Ѡ҆ піа́нствѣ.
Что̀ содѣ́ловаетъ въ человѣ́цѣхъ піа́нство: ка́кѡ ме́рзско, ко́ль вре́дно, и҆ коли́кихъ быва́етъ вино́вно поги́белей; Сѷмволи́ческій дре́вніи хотя́ще начерта́ти: ю҆́ношꙋ на де́лвѣ сѣдя́ща, в̾ рꙋцѣ̀ ́є҆ди́ной ча́шꙋ, въ дрꙋго́й же сте́бліе пе́рца, на главѣ̀ крылѣ̀ и҆мꙋ́щаго, ѹ҆вѣнча́нна ли́ствіемъ, и҆з̾ѡбрази́ша, хотя́ще си́мъ главнѣ́йшая піа́ницъ и҆з̾яви́ти прили́чества.
Вои́стиннꙋ бо крылѣ̀ на главѣ̀ свое́й мнит піа́ный и҆мѣ́ти. ́є҆гда̀ во ѹ҆мѣ̀ своем и҆ вели́къ, и҆ си́ленъ, и҆ стра́шенъ и҆ны́мъ, и҆ да́же до небе́съ высо́къ ꙗ҆вля́ется віном ѹ҆пое́нный, бога́тъ же и҆ и҆зоби́лен, а҆́ки ча́ша и҆спо́лненна. л. рл҃́є ѡ҆б. ѻ҆ба́че по подо́бію ли́твія то́щъ ѿпа́даетъ нога́ма порѣва́нъ сꙋ́щи. го́рекъ всѣ́мъ чꙋ́ждымъ и҆ домашнимъ, а҆́ки пе́рецъ и҆ же́лчъ. Что́ же и҆ де́лвою зна́менателствовати непщева́хꙋ: Се́неки дре́внягѡ Філософа вне́млем словесе́мъ: Ꙗ҆́коже (речѐ) віно́мъ де́лвы напо́лненныя разсѣда́ются, и҆ погиба́ютъ, а҆ что̀ на сподꙋ̀ лежа́ше внꙋ́трь: сіѐ на ве́рхъ теплота̀ ѹ҆мно́жшися, подно́ситъ. та́кѡ напо́лненъ (віно́мъ, и҆лѝ ко́имъ ли бо) ѹ҆пая́ющимъ питіе́мъ, вся̀ внꙋ́трь сокрове́нная, вся̀ та́йная и҆зно́сит на ꙗ҆́во. ꙗ҆́коже бо ѡ҆тягоще́нніи мнѡ́гим питіе́мъ в̾ стома́хꙋ пи́щы, си́це в̾ срⷣцѣ свое́мъ та́йны ѿню́дъ ѹ҆держа́ти не мо́гꙋтъ. л. рл҃ѕ Въ пра́вдꙋ (то́йже гл҃етъ:) вся́кія несоверше́нства на́ша піа́нствомъ ѿкрыва́ются, до и҆збы́тка срⷣцꙋ согрѣ́яннꙋ сꙋ́щꙋ; все́ бо что́ ли бо кры́яшеся ѕло́е, на ве́рхъ и҆зно́сится тогда̀. и҆ а҆́кибы піа́нство но́выхъ не твори́тъ безчи́ній, но ста́рыхъ ѹ҆потребля́етъ. Тогда̀ безстꙋ́дный хва́лится въ безстꙋ́діи свое́мъ, тогда̀ продерзи́вый свобо́дъ и҆ я҆зы́комъ и҆ рꙋка́ми ꙗ҆вля́ется. Расте́тъ в̾ возносли́выхъ го́рдость, ѕло́ба в̾ зави́стныхъ, в̾ жесто́кихъ лю́тость: да сокраще́ннѣ рече́мъ: всѐ ѕло̀, вся́кое безчи́ніе. а҆́ки дро́ждіе нѣ́кое и҆зно́сится ѿ спꙋ́дꙋ, та́кѡ свои́хъ рачи́телей ѹ҆краша́етъ піа́нство. л. рл҃ѕ ѡ҆б.
А҆́ще же вся̑ сія̀ кто̀ ѹ҆́зритъ въ ю҆́номъ чл҃вѣ́цѣ, ни лѝ а҆́ки пса̀ смердя́ща, и҆лѝ ме́рзскаго бѣ́са возгнꙋша́ется ́є҆гѡ̀; ́є҆́й вои́стиннꙋ: ра́дъ бы бы́лъ ѻ҆ц҃ъ такова́гѡ сы́на, ́є҆гда̀ бы ви́дѣлъ де́нь то́й, в̾ ѻ҆́ньже такова́гѡ краси́теля гро́бꙋ пре́далъ. А҆́ще бо ѻ҆ц҃ꙋ̀ стꙋ́дъ ́є҆́сть сы́нъ ненака́занъ, то̀ что̀ ѹ҆жѐ рече́мъ, ́є҆гда̀ піа́ница ́є҆́сть; ѹ҆же́ бо таковы́й и҆ ѹ҆че́нія, и҆ вся́кія добродѣ́тели пꙋ́стъ ́є҆́сть: ꙗ҆́кѡ вседне́вныя прикла́ды и҆з̾ꙋча́ютъ на́съ: ви́димъ бо мно́гихъ, и҆̀же піа́нствꙋ содрꙋжи́шася, ꙗ҆́кѡ и҆ безче́стны и҆ безли́чны, и҆ скве́рни, и҆ ме́рзски, и҆ никомꙋ́же поле́зны сꙋ́ть.
Тогѡ̀ ра́ди вся́къ хотя́й че́стнѡ, л. рл҃з па́че же бл҃гоче́стнѡ жи́телствовати, всѣ́хъ си́хъ хотя́й и҆збѣ́гнꙋти бѣ́дствій, а҆́ки смертоно́сна гꙋби́телства, до́лженъ ́є҆́сть бѣ́гати піа́нства. И҆зря́днѣе же ю҆́ныи, и҆́мже кромѣ̀ всѣ́хъ си́хъ и҆счи́сленных безобра́зій, и҆ поро́кѡⷡ҇, піа́нство (ꙗ҆́коже Пля́то філосо́фъ в̾ Тіме́е гл҃етъ) мно́жицею бѣснова́нію вино́вно быва́етъ.