Ѡ҆ ѹ҆вѣ́тахъ дво́рскимъ.

Ничто́же таково̀ ѡ҆брѣстѝ кто̀ возмо́жетъ поле́зное, ́є҆́же и҆ на вреди́телное ѡ҆брати́ти ѕлохꙋдо́жный не возмо́жетъ. и҆ вопрекѝ гл҃юще: ничто́же то́ль вре́дно и҆ смертоно́сно въ ѕвѣ́рехъ, глаго́лю, и҆ ры́бахъ, во пти́цахъ, га́дѣхъ, ѕмі́ихъ, въ древесѣ́хъ, ѕе́ліахъ, ко́ренехъ и҆ цвѣ́тѣхъ, ́є҆́же на поле́зное не возмо́жет ѡ҆брати́ти ѹ҆́мъ не ѕлохꙋдожный. Ра́внѣ ѡ҆ дво́рѣхъ, и҆ сожи́телствѣ и҆́хъ, глаго́лати бы подоба́ло, ꙗ҆́кѡ ни ́є҆ди́нъ то́ль свобо́дь ѿ ѕлы́хъ, въ не́мже кто̀ па́гꙋбы и҆ прилѣ́жнѡ и҆скі́й не ѡ҆бря́щетъ себѣ̀. и҆ нижѐ та́кѡ и҆зѡби́ленъ безчи́ній ѡ҆бря́щется гдѣ̀, и҆дѣ́же бл҃гъ сꙋ́щь по́лзы не ѡ҆бря́щет. л. рп҃в ѡ҆б. На ѻ҆боя̀ сія̀ мно́зи ѹ҆стреми́вшеся, ѻ҆́во похваля́юще, ѻ҆́во ѹ҆каря́юще довѡ́лная словеса̀ соста́виша. Вѣ́дати ѻ҆ба́че до́лженствꙋет вся́къ ꙗ҆́кѡ а҆́ще воззри́тъ кто̀ на ѹ҆бі̑йства и҆ похꙋ́литъ ѻ҆рꙋ́жія, па́че же и҆ са́мыя рꙋ́цѣ, ꙗ҆́кѡ тѣ́ми сотвори́ся ѹ҆бі́йство, не пра́вѡ сꙋди́лъ ́є҆́сть, нижѐ ꙗ҆́кѡ сожига́ются хра́мы, гра́ды, и҆ человѣ́цы, хꙋли́теленъ ѻ҆́гнь ́є҆́сть, нижѐ віно̀ ви́нно, но про́клято піа́нство, нижѐ похꙋжда́яй дво́ръ,[1] пра́вѡ сꙋди́ти ѹ҆мѣ́етъ. Гл҃яй ѹ҆́бѡ ꙗ҆́кѡ вся̑ та́мѡ подо́бна сꙋ́ть торжи́щꙋ личи́нъ на коме́діахъ ѹ҆потребля́емыхъ, зна́менꙋя си́ми, ничто́же и҆́стинно и҆лѝ непокрове́нно: но вся̑ под̾ притво́рнымъ ѻ҆́бразомъ л. рп҃г ѡ҆брѣта́тися во дво́рѣхъ: не на дво́ръ и҆ сожи́телство, но на ле́сть и҆ ѕлохи́трство да ѿврати́тъ хꙋ́лный глаго́лъ сво́й, а҆́ще бо и҆ ѡ҆бря́щется во мно́жествѣ таковы́й, и҆́же дрꙋ́гъ в̾ сожи́тіи, а҆ в̾ срⷣцы вра́гъ: сла́докъ въ словесѝ, а҆ въ дѣ́лѣ стро́потенъ: ве́селъ въ бл҃ги́хъ дрꙋ́жескихъ, въ бѣда́хъ нижѐ бли́зъ ́є҆́сть: напы́щенъ во ѡ҆бѣща́ніи, в̾ воздая́ніи ло́жъ. Да сокраще́ннѣ рекꙋ̀, вездѣ̀ ѻ҆́во дрꙋголю́бія, ѻ҆́во соболѣ́знованія, ѻ҆́во ра́дости и҆ весе́лія ѻ҆́бразом покрыва́етъ ле́сть: но не можа́ше ли се́й вся̑ со и҆́стиною и҆ пра́веднѣ соверша́ти дѣла̀ своя̀; не можа́ше ли себѐ преⷣ Бг҃омъ и҆ человѣ́ки соблюстѝ непоро́чна; Смѣ́ха дово́лнагѡ, и҆лѝ л. рп҃г ѡ҆б. па́че мно́гих сле́зъ досто́йный нѣ́цыи подава́ютъ ѿвѣ́тъ, глаго́люще: ꙗ҆́кѡ пребыва́ющымъ во и҆зѡби́ліи и҆ простра́нствѣ не возмо́жно ́є҆́сть добродѣ́телей мѣ́рꙋ сохрани́ти. Да бꙋ́детъ како́въ ра́венъ дво́ръ Навꙋходонѡ́соровꙋ, въ не́мже ѻ҆́ніи тріѐ ѻ҆́троцы воспи́тани бя́хꙋ, ѻ҆ба́че вре́дъ ли нра́вѡмъ, и҆лѝ добродѣ́тел́ємъ спо́нꙋ сотворѝ, ника́коже. но и҆ свѣ́тлыхъ сотворѝ, и҆ въ ди́вныхъ добродѣ́телехъ просла́вилъ ́є҆́сть. Свѣ́тлый ѹ҆̀бо црⷭ҇кій дво́ръ ѻ҆́нъ бы́сть, ѻ҆́баче ви́дъ то́кмѡ и҆ позо́ръ свѣ́тлости и҆мѣ́яше, ве́щію же блꙋди́лище, и҆ верте́пъ вся́кія ме́рзости ничи́мже ра́знствꙋяй. ѻ҆́троцы, дѣ́ти л. рп҃д бя́хꙋ лѣ́ты мла́ди ѕѣлѡ̀ и҆ въ простра́нствѣ, (ѿ црⷭ҇кагѡ бо пле́мене бя́хꙋ:) воспи́тани, къ лѣ́тѡмъ [2] несоверше́ннымъ привнидо́ша и҆ бѣды̀ тяжча́йшыя, плѣне́ніе, до́мꙋ и҆ ѻ҆ч҃ества лише́ніе понесо́ша, ва́рварѡм въ рꙋ́цѣ пре́дани бы́ша, ѕвѣ́р́ємъ па́че не́жели чл҃кѡмъ, въ далеча́йшꙋю и҆ грꙋ́бꙋю ѿведе́ни странꙋ̀, не и҆мѣ́яхꙋ ѻ҆́браза, ни при́клада къ до́бромꙋ, ́є҆ще́ же и҆ цр҃ь повелѣ̀ вся́кое дово́лствіе, и҆ ѿ трапе́зы своѐ вкꙋше́ніе; подая́ти. но ко́е вкꙋше́ніе сіѐ; ́є҆́же и҆̀мъ зако́нъ вкꙋси́ти запрети́лъ ́є҆́сть.

