Ѡ҆ примире́нномъ дрꙋ́гѣ.

И҆́же при́снѡ бꙋ́ря, нижѐ тишина̀ всегда̀, нижѐ дожде́ве неизсякнове́нніи, нижѐ ве́дро быва́етъ непреста́нное: си́це ви́димъ в̾ жите́йскихъ, мно́зи по враждѣ̀ въ дрꙋ́жбѣ, множа́йшіи по дрꙋ́жествѣ во враждѣ̀ пребыва́ютъ. А҆ ꙗ҆́коже по велича́йшей тишинѣ̀, страшнѣ́йшыя вѡ́лны: си́це по крѣпча́йшей дрꙋ́жбѣ, неꙋврачева́нныя быва́ютъ вражды̀. ѻ҆́собнѡ же слꙋча́емъ ́є҆́сть сіѐ таковым: и҆̀же не хо́щꙋтъ взаи́мнѣ себѐ проща́ти ѡ҆би́ды, но памятоѕло́бнѣ та̀ во ѹ҆мѣ̀ ѡ҆бнося́ще, вре́менем ко ѿмще́нію и҆́щꙋтъ, ꙗ҆́коже преⷣложе́нная ꙗ҆вля́етъ на́мъ при́тча. Пред̾ нѣ́коегѡ земледѣ́ля до́момъ л. рк҃ѕ ѡ҆б. в̾ горѣ̀ жили́ще и҆мꙋ́щій ѕмі́й вхожда́ше в̾ селе́ніе мꙋ́жа ѻ҆́нагѡ, но по слꙋча́йной же винѣ̀ сы́нъ земледѣ́леⷡ҇ ѹ҆да́ри ѕмі́я. Но се́й воз̾яре́нъ, сме́ртнѣ ѹ҆грызѐ ѻ҆́трока. ѻ҆ц҃ъ ме́ртва зря́щъ сы́на, и҆ болѣ́знію ѡ҆б̾я́тъ сꙋ́щи ѕѣлѡ̀: ско́рѡ бѣжа̀, ́є҆́же ѹ҆би́ти ѕмі́я, но ча́сть то́кмѡ нѣ́кꙋю ѡ҆́шиба ѹ҆сѣчѐ ́є҆мꙋ̀, а҆ ѕмі́й въ го́рꙋ скры́ся. Та́же хотя́щъ ле́стнѣ примири́тися со ѕмі́єм, па́че же вре́мене и҆ща̀ ко ѿмще́нію ѹ҆до́бнаго, взе́мъ во́дꙋ, мꙋкꙋ̀ со́ль, и҆ ѿ пче́лъ со́тъ: призыва́ет ѕмі́я к̾ пре́ждней дрꙋ́жбѣ. Се́й же и҆з̾ пеще́ры ѿвѣща̀, сви́щꙋⷳ. всꙋ́е трꙋди́щася до́брый мꙋ́жꙋ: дрꙋ́жество бо ѹ҆жѐ междꙋ̀ на́ми не бꙋ́детъ. зане́ ́є҆гда́ мя без̾ ѡ҆́шиба л. рк҃з ви́ждꙋ, а҆ ты̀ гро́бъ зри́ши сыно́вній, ми́рни ка́кѡ пребꙋ́демъ;

Та́кѡ ни дрꙋ́гꙋ ѿскочи́вшꙋ вѣ́ровати безбѣ́дно ́є҆́сть, па́че же а҆́ще и҆ зна́м́єнія ѡ҆брѣта́ются вражды̀, ꙗ҆́же тя́жесть серде́чнꙋю съ ненавидѣ́ніемъ ѹ҆множа́ютъ непреста́ннѡ. Бꙋ́демъ ѹ҆́бѡ мꙋ́дріи ꙗ҆́кѡ ѕмі́й ѻ҆́нъ, и҆ не ско́рѡ, но по мно́гомъ и҆звѣ́стіи ввѣря́емся ́є҆мꙋ̀. Вѣ́сть бо ны и҆ писа́ніе ѹ҆вѣщева́ти в̾ таковы́хъ: не и҆мѝ (речѐ) вѣ́ры врагꙋ̀[1] твоемꙋ̀ въ вѣ́къ, ꙗ҆́коже бо мѣ́дь ѡ҆ржавѣ́етъ, та́кѡ и҆ ѕло́ба ́є҆гѡ̀, и҆ а҆́ще смири́тся, то̀ по́йдетъ пони́кши. Ѡ҆ста́ви дꙋ́шꙋ свою̀, и҆ храни́ся ѿ негѡ̀, и҆ бꙋ́деши ́є҆мꙋ̀ ꙗ҆́кѡ ѡ҆чищенно зерца́ло, и҆ разꙋмѣ́еши ꙗ҆́кѡ л. рк҃з ѡ҆б. не доконца̀ ѡ҆ржавѣ́лъ. Не поста́ви ́є҆го̀ ѹ҆ себѐ, да не возри́нꙋвъ тя̀, ста́нетъ на мѣ́стѣ твое́мъ. Не посадѝ ́є҆го̀ ѡ҆деснꙋ́ю тебѐ, да не пои́щет когда̀ сѣда́лища твоегѡ̀, и҆ на послѣ́докъ разꙋмѣ́еши словеса̀ моя̀: и҆ ѡ҆ глаго́лѣ мое́мъ ѹ҆мили́шися. (и҆ па́ки) Ча́съ с̾ тобо́ю пребꙋ́дет, и҆ а҆́ще ѹ҆клони́шися, не сте́рпит, ѹ҆стна́ма свои́ма ѹ҆слади́тся вра́гъ, и҆ мно́го поше́пчет, и҆ рече́тъ: добро̀ ́є҆́сть, ѻ҆чи́ма свои́ма прослези́тся, и҆ срⷣцемъ свои́мъ совѣ́тꙋетъ ври́нꙋти тя̀ в̾ ро́въ. и҆ ́є҆гда̀ ѡ҆бря́щетъ вре́мя, ненасы́тится кро́ве. А҆́ще сря́щетъ тя̀ ѕло̀: тꙋ̀ ѡ҆бря́щеши ́є҆гѡ̀ пе́рвѣе, и҆ ꙗ҆́кѡ помога́я прирази́тъ пя́тꙋ твою̀. покива́етъ главо́ю свое́ю, и҆ воспле́щетъ л. рк҃и рꙋка́ма свои́ми, и҆ мно́гѡ поше́пчетъ, и҆ и҆змѣни́тъ лицѐ своѐ. Си́це ле́стных преда́телей таковы́хъ назна́менова дх҃ъ ст҃ы́й, ѿ ко́ихъ вся́къ и҆мѣ́яй ѹ҆́мъ да храни́тъ себѐ. Ниже́ бо[2] ѻ҆тра́вꙋ, ра́звѣ ме́домъ ѹ҆слажде́ннꙋ подава́ютъ: нижѐ ѕло́бою прелсти́тъ кто̀: ра́звѣ под̾ ѻ҆́бразомъ добродѣ́телнагѡ примире́нія.