙗ҆́коже въ бл҃года́ти ѹ҆жѐ сꙋ́щихъ поꙋча́етъ І҆а́кѡвъ А҆пⷭ҇лъ: да бꙋ́детъ вся́къ чл҃вѣ́къ ско́ръ ѹ҆слы́шати, и҆ ко́сенъ гл҃ати: во многогл҃аніи бо, ꙗ҆́коже и҆ в̾ піа́нствѣ ѕѣлѡ̀ трꙋ́днѡ не впа́сти в̾ бѣдꙋ̀, да и҆лѝ что̀ велича́во, и҆лѝ де́рзостно, и҆лѝ подзо́рно, и҆лѝ неятовѣ́рно и҆знесет я҆зы́къ не ѹ҆кроще́нный. [3] Сіѐ и҆́стое и҆ А҆мвро́сій Медіола́нскій ѹ҆твержда́я гл҃етъ: Вхо́дитъ сме́рть две́рми твои́ми: па́че же а҆́ще лжꙋ̀ гл҃еши, а҆́ще де́рзо что̀, а҆́ще безвре́менно. Ѹ҆кланя́ющеся ѹ҆́бѡ л. ѻ҃д многовреди́телнагѡ велерѣ́чія, наипа́че же ѿ негѡ̀ ражда́емыхъ бѣ́дъ храня́ще себѐ: всеполе́знагѡ потщи́мся навыка́ти со внима́ніемъ молча́нія. Ничто́ бо та́кѡ помоществꙋ́етъ ко[4] взыска́нію внꙋ́треннягѡ ми́ра, ꙗ҆́коже молча́ніе, и҆ по ́є҆ли́кꙋ мо́щнѡ, ѕѣлѡ̀ кра́ткая бесѣ́да ко и҆́нымъ, а҆ с̾ собо́ю непреста́нная. Си́це же и҆ мно́гія навы́кнемъ премⷣрости, и҆ въ ма́лѣ вре́мени, всесоверше́ннѡ позна́ем недоста́точество своѐ. ꙗ҆́же и҆справля́юще, въ мѣ́рꙋ пости́гнемъ добродѣ́телей соверше́нства. А҆́ще бо кто̀, по гл҃ꙋ[5] І҆а́кѡвлю, в̾ сло́вѣ не согрѣша́етъ, се́й соверше́нъ мꙋ́жъ, си́ленъ ѡ҆бꙋзда́ти и҆ всѐ тѣ́ло. что̀ ѹ҆твержда́я гл҃етъ ѻ҆́нъ: се́ бо и҆ кѡне́мъ ѹ҆зды̀ л. ѻ҃д ѡ҆б. влага́емъ, да повинꙋ́ются на́мъ. и҆ всѐ тѣ́ло и҆́хъ ѡ҆браща́емъ, сѐ и҆ кораблѝ вели́цы сꙋ́ще, и҆ ѿ жесто́кихъ вѣ́трѡвъ затача́еми, ѡ҆браща́ются ма́лымъ корми́лцемъ, а҆́може стремле́ніе пра́влящагѡ хо́щетъ.

Тѣ́мъ вся́къ храня́щійся да не согрѣши́тъ я҆зы́комъ: что́либо гл҃ати и҆мѣ́етъ, не пре́жде и҆ны́мъ, но себѣ̀ да гл҃етъ, и҆ са́мъ пе́рвѣе да вкꙋ́ситъ пло́дъ ѹ҆сте́нъ свои́хъ.