Ѡ҆ и҆́стинѣ

Не без̾ прили́чія, дре́вніи любомꙋ́дрцы, И҆́стинꙋ дще́рь вре́менем нарица́ютъ, сказꙋ́юще ѻ҆́нꙋ ѿ вре́мене ражда́емꙋю бы́ти: ви́димъ бо мно́жицею та́кѡ и҆́стинꙋ и҆стребле́ннꙋ, ꙗ҆́кѡ нижѐ слѣ́дꙋ ́є҆я̀ ꙗ҆вля́тися. и҆ а҆́кибы ѹ҆жѐ вно́вь ражда́емꙋ, вре́мени преше́дшꙋ таково́мꙋ, в̾ не́же и҆ нехотя́щи лжа̀ погиба́етъ, съ защи́тники свои́ми.

Но а҆́ще бы вся́къ храня́щій лжꙋ̀ проразсꙋди́лъ въ себѣ̀, что̀ по́льзы в̾ не́й; что́же во и҆́стинѣ ѡ҆бря́щетъ коры́сти, ́є҆́й вои́стиннꙋ, не то́кмѡ я҆зы́комъ, но нижѐ ѹ҆мо́мъ прикаса́лся бы лжѣ̀. Родства́ бо ли ́є҆я̀[1] и҆́щемъ! Ѻ҆те́цъ ́є҆я̀ діа́волъ ́є҆́сть. л. ѻ҃з ѡ҆б. а҆́ще дѣ́йствꙋ́ємая ́є҆́ю взы́щемъ, татьбы̀ сꙋ́ть. не́нависти, разбѡ́и, клев́єты̀, ѹ҆хищр́є́нія слове́съ, свидѣ́телства лѡ́жна, разлꙋче́ніе бра́тіи, и҆ ѡ҆мерзѣ́ніе дрꙋгѡ́въ. бо́льшая ѹ҆слы́шимъ: лжа̀ ́є҆́сть бл҃года́ти Бж҃ія прогна́ніе, дꙋшѝ ѹ҆мерщвле́ніе, и҆ кра́йняя лжꙋ̀ храня́щимъ поги́бель. погꙋ́биши (гл҃етъ ѱало́мникъ) вся̑ глаго́лю́щыя лжꙋ̀. А҆́ще же и҆ ѡ҆ си́хъ не ради́тъ кто̀, ни помышля́етъ, ꙗ҆́кѡ ѡ҆ всѣ́хъ си́хъ приведе́тъ ́є҆го̀ Бг҃ъ на сꙋ́дъ: да вѣ́сть ѻ҆ба́че, ко́ль ме́рзско ́є҆́сть тѣ́ло, въ не́мже дш҃ѝ нѣ́сть, то́ль ме́рзокъ ́є҆́сть, па́че же и҆ ме́рзостнѣйшій вся́къ глаго́ляй лжꙋ̀. Вся̑ же проти́вная семꙋ̀ во и҆́стинѣ л. ѻ҃и ѹ҆́зримъ. А҆́ще родства̀ ́є҆я̀ и҆́щемъ;[2] ѿ Бг҃а ́є҆́сть нача́ло ́є҆я̀, а҆ не ꙗ҆́коже ѿ вре́мене ́є҆́ллини сію̀ помышля́ютъ ражда́емꙋю бы́ти. Красоты́ ли ́є҆я̀ и҆́щемъ; свѣтла̀ ́є҆́сть вездѣ̀, и҆ ѿ землѝ возсія́ти не несво́йственно ́є҆́й. крѣ́пости ли, и҆ постоя́нія; не ѹ҆страша́ется ѻ҆на̀ посредѣ̀ вѡ́лнъ посредѣ̀ ѕвѣре́й безмяте́жна, воспѣва́етъ посредѣ̀ пе́щей разже́нныхъ. Цр҃іе и҆ Кня́зи повинꙋ́ются си́лѣ ́є҆я̀, и҆ вся̀ тва́рь и҆́стинѣ послꙋ́шна ́є҆́сть. И҆́стина красна̀ въ сло́вѣ, лѣ́па и҆ честна̀ въ дѣ́лѣ, пресла́вна въ творе́ніи свое́мъ. Да сокраще́ннѣ рече́мъ: И҆́стины ́є҆ди́на и҆ та́яжде вездѣ̀ си́ла, вездѣ̀ ́є҆ди́но лицѐ ́є҆́сть, неизмѣ́нна бо ́є҆́сть, безсме́ртна л. ѻ҃и ѡ҆б. и҆ вѣ́чна. Хотя́щіи ѹ҆́бѡ добродѣ́телное, сі́есть, хрⷭ҇тіа́нское начина́ти житіѐ, пре́жде всегѡ̀ да поꙋча́ютъ и҆́стинѣ ѹ҆ста̀ своя̀, да навы́кнꙋтъ и҆́стинꙋ гл҃ати. Си́це же и҆ твори́ти возмо́гꙋтъ: предхо́дитъ бо во вся́ческих дѣ́лꙋ сло́во. Ꙗ҆́коже и҆ Гдⷭ҇ь ѹ҆вѣщава́етъ ны̀, ре́къ: [3] гл҃ите и҆́стинꙋ ко́ждо и҆́скреннемꙋ своемꙋ̀. та́же прилага́етъ: и҆́стинꙋ и҆ сꙋ́дъ ми́ренъ сꙋди́те въ вратѣ́хъ свои́хъ. и҆ ко́ждо ѕло́бы и҆́скреннягѡ своегѡ̀ не помышля́йте въ срⷣца́хъ ва́шихъ. и҆ кля́твы и҆ лжѝ не люби́те: Занѐ вся̑ сія̀ возненави́дѣхъ. Что́ же творя́щихъ и҆́стинꙋ, и҆ храня́щихъ лжꙋ̀ ѡ҆жида́етъ, вне́млемъ:[4] бл҃же́ни (речѐ) творя́щіи л. ѻ҃ѳ за́пѡвѣди ́є҆гѡ̀, да бꙋ́детъ вла́сть и҆̀мъ на дре́во живо́тное, и҆ враты̀[5] вни́дꙋтъ во гра́дъ. Внѣ́ же псы̀, и҆ чародѣ́и, и҆ любодѣ́и, и҆ ѹ҆бі́йцы, и҆ і҆дѡлослꙋжи́тели, и҆ вся́къ любя́й и҆ творя́й лжꙋ̀.