Бѣ́днымъ же си́мъ и҆ безпомѡ́щным а҆́гнцемъ посредѣ̀ волкѡ́въ сꙋ́щымъ, ѿсю́дꙋ настоя́ше нꙋ́жда, и҆лѝ л. рп҃д ѡ҆б. и҆ста́явше гла́домъ ѹ҆мре́ти, и҆лѝ вкꙋси́ти ѿ завѣща́нныхъ бра́шенъ: вся́кимъ ѻ҆́баче потща́шася ѻ҆́бразомъ, си́цевыхъ и҆збѣ́гнꙋти бѣ́дъ. и҆ Бг҃ъ ви́дя толи́кое и҆́хъ попече́ніе, спосо́бствова, ́є҆́же не ѡ҆скверни́тися и҆̀мъ. да не рече́тъ кто̀, ꙗ҆́кѡ сама́гѡ Бг҃а сіѐ пресла́вное дѣ́ло бы́сть, но нача́ло произы́де ѿ серде́цъ и҆́хъ: бл҃гоизволя́хꙋ бо па́че ѹ҆мре́ти, не́жели преѡби́дѣти зако́нъ бж҃ій, толи́кимъ ѹ҆̀бо по́двигом свои́мъ ѡ҆брѣто́ша преⷣ Гдⷭ҇емъ млⷭ҇ть, ꙗ҆́кѡ и҆ по жела́нію срⷣцъ и҆́хъ да́лъ ́є҆́сть и҆̀мъ. Ви́диши ли: ꙗ҆́кѡ не дво́ръ то́кмѡ, но и҆ плѣне́ніе, и҆ мла́дость, и҆ сиротство̀, (сꙋ́ть бо нѣ́цыи, и҆̀же въ бѣда́хъ сꙋ́ще, л. рп҃́є го́рѣе ѡ҆ добродѣ́телехъ неради́ви сꙋ́ть,) и҆, ꙗ҆́кѡ посредѣ̀ ва́рваръ бя́хꙋ, и҆ тѣснота̀ ѿвсю́дꙋ, и҆ гла́дъ ко престꙋпле́нію за́повѣдей Гдⷭ҇нихъ, к̾ ѕлонра́вію, и҆ безчи́нномꙋ жи́телствꙋ привестѝ можа́хꙋ, и҆ преклони́ти. но поне́же са́ми себѐ соблюда́хꙋ ѻ҆па́снѡ, цѣ́лы пребы́ша а҆́ки го́лꙋби, и҆ непоро́чни.

