Ѡ҆ воздержа́ніи

Та́я кромѣ̀ и҆ны́хъ всеизря́днѣйшая чистотѣ̀ дѣ́вственной похвала̀ ́є҆́сть, ꙗ҆́кѡ се́ю А҆́гг҃лѡвъ приꙋподобля́ется чл҃къ. Занѐ соблюда́ти чⷭ҇тотꙋ̀ дѣ́вственнꙋю ничто́же и҆но́е ́є҆́сть, то́кмѡ А҆́гг҃лское по ́є҆ли́кꙋ мо́щнѡ, житіѐ на землѝ л. рл҃з ѡ҆б. и҆мѣ́ти ѻ҆ба́че, коли́кѡ добродѣ́тель сія̀ краснѣ́йша па́че и҆ны́хъ, и҆ бл҃гоѡбра́знѣйша, толи́кѡ бо́лшими и҆скꙋше́ніи бори́ма быва́етъ ꙗ҆́коже кри́нъ посредѣ̀ те́рнія сꙋ́щи. И҆ вои́стиннꙋ кри́нъ ́є҆́сть нѣ́кій чистота̀ ѻ҆́на, ꙗ҆́же кромѣ̀ бѣ́лости своея̀, и҆зря́днѣйшее гдⷭ҇ви прино́сит бл҃гоꙋха́ніе. Но Ѽ ко́ль мно́гихъ и҆скꙋше́ній те́рніемъ ѡ҆блага́ется! мно́жицею и҆ в̾ недоꙋмѣ́ніе приходи́ти нꙋ́жно ́є҆́сть! да не ка́кѡ те́рніемъ сицевы́мъ подавле́нъ, бѣ́лость кꙋ́пнѡ, и҆ бл҃гоꙋха́ніе погꙋби́тъ. Не бо̀ спи́тъ дре́вній ѻ҆́нъ непови́нности разори́тель и҆ кра́йніи вра́гъ діа́волъ, и҆́же вся̀ стезѝ назира́етъ, да ѿ созда́телевы любвѐ къ созда́нію, л. рл҃и чи́стагѡ житія̀ къ ме́рзостемъ сластолю́бія привлече́тъ чл҃ка, и҆ да в̾ се́мъ хи́тромъ ѹ҆мышле́ніи свое́мъ ѹ҆до́бнѣйшій возмо́жетъ ѹ҆спѣ́хъ и҆мѣ́ти діа́волъ: влага́етъ в̾ срⷣца̀ на́ша и҆зли́шнее бра́шенъ ѹ҆потребле́ніе, да та́кѡ на вся̀ любохотѣ́нія всеꙋдо́бныя сотвори́тъ тѣлеса̀ на́ша. но Ѽле нерадѣ́нія на́шегѡ! и҆лѝ не вѣ́мы, ꙗ҆́кѡ невоздержа́ніе[1] и҆з̾ рая̀ црⷭ҇твꙋющаго и҆згна̀. Воздержа́ніе же в̾ ра́й призва̀ блꙋдя́щаго. ́є҆́й вѣ́мы, ꙗ҆́кѡ нача́ло живота̀ чл҃ческагѡ хлѣ́бъ и҆ вода̀, нн҃ѣ же что̀ ли бо ѿ ры́бъ пла́ваетъ, что́ ли бо ѿ пти́цъ лѣта́ет, что́ ли бо ѿ ѕвѣре́й скита́ется в̾ пꙋсты́ни, вся̑ сія̀ погреба́ются в̾ чре́вѣхъ на́ших: ꙗ҆́коже гл҃етъ л. рл҃и ѡ҆б. медото́чный ѹ҆ч҃тль. та́кѡ мы̀ ѹ҆гнѣта́емъ бл҃голѣ́пный кри́нъ то́й, та́кѡ в̾ бѣ́дствіе приво́димъ, А҆́гг҃лѡм превозлю́бленнꙋю чистотꙋ̀ дѣ́вственнꙋю. Вся́къ ѹ҆́бѡ хотя́й сицевы́я бѣды̀ свободи́тися, до́лженъ пе́рвѣе бѣ́гати пра́здности, та́же ѹ҆кланя́тися и҆зли́шнягѡ ѹ҆потребле́нія бра́шенъ, к̾ томꙋ̀ посто́мъ, бдѣ́ніем, мл҃твою, и҆ про́чіими ѹ҆мерщвле́ніи смиря́ти тѣ́ло. Ма́ла сла́сть привне́сшися, и҆ногда́ же и҆ са́мое де́рзостное воззрѣ́ніе ве́сь трꙋ́дъ погꙋбля́етъ, и҆ твори́тъ дꙋ́шꙋ тщꙋ̀ сицевыя красоты̀ невозвраще́нныя. что́же бꙋ́детъ, ́є҆гда̀ и҆ са́мымъ любосла́стіемъ побѣди́тъ діа́волъ храни́теля ́є҆я̀. Кратка̀ ́є҆́сть сла́сть л. рл҃ѳ ѻ҆на̀, но никогда́ же ѹ҆слажда́емꙋю го́ресть принесе́тъ. Принесе́тъ ю҆́ности поро́къ с̾ ѹ҆кори́зною: ѹ҆мале́ніе че́сти, па́че же и҆ са́мое безче́стіе. И҆мѣ́нію и҆стоща́ніе, собла́знъ ближнимъ с̾ ско́рбію, сво́йственнымъ печа́ль, ра́дость врагѡ́мъ, и҆ поноше́ніе дрꙋгѡ́мъ тѣлесѝ и҆ всѣ́мъ ѹ҆десем разслабле́ніе, помраче́ніе лица̀, лани́тъ ѹ҆вяде́ніе, измѣне́ніе гла́са, и҆ власѡⷡ҇ ѹ҆мерщвле́ніе: и҆ногда́же и҆ са́мыя жизни конеⷰ ѕо́лъ, а҆ над̾ всѐ блгⷣти. Бж҃іей лише́ніе, и҆ дш҃ѝ поги́бель. Сих ѹ҆́бѡ всѣ́хъ хотя́й избѣ́гнꙋти, чи́стъ да бꙋ́детъ ѹ҆мом, чи́стъ срⷣцемъ и҆ всецѣ́лым тѣ́лом. А҆́ще та́кѡ пребꙋ́детъ,[2] ѹ҆́зрит Бг҃а, и҆ причте́нъ бꙋ́детъ си́мъ, и҆̀же съ жена́ми не ѡ҆скверни́шася, л. рл҃ѳ ѡ҆б. и҆ дѣ́вственницы сꙋ́ть, и҆ послѣ́дꙋютъ А҆́гнцꙋ, а҆́може и҆́детъ ѻ҆́нъ.