Разꙋ́мнѣе нѣ́кто, рыд́ая своегѡ̀ растлѣ́нія, не дво́ръ, но себѐ ѡ҆гл҃го́лꙋетъ си́це:[3] во дво́ръ (речѐ) внидо́хъ неѕло́бивъ сы́й, со ѕло́бою и҆зыдо́хъ ѿтꙋ́дꙋ. внидо́хъ смире́нъ, и҆ и҆́стиненъ, и҆зыдо́хъ ло́жъ съ го́рдостію. и҆ нижѐ смири́ти себѐ могꙋ̀. Тре́звенъ и҆ возде́ржникъ внидо́хъ, а҆ и҆зы́дохъ ѿтꙋ́дꙋ ѡ҆бжи́рецъ л. рп҃́є ѡ҆б. піа́ница, и҆ всемꙋ̀ ѕлꙋ̀ свѣ́домый. Внидо́хъ бл҃гопривѣ́тенъ ко всѣ́мъ, но и҆зыдо́хъ тако́въ, с̾ каковым нижѐ бесѣ́довати кто̀ возмо́же. сло́вомъ ́є҆ди́нымъ, ве́сь весма̀ растли́хся. Но ни на кого́же винꙋ̀ возлага́ю, ѕло́бы бо са́ми навыка́емъ всѝ. Внемлѝ, что̀ гл҃етъ: ѕло́бы речѐ навыка́емъ са́ми, а҆ не дво́ръ поꙋча́етъ кого̀. Є҆ще́ же и҆ мꙋ́читъ ѕлы́хъ и҆ и҆зверга́етъ, ка́зни тѣ́мъ, и҆ ꙗ҆́звы, мно́жицею и҆ сме́рти, бл҃ги̑мъ же и҆ добродѣ́т́єлнымъ подава́етъ хвале́ніе, мздꙋ̀, и҆ на че́сти возведе́ніе хода́тайствꙋетъ дво́ръ. Тѣ́мже, да входя́щій в̾ госпо́дскія и҆ знамени́тыя дворы̀, ѹ҆́мъ, и҆ бл҃гі́я нра́вы не и҆змѣ́нятъ на го́ршее, л. рп҃ѕ но па́че на лꙋ́чшее возмо́гꙋтъ бл҃гоꙋстро́ти, сія̀ да па́мятствꙋют при́снѡ: а҃: Что́ ли бо ско́рѡ да́рствꙋет бл҃гі́й. слꙋ́чай, сіѐ да бꙋ́детъ тебѣ̀ подозри́телно и҆ не безпеча́лно: в̾ неча́янномъ бо смѣхꙋ̀ наде́жда ́є҆́сть пла́ча, и҆ ма́ло сꙋ́ть вѣ̑чнꙋющая, ско́ро ꙗ҆вля́́ємая. И҆́хже ско́рѡ ꙗ҆вля́ется вели́чество, немноголѣ́тно ́є҆́сть, многолѣ́тно же, а҆́ще по ма́лꙋ и҆ а҆́кибы по степе́немъ восхо́дитъ, тѣ́мже ни ́є҆ди́номꙋ та́кѡ не вѣ́рꙋй бл҃гопоспѣ́шествꙋ, ꙗ҆́кѡ ско́ромꙋ и҆ неча́янномꙋ.

в҃: Любо́вь и҆ ми́лость госпо́дій, же́стокъ ́є҆́сть ко́нь и҆ неꙋкроти́мъ, на не́мже не безбѣ́дное ѣ҆жде́ніе быва́етъ, ра́звѣ ѹ҆здо́ю кро́тости твоея̀ ѡ҆брати́ши ́є҆го̀. Тѣ́мже и҆ сего̀, и҆̀же ́є҆́сть л. рп҃ѕ ѡ҆б. бли́зъ ѹ҆́ха господи́на твоегѡ̀, зна́й и҆ люби́ти, и҆ боя́тися, и҆ почита́ти.

г҃: Лꙋка́ваго чл҃ка, сла́дцѣ глаго́лющаго, и҆ вознося́щаго тя, а҆́ки ѕмі́я блюди́ся: сла́дкое бо сло́во и҆мѣ́етъ сво́й ꙗ҆́дъ.

д҃: Є҆ли́кѡ ѿ господи́на возлю́бленъ ́є҆сѝ, толи́кѡ и҆ ѿ и҆ны́хъ притяжѝ любвѐ. Нижѐ да забве́но ти бꙋ́детъ сіѐ, ꙗ҆́кѡ ра́вны сꙋ́ть всѝ пред̾ Гдⷭ҇емъ прекланя́ющимъ срⷣца̀ госпо́дій, а҆́може хо́щетъ ѻ҆́нъ. Но ́є҆гда̀ а҆́ще ви́диши кого̀ смиря́ющася пред̾ тобо́ю че́сти ра́ди твоея̀, и҆ покланя́ющася къ нога́мъ твои́мъ: па́мятствꙋй, что̀ возглаго́ла А҆́гг҃лъ свѣтови́дный къ тайнови́дцꙋ [4] І҆ѡа́ннꙋ, въ А҆пока́лѷѱи, па́дшемꙋ л. рп҃з къ нога́мъ ́є҆гѡ̀. Ви́ждь, (речѐ) ни клевре́тъ ти ́є҆́смь, и҆ бра́тіи твоея̀ и҆мꙋ́щихъ свидѣ́телство І҆и҃сово. Бг҃ꙋ поклони́ся, сія̀ и҆ си̑мъ подѡ́бная ѿвѣщава́й кланя́ющымся тебѣ̀.

́є҃: А҆́ще в̾ сла́сть пріи́меши поклоне́ніе и҆́ных, вѣ́ждь ꙗ҆́кѡ сіѐ ́є҆́сть зна́меніе го́рдостнагѡ сѣ́мене, а҆́ще же и҆ покланя́ющихся презира́еши безѿвѣ́тнѣ, ѹ҆жѐ го́рдъ, го́рдъ ́є҆сѝ, и҆ всѣ́хъ пꙋ́стъ добродѣ́телей, тѣ́мже и҆ поги́бель бли́зъ ́є҆́сть. Ѿ го́рдости бо[5] ражда́ется презрѣ́ніе ни́щихъ и҆ ѹ҆бо́гихъ, расте́тъ вожделѣ́ніе и҆мѣ̑ній, раче́ніе нача́лства, жела́ніе сла́вы. Проти́вѡ доса́дѣ ѿмсти́теленъ ́є҆́сть таковы́й, разгордѣ́выйбося, нижѐ ѿ бо́лшихъ, а҆ не то́кмѡ л. рп҃з ѡ҆б. ѿ ме́нших терпи́тъ пріима́ти доса́дꙋ, не пріе́мляй же доса́ды, нижѐ ѕлострада́ти, нижѐ повинова́тися бл҃гоизво́лнѣ хо́щет, но вездѣ̀ а҆́ки ве́прь смꙋща́етъ всѣ́хъ, тѣ́мже и҆ во́нъ и҆зго́нится. Зрѝ, ка́кѡ ́є҆́сть нача́ло низпаде́нія го́рдости, ка́кѡ же нача́ло го́рдости презрѣ́ніе бли́жнягѡ, презрѣ́ніе же бли́жнягѡ ́є҆́сть забве́ніе. Бг҃а заповѣда́вшагѡ люби́ти бли́жняго ꙗ҆́кѡ себѐ. Но и҆ самомꙋ̀ возгордѣ́вшемꙋся коли́кꙋ прино́ситъ тщетꙋ̀ го́рдость: слы́шимъ Златоꙋ́стагѡ сло́во:[6] Ни ́є҆ди́но же (речѐ) ѕло̀ го́рдости ра́вно ́є҆́сть: бѣ́са чл҃ка содѣ́ловаетъ, досади́теля, хꙋ́лника, не пра́веднѡ кленꙋ́щася, сме́рти твори́тъ и҆ ѹ҆бі́йствъ жела́ти.[7] Го́рдый л. рп҃и прⷭ҇нѡ с̾ печа́лми живе́тъ. прⷭ҇нѡ негодꙋ́етъ, прⷭ҇нѡ тꙋ́житъ, ничто́же сицево̀ ́є҆́сть, ́є҆́же стра́сть ́є҆гѡ̀ насы́тити мо́жетъ. А҆́ще и҆ цр҃я̀ ви́дитъ кланя́ющася, почита́юща, не насы́тится, но па́че воспали́тся, ꙗ҆́коже бо сребролю́бцы, ́є҆ли́кѡ а҆́ще пріи́мꙋтъ, толи́кѡ вя́щшихъ тре́бꙋютъ, си́це и҆ разгордѣ́вшіися, ́є҆ли́кія а҆́ще насладя́тся че́сти, толи́кѡ мно́жайшія жела́ютъ, расте́тъ бо в̾ ни́хъ стра́сть, стра́сть бо ́є҆́сть. Стра́сть же ѹ҆ста́ва не зна́етъ, но тогда̀ ста́нетъ, ́є҆гда̀ ѹ҆біе́тъ и҆мꙋ́щаго ю҆̀.

ѕ҃: Вся́кая стра́сть цѣлбꙋ̀ и҆ врачевство̀ и҆́мать, тѣ́мже и҆ го́рдость а҆́ще и҆ лю́то ́є҆́сть возгорѣ́ніе дш҃ѝ, ѻ҆ба́че ́є҆гда̀ восхо́щем мо́жемъ ю҆̀ погаси́ти. л. рп҃и ѡ҆б. Ка́кѡ же бꙋ́дет сіѐ; Помы́сли мно́го лꙋ́чшихъ тебѐ, помы́сли ́є҆ли̑кія до́лженъ ́є҆сѝ Бг҃ꙋ вины̀. Помы́сли гее́ннꙋ, а҆́ще помы́слиши сія̀, ско́рѡ спря́чеши мы́сль, ско́рѡ преклони́ши ю҆̀. А҆́ще же и҆ сія̀ не сокрꙋша́тъ тя̀, помы́сли настоя́щая, са́мое чл҃ческое ́є҆стество̀, ка́кѡ ничто́же ́є҆́сть чл҃къ, гно́й, ме́рзость, смра́дъ, че́рвіе, пе́пелъ. помы́сли ѡ҆ веще́хъ, и҆ ꙗ҆̀же и҆́маши, и҆ и҆̀хже надѣ́ешися ѹ҆жѐ пости́гнꙋти: Зрѝ ка́кѡ ничи́мже тѣ́ми и҆ со́нія ра́знствꙋютъ, вся̑ бо а҆́ки ды́мъ и҆счеза́ютъ, и҆ са́мая че́сть, ю҆́же а҆́ки ри́зꙋ но́сиши ны́нѣ, ѹ҆́трѡ ѡ҆блече́шися въ срамотꙋ̀, и҆ стꙋ́дъ покры́етъ лицѐ твоѐ: помы́сли, ко́ль мно́зи бы́ша лꙋ́чшіи па́че тебѐ, л. рп҃ѳ и҆ бо́лѣе можа́хꙋ, па́че не́жели ты мо́жеши ны́нѣ. и҆ сѐ нижѐ па́мять и҆́хъ ѡ҆ста̀.[8] Мно́зи мꙋчи́тели сѣдо́ша на землѝ, незна́емый же ѹ҆вязе́ся вѣнце́мъ. Сія́ ли не на вся́къ де́нь быва́ютъ; не колесꙋ́ ли нѣ́коемꙋ подо́бни ́є҆смы̀;

з҃: А҆́ще и҆ вели́къ бꙋ́детъ кто̀ во дворѣ̀, да не превозно́сится са́мъ над̾ дрꙋ́ги свои́ми, ́є҆́же сво́йственно ́є҆́сть гордели́вымъ, (и҆ ꙗ҆́кѡ гл҃ютъ:) на превозноше́ніе помазꙋ́ет горды́ня. нижѐ каковꙋ́ ли бо ме́сть, а҆ наипа́че ѡ҆би́дꙋ да творит и҆̀мъ. Ны́нѣ бо ты̀ вели́къ ́є҆сѝ, а҆ ѹ҆́трѡ ѻ҆́нъ, да ѹ҆страши́тъ же ́є҆щѐ таковы́хъ и҆ А҆ма́нова поги́бель, и҆́же сла́венъ и҆ вели́къ во дворѣ̀ А҆ртаѯе́рѯа царя̀ Персі́дскагѡ л. рп҃ѳ ѡ҆б. сꙋ́ща, (вмѣ́стѡ бо ѻ҆ц҃а̀ почита́ше ́є҆го̀ цр҃ь) хвали́мый же и҆ почита́емый ѿ всѣ́хъ ѕѣлѡ̀, вѣ́дяше Мардохе́а не ѕѣлѡ̀ почита́юща ́є҆го̀, и҆ногда́ же нижѐ кланя́ющася нижѐ востаю́ща нижѐ подви́гшася въ по́честь ́є҆мꙋ̀: возгнѣще́нъ же ѿ го́рдости, поста́ви дре́во, ́є҆́же бы повѣ́сити на не́мъ презира́теля своего̀. Что́ же по се́мъ; Гдⷭ҇ь и҆змѣнѝ лю́тое ѹ҆мышле́ніе сіѐ ѻ҆́бразомъ неча́яннымъ и҆ ди́внымъ: вмѣ́стѡ сме́рти поно́сныя, сла́вою поче́лъ ́є҆го̀, по повелѣ́нію бо цр҃е́вꙋ, ѡ҆блечѐ ́є҆го̀ во ѻ҆де́ждꙋ црⷭ҇кꙋю, и҆ возведѐ на коня̀ цр҃е́ва, ѣ҆́здити ́є҆мꙋ̀ по ꙋ҆́лицамъ гра́да, ́є҆ще́ же и҆ са́мъ А҆ма́нъ проповѣ́даше преⷣ ни́мъ, гл҃я: си́це бꙋ́детъ вся́комꙋ чл҃кꙋ, ́є҆го́же л. р҃ч хо́щетъ цр҃ь просла́вити. но не сѐ ве́рхъ че́сти и҆ прославле́нія Мардохе́ева, нижѐ коне́цъ А҆ма́нова ѹ҆ничиже́нія, гордя́шеся, и҆ презира́ше ра́внѣ слꙋжа́щихъ томꙋ́же цр҃е́ви. каковы́й же; Слы́шимъ: на дре́вѣ ́є҆́же ѹ҆гото́ва Мардохе́а ра́ди, повѣ́шенъ бы́сть А҆ма́нъ, а҆ Мардохе́й и҆ че́сти, и҆ и҆мѣ̑ній ́є҆гѡ̀, по повелѣ́нію цр҃е́вꙋ бы́сть наслѣ́дникъ. та́кѡ вѣ́сть Гдⷭ҇ь смиря́ти гордели́выхъ, вмѣ́стѡ же и҆́хъ посажда́ти смире́нныхъ.

и҃: Дрꙋ́ж́єская, и҆ чія́ ли бо поползнов́є́нія, а҆́ще са́мъ на́єди́нѣ и҆спра́вити любо́внѣ не возмо́жеши, потаева́й, скры́й, и҆ ѹ҆молчѝ, в̾ ню́же бо[9] мѣ́рꙋ мѣ́риши, возмѣ́рится тебѣ̀. л. р҃ч ѡ҆б.

ѳ҃. На дрꙋ́га и҆ на врага̀ не повѣ́дай,[10] слы́шалъ ли ́є҆сѝ сло́во, да ѹ҆́мретъ съ тобо́ю, послѣ́дователнѣ, па́че же и҆ ѡ҆со́бнѡ тако́въ бꙋ́ди господи́нꙋ твоемꙋ̀. Тѣ́мже и҆ вся́кія та́йны ́є҆гѡ̀ храни́ти подоба́етъ ѡ҆па́снѡ, ́є҆́же и҆ Рафаи́лъ А҆рха́гг҃лъ ѹ҆твержда́я глаго́летъ:[11] та́йнꙋ бо цр҃е́вꙋ скры́ти бл҃го ́є҆́сть.

і҃. Вездѣ̀ ѹ҆клоня́йся ѿ клеве́тъ, и҆ словесе́мъ твои́мъ сотворѝ и҆́го и҆ [12] мѣ́рꙋ, ѹ҆стнѡ́мъ же твои́мъ сотворѝ две́рь, и҆ заво́рꙋ, внима́й ́є҆гда̀ ка́кѡ поползне́шися и҆́мъ, не пади́ся пря́мѡ ловя́щемꙋ. мно́зи бо сꙋ́ть лови́тели слове́съ твоих, тѣ́мже да ни ѡ҆ ко́ем ли бо, а҆ наипа́че ѡ҆ господи́нѣ и҆ дома́шнихъ ́є҆гѡ̀, и҆зрече́ши что̀ гни́ло. л. рч҃а и҆зря́днѣе да не ѡ҆бря́щется во ѹ҆стѣх твои́хъ сло́во небл҃года́рно, и҆лѝ поно́сно, кля́твенно же ни во ѹ҆́мъ пріе́мли. Въ со́вѣсти твое́й (гл҃етъ писа́ніе) не кленѝ цр҃я̀,[13] и҆ въ плѣ́ти ло́жницы твоея̀ не кленѝ бога́тагѡ, ꙗ҆́кѡ пти́цы донесꙋ́тъ гла́съ тво́й, и҆ и҆мѣ́яй крилѣ̀ возвѣсти́тъ сло́во твоѐ.

а҃і: Вся̀ твоя̀ совѣ́ты са́мъ зна́й, и҆ ѹ҆таева́й, а҆́ще возмо́жнѡ и҆ дѣла̀, ѿ совѣ́тника хранѝ дꙋ́шꙋ твою̀,[14] и҆ разꙋмѣва́й пе́рвѣе, что̀ ́є҆мꙋ̀ потре́бно ́є҆́сть, са́мъ бо себѣ̀ совѣщава́етъ. Є҆гда ка́кѡ возложи́тъ на тя̀ жре́бій, и҆ рече́тъ ти: до́брѣ тебѣ̀ пꙋ́ть ́є҆́сть, и҆ стане́тъ пря́мѡ ви́дѣти, что̀ бꙋ́детъ тебѣ̀. л. рч҃а ѡ҆б.

в҃і: Без̾ совѣ́та ничесо́же не творѝ[15] ꙗ҆́коже хра́мъ, стѣна́ми разоре́нными не ѡ҆гражде́нъ, та́кѡ мꙋ́жъ что̀ [16] творя́й без̾ совѣ́та, и҆ и҆̀мже нѣ́сть совѣ́та, падꙋ́тся а҆́ки ли́ствіе, спасе́ніе же ́є҆́сть во мно́зѣ совѣ́тѣ.

г҃і: Съ мꙋ́жемъ бл҃говѣ́рнымъ при́снѡ[17] бꙋ́ди, ́є҆го́же а҆́ще позна́еши соблюда́юща за́пѡвѣди. и҆ ́є҆гѡ́же дꙋша̀ а҆́ки твоя̀ дꙋша̀, и҆ а҆́ще согрѣши́ши, поболи́тъ съ тобо́ю.

д҃і: Не вѣ́рꙋй пꙋтѝ, въ не́мже[18] не преткне́шися, и҆ во вся́цѣмъ дѣ́лѣ не вѣ́рꙋй дꙋшѝ твое́й.

́є҃і: Ѡ҆ все́мъ се́мъ помоли́ся[19] вы́шнемꙋ, да ѹ҆пра́витъ во и҆́стиннꙋ пꙋ́ть тво́й.

л. рч҃в